১. তিণকট্ঠসুত্তৰণ্ণনা

১২৪. উপসগ্গো সমাসৰিসযে সসাধনং কিরিযং দস্সেতীতি ৰুত্তং ‘‘ঞাণেন অনুগন্ত্ৰাপী’’তি. ৰস্সসতং ৰস্সসহস্সন্তি নিদস্সনমত্তমেতং, ততো ভিয্যোপি অনুগন্ত্ৰা অনমতগ্গো এৰ সংসারো. অগ্গ-সদ্দো ইধ মরিযাদৰচনো, অনুদ্দেসিকঞ্চেতং ৰচনন্তি আহ ‘‘অপরিচ্ছিন্নপুব্বাপরকোটিকো’’তি. অঞ্ঞথা অন্তিমভৰিকপরিচ্ছিন্নকতৰিমুত্তিপরিপাচনীযধম্মাদীনং ৰসেন অপরিচ্ছিন্নপুব্বাপরকোটি ন সক্কা ৰত্তুং. সংসরণং সংসারো. পচ্ছিমাপি ন পঞ্ঞাযতি অন্ধবালানং ৰসেনাতি অধিপ্পাযো. তেনাহ ভগৰা ‘‘দীঘো বালান সংসারো’’তি (ধ. প. ৬০). ৰেমজ্ঝেযেৰ পন সত্তা সংসরন্তি পুব্বাপরকোটীনং অলব্ভনীযত্তা. অত্থো পরিত্তো হোতি যথাভূতাৰবোধাভাৰতো. বুদ্ধসমযেতি সাসনেতি অত্থো. অত্থো মহা যথাভূতাৰবোধিসম্ভৰতো, অত্থস্স ৰিপুলতায তংসদিসা উপমা নত্থীতি পরিত্তংযেৰ উপমং আহরন্তীতি অধিপ্পাযো. ইদানি ৰুত্তমেৰত্থং ‘‘পাল়িযং হী’’তিআদিনা সমত্থেতি. মাতু মাতরোতি মাতু মাতামহিযো. তস্সেৰাতি দুক্খস্সেৰ. তিব্বন্তি দুক্খপরিযাযোতি.

তিণকট্ঠসুত্তৰণ্ণনা নিট্ঠিতা.