একুত্তরিকনযো

একুত্তরিকনযো এককৰারৰণ্ণনা

৩২১. এৰং খন্ধকপুচ্ছায ৰণ্ণনং কত্ৰা ইদানি একুত্তরিকনযস্স তং করোন্তো আহ ‘‘আপত্তি…পে… নযে’’তি. তত্থ একুত্তরিকনযে এৰং ৰিনিচ্ছযো ৰেদিতব্বোতি যোজনা. ‘‘ছ আপত্তিসমুট্ঠানানী’’তি ইমিনা সমুট্ঠানানি আপত্তিং করোন্তীতি অত্থেন আপত্তিকরা নামাতি দস্সেতি. এতেসন্তি ছন্নং আপত্তিসমুট্ঠানানং. হীতি যস্মা, আপজ্জতীতি সম্বন্ধো. সিক্খাপদে চাতি মাতিকাসিক্খাপদে চ. লহুকা আপত্তীতি এত্থ অপ্পসাৰজ্জত্তা ন লহুকা নাম হোতি, লহুকেন পন ৰিনযকম্মেনাতি আহ ‘‘লহুকেন ৰিনযকম্মেন ৰিসুজ্ঝনতো’’তি. পঞ্চৰিধাতি থুল্লচ্চযাদিৰসেন পঞ্চপকারা. কেনচীতি লহুকেন ৰা গরুকেন ৰা কেনচি আকারেন. সংৰিজ্জতি গিহিভাৰতো অৰসেসো সমণভাৰো এতিস্সাতি সাৰসেসা, পটিপক্খৰসেন অনৰসেসা. দ্ৰে আপত্তিক্খন্ধাতি পারাজিকসঙ্ঘাদিসেসৰসেন দ্ৰে আপত্তিক্খন্ধা.

‘‘করোন্তী’’তি ইমিনা অন্তরাযিকাতি এত্থ ণিকপচ্চযস্স অত্থং দস্সেতি. অন্তরাযিকা আপত্তিযো সব্বথা অন্তরাযিকা হোন্তীতি আহ ‘‘অন্তরাযিকং আপন্নস্সাপী’’তিআদি. দেসেত্ৰা সুদ্ধিপত্তস্সাতি সম্বন্ধো. লোকৰজ্জাতি লোকেহি ৰজ্জেতব্বা. পণ্ণত্তিৰজ্জাতি ভগৰতো পণ্ণত্তিযা ৰজ্জেতব্বা. যন্তি যং আপত্তিং আপজ্জতীতি সম্বন্ধো. করোন্তোতি কিরিযমানতো. এত্থ হি মানসদ্দস্স অন্তাদেসো. ইমিনা করণং কিরিযন্তি ভাৰত্থং দস্সেতি. আপজ্জতীতি পুগ্গলো আপজ্জতি. সা আপত্তি কিরিযতো সমুট্ঠিতা নামাতি যোজনা. কা আপত্তি ৰিযাতি আহ ‘‘পারাজিকাপত্তি ৰিযা’’তি. এসেৰ নযো অনন্তরৰাক্যেসুপি.

পুব্বাপত্তীতি এত্থ পুব্বসদ্দো পঠমত্থোতি আহ ‘‘পঠমং আপন্নাপত্তী’’তি. ‘‘আপন্না’’তি পদেন মজ্ঝেলোপং দস্সেতি. পচ্ছা আপন্নাপত্তীতি ৰত্তভেদদুক্কটাপত্তি. মূলৰিসুদ্ধিযাতি মূলে কাযচি আপত্তিযা অমিস্সত্তা ৰিসুদ্ধিযা আপত্তিযা. কুরুন্দিযং ৰুত্তন্তি সম্বন্ধো. ইদম্পীতি কুরুন্দিযং ৰুত্তৰচনম্পি. পিসদ্দেন পুরিমং মহাঅট্ঠকথাৰচনং অপেক্খতি. একেন পরিযাযেনাতি একেন কারণেন.

যাতি আপত্তি, দেসিতা হোতীতি সম্বন্ধো. অযং দেসিতা গণনূপিকা নামাতি যোজনা. যা দেসিতা হোতি, অযং অগণনূপিকা নামাতি যোজনা. সউস্সাহেনেৰাতি পুনপি আপজ্জিস্সামীতি সহ উস্সাহেনেৰ. হীতি সচ্চং, যস্মা ৰা. ‘‘গণনং ন উপেতী’’তি ইমিনা গণনং ন উপগচ্ছতীতি অগণনূপিকাতি ৰচনত্থং দস্সেতি. অট্ঠমে ৰত্থুস্মিং পূরণেতি সম্বন্ধো. ইদং পাল়িযং অট্ঠৰত্থুকপূরণৰসেন ভিক্খুনীনং আগতত্তা ভিক্খুনিযো সন্ধায ৰুত্তং. ভিক্খূনম্পি দুতিযপারাজিকট্ঠানে লব্ভতিযেৰ.

থুল্লৰজ্জাতি এত্থ থুল্লং ৰজ্জং এতিস্সাতি থুল্লৰজ্জাতি দস্সেন্তো আহ ‘‘থুল্লদোসে পঞ্ঞত্তা’’তি. যা চ ধম্মিকস্স পটিস্সৰস্স অসচ্চাপনে আপত্তি অত্থি, সা চ গিহিপটিসংযুত্তাতি যোজনা. পঞ্চানন্তরিযকম্মাপত্তীতি পঞ্চহি আনন্তরিযকম্মেহি আপন্না পারাজিকাপত্তি. সুদিন্নত্থেরাদীতি আদিসদ্দেন ধনিযত্থেরাদযো সঙ্গণ্হাতি. আদিকম্মিকোতি আদিকম্মং করোন্তো, তস্মিং নিযুত্তো ৰা. মক্কটিসমণাদীতি আদিসদ্দেন ৰজ্জিপুত্তকাদযো সঙ্গণ্হাতি. যো কদাচি করহচি আপত্তিং আপজ্জতি, সো অধিচ্চাপত্তিকো নামাতি যোজনা. পরতোপি এসেৰ নযো.

‘‘চোদেতী’’তি ইমিনা চোদেতীতি চোদকোতি ৰচনত্থং দস্সেতি. ‘‘চোদিতো’’তি ইমিনা চোদিতব্বোতি চুদিতো, সোযেৰ চুদিতকোতি ৰচনত্থং দস্সেতি. পঞ্চদসসূতি পাতিমোক্খট্ঠপনক্খন্ধকে ৰুত্তেসু পঞ্চদসধম্মেসু. তেনাতি অধম্মচোদকেন, চোদিতোতি সম্বন্ধো. পাতিমোক্খট্ঠপনক্খন্ধকে (চূল়ৰ. ৪০১) ৰুত্তে সচ্চে চ অকুপ্পে চ অতিট্ঠন্তোপি অধম্মচুদিতকোযেৰ নাম, সো পন ধম্মচোদকেন চোদিতেযেৰ কুপ্পন্তো অধম্মচুদিতকো নাম, অধম্মচোদকেন চোদিতে পন কুপ্পন্তোপি অধম্মচুদিতকো নাম ন হোতি, তস্মা ইধ ন ৰুত্তো. ‘‘সমন্নাগতো’’তি ইমিনা নিযতা এতস্স সন্তীতি নিযতোতি ৰচনত্থং দস্সেতি.

আপজ্জিতুং ভব্বাতি ভব্বাপত্তিকা. কেনচি কম্মেন অকতোপি অনুক্খিত্তকোযেৰ নাম, সো পন উক্খিত্তকোতি সঙ্কাভাৰতো ইধ ন ৰুত্তো. অযন্তি তজ্জনীযাদিকম্মকতো ভিক্খু. হীতি যস্মা, ন কোপেতীতি সম্বন্ধো. লিঙ্গদণ্ডকম্মসংৰাসনাসনাহীতি লিঙ্গনাসনেন চ দণ্ডকম্মনাসনেন চ সংৰাসনাসনেন চ. যেনাতি ভিক্খুনা. সোতি নানাসংৰাসকো. দ্ৰিন্নং নানাসংৰাসকানং ৰিসেসো হেট্ঠা (পাচি. অট্ঠ. ৪২৮) ৰুত্তোযেৰ. ঠপনং জানিতব্বন্তি এত্থ কিং ঠপনং নামাতি আহ ‘‘পাতিমোক্খট্ঠপন’’ন্তি.

ইতি এককৰারৰণ্ণনায যোজনা সমত্তা.

একুত্তরিকনযো দুকৰারৰণ্ণনা

৩২২. দুকেসু অচিত্তকা আপত্তীতি সম্বন্ধো. ভূতারোচনাপত্তীতি পাচিত্তিযাপত্তি. অভূতারোচনাপত্তীতি পারাজিকথুল্লচ্চযাপত্তি. পদসোধম্মাদিকাতিআদিসদ্দেন উত্তরিছপঞ্চৰাচা সঙ্গহিতা. মঞ্চপীঠাদীনন্তিআদিসদ্দেন ভিসিআদযো সঙ্গণ্হাতি. অনাপুচ্ছাগমনাদীসূতি আদিসদ্দেন অনুদ্ধরিত্ৰা গমনং সঙ্গণ্হাতি. সপুগ্গলোতি সো অত্তসঙ্খাতো পুগ্গলো সপুগ্গলো. পরপুগ্গলোতি পরো পুগ্গলো পরপুগ্গলো. গরুকন্তি সঙ্ঘাদিসেসং. লহুকন্তি পাচিত্তিযং. পুন গরুকন্তি পারাজিকং. পুন লহুকন্তি পাচিত্তিযমেৰ.

