৩. দসবলৰগ্গো

১. দসবলসুত্তৰণ্ণনা

২১. পঠমং দুতিযস্সেৰ সঙ্খেপো পঠমসুত্তে সঙ্খেপৰুত্তস্স অত্থস্স ৰিত্থারৰসেন দুতিযসুত্তস্স দেসিতত্তা, তঞ্চ পন ভগৰা পঠমসুত্তং সঙ্খেপতো দেসেসি, দুতিযং ততো ৰিত্থারতো. পঠমং ৰা সংখিত্তরুচীনং পুগ্গলানং অজ্ঝাসযেন সঙ্খেপতো দেসেসি, দুতিযং পন অত্তনো রুচিযা ততো ৰিত্থারতো. সীহসমানৰুত্তিকা হি বুদ্ধা ভগৰন্তো, তে অত্তনো রুচিযা কথেন্তা অত্তনো থামং দস্সেন্তাৰ কথেন্তি, তস্মা দুতিযসুত্তৰসেন চেত্থ অত্থৰণ্ণনং করিস্সাম, তস্মিং সংৰণ্ণিতে পঠমং সংৰণ্ণিতমেৰ হোতীতি অধিপ্পাযো.

দসবলসুত্তৰণ্ণনা নিট্ঠিতা.

২. দুতিযদসবলসুত্তৰণ্ণনা

২২. তত্থাতি দুতিযসুত্তে. দসহি বলেহীতি দসহি অনঞ্ঞসাধারণেহি ঞাণবলেহি, তানি তথাগতস্সেৰ বলানীতি তথাগতবলানীতি ৰুচ্চন্তি. কামঞ্চ তানি একচ্চানং সাৰকানম্পি উপ্পজ্জন্তি, যাদিসানি পন বুদ্ধানং ঠানাট্ঠানঞাণাদীনি উপ্পজ্জন্তি, ন তাদিসানি তদঞ্ঞেসং কদাচিপি উপ্পজ্জন্তীতি. হত্থিকুলানুসারেনাতি ৰক্খমানহত্থিকুলানুসারেন. কাল়াৰকন্তি কুলসদ্দাপেক্খায নপুংসকনিদ্দেসো. এস নযো সেসেসুপি. পকতিহত্থিকুলন্তি গিরিচরনদিচরৰনচরাদিপ্পভেদা গোচরিযকাল়াৰকনামা সব্বাপি বলেন পাকতিকা হত্থিজাতি. দসন্নং পুরিসানন্তি থামমজ্ঝিমানং দসন্নং পুরিসানং. একস্স তথাগতস্স কাযবলন্তি আনেত্ৰা সম্বন্ধো. একস্সাতি চ তথা হেট্ঠাকথাযং আগতত্তা দেসনাসোতেন ৰুত্তং. নারাযনসঙ্ঘাতবলন্তি এত্থ নারা ৰুচ্চন্তি রস্মিযো, তা বহূ নানাৰিধা ইতো উপ্পজ্জন্তীতি নারাযনং, ৰজিরং, তস্মা নারাযনসঙ্ঘাতবলন্তি ৰজিরসঙ্ঘাতবলন্তি অত্থো. তথাগতস্স কাযবলন্তি তথাগতস্স পাকতিককাযবলং. সঙ্গহং ন গচ্ছতি অত্তনো বলাভাৰতো, ততো এৰস্স বাহিরকতা লামকতা চ. তদুভযং পনস্স কারণেন দস্সেতুং ‘‘এতঞ্হি নিস্সাযা’’তিআদি ৰুত্তং. অঞ্ঞন্তি কাযবলতো অঞ্ঞং ততো ৰিসুংযেৰ. দসসু ঠানেসু দসসু ঞাতব্বট্ঠানেসু. যাথাৰপটিৰেধতো সযঞ্চ অকম্পযং, পুগ্গলঞ্চ তংসমঙ্গিং নেয্যেসু অধিবলং করোতীতি আহ ‘‘অকম্পনট্ঠেন উপত্থম্ভনট্ঠেন চা’’তি.

ঠানঞ্চ ঠানতোতি কারণঞ্চ কারণতো. কারণঞ্হি যস্মা ফলং তিট্ঠতি তদাযত্তৰুত্তিতায উপ্পজ্জতি চেৰ পৰত্ততি চ, তস্মা ‘‘ঠান’’ন্তি ৰুচ্চতি. ৰিপরিযাযেন অট্ঠানন্তি অকারণং ৰেদিতব্বং. তদুভযং ভগৰা যেন ঞাণেন যে যে ধম্মা যেসং যেসং ধম্মানং হেতূ পচ্চযা উপ্পাদায, তং তং ঠানং, যে যে ধম্মা যেসং যেসং ধম্মানং ন হেতূ ন পচ্চযা উপ্পাদায, তং তং অট্ঠানন্তি পজানাতি. তং সন্ধাযাহ ‘‘ঠানঞ্চ…পে… জাননং এক’’ন্তি. কম্মসমাদানানন্তি কম্মং সমাদিযিত্ৰা কতানং কুসলাকুসলকম্মানং, কম্মঞ্ঞেৰ ৰা কম্মসমাদানং. ঠানসো হেতুসোতি পচ্চযতো চ হেতুতো চ. তত্থ গতিউপধিকালপযোগা ৰিপাকস্স ঠানং, কম্মং হেতু. সব্বত্থগামিনীপটিপদাজাননন্তি সব্বগতিগামিনিযা অগতিগামিনিযা চ পটিপদায মগ্গস্স জাননং, বহূসুপি মনুস্সেসু একমেৰ পাণং হনন্তেসু ‘‘ইমস্স চেতনা নিরযগামিনী ভৰিস্সতি, ইমস্স তিরচ্ছানযোনিগামিনী’’তি ইমিনা নযেন একৰত্থুস্মিম্পি কুসলাকুসলচেতনাসঙ্খাতানং পটিপত্তীনং অৰিপরীততো সভাৰজাননং. অনেকধাতুনানাধাতুলোকজাননন্তি চক্খুধাতুআদীহি কামধাতুআদীহি ৰা বহুধাতুনো, তাসংযেৰ ধাতূনং ৰিপরীততায নানপ্পকারধাতুনো খন্ধাযতনধাতুলোকস্স জাননং. পরসত্তানন্তি পরেসং সত্তানং. নানাধিমুত্তিকতাজাননন্তি হীনাদীহি অধিমুত্তীহি নানাধিমুত্তিকভাৰস্স জাননং. তেসংযেৰাতি পরসত্তানংযেৰ. ইন্দ্রিযপরোপরিযত্তজাননন্তি সদ্ধাদীনং ইন্দ্রিযানং পরভাৰস্স অপরভাৰস্স ৰুদ্ধিযা চেৰ হানিযা চ জাননং. ঝানৰিমোক্খসমাধিসমাপত্তীনন্তি পঠমাদীনং চতুন্নং ঝানানং, ‘‘রূপী রূপানি পস্সতী’’তিআদীনং অট্ঠন্নং ৰিমোক্খানং, সৰিতক্কসৰিচারাদীনং তিণ্ণং সমাধীনং, পঠমজ্ঝানসমাপত্তিআদীনঞ্চ নৰন্নং অনুপুব্বসমাপত্তীনং. সংকিলেসৰোদানৰুট্ঠানজাননন্তি হানভাগিযস্স, ৰিসেসভাগিযস্স ‘‘ৰোদানম্পি ৰুট্ঠানং, তম্হা তম্হা সমাধিম্হা ৰুট্ঠানম্পি ৰুট্ঠান’’ন্তি (ৰিভ. ৮২৮) এৰং ৰুত্তপগুণজ্ঝানস্স চেৰ ভৰঙ্গফলসমাপত্তীনঞ্চ জাননং. হেট্ঠিমং হেট্ঠিমঞ্হি পগুণজ্ঝানং উপরিমস্স উপরিমস্স পদট্ঠানং হোতি, তস্মা ৰোদানম্পি ‘‘ৰুট্ঠান’’ন্তি ৰুচ্চতি. ভৰঙ্গেন পন সব্বঝানেহি ৰুট্ঠানং হোতি. ফলসমাপত্তিযা নিরোধসমাপত্তিতো ৰুট্ঠানমেৰ সন্ধায ‘‘তম্হা তম্হা সমাধিম্হা ৰুট্ঠান’’ন্তি ৰুত্তং. পুব্বেনিৰাসজাননন্তি পুব্বেনিৰাসানুস্সতিঞাণেন নিৰুট্ঠক্খন্ধানং জাননং. চুতূপপাতজাননন্তি সত্তানং চুতিযা উপপত্তিযা চ যাথাৰতো জাননং. অযমেত্থ সঙ্খেপো, ৰিত্থারো পন ৰিসুদ্ধিমগ্গে ৰুত্তনযেনেৰ ৰেদিতব্বো. আসৰক্খযজাননং আসৰক্খযঞাণং, মগ্গঞাণন্তি অত্থো. যত্থ পনেতানি ৰিত্থারতো আগতানি সংৰণ্ণিতানি, তানি দস্সেন্তো ‘‘অভিধম্মে পনা’’তিআদিমাহ.

