১. চন্দিমসসুত্তৰণ্ণনা

৯২. পব্বততটা সন্দমানো তথারূপো নদীনিৰত্তনপদেসোপি সম্বাধট্ঠানতায কচ্ছো ৰিযাতি আহ ‘‘পব্বতকচ্ছেপী’’তি. পটিপক্খদূরীভাৰেন সেট্ঠট্ঠেন চ একো উদেতীতি একোদি, একগ্গতা. তস্মিং যোগতো একগ্গচিত্তা ইধ একোদী. পটিপক্খতো অত্তানং নিপযন্তি ৰিসোধেন্তীতি নিপকা, পঞ্ঞৰন্তো. তেনাহ ‘‘একগ্গচিত্তা চেৰা’’তিআদি. কাযাদিভেদং আরম্মণং সাতিসযায সতিযা সরন্তীতি সতা. তেনাহ ‘‘সতিমন্তো’’তি. সোত্থিং গমিস্সন্তীতি যথাৰুত্তপদেসে মগা সোত্থিমনুপদ্দৰেন ৰত্তিস্সন্তি, এৰং ঝানলাভিনো সোত্থিং কিলেসেহি অনুপদ্দুতা ৰত্তিস্সন্তি. অযং কির দেৰপুত্তো ব্রহ্মলোকে নিব্বানসঞ্ঞী, তস্মা এৰমাহ. ভগৰা ‘‘অযং দেৰপুত্তো অনিব্বানগামী সমানো নিব্বানগামিসঞ্ঞী, হন্দস্স নিব্বানগামিনো দস্সেমী’’তি দুতিযং গাথমাহ. চতুন্নং ওঘানং, সংসারমহোঘস্সেৰ ৰা পরতীরভাৰতো পরতীরন্তি নিব্বানং. অম্বুনি জাতো অম্বুজো, মচ্ছো. সুত্তজালং ছিন্দিত্ৰা মচ্ছা ৰিয কিলেসজালং ভিন্দিত্ৰা গমিস্সন্তীতি.

চন্দিমসসুত্তৰণ্ণনা নিট্ঠিতা.