৪. সতুল্লপকাযিকৰগ্গো

১. সব্ভিসুত্তৰণ্ণনা

৩১. সতং সাধূনং সরণগমনসীলাদিভেদস্স ধম্মস্স উল্লপনতো, অত্তনো ৰা পুব্বেনিৰাসানুস্সতিযা তস্স ধম্মস্স উল্লপনতো কথনতো সতুল্লপা, দেৰতা, তাসং কাযো সমূহো, তত্থ ভৰাতি সতুল্লপকাযিকা. তেনাহ ‘‘সতং ধম্ম’’ন্তিআদি. সমাদানৰসেন উল্লপেত্ৰা, ন ৰণ্ণনাকথনমত্তেন তত্রাতি তস্মিং তাসং দেৰতানং সতুল্লপকাযিকভাৰে. ইদং ৰত্থূতি ইদং কারণং. সমুদ্দৰাণিজাতি সংযত্তিকা. খিত্তসরৰেগেনাতি জিযামুত্তসরসদিসৰেগেন, সীঘওঘেনাতি অত্থো. উপ্পততীতি উপ্পাতো. উপ্পাতে ভৰং ব্যসনং উপ্পাতিকং. পতিট্ঠাতি হিতপতিট্ঠা. পরলোকে হিতসুখাৰহং অভযকারণং. জঙ্ঘসতন্তি মনুস্সসতং. জঙ্ঘাসীসেন হি মনুস্সে ৰদতি সহচারিভাৰতো. অগ্গহেসি পঞ্চসীলানি. আসন্নানাসন্নেসু আসন্নস্সেৰ পঠমং ৰিপচ্চনতো ‘‘আসন্নকালে গহিতসীলং নিস্সাযা’’তি ৰুত্তং. ঘটাৰসেনাতি সমূহৰসেন.

সব্ভীতি সাধূহি. তে হি সপরহিতসাধনতো পাসংসতায সন্তগুণতায চ সন্তোতি ৰুচ্চতি. তে পন যস্মা পণ্ডিতলক্খণেহি সমন্নাগতা হোন্তি, তস্মা ‘‘পণ্ডিতেহী’’তি আহ. সমাসেথাতি সংৰসেথাতি অযমেত্থ অধিপ্পাযোতি আহ ‘‘সব্বইরিযাপথে’’তিআদি. মিত্তসন্থৰন্তি মেত্তিসন্ধানং. সত্তানং হিতেসিতালক্খণা হি মেত্তি, সা চ ঞাণসহিতা ঞাণপুব্বঙ্গমাৰাতি মিত্তসন্থৰো অসংকিলিট্ঠো, ইতরো সংকিলিট্ঠোতি আহ ‘‘ন কেনচি সদ্ধিং কাতব্বো’’তি. সদ্ধম্মন্তি দিট্ঠধম্মিকাদিহিতাৰহং সুন্দরধম্মং. সেয্যোতি হিতৰড্ঢনতাদি ৰুত্তন্তি আহ ‘‘ৰড্ঢী’’তি.

সতং সাধূনং, পণ্ডিতানন্তি অযমেত্থ অত্থো. তপ্পটিযোগৰিসযত্তা অঞ্ঞ-সদ্দস্স ৰুত্তং ‘‘অঞ্ঞতো অন্ধবালতো’’তি. সোকনিমিত্তং সোককারণং উত্তরপদলোপেন ইধ সোকসদ্দেন গহিতন্তি আহ ‘‘সোকৰত্থূন’’ন্তিআদি. সোকৰত্থূনি নাম চোরাদযো অচ্ছিন্দনাদিৰসেন পরেসং সোককরণতো. সোকানুগতা সোকপ্পত্তা.

থেরস্সাতি সংকিচ্চত্থেরস্স. অত্তনো ভগিনিযা জেট্ঠত্তা ‘‘তুম্হে’’তি আহ. অযং ‘‘ইধ চোরা পটিপজ্জিংসূ’’তি অম্হে তিণাযপি ন মঞ্ঞতীতি চিন্তেত্ৰা একচ্চে ‘‘মারেম ন’’ন্তি আহংসু. করুণায একচ্চে ‘‘ৰিস্সজ্জেমা’’তি আহংসু. মন্তেত্ৰাতি ভাসেত্ৰা.

অহু অহোসি, ভূতপুব্বন্তি অত্থো. অরঞ্ঞস্মিং ব্রহাৰনেতি তাদিসে ব্রহাৰনে, মহারঞ্ঞে নিৰাসীতি অত্থো চেতোতি ব্যাধো. কূটানীতি ৰাকুরাদযো. ওড্ডেত্ৰাতি সজ্জেত্ৰা. সসকন্তি পেলকং উব্বিগ্গাতি ভীততসিতা. একরত্তিন্তি একরত্তেনেৰ. ধনজানীতি পরিব্বযৰসেন অদ্ধিকেহি লদ্ধব্বধনতো হানি, ‘‘সমণম্পি নাম হন্তি, কিং অম্হেসু লজ্জিস্সতী’’তি অদ্ধিকানং অনাগমনতো একদিৰসং লদ্ধব্বপরিব্বযম্পি ন লভিস্সন্তীতি অধিপ্পাযো.

ঞাতযোপি মাতাপিতুভাতুভগিনিআদিকে ঞাতকে. তে কির অধিমুত্তস্স ভগিনিযা সন্তিকং উপগচ্ছন্তা অন্তরামগ্গে তেন সমাগতা, অধিমুত্তো সচ্চৰাচং অনুরক্খন্তো চোরভযং তেসং নারোচেসি. তেন ৰুত্তং ‘‘তেসম্পী’’তিআদি. তং নিস্সায পব্বজিতত্তা ‘‘অধিমুত্তসামণেরস্স সন্তিকে’’তি ৰুত্তং, ন উপসম্পদাচরিযো হুত্ৰা. তেনাহ ‘‘অত্তনো অন্তেৰাসিকে কত্ৰা’’তি. সচ্চানুরক্খণেন অনুত্তরগুণাধিগমেন চ ঞাতিমজ্ঝে ৰিরোচতি.

সাততন্তি সততং. স-সদ্দস্স হি ইধ সাভাৰো যথা ‘‘সারাগো’’তিআদীসু. সাতভাৰো ৰা সাততন্তি আহ ‘‘সুখং ৰা’’তি. কারণেনাতি তেন তেন কারণেন. সব্বাসং তাসং ৰচনং সুভাসিতং, ভগৰতো পন উক্কংসগতং সুভাসিতমেৰ. স্ৰাযমত্থো তংতংগাথাপদেনেৰ ৰিঞ্ঞাযতীতি তং নীহরিত্ৰা দস্সেতুং ‘‘ন কেৰল’’ন্তিআদি ৰুত্তং. তেন সপ্পুরিসূপসংসেৰসদ্ধম্মাভিযোগো যথা সত্তানং ৰড্ঢিযা পঞ্ঞাপটিলাভস্স একন্তিকং কারণং, এৰং সোকপচ্চযে সতি ৰিসোকভাৰস্স, ঞাতিমজ্ঝে সোভায, সুগতিগমনস্স, চিরং সুখট্ঠানস্স, ৰট্টদুক্খমোচনস্সপি অঞ্ঞাসাধারণং হোতীতি ৰুত্তমেৰাতি দট্ঠব্বং.

সব্ভিসুত্তৰণ্ণনা নিট্ঠিতা.

২. মচ্ছরিসুত্তৰণ্ণনা

৩২. পমজ্জনাকারেন পৰত্তা অনুপলদ্ধি পমাদো. তেন একন্ততো সতিরহিতা হোন্তীতি ৰুত্তং ‘‘সতিৰিপ্পৰাসলক্খণেনা’’তি. দিট্ঠিৰিচিকিচ্ছাদযো চেত্থ পমাদেনেৰ সঙ্গহিতা. ইদানি যথা মচ্ছরিযনিমিত্তঞ্চ পমাদনিমিত্তঞ্চ দানং ন দীযতি, তং দস্সেতুং ‘‘একচ্চো হী’’তিআদি ৰুত্তং. পরিক্খযং গমিস্সতীতি ভোগপরিহানিং গমিস্সতি. খিড্ডাদীতি আদি-সদ্দেন মণ্ডনৰিভূসনছণনক্খত্তকিচ্চব্যসনাদিং সঙ্গণ্হাতি. যসদাযকন্তি কিত্তিযসস্স পরিৰারযসস্স চ দাযকং. সিরীদাযকন্তি সোভগ্গদাযকং. সম্পত্তিদাযকন্তি কুলভোগরূপভোগসম্পদাহি সম্পত্তিদাযকং. পুঞ্ঞন্তি ৰা ইধ পুঞ্ঞফলং দট্ঠব্বং ‘‘এৰমিদং পুঞ্ঞং পৰড্ঢতী’’তিআদীসু (দী. নি. ৩.৮০) ৰিয. অত্থি দানস্স ফলন্তি এত্থ দেয্যধম্মস্স অনৰট্ঠিততং বহুলসাধারণতং, তং পহায গমনীযতং, তব্বিসযায পীতিযা সাৰজ্জতং, দানধম্মস্স অনঞ্ঞসাধারণতং অনুগামিকতং, তব্বিসযায পীতিযা অনৰজ্জতং, লোভাদিপাপধম্মানং ৰিনোদনং, সেসপুঞ্ঞানং উপনিস্সযঞ্চ জানন্তেনাতি ৰত্তব্বং.

