৩. ততিযৰগ্গো

১. সম্বহুলসুত্তৰণ্ণনা

১৫৭. জটাচুম্বটকেনাতি সীসে পটিমুক্কেন জটাকলাপেন. অপরিগ্গহব্রাহ্মণপব্বজিতা হি জটায উঞ্ছাচরিযং চরন্তি. উদুম্বরদণ্ডঞ্হি অত্তগুত্তত্থায গহিতং তেসং অপ্পিচ্ছভাৰপ্পকাসনং. তেনাহ ‘‘অপ্পিচ্ছভাৰপ্পকাসনত্থ’’ন্তি. সীসং ওকম্পেত্ৰাতি এত্থ অতিৰিয সীসস্স ওকম্পিতভাৰং দস্সেতুং ‘‘হনুকেন উরং পহরন্তো অধোনতং কত্ৰা’’তি ৰুত্তং. জিৰ্হং নীহরিত্ৰাতি লম্বনচালনৰসেন মুখতো নিক্খামেত্ৰা. তেনাহ ‘‘উদ্ধ’’ন্তিআদি. তিসাখন্তি তিভঙ্গভকুটি ৰিয নলাটে জাতত্তা নলাটিকং. তেনাহ ‘‘নলাটে উট্ঠিতং ৰলিত্তয’’ন্তি, তিভঙ্গৰলিকং নলাটে কত্ৰাতি অত্থো. অত্তনোৰ তেলেতি অত্তনোৰ পাপকম্মনিব্বত্তকে তেলে, পচিতব্বট্ঠানগেহেতি অধিপ্পাযো.

সম্বহুলসুত্তৰণ্ণনা নিট্ঠিতা.

২. সমিদ্ধিসুত্তৰণ্ণনা

১৫৮. ময্হং লাভাতি এৰরূপস্স নাম সম্মাসম্বুদ্ধস্স সত্থুস্স পটিলাভো, এৰরূপস্স চ নাম নিয্যানিকস্স সদ্ধম্মস্স পটিলাভো, এৰরূপানঞ্চ সুপ্পটিপন্নানং সব্রহ্মচারীনং পটিলাভো, এতে ময্হং সুলদ্ধলাভা. ময্হং সুলদ্ধন্তি যঞ্চেতং মম নিয্যানিকসাসনে পব্বজ্জা উপসম্পদা, তস্মিঞ্চ অভিরতীতি সব্বঞ্চেতং মযা সুলদ্ধং. যথা পনস্স এৰং চেতসো পরিৰিতক্কো উপ্পন্নো, তং দস্সেতুং ‘‘সো কিরা’’তিআদি ৰুত্তং. চরিতানুরূপৰসেন গহিতং মূলকম্মট্ঠানং. পাসাদিকন্তি পসাদাৰহং. এৰমহোসীতি ‘‘লাভা ৰত মে’’তিআদিনা এৰং পরিৰিতক্কো অহোসি. নিসিন্নসদিসোতি নিসিন্নো ৰিয. তস্মিংযেৰ ঠানেতি যস্মিং ঠানে নিসিন্নং মারো উপসঙ্কমি, তস্মিংযেৰ ঠানে. তস্সাতি সমিদ্ধিত্থেরস্স. কম্মট্ঠানং সপ্পাযন্তি কম্মট্ঠানভাৰনায অনুযুঞ্জনং সপ্পাযং উপকারাৰহং ভৰিস্সতি.

ময্হন্তি মযা. সতি চ পঞ্ঞা চ সতিপঞ্ঞা, তা অরিযমগ্গেন জাননসমত্থনভাৰেন অৰবুদ্ধা. থেরো কির তদা ৰিপস্সনং উস্সুক্কাপেসি. কামন্তি যথারুচি. কেচি ‘‘কামং করস্সূতি আযস্মতো ‘কামা’তি মারস্স আলপন’’ন্তি ৰদন্তি. ৰিভিংসকারহানীতি ভযানকারহানি. রূপানীতি ৰিপ্পকারানি. ৰিপ্পকারত্থোপি হি রূপসদ্দো ‘‘রূপং দস্সেতি অনপ্পক’’ন্তিআদীসু ৰিয. ন কম্পেস্সসীতি সমণধম্মকরণতো ন চলিস্সসি.

সমিদ্ধিসুত্তৰণ্ণনা নিট্ঠিতা.

