৭. ৰিকালভোজনসিক্খাপদং

২৪৭. সত্তমে গিরিম্হীতি পব্বতম্হি. সো হি হিমৰমনাদিৰসেন জলং, সারভূতানি চ ভেসজ্জাদিৰত্থূনি গিরতি নিগ্গিরতীতি গিরীতি ৰুচ্চতি. অগ্গসমজ্জোতি উত্তমসমজ্জো. ইমেহি পদেহি অগ্গো সমজ্জো অগ্গসমজ্জো, গিরিম্হি পৰত্তো অগ্গসমজ্জো গিরগ্গসমজ্জোতি অত্থং দস্সেতি. সমজ্জোতি চ সভা. সা হি সমাগমং অজন্তি গচ্ছন্তি জনা এত্থাতি সমজ্জোতি ৰুচ্চতি. ‘‘গিরিস্স ৰা’’তিআদিনা গিরিস্স অগ্গো কোটি গিরগ্গো, তস্মিং পৰত্তো সমজ্জো গিরগ্গসমজ্জোতি অত্থো দস্সিতো. সোতি গিরগ্গসমজ্জো. ভৰিস্সতি কিরাতি যোজনা. ভূমিভাগেতি অৰযৰিআধারো, সন্নিপততীতি সম্বন্ধো. নটঞ্চ নাটকঞ্চ নটনাটকানি. ‘‘নচ্চং গীতং ৰাদিতঞ্চা’’তি ইদং তযং ‘‘নাটক’’ন্তি ৰুচ্চতি. তেসন্তি নটনাটকানং. দস্সনত্থন্তি দস্সনায চ সৰনায চ. সৰনম্পি হি দস্সনেনেৰ সঙ্গহিতং. অপঞ্ঞত্তে সিক্খাপদেতি ঊনৰীসতিৰস্সসিক্খাপদস্স তাৰ অপঞ্ঞত্তত্তা. তেতি সত্তরসৰগ্গিযা. তত্থাতি গিরগ্গসমজ্জং. অথাতি তস্মিং কালে. নেসন্তি সত্তরসৰগ্গিযানং অদংসূতি সম্বন্ধো. ৰিলিম্পেত্ৰাতি ৰিলেপনেহি ৰিৰিধাকারেন লিম্পেত্ৰা.

২৪৯. ‘‘ৰিকালে’’তি সামঞ্ঞেন ৰুত্তেপি ৰিসেসকালোৰ গহেতব্বোতি আহ ‘‘কালো’’তিআদি. সো চাতি ভোজনকালো চ. মজ্ঝন্হিকো হোতীতি যোজনা. তেনেৰাতি ভোজনকালস্স অধিপ্পেতত্তা এৰ. অস্সাতি ‘‘ৰিকালে’’তিপদস্স. ‘‘ৰিকালো নাম…পে… অরুণুগ্গমনা’’তি পদভাজনেন অরুণুগ্গমনতো যাৰ মজ্ঝন্হিকা কালো নামাতি অত্থো নযেন দস্সিতো হোতি. ততোতি ঠিতমজ্ঝন্হিকতো. সূরিযস্স অতিসীঘত্তা ৰেগেন ঠিতমজ্ঝন্হিকং ৰীতিৰত্তেয্যাতি আহ ‘‘কুক্কুচ্চকেন পন ন কত্তব্ব’’ন্তি. কালত্থম্ভোতি কালস্স জাননত্থায থূণো. কালন্তরেতি কালস্স অব্ভন্তরে.

অৰসেসং খাদনীযং নামাতি এত্থ ৰিনিচ্ছযো এৰং ৰেদিতব্বোতি যোজনা. যন্তি খাদনীযং অত্থীতি সম্বন্ধো. ৰনমূলাদিপভেদং যম্পি খাদনীযং অত্থি, তম্পি আমিসগতিকং হোতীতি যোজনা. সেয্যথিদন্তি পুচ্ছাৰাচকনিপাতসমুদাযো. ইদং খাদনীযং সেয্যথা কতমন্তি অত্থো. ইদম্পীতি ইদং দ্ৰাদসৰিধম্পি. পিসদ্দেন ন পূৰাদিযেৰাতি দস্সেতি.

