৬. জোতিসিক্খাপদং

৩৫০. ছট্ঠে জনপদস্স নামত্তা বহুৰচনৰসেন ‘‘ভগ্গেসূ’’তি পাল়িযং ৰুত্তং. সুসুমারসণ্ঠানো পব্বতসঙ্খাতো গিরি এত্থাতি সুসুমারগিরি, এতস্স ৰা মাপিতকালে সুসুমারো গিরতি সদ্দং নিগ্গিরতি এত্থাতি সুসুমারগিরীতি অত্থমনপেক্খিত্ৰা ৰুত্তং ‘‘নগরস্স নাম’’ন্তি. তং পনাতি ৰনং পন. ‘‘মিগান’’ন্তিআদিনা মিগানং অভযো দীযতি এত্থাতি মিগদাযোতি অত্থং দস্সেতি.

৩৫২. ‘‘জোতিকে’’তিপদস্স জোতিস্স অগ্গিস্স করণং জোতিকন্তি দস্সেতুং ৰুত্তং ‘‘জোতিকরণে’’তি.

৩৫৪. ‘‘সমাদহিতুকামতাযা’’তিপদং ‘‘অরণিসণ্ঠাপনতো’’তিপদে হেতু. জালাতি সিখা. সা হি জলতি দিব্বতীতি জালাতি ৰুচ্চতি.

পতিলাতং উক্খিপতীতি এত্থ ‘‘পতিতালাত’’ন্তি ৰত্তব্বে তকারলোপং কত্ৰা সন্ধিৰসেন পতিলাতন্তি ৰুত্তন্তি আহ ‘‘অলাতং পতিতং উক্খিপতী’’তি. অলাতন্তি উম্মুক্কং. তঞ্হি আদিত্তং হুত্ৰা অতিউণ্হত্তা ন লাতব্বং ন গণ্হিতব্বন্তি অলাতন্তি ৰুচ্চতি. অৰিজ্ঝাতন্তি ঝাযনতো ডয্হনতো অৰিগতং অলাতন্তি সম্বন্ধো. ঝাযনং ডয্হনং ঝাতং, ৰিগতং ঝাতং ইমস্সালাতস্সাতি ৰিজ্ঝাতং.

৩৫৬. পদীপাদীনীতি পদীপজোতিকাদীনি. তত্থাতি তাসু দুট্ঠৰাল়মিগঅমনুস্সসঙ্খাতাসু আপদাসু নিমিত্তভূতাসু. নিমিত্তত্থে চেতং ভুম্মৰচনন্তি. ছট্ঠং.