৯. পণীতভোজনসিক্খাপদং

২৫৭. নৰমে পকট্ঠভাৰং নীতন্তি পণীতন্তি ৰুত্তে পণীতসদ্দো উত্তমত্থোতি আহ ‘‘উত্তমভোজনানী’’তি. সম্পন্নো নাম ন মধুরগুণো, অথ খো মধুরগুণযুত্তং ভোজনমেৰাতি আহ ‘‘সম্পত্তিযুত্ত’’ন্তি. কস্সাতি করণত্থে চেতং সামিৰচনং, কেনাতি হি অত্থো. ‘‘সুরস’’ন্তিইমিনা সাদীযতি অস্সাদীযতীতি সাদূতি ৰচনত্থস্স সরূপং দস্সেতি.

২৫৯. ‘‘যো পন…পে… ভুঞ্জেয্যা’’তি এত্থ ৰিনিচ্ছযো এৰং ৰেদিতব্বোতি যোজনা. সুদ্ধানীতি ওদনেন অসংসট্ঠানি. ওদনসংসট্ঠানি সব্বিআদীনীতি সম্বন্ধো. এত্থাতি ইমস্মিং সিক্খাপদে. হীতি সচ্চং. ‘‘পণীতসংসট্ঠানী’’তিইমিনা পণীতেহি সব্বিআদীহি সংসট্ঠানি ভোজনানি পণীতভোজনানীতি অত্থং দস্সেতি. ‘‘সত্তধঞ্ঞনিব্বত্তানী’’তি ইমিনা ভোজনানং সরূপং দস্সেতি.

‘‘সব্বিনা ভত্ত’’ন্তিআদীনং পঞ্চন্নং ৰিকপ্পানং মজ্ঝে তীসুপি ৰিকপ্পেসু ‘‘ভত্ত’’ন্তি যোজেতব্বং. এৰং ৰাক্যং কত্ৰা ৰিঞ্ঞাপনে আপত্তিং দস্সেত্ৰা সমাসং কত্ৰা ৰিঞ্ঞাপনে তং দস্সেন্তো আহ ‘‘সব্বিভত্তং দেহী’’তিআদি.

ইতোতি গাৰিতো লদ্ধেনাতি সম্বন্ধো. ৰিসঙ্কেতন্তি সঙ্কেততো ঞাপিততো ৰিগতং ৰিরহিতন্তি অত্থো. হীতি সচ্চং. ইমিনা ৰিসঙ্কেতস্স গুণদোসং দস্সেতি.

কপ্পিযসব্বিনা দেহীতি কপ্পিযসব্বিনা সংসট্ঠং ভত্তং দেহীতি যোজনা. এসেৰ নযো সেসেসুপি. যেন যেনাতি যেন যেন সব্বিআদিনা. তস্মিং তস্সাতি এত্থাপি ৰিচ্ছাৰসেন অত্থো দট্ঠব্বো. পাল়িযং আগতসব্বি নাম গোসব্বি, অজিকাসব্বি, মহিংসসব্বি, যেসং মংসং কপ্পতি, তেসং সব্বি চ. নৰনীতং নাম এৰমেৰ. তেলং নাম তিলতেলং, সাসপতেলং, মধুকতেলং, এরণ্ডতেলং, ৰসাতেলঞ্চ. মধু নাম মক্খিকামধু. ফাণিতং নাম উচ্ছুম্হা নিব্বত্তং. মচ্ছো নাম উদকচরো. পাল়িঅনাগতো মচ্ছো নাম নত্থি. মংসং নাম যেসং মংসং কপ্পতি, তেসং মংসং. খীরদধীনি সব্বিসদিসানেৰ. ৰুত্তং যথা এৰং ‘‘নৰনীতভত্তং দেহী’’তিআদীসুপি সূপোদনৰিঞ্ঞত্তিদুক্কটমেৰ হোতীতি যোজনা. হীতি সচ্চং. সো চাতি সো চত্থো. তত্থাতি তস্মিং অত্থে. কিং পযোজনং. নত্থেৰ পযোজনন্তি অধিপ্পাযো.

পটিলদ্ধং ভোজনন্তি সম্বন্ধো. একরসন্তি এককিচ্চং. ততোতি নৰপণীতভোজনতো নীহরিত্ৰাতি সম্বন্ধো.

সব্বানীতি নৰ পাচিত্তিযানি সন্ধায ৰুত্তং.

২৬১. উভযেসম্পীতি ভিক্খুভিক্খুনীনম্পি. সব্বীতি চেত্থ যো নং পরিভুঞ্জতি, তস্স বলাযুৰড্ঢনত্থং সব্বতি গচ্ছতি পৰত্ততীতি সব্বি, ঘতং. ততিযক্খরেনেৰ সজ্ঝাযিতব্বং লিখিতব্বঞ্চ. কস্মা? ততিযক্খরট্ঠানেযেৰ সব্ব গতিযন্তি গতিঅত্থস্স সব্বধাতুস্স ধাতুপাঠেসু আগতত্তাতি. নৰমং.