৩. গোধিকসুত্তৰণ্ণনা

১৫৯. পব্বতস্স পস্সেতি পব্বতপাদে উপচ্চকাযং. সমযে সমযে লদ্ধত্তা সামযিকং. তেনাহ ‘‘অপ্পিতপ্পিতক্খণে পচ্চনীকধম্মেহি ৰিমুচ্চতী’’তি. লোকিযৰিমুত্তি হি অনচ্চন্তপহাযিতায সমযৰিমুত্তি নাম, লোকুত্তরৰিমুত্তি অচ্চন্তপহাযিতায অসমযৰিমুত্তি. তাহি সমন্নাগতা ‘‘সমযৰিমুত্তা, অসমযৰিমুত্তা’’তি চ ৰুচ্চন্তি. যাৰ পঠমজ্ঝাননিব্বত্তনং, তাৰ কস্মা পরিহাযীতি অত্থো? সাবাধত্তাতি সরোগত্তা. ৰাতপিত্তসেম্হৰসেনাতি কদাচি ৰাতপিত্তৰসেন, কদাচি ৰাতসেম্হৰসেন, উভিন্নম্পি সন্নিপাতৰসেন. অনুসাযিকোতি কাযং অনুগন্ত্ৰা সযিতো, যাপ্যামযভাৰেন ঠিতোতি অত্থো. সমাধিস্সাতি সমাধিভাৰনায. উপকারকধম্মে উতুভোজনাদিকে. পূরেতুন্তি সমোধানেতুং. পরিহাযীতি সরীরস্স অকল্লভাৰতো.

আহরেয্যন্তি জীৰিতহরণত্থায উপনেয্যং. নিবদ্ধা গতি হোতি কেৰলং ব্রহ্মলোকূপপত্তিতো, ন সোতাপন্নাদীনং ৰিয পরিচ্ছিন্নভাৰেন. তেনাহ ‘‘ব্রহ্মলোকে নিব্বত্ততী’’তি.

জলমানাতি সমুট্ঠিতনিযতইদ্ধিযা অনঞ্ঞসাধারণপরিৰারসম্পত্তিযা চ সদেৰকে লোকে জলমানা. মংসচক্খু দিব্বচক্খু ধম্মচক্খু পঞ্ঞাচক্খু সমন্তচক্খূতি পঞ্চহি চক্খূহি চক্খুমা. আনুভাৰধরাতি অচিন্তেয্যাপরিমেয্যবুদ্ধানুভাৰসম্পন্না. আনুভাৰপরিযাযোপি হি জুতি-সদ্দো হোতি ‘‘ইদ্ধিজুতিবলৰীরিযূপপত্তী’’তিআদীসু (জা. ২.২২.১৫৮৯, ১৫৯৫) ৰিয. অনৰসেসতো মানং সিযতি সমুচ্ছিন্দতীতি অগ্গমগ্গো মানসং. তন্নিব্বত্তনা পন অরহত্তস্স মানসতা দট্ঠব্বা. সীলাদীনীতি অনুত্তরসীলাদীনি. সিক্খমানোতি সিক্খানি ভাৰেন্তো অত্তনো সন্তানে উপ্পাদেন্তো. ন চিত্তভাৰনা. তেনাহ ‘‘সকরণীযো’’তি. জনেতি সত্তস্স কাযে, সদেৰকে লোকেতি অত্থো. ৰিস্সুতাতি অনঞ্ঞসাধারণেহি সীলাদিগুণেহি ৰিস্সুতা.

ৰেদনং ৰিক্খম্ভেত্ৰাতি উপ্পন্নং দুক্খৰেদনং পটিচ্চ উপ্পন্নঅত্তকিলমথং অনুপ্পাদনৰসেন ৰিক্খম্ভেত্ৰা তংযেৰ ৰেদনং পরিগ্গহেত্ৰা পৰত্তৰিপস্সনা ৰীথিমেৰ ওতরতীতি কত্ৰা মূলকম্মট্ঠানন্তি ৰুত্তং. ‘‘সমসীসী হুত্ৰা পরিনিব্বাযী’’তি ৰত্ৰা তস্স পভেদং ৰিভজিত্ৰা ইধাধিপ্পেতং দস্সেতুং ‘‘সমসীসী নাম তিৰিধো হোতী’’তিআদিমাহ. ইরিযাপথৰসেন সমসীসী ইরিযাপথসমসীসী. এস নযো সেসদ্ৰযেপি.

