১০. অরঞ্ঞসুত্তৰণ্ণনা

১০. সন্তকিলেসানন্তি ৰূপসন্তকিলেসপরিল়াহানং. যস্মা সীলাদিগুণসম্ভৰং ততো এৰ ভযসন্তঞ্চ উপাদায পণ্ডিতা ‘‘সন্তো’’তি ৰুচ্চন্তি, তস্মা ৰুত্তং ‘‘পণ্ডিতানং ৰা’’তি. তেনাহ ‘‘সন্তো হৰে’’তিআদি. সেট্ঠচারীনন্তি সেট্ঠচরিযং চরন্তানং. যস্মা পুথুজ্জনকল্যাণতো পট্ঠায ভিক্খু মগ্গব্রহ্মচরিযৰাসং ৰসতি নাম, তস্মা আহ ‘‘মগ্গব্রহ্মচরিযৰাসং ৰসন্তান’’ন্তি. অরিযানং পন মুখৰণ্ণস্স পসীদনে ৰত্তব্বমেৰ নত্থি. মূলকম্মট্ঠানন্তি পারিহারিযকম্মট্ঠানং. ৰিসভাগসন্ততীতি নানারম্মণেসু পৰত্তচিত্তসন্ততি. সা হি ৰিক্খেপব্যাকুলতায অপ্পসন্না সমাহিতচিত্তসন্ততিযা ৰিসভাগসন্ততি. ওক্কমতীতি সমাধিসভাগা চিত্তসন্ততি সমথৰীথিং অনুপৰিসতি. চিত্তং পসীদতীতি কম্মট্ঠাননিরতং ভাৰনাচিত্তং সন্ধাযাহ, তং পসন্নং হুত্ৰা পৰত্ততি. লোহিতং পসীদতীতি চিত্তকালুস্সিযস্সাভাৰতো লোহিতং অনাৰিলং হোতি. পরিসুদ্ধানি হোন্তি কারণস্স পরিসুদ্ধভাৰতো. তালফলমুখস্স ৰিয মুখস্স ৰণ্ণো হোতীতি মুখ-সদ্দস্স আদিম্হি পমুত্তপদেন যোজেতব্বো. এৰঞ্হি চস্স পমুত্তগ্গহণং সমত্থিতং হোতি তালফলমুখস্স ৰণ্ণসম্পদাসদিসত্তা. তিভূমকো এৰ তেভূমকো.

অতীতং নানুসোচন্তি অতীতং পচ্চযলাভং লক্খণং কত্ৰা ন সোচন্তি ন অনুত্থুনন্তি. জপ্পনতণ্হায ৰসেন ন পরিকপ্পন্তীতি আহ ‘‘ন পত্থেন্তী’’তি. যেন কেনচীতি ইতরীতরেন. তঙ্খণে লদ্ধেনাতি সন্নিধিকারপরিভোগাভাৰমাহ. তিৰিধেনপি কারণেনাতি তিপ্পকারেন হেতুনা, তিলক্খণসন্তোসনিমিত্তন্তি অত্থো.

ৰিনাসন্তি ৰিনাসনহেতুং. ৰিনস্সন্তি এতেহীতি ৰিনাসো, লোভদোসা তদেকট্ঠা চ পাপধম্মা. অরূপকাযস্স ৰিয রূপকাযস্সপি ৰিসেসতো সুক্খভাৰকারণন্তি আহ ‘‘এতেন কারণদ্ৰযেনা’’তি. লুতোতি লূনো.

অরঞ্ঞসুত্তৰণ্ণনা নিট্ঠিতা.

নল়ৰগ্গৰণ্ণনা নিট্ঠিতা.