৬. দুক্খৰগ্গো

১. পরিৰীমংসনসুত্তৰণ্ণনা

৫১. উপপরিক্খমানোতি পৰত্তিপৰত্তিহেতুং, নিৰত্তিনিৰত্তিহেতুঞ্চ পরিতুলেন্তো. কুতো পনেতন্তি? ‘‘সম্মা দুক্খক্খযা’’তি ৰচনতো. ন হি সব্বদুক্খপরিৰীমংসং ৰিনা সম্মা দুক্খক্খযো সম্ভৰতি. কস্মাতিআদিনা জরামরণস্সেৰ গহণে কারণং পুচ্ছতি. জাতিআদীনম্পি পৰত্তি দুক্খভাৰিনীতি অধিপ্পাযো. যস্মা জরামরণে গহিতে সতি জাতিপি গহিতা হোতি, তস্সা অভাৰে জরামরণস্সেৰ অভাৰতো. এস নযো ভৰাদীসুপি. এৰং যাৰ জাতিধম্মো জরামরণে গহিতে গহিতোৰ হোতি, জরামরণপদেসেন তব্বিকারৰন্তো সব্বে তেভূমকা সঙ্খারা গহিতাতি এৰম্পি জরামরণগ্গহণেন সব্বম্পি ৰট্টদুক্খং গহিতমেৰ হোতি. তেনাহ ‘‘তস্মিং গহিতে সব্বদুক্খস্স গহিতত্তা’’তি. অনেকৰিধন্তি বহুৰিধং বহুকোট্ঠাসং. ‘‘অনেক’’ন্তি ৰা পাঠো. অনেকন্তি বহুলৰচনং. ৰিধন্তি খণ্ডিচ্চপালিচ্চাদিৰসেন ৰিপরীতকোট্ঠাসং. নানপ্পকারকন্তি ততো এৰ নানপ্পকারং. ন্হত্ৰা ঠিতং পুরিসং ৰিযাতি বালানং অত্তভাৰস্স সুভাকারেন উপট্ঠানং সন্ধাযাহ.

‘‘সারুপ্পভাৰেনা’’তি ৰুত্তং, কিং সব্বথা সারুপ্পভাৰেনাতি আহ ‘‘নিক্কিলেসতায পরিসুদ্ধতাযা’’তি. ন হি তস্সেসা অসঙ্খততাদিভাৰেন সদিসা. পটিপন্নোতি পটিমুখো অভিসঙ্খারমুখো হুত্ৰা পন্নো অধিগতো. অনুগতন্তি অনুচ্ছৰিকভাৰেন গতং, যথা চ নিব্বানস্স অধিগমো হোতি, এৰং তদনুরূপভাৰেন গতং. এত্থ চ পাল়িযং ‘‘পজানাতী’’তি পুব্বভাগৰসেন পজাননা ৰুত্তা, ‘‘তথা পটিপন্নো চ হোতী’’তি নিযতৰসেন. ‘‘অপরভাগৰসেনা’’তি অপরে. কেচি পন ‘‘যথা পটিপন্নস্স জরামরণং নিরুজ্ঝতি, তথা পটিপন্নো’’তি ৰদন্তি. পদৰীমংসনা পুব্বভাগৰসেন ৰেদিতব্বা, ন মগ্গক্খণৰসেন. সঙ্খারনিরোধাযাতি এত্থ নযিদং অৰিজ্জাপচ্চযসঙ্খারগ্গহণং, অথ খো সঙ্খতসঙ্খারগ্গহণন্তি আহ ‘‘সঙ্খারদুক্খস্স নিরোধত্থাযা’’তি. তেনাহ ‘‘এত্তাৰতা যাৰ অরহত্তা দেসনা কথিতা’’তি.

‘‘পচ্চত্তংযেৰ পরিনিব্বাযতী’’তিআদিনা অরহত্তফলপচ্চৰেক্খণং, ‘‘সো সুখঞ্চ ৰেদনং ৰেদযতী’’তিআদিনা সততৰিহারঞ্চ দস্সেত্ৰা দেসনা সব্বথাৰ ৰট্টদেসনাতো নিৰত্তেতব্বা সিযা. অৰিজ্জাগতোতি এত্থ ইতি-সদ্দো আদিঅত্থো, তেন এৰমাদিকং ইদং ৰট্টৰিৰট্টকথনং পুন গণ্হাতি. পুগ্গলসদ্দো ইতরাসং দ্ৰিন্নং পকতীনং ৰাচকোতি ততো ৰিসেসেত্ৰা গহণে পঠমপকতিমেৰ দস্সেন্তো ‘‘পুরিসপুগ্গলো’’তি অৰোচাতি আহ ‘‘পুরিসোযেৰ পুগ্গলো’’তি. উভযেনাতি পুরিসপুগ্গলগ্গহণেন. সম্মুতিযা অৰিজ্জমানায কথা দেসনা সম্মুতিকথা. পরমত্থস্স কথা দেসনা পরমত্থকথা. তত্থাতি সম্মুতিপরমত্থকথাসু, ন সম্মুতিপরমত্থেসু. তেনাহ ‘‘এৰং পৰত্তা সম্মুতিকথা নামা’’তিআদি. তত্রিদং সম্মুতিপরমত্থানং লক্খণং – যস্মিং ভিন্নে বুদ্ধিযা ৰা অৰযৰৰিনিব্ভোগে কতে ন তংসমঞ্ঞা, সা ঘটপটাদিপ্পভেদা সম্মুতি, তব্বিপরিযাযতো পরমত্থো. ন হি কক্খল়ফুসনাদিসভাৰে অযং নযো লব্ভতি. তত্থ রূপাদিধম্মং সমূহসন্তানৰসেন পৰত্তমানং উপাদায ‘‘সত্তো’’তিআদি ৰোহারোতি আহ ‘‘সত্তো নরো…পে… সম্মুতিকথা নামা’’তি. যস্মা রূপাদযো পরমত্থধম্মা ‘‘খন্ধা ধাতুযো’’তিআদিনা ৰুচ্চন্তি, ন ৰোহারমত্তং, তস্মা ‘‘খন্ধা…পে… পরমত্থকথা নামা’’তি ৰুত্তং. ননু খন্ধকথাপি সম্মুতিকথাৰ, সম্মুতি হি সঙ্কেতো খন্ধট্ঠো রাসট্ঠো ৰা কোট্ঠাসট্ঠো ৰাতি? সচ্চমেতং, অযং পন খন্ধসমঞ্ঞা ফস্সাদীসু তজ্জাপঞ্ঞত্তি ৰিয পরমত্থসন্নিস্সযা তস্স আসন্নতরা পুগ্গলসমঞ্ঞাদযো ৰিয ন দূরেতি পরমত্থসঙ্গহতা ৰুত্তা. খন্ধসীসেন ৰা তদুপাদানা সভাৰধম্মা এৰ গহিতা. ননু চ সব্বেপি সভাৰধম্মা সম্মুতিমুখেনেৰ দেসনং আরোহন্তি, ন সম্মুখেনাতি সব্বাপি দেসনা সম্মুতিদেসনাৰ সিযাতি? নযিদমেৰং দেসেতব্বধম্মৰিভাগেন দেসনাৰিভাগস্স অধিপ্পেতত্তা, ন চ সদ্দো কেনচি পৰত্তিনিমিত্তেন ৰিনা অত্থং পকাসেতীতি. তেনাহ ‘‘পরমত্থং কথেন্তাপি সম্মুতিং অমুঞ্চিত্ৰাৰ কথেন্তী’’তি. সচ্চমেৰ অৰিপরীতমেৰ কথেন্তি.

