২. অভিসমযসংযুত্তং

১. নখসিখাসুত্তৰণ্ণনা

৭৪. সুখুমাতি তরুণা পরিত্তা কেসগ্গমত্তভাৰতো. যথা কেসা দীঘসো দ্ৰঙ্গুলমত্তায সব্বস্মিং কালে এতপ্পমাণাৰ, ন তচ্ছিন্দনং, এৰং নখগ্গাপি কেসগ্গমত্তাৰ, ন তেসং ছিন্দনং অৰড্ঢনতো. পরতোতি ‘‘সহস্সিমং সতসহস্সিম’’ন্তি ৰুত্তট্ঠানে. অভিসমেত্ৰাতি পটিৰিজ্ঝিত্ৰা, তস্মা অভিসমেতাৰিনো পটিৰিদ্ধসচ্চস্সাতি অত্থো. কামং পুরিমপদং দুক্খক্খন্ধস্স অতীতভাৰং উপাদাযপি ৰত্তুং যুত্তং. পুরেতরংযেৰ পন ৰুত্তভাৰং উপাদায ৰুত্তন্তি দস্সেতুং ‘‘পুরিমং দুক্খক্খন্ধ’’ন্তিআদি ৰুত্তং. পুরিমং নাম পচ্ছিমং অপেক্খিত্ৰা. পুরিমপচ্ছিমতা হি তং তং উপাদায ৰুচ্চতীতি ইধাধিপ্পেতং পুরিমং নীহরিত্ৰা দস্সেতুং ‘‘কতমং পনা’’তিআদি ৰুত্তং. ‘‘অতীতম্পি পরিক্খীণ’’ন্তি ইধাধিপ্পেতং পরিক্খীণমেৰ ৰিভাৰেতুং ‘‘কতমং পন পরিক্খীণ’’ন্তিআদি ৰুত্তং. সোতাপন্নস্স দুক্খক্খযো ইধ চোদিতোতি তং দস্সেতুং ‘‘পঠমমগ্গস্স অভাৰিতত্তা উপ্পজ্জেয্যা’’তি ৰত্ৰা ইদানি তং সরূপতো দস্সেতুং পুন ‘‘কতম’’ন্তিআদি ৰুত্তং. সত্তসু অত্তভাৰেসু যং অপাযে উপ্পজ্জেয্য অট্ঠমং পটিসন্ধিং আদিং কত্ৰা যত্থ কত্থচি অপাযেসু চাতি যং দুক্খং উপ্পজ্জেয্য, তং সব্বং পরিক্খীণন্তি দট্ঠব্বং. অস্সাতি সোতাপন্নস্স, যং পরিমাণং, ততো উদ্ধঞ্চ উপপাতং অত্থীতি অধিপ্পাযো. মহা অত্থো গুণো মহত্থো, সো এতস্স অত্থীতি মহত্থিযো ক-কারস্স য-কারং কত্ৰা. তেনাহ ‘‘মহতো অত্থস্স নিপ্ফাদকো’’তি.

নখসিখাসুত্তৰণ্ণনা নিট্ঠিতা.

২. পোক্খরণীসুত্তৰণ্ণনা

৭৫. উব্বেধেনাতি অৰৰেধেন অধোদিসতায. তেনাহ ‘‘গম্ভীরতাযা’’তি.

পোক্খরণীসুত্তৰণ্ণনা নিট্ঠিতা.

৩. সংভেজ্জউদকসুত্তাদিৰণ্ণনা

৭৬-৭৭. সম্ভিজ্জট্ঠানেতি সম্ভিজ্জসমোধানগতট্ঠানে. সমেন্তি সমেতা হোন্তি. তেনাহ ‘‘সমাগচ্ছন্তী’’তি. পাল়িযং ৰিভত্তিলোপেন নিদ্দেসোতি তমত্থং দস্সেন্তো ‘‘তীণি ৰা’’তি আহ. সম্ভিজ্জতি মিস্সীভাৰং গচ্ছতি এত্থাতি সম্ভেজ্জং, মিস্সিতট্ঠানং. তত্থ উদকং সম্ভেজ্জউদকং. তেনাহ ‘‘সম্ভিন্নট্ঠানে উদক’’ন্তি.

সংভেজ্জউদকসুত্তাদিৰণ্ণনা নিট্ঠিতা.

৪. পথৰীসুত্তাদিৰণ্ণনা

৭৮-৮৪. চক্কৰাল়ব্ভন্তরাযাতি চক্কৰাল়পব্বতস্স অন্তোগধায.

ছট্ঠাদীসু ৰুত্তনযেনেৰাতি ইধ ছট্ঠসুত্তাদীসু পঠমসুত্তাদীসু ৰুত্তনযেনেৰাতি অত্থো ৰেদিতব্বো ৰিসেসাভাৰতো.

পরিযোসানেতি ইমস্স অভিসমযসংযুত্তস্স ওসানট্ঠানে. অঞ্ঞতিত্থিযসমণব্রাহ্মণপরিব্বাজকানন্তি অঞ্ঞতিত্থিযানং. গুণাধিগমোতি ঝানাভিঞ্ঞাসহিতো গুণাধিগমো. সতভাগম্পি…পে… ন উপগচ্ছতি সচ্চপটিৰেধস্স মহানুভাৰত্তা. তেনাহ ভগৰা পচ্চক্খসব্বধম্মো ‘‘এৰং মহাধিগমো, ভিক্খৰে, দিট্ঠিসম্পন্নো পুগ্গলো এৰং মহাভিঞ্ঞো’’তি.

পথৰীসুত্তাদিৰণ্ণনা নিট্ঠিতা.

সারত্থপ্পকাসিনিযা সংযুত্তনিকায-অট্ঠকথায

অভিসমযসংযুত্তৰণ্ণনায লীনত্থপ্পকাসনা সমত্তা.