১. পঠমৰগ্গো

১. তপোকম্মসুত্তৰণ্ণনা

১৩৭. উরুৰেলায সমীপে গামো উরুৰেলগামো, তং উরুৰেলগামং অভিমুখভাৰেন সম্মদেৰ সব্বধম্মে বুজ্ঝতীতি অভিসম্বোধি, সব্বঞ্ঞুতঞ্ঞাণং, তেন সমন্নাগতত্তা চ ভগৰা অভিসম্বুদ্ধোতি ৰুচ্চতি. তস্স পঞ্চচত্তালীসায ৰস্সেসু আদিতো পন্নরস ৰস্সানি পঠমবোধি, ইধ পন সত্তাহব্ভন্তরমেৰ অধিপ্পেতন্তি আহ ‘‘অভিসম্বুদ্ধো হুত্ৰা অন্তোসত্তাহস্মিং যেৰা’’তি. অসুখভাৰেন অঞ্ঞেহি কাতুং অসক্কুণেয্যত্তা দুক্করং করোতীতি দুক্করকারো, সো এৰ ইত্থিলিঙ্গৰসেন দুক্করকারিকা. তায মুত্তো ৰতম্হীতি চিন্তেসি. যদি এৰং কস্মা তং লোকনাথো ছব্বস্সানি সমনুযুঞ্জতি? কম্মপীল়িতৰসেন. ৰুত্তঞ্হেতং অপদানে (অপ. থের ১.৩৯.৯২-৯৪) –

‘‘অৰচাহং জোতিপালো, সুগতং কস্সপং তদা;

কুতো নু বোধি মুণ্ডস্স, বোধি পরমদুল্লভা.

‘‘তেন কম্মৰিপাকেন, অচরিং দুক্করং বহুং;

ছব্বস্সানুরুৰেলাযং, ততো বোধিমপাপুণিং.

‘‘নাহং এতেন মগ্গেন, পাপুণিং বোধিমুত্তমং;

কুম্মগ্গেন গৰেসিস্সং, পুব্বকম্মেন ৰারিতো’’তি.

মারেতীতি ৰিবাধেতি. ৰিপত্তিআদিসংযোজনঞ্হি সাধূনং পরমত্থতো মরণং সচ্চপটিৰেধমারণত্তা, পাপতরত্তা পাপতমোতি পাপিমা. সা চস্স পাপতমতা পাপৰুত্তিতাযাতি আহ ‘‘পাপে নিযুত্তো’’তি. অধিপতীতি কামাধিপতি. অপ্পহীনকামরাগে অত্তনো ৰসে ৰত্তেতীতি ৰসৰত্তী. তেসংযেৰ কুসলকম্মানং অন্তং করোতীতি অন্তকো. ৰট্টদুক্খতো অপরিমুত্তপচ্চযত্তা নমুচি. মত্তানং পমত্তানং বন্ধূতি পমত্তবন্ধু.

তপোকম্মাতি অত্তকিলমথানুযোগতো. অপরদ্ধোতি ৰিরজ্ঝসি. ‘‘অপরাধো’’তিপি অত্থি, সোযেৰ অত্থো. কাযকিলমথং অনুযুঞ্জন্তো যেভুয্যেন অমরত্থায অনুযুঞ্জতি, সো চ কম্মৰাদীহি অনুযুঞ্জিযমানো দেৰত্থায সিযাতি আহ ‘‘অমরভাৰত্থাযা’’তি. সব্বং তপন্তি সব্বং অত্তপরিতাপনং. অত্থাৰহং ন ভৰতি বোধিযা অনুপাযত্তা. কিঞ্চস্সাতি কিঞ্চি সিযাতি অত্থো. ফিযারিত্তংৰ ধম্মনীতি ধম্মং ৰুচ্চতি ৰণ্ণু, সো ইধ ‘‘ধম্ম’’ন্তি ৰুত্তো, ধম্মনি ৰণ্ণুপদেসেতি অত্থো. তেনাহ ‘‘অরঞ্ঞে’’তি. উভোসু পস্সেসু ফিযাহি আকড্ঢেয্য চেৰ অরিত্তেহি উপ্পীল়েয্য চ.

