৩৫. কম্মারভণ্ডুৰত্থুআদিকথা

৯৮. তুলাধারমুণ্ডকোতি মানভণ্ডধারো মুণ্ডকো. ইমিনা কম্মারভণ্ডূতি এত্থ কম্মারসদ্দো তুলাধারপরিযাযো, ভণ্ডুসদ্দো মুণ্ডকপরিযাযোতি দস্সেতি. তুলাধারো হি অলঙ্কারৰিকতিকরণত্থায কম্মং অরতি জানাতীতি কম্মারোতি ৰুচ্চতি. মুণ্ডকো ভণ্ডীযতি ‘‘মুণ্ডো’’তি পরিভাসীযতীতি ভণ্ডূতি ৰুচ্চতি. ‘‘সুৰণ্ণকারপুত্তো’’তি ইমিনা তস্স সরূপং দস্সেতি. অপলোকেতুন্তি এত্থ অপপুব্বো লোকসদ্দো আপুচ্ছনত্থোতি আহ ‘‘আপুচ্ছিতু’’ন্তি. ‘‘ভণ্ডুকম্মত্থাযা’’তি ইমিনা ভণ্ডুকম্মাযাতি এত্থ তদত্থে চতুত্থীতি দস্সেতি. তত্রাতি ‘‘সঙ্ঘং অপলোকেতু’’ন্তিআদিৰচনে. সীমাপরিযাপন্নেতি ৰিহারসীমায ৰা উপচারসীমায ৰা পরিযাপন্নে. তত্থাতি ভিক্খূনং সন্নিপাতট্ঠানং. এত্থ চাতি আপুচ্ছনে চ. ৰত্তুং ৰট্টতিযেৰাতি পঞ্চসু ৰাক্যেসু যংকিঞ্চি ৰাক্যং কথেতুং ৰট্টতিযেৰ. পিসদ্দেন ‘‘ইমস্স মুণ্ডকম্মং আপুচ্ছামী’’তি ৰাক্যম্পি সঙ্গণ্হাতি.

তেসন্তি ৰীসতিআদীনং ভিক্খূনং. ‘‘দহরভিক্খূ ৰা সামণেরে ৰা’’তি ইদং আসন্নৰসেন ৰুত্তং. গিহিম্পি পেসেত্ৰা আপুচ্ছাপেতুং ৰট্টতি. কস্মা? ‘‘পব্বজ্জাপেক্খং ৰিনা ৰা’’তি ৰুত্তত্তা.

পব্বাজেন্তস্স অনাপত্তিযেৰ, সুপব্বজিতোতি আহ ‘‘পব্বাজেন্তস্সাপি অনাপত্তী’’তি.

আপুচ্ছিতং পগেৰাতি যোজনা. খণ্ডসীমাযন্তি ৰিহারসীমায ৰা উপচারসীমায ৰা অব্ভন্তরে ঠিতাযং খণ্ডসীমাযং. যো পনাতি পব্বজ্জাপেক্খো পন. ৰিব্ভন্তকো ৰাতি নৰৰিব্ভন্তকো ৰা. পব্বজিতানং দ্ৰঙ্গুলকেসো ৰট্টতীতি আহ ‘‘দ্ৰঙ্গুলকেসো ৰা’’তি. দ্ৰীহি অঙ্গুলীহি অতিরিত্তো কেসো ইমস্সাতি দ্ৰঙ্গুলাতিরিত্তকেসো. একসিখামত্তধরোপি হোতীতি যোজনা.

১০০. মারব্যাধিনাতি মারণাবাধো. সো হি সত্তানং মারণট্ঠেন, ৰিৰিধস্স চ দুক্খস্স আদহট্ঠেন মারব্যাধীতি ৰুচ্চতি. ইমিনা অহিৰাতকরোগেনাতি এত্থ অহিৰিসসদিসেন ৰাতেন পৰত্তো রোগো অহিৰাতকরোগোতি ৰুচ্চতীতি দস্সেতি. তমত্থং ৰিত্থারেন্তো আহ ‘‘যত্র হী’’তিআদি. তত্থ যত্রাতি যস্মিং কুলে. সো রোগো তস্মিং কুলে দ্ৰিপদে চতুপ্পদে পঠমং গণ্হাতি, পচ্ছা গেহসামিকে গণ্হাতীতি ধম্মপদঅট্ঠকথাযং (ধ. প. অট্ঠ. ১.সামাৰতীৰত্থু) ৰুত্তং. তথাতি যথা অঞ্ঞো ভিত্তিং ৰা ছদনং ৰা ভিন্দিত্ৰা পলাযিত্ৰা তিরোগামাদিগতো ৰা হুত্ৰা মুচ্চতি, তথা. এত্থ চ কুলে পিতাপুত্তা মুচ্চিংসূতি অত্থো.

কাকুড্ডেপকন্তি এত্থ কাকে উড্ডাপেতীতি কাকুড্ডেপকো, কাকে ৰা উড্ডাপেত্ৰা ভত্তং ভুঞ্জিতুং সক্কোতীতি কাকুড্ডেপকোতি ৰচনত্থং দস্সেন্তো আহ ‘‘যো ৰামহত্থেনা’’তিআদি. তত্থ উড্ডাপেত্ৰাতি উদ্ধং আকাসং গমনাপেত্ৰা. তন্তি কাকুড্ডেপকং.

১০২. ইত্তরসদ্দো অপ্পমত্তকৰাচকো অনিপ্ফন্নপাটিপদিকোতি আহ ‘‘অপ্পমত্তকো’’তি. ‘‘কতিপাহমেৰা’’তি ইমিনা তস্স অত্থং দস্সেতি.