ব্যামোহভযৰসেন সরণপরিযেসনং সারজ্জনং সারদো, ব্যামোহভযং. ৰিগতো সারদো এতস্সাতি ৰিসারদো, তস্স ভাৰো ৰেসারজ্জং. তং পন ঞাণসম্পদং পহানসম্পদং দেসনাৰিসেসসম্পদং খেমং নিস্সায পৰত্তং চতুব্বিধং পচ্চৰেক্খণাঞাণং. তেনাহ ‘‘চতূসু ঠানেসূ’’তিআদি. চতূসূতি পরপরিকপ্পিতেসু ৰত্থূসু. পরপরিকপ্পিতেসু ৰা ৰত্থুমত্তেসু চোদনাকারণেসু. সম্মাসম্বুদ্ধস্স তে পটিজানতোতি ‘‘অহং সম্মাসম্বুদ্ধো’’তি এৰং পটিজানন্তেন তযা. ইমে ধম্মাতি ‘‘ইদং পঞ্চমং অরিযসচ্চং, অযং ছট্ঠো উপাদানক্খন্ধো, ইদং তেরসমং আযতন’’ন্তি ৰেদিতব্বা ইমে ধম্মা. অনভিসম্বুদ্ধা অপ্পটিৰিদ্ধত্তাতি.

তত্রাতি তস্মিং অনভিসম্বুদ্ধধম্মসঙ্খাতে চোদনাৰত্থুস্মিং. কোচীতি সমণাদীহি অঞ্ঞো ৰা যো কোচি. সহ ধম্মেনাতি সহ হেতুনা. ‘‘ধম্মপটিসম্ভিদা’’তিআদীসু ৰিয হেতুপরিযাযো ইধ ধম্ম-সদ্দো. হেতূতি চ উপ্পত্তিসাধনহেতু ৰেদিতব্বো, ন কারকো সম্পাপকো ৰা. নিমিত্তন্তি কারণং, তং পনেত্থ চোদনাৰত্থুমেৰ. ন সমনুপস্সামি সম্মাসম্বুদ্ধভাৰতো. খেমপ্পত্তোতি অখেমপ্পত্তরূপায চোদনায অনুপদ্দৰং পত্তো নিচ্চলভাৰপ্পত্তো. ৰেসারজ্জপ্পত্তোতি ৰিসারদভাৰপ্পত্তো. সেসেসুপি এসেৰ নযো. অযং পন ৰিসেসো – ইমে আসৰাতি কামাসৰাদীসু ইমে নাম আসৰা ন পরিক্খীণাতি আসৰক্খযৰচনেনেত্থ সব্বকিলেসপ্পহানং ৰুত্তং. ন হি সো কিলেসো অত্থি, যো সব্বসো আসৰেসু খীণেসু নপ্পহীযেয্য. অন্তরাযিকাতি অন্তরাযকরা, সগ্গৰিমোক্খাধিগমস্স অন্তরাযকরাতি অত্থো. ধম্মো হি যো সংকিলেসতো নিয্যাতি, সো ‘‘নিয্যানিকো’’তি ৰুত্তো. ধম্মে নিয্যন্তে তংসমঙ্গীপুগ্গলো নিয্যানিকোতি ৰোহরিতো হোতীতি তস্স পটিক্খিপন্তো ‘‘সো ন নিয্যাতী’’তি আহ. কথং পন দেসনাধম্মো নিয্যাতীতি ৰুচ্চতি? নিয্যানত্থসমাধানতো, সো অভেদোপচারেন ‘‘নিয্যাতী’’তি ৰুত্তো. অথ ৰা ‘‘ধম্মো দেসিতো’’তি অরিযধম্মস্স অধিপ্পেতত্তা ন কোচি ৰিরোধো.

উসভস্স ইদন্তি আসভং, অসন্তসনট্ঠেন আসভং ৰিযাতি আসভং, সেট্ঠট্ঠানং সব্বঞ্ঞুতং. আসভট্ঠানট্ঠাযিতায আসভা নাম পুব্ববুদ্ধা. সব্বঞ্ঞুতপটিজাননৰসেন অভিমুখং গচ্ছন্তি, চতস্সো ৰা পরিসা উপসঙ্কমন্তীতি আসভা. চতস্সোপি হি পরিসা বুদ্ধাভিমুখা এৰং তিট্ঠন্তি, ন তিট্ঠন্তি পরম্মুখা. ইদম্পীতি ‘‘উসভো’’তি ইদম্পি পদং. তস্সাতি নিসভস্স. যেসং বলুপ্পাদাৰট্ঠানানং ৰসেন উসভস্স আসভণ্ঠানং ইচ্ছিতং, ততো সাতিসযানং এৰ তেসং ৰসেন আসভণ্ঠানং হোতীতি দট্ঠব্বং. যং কিঞ্চি লোকে উপমং নাম বুদ্ধগুণানং নিদস্সনভাৰেন ৰুচ্চতি, সব্বং তং নিহীনমেৰ. তিট্ঠমানো চাতি অতিট্ঠন্তোপি তিট্ঠমানো এৰ পটিজানাতি নাম. উপগচ্ছতীতি অনুজানাতি.

অট্ঠ খো ইমাতি ইদং ৰেসারজ্জঞাণস্স বলদস্সনং. যথা হি ব্যত্তং পরিসং অজ্ঝোগাহেত্ৰা ৰিঞ্ঞূনং চিত্তং আরাধনসমত্থায কথায ধম্মকথিকস্স ছেকভাৰো পঞ্ঞাযতি, এৰং ইমা অট্ঠ পরিসা পত্ৰা সত্থু ৰেসারজ্জঞাণস্স বলং পাকটং হোতি. তেন ৰুত্তং ‘‘পরিসাসূ’’তি. খত্তিযপরিসাতি খত্তিযানং সন্নিপতিতানং সমূহো. এস নযো সব্বত্থ. মারপরিসাতি মারকাযিকানং সন্নিপতিতানং সমূহো. মারসদিসানং মারানং পরিসাতি মারপরিসা. সব্বা চেতা পরিসা উগ্গট্ঠানদস্সনৰসেন গহিতা. মনুস্সা হি ‘‘এত্থ রাজা নিসিন্নো’’তি ৰুত্তে পকতিৰচনম্পি ৰত্তুং ন সক্কোন্তি, কচ্ছেহি সেদা মুচ্চন্তি, এৰং উগ্গা খত্তিযপরিসা, ব্রাহ্মণা তীসু ৰেদেসু কুসলা হোন্তি, গহপতযো নানাৰোহারেসু চ অক্খরচিন্তায চ কুসলা, সমণা সকৰাদপরৰাদেসু কুসলা, তেসং মজ্ঝে ধম্মকথাকথনং নাম অতিৰিয ভারিযং. দেৰানং উগ্গভাৰে ৰত্তব্বমেৰ নত্থি. অমনুস্সোতি হি ৰুত্তমত্তে মনুস্সানং সকলসরীরং কম্পতি, তেসং রূপং দিস্ৰাপি সদ্দং সুত্ৰাপি সত্তা ৰিসঞ্ঞিতাপি হোন্তি. এৰং অমনুস্সপরিসা উগ্গা. ইতি চেতা পরিসা উগ্গট্ঠানদস্সনৰসেন ৰুত্তা. কস্মা পনেত্থ যামাদিপরিসা ন গহিতাতি? ভুসং কামাভিগিদ্ধতায যোনিসোমনসিকারৰিরহতো. যামাদযো হি উল়ারুল়ারে কামে পটিসেৰন্তা তত্থাভিগিদ্ধতায ধম্মস্সৰনায সভাৰেন চিত্তম্পি ন উপ্পাদেন্তি, মহাবোধিসত্তানং পন বুদ্ধানঞ্চ আনুভাৰেন আকড্ঢিযমানা কদাচি নেসং পযিরুপাসনাদীনি করোন্তি তাদিসে মহাসমযে. তেনেৰ হি ৰিমানৰত্থুদেসনাপি তংনিমিত্তা বহুলা নাহোসি. সেট্ঠনাদন্তি কেনচি অপ্পটিহতভাৰেন উত্তমনাদং. অভীতনাদন্তি ৰেসারজ্জযোগতো কুতোচি নিব্ভযনাদং. সীহনাদসুত্তেনাতি খন্ধিযৰগ্গে আগতেন সীহনাদসুত্তেন. সহনতোতি খমনতো. হননতোতি ৰিধমনতো ৰিদ্ধংসনতো. যথা ৰাতিআদি ‘‘সীহনাদসদিসং ৰা নাদং নদতী’’তি সঙ্খেপতো ৰুত্তস্স অত্থস্স ৰিঞ্ঞাপনং.

এতন্তি ‘‘ব্রহ্মচক্ক’’ন্তি এতং পদং. পঞ্ঞাপভাৰিতন্তি চিরকালপরিভাৰিতায পারমিতাপঞ্ঞায ৰিপস্সনাপঞ্ঞায চ উপ্পাদিতং. করুণাপভাৰিতন্তি ‘‘কিচ্ছং ৰতাযং লোকো আপন্নো’’তিআদিনযপ্পৰত্তায মহাকরুণায উপ্পাদিতং. যথা অভিনিক্খমনতো পভুতি মহাবোধিসত্তানং অরিযমগ্গাধিগমনৰিরোধিনী পটিপত্তি নত্থি, এৰং তুসিতভৰনতো নিযতভাৰাপত্তিতো চ পট্ঠাযাতি দুতিযততিযনযা চ গহিতা. ফলক্খণেতি অগ্গফলক্খণে. পটিৰেধনিট্ঠত্তা অরহত্তমগ্গঞাণং ৰজিরূপমতাযেৰ সাতিসযো পটিৰেধোতি ‘‘ফলক্খণে উপ্পন্নং নামা’’তি ৰুত্তং. তেন পটিলদ্ধস্সপি দেসনাঞাণস্স কিচ্চনিপ্ফত্তি পরস্স বুজ্ঝনমত্তেন হোতীতি ‘‘অঞ্ঞাসিকোণ্ডঞ্ঞস্স সোতাপত্তি…পে… ফলক্খণে পৰত্তনং নামা’’তি ৰুত্তং. ততো পরং পন যাৰ পরিনিব্বানা দেসনাঞাণপ্পৰত্তি, তস্সেৰ পৰত্তিতস্স ধম্মচক্কস্স ঠানন্তি ৰেদিতব্বং পৰত্তিতচক্কস্স চক্কৰত্তিনো চক্করতনস্স ঠানং ৰিয. উভযম্পীতি পি-সদ্দেন লোকিযদেসনাঞাণস্স ইতরেন অনঞ্ঞসাধারণতাৰসেন সমানতং সম্পিণ্ডেতি. উরসি জাততায উরসো সম্ভূতন্তি ওরসং ঞাণং.