সম্মাৰাচাকম্মন্তাজীৰা গহিতা মগ্গসীলস্স অধিপ্পেতত্তা. সমাধিনো হি গহণেন সম্মাৰাযামসতিসমাধযো গহিতা উপকারভাৰতো. পঞ্ঞাযাতি এত্থাপি এসেৰ নযো. বুজ্ঝতি এতেনাতি বোধো. মগ্গোতি আহ ‘‘বোধাযাতি মগ্গত্থাযা’’তি. কথং পন মগ্গং মগ্গত্থায ভাৰেতীতি আহ ‘‘যথা হী’’তিআদি. তেন যথা যাগুপচনারম্ভো যাৰদেৰ যাগুঅত্থো, এৰং মগ্গভাৰনারম্ভো মগ্গাধিগমত্থাযাতি দস্সেতি. আরম্ভোতি চ অরিযমগ্গভাৰনায বন্ধাপনং দট্ঠব্বং. কেচি পন ‘‘মগ্গন্তি অরিযমগ্গং, বোধাযাতি অরহত্তসম্বোধায, এৰঞ্চ কত্ৰা ‘পত্তোস্মি পরমসুদ্ধি’ন্তি ইদম্পি ৰচনং সমত্থিত’’ন্তি ৰদন্তি, অপরে পন ‘‘সব্বঞ্ঞুতঞ্ঞাণসম্বোধাযাতি. সো হি সব্বস্মাপি বোধিতো উত্তরিতরো’’তি. নিহতো নিব্বিসেৰনভাৰং পাপিতো. তেনাহ ‘‘পরাজিতো’’তি.

তপোকম্মসুত্তৰণ্ণনা নিট্ঠিতা.

২. হত্থিরাজৰণ্ণসুত্তৰণ্ণনা

১৩৮. অন্ধভাৰকারকেতি পচুরজনস্স চক্খুৰিঞ্ঞাণুপ্পত্তিনিৰারণেন অন্ধভাৰকারকে. মহাতমেতি মহতি তমসি. পাসাণফলকে মহাচীৰরং সীসে ঠপেত্ৰাতি এতেন তং ফলকং অপস্সায নিসিন্নোতি দস্সেতি. পধানন্তি ভাৰনং. পরিগ্গণ্হমানোতি সব্বসো গণ্হন্তো অৰিস্সজ্জেন্তো, ভাৰনং অনুযুঞ্জন্তো অনুপুব্বসমাপত্তিযো ফলসমাপত্তিঞ্চ মনসিকরোন্তোতি অত্থো. তেনাহ ‘‘ননু চা’’তিআদি. অরিট্ঠকোতি অরিট্ঠকৰণ্ণো. তেনাহ ‘‘কাল়কো’’তি.

দীঘমদ্ধানন্তি চিরতরং কালং. সংসরন্তি আসাদনাধিপ্পাযেন সঞ্চরন্তো, অলং তুয্হং এতেন নিপ্পযোজনন্তি অধিপ্পাযো. ন হি তেন মারস্স কাচি অত্থসিদ্ধীতি.

হত্থিরাজৰণ্ণসুত্তৰণ্ণনা নিট্ঠিতা.

৩. সুভসুত্তৰণ্ণনা

১৩৯. সুসংৰুতাতি মগ্গসংৰরেন সুট্ঠু সংৰুতা. সুপিহিতাতি সুট্ঠু পিহিতা. ৰসানুগাতি কাযাদিদ্ৰারৰসানুগা ৰসৰত্তিনো ন হোন্তি. বদ্ধচরাতি পটিবদ্ধচরিযাতি.

সুভসুত্তৰণ্ণনা নিট্ঠিতা.