অঙ্গুলিমত্তম্পীতি পিসদ্দেন কেসগ্গমত্তম্পীতি অত্থং সম্পিণ্ডেতি. তন্তি মঞ্চপীঠং. গমিযো আপজ্জতি নামাতি সম্বন্ধো.

‘‘আদিযন্তো আপজ্জতি নামা’’তিআদিনা অত্থাপত্তি আদিযন্তো আপজ্জতীতি পাল়িযং আদিযন্তো হুত্ৰা আপজ্জতি আপত্তি অত্থীতি যোজনানযং দস্সেতি. এৰঞ্হি সতি ‘‘আপজ্জতী’’তি আখ্যাতপদং ‘‘অত্থী’’তি কিরিযন্তরং অপেক্খিত্ৰা কত্তা হোতীতি দট্ঠব্বং. অথ ৰা আদিযন্তো পুগ্গলো যং আপত্তিং আপজ্জতি, সা আপত্তি অত্থীতি যোজনা. এসেৰ নযো অঞ্ঞেসুপি. মূগব্বতাদীনীতি আদিসদ্দেন গোৰতকুক্কুরৰতাদীনি সঙ্গণ্হাতি. পারিৰাসিকাদযো আপজ্জন্তীতি সম্বন্ধো. তজ্জনীযাদিকম্মকতা ৰা পুগ্গলাতি যোজনা. অসমাদিযন্তা আপজ্জন্তীতি অসমাদিযন্তা হুত্ৰা আপজ্জন্তি. তেতি পুগ্গলে. করোন্তো আপজ্জতি নামাতি করোন্তো হুত্ৰা আপজ্জতি নামাতি যোজনা. এৰং দেন্তো আপজ্জতি নামাতিআদীসুপি.

একরত্তছারত্তসত্তাহদসাহমাসাতিক্কমেসূতি ‘‘একরত্তম্পি তিচীৰরেন ৰিপ্পৰসেয্যা’’তি (পারা. ৪৭৫-৪৭৬) চ ‘‘ছারত্তপরমং তেন ভিক্খুনা তেন চীৰরেন ৰিপ্পৰসিতব্ব’’ন্তি (পারা. ৬৫৩) চ ‘‘সত্তাহপরমং সন্নিধিকারকং পরিভুঞ্জিতব্ব’’ন্তি (পারা. ৬২২-৬২৩) চ ‘‘দসাহপরমং অতিরেকচীৰরং ধারেতব্ব’’ন্তি (পারা. ৪৬২-৪৬৩) চ ‘‘মাসপরমং নিক্খিপিতব্ব’’ন্তি (পারা. ৪৯৯-৫০০) চ ৰুত্তকালাতিক্কমেসু.

ইমং পন আপত্তিং আপজ্জতি নামাতি সম্বন্ধো.

যস্মিং পক্খে নিসিন্নোতি যস্মিং পক্খে সযং নিসিন্নো. তেসন্তি অত্তনো পক্খে নিসিন্নানং, নানাসংৰাসকন্তি সম্বন্ধো. যেসন্তি সকপক্খে নিসিন্নানং. কম্মং কোপেতীতি নানাসংৰাসকত্তা কম্মং কোপেতি. ইতরেসন্তি পরপক্খে নিসিন্নানং. হত্থপাসং অনাগতত্তা কম্মং কোপেতীতি যোজনা. ‘‘এসেৰ নযো’’তি ৰুত্তৰচনং ৰিত্থারেন্তো আহ ‘‘যেসং হী’’তিআদি. যেসন্তি সকপক্খে ৰা পরপক্খে ৰা নিসিন্নানং যেসং ভিক্খূনং. সোতি ভিক্খু. আপজ্জিতব্বতোতি আপজ্জিতব্বভাৰতো. ইমিনা পুগ্গলেন ছহি সমুট্ঠানেহি আপজ্জিতব্বাতি আপত্তিযোতি ৰচনত্থং দস্সেতি. কম্মেন ৰা সলাকগ্গাহেন ৰাতি এত্থ উদ্দেসো কম্মে লক্খণহারনযেন সঙ্গহং গচ্ছতি, ৰোহারানুস্সাৰনা সলাকগ্গাহেতি দস্সেন্তো আহ ‘‘উদ্দেসো চেৰ…পে… এক’’ন্তি. পুব্বভাগাতি সঙ্ঘভেদস্স পুব্বভাগে পৰত্তা. পমাণন্তি সঙ্ঘভেদস্স কারণং.

অদ্ধানহীনো নামাতি এত্থ অদ্ধানসদ্দো কালপরিযাযোতি আহ ‘‘ঊনৰীসতিৰস্সো’’তি. থেয্যসংৰাসকাদযোতিআদিসদ্দেন তিত্থিযপক্কন্তকভিক্খুনীদূসকপঞ্চানন্তরিযা সঙ্গহেতব্বা. অট্ঠ অভব্বপুগ্গলা করণদুক্কটকা নাম হোন্তীতি যোজনা. এত্থ কত্তব্বন্তি করণং, কম্মং, দুট্ঠু কত্তব্বন্তি দুক্কটং, কম্মমেৰ. করণং দুক্কটমেতস্সাতি করণদুক্কটকো. ৰিসেসনপরনিপাতো ‘‘অগ্যাহিতো’’তিআদীসু ৰিয. তদেৰত্থং দস্সেন্তো আহ ‘‘দুক্কটকিরিযা’’তিআদি. নো চ যাচতীতি এত্থ যাচধাতুযা পধানকম্মং দস্সেন্তো আহ ‘‘উপসম্পদ’’ন্তি, ‘‘সঙ্ঘ’’ন্তি অপধানকম্মমানেতব্বং. তেপিটকোতি তিপিটকং ৰাচুগ্গতৰসেন ধারকো. আণাযপীতি পিসদ্দো ‘‘মতেনপী’’তি অত্থং সম্পিণ্ডেতি. যাচন্তস্সেৰাতি নিস্সযং আচরিযং যাচন্তস্সেৰ. যং ৰত্থুং অজ্ঝাচরন্তো আপত্তিং আপজ্জতি, তং ৰত্থু সাতিসারং নামাতি যোজনা.

উপঘাতিকাতি এত্থ উপহনন্তীতি উপঘাতা, তেযেৰ উপঘাতিকাতি দস্সেন্তো আহ ‘‘উপঘাতা’’তি. তত্থাতি দ্ৰীসু উপঘাতিকেসু. দ্ৰে ৰেনযিকাতি এত্থ ৰিনযেন সিদ্ধা ৰেনযিকাতি দস্সেন্তো আহ ‘‘ৰিনযসিদ্ধা’’তি. ‘‘দ্ৰে অত্থা’’তি ইমিনা ণিকসদ্দস্স সরূপং দস্সেতি. পঞ্ঞত্তানুলোমং নাম দট্ঠব্বন্তি সম্বন্ধো. পচ্চযঘাতোতি পচ্চযস্স ঘাতো. ইমিনা সেতুঘাতোতি এত্থ সেতুসদ্দো পচ্চযৰাচকোতি দস্সেতি. চিত্তস্সাপীতি পিসদ্দো পগেৰ কাযৰাচানন্তি দস্সেতি. ইতিপীতি পিসদ্দো দুতিযত্থসম্পিণ্ডনো. ‘‘পমাণেনা’’তি ইমিনা মত্তকারিতাতি এত্থ মত্তসদ্দো পমাণত্থোতি দস্সেতি. ‘‘করণ’’ন্তি ইমিনা কারিতাতি তদ্ধিতভাৰং কিতভাৰেন দস্সেতি সভাগত্তা. কাযদ্ৰারিকন্তি কাযদ্ৰারে পৰত্তং আপত্তিং. ইমিনা আপজ্জতীতি পদস্স কম্মং দস্সেতি. কাযেনেৰ ৰুট্ঠাতীতি কাযসামগ্গিযা দানত্তা কাযেনেৰ ৰুট্ঠাতি. সীসমক্খনাদীতি আদিসদ্দেন পাদমক্খনাদিং সঙ্গণ্হাতি.

তন্তি ভারং. ‘‘নিত্থরিতুং ৰীরিযং আরভতী’’তি ইমিনা ৰহনাকারং দস্সেতি. থেরো সমানোতি যোজনা. নৰহনাকারং দস্সেন্তো আহ ‘‘অনুজানামী’’তিআদি. ‘‘কুক্কুচ্চাযিত্ৰা করোতী’’তি ইমিনা কুক্কুচ্চসদ্দস্স নামধাতুং দস্সেতি. ‘‘দিৰা চ রত্তো চা’’তি ইমিনা অভিণ্হং আসৰৰড্ঢনং দস্সেতি. তত্থ তত্থাতি তেসু তেসু ৰিভঙ্গক্খন্ধকেসু.

ইতি দুকৰারৰণ্ণনায যোজনা সমত্তা.

একুত্তরিকনযো তিকৰারৰণ্ণনা

৩২৩. তিকেসু ভগৰতি তিট্ঠন্তে যং আপত্তিং আপজ্জতি, সা আপত্তি অত্থীতি যোজনা. সব্বত্থাতি সব্বেসু পদেসু. ৰিত্থারং দস্সেন্তো আহ ‘‘তত্থা’’তিআদি. তত্থ তত্থাতি তিকেসু, ৰিত্থারো এৰং ৰেদিতব্বোতি যোজনা. লোহিতুপ্পাদাপত্তীতি অনুলোমপারাজিকাপত্তি. ‘‘আৰুসোৰাদেনা’’তি ‘‘আৰুসো’’তি ৰোহারেন. ৰোতি তুম্হেহি.