তংযেৰ বালন্তি যো মচ্ছরী, তমেৰ. অদানসীলা বালা. একচ্চো ধনস্স পরিভোগপরিক্খযভযেন অত্তনাপি ন পরিভুঞ্জতি অতিলোভসেট্ঠি ৰিযাতি আহ ‘‘ইধলোকপরলোকেসূ’’তি.

যস্মা একচ্চো অদানসীলো পুরিসো অদ্ধিকে দিস্ৰা পস্সন্তোপি ন পস্সতি, তেসং কথং সুণন্তোপি ন সুণোতি, সযং কিঞ্চি ন কথেতি, অদাতুকম্যতাথম্ভে বদ্ধো হোতি, তস্মা তত্থ মতলিঙ্গানি উপলব্ভন্তিযেৰাতি আহ ‘‘অদানসীলতায মরণেন মতেসূ’’তি. অট্ঠকথাযং পন দানমত্তমেৰ গহেত্ৰা মতেনস্স সমতং দস্সেতুং ‘‘যথা হী’’তিআদি ৰুত্তং. দানসীলস্স পন অমতলিঙ্গানি ৰুত্তৰিপরিযাযতো ৰেদিতব্বানি. ৰজন্তি পুথুত্তে একৰচনং, তস্মা ৰচনৰিপল্লাসেন ৰুত্তন্তি আহ ‘‘সহ ৰজন্তা’’তি. দানসীলাদিধম্মো পুরাতনো, ন অজ্জতনোতি সনন্তনো, সো এতেসু অত্থীতি সনন্তনা, পণ্ডিতা, তেসং ধম্মাতি তেসং ৰসেনপি ধম্মো সনন্তনোতি আহ ‘‘সনন্তনানং ৰা পণ্ডিতানং এস ধম্মো’’তি. অপ্পস্মিম্পি দেয্যধম্মে সতি একে দানং দদন্তি, একে ন দদন্তি মচ্ছরিভাৰা. সহস্সদানসদিসাতি একাপি দক্খিণা পরিচ্চাগচেতনায উল়ারভাৰতো সহস্সদানসদিসা হোতি.

দুরনুগমনোতি অসমঙ্গিনা অনুগন্তুং দুক্করো. অননুগমনঞ্চস্স ধম্মস্স অপূরণমেৰাতি আহ ‘‘দুপ্পূরো’’তি. ‘‘ধম্মং চরে’’তি অযং ধম্মচরিযা গহট্ঠস্স ৰসেন আরদ্ধাতি আহ ‘‘দসকুসলকম্মপথধম্মং চরতী’’তি. তেনাহ ‘‘দারঞ্চ পোস’’ন্তি. সমুঞ্জকন্তি কস্সকেহি অত্তনা কাতব্বং কত্ৰা ৰিসট্ঠধঞ্ঞকরণতো খলে উঞ্ছাচরিযৰসেন সমুঞ্জনিআদিনা ছড্ডিতধঞ্ঞসংহরণং. তেনাহ ‘‘যো অপি…পে… সমুঞ্জকং চরতী’’তি. এতেনাতি সতসহস্সসহস্সযাগিগ্গহণেন দসন্নম্পি ভিক্খুকোটীনং পিণ্ডপাতো দস্সিতো হোতি. ‘‘দিন্নো’’তি পদং আনেত্ৰা যোজনা. দসন্নং ৰা কহাপণকোটীনং পিণ্ডপাতোতি দসন্নং কহাপণকোটীনং ৰিনিযুঞ্জনৰসেন সম্পাদিতপিণ্ডপাতো. তযিদং সতসহস্সং সহস্সযাগীনং দানং এত্তকং হোতীতি কত্ৰা ৰুত্তং. সমুঞ্জকং চরন্তোপীতি সমুঞ্জকং চরিত্ৰাপি, সমুঞ্জকচরণহেতূতি অত্থো. সেসপদদ্ৰযেপি এসেৰ নযো. দারং পোসেন্তোপি ধম্মং চরতি, অপ্পকস্মিং দদন্তোপি ধম্মং চরতীতি যোজনা. তথাৰিধস্সাতি তাদিসস্স তথাধম্মচারিনো যা ধম্মচরিযা, তস্সা কলম্পি নগ্ঘন্তি এতে সহস্সযাগিনো অত্তনো সহস্সযাগিতায. যং তেন দলিদ্দেনাতিআদি তস্সেৰত্থস্স ৰিৰরণং. সব্বেসম্পি তেসন্তি ‘‘সতংসহস্সানং সহস্সযাগিন’’ন্তি ৰুত্তানং তেসং সব্বেসম্পি. ইতরেসন্তি ‘‘তথাৰিধস্সা’’তি ৰুত্তপুরিসতো অঞ্ঞেসং. দসকোটিসহস্সদানন্তি দসকোটিসঙ্খাতং ততো অনেকসহস্সভেদতায সহস্সদানং.

‘‘কলং নগ্ঘতী’’তি ইদং তেসং দানতো ইমস্স দানস্স উল়ারতরভাৰেন ৰিপুলতরভাৰেন ৰিপুলতরফলতায ৰুত্তন্তি আহ ‘‘কথং নু খো এতং মহপ্ফলতরন্তি জাননত্থ’’ন্তি. পচ্চযৰিসেসেন মহত্তং গতোতি মহগ্গতো, উল়ারোতি অত্থো. তেনাহ ‘‘ৰিপুলস্সেতং ৰেৰচন’’ন্তি. সমেনাতি ঞাযেন, ধম্মেনাতি অত্থো. ৰিসমেতি ন সমে মচ্ছরিযলক্খণপ্পত্তে. ছেত্ৰাতি পীল়েত্ৰা. তং পন পীল়নং পোথনন্তি দস্সেন্তো ‘‘পোথেত্ৰা’’তি আহ. অস্সুমুখাতি তিন্তঅস্সুমুখসম্মিস্সা পরং রোদাপেত্ৰা. মহাদানন্তি যথাৰুত্তং বহুদেয্যধম্মস্স পরিচ্চজনেন মহন্তদানং. উপ্পত্তিযা অপরিসুদ্ধতাযাতি অজ্ঝাসযস্স দেয্যধম্মগৰেসনায চ সুদ্ধতায মলীনত্তা. ইতরং ধম্মচরিযায নিব্বত্তিতদানং. পরিত্তদানন্তি পরিত্তস্স দেয্যধম্মস্স ৰসেন পরিত্তদানং. অত্তনো উপ্পত্তিযা পরিসুদ্ধতাযাতি অজ্ঝাসযস্স দেয্যধম্মগৰেসনায চ ৰিসুদ্ধতায. এৰন্তিআদিমাহাতি ‘‘এৰং সহস্সানং সহস্সযাগিন’’ন্তি অৰোচ. তত্থ সহস্সানন্তি সতংসহস্সানং. গাথাবন্ধসুখত্থং সতগ্গহণং ন কতং. সেসং ৰুত্তনযমেৰ.

মচ্ছরিসুত্তৰণ্ণনা নিট্ঠিতা.