৪. পঠমমারপাসসুত্তৰণ্ণনা

১৪০. উপাযমনসিকারেনাতি অনিচ্চাদীসু অনিচ্চাদিতো মনসিকরণেন. উপাযৰীরিযেনাতি অনুপ্পন্নাকুসলানং অনুপ্পাদনায ৰিধিনা পৰত্তৰীরিযেন. কারণৰীরিযেনাতি অনুপ্পন্নানুপ্পাদনাদিঅত্থস্স কারণভূতেন ৰীরিযেন. অনুপ্পন্নপাপকানুপ্পাদনাদিঅত্থানি হি ৰীরিযানি যদত্থং হোন্তি, তং অত্থং সাধেন্তিযেৰাতি এতস্স অত্থস্স দীপকো সম্মা-সদ্দো. যোনিসোসম্মাসদ্দেন হি উপাযকারণত্থদীপকতং সন্ধায ‘‘উপাযৰীরিযেন কারণৰীরিযেনা’’তি ৰুত্তং. অরহত্তফলৰিমুত্তি উক্কট্ঠনিদ্দেসেন. মারেন ‘‘ময্হং খো, ভিক্খৰে’’তিআদিকং ভগৰতো ৰচনং সুত্ৰা ৰুত্তং ‘‘অরহত্তং পত্ৰাপি ন তুস্সতী’’তিআদি.

কিলেসপাসেনাতি কিলেসমারস্স উপাযভূতেন. কিলেসমারো হি সত্তে কামগুণপাসেহি নিবন্ধতি, ন পন সযমেৰ. তেনাহ ‘‘যে দিব্বা কামগুণসঙ্খাতা’’তিআদি. মারবন্ধনেতি কিলেসমারস্স বন্ধনট্ঠানে, ভৰচারকেতি অত্থো. ন মে সমণ মোক্খসীতি ইদং মারো ‘‘অনুত্তরা ৰিমুত্তি অনুপ্পত্তা, ৰিমুত্তা সব্বপাসেহী’’তি চ ভগৰতো ৰচনং অসদ্দহন্তো ৰদতি সদ্দহন্তোপি ৰা ‘‘এৰমযং পরেসং সত্তানং মোক্খায উস্সাহং ন করেয্যা’’তি অত্তনো কোহঞ্ঞে ঠত্ৰা ৰদতি.

পঠমমারপাসসুত্তৰণ্ণনা নিট্ঠিতা.

৫. দুতিযমারপাসসুত্তৰণ্ণনা

১৪১. অনুপুব্বগমনচারিকন্তি গামনিগমরাজধানীসু অনুক্কমেন গমনসঙ্খাতং চারিকং. এৰং হি গতেসূতি এৰং তুম্হেসু বহূসু একজ্ঝং গতেসু.

আদিম্হি কল্যাণং এতস্সাতি আদিকল্যাণং, তথা সেসেসু. সাসনস্স আদি সীলং মূলকত্তা. তস্স সমথাদযো মজ্ঝং সাসনসম্পত্তিযা ৰেমজ্ঝভাৰতো. ফলনিব্বানানি পরিযোসানং তদধিগমতো উত্তরি করণীযাভাৰতো. সাসনে সম্মাপটিপত্তি নাম পঞ্ঞায হোতি, তস্সা চ সীলং সমাধি চ মূলন্তি আহ ‘‘সীলসমাধযো ৰা আদী’’তি. যস্মা পঞ্ঞা অনুবোধপটিৰেধৰসেন দুৰিধা, তস্মা তদুভযং গণ্হন্তো ‘‘ৰিপস্সনামগ্গা মজ্ঝ’’ন্তি আহ. পঞ্ঞানিপ্ফত্তি ফলকিচ্চং, নিব্বানসচ্ছিকিরিযা পন সম্মাপটিপত্তিযা পরিযোসানং ততো পরং কত্তব্বাভাৰতোতি আহ ‘‘ফলনিব্বানানি পরিযোসান’’ন্তি. ফলগ্গহণেন হি সউপাদিসেসনিব্বানং গয্হতি, ইতরেন ইতরং, তদুভযৰসেন পটিপত্তিযা ওসানন্তি আহ ‘‘ফলনিব্বানানি পরিযোসান’’ন্তি. ‘‘তস্মাতিহ ত্ৰং, ভিক্খু, আদিমেৰ ৰিসোধেহি কুসলেসু ধম্মেসু. কো চাদি কুসলানং ধম্মানং? সীলঞ্চ সুৰিসুদ্ধং, দিট্ঠি চ উজুকা’’তি (সং. নি. ৫.৩৬৯) ৰচনতো সীলদিট্ঠুজুকতায মত্থকভূতা ৰিপস্সনা, তদধিট্ঠানা সীলসমাধীতি ইমে তস্স সাসনস্স মূলন্তি আহ ‘‘সীলসমাধিৰিপস্সনা ৰা আদী’’তি. সেসং ৰুত্তনযমেৰ.