ইতি রূপন্তি এত্থ ইতি-সদ্দো অনৰসেসতো রূপস্স সরূপনিদস্সনত্থোতি তস্স ‘‘ইদং রূপ’’ন্তি এতেন সাধারণতো চ সরূপনিদস্সনমাহ. এত্তকং রূপন্তি এতেন অনৰসেসতো ‘‘ইতো উদ্ধং রূপং নত্থী’’তি নিমিত্তস্স অঞ্ঞস্স অভাৰং. ইদানি তমত্থং ৰিত্থারতো দস্সেতুং ‘‘রুপ্পনসভাৰঞ্চেৰা’’তিআদি ৰুত্তং. তত্থ রুপ্পনং সীতাদিৰিরোধিপচ্চযসমৰাযে ৰিসদিসুপ্পত্তি. আদি-সদ্দেন অজ্ঝত্তিকবাহিরাদিভেদং সঙ্গণ্হাতি. লক্খণ…পে… ৰসেনাতি কক্খল়ত্তাদিলক্খণৰসেন সন্ধারণাদিরসৰসেন সম্পটিচ্ছনাদিপচ্চুপট্ঠানৰসেন ভূতত্তযাদিপদট্ঠানৰসেন চ. এৰং পরিগ্গহিতস্সাতি এৰং সাধারণতো চ লক্খণাদিতো চ পরিগ্গহিতস্স. অৰিজ্জাসমুদযাতি অৰিজ্জায উপ্পাদা, অত্থিভাৰাতি অত্থো. নিরোধৰিরোধী হি অত্থিভাৰো হোতি, তস্মা নিরোধে অসতি অত্থিভাৰো হোতি, তস্মা পুরিমভৰে সিদ্ধায অৰিজ্জায সতি ইমস্মিং ভৰে রূপস্স সমুদযো রূপস্স উপ্পাদো হোতীতি অত্থো. তণ্হাসমুদযা কম্মসমুদযাতি এত্থাপি এসেৰ নযো. অৰিজ্জাদীহি চ তীহি অতীতকালিকত্তা তেসং সহকারীকারণভূতং উপাদানম্পি গহিতমেৰাতি ৰেদিতব্বং. পৰত্তিপচ্চযেসু কবল়ীকারআহারস্স বলৰতায, সো এৰ গহিতো, ‘‘আহারসমুদযা’’তি পন গহিতেন পৰত্তিপচ্চযতামত্তেন উতুচিত্তানিপি গহিতানেৰ হোন্তীতি দ্ৰাদসসমুট্ঠানিকং রূপস্স পচ্চযতো দস্সনম্পি ভৰিতব্বমেৰাতি দট্ঠব্বং. নিব্বত্তিলক্খণন্তিআদিনা কালৰসেন উদযদস্সনমাহ. তত্থ ভূতৰসেন মগ্গে উদযং পস্সিত্ৰা ঠিতো ইধ সন্ততিৰসেন অনুক্কমেন খণৰসেন পস্সতি. অৰিজ্জানিরোধা রূপনিরোধোতি অগ্গমগ্গঞাণেন অৰিজ্জায অনুপ্পাদনিরোধতো অনাগতস্স অনুপ্পাদনিরোধো হোতি পচ্চযাভাৰে অভাৰতো. পচ্চযনিরোধেনাতি অৰিজ্জাসঙ্খাতস্স পচ্চযস্স নিরোধভাৰেন. তণ্হানিরোধাতি এত্থাপি এসেৰ নযো. আহারনিরোধাতি পৰত্তিপচ্চযস্স কবল়ীকারাহারস্স অভাৰা. রূপনিরোধাতি তংসমুট্ঠানরূপস্স অভাৰো হোতি. সেসং হেট্ঠা ৰুত্তনযানুসারেন ৰেদিতব্বং. ৰিপরিণামলক্খণন্তি ভৰকালৰসেন হেতুদ্ৰযদস্সনং. তস্মা তং পদট্ঠানৰসেন পগেৰ পস্সিত্ৰা ঠিতো ইধ সন্ততিৰসেন দিস্ৰা অনুক্কমেন খণৰসেন পস্সতি.

ইতি ৰেদনাতিআদীসুপি ৰুত্তনযেন অত্থো ৰেদিতব্বো. সুখাদিভেদন্তি সুখদুক্খঅদুক্খমসুখাদিৰিভাগং. রূপসঞ্ঞাদিভেদন্তি রূপসঞ্ঞা, সদ্দ… গন্ধ… রস… ফোট্ঠব্ব … ধম্মসঞ্ঞাদিৰিভাগং. ফস্সাদিভেদন্তি ফস্সচেতনামনসিকারাদিৰিভাগং. লক্খণ…পে… ৰসেনাতি ইট্ঠানুভৰনলক্খণাদিলক্খণৰসেন ইট্ঠাকারসম্ভোগরসাদিরসৰসেন কাযিকঅস্সাদাদিপচ্চুপট্ঠানৰসেন ইট্ঠারম্মণাদিপদট্ঠানৰসেন. ‘‘ফুট্ঠো ৰেদেতি, ফুট্ঠো সঞ্জানাতি, ফুট্ঠো চেতেতী’’তি (সং. নি. ৪.৯৩) ৰচনতো তীসু ৰেদনাদীসু খন্ধেসু ফস্সসমুদযাতি ৰত্তব্বং. ৰিঞ্ঞাণপ্পচ্চযা নামরূপ’’ন্তি ৰচনতো ৰিঞ্ঞাণক্খন্ধে নামরূপসমুদযাতি ৰত্তব্বং. তেসংযেৰ ৰসেনাতি ‘‘অৰিজ্জানিরোধো ৰেদনানিরোধো’’তিআদিনা তেসংযেৰ অৰিজ্জাদীনং ৰসেন যোজেতব্বং.

উপাদানক্খন্ধানং সমুদযত্থঙ্গমৰসেন তিত্থিযানং অৰিসযোপি সপ্পদেসো সীহনাদো দস্সিতো. ইদানি নিপ্পদেসো অনুলোমপটিলোমৰসেন সঙ্খেপতো ৰিত্থারতো পচ্চযাকারৰিসযো অনঞ্ঞসাধারণো দস্সীযতীতি আহ, ‘‘অযম্পি অপরো সীহনাদো’’তি. তস্সাতি ‘‘ইমস্মিং সতী’’তিআদিনা সঙ্খেপতো ৰুত্তপটিচ্চসমুপ্পাদপাল়িযা. এত্থ চ ‘‘ইমস্মিং সতি ইদং হোতি, ইমস্স নিরোধা ইদং নিরুঝ্তী’’তি অৰিজ্জাদীনং ভাৰে সঙ্খারাদীনং ভাৰস্স, অৰিজ্জাদীনং নিরোধে সঙ্খারাদীনং নিরোধস্স কথনেন পুরিমস্মিং পচ্চযলক্খণে নিযমো দস্সিতো ‘‘ইমস্মিং সতি এৰ, নাসতি, ইমস্স উপ্পাদা এৰ, নানুপ্পাদা, নিরোধা এৰ, নানিরোধা’’তি. তেনেদং লক্খণং অন্তোগধনিযমং ইধ পটিচ্চসমুপ্পাদস্স ৰুত্তন্তি দট্ঠব্বং. নিরোধোতি চ অৰিজ্জাদীনং ৰিরাগা ৰিগমেন আযতিং অনুপ্পাদো অপ্পৰত্তি. তথা হি ৰুত্তং ‘‘অৰিজ্জায ত্ৰেৰ অসেসৰিরাগনিরোধা’’তিআদি. নিরোধৰিরোধী চ উপ্পাদো, যেন সো উপ্পাদনিরোধৰিভাগেন ৰুত্তো ‘‘ইমস্স নিরোধা ইদং নিরুজ্ঝতী’’তি. তেনেতং দস্সেতি ‘‘অসতি নিরোধে উপ্পাদো নাম, সো চেত্থ অত্থিভাৰোতি ৰুচ্চতী’’তি. ‘‘ইমস্মিং সতি ইদং হোতী’’তি ইদমেৰ হি লক্খণং. পরিযাযন্তরেন ‘‘ইমস্স উপ্পাদা ইদং উপ্পজ্জতী’’তি ৰদন্তেন পরেন পুরিমং ৰিসেসিতং হোতি. তস্মা ন ৰত্তমানংযেৰ সন্ধায ‘‘ইমস্মিং সতী’’তি ৰুত্তং, অথ খো মগ্গেন অনিরুজ্ঝনসভাৰঞ্চাতি ৰিঞ্ঞাযতি. যস্মা চ ‘‘ইমস্মিং অসতি ইদং ন হোতি, ইমস্স নিরোধা ইদং নিরুজ্ঝতী’’তি দ্ৰিধাপি উদ্দিট্ঠস্স লক্খণস্স নিদ্দেসং ৰদন্তেন ভগৰতা ‘‘অৰিজ্জায ত্ৰেৰ অসেসৰিরাগনিরোধা সঙ্খারনিরোধো’’তিআদিনা নিরোধোৰ ৰুত্তো, তস্মা নত্থিভাৰোপি নিরোধো এৰাতি নত্থিভাৰৰিরুদ্ধো অত্থিভাৰো অনিরোধোতি দস্সিতং হোতি. তেন অনিরোধসঙ্খাতেন অত্থিভাৰেন উপ্পাদং ৰিসেসেতি. ততো ইধ ন কেৰলং অত্থিভাৰমত্তং উপ্পাদোতি অত্থো অধিপ্পেতো, অথ খো অনিরোধসঙ্খাতো অত্থিভাৰো চাতি অযমত্থো ৰিভাৰিতো হোতি. এৰমেতং লক্খণদ্ৰযৰচনং অঞ্ঞমঞ্ঞং ৰিসেসনৰিসেসিতব্বভাৰেন সাত্থকন্তি ৰেদিতব্বং. কো পনাযং অনিরোধো নাম, যো ‘‘অত্থিভাৰো, উপ্পাদো’’তি চ ৰুত্তোতি? অপ্পহীনভাৰো চ অনিব্বত্তিতফলভাৰেন ফলুপ্পাদনারহতা চাতি অযমেত্থ সঙ্খেপো. ৰিত্থারো পন পরমত্থদীপনিযং উদানট্ঠকথাযং (উদা. অট্ঠ. ১). ৰুত্তনযেন ৰেদিতব্বো.

