৫৬. অপত্তকাদিৰত্থুকথা

১১৮. যো পিণ্ডো হত্থেসু লব্ভতীতি যোজনা. তদত্থাযাতি তস্স পিণ্ডস্স অত্থায. সেয্যথাপি তিত্থিযাতি এত্থ সেয্যথাপিসদ্দো উপমত্থো, তিত্থিযসদ্দো আজীৰকনামকে তিত্থিযে হোতীতি দস্সেন্তো আহ ‘‘যথাপি আজীৰকনামকা তিত্থিযা’’তি. তস্মা আজীৰকসঙ্খাতে তিত্থিযে উপমং কত্ৰা উজ্ঝাযন্তীতি আহ ‘‘সূপব্যঞ্জনেহী’’তিআদি. হীতি সচ্চং, যস্মা ৰা. তেতি আজীৰকা. কম্মং পন ন কুপ্পতীতি পত্তচীৰরেসু অসন্তেসুপি কম্মৰাচায ‘‘পরিপুণ্ণস্স পত্তচীৰর’’ন্তি পরিকিত্তিতত্তা কম্মং ন কুপ্পতীতি অধিপ্পাযো.

যাচিতকেনাতি এত্থ যাচিতো হুত্ৰা গহিতো যাচিতকোতি দস্সেন্তো আহ ‘‘যাচিত্ৰা গহিতেনা’’তি. ‘‘ঈদিসেন হী’’তিআদিনা দোসং দস্সেতি. তস্মাতি যস্মা আপত্তি হোতি, তস্মা. তস্সাতি উপসম্পদাপেক্খস্স. নিরপেক্খেহি আচরিযুপজ্ঝাযাদীহীতি যোজনা. নিস্সজ্জিত্ৰাতি ব্রহ্মদেয্যেন নিস্সজ্জিত্ৰা. অনধিট্ঠানুপগানং পত্তচীৰরানং অপত্তচীৰরত্তা ৰুত্তং ‘‘অধিট্ঠানুপগং পত্তচীৰর’’ন্তি. পণ্ডুপলাসন্তি সমণুদ্দেসভাৰাপেক্খং. সো হি রূল়্হিৰসেন পণ্ডুপলাসোতি ৰুচ্চতি. অথ ৰা যথা পণ্ডুপলাসো ন হরিতো, নাপি সুক্খো হোতি, এৰং সোপি পব্বজাপেক্খো ন গিহী হোতি, নাপি সামণেরো, তস্মা সমণুদ্দেসভাৰাপেক্খো ‘‘পণ্ডুপলাসো’’তি ৰুচ্চতি.

ৰসন্তস্স পণ্ডুপলাসস্সাতি সম্বন্ধো. অনামট্ঠপিণ্ডপাতন্তি ভিক্খূহি অনামসিতব্বগ্গং পিণ্ডপাতং. সামণেরভাগসমকোতি সামণেরেহি লদ্ধেন ভাগেন সমং পৰত্তো. অস্সাতি পণ্ডুপলাসস্স. সামণেরস্স সব্বং পটিজগ্গনকম্মং কাতুং ৰট্টতি ৰিয, অস্স কাতুং ৰট্টতীতি যোজনা.