সম্মুতীতি সমঞ্ঞা. পরমো উত্তমো অত্থোতি পরমত্থো, ধম্মানং যথাভূতসভাৰো. তং পরমত্থং, সম্মুতি পন লোকস্স সঙ্কেতমত্তসিদ্ধা. যদি এৰং কথং সম্মুতিকথায সচ্চতাতি আহ ‘‘লোকসম্মুতিকারণ’’ন্তি লোকসমঞ্ঞং নিস্সায পৰত্তনতো. লোকসমঞ্ঞায হি অভিনিৰেসনং ৰিনা পঞ্ঞাপনা একচ্চস্স সুতস্স সাৰনা ৰিয, ন মুসা অনতিক্কমিতব্বতো তস্সা. তেনাহ ভগৰা ‘‘জনপদনিরুত্তিং নাভিনিৰেসেয্য, সমঞ্ঞং নাতিধাৰেয্যা’’তি. ধম্মানং সভাৰধম্মানং. ভূতলক্খণং ভাৰস্স লক্খণং দীপেন্তীতি কত্ৰা.

তেরসচেতনাভেদন্তি অট্ঠকামাৰচরকুসলচেতনাপঞ্চরূপাৰচরকুসলচেতনাভেদং. অত্তনো সন্তানস্স পুননতো পুজ্জভৰফলস্স অভিসঙ্খরণতো পুঞ্ঞাভিসঙ্খারং. কম্মপুঞ্ঞেনাতি কম্মভূতেন. ৰিপাকপুঞ্ঞেনাতি ৰিপাকসঙ্খাতেন. পুঞ্ঞফলম্পি হি উত্তরপদলোপেন ‘‘পুঞ্ঞ’’ন্তি ৰুচ্চতি ‘‘এৰমিদং পুঞ্ঞং পৰড্ঢতী’’তিআদীসু ৰিয. ‘‘অপুঞ্ঞূপগং হোতি ৰিঞ্ঞাণ’’ন্তি ইদং ‘‘পুঞ্ঞূপগং হোতি ৰিঞ্ঞাণ’’ন্তি এত্থ ৰুত্তনযমেৰাতি ন উদ্ধতং. অপুঞ্ঞফলং উত্তরপদলোপেন ‘‘অপুঞ্ঞ’’ন্তি ৰুচ্চতি. সঙ্খারন্তি সঙ্খারস্স গহিতত্তা ‘‘অৰিজ্জাগতোয’’ন্তি ইমিনা সঙ্খারস্স পচ্চযো গহিতো, ‘‘পুঞ্ঞূপগং হোতি ৰিঞ্ঞাণ’’ন্তিআদিনা পচ্চযুপ্পন্নং ৰিঞ্ঞাণং. তস্মিঞ্চ গহিতে নামরূপাদি সব্বং গহিতমেৰ হোতি. তেনাহ ‘‘দ্ৰাদসপদিকো পচ্চযাকারো গহিতোৰ হোতী’’তি.

ৰিজ্জাতি অরহত্তমগ্গঞাণং উক্কট্ঠনিদ্দেসেন. তস্সা হি উপ্পাদা সব্বসো অৰিজ্জা পহীনা হোতি. পঠমমেৰাতি ইদং অৰিজ্জাপহানৰিজ্জুপ্পাদানং সমানকালতাদস্সনং. তেনাহ ‘‘যথা পনা’’তিআদি. পদীপুজ্জলেনাতি পদীপুজ্জলনহেতুনা সহেৰ. ৰিজ্জুপ্পাদাতি ৰিজ্জুপ্পাদহেতু, এৰং সতীপি সমকালত্তেতি অধিপ্পাযো. ন গণ্হাতীতি ‘‘এতং মমা’’তিআদিনা ন গণ্হাতি. ন তণ্হাযতি ন ভাযতি তণ্হাৰুত্তিনো অভাৰা, ততো এৰ ভযৰত্থুনো চ অভাৰা.

গিলিত্ৰা পরিনিট্ঠাপেত্ৰাতি গিলিত্ৰা ৰিয অঞ্ঞস্স অৰিসযং ৰিয করণেন পরিনিট্ঠাপেত্ৰা. সামিসসুখস্স অনেকদুক্খানুবন্ধভাৰতো, সুখাভিনন্দস্স দুক্খহেতুভাৰতো চ সুখং অভিনন্দন্তোযেৰ দুক্খং অভিনন্দতি নাম অগ্গিসন্তাপসুখং ইচ্ছন্তো ধূমদুক্খানুঞ্ঞাতো ৰিয. দুক্খং পত্ৰা সুখং পত্থনতোতি এত্থ দুব্বলগহণিকাদযো নিদস্সনভাৰেন ৰেদিতব্বা. তে হি যাৰ সাযন্হসমযাপি অভুত্ৰা সাযমাসাদীনি করোন্তো জিঘচ্ছাদিং উপ্পাদেত্ৰা ভুঞ্জনাদীনি করোন্তি. সুখস্স ৰিপরিণামদুক্খতো সুখং অভিনন্দন্তো দুক্খং অভিনন্দতি নামাতি যোজনা. কেচি পন দুক্খস্স অভাৰতো ৰিপরিণামসুখতো তং সুখং অভিনন্দন্তো দুক্খং অভিনন্দতীতি ৰদন্তি. তং ন, ন হি তাদিসং সুখনিমিত্তং কোচি দুক্খং অভিনন্দন্তো দিট্ঠো, দুক্খহেতুং পন সামিসং সুখং অভিনন্দন্তো দিট্ঠো. দুক্খহেতুং সামিসং সুখং অভিনন্দন্তো অত্থতো দুক্খং অভিনন্দতি নামাতি ৰুত্তোৰাযমত্থো. কাযোতি পঞ্চদ্ৰারকাযো, সো পরিযন্তো অৰসানং এতস্সাতি কাযপরিযন্তিকং. তেনাহ ‘‘যাৰ পঞ্চদ্ৰারকাযো পৰত্ততি, তাৰ পৰত্ত’’ন্তি. জীৰিতপরিযন্তিকন্তি এত্থাপি এসেৰ নযো.

