৩৩. ইণাযিকৰত্থুকথা

৯৬. ইণাযিকো নামাতি এত্থ ইণন্তি উদ্ধারো. সো হি যস্মা এতি ৰুদ্ধিং গচ্ছতি, তস্মা ইণন্তি ৰুচ্চতি. তং গণ্হাতি, ধারেতীতি ৰা ইণাযিকো. যং ৰাতি জনং ৰা আঠপেত্ৰাতি সম্বন্ধো. আঠপেত্ৰাতি চ পেসনত্থায ধনসামিকস্স সন্তিকে ঠপেত্ৰাতি অত্থো. আকারো হি পেসনত্থৰাচকো. সোপীতি পিসদ্দো পুরিমজনে অপেক্খতি. ‘‘ধারেতী’’তি ইমিনা আযিকপচ্চযো ধারণত্থে হোতীতি দস্সেতি. অঞ্ঞেতি মাতাপিতূহি অঞ্ঞে. হীতি সচ্চং, যস্মা ৰা. তেতি অঞ্ঞে ঞাতকা, তং আঠপেতুং যস্মা ন ইস্সরা, তস্মা ন ইণাযিকোতি যোজনা. ইতরন্তি নইণাযিকতো অঞ্ঞং. অস্সাতি জনস্স. নন্তি তং জনং. তেসূতি ঞাতিসালোহিতাদীসু. তথারূপস্সাতি অত্তনো ঞাতিসালোহিতস্সাতি অত্থো. আরোচেতব্বাকারং দস্সেন্তো আহ ‘‘সহেতুকো’’তিআদি. তত্থ সহেতুকোতি ভব্বো. সোতি উপট্ঠাকো. পটিপজ্জতীতি পটিদদাতি. এতন্তি কপ্পিযভণ্ডং. অজানিত্ৰাতি ইণাযিকভাৰমজানিত্ৰা. পস্সন্তেনাতি ইণাযিকং পস্সন্তেন. ‘‘অপস্সন্তস্স গীৰা ন হোতী’’তি ইমিনা পস্সিত্ৰা অদস্সেন্তস্স গীৰা হোতীতি দস্সেতি.

পুচ্ছিযমানোপীতি ‘‘কিং ত্ৰং ইণাযিকোসী’’তি পুচ্ছিযমানোপি. তন্তি ইণাযিকং. তত্থাতি অঞ্ঞস্মিং দেসে. তন্তি ইণসামিকং. সোতি ইণসামিকো. অযন্তি ইণাযিকো. অযন্তি ৰচনা. তত্থাতি ইণাযিকস্স পব্বাজনে. সামীচীতি অনুধম্মতা.

নন্তি ইণাযিকং. সোতি ইণসামিকো. অস্সাতি থেরস্স. গীৰা ন হোতীতি সম্বন্ধো. অচ্ছতূতি আসতু উপৰেসতূতি অত্থো. সোতি ইণাযিকো. ঈদিসোতি সহেতুকো ৰত্তসম্পন্নোতি অত্থো. অতিআরাধকোতি ৰত্তাচারেন থেরস্স অতিতোসকো.