৩. সাধুসুত্তৰণ্ণনা

৩৩. উদানং উদানেসীতি পীতিৰেগেন উগ্গিরিতব্বতায উদানং উগ্গিরি উচ্চারেসি. তযিদং যস্মা পীতিসমুট্ঠাপিতং ৰচনং, তস্মা ৰুত্তং ‘‘উদাহারং উদাহরী’’তি. যথা পন তং ৰচনং ‘‘উদান’’ন্তি ৰুচ্চতি, তং দস্সেতুং ‘‘যথা হী’’তিআদি ৰুত্তং. সদ্ধাযাতি এত্থ য-কারো হেতুঅত্থো. পরিচ্চাগচেতনায হি সদ্ধা ৰিসেসপচ্চযো অস্সদ্ধস্স তদভাৰতো. পি-সদ্দো ৰুত্তত্থসম্পিণ্ডনত্থো. ‘‘সাহূ’’তি পদং সাধুসদ্দেন সমানত্থং দট্ঠব্বং. কথন্তি দানযুদ্ধানং ৰিপক্খসভাৰাতি অধিপ্পাযো. এতং উভযন্তি দানং যুদ্ধন্তি ইদং দ্ৰযং. জীৰিতভীরুকোতি জীৰিতৰিনাসভীরুকো. খযভীরুকোতি ভোগক্খযস্স ভীরুকো. ৰদন্তোতি জীৰিতে সালযতং, ততো এৰ যুজ্ঝনে অসমত্থতং পৰেদেন্তো. ছেজ্জন্তি হত্থপাদাদিছেদো. উস্সহন্তোতি ৰীরিযং করোন্তো. এৰং ভোগে রক্খিস্সামীতি তথা ভোগে অপরিক্খীণে করিস্সামীতি. ৰদন্তোতি ইধ ভোগেসু লোভং, ততো এৰ দাতুং অসমত্থতং পৰেদেন্তো. এৰন্তি এৰং জীৰিতভোগনিরপেক্খতায দানঞ্চ যুদ্ধঞ্চ সমং হোতি. সদ্ধাদিসম্পন্নোতি সদ্ধাধম্মজীৰিতাৰীমংসাসীলাদিগুণসমন্নাগতো. সো হি দেয্যৰত্থুনো পরিত্তকত্তা অপ্পকম্পি দদন্তো অত্তনো পন চিত্তসম্পত্তিযা খেত্তসম্পত্তিযা চ বহুং উল়ারপুঞ্ঞং পৰড্ঢেন্তো বহুৰিধং লোভ-দোস-ইস্সা-মচ্ছরিয-দিট্ঠিৰিচিকিচ্ছাদিভেদং তপ্পটিপক্খং অভিভৰতি, ততো এৰ চ তং মহপ্ফলং হোতি মহানিসংসং. অট্ঠকথাযং পন ‘‘মচ্ছেরং মদ্দতি’’চ্চেৰ ৰুত্তং, তস্স পন উজুৰিপচ্চনীকভাৰতো.

পরত্থাতি পরলোকে. একসাটকব্রাহ্মণৰত্থু অন্ৰযৰসেন, অঙ্কুরৰত্থু ব্যতিরেকৰসেন ৰিত্থারেতব্বং.

ধম্মো লদ্ধো এতেনাতি ধম্মলদ্ধো, পুগ্গলো. অগ্গিআহিতপদস্স ৰিয সদ্দসিদ্ধি দট্ঠব্বা. ‘‘উট্ঠানন্তি কাযিকং ৰীরিযং, ৰীরিযন্তি চেতসিক’’ন্তি ৰদন্তি. উট্ঠানন্তি ভোগুপ্পাদে যুত্তপযুত্ততা. ৰীরিযন্তি তজ্জো উস্সাহো. যমস্স আণাপৰত্তিট্ঠানং. ৰেতরণিম্পি ইতরে নিরযে চ অতিক্কম্ম. তে পন অব্বুদাদীনং ৰসেন অৰীচিং দসধা কত্ৰা অৰসেসমহানিরযে সত্তপি আযুপ্পমাণভেদেন তযো তযো কত্ৰা একতিংসাতি ৰদন্তি. সঞ্জীৰাদিনিরযসংৰত্তনস্স কম্মস্স তিক্খমজ্ঝমুদুভাৰেন তস্স আযুপ্পমাণস্স তিৰিধতা ৰিভাৰেতব্বা. অপরে পন ‘‘অট্ঠ মহানিরযা সোল়স উস্সদনিরযা আদিতো চত্তারো সিতনিরযে একং কত্ৰা সত্ত সিতনিরযাতি এৰং একতিংস মহানিরযা’’তি ৰদন্তি. মহানিরযগ্গহণতো আদিতো চত্তারো সিতনিরযা একো নিরযো কতোতি.

তেসন্তি ৰিচিনিত্ৰা গহিতপচ্চযানং. পঞ্চনৰুতিপাসণ্ডভেদা পপঞ্চসূদনিসংৰণ্ণনাযং ৰুত্তনযেন ৰেদিতব্বা. তত্থাতি তেসু দ্ৰীসু ৰিচিননেসু. দক্খিণাৰিচিননং আহ, উপমানানি হি নাম যাৰদেৰ উপমেয্যত্থৰিভাৰনত্থানি. এতেন সুখেত্তগহণতোপি দক্খিণেয্যৰিচিননং দট্ঠব্বং.

পাণেসু সংযমোতি ইমিনা দসৰিধম্পি কুসলকম্মপথধম্মং দস্সেতি. যথা হি ‘‘পাণেসু সংযমো’’তি ইমিনা সত্তানং জীৰিতাৰোরোপনতো সংযমো ৰুত্তো, এৰং তেসং সাপতেয্যাৰহারতো পরদারামসনতো ৰিসংৰাদনতো অঞ্ঞমঞ্ঞভেদনতো ফরুসৰচনেন সঙ্ঘট্টনতো নিরত্থকৰিপ্পলপনতো পরসন্তকাভিজ্ঝানতো উচ্ছেদচিন্তনতো মিচ্ছাভিনিৰেসনতো চ সংযমো হোতীতি. তেনাহ ‘‘সীলানিসংসং কথেতুমারদ্ধা’’তি. ফরুসৰচনসংযমো পনেত্থ সরূপেনেৰ ৰুত্তো.

পরস্স উপৰাদভযেনাতি পাপকিরিযহেতু পরেন অত্তনো ৰত্তব্বউপৰাদভযেন. উপৰাদভযাতি উপৰাদভযনিমিত্তং. ‘‘কথং নু খো অম্হে পরে ন উপৰদেয্যু’’ন্তি আসীসন্তা পাপং ন করোন্তি. ধম্মপদমেৰাতি অসঙ্খতধম্মকোট্ঠাসো এৰ সেয্যো সেট্ঠো. যস্মা সব্বসঙ্খতং অনিচ্চং খযধম্মং ৰযধম্মং ৰিরাগধম্মং নিরোধধম্মং, তস্মা তদধিগমায উস্সাহো করণীযোতি দস্সেতি. পুব্বসদ্দো কালৰিসেসৰিসযোতি আহ ‘‘পুব্বে চ কস্সপবুদ্ধাদিকালেপী’’তিআদি. পুন অকালৰিসেসো অপাটিযেক্কো ভুম্মত্থৰিসযোৰাতি আহ ‘‘সব্বেপি ৰা’’তিআদি. তত্থ সব্বেপি ৰাতি এতে সব্বেপি কস্সপবুদ্ধাদযো লোকনাথা সন্তো নাম ৰূপসন্তসব্বকিলেসসন্তাপা সন্তসব্ভূতগুণত্তা.

সাধুসুত্তৰণ্ণনা নিট্ঠিতা.

৪. নসন্তিসুত্তৰণ্ণনা

৩৪. কমনীযানীতি কন্তানি. ততো এৰ এতানি ইট্ঠারম্মণানি সুখারম্মণানি রূপাদীনি, তে পন ৰত্থুকামা, তদারম্মণকিলেসকামা ৰা. ‘‘ন সন্তি কামা মনুজেসূ’’তি দেসনাসীসমেতং, নিচ্ছযেন কামা অনিচ্চাযেৰ. মচ্চু ধীযতি এত্থাতি মচ্চুধেয্যং. ন পুন আগচ্ছতি এত্থ তং অপুনাগমনং. অপুনাগমনসঙ্খাতং নিব্বানং অনুপগচ্ছনতো. নিব্বানং হীতিআদি ৰুত্তস্সেৰত্থস্স ৰিৰরণং. বদ্ধোতি পটিবদ্ধচিত্তো. পমত্তোতি ৰোস্সগ্গপমাদং আপন্নো.

তণ্হাছন্দতো জাতং তস্স ৰিসেসপচ্চযত্তা. ইচ্ছিতং হনতীতি অঘং, দুক্খং. ইধ পন অনৰসেসপরিযাদানৰসেন পঞ্চুপাদানক্খন্ধা দুক্খন্তি. ছন্দৰিনযা অঘৰিনযোতি হেতুনিরোধেন হি ফলনিরোধো, এৰং সউপাদিসেসনিব্বানং ৰত্ৰা অঘৰিনযা দুক্খৰিনযোতি অনুপাদিসেসনিব্বানং ৰদতি.