পচ্ছা উপ্পজ্জিত্ৰা পঠমং নিরুজ্ঝতীতি একস্মিং অত্তভাৰে মনোদ্ৰারিকৰেদনাতো পচ্ছা উপ্পজ্জিত্ৰা ততো পঠমং নিরুজ্ঝতি, ততো এৰ সিদ্ধমত্থং সরূপেনেৰ দস্সেতুং ‘‘মনোদ্ৰারিকৰেদনা পঠমং উপ্পজ্জিত্ৰা পচ্ছা নিরুজ্ঝতী’’তি ৰুত্তং. ইদানি তমেৰ সঙ্খেপেন ৰুত্তং ৰিৰরিতুং ‘‘সা হী’’তিআদিমাহ. যাৰ তেত্তিংসৰস্সাপি পঠমৰযো. পণ্ণাসৰস্সকালেতি পঠমৰযতো যাৰ পঞ্ঞাসৰস্সকালা, তাৰ ঠিতা হোতীতি ৰুড্ঢিহানিযো অনুপগন্ত্ৰা সরূপেনেৰ ঠিতা হোতি. মন্দাতি মুদুকা অতিখিণা. তদাতি অসীতিনৰুতিৰস্সকালে. তথা চিরপরিৰিতক্কেপি. ভগ্গা নিত্তেজা ভগ্গৰিভগ্গা দুব্বলা. হদযকোটিংযেৰাতি চক্খাদিৰত্থূসু অৰত্তেত্ৰা তেসং খীণত্তা কোটিভূতং হদযৰত্থুংযেৰ. যাৰ এসা ৰেদনা ৰত্ততি.

ৰাপিযাতি মহাতল়াকেন. পঞ্চউদকমগ্গসম্পন্নন্তি পঞ্চহি উদকস্স পৰিসননিক্খমনমগ্গেহি যুত্তং. ততো ততো ৰিস্সন্দমানং সব্বসো পুণ্ণত্তা.

পঠমং দেৰে ৰস্সন্তেতিআদি উপমাসংসন্দনং. ইমং ৰেদনং সন্ধাযাতি ইমং যথাৰুত্তং পরিযোসানপ্পত্তং মনোদ্ৰারিকৰেদনং সন্ধায.

কাযস্স ভেদাতি অত্তভাৰস্স ৰিনাসতো. ‘‘উদ্ধং জীৰিতপরিযাদানা’’তি পাল়ি, অট্ঠকথাযং পন জীৰিতপরিযাদানা উদ্ধন্তি পদুদ্ধারো কতো. পরলোকৰসেন অগন্ত্ৰা. ৰেদনানং সীতিভাৰো নাম সঙ্খারদরথপরিল়াহভাৰো, সো পনাযং অপ্পৰত্তিৰসেনাতি আহ ‘‘পৰত্তি…পে… ভৰিস্সন্তী’’তি. ধাতুসরীরানীতি অট্ঠিকঙ্কলসঙ্খাতধাতুসরীরানি. সরীরেকদেসে হি সরীরসমঞ্ঞা.

কুম্ভকারপাকাতি কুম্ভকারপাকতো. এত্থ পচ্চতীতি পাকো, পচনট্ঠানং. তদেৰ পাচনৰসেন আৰসন্তি এত্থাতি আৰাসো, তস্মা কুম্ভকারাৰাসতো. অৰিগতৰূপসমং সঙ্খরিতং কুম্ভং উদ্ধরিত্ৰা ঠপেন্তো ছারিকায সতি পিধানৰসেন ঠপেতি. তথা ঠপনং পন সন্ধায ৰুত্তং ‘‘পটিসিস্সেয্যা’’তি. কুম্ভস্স পদেসভূততায আবদ্ধা অৰযৰা ‘‘কুম্ভকপালানী’’তি অধিপ্পেতানি, ন ছিন্নভিন্নানি. অৰযৰমুখেন হি সমুদাযো ৰুত্তো. তত্থ কপালসমুদাযো হি ঘটো. তেনাহ ‘‘মুখৰট্টিযা একবদ্ধানী’’তি. অৰসিস্সেয্যুন্তি ৰণ্ণৰিসেসউণ্হভাৰাপগতা ঘটকারানেৰ তিট্ঠেয্যুন্তি. আদিত্ত…পে… তযো ভৰা দট্ঠব্বা একাদসহি অগ্গীহি আদিত্তভাৰতো. যথা কুম্ভকারো কুম্ভকারাৰাসং আদিত্তং পচ্চৰেক্খতি, এৰং আরদ্ধৰিপস্সকোপেস ভৰত্তযং রাগাদীহি আদিত্তন্তি আহ ‘‘কুম্ভকারো ৰিয যোগাৰচরো’’তি. নীহরণদণ্ডকো ৰিয অরহত্তমগ্গঞাণং ভৰত্তযপাকতো নীহরণতো. সমো ভূমিভাগো ৰিয নিব্বানতলং সব্বৰিসমা নিৰত্তনতো.

‘‘আদাননিক্খেপনতো, ৰযোৰুদ্ধত্থঙ্গমতো, আহারমযতো, উতুমযতো, চিত্তসমুট্ঠানতো, কম্মজতো, ধম্মতারূপতো’’তি (ৰিসুদ্ধি. ২.৭০৬) ইমেহি সত্তহি আকারেহি সম্মসন্তো রূপসত্তকং ৰিপস্সতি নাম. ‘‘কলাপতো, যমকতো, খণিকতো, পটিপাটিতো, দিট্ঠিউগ্ঘাটনতো, মানসমুগ্ঘাটতো, নিকন্তিপরিযাদানতো’’তি (ৰিসুদ্ধি. ২.৭১৭) ইমেহি সত্তহি আকারেহি সম্মসন্তো অরূপসত্তকং ৰিপস্সতি নাম, তস্মা যথাৰুত্তং ইমং রূপসত্তকং অরূপসত্তকঞ্চ নীহরিত্ৰা ৰিপস্সন্তস্স. যদিপি অরহতো অত্তভাৰো সব্বভৰেহিপি উদ্ধটো, যাৰ পন অনুপাদিসেসপরিনিব্বানং ন পাপুণাতি, তাৰ তস্মিম্পি সুগতিভৰে ঠিতোযেৰাতি ৰত্তব্বতং লব্ভতীতি ‘‘চতূহি অপাযেহি অত্তভাৰং উদ্ধরিত্ৰা’’ইচ্চেৰ ৰুত্তং. তেনাহ ‘‘খীণাসৰো পনা’’তিআদি. তথা চ ৰক্খতি ‘‘অনুপাদিসেসায নিব্বানধাতুযা পরিনিব্বুতস্স ৰট্টৰূপসমো ৰেদিতব্বো’’তি. ন পরিনিব্বাতি অনুপাদিসেসায নিব্বানধাতুযাতি অধিপ্পাযো, সউপাদিসেসায পন নিব্বানধাতুযা পরিনিব্বানং অরহত্তপ্পত্তিযেৰ. অভিসঙ্খারহেতুতো হেত্থ পরিল়াহৰূপসমস্স উপসমভাৰেন অধিপ্পেতত্তা উণ্হকুম্ভনিব্বাননিদস্সনম্পি ন ৰিরুজ্ঝতি. অনুপাদিন্নকসরীরানীতি উতুসমুট্ঠানিকরূপকলাপে ৰদন্তি. ভিক্খৰেতি এত্থ ইতি-সদ্দো আদিঅত্থো. ইদং পন ৰচনং. অনুযোগারোপনত্থন্তি কাযপরিযন্তিকং ৰেদনং ৰেদযমানো খীণাসৰো অপি নু পুঞ্ঞাভিসঙ্খারাদিকম্মং করেয্যাতি পঞ্হং কাতুং. অথ ৰা অনুযোগারোপনত্থন্তি ‘‘অপি নু খো খীণাসৰো ভিক্খু পুঞ্ঞাভিসঙ্খারং ৰা অভিসঙ্খরেয্যা’’তিআদিনা অনুযোগং আরোপেতুং ৰুত্তং, ন তাৰ যথারদ্ধদেসনং নিট্ঠাপেতুন্তি অত্থো.

