১০. ৰজিরাসুত্তৰণ্ণনা

১৭১. সুদ্ধসঙ্খারপুঞ্জেতি রূপারূপৰিভাগে কিলেসসঙ্খারসমূহে. পরমত্থতোতি সভাৰেন. যথা ন হি সত্তসঞ্ঞিতসঙ্খারপুঞ্জো নাম পরমত্থতো উপলব্ভতি, এৰং তব্বিনিমুত্তো নাম কোচি ন উপলব্ভতি অৰিজ্জমানত্তা. ৰিজ্জমানেসূতি যথাপচ্চযসম্পত্তিযা লব্ভমানেসু. তেনাকারেনাতি ইত্থিপুরিসাদিআকারেন. ৰৰত্থিতেসূতি পচ্চেকং পচ্চযৰিসেসসমুট্ঠিতং সণ্ঠানৰিসেসং উপাদায ‘‘পুরিসো হত্থী অস্সো’’তিআদিনা অভিসঙ্গতো পৰত্তেসু. সম্মুতীতি সত্তোতি ৰোহারো. তেনাহ ‘‘সমঞ্ঞামত্তমেৰা’’তি. পঞ্চক্খন্ধদুক্খন্তি পঞ্চক্খন্ধসঞ্ঞিতং দুক্খং. ৰুত্তং হেতং ভগৰতা ‘‘সংখিত্তেন পঞ্চুপাদানক্খন্ধা দুক্খা’’তি (দী. নি. ২.৩৮৭; ম. নি. ১.১২০; ৩.৩৭৩; ৰিভ. ২০২) অঞ্ঞো নেৰ সম্ভোতি যথাৰুত্তদুক্খতো অঞ্ঞস্স সঙ্খতধম্মস্স অভাৰতো. ন নিরুজ্ঝতীতি ততো অঞ্ঞং ন নিরুজ্ঝতি, উপ্পাদতো হোতি নিরোধোতি.

ৰজিরাসুত্তৰণ্ণনা নিট্ঠিতা.

সারত্থপ্পকাসিনিযা সংযুত্তনিকায-অট্ঠকথায

ভিক্খুনীসংযুত্তৰণ্ণনায লীনত্থপ্পকাসনা সমত্তা.