৬. লাভসক্কারসংযুত্তং

১. পঠমৰগ্গো

১. দারুণসুত্তৰণ্ণনা

১৫৭. থদ্ধোতি কক্খল়ো অনিট্ঠস্স পদানতো. চতুপচ্চযলাভোতি চতুন্নং পচ্চযানং পটিলাভো. সক্কারোতি তেহিযেৰ পচ্চযেহি সুসঙ্খতেহি পূজনা, সো পন অত্থতো সম্পত্তিযেৰাতি আহ ‘‘তেসংযেৰ…পে… লাভো’’তি. ৰণ্ণঘোসোতি গুণকিত্তনা. অন্তরাযস্স অনতিৰত্তনতো অন্তরাযিকো অনত্থাৰহত্তা.

দারুণসুত্তৰণ্ণনা নিট্ঠিতা.

২. বল়িসসুত্তৰণ্ণনা

১৫৮. বল়িসেন চরতি, তেন ৰা জীৰতীতি বাল়িসিকো. তেনাহ ‘‘বল়িসং গহেত্ৰা চরমানো’’তি. আমিসগতন্তি আমিসূপগতং আমিসপতিতং. তেনাহ ‘‘আমিসমক্খিত’’ন্তি. ভিন্নাধিকরণানম্পি বাহিরত্থসমাসো হোতেৰাতি আহ ‘‘আমিসে চক্খুদস্সন’’ন্তি. অযো ৰুচ্চতি সুখং, তব্বিধুরতায অনযো, দুক্খন্তি আহ ‘‘দুক্খং পত্তো’’তি. অস্সাতি এতেন. কত্তুঅত্থে হি এতং সামিৰচনং. যথা কিলেসা ৰত্তন্তি, এৰং পৰত্তমানো পুগ্গলো কিলেসৰিপ্পযোগো ন হোতীতি ৰুত্তং ‘‘যথা কিলেসমারস্স কামো, এৰং কত্তব্বো’’তি.

বল়িসসুত্তৰণ্ণনা নিট্ঠিতা.

৩-৪. কুম্মসুত্তাদিৰণ্ণনা

১৫৯-১৬০. অট্ঠিকচ্ছপা ৰুচ্চন্তি যেসং কপালমত্থকে তিখিণা অট্ঠিকোটি হোতি, তেসং সমূহো অট্ঠিকচ্ছপকুলং. মচ্ছকচ্ছপাদীনং সরীরে লম্বন্তী পপততীতি পপতা, ৰুচ্চমানাকারো অযকণ্টকো. অযকোসকেতি অযোমযকোসকে. কণ্ণিকসল্লসণ্ঠানোতি অত্তনিকাপনসল্লসণ্ঠানো. অযকণ্টকোতি অযোমযৰঙ্ককণ্টকো. নিক্খমতি এত্থ অথাৰরতো. পৰেসিতমত্তো হি সো. ইদানি ত্ৰং ‘‘অম্হাক’’ন্তি ন ৰত্তব্বো. ইতো অনন্তরসুত্তেতি চতুত্থসুত্তমাহ.

কুম্মসুত্তাদিৰণ্ণনা নিট্ঠিতা.

৫. মীল়্হকসুত্তৰণ্ণনা

১৬১. মীল়্হকাতি এৰং ইত্থিলিঙ্গৰসেন ৰুচ্চমানা. গূথপাণকাতি গূথভক্খপাণকা. অন্তোতি কুচ্ছিযং.

মীল়্হকসুত্তৰণ্ণনা নিট্ঠিতা.

৬. অসনিসুত্তৰণ্ণনা

১৬২. ‘‘ইমে লাভসক্কারং অনাহরন্তা জিঘচ্ছাদিদুক্খং পাপুণন্তূ’’তি এৰং ন সত্তানং দুক্খকামতায এৰমাহাতি আনেত্ৰা সম্বন্ধো. অনন্তদুক্খং অনুভোতি অপরাপরং উপ্পজ্জনকঅকুসলচিত্তানং বহুভাৰতো.

অসনিসুত্তৰণ্ণনা নিট্ঠিতা.

৭. দিদ্ধসুত্তৰণ্ণনা

১৬৩. অচ্ছৰিসযুত্তাতি ৰা দিদ্ধে গতেন গতদিদ্ধেন. তেনাহ ‘‘ৰিসমক্খিতেনা’’তি.

দিদ্ধসুত্তৰণ্ণনা নিট্ঠিতা.