কালেতি পুরেভত্তকালে. ৰিকালেতি পচ্ছাভত্তকালে. অৰসেসং আপত্তিন্তি সম্বন্ধো. দসৰস্সোম্হীতি অহং দসৰস্সো অম্হি. নৰোতি পঞ্চৰস্সঅপরিপুণ্ণো. মজ্ঝিমোতি পঞ্চৰস্সতো পট্ঠায যাৰ দসৰস্সঅপরিপুণ্ণো. কুসলচিত্তো আপজ্জতীতি কুসলচিত্তো হুত্ৰা আপজ্জতি. অব্যাকতচিত্তোতি সুপন্তস্স ভৰঙ্গচিত্তং সন্ধায ৰুত্তং. যন্তি আপত্তিং. সব্বন্তি আপত্তিং, আপজ্জতীতি সম্বন্ধো. দুক্খৰেদনাসমঙ্গী হুত্ৰা আপজ্জতীতি যোজনা. যন্তি আপত্তিং.

তযো পটিক্খেপাতি এত্থ পটিক্খেপস্স সামিকং দস্সেন্তো আহ ‘‘বুদ্ধস্স ভগৰতো’’তি. কিলেসসল্লেখনকপটিপত্তিযাতি কিলেসং সল্লিখতি তনুং করোতীতি কিলেসসল্লেখনকা, সাযেৰ পটিপত্তি কিলেসসল্লেখনকপটিপত্তি, তায.

পরিসং উপট্ঠাপেন্তো বালোতি সম্বন্ধো. পরিসং উপট্ঠাপেন্তো পণ্ডিতো চাতি সম্বন্ধো. অৰসেসং আপত্তিন্তি যোজনা. কাল়েতি কাল়পক্খে. জুণ্হেতি জুণ্হপক্খে.

কত্তিকপুণ্ণমাসিযাতি পচ্ছিমকত্তিকপুণ্ণমাসিযা. কুরুন্দিযং ৰুত্তন্তি সম্বন্ধো. সুৰুত্তকারণং দস্সেন্তো আহ ‘‘চাতুমাস’’ন্তিআদি. হীতি যস্মা, পরিযেসন্তো চ নিৰাসেন্তো চ ভিক্খূতি যোজনা.

ৰত্থুন্তি মেথুনধম্মাদিৰত্থুং.

পটিচ্ছাদেতি এতাযাতি পটিচ্ছাদীতি করণত্থোপি যুজ্জতি. ৰিত্থারং দস্সেন্তো আহ ‘‘দ্ৰারং পিদহিত্ৰা’’তিআদি. এতদেৰাতি পরিকম্মমেৰ. উভযত্থাতি উভযেসু জন্তাঘরপটিচ্ছাদিউদকপটিচ্ছাদীসু. সব্বন্তি অখিলং পরিকম্মাদিং. নিয্যন্তীতি নিলীযিত্ৰা যন্তি. ইমিনা ৰহন্তীতি এত্থ ৰহধাতু গত্যত্থোতি দস্সেতি. অব্ভমহিকাধূমরজরাহুৰিমুত্তন্তি অব্ভেন চ মহিকায চ ধূমেন চ রজেন চ রাহুনা চ ৰিমুত্তং. তেসূতি অব্ভাদীসু. তথাতি যথা চন্দমণ্ডলং ৰিরোচতি, তথা সূরিযমণ্ডলং.

করণীযেন হুত্ৰাতি সম্বন্ধো.

কপ্পেন্তোতি করোন্তো. আগন্তুকো আপজ্জতীতি সম্বন্ধো. অনজ্ঝিট্ঠোতি অনজ্ঝেসিতো হুত্ৰাতি সম্বন্ধো. তিণৰত্থারকসমথে কাযেন ৰুট্ঠাতি কাযসামগ্গিযা দানত্তা.

আগাল়্হায চেতেয্যাতি আগাল়্হসদ্দো দল়্হপরিযাযোতি আহ ‘‘দল়্হভাৰাযা’’তি. আ ভুসো গাহিযতে আগাল়্হো, গাল়্হো বাল়্হো দল়্হোতি অত্থতো একং. চেতেয্যাতি পকপ্পেয্য. ন পূরযতোতি ন পূরযন্তস্স. অলজ্জী চ হোতি বালো চ অপকতত্তো চাতি এত্থ বালমত্তঅপকতত্তমত্তেন কম্মং ন কাতব্বং, আপত্তিৰসেনেৰ পন কাতব্বন্তি দস্সেন্তো আহ ‘‘বালো’’তিআদি. তত্থ বালো ন জানাতীতি সম্বন্ধো. অযন্তি বালো. এত্তাৰতাতি এত্তকেন অজাননমত্তেন. বালভাৰমূলকং আপত্তিন্তি সম্বন্ধো. দ্ৰে আপত্তিক্খন্ধেতি পারাজিকসঙ্ঘাদিসেসৰসেন দ্ৰে আপত্তিরাসযো. তেসন্তি তিণ্ণং পুগ্গলানং, কাতব্বন্তি সম্বন্ধো.

কাযিকো দৰো নামাতি কাযিকো পরিহাসো নাম. মুখালম্বরকরণাদিভেদোতি মুখেন আলম্বরনামকতূরিযকিচ্চস্স করণাদিভেদো. দ্ৰীহিপি দ্ৰারেহীতি কাযৰচীৰসেন দ্ৰীহিপি দ্ৰারেহি. কাযদ্ৰারে পঞ্ঞত্তসিক্খাপদৰীতিক্কমোতি কাযদ্ৰারে পঞ্ঞত্তস্স কাযসংসগ্গাদিসিক্খাপদস্স ৰীতিক্কমো. ৰচীদ্ৰারে পঞ্ঞত্তসিক্খাপদৰীতিক্কমোতি ৰচীদ্ৰারে পঞ্ঞত্তস্স দুট্ঠুল্লৰাচাদিসিক্খাপদস্স ৰীতিক্কমো. কাযিকেন উপঘাতিকেনাতি এত্থ উপঘাতিকং নাম অসিক্খনন্তি আহ ‘‘অসিক্খনেনা’’তি. কস্মা অসিক্খনং উপঘাতং নামাতি আহ ‘‘যো হী’’তিআদি. তত্থ যোতি পুগ্গলো. তন্তি কাযদ্ৰারে পঞ্ঞত্তসিক্খাপদং. নন্তি এৰমেৰ. হি যস্মা উপঘাতেতীতি সম্বন্ধো. ৰেজ্জকম্মেন সমন্নাগতোতি সম্বন্ধো. সাসনউগ্গহণআরোচনাদিনা ৰাচসিকেন মিচ্ছাজীৰেনাতি যোজনা.

‘‘মা ভণ্ডনং করী’’তি ইমিনা ‘‘মা’’তি পটিসেধস্স ‘‘করী’’তি পাঠসেসেন সম্বন্ধিতব্বভাৰং দস্সেতি. ন ৰোহরিতব্বন্তি এত্থ ৰিপুব্বঅৰপুব্ব-হরধাতু কথনত্থোতি আহ ‘‘ন কিঞ্চি ৰত্তব্ব’’ন্তি. হীতি সচ্চং. বীজনগ্গাহাদিকেতি আদিসদ্দেন ধম্মজ্ঝেসনাদিং সঙ্গণ্হাতি. ওকাসকম্মং কারেন্তস্সাতি এত্থ ‘‘ওকাস’’ন্তি চ ‘‘ওকাসকম্ম’’ন্তি চ সদিসন্তি আহ ‘‘ওকাসং কারেন্তস্সা’’তি. ন আদাতব্বন্তি ন গণ্হিতব্বং. তমেৰত্থং দস্সেন্তো আহ ‘‘যত্থ গহেত্ৰা’’তিআদি.

যন্তি ৰিনযং. সোতি ভিক্খু. সোতি ৰিনযো. তস্সাতি ভিক্খুস্স. ইদন্তি কম্মং. অঞ্ঞং পুচ্ছাতি মযা অঞ্ঞং ভিক্খুং পুচ্ছাহীতি যোজনা. ইতীতি এৰং. সোতি তীহঙ্গেহি সমন্নাগতো ভিক্খু. অস্সাতি তীহঙ্গেহি সমন্নাগতস্স. ন সাকচ্ছিতব্বোতি ন সহ কথেতব্বো.

‘‘লদ্ধি’’ন্তি ইমিনা ইদমপ্পহাযাতি এত্থ ইদংসদ্দস্স ৰিসযং দস্সেতি. ‘‘অৰিজহিত্ৰা’’তি ইমিনা হাধাতু ত্ৰাপচ্চযোতি দস্সেতি. সুদ্ধং ব্রহ্মচারিন্তি এত্থ সব্বথা কিলেসসুদ্ধো খীণাসৰোৰ গহেতব্বোতি আহ ‘‘খীণাসৰং ভিক্খু’’ন্তি. ‘‘পাতব্যভাৰ’’ন্তি ইমিনা পাতব্যতন্তি এত্থ তাপচ্চযো ভাৰত্থে হোতীতি দস্সেতি. ‘‘পটিসেৰন’’ন্তি ইমিনা পাতব্যসদ্দো যথাকামপরিভুঞ্জনত্থোতি দস্সেতি. গতিৰিসোধনন্তি দুগ্গতিতো সুগতিযা ৰিসুজ্ঝনং. ‘‘অকুসলানি চেৰ মূলানি চা’’তি ইমিনা অকুসলসদ্দস্স চ মূলসদ্দস্স চ তুল্যাধিকরণভাৰং দস্সেতি. তস্মা অকুসলসঙ্খাতানি মূলানি অকুসলমূলানীতি তুল্যাধিকরণসমাসো কাতব্বো. দুচ্চরিতানীতি এত্থ দুসদ্দস্স দুট্ঠুৰিরূপত্থভাৰং দস্সেন্তো আহ ‘‘দুট্ঠু চরিতানি, ৰিরূপানি ৰা চরিতানী’’তি. ৰিরূপানীতি ৰিকারসভাৰানি. ‘‘করণভূতেনা’’তি ইমিনা ‘‘কত্তুভূতেনা’’তি অত্থং পটিক্খিপতি. তত্থ তত্থাতি তস্মিং তস্মিং খন্ধকে.

