৫. কতিছিন্দসুত্তৰণ্ণনা

৫. ছিন্দন্তোতি সমুচ্ছিন্দন্তো. কতি ছিন্দেয্যাতি কিত্তকে পাপধম্মে সমুচ্ছিন্দেয্য, অনুপ্পত্তিধম্মতং পাপেয্য. সেসপদেসুপীতি সেসেসুপি দ্ৰীসু পদেসু. জহন্তো কতি জহেয্য, ভাৰেন্তো কতি উত্তরি ভাৰেয্যাতি ইমমত্থং ‘‘এসেৰ নযো’’তি ইমিনা অতিদিসতি. চতুত্থপদস্স পন অত্থো সরূপেনেৰ দস্সিতো. অত্থতো একন্তি ভাৰত্থতো একং. যদি এৰং কিমত্থং পরিযাযন্তরং গহিতন্তি আহ ‘‘গাথাবন্ধস্স পনা’’তিআদি. অত্থতো এত্থ পুনরুত্তি অত্থেৰাতি আহ ‘‘সদ্দপুনরুত্তিং ৰজ্জযন্তী’’তি. সঙ্গং অতিক্কমযতীতি সঙ্গাতিগোতি আহ ‘‘অযমেৰত্থো’’তি.

ওরং ৰুচ্চতি কামধাতু, পটিসন্ধিযা পচ্চযভাৰেন তঞ্চ ভজন্তীতি ওরম্ভাগিযানি. তত্থ চ কম্মং তব্বিপাকং সত্তে দুক্খং, কম্মুনা ৰিপাকং, সত্তেন দুক্খং সংযোজেন্তীতি সংযোজনানি, সক্কাযদিট্ঠি-ৰিচিকিচ্ছা-সীলব্বতপরামাস-কামরাগ-পটিঘা. উদ্ধং ৰুচ্চতি চতস্সো অরূপধাতুযো, ৰুত্তনযেন তং ভজন্তীতি উদ্ধম্ভাগিযানি, সংযোজনানি রূপারূপরাগমানুদ্ধচ্চাৰিজ্জা. আরোপিতৰচনানুরূপেনেৰ এৰমাহাতি ‘‘পঞ্চ ছিন্দে পঞ্চ জহে’’তি এৰং কথেসি তস্সা দেৰতায সুখগ্গহণত্থং. ন কেৰলং তায দেৰতায ৰুত্তৰচনানুরূপতো এৰ, অথ খো তেসু সংযোজনেসু ৰত্তব্বাকারতোপীতি দস্সেতুং ‘‘অথ ৰা’’তিআদি ৰুত্তং. তেন ওরম্ভাগিযসংযোজনানি নাম গরূনি দুচ্ছেদানি গাল়্হবন্ধনভাৰতো, তস্মা তানি সন্ধায ‘‘পঞ্চ ছিন্দে’’তি ৰুত্তং.

উদ্ধম্ভাগিযসংযোজনানি পন লহূনি সুচ্ছেদানি হেট্ঠা পৰত্তিতানুক্কমেন ভাৰনানযেন পহাতব্বতো, তস্মা তানি সন্ধায ‘‘পঞ্চ জহে’’তি ৰুত্তং. তেনাহ ‘‘পাদেসু বদ্ধপাসসকুণো ৰিযা’’তিআদি. ৰিসেসন্তি ভাৰনানং ৰিসেসং ৰিপস্সনাভাৰনং ভাৰেন্তো উপ্পাদেন্তো ৰিপচ্চেন্তো ৰড্ঢেন্তো চ. সংসারপঙ্কে সঞ্জনট্ঠেন রাগো এৰ সঙ্গো ‘‘রাগসঙ্গো’’. এস নযো সেসেসুপি. যস্মা এত্থ রাগ-মোহ-দিট্ঠি-তব্ভাগিযসক্কাযদিট্ঠি-সীলব্বতপরামাস-কামরাগাৰিজ্জা অত্থতো ওঘা এৰ, ইতরে তদেকট্ঠা, তস্মা ভগৰা সংযোজনপ্পহানসঙ্গাতিক্কমেহি ওঘতরণং কথেসি. লোকিযলোকুত্তরানি কথিতানি ‘‘ভাৰযে’’তি পুব্বভাগায মগ্গভাৰনায অধিপ্পেতত্তা.

কতিছিন্দসুত্তৰণ্ণনা নিট্ঠিতা.