২৭. রাজভটৰত্থুকথা

৯০. উচ্চিনথাতি এত্থ চিধাতুযা ৰড্ঢনত্থং দস্সেন্তো আহ ‘‘ৰড্ঢেথা’’তি. সোতাপন্নত্তাতি বিম্বিসাররঞ্ঞো =০৮ সোতাপন্নভাৰতো. ঘাতেথাতি জীৰিতা ৰোরোপেথ. হনথাতি পহরথ. ততোতি উপজ্ঝাযতো. আচরিযো সেট্ঠোতি সম্বন্ধো. ততোতি আচরিযতো. ইদন্তি ৰচনং, আগতন্তি সম্বন্ধো. আহংসু ৰোহারিকা মহামত্তা মুসাৰাদেনাতি যোজনা. অমচ্চোতি সব্বরাজকিচ্চেসু অমা সহ রঞ্ঞা ভৰতীতি অমচ্চো. অমাসদ্দো সহত্থে নিপাতো. ‘‘অমা’’তি নিপাততো ভৰত্থে অচ্চপচ্চযো (মোগ্গল্লানে ৪.২৩ সুত্তে). মহামত্তোতি মহন্তো মত্তা ইস্সরিযা এতস্সাতি মহামত্তো. মত্তাসদ্দো হেত্থ ইস্সরিযৰাচকো. সেৰকোতি রাজানং সেৰতি ভজতীতি সেৰকো. ভত্তৰেতনভটোতি ভত্তৰেতনানমত্থায ভটো. তস্সাতি রাজভটস্স. পুত্তনত্তভাতুকাদযোতিআদিসদ্দেন ভাগিনেয্যাদযো সঙ্গণ্হাতি. যো পনাতি রাজভটো পন. নিয্যাতেতীতি অপ্পেতি. তং ঠানন্তি তং রাজভটট্ঠানং. যেন ৰাতি কম্মকারেন ৰা. যংকম্মকারণাতি যস্স কম্মস্স কারণা. যো ৰাতি রাজভটো ৰা. পব্বজস্সূতি পব্বাজেহি.