৪১. রাহুলৰত্থুকথা

১০৫. কপিলৰত্থূতি এত্থ কপিলোতি কল়ারৰণ্ণো ইসি ৰুচ্চতি, সো ৰসতি এত্থাতি কপিলৰত্থু, অস্সমো. তস্মিং ঠানে মাপিতত্তা নগরম্পি কপিলৰত্থূতি (দী. নি. অট্ঠ. ১.২৬৭; সু. নি. অট্ঠ. ২.৩৬২) ৰুচ্চতি. অযন্তি ৰক্খমানকথা. সুদ্ধোদনমহারাজাতি এত্থ সুদ্ধোদনোতি তস্স রঞ্ঞো নামং. অথ ৰা সুদ্ধং ওদনং ইমস্সাতি সুদ্ধোদনো, সোযেৰ মহারাজা সুদ্ধোদনমহারাজা. ৰিহরতি কিরাতি সম্বন্ধো. সোতি সুদ্ধোদনমহারাজা. রাজগহন্তি রাজগহনগরং. সাধূতি আযাচনত্থে নিপাতো. আযাচামীতি হি অত্থো. মেতি মম, পুত্তন্তি সম্বন্ধো, অনাদরে ৰা সামিৰচনং. সোতি অমচ্চো. সাধূতি সম্পটিচ্ছনত্থে নিপাতো. এৰন্তি হি অত্থো. অথাতি তস্মিং নিসীদনকালে. অস্সাতি পুরিসসহস্সপরিৰারস্স অমচ্চস্স. ততোতি যাচনকারণা. নন্তি পুরিসসহস্সপরিৰারং অমচ্চং. তত্থেৰাতি রাজগহেযেৰ. তেপীতি অট্ঠ দূতাপি. তেতি নৰ দূতা.

অথাতি ততো পচ্ছা. একদিৰসজাতকন্তি একস্মিং দিৰসে জাতকং. সোতি কাল়ুদাযীঅমচ্চো. পব্বজিত্ৰাপীতি পিসদ্দেন ‘‘অপব্বজিত্ৰাপী’’তি অত্থং সম্পিণ্ডেতি. তথেৰাতি যথা নৰ দূতা সপরিৰারা অরহত্তং পাপুণিংসু, তথেৰাতি অত্থো. সোতি কাল়ুদাযী. সম্ভতেসূতি সম্ভরিতেসু গহেত্ৰা নিট্ঠাপিতেসূতি অত্থো. ৰিস্সট্ঠকম্মেসূতি ৰিস্সট্ঠা কম্মন্তা এতেসন্তি ৰিস্সট্ঠকম্মন্তা, তেসু. সুপুপ্ফিতেসূতি সুন্দরপুপ্ফসঞ্জাতেসু. পটিপজ্জনক্খমেতি পটিপজ্জনত্থায খমে যোগ্যে. গমনৰণ্ণং সংৰণ্ণেসীতি সম্বন্ধো. সট্ঠিমত্তাহীতি (বু. ৰং. অট্ঠ. নিদানকথা ২) সট্ঠিপমাণাহি. এতন্তি এতং সংৰণ্ণস্স কারণং কিন্তি পুচ্ছি. চারিকং পক্কমিতুং কালোতি যোজনা. তেন হীতি উয্যোজনত্থে নিপাতো. ভগৰা পক্কামীতি সম্বন্ধো. পরিৰুতোতি পরিসমন্ততো ৰুতো আৰুতো নিৰুতো হুত্ৰাতি সম্বন্ধো. অতুরিতচারিকন্তি অজৰনচারিকং.

এৰন্তি ইমিনা নযেন. ভগৰতি পক্কন্তে চ সতীতি যোজনা. নিক্খন্তদিৰসতোতি ফগ্গুণপুণ্ণমিযা পাটিপদদিৰসতো. উত্তমভোজনরসস্সাতি উত্তমভোজনরসেন. দস্সথাতি দদেয্যাথ. তেনেৰাতি সদ্ধায উপ্পাদনকারণেনেৰ. নন্তি কাল়ুদাযিং. ভগৰা ঠপেসীতি সম্বন্ধো. এতদগ্গন্তি এসো অগ্গো. যদিদন্তি যো অযং. এতদগ্গেতি এতদগ্গট্ঠানে.