৮. সিঙ্গালসুত্তৰণ্ণনা

১৬৪. জরসিঙ্গালোত্ৰেৰ ৰুচ্চতি সরীরসোভায অভাৰতো. সরীরস্স উগ্গতকণ্টকত্তা উক্কণ্টকেন নাম. ফুটতীতি ফলতি ভিজ্জতি.

সিঙ্গালসুত্তৰণ্ণনা নিট্ঠিতা.

৯. ৰেরম্ভসুত্তৰণ্ণনা

১৬৫. কাযং ন রক্খতি নাম ছব্বীসতিযা সারুপ্পানং পরিচ্চজনতো. ৰাচং ন রক্খতি নাম রাগসামন্তা চ কোধসামন্তা চ যাৰ নিচ্ছারণতো.

ৰেরম্ভসুত্তৰণ্ণনা নিট্ঠিতা.

১০. সগাথকসুত্তৰণ্ণনা

১৬৬. ‘‘যস্স সক্করিযমানস্সা’’তি এত্থ অসক্কারেন চূভযন্তি অসক্কারেন চ উভযঞ্চ, কদাচি সক্কারেন, কদাচি অসক্কারেন কদাচি উভযেনাতি অত্থো. তেনাহ ‘‘অসক্কারেনা’’তিআদি. সততৰিহারানং সম্পত্তিযা সাততিকোতি আহ ‘‘অরহত্ত…পে… সুখুমদিট্ঠী’’তিআদি. তথা হি সা ‘‘ৰজিরূপমঞাণ’’ন্তি ৰুচ্চতি. আগতত্তাতি ফলসমাপত্তিং সমাপজ্জিতুং তস্সা পুব্বপরিকম্মং উপগতত্তা.

সগাথকসুত্তৰণ্ণনা নিট্ঠিতা.

পঠমৰগ্গৰণ্ণনা নিট্ঠিতা.

২. দুতিযৰগ্গো

১-২. সুৰণ্ণপাতিসুত্তাদিৰণ্ণনা

১৬৭-১৬৮. চালেতুং ন সক্কোতি সীলপব্বতসন্নিস্সিতত্তা. অঞ্ঞং ৰা কিচ্চং করোতি পগেৰ সীলস্স ছড্ডিতত্তা. ততিযাদীসু অপুব্বং নত্থি.

সুৰণ্ণপাতিসুত্তাদিৰণ্ণনা নিট্ঠিতা.

দুতিযৰগ্গৰণ্ণনা নিট্ঠিতা.

৩. ততিযৰগ্গো

১. মাতুগামসুত্তৰণ্ণনা

১৭০. যং ৰিসভাগৰত্থু পুরিসস্স চিত্তং পরিযাদায ঠাতুং সক্কোতীতি ৰুচ্চতি, ততো ৰিসেসতো লাভসক্কারোৰ সত্তানং চিত্তং পরিযাদায ঠাতুং সক্কোতীতি দস্সেন্তো ভগৰা ‘‘ন তস্স, ভিক্খৰে’’তিআদিমৰোচাতি দস্সেন্তো ‘‘ন তস্সা’’তিআদিমাহ.

মাতুগামসুত্তৰণ্ণনা নিট্ঠিতা.

২. কল্যাণীসুত্তৰণ্ণনা

১৭১. দুতিযং উত্তানমেৰ, তস্সেৰ অত্থস্স কেৰলং জনপদকল্যাণীৰসেন ৰুত্তং.

কল্যাণীসুত্তৰণ্ণনা নিট্ঠিতা.

৩-৬. একপুত্তকসুত্তাদিৰণ্ণনা

১৭২-১৭৫. সদ্ধাতি অরিযমগ্গেন আগতসদ্ধা অধিপ্পেতাতি আহ ‘‘সোতাপন্না’’তি.

একপুত্তকসুত্তাদিৰণ্ণনা নিট্ঠিতা.

৭. ততিযসমণব্রাহ্মণসুত্তৰণ্ণনা

১৭৬. এৰমাদীতি আদি-সদ্দেন বাহুসচ্চসংৰরসীলাদীনং সঙ্গহো দট্ঠব্বো. লাভসক্কারস্স সমুদযং উপ্পত্তিকারণং সমুদযসচ্চৰসেন দুক্খসচ্চস্স উপ্পত্তিহেতুতাৰসেন.

ততিযসমণব্রাহ্মণসুত্তৰণ্ণনা নিট্ঠিতা.

