৫. পঠমপৰারণসিক্খাপদং

২৩৬. পঞ্চমে পৰারিতাতি এত্থ ৰস্সংৰুত্থপৰারণা, পচ্চযপৰারণা, পটিক্খেপপৰারণা, যাৰদত্থপৰারণা চাতি চতুব্বিধাসু পৰারণাসু যাৰদত্থপৰারণা চ পটিক্খেপপৰারণা চাতি দ্ৰে পৰারণা অধিপ্পেতাতি দস্সেন্তো আহ ‘‘ব্রাহ্মণেনা’’তিআদি. ব্রাহ্মণেন পৰারিতাতি সম্বন্ধো. সযন্তি ততিযন্তনিপাতো ‘‘পৰারিতা’’তিপদেন সম্বন্ধো. চসদ্দো অঞ্ঞত্থ যোজেতব্বো যাৰদত্থপৰারণায চ পটিক্খেপপৰারণায চাতি. পটিমুখং অত্তনো গেহং ৰিসন্তি পৰিসন্তীতি পটিৰিস্সকাতি ৰুত্তে আসন্নগেহৰাসিকা গহেতব্বাতি আহ ‘‘সামন্তঘরৰাসিকে’’তি.

২৩৭. উদ্ধঙ্গমো রৰো ওরৰো, সোযেৰ সদ্দো ওরৰসদ্দো, কাকানং ওরৰসদ্দো ককোরৰসদ্দোতি দস্সেন্তো আহ ‘‘কাকান’’ন্তিআদি.

২৩৯. তৰন্তুপচ্চযস্স অতীতত্থভাৰং দস্সেতুং ৰুত্তং ‘‘তত্থ চা’’তিআদি. তত্থাতি ‘‘ভুত্তৰা’’তিপদে. যস্মা যেন ভিক্খুনা অজ্ঝোহরিতং হোতি, তস্মা সো ‘‘ভুত্তাৰী’’তি সঙ্খ্যং গচ্ছতীতি যোজনা. সঙ্খাদিত্ৰাতি দন্তেহি চুণ্ণং কত্ৰা. তেনাতি তেন হেতুনা. অস্সাতি ‘‘ভুত্তাৰী’’তিপদস্স. পৰারেতি পটিক্খিপতীতি পৰারিতো ভিক্খূতি দস্সেন্তো আহ ‘‘কতপৰারণো’’তি. সোপি চাতি সো পটিক্খেপো চ হোতীতি সম্বন্ধো. অস্সাতি ‘‘পৰারিতো’’তিপদস্স. তত্থাতি ‘‘অসনং পঞ্ঞাযতী’’তিআদিৰচনে. যস্মা ভুত্তাৰীতিপি সঙ্খ্যং গচ্ছতি, তস্মা ন পস্সামাতি যোজনা. ‘‘অসনং পঞ্ঞাযতী’’তি পদভাজনিযা ‘‘ভুত্তাৰী’’তি মাতিকাপদস্স অসংসন্দনভাৰং দস্সেতুং ৰুত্তং ‘‘অসনং পঞ্ঞাযতীতি ইমিনা’’তিআদি. যঞ্চাতি যঞ্চ ভোজনং. দিরত্তাদীতি এত্থ আদিসদ্দেন পঞ্চাদিৰচনং সঙ্গণ্হাতি. এতন্তি ‘‘ভুত্তাৰী’’তিপদং.

‘‘অসনং পঞ্ঞাযতী’’তিআদীসু ৰিনিচ্ছযো এৰং ৰেদিতব্বোতি সম্বন্ধো. ‘‘পঞ্ঞাযতী’’তি এত্থ ঞাধাতুযা খাযনত্থং দস্সেতুং ৰুত্তং ‘‘দিস্সতী’’তি. ‘‘হত্থপাসে’’তিপদস্স দ্ৰাদসহত্থপ্পমাণো হত্থপাসো নাধিপ্পেতোতি আহ ‘‘অড্ঢতেয্যহত্থপ্পমাণে’’তি. ৰাচায অভিহরণং নাধিপ্পেতং. তেনাহ ‘‘কাযেনা’’তি. অভিহরতীতি অভিমুখং হরতি. তন্তি ভোজনং. এতন্তি পঞ্চঙ্গভাৰং, ‘‘পঞ্চহি…পে… পঞ্ঞাযতী’’তি ৰচনং ৰা.