ইরিযাপথকোপনঞ্চাতি ইরিযাপথেহি অসমাযোগো. একপ্পহারেনেৰাতি একৰেলাযমেৰ. পরিনিব্বানৰসেনাতি অনুপাদিসেসপরিনিব্বানৰসেন, ন কিলেসক্খযমত্তেন. এত্থাতি এতেসু দ্ৰীসু নযেসু. এৰং সতি তেনেৰ ইরিযাপথেন ৰিপস্সনং পট্ঠপেত্ৰা তেনেৰ ইরিযাপথেন, একস্মিং অন্তোরোগেযেৰ ৰিপস্সনং পট্ঠপেত্ৰা অরহত্তং পত্ৰা তেনেৰ রোগেন পরিনিব্বাযন্তা খীণাসৰা বহৰোপি সমসীসিনো এৰ সম্ভৰেয্যুং. তস্মা ৰুত্তনযেনেৰ অত্থো ৰেদিতব্বো.

সীসঞ্চেত্থ তেরস – পলিবোধসীসং তণ্হা, বন্ধনসীসং মানো, পরামাসসীসং দিট্ঠি, ৰিক্খেপসীসং উদ্ধচ্চং, কিলেসসীসং অৰিজ্জা, অধিমোক্খসীসং সদ্ধা, পগ্গহসীসং ৰীরিযং, উপট্ঠানসীসং সতি, অৰিক্খেপসীসং সমাধি, দস্সনসীসং পঞ্ঞা, পৰত্তিসীসং জীৰিতিন্দ্রিযং, গোচরসীসং ৰিমোক্খো, সঙ্খারসীসং নিরোধোতি. ইমেসু তেরসসু সীসেসু পলিবোধসীসাদীনি পৰত্তিসীসঞ্চ পরিযাদিযিতব্বানি, অধিমোক্খসীসাদীনি পরিযাদাযকানি, পরিযাদাযকফলং গোচরসীসং. তঞ্হি ৰিসযজ্ঝত্তং ফলং ৰিমোক্খো, পরিযাদাযকস্স মগ্গস্স ফলস্স চ আরম্মণং সঙ্খারসীসং সঙ্খারৰিৰেকভূতো নিরোধোতি পরিযাদিযিতব্বানং পরিযাদাযকফলারম্মণানং সহ ৰিয সংসিদ্ধং দস্সনেন সমসীসিভাৰং দস্সেতুং পটিসম্ভিদাযং তেরস সীসানি ৰুত্তানি. ইধ পন ‘‘অপুব্বং অচরিমং আসৰপরিযাদানঞ্চ হোতি জীৰিতপরিযাদানঞ্চা’’তি (পু. প. ১৬) ৰচনতো তেসু কিলেসপৰত্তসীসানমেৰ ৰসেন যোজনং করোন্তো ‘‘এত্থ চ পৰত্তিসীস’’ন্তিআদিমাহ.

তত্থ পৰত্তিসীসং পৰত্ততো ৰুট্ঠহন্তো মগ্গো চুতিতো উদ্ধং অপ্পৰত্তিকরণৰসেন যদিপি পরিযাদীযতি, যাৰ পন চুতি, তাৰ পৰত্তিসব্ভাৰতো ‘‘পৰত্তিসীসং জীৰিতিন্দ্রিযং চুতিচিত্তং খেপেতী’’তি আহ. কিলেসপরিযাদানেন পন মগ্গচিত্তেন অত্তনো অনন্তরং ৰিয নিপ্ফাদেতব্বা পচ্চৰেক্খণৰারা চ কিলেসপরিযাদানস্সেৰ ৰারাতি ৰত্তব্বতং অরহন্তি. ‘‘ৰিমুত্তস্মিং ৰিমুত্তমিতি ঞাণং হোতী’’তি (ম. নি. ১.৭৮; সং. নি. ৩.১২) ৰচনতো পচ্চৰেক্খণপরিসমাপনেন কিলেসপরিযাদানং সমাপিতং নাম হোতি, তং পন পরিসমাপনং যদি চুতিচিত্তেন হোতি, তেনেৰ জীৰিতপরিসমাপনঞ্চ হোতীতি ইমায ৰারচুতিসমতায কিলেসপরিযাদানজীৰিতপরিযাদানানং অপুব্বাচরিমতা ৰেদিতব্বাতি দস্সেন্তো ‘‘দ্ৰিন্নং চিত্তানং একতো উপ্পাদো নত্থী’’তিআদিমাহ. দ্ৰিন্নং চিত্তানন্তি চুতিচিত্তমগ্গচিত্তানং. তন্তি পচ্চৰেক্খণং পরিপুণ্ণজৰনচিত্তানং সত্তক্খত্তুং পৰত্তিযা, অপরিপুণ্ণানং ৰা পঞ্চক্খত্তুং পৰত্তিযা. কিঞ্চাপি ‘‘একো ৰা দ্ৰে ৰা’’তি ৰুত্তং যথা ‘‘একং ৰা দ্ৰে ৰা তদারম্মণচিত্তানী’’তি, হেট্ঠিমন্তেন পন দ্ৰে পৰত্তন্তি.