কিঞ্চাপি অৰযৰৰিনিমুত্তো সমুদাযো নত্থি, যেসু পন অৰযৰেসু সমুদাযরূপেন অপেক্খিতেসু গাথাতি সমঞ্ঞা, তং ততো ভিন্নং ৰিয কত্ৰা দস্সেন্তো ‘‘চতুপ্পদিকগাথায তাৰ পঠমপাদো’’তিআদিমাহ. পঞ্চপদছপ্পদানং গাথানং আদিপরিযোসানগ্গহণেন ইতরে দুতিযাদযো তযো চত্তারো ৰা মজ্ঝন্তি অৰুত্তসিদ্ধমেৰাতি ন ৰুত্তং. একানুসন্ধিকসুত্তস্সাতি ইদং বহুৰিভাগং যথানুসন্ধিনা একানুসন্ধিকং সুত্তং সন্ধায ৰুত্তং, ইতরস্স পন তেযেৰ দেসেতব্বধম্মৰিভাগেন আদিমজ্ঝপরিযোসানভাগা লব্ভন্তি. নিদানন্তি কালদেসকপরিসাদি-অপদিসনলক্খণাদিকো অত্থো. ইদমৰোচাতি ইতি-সদ্দো আদিঅত্থো. তেন তদৰসেসনিগমনপাল়িং সঙ্গণ্হাতি. অনেকানুসন্ধীকস্স সহ নিদানেন পঠমো অনুসন্ধি আদি. সহ নিগমনেন পচ্ছিমো পরিযোসানং, ইতরেন মজ্ঝিমন্তিআদিমজ্ঝপরিযোসানানি ৰেদিতব্বানি.

সাত্থকন্তি অত্থসম্পত্তিযা সাত্থকং কত্ৰা. সব্যঞ্জনন্তি ব্যঞ্জনসম্পত্তিযা সব্যঞ্জনং. সম্পত্তি চ নাম পরিপুণ্ণব্যঞ্জনতাতি আহ ‘‘ব্যঞ্জনেহি…পে… দেসেতা’’তি. সকলপরিপুণ্ণন্তি সব্বসো পরিপুণ্ণং সীলাদিপঞ্চধম্মক্খন্ধপারিপূরিযা. নিরুপক্কিলেসং দিট্ঠিমানাদিউপক্কিলেসাভাৰতো. অৰিসেসতো তিস্সো সিক্খা সকলে সাসনে ভৰন্তি. ধম্মোতি পন ব্রহ্মচরিযং ৰা সন্ধায ৰুত্তং ‘‘কতমেসানং খো, ভন্তে, বুদ্ধানং ভগৰন্তানং ব্রহ্মচরিযং চিরট্ঠিতিকং অহোসী’’তিআদীসু (পারা. ১৮) ৰিয. দুকূলসাণিযা পটিচ্ছন্না ৰিয, ন তু পাকারসেলাদিপটিচ্ছন্না ৰিয. তেন ধম্মনিরুত্তিযা সকলকিলেসানং পহানানুভাৰং ৰদতি. অলাভপরিহানিযা, ন লদ্ধপরিহানিযা. অড্ঢুড্ঢানীতি পঞ্চসতাধিকানি তীণি পাটিহারিযসহস্সানি. সাতন্তি সুখং.

দুতিযমারপাসসুত্তৰণ্ণনা নিট্ঠিতা.