সাকিযাপি খো পহিণিংসূতি সম্বন্ধো. ঞাতিসেট্ঠন্তি ঞাতীনং সেট্ঠং, ঞাতিযেৰ ৰা সেট্ঠং, ভগৰন্তন্তি যোজনা. নিগ্রোধসক্কস্সাতি নিগ্রোধনামকস্স সক্কস্স. তত্থাতি নিগ্রোধসক্কস্স আরামে. পচ্চুগ্গমনন্তি পটিমুখং উট্ঠহিত্ৰা গমনং. ততোতি পহিণতো, পরন্তি সম্বন্ধো. রাজকুমারে চ রাজকুমারিকাযো চ পহিণিংসূতি যোজনা. তেসন্তি রাজকুমাররাজকুমারিকানং. তত্রাতি নিগ্রোধারামে. মানো জাতি সভাৰো এতেসন্তি মানজাতিকা, মানেন, মানো ৰা থদ্ধো এতেসন্তি মানথদ্ধা. তেতি সাকিযা, আহংসূতি সম্বন্ধো.

তেসূতি সাকিযেসু. নেতি ঞাতযো. ৰুট্ঠাযাতি চতুত্থজ্ঝানতো ৰুট্ঠহিত্ৰা. তেসন্তি ঞাতীনং. কণ্ডম্বরুক্খমূলেতি কণ্ডনামকেন উয্যানপালেন রোপিমস্স অম্বরুক্খস্স আসন্নে. রাজাতি সুদ্ধোদনমহারাজা. ৰোতি তুম্হাকং, পাদেতি সম্বন্ধো. অযন্তি ৰন্দনা. জম্বুচ্ছাযাযাতি জম্বুরুক্খস্স ছাযায. ইতি আহাতি যোজনা.

সিখাপ্পত্তোতি অগ্গপ্পত্তো, কোটিপ্পত্তোতি অত্থো. ততোতি নিসীদনতো, পরন্তি সম্বন্ধো. পোক্খরৰস্সন্তি পদুমৰনে ৰুট্ঠৰস্সসদিসং. তম্বৰণ্ণন্তি লোহিতৰণ্ণং. তন্তি অপতনং ভগৰা কথেসীতি সম্বন্ধো.

দুতিযদিৰসেতি কপিলৰত্থুং পত্তদিৰসতো দুতিযে দিৰসে. ইন্দখীলেতি নগরস্স উম্মারে. কথন্তি কেনাকারেন চরিংসু নু খোতি যোজনা. অগমংসু কিং চরিংসু কিন্তি যোজনা. সপদানচারন্তি ঘরপটিপাটিখণ্ডনৰিরহিতেন সহ পৰত্তং চারং. ততোতি আৰজ্জনতো, পরন্তি সম্বন্ধো. অযমেৰ ৰংসোতি পুব্ববুদ্ধানং অযমেৰ ৰংসো. অযং পৰেণীতি তস্সেৰ ৰেৰচনং. অনুসিক্খন্তাতি অনু পটিভাগং সিক্খন্তা. নিৰিট্ঠগেহতোতি নিৰাসনত্থায ৰিসিতগেহতো. অয্যোতি অধিপো সামীতি অত্থো. সিদ্ধত্থকুমারোতি সব্বলোকস্স সিদ্ধো অত্থো অস্মিং অত্থীতি সিদ্ধত্থো, সোযেৰ কুমারো সিদ্ধত্থকুমারো. সীহপঞ্জরন্তি ৰাতপানং. তঞ্হি সীহরূপং দস্সেত্ৰা কতপঞ্জরত্তা সীহপঞ্জরন্তি ৰুচ্চতি. দস্সনব্যাৰটোতি দস্সনে, দস্সনত্থায ৰা ব্যাৰটো. রাহুলমাতাপি দেৰী আরোচেসীতি সম্বন্ধো. কপালহত্থোতি কপালো হত্থেসু অস্স ভগৰতোতি কপালহত্থো, হুত্ৰাতি সম্বন্ধো. নানাৰিরাগসমুজ্জলাযাতি নানাঠানেসু ৰিরাগায সমুজ্জলায. ৰিরোচমানং ভগৰন্তন্তি সম্বন্ধো.