ইতি তিকৰারৰণ্ণনায যোজনা সমত্তা.

একুত্তরিকনযো চতুক্কৰারৰণ্ণনা

৩২৪. চতুক্কেসু এৰং ৰিনিচ্ছযো ৰেদিতব্বোতি যোজনা. তিণৰত্থারকসমথট্ঠানন্তি তিণৰত্থারকসমথেন অধিকরণৰূপসমিতট্ঠানং. পরস্স কম্মৰাচাযাতি পরস্স করণভূতায কম্মৰাচায. ততোতি চতুক্কতো. পরেসূতি অঞ্ঞেসু চতুক্কেসু এৰমত্থো ৰেদিতব্বোতি যোজনা. তমেৰাতি কাযদ্ৰারিকমেৰ. পুন তমেৰাতি ৰচীদ্ৰারিকমেৰ. আপজ্জিতব্বাপত্তিঞ্চ সহাগারসেয্যাপত্তিঞ্চাতি যোজনা. জগ্গন্তোতি জাগরন্তো.

অচিত্তকো আপজ্জতি নামাতি ‘‘অচিত্তকো ভিক্খু আপজ্জতি নামা’’তি ৰা ‘‘অচিত্তকো হুত্ৰা আপজ্জতি নামা’’তি ৰা যোজনা কাতব্বা. সভাগন্তি ৰত্থুসভাগং. তঞ্চাতি অঞ্ঞতরং তঞ্চ আপত্তিং. ইতীতি এৰং.

কম্মেনাতি সমনুভাসনকম্মেন. কম্মেন ৰুট্ঠাতীতি কম্মেন এৰ ৰুট্ঠাতি.

সোতি গিহিপরিক্খারো, আহটো হোতীতি সম্বন্ধো. অৰাপুরণন্তি কুঞ্চিকং. অন্তোতি ভণ্ডাগারস্স অন্তো.

সম্মুখা ৰুট্ঠাতীতি সম্মুখা এৰ ৰুট্ঠাতি.

সযিতায এৰ ভিক্খুনিযাতি যোজনা. ইদন্তি সহাগারসেয্যাপত্তিং, পটিচ্চাতি সম্বন্ধো. এতন্তি ‘‘লিঙ্গপাতুভাৰেনা’’তি ৰচনং, ৰুত্তন্তি সম্বন্ধো. উভিন্নম্পীতি ভিক্খুভিক্খুনীনম্পি. লিঙ্গপটিলাভেনাতি ইত্থিলিঙ্গপটিলাভেন. পঠমন্তি আদিকপ্পকালে. ‘‘পঠমং উপ্পন্নৰসেনা’’তি ইমিনা পুরে উপ্পন্নং পুরিমন্তি ৰচনত্থং দস্সেতি. ‘‘সেট্ঠভাৰেনা’’তি ইমিনা পুরভাৰেন সেট্ঠভাৰেন উপ্পন্নং পুরিমন্তি ৰচনত্থং দস্সেতি. ‘‘পুরিসলিঙ্গ’’ন্তি ইমিনা ইমপচ্চযস্স সরূপং দস্সেতি. পুরিসকুত্তপুরিসাকারাদীতি আদিসদ্দেন পুরিসনিমিত্তাদযো সঙ্গণ্হাতি. যানি ছচত্তালীস সিক্খাপদানীতি যোজনা. ইমিনা ৰুত্তনযানুসারেন দুতিযচতুক্কেপি অত্থো ৰেদিতব্বো. তেহীতি তিংসাধিকেহি সতসিক্খাপদেহি.

মহাপদেসাতি ৰিনযে (মহাৰ. ৩০৫) আগতা মহাপদেসা. কস্মা মহাপদেসা ‘‘সামুক্কংসা’’তি ৰুচ্চন্তীতি আহ ‘‘তে হী’’তিআদি. তত্থ তেতি চত্তারো মহাপদেসা, ৰুচ্চন্তীতি সম্বন্ধো. ‘‘সয’’ন্তি ইমিনা সামুক্কংসাতি এত্থ সংসদ্দস্স সযমত্থং দস্সেতি. ‘‘উক্খিপিত্ৰা’’তি ইমিনা উক্কংসসদ্দো উক্খিপনত্থোতি দস্সেতি. ‘‘ঠপিতত্তা’’তি ইমিনা সযং উক্কংসিত্ৰা ঠপিতা সামুক্কংসাতি ৰচনত্থং দস্সেতি. ‘‘অজ্ঝোহরণীযপরিভোগা’’তি ইমিনা বাহিরপরিভোগং নিৰত্তেতি. উদকং পনাতি কেনচি অসংসগ্গং পসন্নোদকং পন. কালেতি সপ্পদট্ঠকালে. ‘‘পঞ্চ ৰা দস ৰা সীলানী’’তি ইমিনা পঞ্চ ৰা দস ৰা সীলানি উপাসকসীলন্তি দস্সেতি.

তত্থ চাতি ৰিহারে চ. উভোপীতি আগন্তুকাৰাসিকৰসেন উভোপি. অসাধারণন্তি দ্ৰীহি অসাধারণং. আপত্তিন্তি ভিক্খুনীহিযেৰ সাধারণং আপত্তিং. গমিযচতুক্কেপীতি পিসদ্দো আগন্তুকচতুক্কং অপেক্খতি. ৰত্থুনানত্ততাৰাতি মেথুনাদিৰত্থুনানত্ততা এৰ. হীতি সচ্চং, যস্মা ৰা. সাতি আপত্তি. তথাতি যথা কাযসংসগ্গে, তথা লসুণখাদনেতি যোজনা. এত্থাতি ৰত্থুনানত্ততাদিচতুক্কে. চত্তারি পারাজিকানীতি ভিক্খুপাতিমোক্খে আগতানি. ৰিসুং আপজ্জন্তেসুপি এসেৰ নযোতি সম্বন্ধো.

পুরিমচতুক্কেতি ৰত্থুনানত্ততাদিচতুক্কে. যো পঠমো পঞ্হোতি যোজনা. ইধাতি ৰত্থুসভাগতাদিচতুক্কে. যো চাতি যো চ পঞ্হো. তত্থাতি ৰত্থুনানত্ততাদিচতুক্কে. ততিযচতুত্থেসু পঞ্হেসূতি সম্বন্ধো.

‘‘সদ্ধিৰিহারিকস্সা’’তি পদং ‘‘কত্তব্ব’’ইতি পদে সম্পদানং.

গরুকন্তি পারাজিকং. লহুকন্তি থুল্লচ্চযং ৰা দুক্কটং ৰা.

অট্ঠন্নং ভিক্খুনীনং পটিপাটিযা নিসীদিতব্বতো ৰুত্তং ‘‘নৰমভিক্খুনিতো’’তি. পচ্চুট্ঠানারহাতি পটিমুখং উপট্ঠাতুং অরহা. অৰিসেসেন চাতি ‘‘ভিক্খূ’’তি ৰা ‘‘ভিক্খুনী’’তি ৰা ৰিসেস, মকত্ৰা সামঞ্ঞেন চ. ‘‘আসনারহচতুক্কস্সা’’তি পদং ‘‘পঠমপদ’’ন্তি পদে অৰযৰিসম্বন্ধো.

অসাধারণন্তি ভিক্খূহি অসাধারণং. ৰিকালে কপ্পতীতি তদহুৰিকালে কপ্পতি. কালাতীতন্তি কালযামসত্তহাতীতং. যাৰকালিকাদিত্তযঞ্চ অকপ্পিযমংসঞ্চ উগ্গহিতকঞ্চ অপটিগ্গহিতকঞ্চাতি যোজনা.

গুণঙ্গুণূপাহনঞ্চ ধুৰন্হানঞ্চ চম্মত্থরণঞ্চ গুণঙ্গুণূপাহনধুৰন্হানচম্মত্থরণানি. ইমানি চত্তারীতি পঞ্চৰগ্গেন গণেন উপসম্পদদানাদীনি. ইধাতি পচ্চন্তিমেসু জনপদেসু. ইধাতি মজ্ঝিমেসু. ইদন্তি চতুব্বিধং ৰত্থু. দীপেতুম্পীতি দীপনম্পি. তুংপচ্চযো হি কত্ৰত্থজোতকো. এসেৰ নযো দীপেতুং পনাতি এত্থাপি. সেসং অনুঞ্ঞাতকন্তি সম্বন্ধো. উভযত্থপীতি পচ্চন্তিমমজ্ঝিমৰসেন উভযত্থাপি.