পটিসন্ধিৰিঞ্ঞাণে সিদ্ধে তস্মিং ভৰে উপ্পজ্জনারহানং ৰিঞ্ঞাণানং সিযা সম্ভৰো, নাসতীতি ৰুত্তং ‘‘ৰিঞ্ঞাণং পঞ্ঞাযেথাতি পটিসন্ধিৰিঞ্ঞাণং পঞ্ঞাযেথা’’তি. সব্বসো সঙ্খারেসু অসন্তেসু পটিসন্ধিৰিঞ্ঞাণং অপি নু খো পঞ্ঞাযেয্য. তস্মিঞ্হি অপঞ্ঞাযমানে সব্বং ৰিঞ্ঞাণং ন পঞ্ঞাযেয্য. থেরানন্তি ‘‘ভিক্খৰে’’তি আলপিতত্থেরানং. পঞ্হব্যাকরণং সম্পহংসতি তস্স সব্বঞ্ঞুতঞ্ঞাণেন সংসন্দনতো. অপ্পঞ্ঞাণন্তি অপ্পঞ্ঞাযনং. আদি-সদ্দেন ৰিঞ্ঞাণে অসতি নামরূপস্স অপ্পঞ্ঞাণন্তি এৰমাদিং সঙ্গণ্হাতি. সন্নিট্ঠানসঙ্খাতন্তি সদ্দহনাকারেন পৰত্তসন্নিট্ঠানসঙ্খাতং. অধিমোক্খন্তি নিচ্ছযাকারৰিমোক্খং সদ্ধাৰিমোক্খঞ্চ. তেনাহ পাল়িযং ‘‘সদ্দহথ মেতং, ভিক্খৰে’’তি. সদ্ধাসহিতঞ্হি নিচ্ছযাকারৰিমোক্খং সন্ধাযাহ ‘‘সন্নিট্ঠানসঙ্খাতং অধিমোক্খ’’ন্তি. অন্তোতি পরিযন্তো. পরিতো ছিজ্জতি এত্থাতি পরিচ্ছেদো.

পরিৰীমংসনসুত্তৰণ্ণনা নিট্ঠিতা.

২. উপাদানসুত্তৰণ্ণনা

৫২. আরম্মণাদিভাৰেন সংৰত্তনতো উপাদানানং হিতানি উপাদানিযানি, তেসু উপাদানিযেসু. তেনাহ ‘‘চতুন্নং উপাদানানং পচ্চযেসূ’’তি. অস্সাদং অনুপস্সন্তস্সাতি অসাদেতব্বং মিচ্ছাঞাণেন অনুপস্সতো. তদাহারোতি সোল়স ৰা ৰীসং তিংসং চত্তালীসং পঞ্ঞাসং ৰা আহারো পচ্চযো এতস্সাতি তদাহারো. অগ্গিক্খন্ধো ৰিয তযো ভৰা একাদসহি অগ্গীহি আদিত্তভাৰতো এতদেৰ ভৰত্তযং. অগ্গি…পে… পুথুজ্জনো অগ্গিক্খন্ধসদিসস্স ভৰত্তযস্স পরিবন্ধনতো.

কম্মট্ঠানস্সাতি ৰিপস্সনাকম্মট্ঠানস্স. তেনাহ ‘‘তেভূমকধম্মেসূ’’তি. ধম্মপাসাদন্তি লোকুত্তরধম্মপাসাদং. সো হি অচ্চুগ্গতট্ঠেন ‘‘পাসাদো’’তি ৰুচ্চতি. সতিপট্ঠানমহাৰীথিযং ফলক্খণে পৰত্তাযাতি.

উপাদানসুত্তৰণ্ণনা নিট্ঠিতা.

৩-৪. সংযোজনসুত্তদ্ৰযৰণ্ণনা

৫৩-৫৪. মহন্তৰট্টপ্পবন্ধওপম্মভাৰেন তেলপদীপস্স আহতত্তা ‘‘মহন্তঞ্চ ৰট্টিকপালং গহেত্ৰা’’তি ৰুত্তং. পুরিমনযেনেৰাতি পুরিমস্মিং উপাদানিযসুত্তে ৰুত্তনযেনেৰ. তথা ৰিনেতব্বানং পুগ্গলানং অজ্ঝাসযৰসেন হি ইমেসং সুত্তানং এৰং ৰচনং এৰং দেসনা. এস নযো ইতো পরেসুপি.

সংযোজনসুত্তদ্ৰযৰণ্ণনা নিট্ঠিতা.

৫-৬. মহারুক্খসুত্তদ্ৰযৰণ্ণনা

৫৫-৫৬. ওজং অভিহরন্তীতি রসহরণিযো ৰিয পুরিসস্স সরীরে রুক্খমূলানি রুক্খস্স পথৰীআপোরসে উপরি আরোপেন্তি. তেসং তথা আরোপনং ‘‘ওজাযা’’তিআদিনা ৰিভাৰেতি. হত্থসতুব্বেধমস্সাতি হত্থসতুব্বেধো, হত্থসতং উব্বিদ্ধস্সপি. এত্থাতি এতিস্সং ৰট্টকথাযং. কম্মারোহনন্তি কম্মপচ্চযো.

পুন এত্থাতি এতিস্সং ৰিৰট্টকথাযং. ৰট্টদুক্খং নাসেতুকামস্স দল়্হং উপ্পন্নসংৰেগঞাণং সন্ধায ‘‘কুদ্দালো ৰিযা’’তি আহ. ততো নিব্বত্তিতঞাণং সমাধিপচ্ছিযা ঠিতং নিস্সায পৰত্তেতব্বৰিপস্সনারম্ভঞাণং. রুক্খচ্ছেদনফরসু ৰিযাতি এৰংভূতস্স ৰিপস্সনা একন্ততো ৰট্টচ্ছেদায হোতিযেৰাতি আহ ‘‘রুক্খস্স…পে… মনসিকরোন্তস্স পঞ্ঞা’’তি. তত্থ কম্মট্ঠানন্তি ৰিপস্সনাকম্মট্ঠানং. তং চতুব্বিধৰৰত্থানৰসেন ৰীসতি পথৰীকোট্ঠাসা, দ্ৰাদস আপোকোট্ঠাসা, চত্তারো তেজোকোট্ঠাসা, ছ ৰাযোকোট্ঠাসাতি দ্ৰেচত্তালীসায কোট্ঠাসেসু. ৰিঞ্ঞাণস্স চাতি ইতি-সদ্দো আদিঅত্থো পকারত্থো চ. তেন ভূতরূপানি ৰিঞ্ঞাণসম্পযুত্তধম্মে চ সঙ্গণ্হাতি. সত্তসু সপ্পাযেসু যস্স অলভন্তস্স কম্মট্ঠানং ৰিভূতং হুত্ৰা ন উপট্ঠাতি, তং সন্ধাযাহ ‘‘অঞ্ঞতরং সপ্পায’’ন্তি. সেসং সুৰিঞ্ঞেয্যমেৰ.