৮. ছৰিসুত্তৰণ্ণনা

১৭৭. লাভসক্কারসিলোকো নরকাদীসু নিব্বত্তেন্তোতি ইদং তন্নিস্সযং কিলেসগণং সন্ধাযাহ. নিব্বত্তেন্তোতি নিব্বত্তাপেন্তো. ইমং মনুস্সঅত্তভাৰং নাসেতি মনুস্সত্তং পুন নিব্বত্তিতুং অপ্পদানৰসেন. তস্মাতি দুগ্গতিনিব্বত্তাপনতো ইধ মরণদুক্খাৰহনতো চ.

ছৰিসুত্তৰণ্ণনা নিট্ঠিতা.

৯. রজ্জুসুত্তৰণ্ণনা

১৭৮. খরা ফরুসা ছৰিআদীনি ছিন্দনে সমত্থা.

রজ্জুসুত্তৰণ্ণনা নিট্ঠিতা.

১০. ভিক্খুসুত্তৰণ্ণনা

১৭৯. তং সন্ধাযাতি দিট্ঠধম্মসুখৰিহারস্স ওকাসাভাৰং সন্ধায.

ভিক্খুসুত্তৰণ্ণনা নিট্ঠিতা.

ততিযৰগ্গৰণ্ণনা নিট্ঠিতা.

৪. চতুত্থৰগ্গো

১-৪. ভিন্দিসুত্তাদিৰণ্ণনা

১৮০-১৮৩. দেৰদত্তো সগ্গে ৰা নিব্বত্তেয্যাতিআদি পরিকপ্পৰচনং. ন হি পচ্চেকবোধিযং নিযতগতিকো অন্তরা মগ্গফলানি অধিগন্তুং ভব্বোতি. সোতি অনৰজ্জধম্মো. অস্সাতি দেৰদত্তস্স. সমুচ্ছেদমগমা কতূপচিতস্স মহতো পাপধম্মস্স বলেন তস্মিং অত্তভাৰে সমুচ্ছেদভাৰতো, ন অচ্চন্তায. অকুসলং নামেতং অবলং, কুসলং ৰিয ন মহাবলং, তস্মা তস্মিংযেৰ অত্তভাৰে তাদিসানং পুগ্গলানং অতেকিচ্ছতা, অঞ্ঞথা সম্মত্তনিযামো ৰিয মিচ্ছত্তনিযামো অচ্চন্তিকো সিযা. যদি এৰং ৰট্টখাণুকজোতনা কথন্তি? আসেৰনাৰসেন, তস্মা যথা ‘‘সকিং নিমুগ্গো নিমুগ্গো এৰ বালো’’তি ৰুত্তং, এৰং ৰট্টখাণুকজোতনা. যাদিসে হি পচ্চযে পটিচ্চ পুগ্গলো তং দস্সনং গণ্হি, তথা চ পটিপন্নো, পুন অচিন্তপ্পতিৰত্তে পচ্চযে পতিততো সীসুক্খিপনমস্স ন হোতীতি ন ৰত্তব্বং.

ভিন্দিসুত্তাদিৰণ্ণনা নিট্ঠিতা.

৫. অচিরপক্কন্তসুত্তৰণ্ণনা

১৮৪. কালে সম্পত্তেতি গব্ভস্স পরিপাকগতত্তা ৰিজাযনকালে সম্পত্তে. পোতন্তি অস্সতরিযা পুত্তং. এতন্তি ‘‘গব্ভো অস্সতরিং যথা’’তি এতং ৰচনং.

অচিরপক্কন্তসুত্তৰণ্ণনা নিট্ঠিতা.

৬. পঞ্চরথসতসুত্তৰণ্ণনা

১৮৫. অভিহরীযতীতি অভিহারো, ভত্তংযেৰ অভিহারো ভত্তাভিহারোতি আহ ‘‘অভিহরিতব্বং ভত্ত’’ন্তি. মচ্ছপিত্তন্তি ৰাল়মচ্ছপিত্তং. পক্খিপেয্যুন্তি উরগাদিনা ওসিঞ্চেয্যুং.

পঞ্চরথসতসুত্তৰণ্ণনা নিট্ঠিতা.

৭-১৩. মাতুসুত্তাদিৰণ্ণনা

১৮৬-১৮৭. মাতুপি হেতূতি অত্তনো মাতুযা উপ্পন্নঅনত্থাৰহস্স পহানহেতুপি. ইতো পরেসূতি ‘‘পিতুপি হেতূ’’তি এৰমাদীসু.

মাতুসুত্তাদিৰণ্ণনা নিট্ঠিতা.

সারত্থপ্পকাসিনিযা সংযুত্তনিকায-অট্ঠকথায

লাভসক্কারসংযুত্তৰণ্ণনায লীনত্থপ্পকাসনা সমত্তা.