ছন্দপারিসুদ্ধিঅক্খানং একং কত্ৰা ‘‘চত্তারো’’তি ৰুত্তং. চত্তারো পুব্বকিচ্চাতি লিঙ্গৰিপল্লাসো, ‘‘চত্তারি পুব্বকিচ্চানী’’তি হি অত্থো. এৰং ৰুত্তানি ইমানি চত্তারীতি সম্বন্ধো. এৰং আগতা সম্মুতিযোতি সম্বন্ধো. সব্বত্থাতি সব্বেসু চতুক্কেসু.

ইতি চতুক্কৰারৰণ্ণনায যোজনা সমত্তা.

একুত্তরিকনযো পঞ্চকৰারৰণ্ণনা

৩২৫. পঞ্চকেসু ‘‘পঞ্চ পুগ্গলা নিযতা’’তি এতং আনন্তরিযানমেৰ গহণন্তি যোজনা. পঞ্চ ছেদন কা আপত্তিযো নাম ৰেদিতব্বাতি সম্বন্ধো. যা ৰিকপ্পনা ৰুত্তাতি যোজনা. উস্সঙ্কিতোতি উট্ঠহিত্ৰা সঙ্কিতো. পরিসঙ্কিতোতি পুনপ্পুনং সঙ্কিতো. অকুপ্পো অরহত্তফলসঙ্খাতো ধম্মো ইমস্সাতি অকুপ্পধম্মো, খীণাসৰো. খীণাসৰো সমানোপি উস্সঙ্কিতো চেৰ পরিসঙ্কিতো চাতি যোজনা. পরিহরিতব্বাতি অপনেতব্বা. হীতি সচ্চং, যস্মা ৰা. এতেসূতি অগোচরেসু. থূপচীৰরন্তি এত্থ থূপং পরিক্খিপিত্ৰা কতং চীৰরং থূপচীৰরন্তি দস্সেন্তো আহ ‘‘ৰম্মিক’’ন্তিআদি. ৰম্মিকো হি থূপযতি উদ্ধং আরোহতীতি থূপোতি ৰুচ্চতি. ন্হানট্ঠানেতি সব্বেসং ন্হানট্ঠানে. তঞ্হি উদকেন কাযং অভিসিঞ্চতি এত্থাতি অভিসেকন্তি ৰুচ্চতি. অভিসেকে ছড্ডিতং আভিসেকিকং, চীৰরং. তেন ৰুত্তং ‘‘ছড্ডিতচীৰর’’ন্তি. ভতপটিযাভতন্তি এত্থ ভরধাতুযা পোসনত্থং পটিক্খিপিত্ৰা ধারণত্থং দস্সেন্তো আহ ‘‘সুসানং নেত্ৰা পুন আনীতক’’ন্তি. তত্থ ‘‘সুসান’’ন্তি ইমিনা কম্মং দস্সেতি, ‘‘পুনা’’তি ইমিনা পটিসদ্দস্স অত্থং দস্সেতি. ইমেহি পদেহি সুসানং ভতং হুত্ৰা গেহং পটিআভরিতব্বন্তি ভতপটিযাভতন্তি ৰচনত্থং দস্সেতি, যকারো পদসন্ধিকরো. পাল়িযং, অট্ঠকথাযঞ্চ পোত্থকেসু ‘‘গতপটিযাগত’’ন্তি কণ্ঠজততিযক্খরেন পাঠো অত্থি, সো অসুন্দরো.

কাযো পঠমং, ৰাচা দুতিযং, কাযৰাচা ততিযং, ইদং সন্ধায ‘‘ততিযেনা’’তি ৰুত্তং. তত্থেৰাতি অন্তরপেয্যালে এৰ.

অদিন্নন্তি এত্থ অকারস্স নকারিযভাৰঞ্চ তপচ্চযস্স কম্মৰাচকভাৰঞ্চ দস্সেন্তো আহ ‘‘অঞ্ঞেন ন দিন্ন’’ন্তি. তত্থ ‘‘অঞ্ঞেনা’’তি ইমিনা তপচ্চযস্স কম্মৰাচকভাৰং দস্সেতি, নকারেন অকারস্স কারিযং দস্সেতি. কেন কারণেন অৰিদিতন্তি আহ ‘‘পটিগ্গণ্হামীতি চেতনায অভাৰেনা’’তি. অৰিদিতন্তি অপাকটং. নটসমজ্জাদিদানন্তি নটসমজ্জাদীনং সব্বেসং দানং. উসভৰিস্সজ্জনন্তি উসভস্স ৰিস্সজ্জনং. ইদং উপলক্খণৰসেন ৰুত্তং. সব্বাসম্পি পন মনুস্সামনুস্সানং ইত্থীনং মেথুনরতিৰসেন পুরিসানং দানম্পি গহেতব্বং. ইত্থিদানন্তি এত্থাপি যাসং কাসঞ্চি ইত্থীনং যেসং কেসঞ্চি পুরিসানং দানং গহেতব্বং. পটিভানচিত্তকম্মদানন্তি মেথুনসেৰনপটিভানচিত্তকম্মদানং. লোকস্সাতি লোকেন. কথেতুকম্যতাতি কথেতুকামতা. ‘‘ন সুপ্পটিৰিনোদযা’’তি ইমিনা দুক্খেন পটিৰিনোদেতব্বাতি দুপ্পটিৰিনোদযা, পটিৰিনোদেতুং ন সুকরাতি দস্সেতি. উপাযেনাতি যুত্তিযা.

ফুস্সদেৰত্থেরো অট্ঠাসি কিরাতি সম্বন্ধো. একংসন্তি ভুম্মত্থে চেতং উপযোগৰচনং. একস্মিং অংসেতি হি অত্থো. বুদ্ধারম্মণন্তি বুদ্ধগুণারম্মণং. মারোতি দেৰপুত্তমারো, গতোতি সম্বন্ধো. গোমযন্তি গোমীল়্হং. জরগ্গৰোতি জরগোণো. তাদিসমেৰাতি গোমযৰিপ্পকিরণসভাৰমেৰ. ৰিপ্পকারন্তি ৰিসেসপকারেন করণং. ৰঙ্কপাদন্তি কুটিলপাদং. পরিকসন্তোতি পরিচ্ছেদং কত্ৰা ৰিলেখন্তো. ৰিগচ্ছপুরিসোতি ৰিকারং, ৰিরূপং ৰা গতপুরিসো. ‘‘ৰিভচ্ছপুরিসো’’তিপি পাঠো, ৰিসেসেন সোভণং ভক্খপুরিসোতি অত্থো. অযমেৰ পাঠো অভিধানাদীসু (অভিধানপ্পদীপিকাযং ১০২ গাথাযং) দিস্সতি. সমন্তাতি কটঅন্ধকারৰিহারস্স সমন্ততো. মারো সিযা নু খোতি যোজনা. ন অসক্খিং ইতি আহাতি যোজনা. দিট্ঠপুব্বোতি পুব্বে দিট্ঠো. মহানুভাৰোতি দেৰিদ্ধিযা মহানুভাৰো. ইঙ্ঘাতি উয্যোজনত্থে নিপাতো, উয্যোজেমীতি অত্থো. অত্তভাৰন্তি তৰ অত্তভাৰং. তাদিসং রূপন্তি বুদ্ধস্স ভগৰতো অত্তভাৰসদিসং রূপং. তংসরিক্খকন্তি তেন রূপেন সদিসং. পতিরূপমেৰ সদিসট্ঠেন পতিরূপকং, ন একংসসদিসং রূপং কিঞ্চি সদিসরূপন্তি অত্থো. সকত্তভাৰন্তি সস্স এসো সকো, সোযেৰ অত্তভাৰো সকত্তভাৰো, তং. অযন্তি মারো. কথন্তি কেন কারণেন ভগৰা ন সোভতি নু খো, সোভতিযেৰাতি অত্থো. তদেৰ সমত্থেতুং ৰুত্তং ‘‘সব্বসো ৰীতরাগদোসমোহো’’তি. ৰঞ্চিতোম্হীতি অহং ৰঞ্চিতো অম্হি. কিং অত্থীতি কিং নাম অত্থি, মম ৰঞ্চনচিত্তং নত্থীতি অধিপ্পাযো. দহরভিক্খু পটিলভতীতিআদিনা সম্বন্ধিতব্বং.

দহরভিক্খু অট্ঠাসীতি সম্বন্ধো. সঙ্কারছড্ডনিং পচ্ছিন্তি সম্বন্ধো. সঙ্কারং ছড্ডেতি ইমাযাতি সঙ্কারছড্ডনী. তিস্সদত্তত্থেরো নাম পুচ্ছীতি সম্বন্ধো. নাৰাতোতি পোততো. পঞ্হাসহস্সন্তি সমথৰিপস্সনাকম্মট্ঠানেসু পুচ্ছাসহস্সং. পুচ্ছীতি দহরং পুচ্ছি. পরিচ্ছিন্দীতি তস্মিং দিৰসে কাতব্বৰত্তং নিট্ঠপেসীতি অত্থো. যোনকৰিসযতোতি যোনকলোকতো. অট্ঠ কপ্পে অনুস্সরীতি চেতিযঙ্গণং দিস্ৰা চিত্তস্স পসীদনতো পুব্বেনিৰাসঞাণেন অট্ঠ কপ্পে অনুস্সরি.

একো ভিক্খু গতোতি সম্বন্ধো. দেৰতা পুপ্ফহত্থা অট্ঠংসূতি মনুস্সৰেসং গহেত্ৰা অট্ঠংসু. তেন ৰুত্তং ‘‘কতরগামৰাসিকাত্থা’’তি. তুম্হে কতরস্মিং গামে ৰসনসীলা অত্থ ভৰথাতি যোজনা. ইধেৰাতি ইমস্মিংযেৰ ঠানে. ঠিতাম্হাতি মযং ঠিতা অম্হাতি যোজনা.