মহারুক্খসুত্তদ্ৰযৰণ্ণনা নিট্ঠিতা.

৭. তরুণরুক্খসুত্তৰণ্ণনা

৫৭-৫৯. পলিমজ্জেয্যাতি অল্লকরণৰসেন পরিতো পাল়িং বন্ধেয্য. তথা করোন্তো যস্মা চ তত্থ তিণগচ্ছাদীনং মূলসন্তানগ্গহণেন তং ঠানং সোধেতি নাম, তস্মা ৰুত্তং ‘‘সোধেয্যা’’তি. পংসুন্তি অস্স পৰড্ঢকারকং, আগন্তুকং পংসুন্তি অত্থো. দদেয্যাতি পক্খিপেয্য. তেনাহ ‘‘থদ্ধ’’ন্তিআদি. ৰুত্তনযেনেৰাতি ‘‘রুক্খং নাসেতুকামো পুরিসো ৰিযা’’তিআদিনা পঞ্চমসুত্তে ৰুত্তনযেন. অট্ঠমনৰমানি উত্তানত্থানেৰ ৰুত্তনযত্তা.

তরুণরুক্খসুত্তৰণ্ণনা নিট্ঠিতা.

১০. নিদানসুত্তৰণ্ণনা

৬০. বহুৰচনৰসেনাতি কুরূ নাম জানপদিনো রাজকুমারা, তেসং নিৰাসো একোপি জনপদো রুল়্হীৰসেন ‘‘কুরূ’’তি এৰং বহুৰচনৰসেন. যত্থ ভগৰতো ৰসনোকাসভূতো কোচি ৰিহারো ন হোতি, তত্থ কেৰলং গোচরগামকিত্তনং নিদানকথায পকতি যথা ‘‘সক্কেসু ৰিহরতি দেৰদহং নাম সক্যানং নিগমো’’তি. ‘‘আযস্মা’’তি ৰা ‘‘দেৰানং পিযো’’তি ৰা ভৰন্তি ৰা পিযসমুদাহারো এসোতি আহ ‘‘আযস্মাতি পিযৰচনমেত’’ন্তি. তযিদং পিযৰচনং গারৰৰসেন ৰুচ্চতীতি আহ ‘‘গরুৰচনমেত’’ন্তি. অতিদূরং অচ্চাসন্নং অতিসম্মুখা অতিপচ্ছতো উপরিৰাতো উন্নতপ্পদেসোতি ইমে ছ নিসজ্জদোসা. নীলপীতলোহিতোদাতমঞ্জিট্ঠপভস্সরৰসেন ছব্বণ্ণানং.

কুলসঙ্গহত্থাযাতি কুলানুদ্দযতাৰসেন কুলানুগ্গণ্হনত্থায. সহস্সভণ্ডিকং নিক্খিপন্তো ৰিয ভিক্খাপটিগ্গণ্হনেন তেসং অভিৰাদনাদিসম্পটিচ্ছনেন চ পুঞ্ঞাভিসন্দস্স জননেন. পটিসম্মজ্জিত্ৰাতি অন্তেৰাসিকেহি সম্মট্ঠট্ঠানং সক্কচ্চকারিতায পুন সম্মজ্জিত্ৰা. উভযন্ততো পট্ঠায মজ্ঝন্তি আদিতো পট্ঠায ৰেদনং, জরামরণতো পট্ঠায চ ৰেদনং পাপেত্ৰা সম্মসনমাহ. তিক্খত্তুন্তি ‘‘আদিতো পট্ঠায অন্ত’’ন্তিআদিনা ৰুত্তচতুরাকারুপসংহিতে তযো ৰারে. তেন দ্ৰাদসক্খত্তুং সম্মসনমাহ. অম্হাকং ভগৰতা গম্ভীরভাৰেনেৰ কথিতত্তা সেসবুদ্ধেহিপি এৰমেৰ কথিতোতি ধম্মন্ৰযে ঠত্ৰা ৰুত্তং ‘‘সব্ববুদ্ধেহি…পে… কথিতো’’তি.

পমাণাতিক্কমেতি অপরিমাণত্থে ‘‘যাৰঞ্চিদং তেন ভগৰতা’’তিআদীসু (দী. নি. ১.৩) ৰিয. অতিরেকভাৰজোতনো হি যং যাৰ-সদ্দো. তেনাহ ‘‘অতিগম্ভীরোতি অত্থো’’তি. অৰভাসতি খাযতি উপট্ঠাতি ঞাণস্স. তথা উপট্ঠানঞ্হি সন্ধায ‘‘দিস্সতী’’তি ৰুত্তং. ননু এস পটিচ্চসমুপ্পাদো একন্তগম্ভীরোৰ, অথ কস্মা গম্ভীরাৰভাসতা জোতিতাতি? সচ্চমেতং, একন্তগম্ভীরতাদস্সনত্থমেৰ পনস্স গম্ভীরাৰভাসগ্গহণং, তস্মা অঞ্ঞত্থ লব্ভমানং চাতুকোটিকং ব্যতিরেকমুখেন নিদস্সেত্ৰা তমেৰস্স একন্তগম্ভীরতং ৰিভাৰেতুং ‘‘একং হী’’তিআদি ৰুত্তং. এতং নত্থীতি অগম্ভীরো অগম্ভীরাৰভাসো চাতি এতং দ্ৰযং নত্থি. তেন যথাদস্সিতে চাতুকোটিকে পচ্ছিমা এককোটি লব্ভতীতি দস্সেতি. তেনাহ ‘‘অযং হী’’তিআদি.

