৬. উপযৰগ্গো

১. উপযসুত্তৰণ্ণনা

৫৩. উপেতীতি উপযো. কথমুপেতি? তণ্হামানাদিৰসেনাতি আহ ‘‘তণ্হামানদিট্ঠিৰসেনা’’তি. কথমিদং লব্ভতীতি? ‘‘অৰিমুত্তো’’তি ৰচনতো. তণ্হাদিট্ঠিৰসেন হি বদ্ধো, কিং উপেতীতি আহ ‘‘পঞ্চক্খন্ধে’’তি তব্বিনিমুত্তস্স তথা উপেতস্স অভাৰতো. কো পনুপেতীতি? তংসমঙ্গীপুগ্গলো. তণ্হাদিট্ঠিৰসেন উপগমস্স ৰুত্তত্তা ৰিঞ্ঞাণন্তি অকুসলকম্মৰিঞ্ঞাণমেৰাতি ৰদন্তি. জৰাপেত্ৰাতি গহিতজৰং কত্ৰা. যথা পটিসন্ধিং আকড্ঢিতুং সমত্থং, এৰং কত্ৰা. তেনাহ ‘‘পটিসন্ধী’’তিআদি. অগ্গহণে কারণং ৰুত্তমেৰ ‘‘ওকং পহায অনিকেতসারী’’তি গাথায ৰিস্সজ্জনে. কম্মনিমিত্তাদিৰসেন পটিসন্ধিযা পচ্চযভূতং আরম্মণং পটিসন্ধিজনকস্স কম্মস্স ৰসেন ৰোচ্ছিজ্জতি. পতিট্ঠা ন হোতি সরাগকালে ৰিয অনুপট্ঠানতো. অপ্পতিট্ঠিতং ৰিঞ্ঞাণং ৰুত্তপ্পকারেন. অনভিসঙ্খরিত্ৰাতি অনুপ্পাদেত্ৰা পচ্চযঘাতেন.

উপযসুত্তৰণ্ণনা নিট্ঠিতা.

২. বীজসুত্তৰণ্ণনা

৫৪. বীজজাতানীতি জাত-সদ্দো পদপূরণমত্তন্তি আহ ‘‘বীজানী’’তি. ৰচন্তি সেতৰচং. অজ্জুকন্তি তচ্ছকং. ফণিজ্জকং তুলসি. অভিন্নানীতি একদেসেনপি অখণ্ডিতানি. বীজত্থাযাতি বীজকিচ্চায. ন উপকপ্পতীতি পচ্চযো ন হোতীতি দস্সেতি. ন পাপিতানীতি পূতিতং ন উপগতানি. তণ্ডুলসারস্স আদানতো সারাদানি. আরম্মণগ্গহণৰসেন ৰিঞ্ঞাণং তিট্ঠতি এত্থাতি ৰিঞ্ঞাণট্ঠিতিযো. আরম্মণৰসেনাতি আরম্মণভাৰৰসেন. সিনেহনট্ঠেনাতি তণ্হাযনৰসেন সিনিদ্ধতাপাদনেন, যতো ‘‘নন্দূপসেচন’’ন্তি ৰুত্তং. তথা হি ৰিরোপিতং তং কম্মৰিঞ্ঞাণং পটিসন্ধিঅঙ্কুরুপ্পাদনসমত্থং হোতি. সপ্পচ্চযন্তি অৰিজ্জাঅযোনিসোনমনসিকারাদিপচ্চযেহি সপ্পচ্চযং. ৰিরুহতি ৰিপাকসন্তানুপ্পাদনসমত্থো হুত্ৰা.

বীজসুত্তৰণ্ণনা নিট্ঠিতা.

