৪. বকব্রহ্মসুত্তৰণ্ণনা

১৭৫. ‘‘সস্সতো অত্তা চ লোকো চা’’তি এৰং পৰত্তা দিট্ঠি সস্সতদিট্ঠি. সহ কাযেনাতি সহ তেন ব্রহ্মত্তভাৰেন. ব্রহ্মট্ঠানন্তি অত্তনো ব্রহ্মৰত্থুং. অনিচ্চং ‘‘নিচ্চ’’ন্তি ৰদতি অনিচ্চতায অত্তনো অপঞ্ঞাযমানত্তা. থিরন্তি দল়্হং, ৰিনাসাভাৰতো সারভূতন্তি অত্থো. উপ্পাদৰিপরিণামাভাৰতো সদা ৰিজ্জমানং. কেৰলন্তি পরিপুণ্ণং. তেনাহ ‘‘অখণ্ড’’ন্তি. কেৰলন্তি ৰা জাতিআদীহি অসম্মিস্সং, ৰিরহিতন্তি অধিপ্পাযো. উপ্পাদাদীনং অভাৰতো এৰ অচৰনধম্মং. কোচি জাযনকো…পে… উপপজ্জনকো ৰা নত্থি নিচ্চভাৰতো ঠানেন সদ্ধিং তন্নিৰাসীনং. নিচ্চভাৰঞ্হি সো পটিজানাতি. তিস্সো ঝানভূমিযোতি দুতিযততিযচতুত্থজ্ঝানভূমিযো. চতুত্থজ্ঝানভূমিৰিসেসা হি অসঞ্ঞসুদ্ধাৰাসারুপ্পভৰা. নিব্বানন্তি ৰা এত্থ ইতি-সদ্দো আদিঅত্থো, ন পরিসমাপনত্থো, তস্মা ‘‘সব্ব’’ন্তি ইমিনা ‘‘অসঞ্ঞ…পে… ভৰা’’তি ৰুত্তং সঙ্গণ্হাতি. পটিবাহতীতি সন্তংযেৰ সমানং অজানন্তোৰ ‘‘নত্থী’’তি পটিক্খিপতি. একে উত্তরৰিহারৰাসিনো.

হেট্ঠূপপত্তিকোতি হেট্ঠা ভূমীসু উপ্পন্নউপপত্তিকো. ইদানি তমত্থং ৰিৰরিতুং ‘‘অনুপ্পন্নে’’তিআদি ৰুত্তং. হেট্ঠুপপত্তিকং কত্ৰাতি যথাঠিতভূমিতো হেট্ঠা ততিযজ্ঝানভূমিযং উপপত্তিঝানং কত্ৰা, ন উপরিঝানস্স ৰিয পত্থনামত্তন্তি অধিপ্পাযো. পঠমকালেতি তস্মিং ভৰে পঠমকালে. অঞ্ঞাসি আসন্নভাৰতো. উভযন্তি তং তং অত্তনা কতকম্মঞ্চেৰ নিব্বত্তট্ঠানঞ্চাতি উভযং. পমুস্সিত্ৰা নিব্বত্তিং অনুপধারেন্তো.

অৰিজ্জায গতোতি অৰিজ্জায সহ পৰত্তো. সহযোগে হি ইদং করণৰচনং. তেনাহ ‘‘সমন্নাগতো’’তি. অঞ্ঞাণীতি অৰিদ্ৰা. পঞ্ঞাচক্খুৰিরহতো অন্ধীভূতো, অন্ধভাৰং আপন্নোতি অত্থো. অনাগতে সদ্দো হোতাযং ‘‘ৰক্খতী’’তি যত্রসদ্দপযোগেন, অত্থো পন ৰত্তমানকালিকো. তেনাহ ‘‘ভণতী’’তি. তেনাহ ‘‘যত্রা’’তিআদি.

মগ্গচোরোতি মগ্গপরিবুন্ধকচোরো. সন্তজ্জিযমানোতি ‘‘অৰিজ্জাগতো ৰত, ভো, বকো ব্রহ্মা’’তিআদিনা সন্তজ্জিযমানো. সতিং লভিত্ৰাতি তেনেৰ সন্তজ্জনেন যোনিসো উম্মুজ্জিত্ৰা পুরিমজাতিৰিসযং সতিং লভিত্ৰা. নিপ্পীল়িতুকামোতি ঘংসেতুকামো দোসং দস্সেতুকামো ‘‘ইদং পস্স যাৰঞ্চ তে অপরদ্ধ’’ন্তি. পুঞ্ঞকম্মাতি পুঞ্ঞকারিনো. ৰেদেহি ঞাণেহি গতত্তা পৰত্তত্তা. অন্তিমা ব্রহ্মুপপত্তীতি সব্বপচ্ছিমা ব্রহ্মভাৰপ্পত্তি. অস্মাভিজপ্পন্তীতি অস্মে অভিজপ্পন্তি. আযুৰণ্ণাদিৰসেন ব্রূহিতগুণত্তা ব্রহ্মা. অঞ্ঞেহি মহন্তা ব্রহ্মা মহাব্রহ্মা. অভিভূতি তং ব্রহ্মলোকং জেট্ঠকভাৰেন অভিভৰিত্ৰা ঠিতো. অনভিভূতোতি অঞ্ঞেহি ন অভিভূতো. অঞ্ঞদত্থূতি একংসৰচনমেতং. দস্সনৰসেন দসো, সব্বং পস্সতীতি অধিপ্পাযো. ৰসৰত্তীতি সব্বজনং ৰসে ৰত্তেতি. ইস্সরোতি লোকে ইস্সরো. কত্তা নিম্মাতাতি লোকস্স কত্তা নিম্মাতা. সেট্ঠো সজিতাতি অযং লোকস্স উত্তমো সংৰিভজিতা চ. ৰসী পিতা ভূতভব্যানন্তি আচিণ্ণৰসিত্তা ৰসী, অযং পিতা ভূতানং নিব্বত্তানং ভব্যানং সম্ভৰেসীনন্তি পত্থেন্তি ৰিকত্থেন্তি পিহেন্তি মানেন্তি.