পঞ্চক্খন্ধৰিভজনাদিৰসেনাতি পঞ্চন্নং উপাদানক্খন্ধানং দ্ৰাদসপদিকস্স পচ্চযাকারস্স ৰিভজনৰসেন. ইমস্মিঞ্হি দসবলসুত্তে ধম্মস্স দেসিতাকারো পঞ্চক্খন্ধপচ্চযাকারমত্তো. তেনাহ ‘‘পঞ্চক্খন্ধপচ্চযাকারধম্মো’’তি. আচরিযমুট্ঠিযা অকরণেন ৰিভূতো, সো পন অত্থতো চ সদ্দতো চ পিহিতো হেট্ঠামুখজাতো ৰা ন হোতীতি আহ ‘‘অনিকুজ্জিতো’’তি. ৰিৰটোতি ৰিভাৰিতো. তেনাহ ‘‘ৰিৰরিত্ৰা ঠপিতো’’তি. পকাসিতোতি ঞাণোভাসেন ওভাসিতো আদীপিতোতি আহ ‘‘দীপিতো জোতিতো’’তি. তত্থ তত্থ ছিন্নভিন্নট্ঠানে. সিব্বিতগণ্ঠিতন্তি ৰাকং গহেত্ৰা সিব্বিতং, সিব্বিতুং অসক্কুণেয্যট্ঠানে ৰাকেন গণ্ঠিতঞ্চ. ছিন্নপিলোতিকাভাৰেন ৰিগতপিলোতিকো ধম্মো, তস্স ছিন্নপিলোতিকস্স পটিলোমতা ছিন্নভিন্নতাভাৰেনাতি দস্সেন্তো ‘‘ন হেত্থা’’তিআদিমাহ. নিৰাসনপারুপনং পরিগ্গহণং. সযং পটিভানং কপ্পেত্ৰা. ৰড্ঢেন্তা অত্তনো সমযং. সমণকচৰরন্তি সমণৰেসধারণৰসেন সমণপটিরূপতায সমণানং কচৰরভূতং. অত্তনো রূপপৰত্তিযা করণ্ডং কুচ্ছিতং ধুত্তং ৰাতি পৰত্তেতীতি কারণ্ডৰো, দুস্সীলো. তং কারণ্ডৰং. নিদ্ধমথাতি নীহরথ. কসম্বুন্তি সমণকসটং. অপকস্সথাতি অপকড্ঢথ নন্তি অত্থো. পলাপেতি পলাপসদিসে. তথা হি তণ্ডুলসাররহিতো ধঞ্ঞপটিরূপকো থুসমত্তকো পলাপোতি ৰুচ্চতি, এৰং সীলাদিসাররহিতো সমণপটিরূপকো পলাপো ৰিযাতি পলাপো, দুস্সীলো. তে পলাপে. ৰাহেথাতি অপনেথ. পতিস্সতাতি বাল়্হসতিতায পতিস্সতা হোথাতি.

সদ্ধায পব্বজিতেনাতি রাজূপদ্দৰাদীহি অনুপদ্দুতেন ‘‘এৰঞ্হি তং ওতিণ্ণং জাতিআদিসংসারভযং ৰিজিনিস্সামী’’তি ৰট্টনিস্সরণত্থং আগতায সদ্ধায ৰসেন পব্বজিতেন. আচারকুলপুত্তোতি আচারেন অভিজাতো. তেনাহ ‘‘যতো কুতোচী’’তিআদি. জাতিকুলপুত্তোতি জাতিসম্পত্তিযা অভিজাতো. ৰিঞ্ঞুপ্পসত্থানি অঙ্গানি সম্মাপধানিযঙ্গভাৰেন, কাযে চ জীৰিতে চ নিরপেক্খভাৰেন ৰীরিযং আরভন্তস্স তথাপৰত্তৰীরিযৰসেন ‘‘তচো একং অঙ্গ’’ন্তি ৰুত্তং. এস নযো সেসেসুপি. নৰসু ঠানেসু সমাধাতব্বন্তি ‘‘কালৰসেন পঞ্চসু, ইরিযাপথৰসেন চতূসূ’’তি এৰং নৰসু ঠানেসু ৰীরিযং সমাধাতব্বং পৰত্তেতব্বং.

সো দুক্খং ৰিহরতীতি কুসীতপুগ্গলো নিয্যানিকসাসনে ৰীরিযারম্ভস্স অকরণেন সামঞ্ঞত্থস্স অনুপ্পত্তিযা দুক্খং ৰিহরতি. সকং ৰা অত্থং সদত্থং ক-কারস্স দ-কারং কত্ৰা. কুসীতস্স অত্থপরিহাযনং মূলতো পট্ঠায দস্সেতুং ‘‘ছ দ্ৰারানী’’তিআদি ৰুত্তং. নিসজ্জাৰসেন পীঠমদ্দনতো পীঠমদ্দনো, নিরস্সনৰচনং তস্স, কস্সচিপত্থস্স অধারণতো কেৰলং পীঠভারভূতোতি অধিপ্পাযো. অঞ্ঞত্থ পন ‘‘মখমদ্দনো’’তি ৰুচ্চতি, তত্থ দানমিচ্ছায পরেসং মখং পস্সন্তোতি অত্থো. লণ্ডপূরকোতি কুচ্ছিপূরং ভুঞ্জিত্ৰা ৰচ্চকুটিপূরকো.

‘‘আরদ্ধৰীরিযো’’তিআদীসু ‘‘কুসীতো পুগ্গলো’’তি এত্থ ৰুত্তৰিপরিযাযেন অত্থো ৰেদিতব্বো, আসীসায ৰসেন থোমিতো. আরদ্ধৰীরিযেতি পগ্গহিতৰীরিযে. পহিতত্তেতি নিব্বানং পতিপেসিতচিত্তে. এতেন সাৰকানং সম্মাপটিপত্তিং সত্থুৰন্দনানিসংসঞ্চ দস্সেসি.

হীনেনাতি ৰট্টনিস্সিতেন ধম্মেন. তেনাহ ‘‘হীনায সদ্ধাযা’’তিআদি. অগ্গেনাতি সেট্ঠেন ৰিৰট্টনিস্সিতেন ধম্মেন, ঈসকম্পি কতকালুসিযৰিগতট্ঠেন মণ্ডট্ঠেন চ পসন্নম্পি সুরাদি ন পাতব্বং. সাসনন্তি পরিযত্তিপটিপত্তিপটিৰেধলক্খণং সাসনং. পসন্নং ৰিগতদোসমলত্তা পসাদনিযত্তা চ. পাতব্বঞ্চ পত্তেন ৰিয সুখেন পরিভুঞ্জিতব্বতো দুচ্চরিতসব্বকিলেসকসাৰমলপঙ্কদোসরহিতত্তা চ.