যেহি গম্ভীরভাৰেহি পটিচ্চসমুপ্পাদো ‘‘গম্ভীরো’’তি ৰুচ্চতি, তে চতূহি উপমাহি উল্লিঙ্গেন্তো ‘‘ভৰগ্গগ্গহণাযা’’তিআদিমাহ. যথা ভৰগ্গগ্গহণত্থং হত্থং পসারেত্ৰা গহেতুং ন সক্কা দূরভাৰতো, এৰং সঙ্খারাদীনং অৰিজ্জাদিপচ্চযসম্ভূতসমুদাগতত্থো পকতিঞাণেন গহেতুং ন সক্কা. যথা সিনেরুং ভিন্দিত্ৰা মিঞ্জং পব্বতরসং পাকতিকপুরিসেন নীহরিতুং ন সক্কা, এৰং পটিচ্চসমুপ্পাদগতে ধম্মত্থাদিকে পকতিঞাণেন ভিন্দিত্ৰা ৰিভজ্জ পটিৰিজ্ঝনৰসেন জানিতুং ন সক্কা. যথা মহাসমুদ্দং পকতিপুরিসস্স বাহুদ্ৰযৰসেন পারং তরিতুং ন সক্কা. এৰং ৰেপুল্লট্ঠেন মহাসমুদ্দসদিসং পটিচ্চসমুপ্পাদং পকতিঞাণেন দেসনাৰসেন পরিহরিতুং ন সক্কা. যথা পথৰিং পরিৰত্তেত্ৰা পাকতিকপুরিসস্স পথৰোজং গহেতুং ন সক্কা, এৰং ইত্থং অৰিজ্জাদযো সঙ্খারাদীনং পচ্চযা হোন্তীতি তেসং পটিচ্চসমুপ্পাদসভাৰো পাকতিকঞাণেন নীহরিত্ৰা গহেতুং ন সক্কোতি, এৰং চতুব্বিধগম্ভীরতাৰসেন চতস্সো উপমা যোজেতব্বা. পাকতিকঞাণৰসেন চাযমত্থযোজনা কতা দিট্ঠসচ্চানং তত্থ পটিৰেধসব্ভাৰতো, তথাপি যস্মা সাৰকানং পচ্চেকবুদ্ধানঞ্চ তত্থ সপ্পদেসমেৰ ঞাণং, বুদ্ধানংযেৰ নিপ্পদেসং. তস্মা ৰুত্তং ‘‘বুদ্ধৰিসযং পঞ্হ’’ন্তি.

মাতি পটিসেধে নিপাতো. স্ৰাযং ‘‘উত্তানকুত্তানকো ৰিয খাযতী’’তি ৰচনং সন্ধায ৰুত্তোতি আহ ‘‘মা ভণীতি অত্থো’’তি. উস্সাদেন্তোতি পঞ্ঞাৰসেন উক্কংসন্তোতি অত্থো. অপসাদেন্তোতি নিব্ভচ্ছন্তো, নিগ্গণ্হন্তোতি অত্থো. তেনাতি মহাপঞ্ঞভাৰেন.

তত্থাতি থেরস্স সতিপি উত্তানভাৰে পটিচ্চসমুপ্পাদস্স অঞ্ঞেসং গম্ভীরভাৰে. সুভোজনরসপুট্ঠস্সাতি সুন্দরেন ভোজনরসেন পোসিতস্স. কতযোগস্সাতি নিব্বুদ্ধপযোগে কতপরিচযস্স. মল্লপাসাণন্তি মল্লেহি মহাবলেহেৰ খিপিতব্বপাসাণং. কুহিং ইমস্স ভারিযট্ঠানন্তি কস্মিং পস্সে ইমস্স পাসাণস্স গরুতরপদেসোতি তস্স সল্লহুকভাৰং দীপেন্তো ৰদতি.

তিমিরপিঙ্গলেনেৰ দীপেন্তি তস্স মহাৰিপ্ফারভাৰতো. তেনাহ ‘‘তস্স কিরা’’তিআদি. পক্কুথতীতি পক্কুথন্তং ৰিয পরিৰত্ততি পরিতো ৰত্ততি. লক্খণৰচনঞ্হেতং. পিট্ঠিযং সকলিকঅট্ঠিকা পিট্ঠিপত্তং. কাযূপপন্নস্সাতি মহতা কাযেন উপেতস্স, মহাকাযস্সাতি অত্থো. পিঞ্ছ ৰট্টীতি পিঞ্ছ কলাপো. সুপণ্ণৰাতন্তি নাগগ্গহণাদীসু পক্খপপ্ফোটনৰসেন উপ্পজ্জনকৰাতং.

‘‘পুব্বূপনিস্সযসম্পত্তিযা’’তিআদিনা উদ্দিট্ঠকারণানি ৰিত্থারতো ৰিৰরিতুং ‘‘ইতো কিরা’’তিআদি ৰুত্তং. তত্থ ইতোতি ইতো ভদ্দকপ্পতো. সতসহস্সিমেতি সতসহস্সমে. হংসৰতী নাম নগরং অহোসি জাতনগরং. ধুরপত্তানীতি বাহিরপত্তানি, যানি দীঘতমানি.

কনিট্ঠভাতাতি ৰেমাতিকভাতা কনিট্ঠো যথা অম্হাকং ভগৰতো নন্দত্থেরো. বুদ্ধানঞ্হি সহোদরা ভাতরো নাম ন হোন্তি. তত্থ জেট্ঠা তাৰ নুপ্পজ্জন্তি, কনিট্ঠানং পন অসম্ভৰো এৰ. ভোগন্তি ৰিভৰং. উপসন্তোতি চোরজনিতসঙ্খোভৰূপসমেন উপসন্তো জনপদো.

দ্ৰে সাটকে নিৰাসেত্ৰাতি সাটকদ্ৰযমেৰ অত্তনো কাযপরিহারিযং কত্ৰা, ইতরং সব্বসম্ভারং অত্তনা মোচেত্ৰা.

পত্তগ্গহণত্থন্তি অন্তোপক্খিত্তউণ্হভোজনত্তা পত্তস্স অপরাপরং হত্থে পরিৰত্তেন্তস্স সুখেন পত্তগ্গহণত্থং. উত্তরিসাটকন্তি অত্তনো উত্তরিযং সাটকং. এতানি পাকটট্ঠানানীতি এতানি যথাৰুত্তানি ভগৰতো দেসনায পাকটানি বুদ্ধে বুদ্ধসাৰকে চ উদ্দিস্স থেরস্স পুঞ্ঞকরণট্ঠানানি, পচ্চেকবুদ্ধং পন বোধিসত্তঞ্চ উদ্দিস্স থেরস্স পুঞ্ঞকরণট্ঠানানি বহূনিযেৰ.

পটিসন্ধিং গহেত্ৰাতি অম্হাকং বোধিসত্তস্স পটিসন্ধিগ্গহণদিৰসেযেৰ পটিসন্ধিং গহেত্ৰা.

উগ্গহনং পাল়িযা উগ্গণ্হনং, সৰনং অত্থসৰনং, পরিপুচ্ছনং গণ্ঠিট্ঠানেসু অত্থপরিপুচ্ছনং, ধারণং পাল়িযা পাল়িঅত্থস্স চ চিত্তে ঠপনং. সব্বঞ্চেতং ইধ পটিচ্চসমুপ্পাদৰসেন ৰেদিতব্বং, সব্বস্সপি বুদ্ধৰচনস্স ৰসেনাতিপি ৰট্টতি. সোতাপন্নানঞ্চ…পে… উপট্ঠাতি তত্থ সম্মোহৰিগমেন ‘‘যং কিঞ্চি সমুদযধম্মং, সব্বং তং নিরোধধম্ম’’ন্তি অত্তপচ্চক্খৰসেন উপট্ঠানতো. নামরূপপরিচ্ছেদোতি সহ পচ্চযেন নামরূপস্স পরিচ্ছিজ্জ অৰবোধো. চতূহীতি ধম্মগম্ভীরাদীহি চতূহি গম্ভীরতাহি সব্বাপি গম্ভীরতা.