৬. সপ্পসুত্তৰণ্ণনা

১৪২. সুরাকারকানন্তি পিট্ঠসুরাযোজনকানং. কোসলানং ইস্সরোতি কোসলো, কোসলরাজস্স অযন্তি কোসলিকা. পরিভোগপাতীতি ভত্তপরিভোজনত্থায পাতি পরিভোগপাতি. কম্মারুদ্ধনপণাল়িযাতি কম্মারুদ্ধনপণাল়িমুখে. ধমমানাযাতি ধমিযমানায. তং পন যস্মা ভস্তৰাতেহি পূরিতং নাম হোতি, তস্মা ‘‘ভস্তৰাতেন পূরিযমানাযা’’তি ৰুত্তং. নিযামভূমিযন্তি ভগৰতো পটিসল্লানট্ঠানে সঞ্চরন্তং মারং মংসচক্খুনাৰ দিস্ৰা. তেনাহ ‘‘ৰিজ্জুলতালোকেনা’’তি.

সেয্যত্থাযাতি সেয্যানিসংসায. তেনাহ ‘‘ঠস্সামী’’তিআদি. অত্তসঞ্ঞতোতি অত্তভাৰেন সংযতো. তেনাহ ‘‘সংযতত্তভাৰো’’তি. তংসণ্ঠিতস্সাতি তস্মিং হত্থপাদকুক্কুচ্চরহিতে বুদ্ধমুনিস্মিং অৰট্ঠিতস্স. ৰোস্সজ্জ চরেয্য তত্থ সোতি ইমিনা ভগৰা তং ব্যাকরমানো ৰিভিংসিতা বুদ্ধানং কিং করিস্সতি ভযাভাৰতো? কেৰলং পন অনট্ঠৰলিকং উপ্পীল়েন্তো ৰিয ত্ৰমেৰ আযাসং আপজ্জিস্সসীতি মারং সন্তজ্জেতি.

ভেরৰাতি অৰীতরাগানং ভযজনকা. তত্থাতি তংনিমিত্তং. ফলেয্যাতি ভিজ্জেয্য. সত্তিসল্লন্তি সত্তিসঙ্খাতং পুথুসল্লং. উরস্মিং চারযেয্যুন্তি ফাসুং ৰিজ্ঝিতুং ঠপেয্যুং উগ্গিরেয্যুং. খন্ধুপধীসূতি খন্ধসঙ্খাতেসু উপধীসু. তাণং করোন্তি নামাতি ততো ভযনিমিত্ততো অত্তনো তাণং করোন্তি নাম.

সপ্পসুত্তৰণ্ণনা নিট্ঠিতা.

৭. সুপতিসুত্তৰণ্ণনা

১৪৩. উতুগাহাপনত্থং ধোৰিত্ৰা, ন রজোজল্লৰিক্খালনত্থং. তেনাহ ‘‘বুদ্ধানং পনা’’তিআদি. ধোতপাদকে গেহেতি ধোতপাদেহি অক্কমিতব্বকে. ৰত্তভেদো নাম নত্থি ধম্মস্সামিভাৰতো. ৰত্তসীসে ঠত্ৰা ধোৰন্তি অঞ্ঞেসং দিট্ঠানুগতিআপজ্জনত্থং. সোপ্পপরিগ্গাহকেনাতি এত্থ সোপ্পং নাম নিদ্দায অন্তরন্তরা পৰত্তকিরিযমযচিত্তপ্পৰত্তিরহিতা নিরন্তরভৰঙ্গসন্ততীতি তং সভাৰতো পযোজনতো কালপরিচ্ছেদতো পরিগ্গাহকং উপরিনিদ্দেসসতিসম্পজঞ্ঞং সন্ধায ৰুত্তং ‘‘সোপ্পপরিগ্গাহকেন সতিসম্পজঞ্ঞেনা’’তি. কেচি পন ‘‘নিদ্দাসোপ্পনা’’তি ৰদন্তি, তং ভগৰতো সোপ্পং হীল়েন্তো ৰদতি.

কিং নূতি এত্থং কিন্তি হেতুনিস্সক্কে পচ্চত্তৰচনন্তি আহ ‘‘কস্মা নু সুপসী’’তি? দুব্ভগো ৰুচ্চতি নিস্সিরিকো ভিন্নভগো, সো পন মতসদিসো ৰিসঞ্ঞিসদিসো চ হোতীতি আহ ‘‘মতো ৰিয ৰিসঞ্ঞী ৰিয চা’’তি.