মণ্ডভূতা বোধিপক্খিযধম্মদেসনাপি দেসনামণ্ডো. তস্স একস্সেৰ পন দেসনামণ্ডস্স পটিগ্গাহকা সুপ্পটিপন্না দোসরহিতা চতস্সো পরিসা পটিগ্গহমণ্ডো. মগ্গব্রহ্মচরিযং তগ্গতিকত্তা সকলোপি বোধিপক্খিযধম্মরাসি ব্রহ্মচরিযমণ্ডো. তেনাহ ‘‘কতমো দেসনামণ্ডো’’তিআদি. তত্থ ৰিঞ্ঞাতারোতি সচ্চানং অভিসমেতাৰিনো. তথা হি আদিতো ‘‘চতুন্নং অরিযসচ্চানং আচিক্খণা’’তিআদি ৰুত্তং. পুব্বভাগে ‘‘অত্থি অযং লোকো’’তিআদিনা ইধলোকপরলোকগতসম্মোসৰিগমেন পৰত্তো অধিমোক্খোৰ অধিমোক্খমণ্ডো. ছড্ডেত্ৰা সমুচ্ছেদৰসেন ৰিজহিত্ৰা. চতুভূমকস্স সদ্ধিন্দ্রিযস্স অধিমোক্খমণ্ডেন মণ্ডভূতং অধিমোক্খং. আদি-সদ্দেন ‘‘পগ্গহমণ্ডো ৰীরিযিন্দ্রিযং কোসজ্জকসট’’ন্তিআদিং পাল়িসেসং সঙ্গণ্হাতি. এত্থাতি এতস্মিং সাসনে, ‘‘মণ্ডস্মি’’ন্তি ৰা ৰচনে. কারণৰচনং, তেন ‘‘সত্থা সম্মুখীভূতো’’তি সম্মুখভাৰনাযোগো নিরাসঙ্কফলাৰহোতি দস্সেতি. তেনাহ ‘‘অসম্মুখা’’তিআদি. পমাণন্তি অনুরূপং ভেসজ্জস্স পমাণং. উগ্গমনন্তি ভেসজ্জস্স ৰমনং ৰিরেচনং, তস্স ৰা ৰসেন দোসধাতূনং ৰমনং ৰিরেচনং. এৰমেৰাতি যথা ভেসজ্জমণ্ডং ৰেজ্জসম্মুখা নিরাসঙ্কা পিৰন্তি, এৰমেৰ ‘‘সত্থা সম্মুখীভূতো’’তি নিরাসঙ্কা ৰীরিযং কত্ৰা, মণ্ডপেয্য সাসনং পিৰথাতি যোজনা. অভিঞ্ঞাসমাপত্তিপটিলাভেন সানিসংসা. মগ্গফলাধিগমনেন সৰড্ঢি. পরত্থন্তি অত্তনো দিট্ঠানুগতিআপত্তিযা, তথা সম্মাপটিপজ্জন্তানং পরেসং অত্থন্তি এৰমেত্থ অত্থো দট্ঠব্বো.

দুতিযদসবলসুত্তৰণ্ণনা নিট্ঠিতা.

৩. উপনিসসুত্তৰণ্ণনা

২৩. জানতো পস্সতোতি এত্থ দস্সনং পঞ্ঞাচক্খুনাৰ দস্সনং অধিপ্পেতং, ন মংসচক্খুনাতি আহ ‘‘দ্ৰেপি পদানি একত্থানী’’তি. এৰং সন্তেপীতি পদদ্ৰযস্স একত্থত্তেপি ঞাণলক্খণঞাণপ্পভাৰৰিসযস্স্স তথাদস্সনভাৰাৰিরোধনাতি অত্থো. তেনাহ ‘‘জাননলক্খণঞ্হি ঞাণ’’ন্তিআদি. ঞাণপ্পভাৰন্তি ঞাণানুভাৰেন ঞাণকিচ্চৰিসযোভাসন্তি অত্থো. তেনাহ ‘‘ঞাণেন ৰিৰট্টে ধম্মে পস্সতী’’তি. জানতো পস্সতোতি চ জাননদস্সনমুখেন পুগ্গলাধিট্ঠানা দেসনা পৰত্তাতি আহ – ‘‘ঞাণলক্খণং উপাদাযা’’তিআদি. জানতোতি ৰা পুব্বভাগঞাণেন জানতো, অপরভাগেন ঞাণেন পস্সতো. জানতোতি ৰা ৰত্ৰা ন জাননং অনুস্সৰাকারপরিৰিতক্কমত্তৰসেন ইধাধিপ্পেতং, অথ খো রূপানি ৰিয চক্খুৰিঞ্ঞাণেন রূপাদীনি তেসঞ্চ সমুদযাদিকে পচ্চক্খে কত্ৰা দস্সনন্তি ৰিভাৰেতুং ‘‘পস্সতো’’তি ৰুত্তন্তি এৰং ৰা এত্থ অত্থো.

আসৰানং খযন্তি আসৰানং অচ্চন্তপ্পহানং. সো পন তেসং অনুপ্পাদনিরোধো সব্বেন সব্বং অভাৰো এৰাতি আহ ‘‘অসমুপ্পাদো খীণাকারো নত্থিভাৰো’’তি. আসৰক্খযসদ্দস্স খীণাকারাদীসু আগতট্ঠানং দস্সেতুং ‘‘আসৰানং খযা’’তিআদি ৰুত্তং. উজুমগ্গানুসারিনোতি কিলেসৰঙ্ককাযৰঙ্কাদীনং পহানেন উজুভূতে সৰিপস্সনাহেট্ঠিমমগ্গধম্মে অনুস্সরন্তস্স. যদেৰ হিস্স পরিক্খীণং. খযস্মিং পঠমং ঞাণং ‘‘ততো অঞ্ঞা অনন্তরা’’তি খযসঙ্খাতে অগ্গমগ্গে তপ্পরিযাপন্নমেৰ ঞাণং পঠমং উপ্পজ্জতি, তদনন্তরং পন অঞ্ঞা অরহত্তন্তি. যদিপি গাথায ‘‘খযস্মিং’’ইচ্চেৰ ৰুত্তং, সমুচ্ছেদৰসেন পন ‘‘আসৰে খীণে মগ্গো খযো’’তি ৰুচ্চতীতি আহ ‘‘মগ্গো আসৰক্খযোতি ৰুত্তো’’তি. সমণোতি সমিতপাপো অধিপ্পেতো, সো পন খীণাসৰো হোতীতি. ‘‘আসৰানং খযা’’তি ইধ ফলং, পরিযাযেন পন আসৰক্খযো মগ্গো, তেন পত্তব্বতো ফলং. এতেনেৰ নিব্বানস্সপি আসৰক্খযভাৰো ৰুত্তোতি ৰেদিতব্বো.

জানতো এৰ পস্সতো এৰাতি এৰমেত্থ নিযমো ইচ্ছিতো, ন অঞ্ঞথা ৰিসেসাভাৰতো অনিট্ঠাপন্নোৰাতি তস্স নিযমস্স ফলং দস্সেতুং ‘‘নো অজানতো নো অপস্সতো’’তি ৰুত্তন্তি আহ ‘‘যো পন ন জানাতি, ন পস্সতি, তস্স নো ৰদামীতি অত্থো’’তি. ইমিনা খন্ধানং পরিঞ্ঞা আসৰক্খযস্স একন্তিককারণন্তি দস্সেতি. এতেনাতি ‘‘নো অজানতো, নো অপস্সতো’’তি এতেন ৰচনেন. তে পটিক্খিত্তাতি কে পন তেতি? ‘‘বালে চ পণ্ডিতে চ সন্ধাৰিত্ৰা সংসরিত্ৰা দুক্খস্সন্তং করিস্সন্তি (দী. নি. ১.১৬৮; ম. নি. ২.২২৮) অহেতূ অপ্পচ্চযা সত্তা ৰিসুজ্ঝন্তী’’তি (দী. নি. ১.১৬৮; ম. নি. ২.১০১, ২২৭) এৰমাদিৰাদা. তেসু কেচি অভিজাতিসঙ্কন্তিমত্তেন সংসারসুদ্ধিং পটিজানন্তি, অঞ্ঞে ইস্সরপজাপতিকারণাদিৰসেন. তযিদং সব্বং সংসারাদীহীতি এত্থেৰ সঙ্গহিতন্তি দট্ঠব্বং. পুরিমেন পদদ্ৰযেনাতি ‘‘জানতো পস্সতো’’তি ইমিনা পদদ্ৰযেন. উপাযো ৰুত্তো ‘‘আসৰক্খযা’’তি অধিকারতো. ইমিনাতি ‘‘নো অজানতো, নো অপস্সতো’’তি ইমিনা পদদ্ৰযেন. অনুপাযো হোতি এস আসৰানং খযস্স, যদিদং পঞ্চন্নং খন্ধানং অপরিঞ্ঞাতি ‘‘জানতো পস্সতো’’তি ইমিনাৰ অনিযমৰচনেন অনুপাযপটিসেধোপি অত্থতো বোধিতো হোতীতি. তমেৰ হি অত্থতো বোধিতভাৰং ৰিভাৰেতুং এৰং সংৰণ্ণনা কতাতি দট্ঠব্বং.

