৫. ঞাতিকসুত্তৰণ্ণনা

৪৫. অঞ্ঞমঞ্ঞং দ্ৰিন্নং ঞাতীনং গামো ঞাতিকোতি ৰুত্তোতি আহ ‘‘দ্ৰিন্নং ঞাতকানং গামে’’তি. গিঞ্জকা ৰুচ্চন্তি ইট্ঠকা, গিঞ্জকাহি এৰ কতো আৰসথো গিঞ্জকাৰসথো. সো কির আৰাসো যথা সুধাপরিকম্মেন পযোজনং নত্থি, এৰং ইট্ঠকাহি এৰ চিনিত্ৰা ছাদেত্ৰা কতো. তাদিসঞ্হি ছদনং সন্ধায ভগৰতা ইট্ঠকাছদনং অনুঞ্ঞাতং. তেন ৰুত্তং ‘‘ইট্ঠকাহি কতে মহাপাসাদে’’তি. তত্থ দ্ৰারবন্ধকৰাটফলকাদীনি পন দারুমযানিযেৰ. পরিযাযতি অত্তনো ফলং পরিগ্গহেত্ৰা ৰত্ততীতি পরিযাযো, কারণন্তি আহ ‘‘ধম্মপরিযাযন্তি ধম্মকারণ’’ন্তি, পরিযত্তিধম্মভূতং ৰিসেসাধিগমস্স হেতুন্তি অত্থো. উপেচ্চ সুয্যতি এত্থাতি উপস্সুতীতি ৰুত্তং ‘‘উপস্সুতীতি উপস্সুতিট্ঠান’’ন্তি. অত্তনো কম্মন্তি যদত্থং তত্থ গতো, তং পরিৰেণসমজ্জনকিরিযং. পহাযাতি অকত্ৰা. এৰং মহত্থঞ্হি ৰিমুত্তাযতনসীসে ঠত্ৰা সুণন্তস্স মহতো অত্থায সংৰত্ততি. একঙ্গণং অহোসীতি সব্বং ৰিৰটং অহোসি. তীসু হি ভৰেসু সঙ্খারগতং পচ্চযুপ্পন্নৰসেন মনসিকরোতো ভগৰতো কিঞ্চি অসেসেত্ৰা সব্বম্পি তং ঞাণমুখে আপাথং উপগচ্ছি. তেন ৰুত্তং ‘‘যাৰভৰগ্গা একঙ্গণং অহোসী’’তি. তন্তিৰসেন তমত্থং ৰাচায নিচ্ছারেন্তো ‘‘ৰচসা সজ্ঝাযং করোন্তো’’তি ৰুত্তো. পচ্চযপচ্চযুপ্পন্নৰসেন চ অত্থং আহরিত্ৰা তেসং নিরোধেন ৰিৰট্টস্স আহতত্তা ‘‘যথানুসন্ধিনা’’তি ৰুত্তং. অদ্দস ঞাণচক্খুনা.

মনসা সজ্ঝাযং করোন্তো ‘‘তুণ্হীভূতোৰ পগুণং করোন্তো’’তি ৰুত্তো. পদানুপদন্তি পদঞ্চ অনুপদঞ্চ. পুরিমঞ্হি পদং নাম, তদনন্তরং অনুপদং. ঘটেত্ৰা সম্বন্ধং কত্ৰা অৰিচ্ছিন্দিত্ৰা. পরিযাপুণাতীতি অজ্ঝযতি. আধারপ্পত্তন্তি আধারং চিত্তসন্তানপ্পত্তং অপ্পমুট্ঠং গতত্তা আধারপ্পত্তং নাম. কারণনিস্সিতোতি লোকুত্তরধম্মস্স কারণসন্নিস্সিতো. আদিব্রহ্মচরিযকোতি আদিব্রহ্মচরিযং, তদেৰ আদিব্রহ্মচরিযকং. ধম্মপরিযাযাপেক্খায পুল্লিঙ্গনিদ্দেসো. তীসুপি ইমেসূতি ততিযচতুত্থপঞ্চমেসু তীসু সুত্তেসু.

ঞাতিকসুত্তৰণ্ণনা নিট্ঠিতা.