৯. রতনৰগ্গো

১. অন্তেপুরসিক্খাপদ-অত্থযোজনা

৪৯৪. রাজৰগ্গস্স পঠমে পরিত্তকোতি গুণেন খুদ্দকো. পাসাদৰরসদ্দস্স উপরিসদ্দেন সম্বন্ধিতব্বভাৰং দস্সেতুং ৰুত্তং ‘‘পাসাদৰরস্স উপরি গতো’’তি. ইমিনা পাসাদৰরস্স উপরি উপরিপাসাদৰরং, তং গতো উপগতোতি উপরিপাসাদৰরগতোতি ৰচনত্থং দস্সেতি. অয্যানন্তি ভিক্খূনং. ‘‘কারণা’’তি ইমিনা ‘‘ৰাহসা’’তি পদস্সত্থং দস্সেতি. তেহীতি অয্যেহি.

৪৯৭. অন্তরন্তি খণং, ওকাসং ৰা ৰিৰরং ৰা. ঘাতেতুন্তি হনিতুং. ইচ্ছতীতি ইমিনা পত্থধাতুযা যাচনত্থং দস্সেতি. ‘‘রাজন্তেপুরং হত্থিসম্মদ্দ’’ন্তিআদীসু ৰচনত্থো এৰং ৰেদিতব্বোতি যোজনা. হত্থিসম্মদ্দন্তি হত্থিসম্বাধট্ঠানং. অস্সেহি সম্মদ্দো এত্থাতি অস্সসম্মদ্দো. রথেহি সম্মদ্দো এত্থাতি রথসম্মদ্দোতি ৰচনত্থং অতিদিসন্তো আহ ‘‘এসেৰ নযো’’তি. ‘‘সম্মত্ত’’ন্তি পঠমক্খরেন পাঠস্স সম্বাধস্স অৰাচকত্তা ৰুত্তং ‘‘তং ন গহেতব্ব’’ন্তি. তত্থাতি পাঠে. ‘‘হত্থীনং সম্মদ্দ’’ন্তি ইমিনা উত্তরপদস্স সম্মদ্দনং সম্মদ্দন্তি ভাৰত্থং দস্সেতি, পুরিমপদেন ছট্ঠীসমাসঞ্চ. পুরিমপাঠে পন উত্তরপদস্স অধিকরণত্থঞ্চ পুব্বপদেন ততিযাসমাসঞ্চ দস্সেতি. বাহিরত্থসমাসোতিপি ৰুচ্চতি. পচ্ছিমপাঠে ‘‘হত্থিসম্মদ্দ’’ন্তিআদিপদস্স লিঙ্গৰিপল্লাসঞ্চ ‘‘অত্থী’’তি পাঠসেসেন যোজেতব্বতঞ্চ দস্সেতুং ৰুত্তং ‘‘হত্থিসম্মদ্দো অত্থী’’তি. রজিতব্বানীতি রজনীযানি, রজিতুং অরহানীতি অত্থো. ইমিনা সম্বন্ধকালে পুরিমপাঠে রঞ্ঞো অন্তেপুরেতি ৰিভত্তিৰিপল্লাসো কাতব্বোতি. পচ্ছিমপাঠে পন মুখ্যতোৰ যুজ্জতি. তেন ৰুত্তং ‘‘তস্মিং অন্তেপুরে’’তি.

৪৯৮. অৰসিত্তস্সাতি খত্তিযাভিসেকেন অভিসিত্তস্স. ইতোতি সযনিঘরতো. ইমিনা পঞ্চমীবাহিরসমাসং দস্সেতি. রঞ্ঞো রতিজননট্ঠেন রতনং ৰুচ্চতি মহেসী. মহেসীতি চ সাভিসেকা দেৰী. নিপুব্ব গমুধাতুস্স নিপুব্বকমুধাতুযা পরিযাযভাৰং দস্সেতুং ৰুত্তং ‘‘নিগ্গতন্তি নিক্খন্ত’’ন্তি. পঠমং.