৩. উদানসুত্তৰণ্ণনা

৫৫. উদানং উদাহরীতি অত্তমনৰাচং নিচ্ছারেসি. এস ৰুত্তপ্পকারো উদাহারো. ভুসো নিস্সযো উপনিস্সযো, দানমেৰ উপনিস্সযো দানূপনিস্সযো. এস নযো সেসেসুপি. তত্থ দানূপনিস্সযো অন্নাদিৰত্থূসু বলৰাতি বলৰভাৰেন হোতি, তস্মা উপনিস্সযবহুলো কামরাগপ্পহানেনেৰ কতপরিচযত্তা ৰিপস্সনমনুযুঞ্জন্তো ন চিরস্সেৰ অনাগামিফলং পাপুণাতি, তথা সুৰিসুদ্ধসীলূপনিস্সযো কামদোসজিগুচ্ছনেন. যদি এৰং কস্মা ইমে দ্ৰে উপনিস্সযা দুব্বলাতি ৰুত্তা? ৰিজ্জূপমঞ্ঞাণস্সেৰ পচ্চযভাৰতো. সোপি ভাৰনূপনিস্সযসহাযলাভেনেৰ, ন কেৰলং. ভাৰনা পন পটিৰেধস্স ৰিসেসহেতুভাৰতো বলৰা উপনিস্সযো. তথা হি সা ৰজিরূপমঞাণস্স ৰিসেসপচ্চযো. তেনাহ ‘‘ভাৰনূপনিস্সযো অরহত্তং পাপেতী’’তি.

সোতি মিলকত্থেরো. ৰিহারন্তি ৰসনট্ঠানং. ৰিহারপচ্চন্তে হি পণ্ণসালায থেরো ৰিহরতি. উপট্ঠাতি একলক্খণেন. কূটগোণো ৰিয গমনৰীথিং. তত্থাতি অল্লকট্ঠরাসিম্হি. উদকমণিকানন্তি উদকথেৰানং.

অত্তনিযেৰ উপনেসি উদানকথায ৰুত্তধম্মানং পরিপুণ্ণানং অত্তনি সংৰিজ্জমানত্তা. তেনাহ ‘‘উট্ঠানৰতা’’তিআদি. অযঞ্হি মিলকত্থেরো সিক্খায গারৰো সপ্পতিস্সো ৰত্তপটিৰত্তং পূরেন্তো ৰিসুদ্ধসীলো হুত্ৰা ঠিতো, তস্মা ‘‘দুব্বলূপনিস্সযে’’তি ৰুত্তং. তেনাহ ভগৰা উদানেন্তো ‘‘নো চস্সং…পে… সঞ্ঞোজনানী’’তি.

সচে অহং ন ভৰেয্যন্তি যদি অহং নাম কোচি ন ভৰেয্যং তাদিসস্স অহংসদ্দৰচনীযস্স কস্সচি অত্থস্স অভাৰতো. ততো এৰ মম পরিক্খারোপি ন ভৰেয্যতস্স চ পভঙ্গুভাৰেন অনৰট্ঠিতভাৰতো. এৰং অত্তুদ্দেসিকভাৰেন পদদ্ৰযস্স অত্থং ৰত্ৰা ইদানি কম্মফলৰসেন ৰত্তুং ‘‘সচে ৰা পনা’’তিআদি ৰুত্তং. অতীতপচ্চুপ্পন্নৰসেন সুঞ্ঞতং দস্সেত্ৰা ইদানি পচ্চুপ্পন্নানাগতৰসেন তং দস্সেন্তো ‘‘ইদানি পনা’’তিআদি ৰুত্তং. এৰং অধিমুচ্চন্তোতি এদিসং অধিমুত্তিং পৰত্তেন্তো. ৰিভৰিস্সতীতি ৰিনস্সিস্সতি. ৰিভৰো হি ৰিনাসো. তেনাহ ‘‘ভিজ্জিস্সতী’’তি. ৰিভৰদস্সনং ৰিভৰোতি উত্তরপদলোপেন ৰুত্তন্তি আহ ‘‘ৰিভৰদস্সনেনা’’তি. ৰিভৰদস্সনং নাম অচ্চন্তায ৰিনাসস্স দস্সনং. তন্তি অরিযমগ্গং. সামঞ্ঞজোতনা হেসা ৰিসেসনিট্ঠা হোতীতি ততিযমগ্গৰসেন অত্থো ৰেদিতব্বো.

