২. গারৰসুত্তৰণ্ণনা

১৭৩. অযং ৰিতক্কোতি অযং ‘‘কিন্তাহং ৰিহরেয্য’’ন্তি এৰং পৰত্তিতৰিতক্কো. অঞ্ঞস্মিন্তি পরস্মিং. অত্তা ন হোতীতি হি অঞ্ঞো, পরো. সো পনেত্থ ন যো কোচি অধিপ্পেতো, অথ খো গরুট্ঠানীযো. তেনাহ ‘‘কঞ্চি গরুট্ঠানে অট্ঠপেত্ৰা’’তি. পতিস্সৰতি গরুনো ‘‘আমা’’তি সম্পটিচ্ছতীতি পতিস্সো, ন পতিস্সোতি অপ্পতিস্সো. পতিস্সযরহিতো গরুপস্সযরহিতোতি অত্থো.

সদেৰকেতি অৰযৰেন ৰিগ্গহো সমুদাযো সমাসত্থো. সদেৰকগ্গহণেন পঞ্চকামাৰচরদেৰগ্গহণং পারিসেসঞাযেন ইতরেসং পদন্তরেহি সঙ্গহিতত্তা, সমারকগ্গহণেন ছট্ঠকামাৰচরদেৰগ্গহণং পচ্চাসত্তিঞাযেন. তত্থ হি মারো জাতো তন্নিৰাসী চ হোতি. সব্রহ্মকৰচনেন ব্রহ্মকাযিকাদিব্রহ্মগ্গহণং পচ্চাসত্তিঞাযেনেৰ. ‘‘সস্সমণব্রাহ্মণিযা পজাযা’’তি সাসনস্স পচ্চত্থিকসমণব্রাহ্মণগ্গহণং. নিদস্সনমত্তঞ্চেতং অপচ্চত্থিকানং অসমিতপাপানং অবাহিতপাপানঞ্চ সমণব্রাহ্মণানং তেনেৰ ৰচনেন গহিতত্তা. কামং ‘‘সদেৰকে’’তিআদিৰিসেসনানং ৰসেন সত্তৰিসযো লোকসদ্দোতি ৰিঞ্ঞাযতি তুল্যযোগৰিসযত্তা তেসং. ‘‘সলোমকো সপক্খকো’’তিআদীসু পন অতুল্যযোগেপি অযং সমাসো লব্ভতীতি ব্যভিচারদস্সনতো পজাগহণন্তি পজাৰচনেন সত্তলোকগ্গহণং. দেৰভাৰসামঞ্ঞেন মারব্রহ্মেসু গহিতেসুপি ইতরেহি তেসং লব্ভমানৰিসেসদস্সনত্থং ৰিসুং গহণন্তি দস্সেন্তো ‘‘মারো নামা’’তিআদিমাহ. মারো ব্রহ্মানম্পি ৰিচক্খুকম্মায পহোতীতি আহ ‘‘সব্বেস’’ন্তি. উপরীতি উপরিভাৰে. ব্রহ্মাতি দসসহস্সিব্রহ্মানং সন্ধাযাহ. তথা চাহ ‘‘দসহি অঙ্গুলীহী’’তিআদি. ইধ দীঘনিকাযাদযো ৰিয বাহিরকানম্পি গন্থনিকাযো লব্ভতীতি আহ ‘‘একনিকাযাদিৰসেনা’’তি.

ৰত্থুৰিজ্জাদীতি আদি-সদ্দেন ৰিজ্জাট্ঠানানি সঙ্গহিতানি. যথাসকং কম্মকিলেসেহি পজাতত্তা নিব্বত্তত্তা পজা, সত্তনিকাযো. তস্সা পজায. সদেৰমনুস্সাযাতি ৰা ইমিনা সম্মুতিদেৰগ্গহণং তদৰসিট্ঠমনুস্সলোকগ্গহণঞ্চ দট্ঠব্বং. এৰং ভাগসো লোকং গহেত্ৰা যোজনং দস্সেত্ৰা ইদানি অভাগসো লোকং গহেত্ৰা যোজনং দস্সেতুং ‘‘অপিচেত্থা’’তিআদি ৰুত্তং. লোকৰসেন ৰুত্তানি ‘‘লোকীযন্তি এত্থ কম্মকম্মফলানী’’তি কত্ৰা, পজাৰসেন ‘‘হেতুপচ্চযেহি পজাযতী’’তি কত্ৰা. সীলসম্পন্নতরন্তি এত্থ পরিপুণ্ণসম্পন্নতা অধিপ্পেতা ‘‘সম্পন্নং সালিকেদার’’ন্তিআদীসু (জা. ১.১৪.১) ৰিয. তেনাহ ‘‘অধিকতরন্তি অত্থো’’তি. পরিপুণ্ণম্পি ‘‘অধিকতর’’ন্তি ৰত্তব্বতমরহতি. সেসেসূতি ‘‘সমাধিসম্পন্নতর’’ন্তিআদীসু.

কারণন্তিআদীসু কারণন্তি যুত্তিং. অত্থন্তি অৰিপরীতত্থং. ৰুড্ঢিন্তি অভিৰুড্ঢিনিমিত্তং.

ইমিনা ৰচনেনাতি ইমস্মিং সুত্তে অনন্তরং ৰুত্তৰচনেন. ন কেৰলং ইমিনাৰ, সুত্তন্তরম্পি আনেত্ৰা পটিবাহিতব্বোতি দস্সেন্তো ‘‘ন মে আচরিযো অত্থী’’তিআদিমাহ. এত্থ যং ৰত্তব্বং, তং সুমঙ্গলৰিলাসিনিযা দীঘনিকাযট্ঠকথায (দী. নি. অট্ঠ. ৩.১৬২) ৰুত্তমেৰ. সরন্তি করণে এতং পচ্চত্তৰচনন্তি আহ ‘‘সরন্তেনা’’তি, সরন্তি ৰা সরণহেতূতি অত্থো.

গারৰসুত্তৰণ্ণনা নিট্ঠিতা.