তত্রাতি ‘‘অসনং পঞ্ঞাযতী’’তিআদিৰচনে. অস্নাতীতি কীযাদিগণত্তা, তস্স চ একক্খরধাতুত্তা সকারনকারানং সংযোগো দট্ঠব্বো. তন্তি ভোজনং. উন্দতি পসৰতি ভুঞ্জন্তানং আযুবলং জনেতীতি ওদনো. যৰাদযো পূতিং কত্ৰা কতত্তা কুচ্ছিতেন মসীযতি আমসীযতীতি কুমাসো. সচতি সমৰাযো হুত্ৰা ভৰতীতি সত্তু. ব্যঞ্জনত্থায মারেতব্বোতি মচ্ছো. মানীযতি ভুঞ্জন্তেহীতি মংসং. তত্থাতি ওদনাদীসু পঞ্চসু ভোজনেসু. সারো অস্সত্থি অঞ্ঞেসং ধঞ্ঞানন্তি সালী. ৰহতি ভুঞ্জন্তানং জীৰিতন্তি ৰীহি. যৰতি অমিস্সিতোপি মিস্সিতো ৰিয ভৰতীতি যৰো. গুধতি পরিৰেঠতি মিলক্খভোজনত্তাতি গোধুমো. সোভনসীসত্তা কমনীযভাৰং গচ্ছতীতি কঙ্গু. মহন্তসীসত্তা, মধুররসনাল়ত্তা চ ৰরীযতি পত্থীযতি জনেহীতি ৰরকো. কোরং রুধিরং দূসতি ভুঞ্জন্তানন্তি কুদ্রূসকো. নিব্বত্তো ওদনো নামাতি সম্বন্ধো. তত্থাতি সত্তসু ধঞ্ঞেসু. সালীতীতি এত্থ ইতিসদ্দো নামপরিযাযো. সালী নামাতি অত্থো. এসেৰ নযো ‘‘ৰীহীতী’’তিআদীসুপি.

এত্থাতি তিণধঞ্ঞজাতীসু. নীৰারো সালিযা অনুলোমো, ৰরকচোরকো ৰরকস্স অনুলোমো. অম্বিলপাযাসাদীসূতি এত্থ আদিসদ্দেন খীরভত্তাদযো সঙ্গণ্হন্তি. ওধীতি অৰধি, মরিযাদোতি অত্থো. সো হি অৰহীযতি চজীযতি অস্মাতি ওধীতি ৰুচ্চতি.

যোপি পাযাসো ৰা যাপি অম্বিলযাগু ৰা ওধিং ন দস্সেতি, সো পৰারণং ন জনেতীতি যোজনা. পযেন খীরেন কতত্তা পাযাসো. পাতব্বস্স, অসিতব্বস্স চাতি দ্ৰিন্নং ব্যুপ্পত্তিনিমিত্তানং সম্ভৰতো ৰা পাযাসোতি ৰুচ্চতি. উদ্ধনতোতি চুল্লিতো. সা হি উপরি ধীযন্তি ঠপিযন্তি থাল্যাদযো এত্থাতি উদ্ধনন্তি ৰুচ্চতি. আৰজ্জিত্ৰাতি পরিণামেত্ৰা. ঘনভাৰন্তি কথিনভাৰং. এত্থাপি ৰাক্যে ‘‘যো সো’’তি পদানি যোজেতব্বানি. পুব্বেতি অব্ভুণ্হকালে. নিমন্তনেতি নিমন্তনট্ঠানে. ভত্তে আকিরিত্ৰা দেন্তীতি সম্বন্ধো. যাপনং গচ্ছতি ইমাযাতি যাগু. কিঞ্চাপি তনুকা হোতি, তথাপীতি যোজনা. উদকাদীসূতিআদিসদ্দেন কিঞ্জিকখীরাদযো সঙ্গয্হন্তি. যাগুসঙ্গহমেৰ গচ্ছতি, কস্মা? উদকাদীনং পক্কুথিতত্তাতি অধিপ্পাযো. তস্মিং ৰাতি সভত্তে, পক্কুথিতউদকাদিকে ৰা. অঞ্ঞস্মিং ৰাতি পক্কুথিতউদকাদিতো অঞ্ঞস্মিং উদকাদিকে ৰা. যত্থ যস্মিং উদকাদিকে পক্খিপন্তি, তং পৰারণং জনেতীতি যোজনা.