এতন্তি ৰিপরীতসঞ্ঞাৰসেন ‘‘ইদং নিচ্চং ইদং ধুৰং ইদং সস্সত’’ন্তিআদিনা ৰুত্তং এতং অপ্পং পরিত্তকন্তি তং ভগৰা পরিচ্ছিন্দিত্ৰা দস্সেতি. তং পন ‘‘একস্মিং কোসলকে তিলৰাহে ৰস্সসতে ৰস্সসতে একেকতিলুদ্ধারে কযিরমানে তিলানি পরিক্খযং গচ্ছন্তি, ন ত্ৰেৰ অব্বুদে আযূ’’তি এৰং ৰুত্তো অব্বুদো, তংৰসেন ৰীসতিগুণং নিরব্বুদো, তেসং নিরব্বুদানং ৰসেন নিরব্বুদসতসহস্সং. অযমেত্থ সঙ্খেপো, ৰিত্থারতো পন পদুমে আযুনো ৰস্সগণনা ইমস্মিংযেৰ সংযুত্তে পরতো আগমিস্সতি. অনন্তদস্সীতি অনন্তস্স ঞেয্যস্স অনৰসেসতো দস্সী. ৰতসীলৰত্তন্তি সমাদানৰসেন ৰতভূতং চারিত্তসীলৰসেন সমাচিণ্ণত্তা সীলৰত্তং. তং পন একমেৰাতি আহ ‘‘সীলমেৰা’’তি.

অপাযেসীতি এত্থ যদা সো পিপাসিতে মনুস্সে পানীযং পাযেসি, তং সমুদাগমতো পট্ঠায দস্সেতুং ‘‘তত্রা’’তিআদি আরদ্ধং. পুব্বেতি পুরিমজাতিযং. এস ব্রহ্মা ‘‘জরামরণস্স অন্তং করিস্সামী’’তি অজ্ঝাসযৰসেন ঝানং নিব্বত্তেত্ৰা ব্রহ্মলোকে নিব্বত্তি, সো তত্থ নিব্বানসঞ্ঞী অহোসি. ঝানরতিযা ৰীতিনামেতীতি তদা তস্সা কিরিযায অৰিচ্ছেদতো পৰত্তিং উপাদায ৰত্তমানপযোগো. রত্তন্ধকারে পুরতো পুরতো গচ্ছন্তস্স সকটস্স অনুস্সরণৰসেন গচ্ছন্তানং সকটানং নিৰত্তনং হোতীতি ‘‘সব্বসকটানি তথেৰ নিৰত্তিত্ৰা’’তি ৰুত্তং.

কম্মসজ্জাতি যুদ্ধসজ্জা. ৰিলোপন্তি ৰিলুত্তভণ্ডং. এণিকূলস্মিন্তি এত্থ ‘‘পনিহতায নিচ্চগঙ্গায নাম’’ন্তি কেচি. ‘‘এণিমিগবহুলতায সো গঙ্গায তীরপ্পদেসো এণিকূলন্তি ৰুত্ত’’ন্তি অপরে. গঙ্গেয্যকোতি গঙ্গাসন্নিৰাসী.

বদ্ধচরোতি পটিবদ্ধচরিযো. তেনাহ ‘‘অন্তেৰাসিকো’’তি. যস্মা বুদ্ধো সব্বঞ্ঞূ, তস্মা অঞ্ঞাসি, ইধ ময্হং পমুট্ঠঞ্চ সব্বং জানাসীতি অধিপ্পাযো. সব্বং ব্রহ্মলোকং ওভাসযন্তো সব্বম্পিমং ব্রহ্মলোকং ভগৰা ওভাসং অভিভৰিত্ৰা অনঞ্ঞসাধারণং অত্তনো ওভাসং ওভাসেন্তো তিট্ঠতি.

বকব্রহ্মসুত্তৰণ্ণনা নিট্ঠিতা.