চিত্রানীতি কিলেসকামাপি ৰেদনাদিট্ঠিসম্পযোগভেদেন হোন্তি, আকারভেদেন চ অত্থি সৰিঘাতাৰিঘাতাতি ততো ৰিসেসেতুং ‘‘আরম্মণচিত্তানী’’তি ৰুত্তং. সঙ্কপ্পিতরাগোতি সুভাদিৰসেন সঙ্কপ্পিতৰত্থুম্হি রাগো. কিলেসকামো কামোতি ৰুত্তো তস্সেৰিধ ৰিসেসতো কামভাৰসিদ্ধিতো. পসূরসুত্তেন ৰিভাৰেতব্বো ‘‘ন তে কামা’’তিআদিনা তস্স ৰত্থুম্হি আগতত্তা. ইদানি তমত্থং সঙ্খেপেনেৰ ৰিভাৰেন্তো ‘‘পসূরপরিব্বাজকো হী’’তিআদিমাহ. ন তে কামা যানি চিত্রানি লোকেতি তে চে কামা ন হোন্তি, যানি লোকে চিত্রানি রূপাদিআরম্মণানি. ৰেদেসীতি কেৰলং সঙ্কপ্পরাগঞ্চ কামং কত্ৰা ৰদেসি চে. হেহিন্তীতি ভৰেয্যুন্তি অত্থো. সুণন্তো সদ্দানি মনোরমানি, সত্থাপি তে হেহিতি কামভোগীতি পচ্চেকং গাথা, ইধ পন সংখিপিত্ৰা দস্সিতা. ধীরা নাম ধিতিসম্পন্নাতি আহ ‘‘পণ্ডিতা’’তি.

তস্সাতি যো পহীনকোধমানো সব্বসো সংযোজনাতিগো নামরূপস্মিং অসজ্জন্তো রাগাদিকিঞ্চনরহিতো, তস্স. মোঘরাজা নাম থেরো বাৰরীব্রাহ্মণস্স পরিচারকানং সোল়সন্নং অঞ্ঞতরো. যথানুসন্ধিং অপ্পত্তো সাৰসেস-অত্থো, কিঞ্চি ৰত্তব্বং অত্থীতি অধিপ্পাযো. সব্বসো ৰিমুত্তত্তাৰ দেৰমনুস্সা নমস্সন্তি, যে তং পটিপজ্জন্তি. তেসং কিং হোতি? কিঞ্চিপি ন সিযাতি অযমেত্থ অত্থৰিসেসো? দসবলং সন্ধাযেৰমাহ উক্কট্ঠনিদ্দেসেন. অনুপটিপত্তিযাতি পটিপত্তিং অনুগন্ত্ৰা পটিপজ্জনেন. নমস্সন্তি তং পূজেন্তি.

চতুসচ্চধম্মং জানিত্ৰাতি তেন পটিৰিদ্ধং চতুসচ্চধম্মং পটিৰিজ্ঝিত্ৰা. তথা চ বুদ্ধসুবুদ্ধতায নিব্বেমতিকা হোন্তীতি আহ ‘‘ৰিচিকিচ্ছং পহাযা’’তি. ততো পরং পন অনুক্কমেন অগ্গমগ্গাধিগমেন সঙ্গাতিগাপি হোন্তি. অসেক্খধম্মপারিপূরিযা পসংসিযা ৰিঞ্ঞূনং পসংসাপি হোন্তীতি.

নসন্তিসুত্তৰণ্ণনা নিট্ঠিতা.

৫. উজ্ঝানসঞ্ঞিসুত্তৰণ্ণনা

৩৫. উজ্ঝানৰসেন পৰত্তা সঞ্ঞা এতেসং অত্থি, উজ্ঝানৰসেন ৰা সঞ্জানন্তীতি উজ্ঝানসঞ্ঞী. কারযেতি কতানং পরিযন্তং কারযেতি অত্থো. পরিযন্তকারিতন্তি পরিচ্ছিন্নকারিতং পরিমিতৰচনন্তি অত্থো. পংসুকূলাদিপটিপক্খনযেন পত্তুণ্ণদুকুলাদি ৰুত্তং. নামং গহিতন্তি এতেন ‘‘উজ্ঝানসঞ্ঞিকা’’তি এত্থ ক-সদ্দো সঞ্ঞাযন্তি দস্সেতি.

অঞ্ঞেনাকারেন ভূতন্তি অত্তনা পৰেদিযমানাকারতো অঞ্ঞেন অসুদ্ধেন আকারেন ৰিজ্জমানং উপলব্ভমানং অত্তানং. ৰঞ্চেত্ৰাতি পলম্ভেত্ৰা. তস্স কুহকস্স. তং চতুন্নং পচ্চযানং পরিভুঞ্জনং. পরিজানন্তীতি তস্স পটিপত্তিং পরিচ্ছিজ্জ জানন্তি. কারকোতি সম্মাপটিপত্তিযা কত্তা, সম্মাপটিপজ্জিতাতি অত্থো.

ইদন্তি লিঙ্গৰিপল্লাসেন ৰুত্তং, অযন্তি অত্থো. ধম্মানুধম্মপটিপদাতি নিব্বানধম্মস্স অনুচ্ছৰিকতায অনুধম্মভূতা পটিপদা. পটিপক্খৰিধমনে অসিথিলতায দল়্হা. ভাসিতমত্তেন চ সৰনমত্তেন চাতি এত্থ চ-সদ্দো ৰিসেসনিৰত্তিঅত্থো. তেন ভাসিতস্স সুতস্স চ সম্মাপটিপত্তিৰিসেসং নিৰত্তেতি. লোকপরিযাযন্তি লোকস্স পরিৰিধমনং উপ্পাদনিরোধৰসেন সঙ্খারানং পরাৰুত্তিং. তেনাহ ‘‘সঙ্খারলোকস্স উদযব্বয’’ন্তি. স্ৰাযমত্থো সচ্চপটিৰেধেনেৰ হোতীতি আহ ‘‘চতুসচ্চধম্মঞ্চ অঞ্ঞাযা’’তি. এৰং ন কুব্বন্তীতি অত্তনি ৰিজ্জমানম্পি গুণং অনাৰীকরোন্তো ‘‘যথা তুম্হে ৰদথ, এৰং ন কুব্বন্তী’’তি অৰিজ্জমানতং ব্যাকরোতীতি অত্থো.

অকারকমেৰাতি দোসং অকারকমেৰ. অচ্চযস্স পটিগ্গণ্হনং নাম অধিৰাসনং, এৰং সো দেসকেন দেসিযমানো ততো ৰিগতো নাম হোতি. তেনাহ ‘‘পটিগ্গণ্হাতূতি খমতূ’’তি.

সভাৰেনাতি সভাৰতো. একসদিসন্তি পরেসং চিত্তাচারং জানন্তম্পি অজানন্তেহি সহ একসদিসং করোন্তা. পরতোতি পচ্ছা. কথায উপ্পন্নাযাতি ‘‘কস্সচ্চযা ন ৰিজ্জন্তী’’তিআদিকথায পৰত্তমানায ‘‘তথাগতস্স বুদ্ধস্সা’’তিআদিনা বুদ্ধবলং বুদ্ধানুভাৰং দীপেত্ৰা. খমিস্সামীতি অচ্চযদেসনং পটিগ্গণ্হিস্সামি. তপ্পটিগ্গহো হি ইধ খমনন্তি অধিপ্পেতং, সত্থা পন সব্বকালং খমো এৰ.

কোপো অন্তরে চিত্তে এতস্সাতি কোপন্তরো. দোসো গরু গরুকাতব্বো অস্সাতি দোসগরু. ‘‘পটিমুচ্চতী’’তি ৰা পাঠো, অযমেৰ অত্থো. অচ্চাযিককম্মন্তি সহসা অনুপধারেত্ৰা কিরিযা. নো চিধাতি নো চে ইধ. ইধাতি নিপাতমত্তং. অপগতং অপনীতং. দোসো নো চে সিযা, তেন পরিযাযেন যদি অপরাধো নাম ন ভৰেয্যাতি. ন সম্মেয্যুং ন ৰূপসমেয্যুং. কুসলোতি অনৰজ্জো.

ধীরো সতোতি পদদ্ৰযেন ৰট্টছিন্দং আহ. কো নিচ্চমেৰ পণ্ডিতো নামাতি অত্থোতি ‘‘কস্সচ্চযা’’তিআদিকায পুচ্ছাগাথায অত্থো. দীঘমজ্ঝিমসংৰণ্ণনাসু তথাগত-সদ্দো ৰিত্থারতো সংৰণ্ণিতোতি আহ ‘‘এৰমাদীহি কারণেহি তথাগতস্সা’’তি. বুদ্ধত্তাদীহীতি আদি-সদ্দেন ‘‘বোধেতা পজাযা’’তিআদিনা (মহানি. ১৯২; চূল়নি. পারাযনত্থুতিগাথানিদ্দেস ৯৭) নিদ্দেসে আগতকারণানি সঙ্গয্হন্তি. ৰিমোক্খং ৰুচ্চতি অরিযমগ্গো, তস্স অন্তো অগ্গফলং, তত্থ ভৰা পণ্ণত্তি, তস্সা ৰসেন. এৰং বুদ্ধবলং দীপেতি. ইদানি খিত্তং সঙ্খেপেন সংহরাপিতং হোতীতি দস্সেতি.

