৯. তুরূব্রহ্মসুত্তৰণ্ণনা

১৮০. আবাধো এতস্স অত্থীতি আবাধিকো. অনন্তরসুত্তেতি অনাগতানন্তরে সুত্তে. ৰরাকোতি অনুগ্গহৰচনমেৰ, ন নিপ্পরিযাযেন ৰুত্তৰচনং. পিযসীলাতি ইমিনা এতস্মিং অত্থে নিরুত্তিনযেন ‘‘পেসলা’’তি পদসিদ্ধীতি দস্সেতি. কবরক্খীনীতি ব্যাধিবলেন পরিভিন্নৰণ্ণতায কবরভূতানি অক্খীনি. যত্তকন্তি যং ত্ৰং ভগৰতো ৰচনং অঞ্ঞথা করোসি, তত্তকং তযা অপরদ্ধং, তস্স পমাণং নত্থীতি অত্থো. যস্মা অনাগামিনো নাম কামচ্ছন্দব্যাপাদা পহীনা হোন্তি, ত্ৰঞ্চ দিট্ঠো কামচ্ছন্দব্যাপাদৰসেন ইধাগতো, তস্মা যাৰ তে ইদং অপরদ্ধন্তি অযমেৰেত্থ অত্থো দট্ঠব্বো.

অদিট্ঠিপ্পত্তোতি অপ্পত্তদিট্ঠিনিমিত্তো. গিলৰিসো ৰিয ৰিসং গিলিত্ৰা ঠিতো ৰিয. কুঠারিসদিসা মূলপচ্ছিন্দনট্ঠেন. উত্তমত্থেতি অরহত্তে. খীণাসৰোতি ৰদতি সুনক্খত্তো ৰিয অচেলং কোরক্খত্তিযং. যো অগ্গসাৰকো ৰিয পসংসিতব্বো খীণাসৰো, তং ‘‘দুস্সীলো অয’’ন্তি যো ৰা ৰদতি. সমকোৰ ৰিপাকোতি পসংসিযনিন্দা ৰিজ্জমানগুণপরিধংসনৰসেন পৰত্তা যাৰ মহাসাৰজ্জতায কটুকতরৰিপাকা, তাৰ নিন্দিযপসংসাপি মহাসাৰজ্জতায সমৰিপাকা তত্থ অৰিজ্জমানগুণসমারোপনেন অত্তনো পরেসং মিচ্ছাপটিপত্তিহেতুভাৰতো পসংসিযেন তস্স সমভাৰকরণতো চ. লোকেপি হি অযং পুরে সমণগারয্হো হোতি, পগেৰ দুপ্পটিপন্নদুপ্পটিপন্নোতি সমং করোন্তীতি.

সকেনাতি অত্তনো সাপতেয্যেন. অযং অপ্পমত্তকো অপরাধো দিট্ঠধম্মিকত্তা সপ্পতিকারত্তা চ তস্স. অযং মহন্ততরো কলি কতূপচিতস্স সম্পরাযিকত্তা অপ্পতিকারত্তা চ.

‘‘নিরব্বুদো’’তি গণনাৰিসেসো একোতি আহ ‘‘নিরব্বুদগণনাযা’’তি, সতসহস্সং নিরব্বুদানন্তি অত্থো. নিরব্বুদপরিগণনং পন হেট্ঠা ৰুত্তমেৰ. যমরিযগরহী নিরযং উপেতীতি এত্থ যথাৰুত্তং আযুপ্পমাণং পাকতিকেন অরিযূপৰাদিনা ৰুত্তন্তি ৰেদিতব্বং. ‘‘অগ্গসাৰকানং পন গুণমহন্ততায ততোপি অতিৰিয মহন্ততরা এৰা’’তি ৰদন্তি.

তুরূব্রহ্মসুত্তৰণ্ণনা নিট্ঠিতা.