৬. পাটিদেসনীযকণ্ডং

১. পঠমপাটিদেসনীযসিক্খাপদ-অত্থযোজনা

খুদ্দকানং অনন্তরা পাটিদেসনীযা যে ধম্মা সঙ্গীতিকারেহি ঠপিতা, ইদানি তেসং ধম্মানং অযং ৰণ্ণনা ভৰতীতি যোজনা.

৫৫২. পঠমপাটিদেসনীযে তাৰ অত্থো এৰং ৰেদিতব্বোতি যোজনা. পটিআগমনকালেতি পিণ্ডায চরণট্ঠানতো পক্কমিত্ৰা, পটিনিৰত্তিত্ৰা ৰা আগমনকালে. সব্বেৰাতি এত্থ নিগ্গহীতলোপৰসেন সন্ধি হোতীতি আহ ‘‘সব্বমেৰা’’তি. ‘‘কম্পমানা’’তি ইমিনা পপুব্বৰিধধাতুযা কম্পনত্থং দস্সেতি. অপেহীতি এত্থ অপপুব্বইধাতু গত্যত্থোতি আহ ‘‘অপগচ্ছা’’তি.

৫৫৩. পটিদেসেতব্বাকারং দস্সেতি অনেনাতি পটিদেসেতব্বাকারদস্সনং. দ্ৰিন্নং সদ্দানং পরিযাযভাৰং দস্সেতুং ৰুত্তং ‘‘রথিকাতি রচ্ছা’’তি. রথস্স হিতা রথিকা. ণ্যপচ্চযে কতে ‘‘রচ্ছা’’তি (মোগ্গল্লানে ৪.৭২ সুত্তে) ৰুচ্চতি. রচ্ছন্তরেন অনিব্বিদ্ধা রচ্ছা ব্যূহো নামাতি আহ ‘‘অনিব্বিজ্ঝিত্ৰা’’তিআদি. ব্যূহেতি সম্পিণ্ডেতি জনে অঞ্ঞত্থ গন্তুমপদানৰসেনাতি ব্যূহো. সিঙ্ঘাটকং নাম মগ্গসন্ধীতি আহ ‘‘মগ্গসমোধানট্ঠান’’ন্তি. সিঙ্ঘতি মগ্গসমোধানং করোতি এত্থাতি সিঙ্ঘাটকং. এতেসূতি রথিকাদীসু. এসেৰ নযোতি দুক্কটপাটিদেসনীযে অতিদিসতি. হীতি সচ্চং. ‘‘ৰচনতো’’তি পদং ‘‘ৰেদিতব্বো’’তি পদে ঞাপকহেতু. দদমানায ভিক্খুনিযা ৰসেনাতি যোজনা. এত্থাতি সিক্খাপদে. তস্মাতি যস্মা অপমাণং, তস্মা.

ইদন্তি ৰচনং ৰুত্তন্তি সম্বন্ধো. সম্ভিন্নে একরসে কালিকত্তযেতি যোজনা.

৫৫৬. ‘‘দাপেতী’’তি হেতুত্থকিরিযায কারিতকত্তুকারিতকম্মানি দস্সেতুং ৰুত্তং ‘‘অঞ্ঞাতিকায অঞ্ঞেন কেনচী’’তি. অঞ্ঞেনাতি অত্তনা অঞ্ঞেন. ‘‘তায এৰ ৰা ভিক্খুনিযা অঞ্ঞেন ৰা কেনচী’’তি পদানি ‘‘পটিগ্গহাপেত্ৰা’’তিপদে কারিতকম্মানীতি. পঠমং.

২. দুতিযপাটিদেসনীযসিক্খাপদং

৫৫৮. দুতিযে পুরিমসিক্খাপদেন আপত্তি অন্তরঘরত্তাতি অধিপ্পাযো. ইমিনা সিক্খাপদেন আপত্তি ভৰেয্য ৰোসাসমানত্তাতি অধিপ্পাযো. দেন্তিযা পন নেৰ ইমিনা, ন পুরিমেন আপত্তি অঞ্ঞস্স ভত্তত্তাতি অধিপ্পাযোতি. দুতিযং.

৩. ততিযপাটিদেসনীযসিক্খাপদং

৫৬২. ততিযে ‘‘উভতো’’তি এত্থ করণত্থে তোতি আহ ‘‘দ্ৰীহী’’তি. ‘‘উভতোপসন্ন’’ন্তি ব্যাসোপি সমাসোপি যুত্তোযেৰ, সমাসে তোপচ্চযস্স অলোপো হোতি. ‘‘উভতো’’তিপদস্স সরূপং দস্সেতুং ৰুত্তং ‘‘উপাসকেনপি উপাসিকাযপী’’তি. কস্মা উভতো পসন্নং হোতীতি আহ ‘‘তস্মিং কিরা’’তিআদি. যস্মা তস্মিং কুলে…পে… সোতাপন্নাযেৰ হোন্তি কির, তস্মা ‘‘উভতোপসন্ন’’ন্তি ৰুত্তং হোতি. ‘‘সচেপী’’তি এত্থ পিসদ্দেন অসীতিকোটিধনতো অধিকম্পি সম্পিণ্ডেতি. হাযনস্স কারণং দস্সেতি ‘‘যস্মা’’তিআদিনা.