দব্বজাতিকোতি দব্বরূপো. সো হি ‘‘দ্রব্যো’’তি ৰুচ্চতি ‘‘দ্রব্যং ৰিনস্সতি নাদ্রব্য’’ন্তিআদীসু. দব্বজাতিকো ৰা সারসভাৰো, সারুপ্পসীলাচারোতি অত্থো. যথাহ ‘‘ন খো দব্ব দব্বা এৰং নিব্বেঠেন্তী’’তি (পারা. ৩৮৪). ৰত্তসীসে ঠত্ৰাতি ৰত্তং উত্তমং ধুরং কত্ৰা. যো হি পরিসুদ্ধাজীৰো কাতুং অজানন্তানং সব্রহ্মচারীনং অত্তনো ৰা ৰস্সৰাতাদিপটিবাহনত্থং ছত্তাদীনি করোতি, সো ৰত্তসীসে ঠত্ৰা করোতি নাম. পদট্ঠানং ন হোতীতি ন ৰত্তব্বং নাথকরণধম্মভাৰেন মগ্গফলাধিগমস্স উপনিস্সযভাৰতো. ৰুত্তঞ্হি ‘‘যানি তানি সব্রহ্মচারীনং উচ্চাৰচানি কিচ্চকরণীযানি, তত্থ দক্খো হোতী’’তিআদি (দী. নি. ৩.৩৪৫). এৰং জানতোতি এৰং ৰেজ্জকম্মাদীনং জাননহেতু মিচ্ছাজীৰপচ্চযা কামাসৰাদযো আসৰা ৰড্ঢন্তিযেৰ, ন পহীযন্তি. ‘‘এৰং খো…পে… আসৰানং খযো হোতী’’তি ইমায পাল়িযা অরহত্তস্সেৰ গহণং যুত্তং ফলগ্গহণেন হেতুনো অৰুত্তসিদ্ধত্তা. তেনাহ ‘‘আসৰানং খযন্তে জাতত্তা’’তি.

আগমনং আগমো, তং আৰহতীতি আগমনীযা, পুব্বভাগপটিপদা. খযস্মিন্তি ভাৰেনভাৰলক্খণে ভুম্মং, খযেতি পন ৰিসযে. তেনাহ ‘‘আসৰক্খযসঙ্খাতে’’তি. উপনিসীদতি ফলং এত্থাতি কারণং উপনিসা. অরহত্তফলৰিমুত্তি উক্কট্ঠনিদ্দেসতো. সাতি ৰিমুত্তি. অস্সাতি পচ্চৰেক্খণঞাণস্স. মনস্মিং ৰিৰট্টনিস্সিতে পন অনন্তরূপনিস্সযাপি পচ্চযা সম্ভৰন্তীতি ‘‘লব্ভমানৰসেন পচ্চযভাৰো ৰেদিতব্বো’’তি ৰুত্তং.

ৰিরজ্জতি অসেসসঙ্খারতো এতেনাতি ৰিরাগো, মগ্গো. নিব্বিন্দতি এতাযাতি নিব্বিদা, বলৰৰিপস্সনা. তেনাহ ‘‘এতেনা’’তিআদি. পটিসঙ্খানুপস্সনাপি মুচ্চিতুকম্যতাপক্খিকা এৰাতি অধিপ্পাযেন ‘‘চতুন্নং ঞাণানং অধিৰচন’’ন্তি ৰুত্তং. ‘‘যাৰ মগ্গামগ্গঞাণদস্সনৰিসুদ্ধি, তাৰ তরুণৰিপস্সনা’’তি হি ৰচনতো উপক্কিলেসৰিমুত্তউদযব্বযঞাণতো পরং বলৰৰিপস্সনা. রূপারূপধম্মানং ৰিসেসভূতো সামঞ্ঞভূতো চ যো যো সভাৰো যথাসভাৰো, তস্স জাননং যথাসভাৰজাননং. তদেৰ দস্সনং. পচ্চক্খকরণত্থেন ঞাতপরিঞ্ঞা তীরণপরিঞ্ঞা চ গহিতা হোতি. তেনাহ ‘‘তরুণৰিপস্সন’’ন্তিআদি. সঙ্খারপরিচ্ছেদেঞাণন্তি নামরূপপরিগ্গহঞাণং ৰদতি. কঙ্খাৰিতরণং পচ্চযপরিগ্গহো ধম্মট্ঠিতিঞাণন্তিপি ৰুচ্চতি. নযৰিপস্সনাদিকং অনুপস্সনাঞাণং সম্মসনং. মগ্গামগ্গেঞাণন্তি মগ্গামগ্গং ৰৰত্থপেত্ৰা ঠিতং ঞাণং. সো হি পাদকজ্ঝানসমাধি তরুণৰিপস্সনায পচ্চযো হোতি. ‘‘সমাহিতো যথাভূতং পজানাতি পস্সতী’’তি (সং. নি. ৩.৫.; ৪.৯৯; ৫.১০৭১) হি ৰুত্তং.

পুব্বভাগসুখন্তি উপচারজ্ঝানসহিতসুখং. দরথ পটিপ্পস্সদ্ধীতি কামচ্ছন্দাদিকিলেসদরথস্স পটিপস্সম্ভনং. ‘‘সুখংপাহং, ভিক্খৰে, সউপনিসং ৰদামী’’তি এত্থ অধিপ্পেতসুখং দস্সেতুং ‘‘অপ্পনাপুব্বভাগস্স সুখস্সা’’তি ৰুত্তং. ‘‘পস্সদ্ধকাযো সুখং ৰেদেতী’’তি (দী. নি. ১.৪৬৬;৩.৩৫৯; অ.নি. ১.৩.৯৬) ৰুত্তঅপ্পনাসুখস্স পস্সদ্ধিযা পচ্চযত্তে ৰত্তব্বমেৰ নত্থি. সুখন্তি এত্থাপি এসেৰ নযো. বলৰপীতীতি ফরণলক্খণপ্পত্তা পীতি. তাদিসা হি ৰিতক্কৰিচারসুখসমাধীহি লদ্ধপ্পচ্চযা নীৰরণং ৰিক্খম্ভন্তী তংনিমিত্তং দরথং পরিল়াহং পটিপস্সম্ভেতি. তেনাহ ‘‘সা হি দরথপ্পস্সদ্ধিযা পচ্চযো হোতী’’তি. দুব্বলপীতীতি তরুণপীতি. তেনাহ ‘‘সা হি বলৰপীতিযা পচ্চযো হোতী’’তি. সদ্ধাতি রতনত্তযগুণানং কম্মফলস্স চ সদ্দহনৰসেন পৰত্তো অধিমোক্খো, সা পন যস্মা অত্তনো ৰিসযে পুনপ্পুনং উপ্পজ্জতি, ন একৰারমেৰ, তস্মা আহ ‘‘অপরাপরং উপ্পজ্জনসদ্ধা’’তি. যস্মা সদ্দহন্তো সদ্ধেয্যৰত্থুস্মিং পমুদিতো হোতি, তস্মা আহ ‘‘সা হি দুব্বলপীতিযা পচ্চযো হোতী’’তি. দুক্খদুক্খাদিভেদস্স সব্বস্সপি দুক্খস্স ৰট্টদুক্খন্তোগধত্তা তস্স চ ইধাধিপ্পেতত্তা ৰুত্তং ‘‘দুক্খন্তি ৰট্টদুক্খ’’ন্তি. জরামরণদুক্খন্তি কেচি, সোকাদযো চাতি অপরে. তদুভযস্সপি সঙ্গণ্হনতো পঠমো এৰত্থো যুত্তো. যস্মা দুক্খপ্পত্তো কম্মস্স ফলানি সদ্দহতি, রতনত্তযে চ পসাদং উপ্পাদেতি, তস্মা ৰুত্তং ‘‘তঞ্হি অপরাপরসদ্ধায পচ্চযো হোতী’’তি. যস্মা ‘‘আচরিযানং সন্তিকে ধম্মং সুত্ৰা পৰত্তিদুক্খ’’ন্তি চিন্তযতো ‘‘একন্ততো অযং ধম্মো ইমস্স দুক্খস্স সমতিক্কমায হোতী’’তি সদ্ধা উপ্পজ্জতি. তেনাহ ‘‘ধম্মং সুত্ৰা তথাগতে সদ্ধং পটিলভতী’’তিআদি (দী. নি. ১.১৯১). সৰিকারাতি উপ্পাদৰিকারেন সৰিকারা খন্ধজাতি জাযনট্ঠেন. জাতিযা পন অসতি তত্থ তত্থ ভৰে নত্থি দুক্খস্স সম্ভৰোতি আহ ‘‘সা হি ৰট্টদুক্খস্স পচ্চযো’’তি. কম্মভৰোতি কম্মভৰাদিকো তিৰিধোপি কম্মভৰো. সো হি উপপত্তিভৰস্স পচ্চযো. এৰমাদিং সন্ধাযাহ ‘‘এতেনুপাযেনা’’তি. সেসপদানীতি উপাদানাদিপদানি. অনুলোমঞাণং সঙ্খারুপেক্খাপক্খিকত্তা নিব্বানগ্গহণেন গহিতং, গোত্রভুঞাণং পঠমমগ্গস্স আৰজ্জনং. সো হি তেন ৰিপস্সনায কিঞ্চি কিঞ্চি ৰিসেসট্ঠানং কযিরতীতি তং অনামসিত্ৰা নিব্বিদূপনিসো ৰিরাগোতি ‘‘ৰিরাগো’’ইচ্চেৰ ৰুত্তং.