সুদ্ধরসকোতি মচ্ছমংসখণ্ডন্হারূহি অমিস্সো সুদ্ধো মচ্ছাদিরসকো. রসকযাগূতি রসকভূতা দ্রৰভূতা যাগু. ঘনযাগূতি কথিনযাগু. এত্থাতি ঘনযাগুযং. পুপ্ফিঅত্থাযাতি পুপ্ফং ফুল্লং ইমস্স খজ্জকস্সাতি পুপ্ফী, পুপ্ফিনো অত্থো পযোজনং পুপ্ফিঅত্থো, তদত্থায কতন্তি সম্বন্ধো. তে তণ্ডুলেতি তে সেদিততণ্ডুলে. অচুণ্ণত্তা নেৰ সত্তুসঙ্খ্যং, অপক্কত্তা ন ভত্তসঙ্খ্যং গচ্ছন্তি. তেহীতি সেদিততণ্ডুলেহি. তে তণ্ডুলে পচন্তি, করোন্তীতি সম্বন্ধো.

‘‘যৰেহী’’তি বহুৰচনেন সত্ত ধঞ্ঞানিপি গহিতানি. এস নযো সালিৰীহিযৰেহীতি এত্থাপি. থুসেতি ধঞ্ঞতচে. পলাপেত্ৰাতি পটিক্কমাপেত্ৰা. তন্তি চুণ্ণং গচ্ছতীতি সম্বন্ধো. খরপাকভজ্জিতানন্তি খরো পাকো খরপাকো, খরপাকেন ভজ্জিতা খরপাকভজ্জিতা, তেসং. ন পৰারেন্তি অসত্তুসঙ্গহত্তাতি অধিপ্পাযো. কুণ্ডকম্পীতি কণম্পি. পৰারেতি সত্তুসঙ্গহত্তাতি অধিপ্পাযো. তেহীতি লাজেহি. সুদ্ধখজ্জকন্তি পিট্ঠেহি অমিস্সিতং সুদ্ধং ফলাফলাদিখজ্জকং. যাগুং পিৰন্তস্স দেন্তীতি যোজনা. তানীতি দ্ৰে মচ্ছমংসখণ্ডানি. ন পৰারেতি দ্ৰিন্নং মচ্ছমংসখণ্ডানং অখাদিতত্তাতি অধিপ্পাযো. ততোতি দ্ৰেমচ্ছমংসখণ্ডতো নীহরিত্ৰা একন্তি সম্বন্ধো, তেসু ৰা. সোতি খাদকো ভিক্খু. অঞ্ঞন্তি দ্ৰীহি মচ্ছমংসখণ্ডেহি অঞ্ঞং পৰারণপহোনকং ভোজনং.

অৰত্থুতাযাতি পৰারণায অৰত্থুভাৰতো. তং ৰিত্থারেন্তো আহ ‘‘যং হী’’তি. হিসদ্দো ৰিত্থারজোতকো. যন্তি মংসং. ইদং পনাতি ইদং মংসং পন. পটিক্খিত্তমংসং কপ্পিযভাৰতো অপটিক্খিপিতব্বট্ঠানে ঠিতত্তা পটিক্খিত্তম্পি মংসভাৰং ন জহাতি. ননু খাদিতমংসং পন অকপ্পিযভাৰতো পটিক্খিপিতব্বট্ঠানে ঠিতত্তা খাদিযমানম্পি মংসভাৰং জহাতীতি আহ ‘‘যং পনা’’তিআদি. কুলদূসককম্মঞ্চ ৰেজ্জকম্মঞ্চ উত্তরিমনুস্সধম্মারোচনঞ্চ সাদিতরূপিযঞ্চ কুল…পে… রূপিযানি, তানি আদীনি যেসং কুহনাদীনন্তি কুল…পে… রূপিযাদযো, তেহি. সব্বত্থাতি সব্বেসু ৰারেসু.

এৰন্তিআদি নিগমননিদস্সনং. তন্তি ভোজনং. যথাতি যেনাকারেন. যেন অজ্ঝোহটং হোতি, সো পটিক্খিপতি পৰারেতীতি যোজনা. কত্থচীতি কিস্মিঞ্চি পত্তাদিকে. তস্মিং চে অন্তরেতি তস্মিং খণে চে. অঞ্ঞত্রাতি অঞ্ঞস্মিং ঠানে. পত্তে ৰিজ্জমানভোজনং অনজ্ঝোহরিতুকামো হোতি যথা, এৰন্তি যোজনা. হীতি সচ্চং. সব্বত্থাতি সব্বেসু পদেসু. তত্থাতি কুরুন্দীযং. আনিসদস্সাতি আগম্ম নিসীদতি এতেনাতি আনিসদো, তস্স পচ্ছিমন্ততোতি সম্বন্ধো. পণ্হিঅন্ততোতি পসতি ঠিতকালে ৰা গমনকালে ৰা ভূমিং ফুসতীতি পণ্হী, তস্স অন্ততো. ‘‘দাযকস্সা’’তিপদং ‘‘পসারিতহত্থ’’ন্তি পদেন চ ‘‘অঙ্গ’’ন্তি পদেন চ অৰযৰীসম্বন্ধো. হত্থপাসোতি হত্থস্স পাসো সমীপো হত্থপাসো, হত্থো পসতি ফুসতি অস্মিং ঠানেতি ৰা হত্থপাসো, অড্ঢতেয্যহত্থো পদেসো. তস্মিন্তি হত্থপাসে.