উপরি মগ্গফলন্তি অগ্গমগ্গফলং. নত্থি এতিস্সা জাতিযা অন্তরন্তি অনন্তরা, অনন্তরা ৰিপস্সনা মগ্গস্স. গোত্রভূ পন অনুলোমৰীথিপরিযাপন্নত্তা ৰিপস্সনাগতিকং ৰা সিযা, নিব্বানারম্মণত্তা মগ্গগতিকং ৰাতি ন তেন মগ্গো অন্তরিকো নাম হোতি. তেনাহ ‘‘ৰিপস্সনা মগ্গস্স আসন্নানন্তরং নামা’’তি. ফলং পন নিব্বানারম্মণত্তা কিলেসানং পজহনৰসেন পৰত্তনতো লোকুত্তরভাৰতো চ কম্মমগ্গগতিকমেৰ, কুসলৰিপাকভাৰেন পন নেসং অত্থো পভেদোতি ৰিপস্সনায ফলস্স সিযা অনন্তরতাতি ৰুত্তং ‘‘ফলস্স দূরানন্তরং নামা’’তি. ‘‘আসৰানং খযো’’তি পন অগ্গমগ্গে ৰুচ্চমানে ৰিপস্সনানং আসন্নতায ৰত্তব্বমেৰ নত্থি. অতসিতাযেতি ন তসিতব্বে তাসং অনাপজ্জিতব্বে. তাসোতি তাসহেতু ‘‘তসতি এতস্মা’’তি কত্ৰা. সোতি অস্সুতৰা পুথুজ্জনো. তিলক্খণাহতন্তি অনিচ্চতাদিলক্খণত্তযলক্খিতং. মনম্হি নট্ঠোতি ঈসকং নট্ঠোম্হি, ততো পরম্পি তত্থেৰ ঠত্ৰা কিঞ্চি অপূরিতত্তা এৰ মুত্তোতি অধিপ্পাযো. ‘‘ন তাসো নাম হোতী’’তি ৰত্ৰা তস্স অতাসভাৰং দস্সেতুং ‘‘ন হী’’তিআদি ৰুত্তং. কল্যাণপুথুজ্জনো হি ভযতুপট্ঠানঞাণেন ‘‘সভযা সঙ্খারা’’তি ৰিপস্সন্তো ন উত্তসতি.

উদানসুত্তৰণ্ণনা নিট্ঠিতা.

৪. উপাদানপরিপৰত্তসুত্তৰণ্ণনা

৫৬. চতুন্নং পরিৰট্টনৰসেনাতি পচ্চেকক্খন্ধেসু চতুন্নং অরিযসচ্চানং পরিৰট্টনৰসেন. রূপং অব্ভঞ্ঞাসিন্তি সকলভূতুপাদারূপং কুচ্ছিতভাৰতো তত্থ চ তুচ্ছৰিপল্লাসতায ‘‘দুক্খসচ্চ’’ন্তি অভিৰিসিট্ঠেন ঞাণেন অঞ্ঞাসিং পটিৰিজ্ঝিং. আহারৰসেন রূপকাযস্স হানিৰুদ্ধাদীনং পাকটভাৰতো ৰিসেসপচ্চযতো চ তস্স ‘‘আহারসমুদযা’’তি ৰুত্তং. দুক্খসমুদযকথা নাম ৰট্টকথাতি ‘‘সচ্ছন্দরাগো’’তি ৰিসেসেত্ৰা ৰুত্তং. ছন্দরাগগ্গহণেন চ উপাদানকম্মাৰিজ্জাপি গহিতা এৰ. পটিপন্না হোন্তীতি অত্থো. ৰত্তমানকালপ্পযোগো হেস যথা ‘‘কুসলং চিত্তং উপ্পন্নং হোতী’’তি. পতিট্ঠহন্তীতি পতিট্ঠং লভন্তি. কেৰলিনোতি ইধ ৰিমুত্তিগুণেন পারিপূরীতি আহ ‘‘সকলিনো কতসব্বকিচ্চা’’তি. যেন তেতি যেন অৰসিট্ঠেন তে অসেক্খে পঞ্ঞাপেন্তা পঞ্ঞাপেয্যুং, তং নেসং ৰট্টং সেক্খানং ৰিয নত্থি পঞ্ঞাপনায. ৰট্টন্তি কারণং ৰট্টনট্ঠেন ফলস্স পৰত্তনট্ঠেন. অসেক্খভূমিৰারোতি অসেক্খভূমিপ্পৰত্তি.

উপাদানপরিপৰত্তসুত্তৰণ্ণনা নিট্ঠিতা.