উজ্ঝানসঞ্ঞিসুত্তৰণ্ণনা নিট্ঠিতা.

৬. সদ্ধাসুত্তৰণ্ণনা

৩৬. তত্ৰস্সাতি ও-কারস্স ৰ-কারাদেসং অ-কারস্স চ লোপং কত্ৰা নিদ্দেসোতি আহ ‘‘ততো অস্সা’’তি. ‘‘ততস্সা’’তি ৰা পাঠো, ততোতি চ সদ্ধাহেতূতি অত্থো. নানুপতন্তীতি ন ৰত্তন্তি. পমাদং করোন্তীতি পমজ্জন্তি, মিচ্ছা পটিপজ্জন্তীতি অত্থো. লক্খণানীতি অনিচ্চাদিলক্খণানি. উপনিজ্ঝাযতীতি উপেচ্চ ঞাণচক্খুনা পেক্খতি, অনুপস্সতীতি অত্থো. আগতকিচ্চন্তি আহতকিচ্চং, অযমেৰ ৰা পাঠো. সাধেতীতি অসম্মোহপটিৰেধৰসেন নিপ্ফাদেতি, তথলক্খণং নিরোধসচ্চং উপনিজ্ঝাযতীতি অযমত্থো মগ্গেপি ৰত্তব্বো তেন ৰিনা অসম্মোহপটিৰেধস্স অসম্ভৰতো. কসিণারম্মণস্সাতি ইদং লক্খণৰচনং. অকসিণারম্মণসমাপত্তিযোপি হি সন্তীতি. যথা চ কসিণারম্মণানি অট্ঠন্নং সমাপত্তীনং অৰসেসানঞ্চ তদারম্মণানং পচ্চৰেক্খণৰসেন চিত্তানং, এৰং তেন তানি আরম্মণানি গহিতানীতি ‘‘কসিণারম্মণস্স’’ইচ্চেৰ ৰুত্তং. পরমং উত্তমং সুখন্তি ৰত্তব্বতো পরমসুখং অরহত্তং.

সদ্ধাসুত্তৰণ্ণনা নিট্ঠিতা.

৭. সমযসুত্তৰণ্ণনা

৩৭. উদানং পটিচ্চাতি উক্কাকরঞ্ঞা জাতিসম্ভেদপরিহারনিমিত্তং অত্তনো ৰংসপরিসুদ্ধং নিস্সায ৰুত্তং পীতিউদাহারং পটিচ্চ গোত্তৰসেন ‘‘সক্কা’’তি লদ্ধনামানং. যদি একোপি জনপদো, কথং বহুৰচনন্তি আহ ‘‘রুল়্হীসদ্দেনা’’তি. অক্খরচিন্তিকা হি ঈদিসেসু ঠানেসু যুত্তে ৰিয সলিঙ্গৰচনানি ইচ্ছন্তি, অযমেত্থ রুল়্হী যথা ‘‘অৰন্তী কুরূ’’তি, তব্বিসেসনে পন জনপদসদ্দে জাতিসদ্দতায একৰচনমেৰ. অরোপিমেতি কেনচি ন রোপিমে.

আৰরণেনাতি সেতুনা. বন্ধাপেত্ৰাতি পণ্ডুপলাসপাসাণমত্তিকখণ্ডাদীহি আলিং থিরং কারাপেত্ৰা. সস্সানি কারেন্তীতি জেট্ঠমাসে কির ঘম্মস্স বলৰভাৰেন হিমৰন্তে হিমং ৰিলীযিত্ৰা সন্দিত্ৰা অনুক্কমেন রোহিণিং নদিং পৰিসতি, তং বন্ধিত্ৰা সস্সানি কারেন্তি. ‘‘জাতিং ঘট্টেত্ৰা কলহং ৰড্ঢযিংসূ’’তি সঙ্খেপেন ৰুত্তমত্থং পাকটতরং কাতুং ‘‘কোলিযকম্মকরা ৰদন্তী’’তি আহ. নিযুত্তঅমচ্চানন্তি তস্মিং সস্সপরিপালনকম্মে নিযোজিতমহামত্তানং.

তীণি জাতকানীতি ‘‘কুঠারিহত্থো পুরিসো’’তিআদিনা ফন্দনজাতকং (জা. ১.১৩.১৪ আদযো) ‘‘দুদ্দুভাযতি ভদ্দন্তে’’তিআদিনা দুদ্দুভজাতকং, (জা. ১.৪.৮৫ আদযো) ‘‘ৰন্দামি তং কুঞ্জরা’’তিআদিনা লটুকিকজাতকন্তি (জা. ১.৫.৩৯ আদযো) ইমানি তীণি জাতকানি. দ্ৰে জাতকানীতি –

‘‘সাধু সম্বহুলা ঞাতী, অপি রুক্খা অরঞ্ঞজা;

ৰাতো ৰহতি একট্ঠং, ব্রহন্তম্পি ৰনপ্পতি’’ন্তি. –

আদিনা রুক্খধম্মজাতকং (জা. ১.১.৭৪).

‘‘সম্মোদমানা গচ্ছন্তি, জালমাদায পক্খিনো;

যদা তে ৰিৰদিস্সন্তি, তদা এহিন্তি মে ৰস’’ন্তি. (জা. ১.১.৩৩) –

আদিনা সম্মোদমানজাতকন্তি ইমানি দ্ৰে জাতকানি.

‘‘অত্তদণ্ডা ভযং জাতং, জনং পস্সথ মেধগং;

সংৰেগং কিত্তযিস্সামি, যথা সংৰিজিতং মযা’’তি. (সু. নি. ৯৪১) –

আদিনা অত্তদণ্ডসুত্তং.

তেনাতি ভগৰতা. কলহকরণভাৰোতি কলহকরণস্স অত্থিভাৰো. মহাপথৰিযা মহগ্ঘে খত্তিযে কস্মা নাসেথাতি দস্সেত্ৰা কলহং ৰূপসমেতুকামো ভগৰা পথৰিং নিদস্সনভাৰেন গণ্হীতি দস্সেন্তো ‘‘পথৰী নাম কিং অগ্ঘতী’’তিআদিমাহ. অট্ঠানেতি অকারণে. ৰেরং কত্ৰাতি ৰিরোধং উপ্পাদেত্ৰা. তংতংপলোভনকিরিযায পরক্কমন্তিযো ‘‘উক্কণ্ঠন্তূ’’তি সাসনং পেসেন্তি. কুণালদহেতি কুণালদহতীরে পতিট্ঠায. পুচ্ছিতং কথেসি অনুক্কমেন কুণালসকুণরাজস্স পুচ্ছাপসঙ্গেন কুণালজাতকং (জা. ২.২১.কুণালজাতক) কথেস্সামীতি. অনভিরতিং ৰিনোদেসি ইত্থীনং দোসদস্সনমুখেন কামানং আদীনৰোকারসংকিলেসৰিভাৰনৰসেন. পুরিসপুরিসেহীতি কোসজ্জং ৰিদ্ধংসেত্ৰা পুরিসথামব্রূহনেন উত্তমপুরিসেহি নো ভৰিতুং ৰট্টতীতি উপ্পন্নচিত্তা. অৰিস্সট্ঠসমণকম্মন্তা অপরিচ্চত্তকম্মট্ঠানাভিযোগাতি অত্থো. নিসীদিতুং ৰট্টতীতি ভগৰা চিন্তেসীতি যোজনা.

পদুমিনিযন্তি পদুমৰনে. ৰিকসিংসু গুণগণৰিবোধেন. অযংইমস্স…পে… ন কথেসীতি ইমিনা সব্বেপি তে ভিক্খূ তাৰদেৰ পটিপাটিযা আগতত্তা অঞ্ঞমঞ্ঞস্স লজ্জমানা অত্তনা পটিলদ্ধৰিসেসং ভগৰতো নারোচেসুন্তি দস্সেতি. খীণাসৰানন্তিআদিনা তত্থ কারণমাহ.