তত্থাতি দ্ৰাদসসু খাদনীযেসু, আধারে ভুম্মং. মূলতি পতিট্ঠাতি এত্থ, এতেনাতি ৰা মূলং. খাদিতব্বন্তি খাদনীযং. মূলমেৰ খাদনীযং মূলখাদনীযং, তস্মিং ৰিনিচ্ছযো এৰং ৰেদিতব্বোতি যোজনা. মূলকমূলাদীনি লোকসঙ্কেতো পদেসতোযেৰ ৰেদিতব্বানি. তং তঞ্হি নামং অজানন্তানং অতিসম্মূল়্হকারণত্তা সহ পরিযাযন্তরেন ৰচনত্থং ৰক্খাম. সূপস্স হিতং সূপেয্যং, সূপেয্যং পণ্ণং এতেসন্তি সূপেয্যপণ্ণা, তেসং মূলানি সূপেয্যপণ্ণমূলানি. আমীযতি অন্তো পৰেসীযতীতি আমিসো, আকারো অন্তোকরণত্থো, আমিসস্স গতি ৰিয গতি এতেসন্তি আমিসগতিকানি . এত্থাতি মূলেসু. জরড্ঢন্তি জরভূতং উপড্ঢং. অঞ্ঞম্পীতি ৰজকলিমূলতো অঞ্ঞম্পি.

যানি পন মূলানি ৰুত্তানি, তানি যাৰজীৰিকানীতি যোজনা. পাল়িযং ৰুত্তানীতি সম্বন্ধো. খাদনীযত্থন্তি খাদনীযস্স, খাদনীযে ৰা ৰিজ্জমানং, খাদনীযেন ৰা কাতব্বং কিচ্চং, পযোজনং ৰাতি খাদনীযত্থং. ‘‘খাদনীযে’’তিইমিনা ‘‘তত্থ ৰুত্তাভিধম্মত্থা’’তিআদীসু ৰিয খাদনীযত্থপদস্স উত্তরপদত্থপধানভাৰং দস্সেতি. তত্থ খাদনীযস্স, খাদনীযে ৰা ৰিজ্জমানং, খাদনীযেন ৰা কাতব্বং কিচ্চং নাম জিঘচ্ছাহরণমেৰ. যঞ্হি পূৰাদিখাদনীযং খাদিত্ৰা জিঘচ্ছাহরণং হোতি, তস্স কিচ্চং কিচ্চং নামাতি ৰুত্তং হোতি. তং কিচ্চং, পযোজনং ৰা নেৰ ফরন্তি, নেৰ নিপ্ফাদেন্তি. এসেৰ নযো ‘‘ন ভোজনীযে ভোজনীযত্থং ফরন্তী’’তিএত্থাপি.

তেসন্তি মূলানং অন্তো, লক্খণন্তি ৰা সম্বন্ধো. একস্মিং জনপদে খাদনীযত্থভোজনীযত্থেসু ফরমানেসু অঞ্ঞেসুপি জনপদেসু ফরন্তিযেৰাতি দস্সনত্থং ‘‘তেসু তেসু জনপদেসূ’’তি ৰিচ্ছাপদং ৰুত্তং. কিঞ্চাপি হি বহূসু জনপদেসু পথৰীরসআপোরসসম্পত্তিৰসেন খাদনীযত্থভোজনীযত্থং ফরমানম্পি একস্মিং জনপদে পথৰীরসআপোরসৰিপত্তিৰসেন অফরমানং ভৰেয্য, ৰিকারৰসেন পন তত্থ পৰত্তত্তা তং জনপদং পমাণং ন কাতব্বং, গহেতব্বমেৰাতি ৰুত্তং হোতি. পকতিআহারৰসেনাতি অঞ্ঞেহি যাৰকালিক, সত্তাহকালিকেহি অমিস্সিতং অত্তনো পকতিযাৰ আহারকিচ্চকরণৰসেন. ‘‘মনুস্সান’’ন্তিইমিনা অঞ্ঞেসং তিরচ্ছানাদীনং খাদনীযত্থভোজনীযত্থং ফরমানম্পি ন পমাণন্তি দস্সেতি. তন্তি মূলং. হীতি সচ্চং. নামসঞ্ঞাসূতি নামসঙ্খাতাসু সঞ্ঞাসু.

যথা মূলে লক্খণং দস্সিতং, এৰং কন্দাদীসুপি যং লক্খণং দস্সিতন্তি যোজনা. ন কেৰলং পাল়িযং আগতানং হলিদ্দাদীনং মূলংযেৰ যাৰজীৰিকং হোতি, অথ খো তচাদযোপীতি আহ ‘‘যঞ্চেত’’ন্তিআদি. যং এতং অট্ঠৰিধন্তি সম্বন্ধো.

এৰং মূলখাদনীযে ৰিনিচ্ছযং দস্সেত্ৰা ইদানি কন্দখাদনীযে তং দস্সেন্তো আহ ‘‘কন্দখাদনীযে’’তিআদি. তত্থ কন্দখাদনীযেতি কং সুখং দদাতীতি কন্দো, পদুমাদিকন্দো, সুখস্স অদাযকা পন কন্দা রুল়্হীৰসেন কন্দাতি ৰুচ্চন্তি, কন্দো এৰ খাদনীযং কন্দখাদনীযং, তস্মিং ৰিনিচ্ছযো এৰং ৰেদিতব্বোতি যোজনা. এসেৰ নযো উপরিপি. যন্তি কন্দং. ইমিনা তংসদ্দানপেক্খো যংসদ্দোপি অত্থীতি ঞাপেতি. তত্থাতি কন্দখাদনীযে. তরুণো, সুখখাদনীযোতি ৰিসেসনপদানি যথাৰচনং উপরিপি যোজেতব্বানি. এৰমাদযো ফরণককন্দা যাৰকালিকাতি সম্বন্ধো.