উণ্হীসতোতি সিরোৰেঠনতো. তঞ্হি উপরিসীসে নহতি বন্ধতি, নহীযতি বন্ধীযতীতি ৰা উণ্হীসোতি ৰুচ্চতি. নরসীহগাথাহি নামাতি নরসীহগাথানামকাহি. তা হি যস্মা নরোযেৰ সব্বসত্তানং সীহো সেট্ঠো, নরানং, নরেসু ৰা সীহো সেট্ঠোতি নরসীহো, তস্স পকাসকা গাথা হোন্তি, তস্মা নরসীহগাথাতি ৰুচ্চন্তি. রঞ্ঞোতি সস্সুররঞ্ঞো, মাতুলরঞ্ঞো ৰা. সংৰিগ্গহদযোতি চলনচিত্তো. সণ্ঠাপযমানোতি সুট্ঠু ঠাপযমানো. তুরিততুরিতন্তি তুরিততো তুরিতং, অতিসীঘন্তি অত্থো. কিং ভন্তেতি কিং কারণা ভন্তে. অহুৰত্থাতি হিয্যত্তনীমজ্ঝিমপুরিসসঙ্খাতায ত্থৰিভত্তিযা হূধাতুস্স ঊকারস্স উৰাদেসো হোতি, তস্মা তুম্হে এৰংসঞ্ঞিনো অহুৰত্থাতি যোজনা. ৰংসচারিত্তমেতন্তি এতং পিণ্ডায চরণং ৰংসতো পৰেণিতো চারিত্তং. তত্থ চাতি মহাসম্মতখত্তিযৰংসে চ. অযন্তি মহাসম্মতখত্তিযৰংসো. অন্তরৰীথিযন্তি ৰীথিযা মজ্ঝে. ঠিতোৰ আহাতি সম্বন্ধো.

উত্তিট্ঠেতি উদ্দিস্স, উট্ঠহিত্ৰা ৰা পিণ্ডায তিট্ঠনে. ধম্মং সুচরিতন্তি সুট্ঠু চরিতব্বং ভিক্খাচরিযসঙ্খাতং ধম্মং. চরেতি চরেয্য. ধম্মচারীতি ভিক্খাচরিযসঙ্খাতং ধম্মং চরণসীলো সমণো. সুখং সেতীতি উপলক্খণৰসেন ৰুত্তং. সেসইরিযাপথাপি লক্খণহারৰসেন গহেতব্বা সমানকিচ্চত্তা. অস্মিঞ্চ লোকে পরম্হি চ লোকেতি যোজনা.

ন তং দুচ্চরিতং চরেতি ৰেসিযাদিগোচরসঙ্খাতং দুট্ঠু চরিতব্বং তং ধম্মং ন চরেয্য.

এত্থ চ পঠমগাথং অন্তরৰীথিযং কথেত্ৰা রাজানং সোতাপত্তিফলে পতিট্ঠাপেসি, দুতিযগাথং পিতুনিৰেসনে কথেত্ৰা মহাপজাপতিং সোতাপত্তিফলে, রাজানং সকদাগামিফলে পতিট্ঠাপেসীতি দট্ঠব্বং. ধম্মপালজাতকং সুত্ৰাতি পুন অপরস্মিং দিৰসে (জা. অট্ঠ. ৪.৯৮ আদযো; ধ. প. অট্ঠ. ১.নন্দত্থেরৰত্থু) ধম্মপালজাতকং (জা. অট্ঠ. ৪.মহাধম্মপালজাতকৰণ্ণনা) সুত্ৰা. মরণসমযেতি মরণাসন্নকালে, মরণসমযসমীপে ৰা, সমীপত্থে চেতং ভুম্মৰচনং.