৫. সত্তট্ঠানসুত্তৰণ্ণনা

৫৭. সত্তসু ওকাসেসূতি রূপপজাননাদীসু সত্তসু ওকাসেসু. ৰুসিতৰাসোতি ৰুসিতঅরিযৰাসো. এত্থাতি ইমস্মিং উদ্দেসে. সেসং নাম ইধ ৰুত্তাৰসেসং. ৰুত্তনযেনাতি হেট্ঠা ৰুত্তনযেন ৰেদিতব্বং. উস্সদনন্দিযন্তি উস্সন্নগুণৰতো তোসনং সম্মোদাপনং. গুণকিত্তনেন পলোভনীযং সেক্খকল্যাণপুথুজ্জনানং পসাদুপ্পাদনেন. ইদানি ৰুত্তমেৰ অত্থং পাকটং কাতুং ‘‘যথা হী’’তিআদি ৰুত্তং.

এত্তাৰতাতি পঞ্চন্নং খন্ধানং ৰসেন সত্তসু ঠানেসু কোসল্লদীপনেন এত্তকেন দেসনাক্কমেন. তন্তি আরম্মণং. ধাতুআদিমত্তমেৰাতি ধাতাযতনপটিচ্চসমুপ্পাদমত্তমেৰ. ইমেসু ধম্মেসূতি ইমেসু জাতাদীসু. কম্মং কত্ৰাতি সম্মসনকম্মং নিট্ঠপেত্ৰাতি অত্থো. এৰমেত্থ পঞ্চন্নং খন্ধানং ৰসেন সত্তট্ঠানকোসল্লপৰত্তিযা পভেদেন ৰিভজিত্ৰা ‘‘তিৰিধূপপরিক্খী’’তি দস্সেতি ধম্মরাজা.

সত্তট্ঠানসুত্তৰণ্ণনা নিট্ঠিতা.

৬. সম্মাসম্বুদ্ধসুত্তৰণ্ণনা

৫৮. অধিকং সৰিসেসং পযসতি পযুঞ্জতি এতেনাতি অধিপ্পযাসো, ৰিসিট্ঠপযোগো. তেনাহ ‘‘অধিকপযোগো’’তি. ইমঞ্হি মগ্গন্তি অট্ঠঙ্গিকং অরিযমগ্গমাহ. ইধাতি ইমস্মিং সুত্তে. অৰত্তমানট্ঠেনাতি বুদ্ধুপ্পাদতো পুব্বে ন ৰত্তমানভাৰেন. মগ্গং জানাতীতি সমুদাগমতো পট্ঠায সপুব্বভাগং সসম্ভারৰিসযং সফলং সউদ্রযং অরিযং মগ্গং জানাতি অৰবুজ্ঝতীতি মগ্গঞ্ঞূ. ৰিদিতন্তি অঞ্ঞেসম্পি ঞাতং পটিলদ্ধং হত্থতলে আমলকং ৰিয পাকটং অকাসি, তথা কত্ৰা দেসেসি. অমগ্গে পরিৰজ্জনেন মগ্গে পটিপত্তীতি তস্স মগ্গকুসলতা ৰিয অমগ্গকুসলতাপি ইচ্ছিতব্বাতি আহ ‘‘মগ্গে চ অমগ্গে চ কোৰিদো’’তি. অহং পঠমং গতোতি অহং পঠমমগ্গেন সমন্নাগতো.

সম্মাসম্বুদ্ধসুত্তৰণ্ণনা নিট্ঠিতা.

৭. অনত্তলক্খণসুত্তৰণ্ণনা

৫৯. পুরাণুপট্ঠাকেতি পুব্বে পধানপদহনকালে উপট্ঠাকভূতে. ‘‘অৰসৰত্তনট্ঠেন অস্সামিকট্ঠেন সুঞ্ঞতট্ঠেন অত্তপটিক্খেপট্ঠেনা’’তি এৰং পুব্বে ৰুত্তেহি. এত্তকেন ঠানেনাতি ‘‘রূপং, ভিক্খৰে, অনত্তা’’তি আরভিত্ৰা যাৰ ‘‘এৰং মে ৰিঞ্ঞাণং মা অহোসী’’তি এত্তকেন সুত্তপদেসেন. অকথিতস্সেৰ কথনং উত্তরং, ন কথিতস্সাতি ৰুত্তং ‘‘তানি দস্সেত্ৰা’’তি. সমোধানেত্ৰাতি সম্পিণ্ডিত্ৰা. ৰিত্থারকথাতি ৰিত্থারতো অট্ঠকথা. অনত্তলক্খণমেৰাতি তব্বহুলতায তপ্পধানতায চ ৰুত্তং. অনিচ্চতাদীনম্পি হি তত্থ তংদীপনত্থমেৰ ৰুত্তত্তা তদেৰ জেট্ঠং পধানং তথা ৰেনেয্যজ্ঝাসযতো.