কেন উদকেন ৰিদারযিত্ৰা গতপদেসোতি কত্ৰা কন্দরো. নিতম্বোতিপি উদকস্স. যথা নিন্নং উদকং পৰত্ততি, তথা নিৰত্তনভাৰেন নদীকুঞ্ছোতিপি ৰুচ্চতি. হেমন্তগিম্হউতুৰসেন অট্ঠ মাসে পৰত্তো পথৰীৰিৰরোতি কত্ৰা পদরো. খুদ্দিকা উদকৰাহিনিযো সাখা ৰিযাতি সাখা, খুদ্দকা সোব্ভা কুসুব্ভা ও-কারস্স উ-কারং কত্ৰা. এৰমেৰ খোতিআদি ‘‘সেয্যথাপি, ভিক্খৰে’’তিআদিনা উপনীতায উপমায উপমেয্যেন সংসন্দনন্তি, তং যোজেত্ৰা দস্সেতুং ‘‘অৰিজ্জা পব্বতোতি দট্ঠব্বা’’তিআদি ৰুত্তং. তত্থ অৰিজ্জা চ সন্তানৰসেন চিরংতনকালপ্পৰত্তনতো পচুরজনেহি দুপ্পজহনতো ‘‘পব্বতো’’তি ৰুত্তা. লোকত্তযাভিব্যাপনতো অভিসন্দনতো চ অভিসঙ্খারা মেঘসদিসা. অভিসঙ্খারা মেঘোতি দট্ঠব্বাতি আনেত্ৰা সম্বন্ধো. তথা সেসপদদ্ৰযেপি. ৰিঞ্ঞাণাদিৰট্টং অনুপৰত্তিতো পরম্পরপচ্চযতো চ কন্দরাদিসদিসা. ৰিমুত্তি একরসত্তা, হানিৰুদ্ধিঅভাৰতো চ সাগরসদিসাতি উপমাসংসন্দনং.

তত্থ যস্মা পুরিমসিদ্ধায অৰিজ্জায সতি অভিসঙ্খারা, নাসতি, তস্মা তে উপরিপব্বতে পৰত্তা ৰিয হোন্তীতি ৰুত্তং ‘‘অৰিজ্জা…পে… ৰস্সনং ৰেদিতব্ব’’ন্তি. অস্সুতৰা হীতিআদি ৰুত্তস্সেৰ অত্থস্স সমত্থনং. তণ্হায অভিলাসং কত্ৰাতি এতেন সব্বস্সপি অভিসঙ্খারৰুট্ঠিতেমনত্থং দীপেতি. তণ্হা হি ‘‘স্নেহো’’তি ৰুত্তা. অন্তিমভৰিকস্স অন্তভৰনিব্বত্তকো অভিসঙ্খারো নিব্বানং ন পত্তো, তদন্তস্স ভাগস্স নিব্বানং আহচ্চ ঠিতো ৰিয হোতীতি ‘‘মহাসমুদ্দং আহচ্চ ঠিতকালো ৰিযা’’তি উপমানিদস্সনং কতং. ৰিঞ্ঞাণাদিৰট্টং পূরেত্ৰাপি ইমিনাপি হি অন্তিমভৰিকস্সেৰ ৰিঞ্ঞাণপ্পৰত্তি দস্সিতা. সা হি পূরিতাতি ৰত্তব্বা ততো পরং ৰিঞ্ঞাণাদিৰট্টস্সেৰ অভাৰতো. জাতস্স পুগ্গলস্স জাতিপচ্চযৰট্টদুক্খৰেদনায ধম্মস্সৰনং ইচ্ছিতব্বং, তং পন যদিপি ইমস্মিং সুত্তে ন আগতং, সুত্তন্তরেসু পন আগতমেৰাতি ততো আহরিত্ৰা তং ৰত্তব্বন্তি দস্সেন্তো ‘‘বুদ্ধৰচনং পনা’’তিআদিমাহ. তযিদং সাৰকবোধিসত্তানং ৰসেনাযং দেসনাতি কত্ৰা ৰুত্তং. ইতরেসং পন ৰসেন ৰুচ্চমানং সুত্তন্তরগ্গহণত্থং পযোজনং নত্থীতি ‘‘যা হী’’তিআদিমাহ. পাল়িযা ৰসেন গহিতমেৰাতি সঙ্খেপতো ৰুত্তঅত্থস্স ৰিত্থারতো দস্সনং. নিব্বত্তীতি নিব্বত্তমানা খন্ধা গহিতাতি আহ ‘‘সৰিকারা’’তি. অনিচ্চতালক্খণাদিদীপনতো লক্খণাহটং. কম্মাকম্মন্তি ৰিনিচ্ছযং. নিজ্জটন্তি নিগ্গুম্বং, সুদ্ধন্তি অত্থো. পথৰীকসিণাদীসু কম্মং আরভতীতিআদি পাল়িযং সমথপুব্বঙ্গমা ৰিপস্সনা দস্সিতাতি কত্ৰা ৰুত্তং. এৰঞ্হি পামোজ্জাদিদস্সনং সম্ভৰতীতি. দেৰস্সাতি মেঘস্স. কস্মা পনেত্থ ‘‘খীণাসৰস্স…পে… ঠিতকালো ৰেদিতব্বো’’তি ৰুত্তং, ননু পুব্বে দেৰট্ঠানিযো অভিসঙ্খারো ৰুত্তো, ন অভিসঙ্খারো খীণাসৰোতি? নাযং দোসো, কারণূপচারেন ফলস্স ৰুত্তত্তা. অভিসঙ্খারমূলকো হি খন্ধসন্তানো খন্ধসন্তানে চ উচ্ছিন্নসংযোগে খীণাসৰসমঞ্ঞাতি.

উপনিসসুত্তৰণ্ণনা নিট্ঠিতা.

৪. অঞ্ঞতিত্থিযসুত্তৰণ্ণনা

২৪. সোতি সারিপুত্তত্থেরো. যদি ন তাৰ পৰিট্ঠো, কস্মা ‘‘পাৰিসী’’তি ৰুত্তন্তি আহ ‘‘পৰিসিস্সামী’’তিআদি. তেন অৰস্সম্ভাৰিনি ভূতে ৰিয উপচারো হোতীতি দস্সেতি. ইদানি তমত্থং উপমায ৰিভাৰেন্তো ‘‘যথা কি’’ন্তিআদিমাহ. অতিপ্পগোযেৰ নিক্খন্তদিৰসোতি পকতিযা ভিক্খাচরণৰেলায অতিৰিয পাতো এৰ ৰিহারতো নিক্খন্তদিৰসভাগো. এতদহোসীতি এতং ‘‘অতিপ্পগো খো’’তিআদিকং চিন্তনং অহোসি. দক্খিণদ্ৰারস্সাতি রাজগহনগরে দক্খিণদ্ৰারস্স ৰেল়ুৰনস্স চ অন্তরা অহোসি, তস্মা ‘‘তেনুপসঙ্কমিস্স’’ন্তি চিন্তনা অহোসীতি অধিপ্পাযো. কিং ৰাদীতি চতূসু ৰাদেসু কতরং ৰাদং ৰদসি. কিমক্খাযীতি তস্সেৰ ৰেৰচনং. কিং ৰদতীতি পন চত্তারো ৰাদে সামঞ্ঞতো গহেত্ৰা নপুংসকলিঙ্গেন ৰদতি যথা কিং তে জাতলিঙ্গং. সব্বনামঞ্হেতং, যদিদং নপুংসকলিঙ্গং. ৰদতি এতেনাতি ৰাদো, দস্সনং. তং সন্ধাযাহ ‘‘কিং এত্থ…পে… দস্সনন্তি পুচ্ছন্তী’’তি. ‘‘ধম্মপটিসম্ভিদা’’তিআদীসু ৰিয ধম্ম-সদ্দো হেতুঅত্থোতি আহ ‘‘যং ৰুত্তং কারণং, তস্স অনুকারণ’’ন্তি. ৰাদস্স ৰচনস্স অনুপ্পত্তি ৰাদপ্পৰত্তি.

ইদং ৰচনন্তি ‘‘একমিদাহ’’ন্তিআদিৰচনং. সাতি ‘‘একে সমণব্রাহ্মণা কম্মৰাদা’’তি এৰং পৰত্তকথা. অচ্ছরং অঙ্গুলিফোটনং অরহতীতি অচ্ছরিযং. অব্ভুতন্তি নিরুত্তিনযেন পদসিদ্ধি দট্ঠব্বা. সব্বৰাদানন্তি সব্বেসং চতুব্বিধৰাদানং. পঠমো হেত্থ সস্সতৰাদো, দুতিযো উচ্ছেদৰাদো, ততিযো একচ্চসস্সতৰাদো, চতুত্থো অধিচ্চসমুপ্পন্নৰাদো, তেসং সব্বেসং পটিক্খেপতো পটিক্খেপকারণং ৰুত্তং. পটিচ্চসমুপ্পাদকিত্তনং ৰা পচুরজনঞাণস্স অলব্ভনেয্যপতিট্ঠতায গম্ভীরঞ্চেৰ, তথা অৰভাসনতো চেতসি উপট্ঠানতো গম্ভীরাৰভাসঞ্চ করোন্তো. তদেৰ পদন্তি ফস্সপদংযেৰ আদিভূতং গহেত্ৰা.

অঞ্ঞতিত্থিযসুত্তৰণ্ণনা নিট্ঠিতা.