২. রতনসিক্খাপদং

৫০২. দুতিযে পমুস্সিত্ৰাতি সতিৰিপ্পৰাসেন পমুস্সিত্ৰা. পুণ্ণপত্তন্তি তুট্ঠিদাযং. তঞ্হি মনোরথপুণ্ণেন পত্তব্বভাগত্তা ‘‘পুণ্ণপত্ত’’ন্তি ৰুচ্চতি. তস্স সরূপং দস্সেতুং ৰুত্তং ‘‘সততো পঞ্চ কহাপণা’’তি. ইধ পন কহাপণানং পঞ্চসতত্তা পঞ্চৰীসকহাপণা অধিপ্পেতা. আভরণসদ্দস্স অলঙ্কারসদ্দেন পরিযাযভাৰং দস্সেতুং ৰুত্তং ‘‘অলঙ্কার’’ন্তি. ‘‘মহালতং নামা’’তি ইমিনা ন যো ৰা সো ৰা অলঙ্কারো, অথ খো ৰিসেসালঙ্কারোতি দস্সেতি. মহন্তানি মালাকম্মলতাকম্মানি এত্থাতি মহালতা. লতাগহণেন হি মালাপি গহিতা. নৰহি কোটীহি অগ্ঘং ইমস্সাতি নৰকোটিঅগ্ঘনকং, নৰকোটিসঙ্খাতং অগ্ঘং অরহতীতি ৰা নৰকোটিঅগ্ঘনকং.

৫০৪. অন্তে সমীপে ৰসনসীলত্তা পরিচারিকো ‘‘অন্তেৰাসী’’তি ৰুচ্চতীতি আহ ‘‘পরিচারিকো’’তি.

৫০৬. দ্ৰে লেড্ডুপাতাতি থামমজ্ঝিমস্স পুরিসস্স দ্ৰে লেড্ডুপাতা. সঙ্ঘ…পে… নৰকম্মানং অত্থায উগ্গণ্হন্তস্স ৰা উগ্গণ্হাপেন্তস্স ৰা দুক্কটন্তি যোজনা. অৰসেসন্তি জাতরূপরজততো অৰসেসং. মাতুকণ্ণপিল়ন্ধনতালপণ্ণম্পীতি মাতুযা কণ্ণে পিল়ন্ধিততালপণ্ণম্পি, পটিসামেন্তস্সাতি সম্বন্ধো.

‘‘কপ্পিযভণ্ডং হোতী’’তি ইমিনা অকপ্পিযভণ্ডং ন ৰট্টতীতি দস্সেতি. ইদন্তি ভণ্ডং. পলিবোধো নামাতি অত্তনো পলিবোধো নাম. ছন্দেনপীতি ৰড্ঢকীআদীনং ছন্দহেতুনাপি. ভযেনপীতি রাজৰল্লভানং ভযহেতুনাপি. বলক্কারেনাতি করণং কারো, বলেন কারো বলক্কারো, তেন, বলক্কারো হুত্ৰা পাতেত্ৰাতি অত্থো.

তত্থাতি মহারামে. যত্থাতি যস্মিং ঠানে, সঙ্কা উপ্পজ্জতীতি সম্বন্ধো. মহাজনসঞ্চরণট্ঠানেসূতি বহূনং জনানং সঞ্চরণসঙ্খাতেসু ঠানেসু. নগহেতব্বস্স হেতুং দস্সেতুং ৰুত্তং ‘‘পলিবোধো ন হোতী’’তি. যস্মা পলিবোধো ন হোতি, তস্মা ন গহেতব্বন্তি অধিপ্পাযো. একোতি একো ভিক্খু পস্সতীতি সম্বন্ধো. ওক্কম্মাতি ওক্কমিত্ৰা.

রূপসদ্দো ভণ্ডপরিযাযোতি আহ ‘‘ভণ্ড’’ন্তি. ভণ্ডং রূপং নামাতি যোজনা. ভণ্ডিকন্তি ভণ্ডেন নিযুত্তং পুটকং. গণেত্ৰাতি গণনং কত্ৰা. নিমিত্তন্তীতি এত্থ ইতিসদ্দো নামপরিযাযো. লঞ্ছনাদি নিমিত্তং নামাতি হি যোজনা. লঞ্ছনাদীতি আদিসদ্দেন নীলপিলোতিকাদযো সঙ্গণ্হাতি. লাখাযাতি জতুনা.

