৩. অস্সুসুত্তৰণ্ণনা

১২৬. কন্দনং সসদ্দং, রোদনং পন কেৰলমেৰাতি আহ ‘‘কন্দন্তানন্তি সসদ্দং রুদমানান’’ন্তি. পৰত্তন্তি সন্দনৰসেন পৰত্তং. ‘‘সিনেরুরস্মীহি পরিচ্ছিন্নেসূ’’তি সঙ্খেপেন ৰুত্তমত্থং ৰিৰরন্তো ‘‘সিনেরুস্সা’’তিআদিমাহ. মণিমযন্তি ইন্দনীলমণিমযং. সিনেরুস্স পুব্বদক্খিণকোণসমপদেসা ‘‘পুব্বদক্খিণপস্সা’’তি অধিপ্পেতা. তেহি নিক্খন্তরজতরস্মিযো ইন্দনীলরস্মিযো চ একতো হুত্ৰা. তাসং রস্মীনং অন্তরেসূতি তাসং চতূহি কোণেহি নিক্খন্তরস্মীনং চতূসু অন্তরেসু. চত্তারোতি দক্খিণাদিভেদা চত্তারো মহাসমুদ্দা হোন্তি. ৰিঅসনন্তি ৰিসেসেন খেপনং. কিং পন তন্তি আহ ‘‘ৰিনাসোতি অত্থো’’তি.

অস্সুসুত্তৰণ্ণনা নিট্ঠিতা.