ওসটমত্তেতি ভগৰতো সন্তিকং উপগতমত্তে. অরিযমণ্ডলেতি অরিযপুগ্গলসমূহে. পাচীনযুগন্ধরপরিক্খেপতোতি যুগন্ধরপব্বতস্স পাচীনপরিক্খেপতো, ন বাহিরকেহি ৰুচ্চমানউদযপব্বততো. রামণেয্যকদস্সনত্থন্তি বুদ্ধুপ্পাদপটিমণ্ডিতত্তা ৰিসেসতো রমণীযস্স লোকস্স রমণীযভাৰদস্সনত্থং. উল্লঙ্ঘিত্ৰাতি উট্ঠহিত্ৰা. এৰরূপে খণে লযে মুহুত্তেতি যথাৰুত্তে চন্দমণ্ডলস্স উট্ঠিতক্খণে উট্ঠিতৰেলাযং উট্ঠিতমুহুত্তেতি উপরূপরিকালস্স ৰড্ঢিতভাৰদস্সনত্থং ৰুত্তং.

তেসং ভিক্খূনং জাতিআদিৰসেন ভগৰতো অনুরূপপরিৰারভাৰং দস্সেন্তো ‘‘তত্থা’’তিআদিমাহ. মহাসম্মতস্স ৰংসে উপ্পন্নোতিআদি কুলৰংসসুদ্ধিদস্সনং. খত্তিযগব্ভে জাতোতি ইদং সতিপি জাতিৰিসুদ্ধিযং মাতাপিতূনং ৰসেন অৰিসুদ্ধতা সিযাতি তেসম্পি ‘‘অৰিসুদ্ধতা নত্থি ইমেস’’ন্তি ৰিসুদ্ধিদস্সনত্থং ৰুত্তং. সতিপি চ গব্ভৰিসুদ্ধিযং কতদোসেন মিস্সকত্তা অরজ্জারহতাপি সিযাতি ‘‘তম্পি নত্থি ইমেস’’ন্তি দস্সনত্থং ‘‘রাজপব্বজিতা’’তিআদি ৰুত্তং.

সামন্তাতি সমীপে. চলিংসূতি উট্ঠহিংসু. কোসমত্তং ঠানং সদ্দন্তরং, ‘‘সদ্দসৰনট্ঠানমেৰ সদ্দন্তর’’ন্তি অপরে. তিক্খত্তুং তেসট্ঠিযা নগরসহস্সেসূতি জম্বুদীপে কির আদিতো মহন্তানি তেসট্ঠি নগরসহস্সানি উপ্পন্নানি, তথা দুতিযং, তথা ততিযং. তং সন্ধাযাহ ‘‘তিক্খত্তুং তেসট্ঠিযা নগরসহস্সেসূ’’তি. তানি পন সম্পিণ্ডেত্ৰা সতসহস্সতো পরং নৰসহস্সাধিকানি অসীতিসহস্সানি. নৰনৰুতিযা দোণমুখসতসহস্সেসূতি নৰসতসহস্সাধিকেসু নৰুতিসতসহস্সেসু দোণমুখেসু. দোণমুখন্তি চ মহানগরস্স আযুপ্পত্তিট্ঠানভূতং পাদনগরং ৰুচ্চতি. ছনৰুতিযা পট্টনকোটিসতসহস্সেসূতি ছকোটিসতসহস্সঅধিকেসু নৰুতিকোটিসতসহস্সপট্টনেসু. তম্বপণ্ণিদীপাদিছপণ্ণাসায রতনাকরেসু. এৰং পন নগর-দোণমুখপট্টন-রতনাকরাদিভাৰেন কথনং তংতংঅধিৰত্থায ৰসন্তীনং তাসং দেৰতানং বহুভাৰদস্সনত্থং. যদি দসসহস্সচক্কৰাল়েসু দেৰতা সন্নিপতিতা. অথ কস্মা পাল়িযং ‘‘দসহি চ লোকধাতূহী’’তি? ৰুত্তন্তি আহ ‘‘দসসহস্স…পে… অধিপ্পেত’’ন্তি. তেন সহস্সিলোকধাতু ইধ ‘‘একা লোকধাতূ’’তি ৰেদিতব্বা.

লোহপাসাদেতি সব্বপঠমকতে লোহপাসাদে. ব্রহ্মলোকেতি হেট্ঠিমে ব্রহ্মলোকে. যদি তা দেৰতা এৰং নিরন্তরা হুত্ৰা সন্নিপতিতা, পচ্ছা আগতানং ওকাসো এৰ ন ভৰেয্যাতি চোদনং সন্ধাযাহ ‘‘যথা খো পনা’’তিআদি.

সুদ্ধাৰাসকাযে উপ্পন্না সুদ্ধাৰাসকাযিকা. তাসং পন যস্মা সুদ্ধাৰাসভূমি নিৰাসট্ঠানং, তস্মা ৰুত্তং ‘‘সুদ্ধাৰাসৰাসীন’’ন্তি. আৰাসাতি আৰাসট্ঠানভূতা. দেৰতা পন ওরম্ভাগিযানং ইতরেসঞ্চ সংযোজনানং সমুচ্ছিন্নট্ঠেন সুদ্ধো আৰাসো ৰিহারো এতেসন্তি সুদ্ধাৰাসা. মহাসমাগমং ঞত্ৰাতি মহাসমাগমং গতাতি ঞত্ৰা.

পুরত্থিমচক্কৰাল়মুখৰট্টিযং ওতরি অঞ্ঞত্থ ওকাসং অলভমানো. এৰং সেসাপি. মণিৰম্মন্তি ইন্দনীলমণিমযং কৰচং. বুদ্ধানং অভিমুখভাগো বুদ্ধৰীথি, সা যাৰ চক্কৰাল়া উত্তরিতুং ন সক্কা. মহতিযা বুদ্ধৰীথিযাৰাতি বুদ্ধানং সন্তিকং উপসঙ্কমন্তেহি তেহি দেৰব্রহ্মেহি ৰলঞ্জিতবুদ্ধৰীথিযাৰ.

সমিতি সঙ্গতি সন্নিপাতো সমযো, মহন্তো সমযো মহাসমযোতি আহ ‘‘মহাসমূহো’’তি. পৰদ্ধং ৰনং পৰনন্তি আহ ‘‘ৰনসণ্ডো’’তি. দেৰঘটাতি দেৰসমূহা. সমাদহংসূতি সমাহিতং লোকুত্তরসমাধিং সুট্ঠু অপ্পিতং অকংসু. তথা সমাহিতং পন সমাধিনা নিযোজিতং নাম হোতীতি ৰুত্তং ‘‘সমাধিনা যোজেসু’’ন্তি. সব্বেসং গোমুত্তৰঙ্কাদীনং দূরসমুস্সারিতত্তা অত্তনো…পে… অকরিংসু. ৰিনযতি অস্সে এতেহীতি নেত্তানি, যোত্তানি. অৰীথিপটিপন্নানং অস্সানং ৰীথিপটিপাদনং রস্মিগ্গহণেন হোতীতি ‘‘যোত্তানি গহেত্ৰা অচোদেন্তো’’তি ৰত্ৰা তং পন অচোদনং অৰারণমেৰাতি আহ ‘‘অচোদেন্তো অৰারেন্তো’’তি.

যথা খীলং ভিত্তিযং, ভূমিযং ৰা আকোটিতং দুন্নীহরণং, যথা চ পলিঘং নগরপ্পৰেসনিৰারণং, যথা চ ইন্দখীলং গম্ভীরনেমি সুনিখাতং দুন্নীহরণং, এৰং রাগাদযো সত্তসন্তানতো দুন্নীহরণা নিব্বাননগরপ্পৰেসনিৰারণা চাতি তে ‘‘খীলং পলিঘং ইন্দখীল’’ন্তি চ ৰুত্তা. ঊহচ্চাতি উদ্ধরিত্ৰা. তণ্হাএজায অভাৰেন অনেজা. পরমসন্তুট্ঠভাৰেন চাতুদ্দিসত্তা অপ্পটিহতচারিকং চরন্তি. বুদ্ধচক্খু-ধম্মচক্খু-দিব্বচক্খু-সমন্তচক্খু-পকতিচক্খূনং ৰসেন পঞ্চহি চক্খূহি. সুদন্তা কুতোতি আহ ‘‘চক্খুতোপী’’তি. ছন্দাদীহীতি ছন্দাদীনং ৰসেন ন গচ্ছন্তি ন ৰত্তন্তি. ন আগচ্ছন্তি অনুপ্পাদনতো. আগুন্তি অপরাধং.

সব্বসংযোগাতি ৰিভত্তিলোপেন নিদ্দেসো, সব্বে সংযোগেতি অত্থো. ৰিসজ্জাতি ৰিসজ্জিত্ৰা. এৰম্পীতি ইমাযপি গাথায ৰসেন ‘‘আগুং ন করোতী’’তি পদে.