উপ্পাটেত্ৰাতি উদ্ধরিত্ৰাতি অত্থো. অনুপাদিসেসেনাতি অনুপাদিসেসনিব্বানেন.

ধূমাযিতত্তন্তি ধূমস্স ৰিয অযিতভাৰং পৰত্তিআকারং. ধূমসদিসা ৰলাহকা ধূমৰলাহকা, তিমিরৰলাহকা, যে মহিকা ‘‘তিমির’’ন্তি ৰুচ্চন্তি. অপ্পতিট্ঠিতেনাতি পতিট্ঠং অলভন্তেন. ইত্থম্ভূতলক্খণে এতং করণৰচনং, অনুপ্পত্তিধম্মেনাতি অত্থো. সতি হি উপ্পাদে পতিট্ঠিতং নাম সিযা, অট্ঠকথাযং পন যদেৰ তস্স ৰিঞ্ঞাণস্স অপ্পতিট্ঠানকারণং, তদেৰ পরিনিব্বানকারণন্তি ৰুত্তং ‘‘অপ্পতিট্ঠিতকারণা’’তি.

সোকেন ফুট্ঠস্সাতি ‘‘অফলো ৰত মে ৰাযামো জাতো’’তি সোকেন অভিভূতস্স. অভস্সথাতি বলৰসোকাভিতুন্নস্স সতিসম্মোসা সিথিলং গহিতা ভস্সি পতিতা সা কচ্ছা.

গোধিকসুত্তৰণ্ণনা নিট্ঠিতা.

৪. সত্তৰস্সানুবন্ধসুত্তৰণ্ণনা

১৬০. যস্মা কপিলৰত্থুতো নিক্খন্তকালতো পট্ঠায মারো ওতারাপেক্খো লোকনাথং অনুবন্ধিতুং আরদ্ধো, তস্মা ৰুত্তং ‘‘পুরে বোধিযা ছব্বস্সানী’’তি. অতিগহেত্ৰাতি অনুগন্ত্ৰা তস্স যথারুচি পটিপত্তিং অনুৰত্তো ৰিয হুত্ৰা.

অৰজ্ঝাযন্তোতি পজ্ঝাযন্তো. জিতো ৰিত্তপরাজিতো অসি নু. পমাণাতিক্কন্তন্তি গরুতরং.

খনিত্ৰা উম্মূলেত্ৰা. কামাসৰাদীনি পজহন্তো অনাসৰো.

পেহীতি অপেহি. পারগামিনোতি পারঙ্গমনসীলা. তেকালিকো অযং গামি-সদ্দোতি আহ ‘‘যেপী’’তিআদি.

মারৰিসূকানীতি মারকণ্টকানি কণ্টকসদিসানি মারস্স দুরাচারানি. ৰিরুদ্ধসেৰিতানি ৰিরোধৰসেন তাসংযেৰ ৰেৰচনানি. তানি সরূপতো দস্সেতুং ‘‘অপ্পমাযূ’’তিআদি ৰুত্তং. নিব্বেজনীযাতি নিব্বেদদাযিকা. উক্কণ্ঠনীযাতি উক্কণ্ঠৰহা.

