১. আদিত্তসুত্তৰণ্ণনা

৪১. সীসন্তি দেসনাপদেসো, দেসনায অঞ্ঞেসুপি ৰত্তব্বেসু কস্সচিদেৰ সীসভাগেন অপদিসনং. তেনাহ ‘‘রাগাদীহী’’তিআদি. দানেনাতি অত্তনো সন্তকস্স পরেসং পরিচ্চজনেন. তং পন পরিচ্চজনং চেতনায হোতীতি আহ ‘‘দানচেতনাযা’’তি দানপুঞ্ঞচেতনাতি দানমযা পুঞ্ঞচেতনা দাযকস্সেৰ হোতি তংসন্ততিপরিযাপন্নত্তা. নীহতভণ্ডকন্তি আদিত্তগেহতো বহি নিক্খামিতং ভণ্ডকং. এতন্তি ‘‘দিন্নং হোতী’’তিআদিৰচনং. অদিন্নেতি দানমুখে অনিযুঞ্জিতে ভোগে. ‘‘অন্তেনা’’তি জীৰিতস্স অন্তো অধিপ্পেতোতি আহ ‘‘মরণেনা’’তি. মমাতি পরিগ্গহিতত্তা পরিগ্গহা, ভোগা. তেপি কেনচি আকারেন ৰিনাসং অনুপগতা মরণেন পহীযন্তি নামাতি ৰুত্তং ‘‘চোরাদীনং ৰসেন অৰিনট্ঠভোগে’’তি. সোভনা অগ্গভূতা রূপাদযো এত্থাতি সগ্গো, তং সগ্গং.

আদিত্তসুত্তৰণ্ণনা নিট্ঠিতা.