গতাসেতি গতা এৰ. ন গমিস্সন্তি পরিনিট্ঠিতসরণগমনত্তা. লোকুত্তরসরণগমনঞ্হেত্থ অধিপ্পেতং. তেনাহ ‘‘নিব্বেমতিকসরণগমনেন গতা’’তি. তে হি নিযমেন অপাযং ন গমিস্সন্তি, দেৰকাযঞ্চ পরিপূরেস্সন্তি. যে পন লোকিযেন সরণগমনেন বুদ্ধং সরণং গতা, ন তে গমিস্সন্তি অপাযং, সতি চ পচ্চযন্তরসমৰাযে পহায মানুসং দেহং দেৰকাযং পরিপূরেস্সন্তীতি. তেনাহ সো ব্রহ্মা ‘‘যে কেচি বুদ্ধং…পে… পরিপূরেস্সন্তী’’তি.

সমযসুত্তৰণ্ণনা নিট্ঠিতা.

৮. সকলিকসুত্তৰণ্ণনা

৩৮. তন্তি উয্যানং সঙ্খং গতন্তি সম্বন্ধো. ধনুনা সরেন গহন্তি পোথযন্তি বাধেন্তীতি ধনুগ্গহা. তং সম্পটিচ্ছীতি তস্সা সিলায হেট্ঠাভাগেন উগ্গন্ত্ৰা সম্পটিচ্ছি. সত্থু পুঞ্ঞানুভাৰেন উপহতত্তা সযম্পি পরিপতন্তী ৰাতং উপত্থম্ভেতি. অভিহনি সত্থারা অনাৰজ্জিতত্তা. তঞ্চ খো কম্মফলৰসেনাতি দট্ঠব্বং. ততো এৰ ততো পট্ঠায ভগৰতো অফাসু জাতন্তি এতেনপি উপাদিণ্ণকসরীরে নাম অনিট্ঠাপি সম্ফস্সকা পতন্তি এৰ তথারূপেন কম্মুনা কতোকাসেতি দস্সেতি. অযং ৰিহারোতি গিজ্ঝকূটৰিহারো. উজ্জঙ্গলো ন কত্তব্বপরো. ৰিসমোতি ভূমিভাগৰসেন ৰিসমো. সিৰিকাকারেন সজ্জিতো মঞ্চো এৰ মঞ্চসিৰিকা.

ভুসাতি দল়্হা. দুক্খাতি দুক্খমা দুত্তিতিক্খা. খরাতি কক্কসা. কটুকাতি অনিট্ঠা. অসাতাতি ন সাতা অপ্পিযা. ন অপ্পেতীতি ন উপেতি. ন অপ্পাযন্তীতি ন খমন্তি. ৰেদনাধিৰাসনখন্তিযা সতিসম্পজঞ্ঞযুত্তত্তা সব্বসত্তট্ঠিতাহারসমুদযৰত্থুজাতস্স আদীনৰনিস্সরণানং পগেৰ সুপ্পটিৰিদিতত্তা যথা সমুদাচারো চিত্তং নাভিভৰতি, এৰং সম্মদেৰ উপট্ঠাপিতসতিসম্পজঞ্ঞত্তা ৰুত্তং ‘‘ৰেদনাধিৰাসন…পে… হুত্ৰা’’তি. অপীল়িযমানোতি অবাধিযমানো. কামং অনিট্ঠায ৰেদনায ফুট্ঠো তায অপীল়িযমানো নাম নত্থি, পরিঞ্ঞাতৰত্থুকত্তা পন তস্সা ৰসে অৰত্তমানো ‘‘অৰিহঞ্ঞমানো’’তি ৰুত্তো. তেনাহ ‘‘সম্পরিৰত্তসাযিতায ৰেদনানং ৰসং অগচ্ছন্তো’’তি.

সীহসেয্যন্তি এত্থ সযনং সেয্যা, সীহস্স ৰিয সেয্যা সীহসেয্যা, তং সীহসেয্যং. অথ ৰা সীহসেয্যন্তি সেট্ঠসেয্যং উত্তমসেয্যং. স্ৰাযমত্থো অট্ঠকথাযমেৰ আগমিস্সতি. ‘‘ৰামেন পস্সেন সেন্তী’’তি এৰং ৰুত্তা কামভোগিসেয্যা. দক্খিণপস্সেন সযানো নাম নত্থি দক্খিণহত্থস্স সরীরগ্গহণাদিযোগক্খমতো. পুরিসৰসেন চেতং ৰুত্তং. একেন পস্সেন সযিতুং ন সক্কোন্তি দুক্খুপ্পত্তিতো. অযং সীহসেয্যাতি অযং যথাৰুত্তা সীহসেয্যা. তেজুস্সদত্তাতি ইমিনা সীহস্স অভীতভাৰং দস্সেতি. ভীরুকজাতিকা হি সেসমিগা অত্তনো আসযং পৰিসিত্ৰা উত্রাসবহুলা সন্তাসপুব্বকং যথা তথা সযন্তি, সীহো পন অভিরুকভাৰতো সতোকারী ভিক্খু ৰিয সতিং উপট্ঠপেত্ৰাৰ সযতি. তেনাহ ‘‘দ্ৰে পুরিমপাদে’’তিআদি. পুরিমপাদেতি দক্খিণপুরিমপাদে ৰামস্স পুরিমপাদস্স ঠপনৰসেন দ্ৰে পুরিমপাদে একস্মিং ঠানে ঠপেত্ৰা. পচ্ছিমপাদেতি দ্ৰে পচ্ছিমপাদে. ৰুত্তনযেনেৰ ইধাপি একস্মিং ঠানে ঠপনং ৰেদিতব্বং. ঠিতোকাসসল্লক্খণং অভীরুকভাৰেনেৰ. সীসং পন উক্খিপিত্ৰাতিআদিনা ৰুত্তসীহকিরিযা অনুত্রাসপবুজ্ঝনং ৰিয অভীরুকভাৰসিদ্ধা ধম্মতাৰসেনেৰাতি ৰেদিতব্বা. সীহৰিজম্ভিতৰিজম্ভনং অতিৰেলং একাকারেন ঠপিতানং সরীরাৰযৰানং গমনাদিকিরিযাসু যোগ্গভাৰাপাদনত্থং. তিক্খত্তুং সীহনাদনদনং অপ্পেসক্খমিগজাতপরিহরণত্থং.

সেতি অব্যাৰটভাৰেন পৰত্ততি এত্থাতি সেয্যা, চতুত্থজ্ঝানমেৰ সেয্যা চতুত্থজ্ঝানসেয্যা. কিং পনেত্থ তং চতুত্থজ্ঝানন্তি? আনাপানচতুত্থজ্ঝানং. ততো হি ৰুট্ঠহিত্ৰা ৰিপস্সনং ৰড্ঢেত্ৰা অনুক্কমেন অগ্গমগ্গং অধিগন্ত্ৰা তথাগতো জাতোতি. ‘‘তযিদং পদট্ঠানং নাম, ন সেয্যা, তথাপি যস্মা ‘চতুত্থজ্ঝানা ৰুট্ঠহিত্ৰা সমনন্তরং ভগৰা পরিনিব্বাযী’তি মহাপরিনিব্বানে (দী. নি. ২.২১৯) আগতং. তস্মা লোকিযচতুত্থজ্ঝানসমাপত্তি এৰ তথাগতসেয্যা’’তি কেচি. এৰং সতি পরিনিব্বানকালিকাৰ তথাগতসেয্যাতি আপজ্জতি; ন চ তথাগতো লোকিযচতুত্থজ্ঝানসমাপজ্জনবহুলো ৰিহাসি. অগ্গফলৰসেন পৰত্তং পনেত্থ চতুত্থজ্ঝানং ৰেদিতব্বং. তত্থ যথা সত্তানং নিদ্দুপগমলক্খণা সেয্যা ভৰঙ্গচিত্তৰসেন হোতি, সা চ নেসং পঠমং জাতিসমন্ৰযা যেভুয্যৰুত্তিকা, এৰং ভগৰতো অরিযজাতিসমন্ৰযং যেভুয্যৰুত্তিকং অগ্গফলভূতং চতুত্থজ্ঝানং তথাগতসেয্যাতি ৰেদিতব্বা. সীহসেয্যা নাম সেট্ঠসেয্যাতি আহ ‘‘উত্তমসেয্যা’’তি.

‘‘কালপরিচ্ছেদং কত্ৰা যথাপরিচ্ছেদং উট্ঠহিস্সামী’’তি এৰং তদা মনসিকারস্স অকতত্তা পাল়িযং ‘‘উট্ঠানসঞ্ঞং মনসিকরিত্ৰা’’তি ন ৰুত্তন্তি আহ ‘‘উট্ঠানসঞ্ঞন্তি পনেত্থ ন ৰুত্ত’’ন্তি. তত্থ কারণমাহ ‘‘গিলানসেয্যা হেসা’’তি. সা হি চিরকালপ্পৰত্তিকা হোতি.