৫৬৯. ‘‘ঘরতো নীহরিত্ৰা’’তি এত্থ ‘‘নীহরিত্ৰা’’তি পদস্স কম্মং দস্সেতুং ৰুত্তং ‘‘আসনসালং ৰা ৰিহারং ৰা’’তি. ‘‘আনেত্ৰা’’তিইমিনা নীপুব্বহরধাতুযা অত্থং দস্সেতি. দ্ৰারেতি অত্তনো গেহদ্ৰারেতি. ততিযং.

৪. চতুত্থপাটিদেসনীযসিক্খাপদং

৫৭০. চতুত্থে অৰরুদ্ধসদ্দো পরিরুদ্ধসদ্দস্স পরিযাযোতি আহ ‘‘পরিরুদ্ধা হোন্তী’’তি. আরঞ্ঞকস্স সেনাসনস্স পরিসমন্ততো রুদ্ধা আৰুতা হোন্তীতি অত্থো.

৫৭৩. ‘‘পঞ্চন্ন’’ন্তি নিদ্ধারণে সামিৰচনভাৰঞ্চ ‘‘যংকিঞ্চী’’তি নিদ্ধারণীযেন সম্বন্ধিতব্বভাৰঞ্চ দস্সেতুং ৰুত্তং ‘‘পঞ্চসু সহধম্মিকেসু যং কিঞ্চী’’তি. ‘‘পেসেত্ৰা খাদনীযং ভোজনীযং আহরিস্সামী’’তিইমিনা পটিসংৰিদিতাকারদস্সনং. ‘‘আরাম’’ন্তি সামঞ্ঞতো ৰুত্তেপি আরঞ্ঞকসেনাসনস্স আরামো এৰ অধিপ্পেতোতি আহ ‘‘আরঞ্ঞকসেনাসনারামঞ্চা’’তি. তস্সাতি আরঞ্ঞকসেনাসনারামস্স. ‘‘কস্মা’’তি পুচ্ছায ‘‘পটিমোচনত্থ’’ন্তি ৰিসজ্জনায সমেতুং সম্পদানত্থে নিস্সক্কৰচনং কাতব্বং. কিমত্থন্তি হি অত্থো. পটিমোচনত্থন্তি তদত্থে পচ্চত্তৰচনং. পটিমোচনসঙ্খাতায অত্থাযাতি হি অত্থো. অত্থসদ্দো চ পযোজনৰাচকো. পযোজনাযাতি হি অত্থো. অথ ৰা ‘‘পটিমোচনত্থ’’ন্তি ৰিসজ্জনাযং. ‘‘কস্মা’’তি পুচ্ছায সমেতুং নিস্সক্কত্থে পচ্চত্তৰচনং কাতব্বং. পটিমোচনসঙ্খাতা অত্থাতি হি অত্থো. অত্থসদ্দো চ কারণৰাচকো. কারণাতি হি অত্থো. এৰঞ্হি পুচ্ছাৰিসজ্জনানং পুব্বাপরসমসঙ্খাতো ৰিচযো হারো পরিপুণ্ণো হোতীতি দট্ঠব্বং. অম্হাকন্তি খাদনীযভোজনীযপটিহরন্তানং অম্হাকং. অম্হেতি চোরসঙ্খাতে অম্হে.

‘‘তস্সা’’তি পদস্সত্থং দস্সেতুং ৰুত্তং ‘‘এতিস্সা যাগুযা’’তি. অঞ্ঞানিপীতি পটিসংৰিদিতকুলতো অঞ্ঞানিপি কুলানি. তেনাতি পটিসংৰিদিতকুলেন. কুরুন্দিৰাদে যাগুযা পটিসংৰিদিতং কত্ৰা যাগুং অগ্গহেত্ৰা পূৰাদীনি আহরন্তি, ৰট্টতীতি অধিপ্পাযো.

৫৭৫. একস্সাতি ভিক্খুস্স. তস্সাতি পটিসংৰিদিতভিক্খুস্স, চতুন্নং ৰা পঞ্চন্নং ৰা ভিক্খূনং অত্থাযাতি যোজনা. অঞ্ঞেসম্পীতি চতুপঞ্চভিক্খুতো অঞ্ঞেসম্পি. অধিকমেৰাতি পরিভুত্ততো অতিরেকমেৰ. যং পনাতি খাদনীযভোজনীযং পন, যম্পি খাদনীযভোজনীযং ৰনতো আহরিত্ৰা দেন্তীতি যোজনা. ‘‘তত্থজাতক’’ন্তি এত্থ তসদ্দস্স ৰিসযং দস্সেতুং ৰুত্তং ‘‘আরামে’’তি. অঞ্ঞেন দিন্নন্তি সম্বন্ধো. নন্তি মূলখাদনীযাদিং. পটিসংৰিদিতন্তি পটিকচ্চেৰ সুট্ঠু জানাপিতন্তি অত্থোতি. চতুত্থং.

ইতি সমন্তপাসাদিকায ৰিনযসংৰণ্ণনায

পাটিদেসনীযৰণ্ণনায

যোজনা সমত্তা.