আদিনাতি আদি-সদ্দেন ‘‘বাহিরস্স উপাদায অট্ঠারসা’’তিআদিনা (ৰিভ. ৮৪২) আগতং তণ্হাকোট্ঠাসং সঙ্গণ্হাতি. তত্থ তত্থ ৰিসত্ততাযাতি তম্মিং তস্মিং আরম্মণে ৰিসেসতো আসত্তভাৰেন. ৰিসস্স দুক্খনিব্বত্তককম্মস্স হেতুভাৰতো ৰিসমূলতা ৰিসং ৰা দুক্খদুক্খাদিভূতৰেদনা মূলং এতস্সাতি ৰিসমূলা, তণ্হা. তস্স রূপাদিকস্স দুক্খস্স পরিভোগো, ন অমতস্সাতি ৰিসপরিভোগতা. কত্থচি নেতুন্তি কত্থচি ভৰে সব্বথা নেতুং? পরিক্খযাতি সব্বসো খীণত্তা. তুয্হং কিং এত্থাতি সব্বুপধিপরিক্খযা সুদ্ধস্স মম পটিপত্তিযং তুয্হং কিং উজ্ঝাযনং? কেৰলং ৰিঘাতোযেৰ তেতি দস্সেতি.

সুপতিসুত্তৰণ্ণনা নিট্ঠিতা.

৮. নন্দতিসুত্তৰণ্ণনা

১৪৪. অট্ঠমং উত্তানত্থমেৰ.

নন্দতিসুত্তৰণ্ণনা নিট্ঠিতা.

৯. পঠমআযুসুত্তৰণ্ণনা

১৪৫. পণ্ণাসং ৰা ৰস্সানি জীৰতি ৰস্সসততো উপরি সেয্যথাপি থেরো অনুরুদ্ধো. সট্ঠি ৰা ৰস্সানি সেয্যথাপি থেরো বাকুলো. পটিহরিত্ৰা পচ্চনীকভাৰে সাতং সুখং এতস্সাতি পচ্চনীকসাতো, তব্ভাৰো পচ্চনীকসাততা, তায. অভিভৰিত্ৰা অভাসি পটিৰচনং জানমানোৰ.

ন হীল়েয্য ন জিগুচ্ছেয্য. এৰন্তি সো দারকো ৰিয কিঞ্চি অচিন্তেন্তো সপ্পুরিসো চরেয্য, এৰং হিস্স চিত্তদুক্খং ন হোতীতি অধিপ্পাযো. পজ্জলিতসীসো ৰিয চরেয্যাতি যথা পজ্জলিতসীসো পুরিসো অঞ্ঞং কিঞ্চি অকত্ৰা তস্সেৰ ৰূপসমায ৰাযমেয্য, এৰং সপ্পুরিসো আযুং পরিত্তন্তি ঞত্ৰা তেনেৰ নযেন সব্বসঙ্খারগতং অনিচ্চং, অনিচ্চত্তা এৰ দুক্খং, অনত্তাতি ৰিপস্সনম্পি ওতরিত্ৰা তং উস্সুক্কাপেন্তোপি সঙ্খারৰিগমায চরেয্য পটিপজ্জেয্য.

পঠমআযুসুত্তৰণ্ণনা নিট্ঠিতা.

১০. দুতিযআযুসুত্তৰণ্ণনা

১৪৬. নেমীৰাতি নেমিসীসেন চক্কং ৰদতি. কুব্বরং অনুপরিযাযতীতি কুব্বরং অনুপরিৰত্ততি. তথাভূতো পন সো তং অজহন্তোৰাতি আহ ‘‘ন ৰিজহতী’’তি. আযু অনুপরিযাযতীতি মচ্চানং আযু গতম্পি পচ্চাগচ্ছতীতি ভগৰতো পটাণি হুত্ৰা ৰদতি, ভগৰা পন তং অভিভৰিত্ৰা ‘‘অচ্চযন্তি অহোরত্তা’’তিআদিনা আযুনো অচ্চযগমনমরণতংযেৰ পৰেদেসি.

দুতিযআযুসুত্তৰণ্ণনা নিট্ঠিতা.

পঠমৰগ্গৰণ্ণনা নিট্ঠিতা.