৪. উপাদানপরিপৰত্তসুত্তৰণ্ণনা

৫৬. চতুন্নং পরিৰট্টনৰসেনাতি পচ্চেকক্খন্ধেসু চতুন্নং অরিযসচ্চানং পরিৰট্টনৰসেন. রূপং অব্ভঞ্ঞাসিন্তি সকলভূতুপাদারূপং কুচ্ছিতভাৰতো তত্থ চ তুচ্ছৰিপল্লাসতায ‘‘দুক্খসচ্চ’’ন্তি অভিৰিসিট্ঠেন ঞাণেন অঞ্ঞাসিং পটিৰিজ্ঝিং. আহারৰসেন রূপকাযস্স হানিৰুদ্ধাদীনং পাকটভাৰতো ৰিসেসপচ্চযতো চ তস্স ‘‘আহারসমুদযা’’তি ৰুত্তং. দুক্খসমুদযকথা নাম ৰট্টকথাতি ‘‘সচ্ছন্দরাগো’’তি ৰিসেসেত্ৰা ৰুত্তং. ছন্দরাগগ্গহণেন চ উপাদানকম্মাৰিজ্জাপি গহিতা এৰ. পটিপন্না হোন্তীতি অত্থো. ৰত্তমানকালপ্পযোগো হেস যথা ‘‘কুসলং চিত্তং উপ্পন্নং হোতী’’তি. পতিট্ঠহন্তীতি পতিট্ঠং লভন্তি. কেৰলিনোতি ইধ ৰিমুত্তিগুণেন পারিপূরীতি আহ ‘‘সকলিনো কতসব্বকিচ্চা’’তি. যেন তেতি যেন অৰসিট্ঠেন তে অসেক্খে পঞ্ঞাপেন্তা পঞ্ঞাপেয্যুং, তং নেসং ৰট্টং সেক্খানং ৰিয নত্থি পঞ্ঞাপনায. ৰট্টন্তি কারণং ৰট্টনট্ঠেন ফলস্স পৰত্তনট্ঠেন. অসেক্খভূমিৰারোতি অসেক্খভূমিপ্পৰত্তি.

উপাদানপরিপৰত্তসুত্তৰণ্ণনা নিট্ঠিতা.