অনত্তলক্খণসুত্তৰণ্ণনা নিট্ঠিতা.

৮. মহালিসুত্তৰণ্ণনা

৬০. একন্তদুক্খন্তিআদীনি পদানি ৰুত্তনযানেৰ, তস্মা তত্থ ৰুত্তনযেনেৰ অত্থো ৰেদিতব্বো. এত্থ চ যথা সরাগো হেতু পচ্চযো সংকিলেসায, এৰং সৰিপস্সনো মগ্গো হেতু পচ্চযো চ ৰিসুদ্ধিযাতি দট্ঠব্বং.

মহালিসুত্তৰণ্ণনা নিট্ঠিতা.

৯. আদিত্তসুত্তৰণ্ণনা

৬১. একাদসহীতি রাগাদীহি উপাযাসপরিযোসানেহি একাদসহি সন্তাপনট্ঠেন অগ্গীহি. দ্ৰীসূতি অট্ঠমনৰমেসু. দুক্খলক্খণমেৰাতি তব্বহুলতায তপ্পধানতায চ ৰুত্তং.

আদিত্তসুত্তৰণ্ণনা নিট্ঠিতা.

১০. নিরুত্তিপথসুত্তৰণ্ণনা

৬২. নিরুত্তিযোৰ নিরুত্তিপথাতি পথ-সদ্দেন পদৰড্ঢনমাহ যথা ‘‘বীজানিযেৰ বীজজাতানী’’তি. নিরুত্তিৰসেনাতি নিব্বচনৰসেন. পথা চ অত্থানুরূপভাৰতো. তীণিপীতি নিরুত্তিঅধিৰচনপঞ্ঞত্তিপথপদানি. তথা হি ‘‘ফুসতীতি ফস্সো’’তিআদিনা নীহরিত্ৰা ৰচনং নিরুত্তি, ‘‘সিরীৰড্ঢকো ধনৰড্ঢকো’’তিআদিনা ৰচনমত্তমেৰ অধিকারং কত্ৰা পৰত্তং অধিৰচনং, ‘‘তক্কো ৰিতক্কো’’তিআদিনা তংতংপকারেন ঞাপনতো পঞ্ঞত্তি. অথ ৰা তংতংঅত্থপ্পকাসনেন নিচ্ছিতং, নিযতং ৰা ৰচনং নিরুত্তি. অধি-সদ্দো উপরিভাগে, উপরি ৰচনং অধিৰচনং. কস্স উপরি? পকাসেতব্বস্স অত্থস্সাতি পাকটোযমত্থো. অধীনং ৰচনং অধিৰচনং. কেন অধীনং? অত্থেন. অত্থস্স পঞ্ঞাপনত্থেন পঞ্ঞত্তীতি এৰং নিরুত্তিআদিপদানং সব্বৰচনেসু পৰত্তি ৰেদিতব্বা. অঞ্ঞথা ‘‘ফুসতীতি ফস্সো’’তিআদিপ্পকারেন নিদ্ধারণৰচনানংযেৰ নিরুত্তিতা, সিরিৰড্ঢকধনৰড্ঢকপকারানমেৰ অভিলাপনং অধিৰচনতা. ‘‘তক্কো ৰিতক্কো’’তি এৰংপকারানমেৰ একমেৰ অত্থং তেন তেন পকারেন ঞাপেন্তানং ৰচনানং পঞ্ঞত্তিতা চ আপজ্জেয্য. অসংকিণ্ণাতি ন সংকিণ্ণা. তেনাহ ‘‘অৰিজহিতা…পে… অছড্ডিতা’’তি. ন সংকীযন্তীতি ন সংকিরীযন্তি, ন সংকীযিস্সন্তি ন সংকিরীযিস্সন্তীতি অত্থো. অপ্পটিকুট্ঠাতি ন পটিক্খিত্তা. যস্মা ভঙ্গং অতিক্কন্তং উপ্পাদাদি অতিক্কন্তমেৰ হোতি, তস্মা ৰুত্তং ‘‘ভঙ্গমেৰা’’তি. যস্মা দেসন্তরং সঙ্কন্তোপি অতিক্কন্তন্তি ৰুচ্চতি, তস্মা তদাভাৰং দস্সেতুং ‘‘দেসন্তরং অসঙ্কমিত্ৰা’’তি ৰুত্তং. যত্থ যত্থ হি সঙ্খারা উপ্পজ্জন্তি, তত্থ তত্থেৰ ভিজ্জন্তি নিরুজ্ঝন্তি ৰিপরিণমন্তি ৰিনাসং আপজ্জন্তি. তেনাহ ‘‘ৰিপরিণতন্তি…পে… নট্ঠ’’ন্তি. অপাকটীভূতং অজাতত্তা এৰ.

