১. পঠমনিস্সগ্গিযপাচিত্তিযসিক্খাপদ-অত্থযোজনা

তিংস নিস্সগ্গিযা যে ধম্মা ভিক্খুনীনং ভগৰতা পকাসিতা, তেসং ধম্মানং দানি ইমস্মিং কালে অযং সংৰণ্ণনাক্কমো ভৰতীতি যোজনা.

৭৩৩. পঠমে আমত্তিকাপণন্তি এত্থ আমত্তসদ্দো ভাজনপরিযাযোতি আহ ‘‘ভাজনানী’’তি. ভাজনানি হি অমন্তি পরিভুঞ্জিতব্বভাৰং গচ্ছন্তীতি ‘‘অমত্তানী’’তি ৰুচ্চন্তি. অমত্তানি ৰিক্কিণন্তীতি ‘‘আমত্তিকা’’তি ৰচনত্থং দস্সেন্তো আহ ‘‘তানী’’তিআদি. তেসন্তি আমত্তিকানং. তং ৰাতি আমত্তিকাপণং ৰা.

৭৩৪. ‘‘সন্নিধি’’ন্তি ইমিনা সংনিপুব্বো চিসদ্দো উচিননত্থোতি দস্সেতি. হিসদ্দো ৰিসেসজোতকো. তত্থাতি মহাৰিভঙ্গে. ইধাতি ভিক্খুনিৰিভঙ্গে.

ইদম্পীতি ইদং সিক্খাপদম্পি. পিসদ্দো মহাৰিভঙ্গসিক্খাপদং অপেক্খতীতি. পঠমং.