১০. কোকালিকসুত্তৰণ্ণনা

১৮১. দ্ৰে কোকালিকনামকা ভিক্খূ, ততো ইধ অধিপ্পেতং নিদ্ধারেত্ৰা দস্সেতুং – ‘‘কো অযং কোকালিকো’’তি? পুচ্ছা. সুত্তস্স অট্ঠুপ্পত্তিং দস্সেতুং – ‘‘কস্মা চ উপসঙ্কমী’’তি? পুচ্ছা. অযং কিরাতিআদি যথাক্কমং তাসং ৰিস্সজ্জনং. ৰিৰেকৰাসং ৰসিতুকামত্তা অপ্পিচ্ছতায চ মা কস্সচি…পে… ৰসিংসু.

পক্কমিস্সন্তীতি আঘাতং উপ্পাদেসি অত্তনো ইচ্ছাৰিঘাতনতো. থেরা ভিক্খুসঙ্ঘস্স নিয্যাদযিংসু পযুত্তৰাচায অকতত্তা থেরেহি চ অদীপিতত্তা. পুব্বেপি…পে… মঞ্ঞেতি ইমিনা থেরানং কোহঞ্ঞে ঠিতভাৰং আসঙ্কতি অৰণে ৰণং পস্সন্তো ৰিয, সুদ্ধে আদাসতলে লেখং উট্ঠাপেন্তো ৰিয চ.

অপরজ্ঝিত্ৰাতি ভগৰতো সম্মুখা ‘‘পাপভিক্খূ জাতা’’তি ৰত্ৰা. আহ ‘‘সদ্ধায আকরো পসাদাৰহো’’তি. পৰত্তসদ্ধাযিকো ৰাতি অত্থোতি আহ ‘‘সদ্ধাতব্বৰচনো’’তি.

পীল়কা নাম বাহিরতো পট্ঠায অট্ঠিং ভিন্দতি, ইমা পন পঠমংযেৰ অট্ঠিং ভিন্দিত্ৰা উগ্গতা. তরুণবেলুৰমত্তিযোতি তরুণবিল্লফলমত্তিযো. ৰিসগিলিতোতি খিত্তপহরণো. তঞ্চ বল়িসং ৰিসসমঞ্ঞা লোকে. ‘‘আরক্খদেৰতানং সুত্ৰা’’তি পদং আনেত্ৰা সম্বন্ধো.

মগধরট্ঠে সংৰোহারতো মাগধকো পত্তো, তেন. তিলসকটং তিলৰাহাএতি ৰুত্তো. পচ্চিতব্বট্ঠানস্সাতি নিরযদুক্খেন পচ্চিতব্বপদেসস্স. এতং ‘‘অব্বুদো’’তি নামং.

ৰস্সগণনাতি একতো পট্ঠায দসগুণিতং অব্বুদআযুম্হি, ততো পরং ৰীসতিগুণং নিরব্বুদাদীসু ৰস্সগণনা ৰেদিতব্বা. সব্বত্থাতি অববাদীসু পদুমপরিযোসানেসু সব্বেসু নিরযেসু. এসেৰ নযোতি হেট্ঠিমতো উপরিমস্স উপরিমস্স ৰীসতিগুণতং অতিদিসতি.

কোকালিকসুত্তৰণ্ণনা নিট্ঠিতা.

পঠমৰগ্গৰণ্ণনা নিট্ঠিতা.