ৰসভণগোত্ততায ৰস্সভঞ্ঞা. মূলদিট্ঠিগতিকাতি মূলভূতা দিট্ঠিগতিকা, ইমস্মিং কপ্পে সব্বপঠমং তাদিসদিট্ঠিসমুপ্পাদকা. পুনপ্পুনং আৰজ্জেন্তস্সাতি অহেতুৰাদপটিসংযুত্তগন্থং উগ্গহেত্ৰা পরিযাপুণিত্ৰা তদত্থং ৰীমংসন্তস্স ‘‘নত্থি হেতু, নত্থি পচ্চযো সত্তানং সংকিলেসাযা’’তিআদিনযপ্পৰত্তায লদ্ধিযা আরম্মণে মিচ্ছাসতি সন্তিট্ঠতি, ‘‘নত্থি হেতূ’’তিআদিৰসেন অনুস্সৰূপলদ্ধে অত্থে তদাকারপরিৰিতক্কনেহি সৰিগ্গহে ৰিয সরূপতো চিত্তস্স পচ্চুপট্ঠিতে চিরকালপরিচযেন ‘‘এৰমেত’’ন্তি নিজ্ঝানক্খমভাৰূপগমনেন নিজ্ঝানক্খন্তিযা তথাগহিতে পুনপ্পুনং তথেৰ আসেৰন্তস্স বহুলীকরোন্তস্স মিচ্ছাৰিতক্কেন সমাদিযমানা মিচ্ছাৰাযামূপত্থম্ভিতা অতংসভাৰং ‘‘তংসভাৰ’’ন্তি গণ্হন্তী মিচ্ছাসতীতি লদ্ধনামা তংলদ্ধিসহগতা তণ্হা সন্তিট্ঠতি. যথাসকং ৰিতক্কাদিপচ্চযলাভেন তস্মিং আরম্মণে অধিট্ঠিততায অনেকগ্গতং পহায চিত্তং একগ্গতং অপ্পিতং ৰিয হোতি মিচ্ছাসমাধিনা. সোপি হি পচ্চযৰিসেসেহি লদ্ধভাৰনাবলো ঈদিসে ঠানে সমাধানপতিরূপকিচ্চকরো হোতিযেৰ ৰালৰিজ্ঝনাদীসু ৰিযাতি দট্ঠব্বং. তথা হি অনেকক্খত্তুং তেনাকারেন পুব্বভাগিযেসু জৰনৰারেসু পৰত্তেসু সব্বপচ্ছিমে জৰনৰারে সত্ত জৰনানি জৰন্তি. তত্থ পঠমে সতেকিচ্ছো হোতি, তথা দুতিযাদীসু. সত্তমে পন জৰনে সম্পত্তে অতেকিচ্ছো হোতি. তেনাহ ‘‘অস্সাদেন্তস্সা’’তিআদি. ইমেসুপীতি দ্ৰীসুপি ঠানেসু.

পচ্চুপ্পন্নং ৰাতি এত্থ ইতি-সদ্দো আদিঅত্থো. তেন ‘‘যদেতং অনাগতং নাম, নযিদং অনাগত’’ন্তিআদিকং সঙ্গণ্হাতি. তেপীতি তে ৰস্সভঞ্ঞাপি ন মঞ্ঞিংসু লোকসমঞ্ঞায অনতিক্কমনীযতো. তেনাহ ‘‘অতীতং পনা’’তিআদি. খন্ধানং উপরি নিরুল়্হা পণ্ণত্তি.

নিরুত্তিপথসুত্তৰণ্ণনা নিট্ঠিতা.

উপযৰগ্গৰণ্ণনা নিট্ঠিতা.