সোতাপত্তিফলং সচ্ছিকত্ৰা পরিৰিসীতি সম্বন্ধো. সব্বং ইত্থাগারন্তি সব্বো ওরোধো. সো হি ইত্থীনং অগারন্তি ইত্থাগারন্তি ৰুচ্চতি. ইমিনা ৰচনত্থেন অগারমেৰ মুখ্যতো লব্ভতি, রাজিত্থিযো পন উপচারেনাতি দট্ঠব্বং. সা পনাতি রাহুলমাতা পন. পরিজনেনাতি পরিৰারেন. নন্তি অয্যপুত্তং. ‘‘রাজান’’ন্তিপদং ‘‘গাহাপেত্ৰা’’তিপদে কারিতকম্মং, ‘‘পত্ত’’ন্তিপদং তত্থেৰ ধাতুকম্মং. রাজধীতাযাতি সুপ্পবুদ্ধরঞ্ঞো ধীতায. সাতি রাজধীতা. গোপ্ফকেসূতি চরণগণ্ঠীসু ভগৰন্তং গহেত্ৰাতি যোজনা. অথ ৰা ভগৰতো গোপ্ফকে গহেত্ৰাতি যোজনা. এৰঞ্হি সতি উপযোগত্থে ভুম্মৰচনন্তি দট্ঠব্বং.

রাজা কথেসীতি সম্বন্ধো. অনচ্ছরিযন্তি ন অচ্ছরিযং, অচ্ছরং পহরিতুং ন যোগ্যন্তি অত্থো. রাজধীতা যং অত্তানং রক্খি, ইদং অনচ্ছরিযন্তি যোজনা.

তংদিৰসমেৰাতি তস্মিং দুতিযদিৰসেযেৰ. কেসৰিসজ্জনন্তি রাজচূল়ামণিবন্ধনত্থং কুমারকালে বন্ধিতসিখাৰেণিসঙ্খাতস্স কেসস্স ৰিসজ্জনং, মোচনন্তি অত্থো. পট্টবন্ধোতি অসুকো নাম রাজাতি নলাটে সুৰণ্ণমযস্স পট্টস্স বন্ধনং. ঘরমঙ্গলন্তি অভিনৰঘরং পৰেসনমঙ্গলং. আৰাহমঙ্গলন্তি আৰাহে পৰত্তং মঙ্গলং. ছত্তমঙ্গলন্তি রাজছত্তুস্সাপনকালে পৰত্তং মঙ্গলং. মঙ্গলং ৰত্ৰাতি মঙ্গলসংযুত্তং ধম্মকথং কথেত্ৰা. জনপদকল্যাণীতি জনপদম্হি কল্যাণসমন্নাগতা. তুৰট্টং খোতি খিপ্পমেৰ. সোপীতি নন্দরাজকুমারোপি. ইতীতিআদি নিগমনং. দুতিযদিৰসেতি কপিলৰত্থুপত্তদিৰসতো দুতিযে দিৰসে. ধম্মপদঅট্ঠকথাযং (ধ. প. অট্ঠ. ১.নন্দত্থেরৰত্থু; থেরগা. অট্ঠ. ১.নন্দত্থেরগাথাৰণ্ণনা) পন ‘‘ততিযদিৰসে নন্দং পব্বাজেসী’’তি ৰুত্তং.

সত্তমে দিৰসেতি কপিলৰত্থুপত্তদিৰসতোযেৰ সত্তমে দিৰসে. এতং সমণং পস্সাতি যোজনা. ব্রহ্মরূপৰণ্ণন্তি ব্রহ্মুনো রূপসঙ্খাতো ৰণ্ণো ৰিয ৰণ্ণো ইমস্সাতি ব্রহ্মরূপৰণ্ণো, তং. অযন্তি অযং সমণো. ত্যস্সাতি তে অস্স. তেতি নিধযো. অস্সাতি সমণস্স. নন্তি সমণং. যাচাতি যাচাহি. অযং দ্ৰিকম্মিকধাতু. হীতি সচ্চং, যস্মা ৰা. পুত্তো পিতুসন্তকস্স সামিকো, ইতি তস্মা মে দেহীতি যোজনা. অনুরূপং ৰচনন্তি সম্বন্ধো. ভগৰন্তং অনুবন্ধীতি ভগৰতো পিট্ঠিতো পিট্ঠিতো অনুবন্ধি.

