৬. জাগরসুত্তৰণ্ণনা

৬. জাগরতন্তি অনাদরে সামিৰচনং. তেনাহ ‘‘ইন্দ্রিযেসু জাগরন্তেসূ’’তি. ‘‘ৰিস্সজ্জনগাথাযং পনা’’তি ইমস্স পদস্স ‘‘অযমত্থো ৰেদিতব্বো’’তি ইমিনা সম্বন্ধো. পুচ্ছাগাথায পন অত্থো ইমিনাৰ নযেন ৰিঞ্ঞাযতীতি অধিপ্পাযো. পঞ্চ জাগরতং সুত্তাতি এত্থ ‘‘সুত্তা’’তি পদং অপেক্খিত্ৰা পঞ্চাতি পচ্চত্তৰচনং ‘‘জাগরত’’ন্তি পদং অপেক্খিত্ৰা সামিৰসেন পরিণামেতব্বং ‘‘পঞ্চন্নং জাগরত’’ন্তি. তেনাহ – ‘‘পঞ্চসু ইন্দ্রিযেসু জাগরন্তেসূ’’তি, জাগরন্তেসু বদ্ধাভাৰেন সকিচ্চপ্পসুততায সকিচ্চসমত্থতায চাতি অত্থো. সোত্তংৰ সুত্তা পমাদনিদ্দাভাৰতো. তমেৰ সুত্তভাৰং পুগ্গলাধিট্ঠানায কথায দস্সেতুং ‘‘কস্মা’’তিআদি ৰুত্তং. পমজ্জতি, পমাদো ৰা এতস্স অত্থীতি পমাদো, তস্স ভাৰো পমাদতা, তায, পমত্তভাৰেনাতি অত্থো.

এৰং গাথায পঠমস্স পাদস্স অত্থং ৰত্ৰা দুতিযস্স ৰত্তুং ‘‘এৰং সুত্তেসূ’’তিআদি ৰুত্তং. তস্সত্থো ৰুত্তনযেন ৰেদিতব্বো. যস্মা অপ্পহীনসুপনকিরিযাৰসেন সনীৰরণস্স পুগ্গলস্স অনুপ্পন্নরাগরজাদযো উপ্পজ্জন্তি, উপ্পন্না পৰড্ঢন্তি, তস্মা ৰুত্তং ‘‘নীৰরণেহেৰ কিলেসরজং আদিযতী’’তি. তেনেৰাহ ‘‘পুরিমা’’তিআদি. পুরিমানং পচ্ছিমানং অপরাপরুপ্পত্তিযা পচ্চযভাৰো হেত্থ আদিযনং. পঞ্চহি ইন্দ্রিযেহি পরিসুজ্ঝতীতি মগ্গপরিযাপন্নেহি সদ্ধাদীহি পঞ্চহি ইন্দ্রিযেহি সকলসংকিলেসতো ৰিসুজ্ঝতি. পঞ্ঞিন্দ্রিযমেৰ হি অনঞ্ঞাতঞ্ঞস্সামীতিন্দ্রিযাদীনি, ইতরানি চ অন্ৰযানীতি.

জাগরসুত্তৰণ্ণনা নিট্ঠিতা.