অযং কথাতি অযং ৰক্খমানকথা. কিং অমচ্চপুত্তো পাসাদিকো নু খোতি যোজনা. নেতি অমচ্চপুত্তঅভযত্থেরে. ঞাতকা অগমংসূতি সম্বন্ধো. থেরমাতাপি পহিণীতি সম্বন্ধো. পিসদ্দেন ঞাতকে অপেক্খতি. পহিণাকারং দস্সেন্তো আহ ‘‘পুত্তো মে’’তিআদি. অমচ্চপুত্তো আরূল়্হোতি সম্বন্ধো. অভযত্থেরো আহাতি সম্বন্ধো. তেনাতি অমচ্চপুত্তেন. যুগগ্গাহন্তি যুগস্স গাহং. ‘‘মহল্লকত্থেরস্স সম্মট্ঠট্ঠানে কচৰরং ছড্ডেত্ৰা’’তি ৰচনং আৰি করোন্তো আহ ‘‘অতীতত্তভাৰে কিরা’’তিআদি. অমচ্চপুত্তো ছড্ডেসীতি সম্বন্ধো.

তন্তি সম্মজ্জনৰত্তং. তত্রাতি ‘‘সত্থুসাসনং কতং হোতী’’তিৰচনে. আযস্মা সারিপুত্তো নিসীদি কিরাতি সম্বন্ধো. ভগৰা পচ্চাগঞ্ছীতি সম্বন্ধো. পাদানীতি পাদস্স অক্কমনট্ঠানানি, পাদচেতিযানীতি অত্থো. থেরো নিসীদীতি সম্বন্ধো. জণ্ণুকেহি পতিট্ঠায ‘‘পাদচেতিযং ৰন্দিত্ৰা’’তি পাঠসেসো অজ্ঝাহরিতব্বো. মে নিসিন্নভাৰং মে সত্থা অঞ্ঞাসি ৰতাতি যোজনা. মেসদ্দো হি পুব্বপরাপেক্খো. চোদনন্তি দোসারোপনং. কারেস্সামীতি দসবলং কারেস্সামি. ভগৰা আহাতি সম্বন্ধো. গতোসীতি ত্ৰং গতো অসি, ৰিচরন্তস্স তুয্হং ন পতিরূপন্তি যোজনা. ততোতি চোদনকালতো.

এত্তকো ৰিনিচ্ছযো উপলব্ভতীতি সম্বন্ধো. ভাসপরিযন্তন্তি ৰচনপরিচ্ছেদং. অযন্তি কথা. এত্তকং ৰচনন্তি সম্বন্ধো. গয্হূপগন্তি গহেতব্বভাৰং উপগমনং, গণ্হিতুং খমনীযন্তি অত্থো. তানীতি দ্ৰে মূলানি. পুন তানীতি সমুদযভূতানি ছ আপত্তিসমুট্ঠানানি. ৰত্থুন্তি মেথুনাদিৰত্থুং. ইতিপীতি পিসদ্দো পঠমনযং অপেক্খতি. এত্থ পঠমনযে মূলেন সমুদযস্স পাযতো অভেদো হোতি, পচ্ছিমনযে পন সব্বথা ভেদো হোতি. তস্মা পচ্ছিমনযোযেৰ যুত্ততরোতি দট্ঠব্বো. ‘‘ৰূপসম্মতী’’তি ইমিনা ‘‘নিরুজ্ঝতী’’তি পদস্স সমুচ্ছেদনিরোধং দস্সেতি. ৰুট্ঠানেনাতি পরিৰাসাদিৰিনযকম্মেন.

তেত্তিংসমূলানং সরূপং দস্সেন্তো আহ ‘‘ৰিৰাদাধিকরণস্স দ্ৰাদস মূলানী’’তিআদি. একং মূলন্তি সম্বন্ধো. তানীতি তেত্তিংস মূলানি. পরতোতি পরস্মিং. ‘‘অট্ঠারস ভেদকরৰত্থূনী’’তিআদিনা অধিকরণানং সমুট্ঠানং দস্সেতি. চত্তারি সঙ্ঘকিচ্চানি নিস্সায উপ্পজ্জতীতি যোজনা. ইদন্তি ৰত্থু. সত্তন্নং নিদানন্তি সত্তন্নং আপত্তিক্খন্ধানং পঞ্ঞত্তিট্ঠানসঙ্খাতং নিদানং. এত্থাতি ঠানে. পঞ্ঞত্তিং ন জানাতীতি এত্থ ‘‘অনুপঞ্ঞত্তিং ন জানাতী’’তি ৰক্খমানত্তা পঠমপঞ্ঞত্তি গহেতব্বাতি আহ ‘‘পঠমপঞ্ঞত্তিং ন জানাতী’’তি. অনুপঞ্ঞত্তীতি এত্থ অনুসদ্দো নউপচ্ছিন্নত্থোতি আহ ‘‘পুনপ্পুনং পঞ্ঞত্তিং ন জানাতী’’তি. পচ্ছাত্থোপি যুজ্জতেৰ পঠমপঞ্ঞত্তিতো পচ্ছা পঞ্ঞত্তত্তা. অনুসন্ধিৰচনপথন্তি এত্থ অনুসন্ধীনং ৰসেন ৰচনপথন্তি দস্সেন্তো আহ ‘‘কথানুসন্ধিৰিনিচ্ছযানুসন্ধিৰসেন ৰত্থু’’ন্তি. ঞত্তিকিচ্চন্তি ঞত্তিযা কিচ্চং. ইমিনা ঞত্তিযাতি এত্থ সাম্যত্থে সামিৰচনং. করধাতুসম্বন্ধে করণৰচনম্পি যুজ্জতেৰ. করণন্তি এত্থ চ যুপচ্চযস্স কম্মত্থভাৰঞ্চ দস্সেতি. ন কেৰলং ঞত্তিকম্মে এৰ ঞত্তিকিচ্চং ন জানাতি, অথ খো ঞত্তিদুতিযঞত্তিচতুত্থকম্মেসুপি ন জানাতীতি দস্সেন্তো আহ ‘‘ঞত্তিদুতিযঞত্তিচতুত্থকম্মেসূ’’তিআদি. পুব্বে ঠপেতব্বাতি ঞত্তি নাম কম্মৰাচায পুব্বে ঠপেতব্বাতি ন জানাতি. ইমিনা নপুব্বকুসলভাৰং দস্সেতি. ‘‘পচ্ছা’’তি ইমিনা নঅপরকুসলভাৰং দস্সেতি. পিসদ্দেন পঠমনযং অপেক্খতি. ‘‘কালং ন জানাতী’’তি ইমিনা অকালঞ্ঞূতি পদস্স ৰিগ্গহৰাক্যং দস্সেতি. কালং দস্সেন্তো আহ ‘‘অনজ্ঝিট্ঠো’’তিআদি.

‘‘ধুতঙ্গে আনিসংসং অজানিত্ৰা’’তি ইমিনা মন্দমোমূহানং ফলং দস্সেতি. পাপিচ্ছোতি এত্থ পাপিচ্ছো নাম পচ্চযলাভস্স পত্থনাতি আহ ‘‘পচ্চযলাভং পত্থযমানো’’তি. কাযৰিৰেকো চ চিত্তৰিৰেকো চ উপধিৰিৰেকো চ কাযচিত্তউপধিৰিৰেকং, সমাহারদ্ৰন্দো, পুব্বপদেসু উত্তরপদলোপো. এতস্সাতি আরঞ্ঞিকস্স. ইমিনা ইমায অত্থো ইদমত্থো, সো এতস্সত্থীতি ইদমত্থীতি ৰচনত্থং দস্সেতি. অপ্পিচ্ছঞ্ঞেৰাতিআদীসু এৰসদ্দানং ছড্ডেতব্বত্থং দস্সেন্তো আহ ‘‘ন অঞ্ঞং কিঞ্চি লোকামিস’’ন্তি.

নৰৰিধন্তি দিৰসৰসেন তিৰিধং, তথা কত্তব্বাকারৰসেন, তথা কারকৰসেনাতি নৰৰিধং উপোসথং.

কাযদুচ্চরিতাদি যস্মা ন পসাদং সংৰত্তেতি, ন পসাদায ৰা সংৰত্ততি, তস্মা অপাসাদিকন্তি ৰুচ্চতি. তেন ৰুত্তং ‘‘অপাসাদিকন্তি কাযদুচ্চরিতাদি অকুসল’’ন্তি. ৰেলং অতিক্কম্মাতি ভোজনাদিকালং অতিক্কমিত্ৰা. ইমিনা অতিৰেলন্তি এত্থ অতিসদ্দস্স অতিক্কমনত্থঞ্চ ‘‘অতিৰেল’’ন্তি পদস্স ‘‘ৰিহরতো’’তি পদে কিরিযৰিসেসনভাৰঞ্চ দস্সেতি. অপ্পং কালন্তি যোজনা. অৰতরণং ওতারোতি দস্সেন্তো আহ ‘‘ওতরণ’’ন্তি. সব্বত্থাতি সব্বেসু পঞ্চকেসু.

ইতি পঞ্চকৰারৰণ্ণনায যোজনা সমত্তা.

একুত্তরিকনযো ছক্কৰারৰণ্ণনা

৩২৬. ছক্কেসু এৰমত্থো ৰেদিতব্বোতি যোজনা. ইতীতি এৰং. ইমা ছ সামীচিযোতি যোজনা. তত্থাতি ছসু আকারেসু. সতিসম্মোসেনাতি সতিযা ৰিপ্পৰাসেন.