সাৰকেহি দেসিতা দেসনাপি পন সত্থু এৰ দেসনাতি আহ ‘‘মযা দিন্ননযে ঠত্ৰা’’তি. ‘‘সেক্খেন নাম নিব্বানং সব্বাকারেন পটিৰিদ্ধং ন হোতী’’তি ন তস্স গম্ভীরতাতি তস্স গম্ভীরস্স উপাদানস্স গম্ভীরতা ৰিয সুট্ঠু দিট্ঠা নাম হোতি. তস্মা আহ ‘‘ইদং নিব্বানমেৰ গম্ভীরং, পচ্চযাকারো পন উত্তানকো জাতো’’তি. নিব্বানঞ্হি সব্বেপি অসেক্খা সব্বসো পটিৰিজ্ঝন্তি নিপ্পদেসত্তা, পচ্চযাকারং পন সম্মাসম্বুদ্ধাযেৰ অনৰসেসতো পটিৰিজ্ঝন্তি, ন ইতরে. তস্মা পচ্চযৰসেন ‘‘ইদং অপরদ্ধ’’ন্তি ৰুত্তং থেরং অপসাদেন্তেন. তমেৰ হিস্স অনৰসেসতো পটিৰেধাভাৰং ৰিভাৰেতুং ‘‘অথ কস্মা’’তিআদি ৰুত্তং. অসতিপি ধম্মতো ভেদে সংযোজনত্থঅনুসযত্থৰসেন পন তেসং লব্ভমানভেদং গহেত্ৰা ‘‘ইমে চত্তারো কিলেসে’’তি ৰুত্তং. অঞ্ঞো হি তেসং বন্ধনত্থো, অঞ্ঞো থামগমনট্ঠোতি. এস নযো সেসেসুপি. ইতি ইমেসং কিলেসানং অপ্পহীনত্তা তথারূপং উপনিস্সযসম্পদং অভাৰযতোৰ অনুত্তানমেৰ ধম্মং উত্তানন্তি ন ৰত্তব্বমেৰাতি অধিপ্পাযো. চত্তারি অট্ঠ সোল়স ৰা অসঙ্খ্যেয্যানীতি ইদং মহাবোধিসত্তানং সন্তানে বোধিপরিপাচকধম্মানং তিক্খমজ্ঝিমমুদুভাৰসিদ্ধকালৰিসেসদস্সনং, তঞ্চ খো মহাভিনীহারতো পট্ঠাযাতি ৰদন্তি. এতেহীতি যথাৰুত্তবুদ্ধসাৰকঅগ্গসাৰকপচ্চেকবুদ্ধসম্মাসম্বুদ্ধানং ৰিসেসাধিগমেহি. পচ্চনীকন্তি পটিক্কূলং ৰিরুদ্ধং. সব্বথা পচ্চযাকারপটিৰেধো নাম সম্মাসম্বোধিযাধিগমো এৰাতি ৰুত্তং ‘‘পচ্চযাকারং পটিৰিজ্ঝিতুং ৰাযমন্তস্সেৰা’’তি. নৰহি আকারেহীতি উপ্পাদাদীহি নৰহি পচ্চযাকারেহি. ৰুত্তঞ্হেতং পটিসম্ভিদাযং (পটি. ম. ১.৪৫) –

‘‘অৰিজ্জাসঙ্খারানং উপ্পাদট্ঠিতি চ পৰত্তট্ঠিতি চ নিমিত্তট্ঠিতি চ আযূহনট্ঠিতি চ সংযোগট্ঠিতি চ পলিবোধট্ঠিতি চ সমুদযট্ঠিতি চ হেতুট্ঠিতি চ পচ্চযট্ঠিতি চ, ইমেহি নৰহাকারেহি অৰিজ্জা পচ্চযো, সঙ্খারা পচ্চযসমুপ্পন্না’’তিআদি.

তত্থ নৰহাকারেহীতি নৰহি পচ্চযভাৰূপগমনেহি আকারেহি. উপ্পজ্জতি এতস্মা ফলন্তি উপ্পাদো, ফলুপ্পত্তিযা কারণভাৰো. সতি চ অৰিজ্জায সঙ্খারা উপ্পজ্জন্তি, নাসতি, তস্মা অৰিজ্জা সঙ্খারানং উপ্পাদো হোতি. তথা অৰিজ্জায সতি সঙ্খারা পৰত্তন্তি চ নিমিযন্তি চ. যথা চ ভৰাদীসু খিপন্তি, এৰং তেসং অৰিজ্জা পচ্চযো হোতি, তথা আযূহন্তি ফলুপ্পত্তিযা ঘটেন্তি সংযুজ্জন্তি অত্তনো ফলেন. যস্মিং সন্তানে সযং উপ্পন্না, তং পলিবুন্ধন্তি পচ্চযন্তরসমৰাযে উদযন্তি উপ্পজ্জন্তি, হিনোতি চ সঙ্খারানং কারণভাৰং উপগচ্ছতি. পটিচ্চ অৰিজ্জং সঙ্খারা অযন্তি পৰত্তন্তীতি এৰং অৰিজ্জায সঙ্খারানং কারণভাৰূপগমনৰিসেসা উপ্পাদাদযো ৰেদিতব্বাতি. উপ্পাদট্ঠিতীতি চ তিট্ঠতি এতেনাতি ঠিতি, কারণং. উপ্পাদো এৰ ঠিতি উপ্পাদঠিতি. এস নযো সেসেসুপি. ইদঞ্চ পচ্চযাকারদস্সনং যথা পুরিমেহি মহাবোধিমূলে পৰত্তিতং, তথা অম্হাকং ভগৰতাপি পৰত্তিতন্তি অচ্ছরিযৰেগাভিহতা দসসহস্সিলোকধাতু সঙ্কম্পি সম্পকম্পীতি দস্সেন্তো ‘‘দিট্ঠমত্তে’’তিআদিমাহ.

