৫৯. গমিকাদিনিস্সযৰত্থুকথা

১২১. ‘‘করণীযনিস্সযো’’তি ইমিনা নিস্সযগহণং নিস্সযো উত্তরপদলোপৰসেন, সো করণীযো ইমস্সাতি নিস্সযকরণীযোতি ৰিসেসনপরনিপাতভাৰং দস্সেতি. নিস্সযং অলভমানেনাতি এত্থ কিং নিস্সযস্স অলভনং নামাতি আহ ‘‘অত্তনা’’তিআদি. ৰুত্থপুব্বন্তি ৰসিতপুব্বং. একরত্তং ৰসন্তেনাপীতি পিসদ্দো দ্ৰিরত্তাদিকে কা নাম কথাতি দস্সেতি. ৰিস্সমন্তো ৰা সত্থং পরিযেসন্তো ৰা হুত্ৰাতি যোজনা. নাৰায গচ্ছন্তস্সাতি নাৰায অদ্ধানমগ্গং পটিপন্নস্স.

যাচিযমানেনাতি এত্থ বহুকত্তুপসঙ্গত্তা ৰুত্তং ‘‘তেন গিলানেনা’’তি. ‘‘মানেনা’’তি ইমিনা যাচিতুমসক্কুণেয্যতাদীনি নিৰত্তেতি.

ফাসু হোতীতি এত্থ আৰাসসপ্পাযাদিৰসেন ফাসু হোতীতি আসঙ্কা ভৰেয্যাতি আহ ‘‘সমথৰিপস্সনানং পটিলাভৰসেনা’’তি. হীতি সচ্চং. ইমং পরিহারন্তি ইমং ফাসুৰিহারপরিহারং. থামগতায ৰিপস্সনাযাতি যোজনা. সমথো ৰা তরুণো হোতীতি যোজনা. এতস্সেৰাতি তরুণসমথৰিপস্সনিকস্সেৰ ভিক্খুনো. তস্স নিস্সাযাতি এত্থ তস্স ওৰাদং নিস্সাযাতি যোজনা. অথ ৰা উপযোগত্থে সামিৰচনং. তং নিস্সযদাযকং নিস্সাযাতি হি অত্থো. যত্তকো কালো আসল়্হীপুণ্ণমা অত্থি, তত্তকং কালন্তি যোজনা. ‘‘আসল়্হীপুণ্ণমা’’তি এত্থ ‘‘যাৰা’’তি নিপাতপযোগত্তা অভিৰিধিঅৰঝত্থে নিস্সক্কৰচনং দট্ঠব্বং. যত্থাতি যস্মিং ঠানে.

১২২. পাল়িযং গোত্তেনপীতি এত্থ পিসদ্দেন ন কেৰলং নামেনেৰ, অথ খো গোত্তেনপি সাৰেতুন্তি দস্সেতি. তস্মা ‘‘আযস্মতো পিপ্পলিস্সা’’তি নামং সাৰেত্ৰাতিপি ‘‘আযস্মতো মহাকস্সপস্সা’’তি গোত্তং সাৰেত্ৰাপি অনুসাৰেতব্বং. তেন ৰুত্তং ‘‘মহাকস্সপস্সা’’তিআদি. ইমিনা ‘‘কোনামো তে উপজ্ঝাযো? উপজ্ঝাযো মে ভন্তে আযস্মা মহাকস্সপো নামা’’তিআদীসু গোত্তম্পি নামেনেৰ সঙ্গহিতন্তি সিদ্ধং হোতি.

১২৩. একানুসাৰনেতি পদস্স সমানাধিকরণবাহিরত্থসমাসভাৰং নিৰত্তেন্তো আহ ‘‘একতো অনুসাৰনে’’তি. তত্থ একতোতি একক্খণে, একপহারেন ৰা. ৰক্খতি হি ‘‘একক্খণে’’তি চ ‘‘একপহারেনেৰা’’তি চ. ইমিনা একতো অনুসাৰনমেতেসন্তি একানুসাৰনাতি অসমানাধিকরণবাহিরত্থসমাসং দস্সেতি. একেনাতি একেন অনুসাৰনাচরিযেন. একস্সাতি একস্স উপসম্পদাপেক্খস্স. ‘‘একক্খণে’’তি ইমিনা ‘‘একতো’’তি পদস্স অত্থং দস্সেতি. ‘‘উপসম্পাদেতু’’ন্তি দ্ৰিন্নং উপসম্পদাপেক্খানং উপসম্পাদেতুং.

পুরিমনযেনেৰাতি ‘‘একেন একস্স, অঞ্ঞেন ইতরস্সা’’তিআদিনা পুব্বে ৰুত্তনযেনেৰ. একতো অনুসাৰনে কাতুন্তি ‘‘একেন একস্স, অঞ্ঞেন অঞ্ঞস্স, ইতরেন ইতরস্সা’’তি এৰং তীহি আচরিযেহি তিণ্ণং উপসম্পদাপেক্খানং একক্খণে অনুসাৰনে কাতুং. তঞ্চ খোতি এত্থ তসদ্দস্স ‘‘অনুসাৰনে কাতু’’ন্তি পদস্সেৰ অত্থৰিসযতং দস্সেতুং ৰুত্তং ‘‘অনুসাৰনকিরিয’’ন্তি. দ্ৰে ৰা তযো ৰাতি এত্থ ৰাসদ্দো অনিযমৰিকপ্পত্থো. সচে একেনাচরিযেন দ্ৰে অনুসাৰেতি, ‘‘অযং বুদ্ধরক্খিতো চ অযং ধম্মরক্খিতো চা’’তি অনুসাৰেতব্বা. সচে তযো অনুসাৰেতি, ‘‘অযং বুদ্ধরক্খিতো চ অযং ধম্মরক্খিতো চ অযং সঙ্ঘরক্খিতো চা’’তি অনুসাৰেতব্বা. যথা একেনাচরিযেন দ্ৰে ৰা তযো ৰা একতো অনুসাৰেতব্বা, এৰং দ্ৰীহি ৰা তীহি ৰা আচরিযেহি একো অনুসাৰেতব্বোতিপি ৰদন্তি. একেন উপজ্ঝাযেন করণভূতেন, একো উপজ্ঝাযো হুত্ৰাতি ৰা অত্থো. ‘‘একপহারেনেৰা’’তি ইমিনা ‘‘একতো’’তি পদস্স অত্থং দস্সেতি. দ্ৰে তিস্সো কম্মৰাচাতি দ্ৰীহি আচরিযেহি দ্ৰে, তীহি আচরিযেহি তিস্সো কম্মৰাচা. একেন উপজ্ঝাযেন অনুসাৰনে একো ৰা দ্ৰে ৰা তযো ৰা আচরিযা ৰট্টন্তি, নানুপজ্ঝাযেন অনুসাৰনে পন নানাচরিযা এৰ ৰট্টন্তীতি দস্সেন্তো আহ ‘‘সচে পনা’’তিআদি. তিস্সত্থেরোতি কম্মৰাচাচরিযভূতো তিস্সত্থেরো. সুমনত্থেরস্সাতি উপজ্ঝাযভূতস্স সুমনত্থেরস্স. ইদন্তি নানুপজ্ঝাযেন একস্সাচরিযস্সানুসাৰনং. এস পটিক্খেপোতি ‘‘ন ত্ৰেৰ নানুপজ্ঝাযেনা’’তি এসো পটিক্খেপো.