তত্থাতি চুদ্দসসু পরমেসু. ততোতি ছক্কতো. একং অপনেত্ৰাতি যংকিঞ্চি একং অপনেত্ৰা. সেসেসূতি ছহি পরমেহি সেসেসু অট্ঠসু পরমেসু. অঞ্ঞানিপি ছক্কানীতি পঠমছক্কতো অঞ্ঞানিপি অট্ঠ ছক্কানি.

ছ আপত্তিযোতি তীণি ছক্কানীতি ‘‘ছ আপত্তিযো’’তি ৰুত্তানি তীণি ছক্কানীতি যোজনা. ৰুত্তদ্ৰযং একং কত্ৰা. ন্হানেতি ন্হানসিক্খাপদে. ছক্কদ্ৰযন্তি আদাযসমাদাযৰসেন ছক্কদ্ৰযং. সব্বত্থাতি সব্বেসু ছক্কেসু.

ইতি ছক্কৰারৰণ্ণনায যোজনা সমত্তা.

একুত্তরিকনযো সত্তকৰারৰণ্ণনা

৩২৭. সত্তকেসু ছসু সামীচীসু পক্খিপিত্ৰাতি সম্বন্ধো. তত্থেৰাতি সমথক্খন্ধকে এৰ.

চম্পেয্যকেতি চম্পেয্যক্খন্ধকে. ‘‘অসদ্ধম্মা’’তি পদস্স ভেদনিস্সিততুল্যনিস্সিতসমাসং দস্সেন্তো আহ ‘‘অসতং ধম্মা’’তিআদি. তত্থ ‘‘অসতং ধম্মা’’তি ইমিনা ভেদনিস্সিতসমাসং দস্সেতি, ‘‘অসন্তো ৰা ধম্মা’’তি ইমিনা তুল্যনিস্সিতসমাসং দস্সেতি. সব্বত্থাতি সব্বেসু সত্তকেসু. সেসং সুৰিঞ্ঞেয্যমেৰ.

ইতি সত্তকৰারৰণ্ণনায যোজনা সমত্তা.

একুত্তরিকনযো অট্ঠকৰারৰণ্ণনা

৩২৮. অট্ঠকেসু অট্ঠানিসংসাদীনং দেসনাকারদেসনট্ঠানানি দস্সেন্তো আহ ‘‘ন ময’’ন্তিআদি. তত্থ ‘‘ন মযং…পে… করিস্সামা’’তি ইমিনা দেসনাকারং দস্সেতি, ‘‘কোসম্বকক্খন্ধকে’’তি ইমিনা দেসনট্ঠানং দস্সেতি. তম্পীতি দুতিযঅট্ঠকম্পি.

তেরসকে ৰুত্তাতি সম্বন্ধো. কুলানি দূসেতীতি এত্থ ‘‘দূসেতী’’তি কিরিযাপদস্স করণং দস্সেন্তো আহ ‘‘পুপ্ফেন ৰা’’তিআদি. ইমেহি অট্ঠহি দূসেতীতি যোজনা. ‘‘লাভেনা’’তিআদিনা ‘‘অট্ঠহি অসদ্ধম্মেহী’’তি এত্থ অসদ্ধম্মসরূপং দস্সেতি. সারাগোতি সংরাগো, ভুসং রজ্জনন্তি অত্থো. পটিৰিরোধোতি দোসো. সো হি যস্মা অলাভাদীসু পটিৰিরুজ্ঝতি, তস্মা পটিৰিরোধোতি ৰুচ্চতি. পাল়িযন্তি ৰিনযপাল়িযং.

পাণন্তিআদিকা দ্ৰে গাথাযো দ্ৰাদসক্খরেন বন্ধিতা. পঠমগাথায ততিযপাদে চরিযসদ্দেন যুত্তত্তা একক্খরো অধিকো. অযং পনেত্থ যোজনা – পাণং ন হনে ন ঘাতেয্য, আদিন্নঞ্চ ন আদিযে ন গণ্হেয্য, মুসা ৰিতথৰচনং ন ভাসে ন কথেয্য, মজ্জপো মজ্জপানং ন চ সিযা, অব্রহ্মচরিযা মেথুনা ৰিরমেয্য, রত্তিং ৰিকালভোজনং ন ভুঞ্জেয্য.

মালং ন ধারে ন ধারেয্য, গন্ধঞ্চ ন আচরে, সন্থতে মঞ্চে চ ছমাযঞ্চ সযেথ. এতঞ্হি উপোসথং অট্ঠঙ্গিকং উপোসথং ইতি দুক্খন্তগুনা বুদ্ধেন পকাসিতন্তি আহু পণ্ডিতাতি.

সঙ্ঘভেদকেতি সঙ্ঘভেদকক্খন্ধকে. তাসংযেৰাতি ভিক্খুনীনমেৰ. ‘‘উপাসিকা অট্ঠ ৰরানি যাচতী’’তি এৰং সামঞ্ঞৰচনস্সাপি অত্থপকরণাদিনা ৰিসেসৰিসযো হোতীতি আহ ‘‘ৰিসাখা’’তি. সা হি ৰিৰিধা পুত্তনত্তুসঙ্খাতা সাখা এতিস্সাত্থীতি ৰিসাখাতি ৰুচ্চতি. সব্বত্থাতি সব্বেসু অট্ঠকেসু. সেসং সুৰিঞ্ঞেয্যমেৰ.

ইতি অট্ঠকৰারৰণ্ণনায যোজনা সমত্তা.

একুত্তরিকনযো নৰকৰারৰণ্ণনা

৩২৯. নৰকেসু অচরীতিআদীনীতি আদিসদ্দেন ‘‘চরতি, চরিস্সতী’’তিআদীনি (দী. নি. ৩.৩৪০; অট্ঠ. নি. ৯.২৯-৩০) সঙ্গণ্হাতি. তং কুতেত্থ লব্ভাতি এত্থ তন্তি অনত্থচরণং, কোপকরণং ৰা. কুতোতি কেন কারণেন. এত্থাতি এতস্মিং অনত্থচরকপুগ্গলে. লব্ভাতি লদ্ধা, সক্কা লদ্ধুং ন লব্ভা এৰাতি অত্থো. নৰন্নং ৰা ভিক্খূনং কারণাতি যোজনা. তণ্হন্তি দ্ৰীসু এসনতণ্হাএসিততণ্হাসু এসনতণ্হং. পটিচ্চাতি আরব্ভ. পরিযেসনাতি পুনপ্পুনং এসনা. লাভোতি রূপাদিআরম্মণলাভো. ৰিনিচ্ছযোতি ঞাণতণ্হাদিট্ঠিৰিতক্কৰসেন চতুব্বিধো ৰিনিচ্ছযো. চতুব্বিধো হি ধম্মো ‘‘এত্তকং ময্হং ভৰিস্সতী’’তিআদিনা ৰিনিচ্ছিনতি অনেনাতি ৰিনিচ্ছযোতি ৰুচ্চতি. ছন্দরাগোতি বলৰরাগো. অজ্ঝোসানন্তি ‘‘অহং মম’’ন্তি বলৰসন্নিট্ঠানং, পরিগ্গহোতি তণ্হাদিট্ঠিৰসেন পরিচ্ছিন্দিত্ৰা গহণং. মচ্ছরিযন্তি পরেসং সাধারণভাৰস্স অসহনতা. আরক্খাতি দ্ৰারপিদহনমঞ্জূসগোপনাদিৰসেন আভুসো রক্খনং. আরক্খাধিকরণন্তি আরক্খকারণা, হেত্ৰত্থে চেতং পচ্চত্তৰচনং. দণ্ডাদানাদীসু পরনিসেধনত্থং দণ্ডস্স আদানং দণ্ডাদানং. তথা একতোধারাদিনো সত্থস্স আদানং সত্থাদানং. কলহোতি কাযকলহোপি ৰাচাকলহোপি. ৰিগ্গহোতি ৰিরুদ্ধৰসেন গহণং. ৰিৰাদোতি ৰিরুদ্ধৰসেন ৰদনং. ‘‘তুৰং তুৰ’’ন্তি অনাদরৰসেন ৰদনং তুৰংতুৰং ৰাদো, পেসুঞ্ঞৰসেন ৰদনং পেসুঞ্ঞৰাদো, মুসাৰসেন ৰদনং মুসাৰাদো, দণ্ডাদানঞ্চ সত্থাদানঞ্চ কলহো চ ৰিগ্গহো চ ৰিৰাদো চ তুৰংতুৰংৰাদো চ পেসুঞ্ঞৰাদো চ মুসাৰাদো চ দণ্ডাদান…পে… মুসাৰাদা. মুসাৰাদাতি এত্থ ৰাদসদ্দো ‘‘তুৰং তুৰ’’ন্তি চ ‘‘পেসুঞ্ঞ’’ন্তি চ এত্থাপি যোজেতব্বো. ‘‘অহং সেয্যোহমস্মী’’তি পৰত্তমানাদযোতি যোজনা. অধিট্ঠিতকালতো পট্ঠায ন ৰিকপ্পেতব্বানীতি অধিট্ঠানৰিকপ্পনং একতো ন কাতব্বং, অধিট্ঠিতে ন ৰিকপ্পেতব্বন্তি অধিপ্পাযো. পরিণতং লাভং পরিণামেতীতি সম্বন্ধো.