অধোতোতি ৰিসরসো উদকেন অধূনিতো. তেতি কন্দা সঙ্গহিতাতি সম্বন্ধো.

মূলে অলতি পৰত্ততীতি মুল়ালো, উদকতো ৰা উদ্ধটমত্তে মিলতি নিমিলতীতি মুল়ালং. এৰমাদি ফরণকমুল়ালং যাৰকালিকন্তি যোজনা. তং সব্বম্পীতি সব্বম্পি তং মুল়ালং সঙ্গহিতন্তি সম্বন্ধো.

মসতি ৰিজ্ঝতীতি মত্থকো. এৰমাদি মত্থকো যাৰকালিকোতি যোজনা. জরড্ঢবুন্দোতি জরভূতঅড্ঢসঙ্খাতো পাদো.

খনীযতি অৰদারীযতীতি খন্ধো, খাযতীতি ৰা খন্ধো. ‘‘অন্তোপথৰীগতো’’তিপদং ‘‘সালকল্যাণিখন্ধো’’তিপদেনেৰ যোজেতব্বং, ন অঞ্ঞেহি. এৰমাদি খন্ধো যাৰকালিকোতি যোজনা. অৰসেসাতি তীহি দণ্ডকাদীহি অৰসেসা.

তচতি সংৰরতি পটিচ্ছাদেতীতি তচো. সরসোতি এত্থ এৰকারো যোজেতব্বো, সরসো এৰাতি অত্থো. তেসং সঙ্গহোতি সম্বন্ধো. হীতি সচ্চং. এতন্তি কসাৰভেসজ্জং, ‘‘অনুজানামি …পে… ভোজনীযত্থ’’ন্তি ৰচনং ৰা. এত্থাতি কসাৰভেসজ্জে. এতেসম্পীতি মত্থকখন্ধত্তচানম্পি.

পততীতি পত্তং. এতেসন্তি মূলকাদীনং. এৰরূপানি পত্তানি চ একংসেন যাৰকালিকানীতি যোজনা. যা লোণী আরোহতি, তস্সা লোণিযা পত্তং যাৰজীৰিকন্তি যোজনা. দীপৰাসিনোতি তম্বপণ্ণিদীপৰাসিনো, জম্বুদীপৰাসিনো ৰা. যানি ৰা ফরন্তীতি ৰুত্তানীতি সম্বন্ধো. তেসন্তি নিম্বাদীনং. ইদং পদং পুব্বপরাপেক্খকং, তস্মা দ্ৰিন্নং মজ্ঝে ৰুত্তন্তি দট্ঠব্বং. পণ্ণানং অন্তো নত্থীতি সম্বন্ধো.

পুপ্ফতি ৰিকসতীতি পুপ্ফং. এৰমাদি পুপ্ফং যাৰকালিকন্তি যোজনা. তস্সাতি পুপ্ফস্স. অস্সাতি এৰমেৰ.

ফলতীতি ফলং. যানীতি ফলানি. ফরন্তীতি সম্বন্ধো. নেসন্তি ফলানং পরিযন্তন্তি সম্বন্ধো. যানি ৰুত্তানি, তানি যাৰজীৰিকানীতি যোজনা. তেসম্পীতি ফলানম্পি পরিযন্তন্তি সম্বন্ধো.

অসীযতি খিপীযতি, ছড্ডীযতীতি ৰা অট্ঠি. এৰমাদীনি ফরণকানি অট্ঠীনি যাৰকালিকানীতি যোজনা. তেসন্তি অট্ঠীনং.

পিসীযতি চুণ্ণং করীযতীতি পিট্ঠং. এৰমাদীনি ফরণকানি পিট্ঠানি যাৰকালিকানীতি যোজনা. অধোতকন্তি উদকেন অধূনিতং. তেসন্তি পিট্ঠানং.

নিরন্তরং অসতি সম্বজ্ঝতীতি নিয্যাসো. সেসাতি উচ্ছুনিয্যাসতো সেসা. পাল়িযং ৰুত্তনিয্যাসাতি সম্বন্ধো. তত্থাতি নিয্যাসখাদনীযে. সঙ্গহিতানং নিয্যাসানং পরিযন্তন্তি যোজনা. এৰন্তিআদি নিগমনং.

ৰুত্তমেৰাতি হেট্ঠা পঠমপৰারণসিক্খাপদে ৰুত্তমেৰাতি. সত্তমং.