ৰিকপ্পৰসেন ৰেদিতব্বো ওপম্মপরিকপ্পৰিসযত্তা তস্স কিরিযাপদস্স. তেনাহ ‘‘অনুপরিগচ্ছেয্যা’’তি. এত্থাতি এতস্মিং মেদৰণ্ণৰত্থুস্মিং. মুদুন্তি মুদুমধুরসং ৰিন্দেয্যাম পটিলভেয্যাম. অস্সাদোতি অস্সাদেতব্বো.

সত্তৰস্সানুবন্ধসুত্তৰণ্ণনা নিট্ঠিতা.

৫. মারধীতুসুত্তৰণ্ণনা

১৬১. চিন্তেসীতি সোকৰসিকো হুত্ৰা চিন্তযি. গণিকারহত্থিনিযোতি দীপককরেণুযো. একসতং একসতন্তি একসতং একসতং পচ্চেকং সতং সতন্তি অত্থো. তেনাহ ‘‘একেকং সতং সতং কত্ৰা’’তি. কুমারিৰণ্ণসতন্তি কুমারিত্থীনং অত্তভাৰানং সতং. তা কির পঠমং কঞ্ঞারূপেন অত্তানং দস্সেসুং. অনুপগতপুপ্ফানঞ্হি সমঞ্ঞা কঞ্ঞাতি. পুন যথাৰুত্তকুমারিরূপেন উপগতপুপ্ফা হি কুমারী. পুন ৰধুকারূপেন. তং সন্ধায ৰুত্তং ‘‘অৰিজাতৰণ্ণসত’’ন্তি. ততিযৰারে যুৰতিরূপেন. ৰিজাতা হি ইত্থী অনতিক্কন্তমজ্ঝিমৰযা যুৰতী. এত্তাৰতা বালা তরুণী পোরীতি তিৰিধাসু ইত্থীসু পুরিমা দ্ৰে দস্সিতা, পরিযোসানৰারেসু মনুস্সজাতিকানং মনুস্সিত্থিযোৰ রুচ্চন্তীতি তেন মনুস্সরূপেন তা অত্তানং দস্সেসুং.

অত্থস্স পত্তিন্তি একন্ততো হিতানুপ্পত্তিং. হদযস্স সন্তিন্তি পরমচিত্তুপসমং. কিলেসসেনন্তি কামগুণসঙ্খাতং পঠমং কিলেসসেনং. সা হি কিলেসসেনা অচ্ছরাসঙ্ঘাতসভাৰাপি পটিপত্থযমানা পিযাযিতব্বইচ্ছিতব্বরূপভাৰতো পিযরূপসাতরূপা নাম অত্তনো কিচ্চৰসেন. একো অহং ঝাযন্তোতি গণসঙ্গণিকায কিলেসসঙ্গণিকায চ অভাৰতো একো অসহাযো অহং লক্খণূপনিজ্ঝানেন নিজ্ঝাযন্তো. অনুবুজ্ঝিন্তি অনুক্কমেন মগ্গপটিপাটিযা বুজ্ঝিং পটিবুজ্ঝিং. তস্মাতি যথাৰুত্তৰিৰেকসুখসমধিগমনিমিত্তং. অকরণেনাতি মিত্তসন্থৰস্স অকরণেন. সক্খীতি সক্খিভাৰো.

কতমেন ৰিহারেনাতি ঝানসমাপত্তীনং কতমেন ৰিহারেন. ইধ দুতিযপদস্স অত্থো ৰিস্সজ্জনগাথাৰণ্ণনাযমেৰ আৰি ভৰিস্সতি. অনামন্তেন ‘‘তং পুগ্গল’’ন্তি সম্মুখা ঠিতম্পি ভগৰন্তং অসম্মুখা ৰিয কত্ৰা ৰদতি, কথং ত্ৰন্তি অত্থো.

