৬. ছট্ঠনিস্সগ্গিযপাচিত্তিযসিক্খাপদং

৭৫৮. ছট্ঠে ছন্দং উপ্পাদেত্ৰা গহিতং ছন্দকন্তি ৰচনত্থং দস্সেন্তো আহ ‘‘ছন্দক’’ন্তিআদি. ধম্মকিচ্চন্তি পুঞ্ঞকরণীযং. ধম্মসদ্দো হেত্থ পুঞ্ঞৰাচকো. যন্তি ৰত্থুং. পরেসন্তি অত্তনা অঞ্ঞেসং. ‘‘এত’’ন্তি ‘‘ছন্দক’’ন্তি এতং নামং. ‘‘অঞ্ঞস্সত্থায দিন্নেনা’’তিইমিনা অঞ্ঞস্স অত্থো অঞ্ঞদত্থো, দকারো পদসন্ধিকরো, তদত্থায দিন্নো অঞ্ঞদত্থিকোতি ৰচনত্থং দস্সেতি. ‘‘অঞ্ঞং উদ্দিসিত্ৰা দিন্নেনা’’তিইমিনা অঞ্ঞং উদ্দিসিত্ৰা দিন্নং অঞ্ঞুদ্দিসিকন্তি ৰচনত্থং দস্সেতি. ‘‘সঙ্ঘস্স পরিচ্চত্তেনা’’তি ইমিনা সঙ্ঘস্স পরিচ্চত্তো সঙ্ঘিকোতি ৰচনত্থং দস্সেতি.

৭৬২. যদত্থাযাতি যেসং চীৰরাদীনং অত্থায. যসদ্দেন সমাসভাৰতো পুব্বে নিগ্গহিতাগমো হোতি. তন্তি চীৰরাদিকং. তুম্হেহীতি দাযকে সন্ধায ৰুত্তং. উপদ্দৰেসূতি দুব্ভিক্খাদিউপসগ্গেসু. যং ৰা তং ৰাতি চীৰরং ৰা অঞ্ঞে ৰা পিণ্ডপাতাদিকেতি যং ৰা তং ৰাতি. ছট্ঠং.