৪. চতুত্থনিস্সগ্গিযপাচিত্তিযসিক্খাপদং

৭৪৮. চতুত্থে কিণাতি অনেনাতি কযন্তি ৰচনত্থেন মূলং কযং নামাতি আহ ‘‘মূলেনা’’তি. সাতি থুল্লনন্দা, আহ কিরাতি সম্বন্ধো. ঞাধাতুযা অৰবোধনত্থতো অঞ্ঞম্পি ঞাধাতুযা যাচনত্থং দস্সেন্তো আহ ‘‘যাচিত্ৰা ৰা’’তি.

৭৫২. যন্তি সব্বিতেলাদি. তঞ্ঞেৰাতি সব্বিতেলাদিমেৰ. যমকন্তি সব্বিং সহ তেলেন যুগল়ং কত্ৰা. ৰেজ্জেনাতি ভিসক্কেন. সো হি আযুব্বেদসঙ্খাতং ৰিজ্জং জানাতীতি ৰেজ্জোতি চ রোগঞ্চ তস্স নিদানঞ্চ ভেসজ্জঞ্চ ৰিদতি জানাতীতিপি ৰেজ্জোতি চ ৰুচ্চতি. ততোতি ৰেজ্জেন ৰুত্তকারণা. কহাপণস্সাতি কহাপণেন, আভতন্তি সম্বন্ধোতি. চতুত্থং.