৫. ভূমিজসুত্তৰণ্ণনা

২৫. পুরিমসুত্তেতি অনন্তরে পুরিমে সুত্তে. ৰুত্তনযেনেৰ ৰেদিতব্বন্তি পদত্থে ততো ৰিসিট্ঠং অনিদ্দিসিত্ৰা ইতরং অত্থতো ৰিভাৰেতুং ‘‘অযং পন ৰিসেসো’’তিআদিমাহ. ন কেৰলং ফস্সপচ্চযা উপ্পজ্জতি, অথ খো ফস্সস্স সহকারীকারণভূতঅঞ্ঞপচ্চযা চ উপ্পজ্জতীতি. কাযেনাতি চোপনকাযেন, কাযৰিঞ্ঞত্তিযাতি অত্থো. সা হি কামং পট্ঠানে আগতেসু চতুৰীসতিযা পচ্চযেসু কেনচি পচ্চযেন চেতনায পচ্চযো ন হোতি. যস্মা পন কাযে সতি এৰ কাযকম্মং নাম হোতি, নাসতি, তস্মা সা তস্সা সামগ্গিযভাৰেন ইচ্ছিতব্বাতি ৰুত্তং ‘‘কাযেনপি করিযমানং করীযতী’’তি. তেনাহ ভগৰা ‘‘কাযে ৰা, হানন্দ, সতি কাযসঞ্চেতনাহেতু উপ্পজ্জতি অজ্ঝত্তং সুখং দুক্খ’’ন্তি. ৰাচাযপীতি এত্থাপি এসেৰ নযো. মনসাতি পাতুভূতেন মনসা, ন মনমত্তেনাতি. অত্তনা পরেহি অনুস্সাহিতেন. পরেনাতি পরেন অনুস্সাহেন. সম্পজানেনাতি ঞাণসম্পযুত্তচিত্তৰসেন পজানন্তেন. অসম্পজানেনাতি তথা ন সম্পজানন্তেন. তস্সাতি সুখদুক্খস্স. কাযসঞ্চেতনাহেতূতি কাযকম্মনিমিত্তং, কাযিকস্স কম্মস্স কতত্তা উপচিতত্তাতি অত্থো. এস নযো সেসসঞ্চেতনাসুপি. উদ্ধচ্চসহগতচেতনা পৰত্তিযং ৰিপাকং দেতিযেৰাতি ‘‘ৰীসতি চেতনা লব্ভন্তী’’তি ৰুত্তং. তথা ৰচীদ্ৰারেতি এত্থ ‘‘কামাৰচরকুসলাকুসলৰসেন ৰীসতি চেতনা লব্ভন্তী’’তি ইদং তথা-সদ্দেন উপসংহরতি. রূপারূপচেতনাহীতি রূপাৰচরারূপাৰচরকুসলচেতনাহি. তপ্পচ্চযং যথারহন্তি অধিপ্পাযো. তাপি চেতনাতি যথাৰুত্তা একূনৰীসতি চেতনা অৰিজ্জাপচ্চযা হোন্তি কুসলানম্পি পগেৰ ইতরাধিট্ঠহিতাৰিজ্জস্সেৰ উপ্পজ্জনতো, অঞ্ঞথা অনুপ্পজ্জনতো. যথাৰুত্তচেতনাভেদন্তি যথাৰুত্তং কাযচেতনাদিৰিভাগং. পরেহি অনুস্সাহিতো সরসেনেৰ পৰত্তমানো. পরেহি কারিযমানোতি পরেহি উস্সাহিতো হুত্ৰা কযিরমানো. জানন্তোপীতি অনুস্সৰাদিৰসেন জানন্তোপি. কম্মমেৰ জানন্তোতি তদা অত্তনা করিযমানকম্মমেৰ জানন্তো.

চতূসূতি ‘‘সামং ৰা পরে ৰা সম্পজানো ৰা অসম্পজানো ৰা’’তি এৰং ৰুত্তেসু চতূসু ঠানেসু. যথাৰুত্তে একূনৰীসতিচেতনাধম্মে অসঙ্খারিকসসঙ্খারিকভাৰেন সম্পজানকতাসম্পজানকতভাৰেন চতুগুণে কত্ৰা ৰুত্তং ‘‘ছসত্ততি দ্ৰেসতা চেতনাধম্মা’’তি. যেসং সহজাতকোটি লব্ভতি, তেসম্পি উপনিস্সযকোটি লব্ভতেৰাতি ‘‘উপনিস্সযকোটিযা অনুপতিতা’’তিইচ্চেৰ ৰুত্তা. তেতি যথাৰুত্তা সব্বেপি ধম্মা. সো কাযো ন হোতীতি এত্থ পসাদকাযোপি গহেতব্বো. তেনাহ ‘‘যস্মিং কাযে সতী’’তিআদি. সো কাযো ন হোতীতি সো কাযো পচ্চযনিরোধেন ন হোতি. ৰাচাতি সদ্দৰাচা. মনোতি যং কিঞ্চি ৰিঞ্ঞাণং. ইদানি কম্মৰসেনেৰ যোজেতুং ‘‘অপিচা’’তিআদি ৰুত্তং. এসেৰ নযো ‘‘ৰাচাপি দ্ৰারভূতা মনোপি দ্ৰারভূতো’’তি. খীণাসৰস্স কথং কাযো ন হোতি, ন তস্স কাযকম্মাধিট্ঠানন্তি অধিপ্পাযো. অৰিপাকত্তাতি অৰিপাকধম্মত্তাতি অত্থো. কাযো ন হোতীতি ৰুত্তং অকম্মকরণভাৰতো.

তন্তি কম্মং. খেত্তং ন হোতীতি তস্স দুক্খস্স অৰিরুহনট্ঠানত্তা. ৰিরুহনট্ঠানাদযো ব্যতিরেকৰসেন ৰুত্তা. তেনাহ ‘‘ন হোতী’’তি. কারণট্ঠেনাতি আধারভূতকারণভাৰেন. সঞ্চেতনামূলকন্তি সঞ্চেতনানিমিত্তং. ৰিরুহনাদীনং অত্থানন্তি ‘‘ৰিরুহনট্ঠেনা’’তিআদিনা ৰুত্তানং অত্থানং. ইমিনা ৰিরুহনাদিভাৰেন ৰেদনা ‘‘সুখদুক্খৰেদনা’’তি কথিতা, নযিধ জেট্ঠলক্খণং সুখদুক্খং নিপ্পযোজকস্স সুখস্স দুক্খস্স চ অধিপ্পেতত্তা. উপেক্খাৰেদনাপেত্থ সুখসণ্হসভাৰৰিপাকভূতা ৰেদনাৰ.

ভূমিজসুত্তৰণ্ণনা নিট্ঠিতা.

৬. উপৰাণসুত্তৰণ্ণনা

২৬. ৰট্টদুক্খমেৰ কথিতং ইতরদুক্খস্সপি ৰিপাকস্স সঙ্গণ্হনতো.

উপৰাণসুত্তৰণ্ণনা নিট্ঠিতা.

৭. পচ্চযসুত্তৰণ্ণনা

২৭. পটিপাটিযাতি পটিপাটিযা ঠপনেন. চতুসচ্চযোজনং দস্সেতুং পরিযোসান…পে… আদি ৰুত্তং. দুক্খসচ্চৰসেনাতি পরিঞ্ঞেয্যভাৰৰসেন. জরামরণাপদেসেন হি পঞ্চুপাদানক্খন্ধা ৰুত্তা, তে চস্স অত্তনো ফলস্স পচ্চযা ন হোন্তি. তং সন্ধায ৰুত্তং ‘‘পচ্চযং জানাতী’’তি. ৰিনেয্যজ্ঝাসযৰসেন হেত্থ দেসনা পৰত্তা. সম্পন্নোতি সমন্নাগতো. আগতোতি উপগতো, অধিগতোতি অত্থো. পস্সতীতি পচ্চৰেক্খণঞাণেন পচ্চক্খতো পস্সতি, মগ্গপঞ্ঞায এৰং অসম্মোহপটিৰেধৰসেন পস্সতি. মগ্গঞাণেনেৰ, ন ফলঞাণেন. ধম্মসোতং সমাপন্নোতি অরিযধম্মসোতং সম্মদেৰ আপন্নো পত্তো. অনযে নইরিযনতো, অযে চ ইরিযনতো, সদেৰকেন চ লোকেন ‘‘সরণ’’ন্তি অকরণীযতো অরিযপক্খং ভজন্তো পুথুজ্জনভূমিং অতিক্কন্তো. নিব্বেধিকপঞ্ঞাযাতি চতুন্নং অরিযসচ্চানং নিব্বিজ্ঝনকপঞ্ঞায. আহচ্চ তিট্ঠতি মগ্গক্খণে, ফলক্খণে পন আহচ্চ ঠিতো নাম.

পচ্চযসুত্তৰণ্ণনা নিট্ঠিতা.

৮. ভিক্খুসুত্তৰণ্ণনা

২৮. উত্তানমেৰ সব্বসোৰ সত্তমে আগতনযত্তা, ৰিনেয্যজ্ঝাসযৰসেন হি ইদং সুত্তং সত্থারা অঞ্ঞস্মিং আসনে দেসিতং, পরিসায ৰিৰট্টেন সাত্থিকাতি সত্থু দেসনা আগতাতি অযং পটিগ্গাহকাধীনা হোতীতি ধম্মগারৰেন সঙ্গহং আরোপেন্তিযেৰ.

ভিক্খুসুত্তৰণ্ণনা নিট্ঠিতা.

৯. সমণব্রাহ্মণসুত্তৰণ্ণনা

২৯. অক্খরভাণকানন্তি অক্খররুচীনং. উপসগ্গেন পদৰড্ঢনম্পি রুচ্চন্তি. তেনাহ ‘‘তে হী’’তিআদি.

সমণব্রাহ্মণসুত্তৰণ্ণনা নিট্ঠিতা.

১০. দুতিযসমণব্রাহ্মণসুত্তৰণ্ণনা

৩০. দ্ৰীসু সুত্তেসূতি নৰমদসমসুত্তেসু.

দুতিযসমণব্রাহ্মণসুত্তৰণ্ণনা নিট্ঠিতা.

দসবলৰগ্গৰণ্ণনা নিট্ঠিতা.