৫৪. উভতোব্যঞ্জনকৰত্থুকথা

১১৬. উভতোব্যঞ্জনকোতি এত্থ বাহিরত্থসমাসং দস্সেন্তো আহ ‘‘ইত্থিনিমিত্তুপ্পাদনকম্মতো চা’’তিআদি. তত্থ ‘‘ইত্থি…পে… কম্মতো চা’’তি ইমিনা উভযসরূপং দস্সেতি. উভতো কম্মতো পৰত্তন্তি পাঠসেসো যোজেতব্বো. ব্যঞ্জনন্তি নিমিত্তং. অস্সাতি জনস্স. করোতিপি কারেতিপীতি এত্থ করধাতুযা সুদ্ধকম্মকারিতকম্মানি দস্সেন্তো আহ ‘‘পুরিসনিমিত্তেনা’’তিআদি. তত্থ ‘‘ৰীতিক্কম’’ন্তি ইমিনা সুদ্ধকম্মং দস্সেতি, ‘‘পর’’ন্তি ইমিনা কারিতকম্মং দস্সেতি. সমাদপেত্ৰাতি উয্যোজেত্ৰা. তস্স দুৰিধভাৰং দস্সেন্তো আহ ‘‘দুৰিধো’’তিআদি. তত্থ ইত্থিভাৰেন লক্খিতো উভতোব্যঞ্জনকো ইত্থিউভতোব্যঞ্জনকো. এস নযো ইতরত্থাপি.

তত্থাতি দুৰিধেসু উভতোব্যঞ্জনকেসু. ইত্থিনিমিত্তন্তি ইত্থিযা অঙ্গজাতং. এসেৰ নযো ‘‘পুরিসনিমিত্ত’’ন্তি এত্থাপি. পাকটং পটিচ্ছন্নন্তি সভাৰতো পাকটং পটিচ্ছন্নং. পুন পটিচ্ছন্নং পাকটন্তি রাগৰসেন পটিচ্ছন্নং পাকটং. পরং গণ্হাপেতীতি পরমেৰ গণ্হাপেতীতি অত্থো. ইদন্তি কারণং. এতেসন্তি দ্ৰিন্নং উভতোব্যঞ্জনকানং. কুরুন্দিযং পন ৰুত্তং, কিং ৰুত্তন্তি যোজনা. তত্থাতি উভতোব্যঞ্জনকে. ৰিচারণক্কমোতি ৰীমংসনানুক্কমো. ‘‘তত্থ ৰিচারক্কমো’’তিপি পাঠো. ৰিচারণক্কমো ধম্মসঙ্গহট্ঠকথায ৰেদিতব্বো, ইধ পন কিং ৰেদিতব্বন্তি আহ ‘‘ইদমিধ ৰেদিতব্ব’’ন্তি. তত্থ ইদন্তি নপব্বজ্জূপসম্পদকারণং. ইধাতি ইমিস্সং ৰিনযট্ঠকথাযং.