পতিরূপা নাম ইধ লজ্জিকুক্কুচ্চকাতি আহ ‘‘লজ্জিনো কুক্কুচ্চকা’’তি. থাৰরন্তি জঙ্গমা অঞ্ঞং থাৰরং. অদ্ধুনোতি কালস্স. সমাদপেত্ৰাতি অঞ্ঞে সমাদপেত্ৰা. উদ্দিস্স অরিযা তিট্ঠন্তি, এসা অরিযান যাচনা’’তি (জা. ১.৭.৫৯) ৰুত্তনযেন যাচিত্ৰাতি অত্থো.

৫০৭. রতনসম্মতন্তি মনুস্সানং উপভোগপরিভোগন্তি. দুতিযং.

৩. ৰিকালগামপ্পৰিসনসিক্খাপদং

৫০৮. ততিযে ‘‘তিরচ্ছানভূতং কথ’’ন্তি ইমিনা ‘‘তিরচ্ছানকথ’’ন্তি পদস্স তুল্যনিস্সিতসমাসং দস্সেতি. রাজপটিসংযুত্তন্তি রাজূহি পটিসংযুত্তং.

৫১২. সম্বহুলা ভিক্খূতি সম্বন্ধো. তস্মিং গামেতি তস্মিং পঠমপৰিসনগামে. তং কম্মন্তি তং ইচ্ছিতকম্মং. অন্তরাতি গামৰিহারানমন্তরে. ভুম্মত্থে চেতং নিস্সক্কৰচনং.

কুলঘরে ৰাতি ঞাতিকুলউপট্ঠাককুলঘরে ৰা. তেলভিক্খায ৰাতি তেলযাচনত্থায ৰা. পস্সেতি অত্তনো পস্সে সমীপেতি ৰুত্তং হোতি. তেনাতি গামমজ্ঝমগ্গেন. অনোক্কম্মাতি অনোক্কমিত্ৰা, অপক্কমিত্ৰাতি অত্থোতি. ততিযং.

৪. সূচিঘরসিক্খাপদং

৫১৭. চতুত্থে ককারস্স পদপূরণভাৰং দস্সেতুং ৰুত্তং ‘‘ভেদনমেৰ ভেদনক’’ন্তি. অস্সত্থিঅত্থে অপচ্চযোতি আহ ‘‘তং অস্স অত্থী’’তি. অস্সাতি পাচিত্তিযস্স. পঠমং সূচিঘরং ভিন্দিত্ৰা পচ্ছা পাচিত্তিযং দেসেতব্বন্তি অত্থো. অরণিধনুকেতি অরণিযা ধনুকে. ৰেধকেতি কাযবন্ধনৰেধকেতি. চতুত্থং.

৫. মঞ্চসিক্খাপদং

৫২২. পঞ্চমে ছেদনমেৰ ছেদনকং, তমস্সত্থীতি ছেদনকন্তি অত্থং সন্ধায ৰুত্তং ‘‘ৰুত্তনযমেৰা’’তি.

নিখণিত্ৰাতি পমাণাতিরেকং নিখণিত্ৰা. উত্তানং ৰা কত্ৰাতি হেট্ঠুপরি পরিৰত্তনং ৰা কত্ৰা. ঠপেত্ৰাতি লম্বণৰসেন ঠপেত্ৰাতি. পঞ্চমং.

৬. তূলোনদ্ধসিক্খাপদং

৫২৬. ছট্ঠে এত্থাতি মঞ্চপীঠে. অৰনহিতব্বন্তি ওনদ্ধং, তূলেন ওনদ্ধং তূলোনদ্ধন্তি অত্থোপি যুজ্জতি. তূলং পক্খিপিত্ৰাতি মঞ্চপীঠে চিমিলিকং পত্থরিত্ৰা তস্সুপরি তূলং পক্খিপিত্ৰাতি অত্থোতি. ছট্ঠং.