‘‘অৰিতক্কঝাযী’’তি ৰক্খমানত্তা অযমেৰেত্থ কাযপস্সদ্ধি ৰেদিতব্বাতি আহ ‘‘চতুত্থজ্ঝানেন অস্সাসপস্সাসকাযস্স পস্সদ্ধত্তা পস্সদ্ধকাযো’’তি. পুঞ্ঞাভিসঙ্খারাদিকে কম্মাভিসঙ্খারে. কামালযাদীনং অভাৰতো অনালযো. ন সরতীতি ন সৰতি. রাগৰসেন হি সত্তা সংসারমনুসৰন্তি. ন থিনোতি ন থিনমিদ্ধচিত্তো. মোহৰসেন হি সত্তা থিনমিদ্ধং আপজ্জন্তীতি. দিযড্ঢকিলেসসহস্সন্তি খুদ্দকৰত্থুৰিভঙ্গে (ৰিভ. ৮৪২, ৯৭৬) আগতেসু অট্ঠসু কিলেসসতেসু অট্ঠসতং তণ্হাৰিচরিতানি অপনেত্ৰা সেসা পঞ্ঞাসাধিকং সতং কিলেসা, তে ব্রহ্মজালে (দী. নি. ১.৩১) আগতাহি দ্ৰাসট্ঠিযা দিট্ঠীহি সহ পঞ্চপঞ্ঞাসাধিকং সত্তসতং হোতি; তা চ উপ্পন্নানুপ্পন্নভাৰেন দিগুণিতা দিযড্ঢকিলেসসহস্সং দসাধিকং হোতি; তং অপ্পকং পন ঊনমধিকং ৰা গণনুপগং ন হোতীতি ‘‘দিযড্ঢকিলেসসহস্স’’ন্তি ৰুত্তং. ইতরেসং অতীতাদিভাৰামসনতো অগ্গহণং পহানস্স অধিপ্পেতত্তা. অযমেত্থ সঙ্খেপো, ৰিত্থারো পন অভিধম্মটীকাযং (ধ. স. অনুটী. নিদানকথাৰণ্ণনা) ৰুত্তনযেন ৰেদিতব্বো. পঠমপদেনাতি ‘‘ন কুপ্পতী’’তি ইমিনা পদেন. দুতিযেনাতি ‘‘ন সরতী’’তি পদেন. ততিযেনাতি ‘‘ন থিনো’’তি পদেন. নীৰরণপ্পহানেন খীণাসৰতং দস্সেতি, অনৰসেসতো নীৰরণানং অচ্চন্তপ্পহানং অধিপ্পেতং.

পঞ্চদ্ৰারিককিলেসোঘং তিণ্ণোতি ছন্নং দ্ৰারানং ৰসেন পৰত্তনকিলেসোঘং তরিত্ৰা ঠিতো. কামোঘদিট্ঠোঘভৰোঘট্ঠকিলেসভাৰতো ‘‘পঞ্চোঘগ্গহণেন ৰা পঞ্চোরম্ভাগিযানি সংযোজনানি ৰেদিতব্বানী’’তি আহ. রূপরাগাদযো ৰিসেসতো ন পঞ্চদ্ৰারিকাতি ৰুত্তং ‘‘ছট্ঠগ্গহণেন পঞ্চুদ্ধম্ভাগিযানি ৰেদিতব্বানী’’তি.

মচ্চুরাজস্সাতি সম্বন্ধে সামিৰচনন্তি দস্সেন্তো ‘‘মচ্চুরাজস্স হত্থতো’’তি আহ. নযমানানন্তি অনাদরে সামিৰচনন্তি কত্ৰা ৰুত্তং ‘‘নযমানেসূ’’তি.

ঊহচ্চাতি বুদ্ধং নিস্সায. ‘‘ইদমৰোচা’’তি দেসনং নিট্ঠাপেত্ৰাতি এতেন সংযুত্তেসু অযং নিগমনপাল়ি, হেট্ঠা অনাগতনযত্তা পন কেসুচি পোত্থকেসু ন লিখীযতীতি দস্সেতি. দদ্দল্লমানাতি জজ্জকারস্স হি দদ্দকারং কত্ৰা নিদ্দেসো. তেনাহ ‘‘অতিৰিয জলমানা’’তি. নীহরীতি তাসং কাযৰচীৰিকারং ন মনসিকরোন্তো তিণাযপি অমঞ্ঞমানোৰ অনপেক্খেনেৰ নীহরি. ফলতো ভট্ঠন্তি ফলসিপাটিকতো ভট্ঠং. কুণ্ডতিণাদিগচ্ছতূলং পোটকিতূলং.

মারধীতুসুত্তৰণ্ণনা নিট্ঠিতা.

ততিযৰগ্গৰণ্ণনা নিট্ঠিতা.

সারত্থপ্পকাসিনিযা সংযুত্তনিকায-অট্ঠকথায

মারসংযুত্তৰণ্ণনায লীনত্থপ্পকাসনা সমত্তা.