ন ৰিসহতীতি ন সমত্থেতি. অযং কুমারো পিতুসন্তকং যং ধনং ইচ্ছতি, তন্তি যোজনা. ৰট্টানুগতন্তি ৰট্টদুক্খং অনুগতং. সৰিঘাতকন্তি ৰিঘাতকেহি পঞ্চহি ৰেরেহি সহিতং. অস্সাতি কুমারস্স. নন্তি কুমারং. অযন্তি কুমারো. দাযজ্জন্তি দাযসঙ্খাতং মাতাপিতূনং ধনং আদদাতীতি দাযাদো, পুত্তো, তস্স ইদন্তি দাযজ্জং, মাতাপিতূনং ধনং.

‘‘কথাহং ভন্তে রাহুলকুমারং পব্বাজেমী’’তি কস্মা আহ, ননু আযস্মা সারিপুত্তো বারাণসিযং তীহি সরণগমনেহি অনুঞ্ঞাতং পব্বজ্জং ন জানাতীতি আহ ‘‘ইদানী’’তিআদি. যা সা পব্বজ্জা চ উপসম্পদা চ অনুঞ্ঞাতাতি যোজনা. ততোতি পব্বজ্জাউপসম্পদতো. উপসম্পদং পটিক্খিপিত্ৰাতি সম্বন্ধো. ৰিমতীতি ৰিৰিধা ইচ্ছা. ইমঞ্চ পনত্থন্তি ইমমেৰ ৰিমতিসঙ্খাতমত্থং. ধম্মসেনাপতি আহাতি সম্বন্ধো. ভগৰতো তং অজ্ঝাসযন্তি যোজনা.

‘‘অথ খো…পে… পব্বাজেসী’’তি এত্থ কিং কুমারস্স কেসচ্ছেদনাদীনি সব্বকিচ্চানি আযস্মা সারিপুত্তোযেৰ করোতীতি আহ ‘‘মহামোগ্গল্লানত্থেরো’’তিআদি. ওৰাদাচরিযোতি নিৰাসনপারুপনাদীসু সেখিযৰত্তেসু, আভিসমাচারিকেসু চ ওৰাদকো আচরিযো. অথ কস্মা ‘‘আযস্মা সারিপুত্তো রাহুলকুমারং পব্বাজেসী’’তি ৰুত্তন্তি আহ ‘‘যস্মা পনা’’তিআদি. তত্থাতি তস্সং পব্বজ্জাউপসম্পদাযং. ন আচরিযোতি পব্বজ্জাচরিযো চ ওৰাদাচরিযো চ ন ইস্সরো.

উপ্পন্নসংৰেগেন হদযেনাতি এত্থ ইত্থম্ভূতলক্খণে করণৰচনং. উপ্পন্নসংৰেগো হদযো হুত্ৰাতি হি যোজনা. সব্বন্তি সব্বং ৰচনং.