এতেসংযেৰ দানানন্তি এতেসংযেৰ অধম্মিকানং দানানং. সঙ্ঘস্স নিন্নন্তি সঙ্ঘস্স নতং, নামিতং ৰা লাভন্তি সম্বন্ধো. সঙ্ঘস্স নমতি, নামিযতীতি ৰা নিন্নং. তেসংযেৰাতি তেসংযেৰ তিণ্ণং ধম্মিকদানানং. তযো তযো দানপটিগ্গহপরিভোগে সম্পিণ্ডেত্ৰা নৰকো গহেতব্বো. তত্থেৰাতি সমথক্খন্ধকে এৰ. ওৰাদৰগ্গস্সাতি ভিক্খুনোৰাদৰগ্গস্স. তত্থেৰাতি ওৰাদৰগ্গস্স পঠমসিক্খাপদে এৰ. সব্বত্থাতি সব্বেসু নৰকেসু.

ইতি নৰকৰারৰণ্ণনায যোজনা সমত্তা.

একুত্তরিকনযো দসকৰারৰণ্ণনা

৩৩০. দসকেসু অট্ঠানে ৰা পনাতি অকারণে ৰা পন. তত্থাতি নৰকেসু. ‘‘নত্থি দিন্নন্তিআদিৰসেনা’’তি আদিসদ্দেন ‘‘নত্থি যিট্ঠং নত্থি হুত’’ন্তিআদযো (ধ. স. ১২২১; ম. নি. ৯৪.২২৫; ৩.৯১, ১১৬; সং. নি. ৩.২১০; অ. নি. ১০.১৭৬) নৰ নত্থিকা সঙ্গহেতব্বা. ‘‘সস্সতো লোকোতি আদিৰসেনা’’তিআদিসদ্দেন (দী. নি. ১.৩১; ম. নি. ১.২৬৯) ‘‘অসস্সতো লোকো’’তিআদযো (ম. নি. ১.২৬৯) নৰ অন্তগ্গাহিকে সঙ্গণ্হাতি. ৰিপরীতা সম্মত্তাতি দসহি মিচ্ছত্তেহি ৰিপরীতা দস সম্মত্তা সম্মাদিট্ঠি সম্মাসঙ্কপ্পো সম্মাৰাচা সম্মাকম্মন্তো সম্মাআজীৰো সম্মাৰাযামো সম্মাসতি সম্মাসমাধি সম্মাঞাণং সম্মাৰিমুত্তীতি.

দস আদীনৰা নিদ্দিট্ঠাতি সম্বন্ধো. উন্দূরক্খাযিতন্তি মূসিকেন খাদিতং. এত্থ হি খেধাতু খাদনত্থো হোতি. অগ্গিদড্ঢন্তি অগ্গিনা দড্ঢং. এতেসূতি এতেসু দসসু পংসুকূলেসু. উদকসাটিকং ৰা সংকচ্চিকং ৰাতি ভিক্খুনীনং উদকসাটিকং ৰা সংকচ্চিকং ৰা. এত্থ ৰাসদ্দো অনিযমৰিকপ্পত্থো.

পণ্ণসন্থারো তিণসন্থারেন সঙ্গহিতো. সব্বত্থাতি সব্বেসু দসকেসু.

ইতি দসকৰারৰণ্ণনায যোজনা সমত্তা.

একুত্তরিকনযো একাদসকৰারৰণ্ণনা

৩৩১. একাদসকেসু তিণপাদুকাতি মুঞ্জপব্বজেহি অৰসেসা তিণমযপাদুকা. কট্ঠপাদুকসঙ্গহমেৰাতি কট্ঠপাদুকে সঙ্গহং এৰ. তম্বলোহমযেন ৰা দারুমযেন ৰাতি ৰাসদ্দো অনিযমৰিকপ্পত্থো. ‘‘নসি অনিমিত্তা’’তিআদযো ভিক্খুনিক্খন্ধকে (চূল়ৰ. ৪২৩) নিদ্দিট্ঠা. তে সব্বেতি সব্বে তে গণ্ঠিকৰিধা. নগ্গেনাতি অচেলকেন. তে সব্বেতি সব্বে তে অৰন্দিযপুগ্গলা. পুব্বেতি দসকে. কম্মৰগ্গেতি অৰসানে কম্মৰগ্গে.

সো ভিক্খু যং ন নিগচ্ছেয্য, এতং ন নিগতং অট্ঠানং অনৰকাসোতি যোজনা. এৰঞ্হি সতি যংসদ্দো কিরিযাপরামসনো হোতি, অথ ৰা যং যেন কারণেন ন নিগচ্ছেয্য, এতং কারণং অট্ঠানন্তি যোজনা. অনধিগতং সমাধিন্তি যোজনা. সদ্ধম্মাস্সাতি সদ্ধম্মা অস্স. অস্স অক্কোসকপরিভাসকস্স ভিক্খুস্স সদ্ধম্মা ন ৰোদাযন্তি ন পরিযোদপেন্তীতি অত্থো. রোগাতঙ্কন্তি রোগসঙ্খাতং আতঙ্কং. নিরযং উপপজ্জতীতি নিরযম্হি উপপজ্জতি. ‘‘উপপজ্জতী’’তি এত্থ উপইতি কম্মপ্পৰচনীযউপসগ্গেন যুত্তত্তা ‘‘নিরয’’ন্তি এত্থ ভুম্মত্থে উপযোগৰচনং দট্ঠব্বং. এত্থ এতস্মিং অঙ্গুত্তরপাল়িযং (অ. নি. ১১.৬).

আসেৰিতাযাতি এত্থ আত্যূপসগ্গো আদিকম্মত্থোতি আহ ‘‘আদিতো পট্ঠায সেৰিতাযা’’তি. ‘‘নিপ্ফাদিতাযা’’তিইমিনা ভাৰিতাযাতি এত্থ ভূসদ্দো সত্তত্থোতি দস্সেতি, ‘‘ৰড্ঢিতাযা’’তি ইমিনা ৰড্ঢনত্থোতি দস্সেতি. বহুলীকতাযাতি এত্থ বহুলং নাম অত্থতো পুনপ্পুনন্তি আহ ‘‘পুনপ্পুনং কতাযা’’তি. সুযুত্তযানসদিসাযাতি সুট্ঠু যুত্তেন যানেন সদিসায. ইমিনা যানীকতাযাতি এত্থ ন যংকিঞ্চি যানং ৰিয কতং হোতি, অথ খো ইচ্ছিতিচ্ছিতক্খণে আরোহনীযত্তা সুযুত্তযানং ৰিয কতং হোতীতি দস্সেতি. যথা করিযমানে পতিট্ঠা হোতীতি যোজনা. ৰত্থুকতাযাতি এত্থ ৰত্থুসদ্দো পতিট্ঠত্থোতি দস্সেতি. ৰসতি পতিট্ঠহতি এত্থাতি ৰত্থূতি ৰচনত্থো কাতব্বো. অনুট্ঠিতাযাতি এত্থ অনুসদ্দো নউপচ্ছিন্নত্থো, ঠাধাতু উপ্পজ্জনত্থোতি দস্সেন্তো আহ ‘‘অনু অনু পৰত্তিতাযা’’তি. ‘‘সমন্ততো’’তি ইমিনা পরিচিতাযাতি এত্থ পরিসদ্দো সমন্তত্থোতি দস্সেতি. ‘‘অভিৰড্ঢিতাযা’’তি ইমিনা চিধাতু ৰড্ঢনত্থোতি দস্সেতি. সমারদ্ধাযাতি পরিপুণ্ণং আরাধিতায. রাধধাতু হি সাধনত্থো হোতি. ‘‘ৰসীভাৰং উপনীতাযা’’তি ইমিনা তদত্থং অধিপ্পাযেন দস্সেতি. ‘‘ন পাপকং সুপিনং পস্সতী’’তি ৰচনস্স অত্থাপত্তিনযং দস্সেন্তো আহ ‘‘ভদ্রকং পনা’’তিআদি. ৰুদ্ধিকারণভূতন্তি ৰুদ্ধিযা কারণভূতং সুপিনন্তি সম্বন্ধো. দেৰতা রক্খন্তীতি এত্থ সামঞ্ঞতো ৰুত্তেপি আরক্খদেৰতাযেৰ গহেতব্বাতি আহ ‘‘আরক্খদেৰতা’’তি. আরক্খদেৰতা নাম ভুম্মদেৰাদযো. খিপ্পন্তি ভাৰনপুংসকং. ইমিনা তুৰটং চিত্তন্তি এত্থ তুৰটসদ্দো খিপ্পপরিযাযোতি দস্সেতি. উত্তরিমপ্পটিৰিজ্ঝন্তোতি এত্থ ‘‘উত্তরি’’ন্তি পদস্স অৰধিপেক্খত্তা তস্স অৰধি চ উত্তরিসদ্দস্স ইধ অরহত্তৰাচকভাৰঞ্চ ৰিধধাতুযা সচ্ছিকরণত্থঞ্চ দস্সেন্তো আহ ‘‘মেত্তাঝানতো’’তিআদি. তত্থ ‘‘মেত্তাঝানতো’’তি ইমিনা অৰধিং দস্সেতি, ‘‘অরহত্ত’’ন্তি ইমিনা ‘‘উত্তরি’’ন্তি পদস্স সরূপত্থং দস্সেতি, ‘‘অসচ্ছিকরোন্তো’’তি ইমিনা ৰিধধাতুযা সচ্ছিকরণত্থং দস্সেতি. সব্বত্থাতি সব্বেসু একাদসকেসু.

ইতি একাদসকৰারৰণ্ণনাপরিযোসানায

একুত্তরিকৰণ্ণনায

যোজনা সমত্তা.