৩. ব্রহ্মদেৰসুত্তৰণ্ণনা

১৭৪. এককোতি ৰিৰেকট্ঠিততায নিস্সটো. গণসঙ্গণিকাভাৰো তস্সানেন দীপিতো, কিলেসসঙ্গণিকাভাৰো পন ‘‘অপ্পমত্তো’’তিআদীহি পকাসিতো. পেসিতত্তোতি নিব্বানং পতি পেসিতচিত্তো. সম্মদেৰাতি ঞাযেনেৰ. সো পন যদি আগমনতো পট্ঠায লব্ভতি, ৰত্তব্বমেৰ নত্থি, অথ পটিপদারম্ভতো পট্ঠায লব্ভতি, এৰম্পি ৰট্টতেৰাতি দস্সেতুং ‘‘যথা ৰা তথা ৰা’’তিআদি ৰুত্তং. অগ্গমগ্গাধিগমেন অসম্মোহপটিৰেধস্স সিখাপ্পত্তত্তা মগ্গধম্মেসু ৰিয ফলধম্মেসুপি সাতিসযো অসম্মোহোতি ‘‘সযং অভিঞ্ঞা’’তি ৰুত্তন্তি আহ ‘‘সামং জানিত্ৰা’’তি. যথা জাননা পনস্স সচ্ছিকরণং অত্তপচ্চক্খকিরিযাতি ‘‘সচ্ছিকত্ৰা’’তি ৰুত্তন্তি আহ ‘‘পচ্চক্খং কত্ৰা’’তি. তথা সচ্ছিকিরিযা চস্স ৰিপস্সনাপটিলাভোতি ‘‘উপসম্পজ্জা’’তি ৰুত্তন্তি আহ ‘‘পটিলভিত্ৰা’’তি. এতেনাতি ‘‘খীণা জাতী’’তিআদিৰচনেন.

জাতি খীণাতি এত্থ জাতিসীসেন তব্বিকারৰন্তো খন্ধা ৰুত্তা. পুব্বেৰ খীণত্তাতি মগ্গাধিগমনতো পগেৰ অতীতভাৰেনেৰ খীণত্তা. তত্থ অনাগতেসু. ৰাযামাভাৰতোতি অৰিজ্জমানত্তা. অনাগতভাৰসামঞ্ঞং গহেত্ৰা লেসেন ৰুত্তং. ন পচ্চুপ্পন্না ৰিজ্জমানত্তাতি সংকিলিট্ঠা চ মগ্গভাৰনাতি সিযাতি ৰচনসেসো. যথা অজাতফলতরুণরুক্খমূলে ছিন্নে আযতিউপ্পজ্জনারহানি ফলানি ছেদনপচ্চযা অনুপ্পজ্জমানানি নট্ঠানি নাম হোন্তি, এৰমেৰ ভাৰনায অসতি উপ্পজ্জনারহা কিলেসা তপ্পচ্চযা জাতি চ মগ্গভাৰনায সতি ন উপ্পজ্জমানা পহীনাতি ৰুচ্চন্তীতি ইমমত্থং দস্সেতি ‘‘মগ্গস্স পনা’’তিআদিনা. অনুপ্পাদধম্মতং আপজ্জনেন ঞাণেন খীণরাগৰসেন.

সোল়সকিচ্চভাৰাযাতি সোল়সকিচ্চতায, সোল়সৰিধস্স ৰা কিচ্চস্স ভাৰায উপ্পাদনায. পাল়িযং সপদানন্তি সপদানচারো ৰুত্তো ভাৰনপুংসকনিদ্দেসেনাতি আহ ‘‘সপদানচার’’ন্তি. অনুক্কম্মাতি অনতিক্কমিত্ৰা. আহুতিপিণ্ডন্তি জুহিতব্বপিণ্ডং, জুহনৰসেন অগ্গিম্হি পক্খিপিতব্বপাযাসপিণ্ডন্তি অধিপ্পাযো. ভূতবলিকম্মন্তি তথা পক্খিপিত্ৰা বলিকম্মকরণং. হরিতুপলিত্তন্তি অল্লগোমযেন কতপরিভণ্ডং. ৰনমালপরিক্খিত্তন্তি মনোহরাহি ৰনপুপ্ফমালাহি পরিক্খিত্তং. ধূমকটচ্ছূতি ধূমপানং. সীলগন্ধন্তি সীলং পটিচ্চ উপ্পন্নকিত্তিগন্ধং. ঘাযমানস্সাতি উপগতং গণ্হন্তস্স.

ইমম্হা ঠানাতি ইমস্মা মনুস্সানং ৰসনট্ঠানা, মহাপথৰিতলতোতি অধিপ্পাযো. সব্বহেট্ঠিমোতি ব্রহ্মপারিসজ্জানং ৰাসব্রহ্মলোকমাহ. ব্রহ্মপথো নাম চত্তারি কুসলজ্ঝানানি ব্রহ্মলোকমগ্গভাৰতো. জীৰিতপথো নাম জীৰিতপৰত্তিউপাযভাৰতো. ‘‘ভুঞ্জতু ভৰং মহাব্রহ্মা’’তি ৰচনং সন্ধাযাহ ‘‘কিং জপ্পসী’’তিআদি. তিণবীজানীতি সালিতণ্ডুলাদীনি. গোযূসন্তি খীরং জিগুচ্ছন্তো ৰদতি. অযম্পি অত্থো ‘‘নেতাদিসো ব্রহ্মভক্খো’’তি ৰদন্তেন দীপিতোতি.

অতিদেৰপত্তোপি পঞ্চখন্ধূপধীনং অত্থিতায কিলেসূপধিআদীনংযেৰ ৰিরহিতভাৰো গহিতো. অঞ্ঞত্র হি ভাৰপচ্চযং তদত্থো ৰিঞ্ঞাযতীতি আহ ‘‘অতিদেৰভাৰং পত্তো’’তি. যস্মা ব্রহ্মানোপি দেৰগতিপরিযাপন্নত্তা দেৰা এৰ, তস্মা ৰুত্তং ‘‘অতিব্রহ্মভাৰং পত্তো’’তি.

অত্তানং ভাৰেত্ৰাতি সীলাদীহি গুণেহি অত্তানং ৰড্ঢেত্ৰা পরিব্রূহিত্ৰা ঠিতো.

পুথুজ্জনা তসা তণ্হামানদিট্ঠিপরিত্তাসৰসেন তাসনতো. খীণাসৰা থাৰরা নাম সব্বসো গতীসু সঞ্চরণাভাৰতো. তথা হি চতুন্নং সচ্চানং সব্বসো অদিট্ঠত্তা ভৰদাযজ্জস্স তণ্হাদাসব্যস্স ভাৰতো একচ্চাসু গতীসু সঞ্চরণসভাৰতো সেক্খা থাৰরা ন হোন্তি. ভজমানাতি ভজাপিযমানা. থাৰরপক্খমেৰ ভজন্তি সব্বসেট্ঠপক্খং একন্তপসট্ঠং ভজমানভাৰং উপাদায.

পহীনকিলেসো খীণাসৰো ৰিসেনো. সুখং আযতি সুখাযতি, তস্স কারকং সুখাযতিকং.

ব্রহ্মদেৰসুত্তৰণ্ণনা নিট্ঠিতা.