ৰিসুং ৰিসুং রাসিৰসেন অনাগন্ত্ৰা একজ্ঝং পুঞ্জৰসেন আগতত্তা ৰুত্তং ‘‘সব্বাপি তা’’তি. তেনাহ ‘‘সত্তসতা’’তি. ৰিকারমত্তম্পীতি ৰেদনায অসহনৰসেন পৰত্তনাকারমত্তম্পি. সুসম্মট্ঠকঞ্চনং ৰিযাতি সম্মট্ঠসুসজ্জিতসুৰণ্ণং ৰিয.

ধম্মালপনন্তি অসঙ্খারিকসমুপ্পন্নসভাৰালপনং. সমুল্লপিতঞ্হি আকারসমানৰচনমেতং. নাগো ৰিয ৰাতি পৰত্ততীতি নাগৰো. তস্স ভাৰো নাগৰতা. ৰিভত্তিলোপেন হেস নিদ্দেসো, মহানাগহত্থিসদিসতাযাতি অত্থো. ব্যত্তুপরিচরণট্ঠেনাতি ব্যত্তং উপরূপরি অত্তনো কিরিযাচরণেন. আজানীযোতি সম্মাপতিতং দুক্খং সহন্তো অত্তনা কাতব্বকিরিযং ধীরো হুত্ৰা নিত্থারকো. কারণাকারণজাননেনাতি নিয্যানিকানিয্যানিককরণঞাততায. তেনেৰট্ঠেনাতি অপ্পটিসমট্ঠেনেৰ. ‘‘মুত্তো মোচেয্য’’ন্তিআদি ধুরৰাহট্ঠেন. নিব্বিসেৰনট্ঠেনাতি রাগাদিৰিসৰিগতভাৰেন.

অনিযমিতাণত্তীতি অনুদ্দেসিকং আণাপনং. সামঞ্ঞকতোপি সমাধিসদ্দো পকরণতো ইধ ৰিসেসত্থোতি আহ ‘‘সমাধিন্তি অরহত্তফলসমাধি’’ন্তি. পটিপ্পস্সদ্ধিৰসেন সব্বকিলেসেহি সুট্ঠু ৰিমুত্তন্তি সুৰিমুত্তং. অভিনতং নাম আরম্মণে অভিমুখভাৰেন পৰত্তিযা. অপনতং অপগমনৰসেন পৰত্তিযা, ৰিমুখতাযাতি অত্থো. লোকিযজ্ঝানচিত্তং ৰিয ৰিপস্সনা ৰিয চ সসঙ্খারেন সপ্পযোগেন তদঙ্গপ্পহানৰিক্খম্ভনপহানৰসেন চ ৰিক্খম্ভেত্ৰা ন অধিগতং ন ঠপিতং, কিঞ্চরহি কিলেসানং সব্বসো ছিন্নতাযাতি আহ ‘‘ছিন্নত্তা ৰতং ফলসমাধিনা সমাহিত’’ন্তি. অতিক্কমিতব্বন্তি আচারাতিক্কমৰসেন লঙ্ঘিতব্বং. সা পন লঙ্ঘনা আসাদনা ঘট্টনাতি আহ ‘‘ঘট্টেতব্ব’’ন্তি.

পঞ্চৰেদা নাম – ইরুৰেদো, যজুৰেদো, সামৰেদো, আথব্বণৰেদো, ইতিহাসো চাতি এৰং ইতিহাসপঞ্চমানং ৰেদানং. ‘‘চর’’ন্তি ৰচনৰিপল্লাসেন ৰুত্তন্তি আহ ‘‘চরন্তা’’তি, তপন্তাতি অত্থো. হীনত্তরূপাতি হীনাধিমুত্তিকতায নিহীনচিত্তসভাৰা. ৰিমুত্তিকতায অভাৰতো নিব্বানঙ্গমা ন হোন্তি. অরহত্তাধিগমকম্মস্স অভব্বতায পরিহীনত্থা. অজ্ঝোত্থটাতি অভিভূতা. তাদিসেহেৰ সীলেহীতি গোসীলাদীহি. বদ্ধাতি সমাদপেত্ৰা পৰত্তনৰসেন অনুবদ্ধা. লূখং তপন্তি অত্তকিলমথানুযোগং. তং পন একদেসেন দস্সেন্তো ‘‘পঞ্চাতপতাপন’’ন্তিআদিমাহ. ‘‘এৰং পটিপন্নস্স মোক্খো নত্থি, এৰং পটিপন্নস্স ৰট্টতো মুত্তি অত্থী’’তি ৰদন্তী সা অত্ততো সাসনস্স নিয্যানভাৰো কথিতো নাম হোতীতি আহ ‘‘সাসনস্স নিয্যানিকভাৰং কথেন্তী’’তি. আদিন্তি গাথাদ্ৰযং.

সকলিকসুত্তৰণ্ণনা নিট্ঠিতা.

৯. পঠমপজ্জুন্নধীতুসুত্তৰণ্ণনা

৩৯. চাতুমহারাজিকস্সাতি চাতুমহারাজিককাযিকস্স. ধম্মো অনুবুদ্ধোতি চতুসচ্চধম্মো পরিঞ্ঞেয্যাদিভাৰস্স অনুরূপতো বুদ্ধো. পচ্চক্খমেৰাতি পরপত্তিযা অহুত্ৰা অত্তপচ্চক্খমেৰ কত্ৰা জানামি. ধম্মং গরহন্তা নাম সদ্দদোসৰসেন ৰা অত্থদোসৰসেন ৰা গরহেয্যুন্তি তং দস্সেন্তো ‘‘হীনক্খর…পে… কোতিৰা’’তি আহ. সা পন ‘‘তেসং ৰিগরহা দুম্মেধতায মহানত্থাৰহাৰা’’তি দস্সেন্তী দেৰতা আহ ‘‘দুম্মেধা উপেন্তি রোরুৰ’’ন্তি. ৰিসুং হোতীতি অৰীচিমহানিরযতো ৰিসুং এৰ হোতি. খন্তিযাতি ঞাণখন্তিযা. উপসমেনাতি রাগাদীনং সব্বসো ৰূপসমেন. তেনাহ ‘‘রুচ্চিত্ৰা’’তিআদি.

পঠমপজ্জুন্নধীতুসুত্তৰণ্ণনা নিট্ঠিতা.

১০. দুতিযপজ্জুন্নধীতুসুত্তৰণ্ণনা

৪০. বুদ্ধঞ্চ ধম্মঞ্চ নমস্সমানাতি বুদ্ধসুবুদ্ধতং ধম্মসুধম্মতঞ্চ ঞত্ৰা তদুভযং নমস্সমানা. যস্মা বুদ্ধে চ ধম্মে চ পসন্নো সঙ্ঘে চ পসন্নো এৰ হোতি তস্স সুপ্পটিপত্তিযা ৰিজাননতো, তস্মা সো অত্থো গাথায চ-সদ্দসঙ্গহিতোতি দস্সেন্তো ‘‘চ-সদ্দেন সঙ্ঘঞ্চা’’তি আহ অত্থৰতিযোতি লোকিযলোকুত্তরঅত্থসঙ্গহিতা লোকিযকুসললোকুত্তরমগ্গসঙ্গণ্হনতো. যং ধম্মং সা অভাসীতি যং তুম্হাকং ধম্মং পটিৰিজ্ঝিত্ৰা ঠিতা, সা মহাকোকনদা অত্তনো বলানুরূপং অভাসি. বহুনাতি নানপ্পকারেন. পরিযাযেনাতি কারণেন. তাদিসোতি তথারূপো তথাপটিৰিদ্ধসচ্চো অত্থধম্মাদীসু কুসলো একেকং পদম্পি উদাহরণহেতুনিগমনানি নীহরন্তো আচিক্খতি দেসেতি পঞ্ঞপেতি পঠপেতি ৰিৰরতি ৰিভজতি উত্তানীকরোতি. তেনাহ ‘‘অযং ভগৰা’’তিআদি. এতেন অতিৰিয ৰিত্থারক্খমো সুগতধম্মোতি দস্সেতি. পরিযাপুটন্তি পরিৰত্তিতং. এৰং ৰিত্থারক্খমং ধম্মং যস্মা দেৰধীতা ‘‘সংখিত্তমত্থং লপযিস্সামী’’তি অৰোচ, তস্মা ৰুত্তং ‘‘তস্সত্থ’’ন্তিআদি.

দুতিযপজ্জুন্নধীতুসুত্তৰণ্ণনা নিট্ঠিতা.

সতুল্লপকাযিকৰগ্গৰণ্ণনা নিট্ঠিতা.