এতস্স ধম্মস্সাতি এতস্স পটিচ্চসমুপ্পাদসঞ্ঞিতস্স ধম্মস্স. সো পন যস্মা অত্থতো হেতুপ্পভৰানং হেতু. তেনাহ ‘‘এতস্স পচ্চযধম্মস্সা’’তি. জাতিআদীনং জরামরণপচ্চযতাযাতি অত্থো. নামরূপপরিচ্ছেদো তস্স চ পচ্চযপরিগ্গহো ন পঠমাভিনিৰেসমত্তেন হোতি, অথ খো তত্থ অপরাপরং ঞাণুপ্পত্তিসঞ্ঞিতেন অনু অনু বুজ্ঝনেন. তদুভযভাৰং পন দস্সেন্তো ‘‘ঞাতপরিঞ্ঞাৰসেন অননুবুজ্ঝনা’’তি আহ. নিচ্চসঞ্ঞাদীনং পজহনৰসেন পৰত্তমানা ৰিপস্সনাধম্মে পটিৰিজ্ঝতি এৰ নাম হোতি পটিপক্খৰিক্খম্ভনেন তিক্খৰিসদভাৰাপত্তিতো, তদধিট্ঠানভূতা চ তীরণপরিঞ্ঞা অরিযমগ্গো চ পরিঞ্ঞাপহানাভিসমযৰসেন পৰত্তিযা তীরণপ্পহানপরিঞ্ঞাসঙ্গহো চাতি তদুভযপটিৰেধাভাৰং দস্সেন্তো ‘‘তীরণপ্পহানপরিঞ্ঞাৰসেন অপ্পটিৰিজ্ঝনা’’তি আহ. তন্তং ৰুচ্চতি পটৰীননত্থং তন্তৰাযেতি তন্তং আৰঞ্ছিত্ৰা পসারিতসুত্তৰট্টিতং নীযতীতি কত্ৰা, তং পন তন্তাকুলতায নিদস্সনভাৰেন আকুলমেৰ গহিতন্তি আহ ‘‘তন্তং ৰিয আকুলজাতা’’তি. সঙ্খেপতো ৰুত্তমত্থং ৰিত্থারতো দস্সেন্তো ‘‘যথা নামা’’তিআদি ৰুত্তং. সমানেতুন্তি পুব্বেনাপরং সমং কত্ৰা আনেতুং, অৰিসমং উজুং কাতুন্তি অত্থো. তন্তমেৰ ৰা আকুলং তন্তাকুলং, তন্তাকুলং ৰিয জাতা ভূতা তন্তাকুলকজাতা. মজ্ঝিমং পটিপদং অনুপগন্ত্ৰা অন্তদ্ৰযপক্খন্দেন পচ্চযাকারে খলিত্ৰা আকুলব্যাকুলা হোন্তি, তেনেৰ অন্তদ্ৰযপক্খন্দেন তংতংদিট্ঠিগ্গাহৰসেন পরিব্ভমন্তা উজুকং ধম্মট্ঠিতিতন্তং পটিৰিজ্ঝিতুং ন জানন্তি. তেনাহ ‘‘ন সক্কোন্তি পচ্চযাকারং উজুং কাতু’’ন্তি. দ্ৰে বোধিসত্তেতি পচ্চেকবোধিসত্তমহাবোধিসত্তে. অত্তনো ধম্মতাযাতি অত্তনো সভাৰেন, পরোপদেসেন ৰিনাতি অত্থো. তত্থ তত্থ গুল়কজাতন্তি তস্মিং তস্মিং ঠানে জাতগুল়কং পিণ্ডিসুত্তং. ততো এৰ গণ্ঠিবদ্ধন্তি ৰুত্তং. পচ্চযেসু পক্খলিত্ৰাতি অনিচ্চদুক্খানত্তাদিসভাৰেসু পচ্চযধম্মেসু নিচ্চাদিভাৰৰসেন পক্খলিত্ৰা. পচ্চযে উজুং কাতুং অসক্কোন্তোতি তস্সেৰ নিচ্চাদিগাহস্স অৰিস্সজ্জনতো পচ্চযধম্মনিমিত্তং অত্তনো দস্সনং উজুং কাতুং অসক্কোন্তো ইদংসচ্চাভিনিৰেসকাযগন্থৰসেন গণ্ঠিকজাতা হোন্তীতি আহ ‘‘দ্ৰাসট্ঠি…পে… গণ্ঠিবদ্ধা’’তি.

যে হি কেচি সমণা ৰা ব্রাহ্মণা ৰা সস্সতদিট্ঠিআদি দিট্ঠিযো নিস্সিতা অল্লীনা, ৰিননতো কুলাতি ইত্থিলিঙ্গৰসেন লদ্ধনামস্স তন্তৰাযস্স গণ্ঠিকং নাম আকুলভাৰেন অগ্গতো ৰা মূলতো ৰা দুৰিঞ্ঞেয্যাৰযৰং খলিতবন্ধসুত্তন্তি আহ ‘‘কুলাগণ্ঠিকং ৰুচ্চতি পেসকারকঞ্জিযসুত্ত’’ন্তি. সকুণিকাতি ৰট্টচাটকসকুণিকা. সা হি রুক্খসাখাসু ওলম্বনকুলাৰকা হোতি. তঞ্হি সা কুলাৰকং ততো ততো তিণহীরাদিকে আনেত্ৰা তথা তথা ৰিনন্ধতি, যথা তেসং পেসকারকঞ্জিযসুত্তং ৰিয অগ্গেন ৰা অগ্গং, মূলেন ৰা মূলং সমানেতুং ৰিৰেচেতুং ৰা ন সক্কা. তেনাহ ‘‘যথা’’তিআদি. তদুভযম্পীতি কুলাগণ্ঠিকন্তি ৰুত্তং কঞ্জিযসুত্তং কুলাৰকঞ্চ. পুরিমনযেনেৰাতি ‘‘এৰমেৰ সত্তা’’তিআদিনা পুব্বে ৰুত্তনযেনেৰ.

কামং মুঞ্জপব্বজতিণানি যথাজাতানিপি দীঘভাৰেন পতিত্ৰা অরঞ্ঞট্ঠানে অঞ্ঞমঞ্ঞং ৰিনন্ধিত্ৰা আকুলানি হুত্ৰা তিট্ঠন্তি, তানি পন তথা দুব্বিৰেচিযানি যথা রজ্জুভূতানীতি দস্সেতুং ‘‘যথা হী’’তিআদি ৰুত্তং. সেসমেত্থ হেট্ঠা ৰুত্তনযমেৰ.

অপাযোতি অযেন সুখেন, সুখহেতুনা ৰা ৰিরহিতো. দুক্খস্স গতিভাৰতোতি অপাযিকস্স দুক্খস্স পৰত্তিট্ঠানভাৰতো. সুখসমুস্সযতোতি ‘‘অব্ভুদযতো ৰিনিপতিতত্তা’’তি ৰিরূপং নিপতিতত্তা যথা তেনত্তভাৰেন সুখসমুস্সযো ন হোতি, এৰং নিপতিতত্তা. ইতরোতি সংসারো ননু ‘‘অপায’’ন্তিআদিনা ৰুত্তোপি সংসারো এৰাতি? সচ্চমেতং, নিরযাদীনং পন অধিমত্তদুক্খভাৰদস্সনত্থং অপাযাদিগ্গহণং গোবলিবদ্দঞাযেন অযমত্থো ৰেদিতব্বো. খন্ধানঞ্চ পটিপাটীতি পঞ্চন্নং খন্ধানং হেতুফলভাৰেন অপরাপরুপ্পত্তি. অব্ভোচ্ছিন্নং ৰত্তমানাতি অৰিচ্ছেদেন পৰত্তমানা.

তং সব্বম্পীতি তং ‘‘অপায’’ন্তিআদিনা ৰুত্তং সব্বং অপাযদুক্খঞ্চেৰ ৰট্টদুক্খঞ্চ. মহাসমুদ্দে ৰাতক্খিত্তা নাৰা ৰিযাতি ইদং পরিব্ভমনট্ঠানস্স মহন্তভাৰদস্সনত্থঞ্চেৰ পরিব্ভমনস্স অনৰত্তিতদস্সনত্থঞ্চ ৰেদিতব্বং. সেসং ৰুত্তনযমেৰ.

নিদানসুত্তৰণ্ণনা নিট্ঠিতা.

দুক্খৰগ্গৰণ্ণনা নিট্ঠিতা.