তত্থাতি পুরিমৰচনাপেক্খং. অৰিসেসেনাতি ‘‘ধন’’ন্তি ৰা ‘‘অঞ্ঞ’’ন্তি ৰা ‘‘সাৰজ্জ’’ন্তি ৰা ‘‘অনৰজ্জ’’ন্তি ৰা ৰিসেসমকত্ৰা সামঞ্ঞেন. ন চ বুদ্ধানন্তি এত্থ চসদ্দেন ন কেৰলং অপটিরূপমেৰ, অথ খো বুদ্ধানঞ্চ ন আচিণ্ণন্তি অত্থং দস্সেতি. যন্তি যং ৰরং. তথা নন্দেতি এত্থ তথাসদ্দস্স উপমেয্যত্থজোতকভাৰং দস্সেন্তো আহ ‘‘যথেৰ কিরা’’তিআদি. যথেৰ বোধিসত্তং ব্যাকরিংসু, এৰং নন্দম্পি রাহুলম্পি ব্যাকরিংসু কিরাতি যোজনা. পাল়িযং পন যথা ভগৰতি মে ভন্তে পব্বজিতে অনপ্পকং দুক্খং অহোসি, তথা নন্দে পব্বজিতে অনপ্পকং দুক্খং অহোসি, তথা রাহুলে পব্বজিতে অধিমত্তং দুক্খং অহোসীতি যোজনা. নেমিত্তকাতি সুভাসুভনিমিত্তং কথেন্তীতি নেমিত্তকা. পুত্তস্সাতি জেট্ঠপুত্তস্স সিদ্ধত্থকুমারস্স. পব্বজ্জাযাতি পব্বজ্জাহেতু পব্বজ্জাকারণা, পব্বজ্জানিমিত্তং ৰা. ততোতি ভগৰতো পব্বজ্জতো. তম্পীতি নন্দম্পি. ইতীতি ঈদিসং. ভগৰতো পব্বজ্জায মহন্তং ইচ্ছাৰিঘাতসদিসন্তি অত্থো. তম্পীতি রাহুলম্পি. তেনাতি পব্বজ্জাহেতুনা. অস্সাতি রঞ্ঞো. উপ্পজ্জীতি সম্বন্ধো. ইতোতি সোকুপ্পত্তিতো ৰরযাচনতো ৰা.

সোতি রাজা. যত্র হি নামাতি যো নাম. অহম্পি নাম যো যাদিসো বুদ্ধমামকো ধম্মমামকো সঙ্ঘমামকো সমানো, সো তাদিসো অহম্পি ন সক্কোমীতি যোজনা. অঞ্ঞেতি মযা অপরে. দুক্খন্তি ঞাতিৰিযোগদুক্খং. নিয্যানিককারণন্তি মনুস্সানং গরহউপৰাদঅক্কোসতো নিয্যানিকং কারণং.

তত্থাতি ‘‘অননুঞ্ঞাতো’’তিআদিৰচনে. জনেতীতি জননী, মাতা. জনেতীতি জনকো, পিতা. ইমিনা পোসাৰনিকমাতাপিতরো নিৰত্তেতি. মাতা ৰা মতা হোতীতি যোজনা. সো এৰ ৰাতি পুত্তো এৰ ৰা. অনুঞ্ঞাতোম্হীতি ৰদতীতি সচ্চেন ৰা অলিকেন ৰা ‘‘অনুঞ্ঞাতোম্হী’’তি ৰদতি. মাতা ৰা সযং পব্বজিতাতি যোজনা. পিতস্সাতি পিতা অস্স. অস্সাতি পুত্তস্স. ৰিপ্পৰুত্থোতি মাতুযা কেনচি কারণেন পৰাসো.

চূল়মাতাদীনন্তিআদিসদ্দেন মহামাতাদীনি সঙ্গণ্হাতি. পোসনকাতি ৰড্ঢনকা. তেসুপীতি পোসনকমাতাপিতরেসুপি.

যং পন পুত্তং নানুজানন্তীতি সম্বন্ধো. জীৰস্সেৰাতি তস্স জীৰস্স এৰ, পব্বাজেন্তস্স ৰা ভিক্খুস্স, ন দেসন্তরগমনাদীনমত্থাযাতি অত্থো. তেসন্তি মাতাপিতূনং.

মহাকন্তারোতি কেন উদকেন তরিতব্বোতি কন্তারো, নিরুদককন্তারোৰ মুখ্যতো লব্ভতি, ৰাল়কন্তারো চোরকন্তারো অমনুস্সকন্তারো দুব্ভিক্খকন্তারো মরুকন্তারোতি ইমে পঞ্চ কন্তারা রূল়্হীৰসেন. মহন্তো কন্তারো মহাকন্তারো.

যাৰতকেতি এত্থ যাৰসদ্দো পমাণত্থোতি আহ ‘‘যত্তকে’’তি.