৭. নিসীদনসিক্খাপদং

৫৩১. সত্তমে কত্থাতি কিস্মিং খন্ধকে, কিস্মিং ৰত্থুস্মিং ৰা. হীতি সচ্চং. তত্থাতি চীৰরক্খন্ধকে, পণীতভোজনৰত্থুস্মিং ৰা. ‘‘যথা নামা’’তি ইমিনা ‘‘সেয্যথাপী’’তি পদস্স অত্থং দস্সেতি, ‘‘পুরাণো চম্মকারো’’তি ইমিনা ‘‘পুরাণাসিকোট্ঠো’’তি পদস্স. চম্মকারো হি অসিনা চম্মং কুটতি ছিন্দতীতি ‘‘অসিকোট্ঠো’’তি ৰুচ্চতি. ৰত্থুপ্পন্নকালমুপনিধায ৰুত্তং ‘‘পুরাণো’’তি. তমেৰূপমং পাকটং করোন্তো আহ ‘‘যথা হী’’তি. হীতি তপ্পাকটীকরণং, তং পাকটং করিস্সামীতি হি অত্থো. চম্মকারো কড্ঢতীতি সম্বন্ধো. ৰিত্থতন্তি ৰিসালং. সোপীতি উদাযীপি. তং নিসীদনং কড্ঢতীতি যোজনা. তেনাতি কড্ঢনহেতুনা. তন্তি উদাযিং. সন্থতসদিসন্তি সন্থতেন সদিসং. একস্মিং অন্তেতি একস্মিং কোট্ঠাসে, ফালেত্ৰাতি সম্বন্ধোতি. সত্তমং.

৮. কণ্ডুপটিচ্ছাদিসিক্খাপদং

৫৩৭. অট্ঠমে ‘‘কত্থা’’তিআদীনি ৰুত্তনযানেৰ.

৫৩৯. ‘‘যস্সা’’তি পদস্স ৰিসযং দস্সেতুং ৰুত্তং ‘‘ভিক্খুনো’’তি. ‘‘নাভিযা হেট্ঠা’’তি ইমিনা নাভিযা অধো অধোনাভীতি ৰচনত্থং দস্সেতি, ‘‘জাণুমণ্ডলানং উপরী’’তি ইমিনা জাণুমণ্ডলানং উব্ভ উব্ভজাণুমণ্ডলন্তি. উব্ভসদ্দো হি উপরিপরিযাযো সত্তম্যন্তনিপাতো. কণ্ডুখজ্জুসদ্দানং ৰেৰচনত্তা ৰুত্তং ‘‘কণ্ডূতি খজ্জূ’’তি. কণ্ডতি ভেদনং করোতীতি কণ্ডু. খজ্জতি ব্যধনং করোতীতি খজ্জু. কেসুচি পোত্থকেসু ‘‘কচ্ছূ’’তি পাঠো অত্থি, সো অযুত্তো.

লোহিতং তুণ্ডং এতিস্সাতি লোহিততুণ্ডিকা. পিল়যতি ৰিবাধযতীতি পিল়কা. আ ভুসো অসুচিং সৰতি পগ্ঘরাপেতীতি অস্সাৰোতি ৰচনত্থং দস্সেন্তো আহ ‘‘অসুচিপগ্ঘরণ’’ন্তি. অরিসঞ্চ ভগন্দরা চ মধুমেহো চ. আদিসদ্দেন দুন্নামকাদযো সঙ্গণ্হাতি. তত্থ অরি ৰিয ঈসতি অভিভৰতীতি অরিসং. ভগং ৰুচ্চতি ৰচ্চমগ্গং, তং দরতি ফালেতীতি ভগন্দরা, গূথসমীপে জাতো ৰণৰিসেসো. মধু ৰিয মুত্তাদিং মিহতি সেচতীতি মধুমেহো, সো আবাধো মুত্তমেহো সুক্কমেহো রত্তমেহোতি অনেকৰিধো. থুল্লসদ্দো মহন্তপরিযাযোতি আহ ‘‘মহা’’তি. অট্ঠমং.

৯. ৰস্সিকসাটিকসিক্খাপদং

৫৪২. নৰমে ৰস্সে ৰস্সকালে অধিট্ঠাতব্বাতি ৰস্সিকা, ৰস্সিকা চ সা সাটিকা চেতি ৰস্সিকসাটিকাতি. নৰমং.

১০. নন্দত্থেরসিক্খাপদং

৫৪৭. দসমে ‘‘চতূহি অঙ্গুলেহী’’তি ইমিনা চতুরো অঙ্গুলা চতুরঙ্গুলাতি অসমাহারদিগুং দস্সেতি. ঊনকপ্পমাণোতি ভগৰতো লামকপমাণো. ইমিনা ওমকসদ্দস্স লামকত্থং দস্সেতীতি দট্ঠব্বন্তি. দসমং.

রতনৰগ্গো নৰমো.

ইতি সমন্তপাসাদিকায ৰিনযসংৰণ্ণনায

খুদ্দকৰণ্ণনায যোজনা সমত্তা.