উপনামেতীতি সমীপং নামেতি. অনন্তরনিসিন্নোপীতি হত্থপাসং অৰিজহিত্ৰা অনন্তরে ঠানে নিসিন্নোপি ভিক্খু ৰদতীতি যোজনা. ভত্তপচ্ছিন্তি ভত্তেন পক্খিত্তং পচ্ছিং. ঈসকন্তি ভাৰনপুংসকং. উদ্ধরিত্ৰা ৰা অপনামেত্ৰা ৰাতি সম্বন্ধিতব্বং. দূরেতি নৰাসনে. ইতোতি পত্ততো. গতো দূতোতি সম্বন্ধো.

পরিৰেসনাযাতি পরিৰেসনত্থায, ভত্তগ্গে ৰা. তত্রাতি অস্মিং পরিৰেসনে. তন্তি ভত্তপচ্ছিং. ফুট্ঠমত্তাৰাতি ফুসিযমত্তাৰ. কটচ্ছুনা উদ্ধটভত্তে পন পৰারণা হোতীতি যোজনা. হীতি সচ্চং, যস্মা ৰা. তস্সাতি পরিৰেসকস্স. অভিহটে পটিক্খিত্তত্তাতি অভিহটস্স ভত্তস্স পটিক্খিত্তভাৰতো.

‘‘কাযেন ৰাচায ৰা পটিক্খিপন্তস্স পৰারণা হোতী’’তি সঙ্খেপেন ৰুত্তমত্থং ৰিত্থারেন দস্সেন্তো আহ ‘‘তত্থা’’তিআদি. তত্থাতি তেসু কাযৰাচাপটিক্খেপেসু. মচ্ছিকবীজনিন্তি মক্খিকানং উত্তাসনিং বীজনিং. খকারস্স হি ছকারং কত্ৰা ‘‘মচ্ছিকা’’তি ৰুচ্চতি ‘‘সচ্ছিকত্ৰা’’তিআদীসু ৰিয (অ. নি. ৩.১০৩). এত্থ হি ‘‘সক্খিকত্ৰা’’তি ৰত্তব্বে খকারস্স ছকারো হোতি.

একো ৰদতীতি সম্বন্ধো. অপনেত্ৰাতি পত্ততো অপনেত্ৰা. এত্থাতি ৰচনে. কথন্তি কেনাকারেন হোতীতি যোজনা. ৰদন্তস্স নামাতি এত্থ নামসদ্দো গরহত্থো ‘‘অত্থী’’তিপদেন যোজেতব্বো. অত্থি নামাতি অত্থো. ইতোপীতি পত্ততোপি. তত্রাপীতি তস্মিং ৰচনেপি.

সমংসকন্তি মংসেন সহ পৰত্তং. রসন্তি দ্রৰং. তন্তি ৰচনং. পটিক্খিপতো হোতি. কস্মা? মচ্ছো চ রসো চ মচ্ছেন মিস্সো রসো চাতি অত্থস্স সম্ভৰতো. ইদন্তি ৰত্থুং. মংসং ৰিসুং কত্ৰাতি ‘‘মংসস্স রসং মংসরস’’ন্তি মংসপদত্থস্স পধানভাৰং অকত্ৰা, রসপদত্থস্সেৰ পধানভাৰং কত্ৰাতি অত্থো.

আপুচ্ছন্তন্তি ‘‘মংসরসং গণ্হথা’’তি আপুচ্ছন্তং. তন্তি মংসং. করম্বকোতি মিস্সকাধিৰচনমেতং. যঞ্হি অঞ্ঞেন অঞ্ঞেন মিস্সেত্ৰা করোন্তি, সো ‘‘করম্বকো’’তি ৰুচ্চতি. অযং পনেত্থ ৰচনত্থো – করোতি সমূহং অৰযৰিন্তি করো, করীযতি ৰা সমূহেন অৰযৰিনাতি করো, অৰযৰো, তং ৰকতি আদদাতীতি করম্বকো, সমূহো. ‘‘কদম্বকো’’তিপি পাঠো, সোপি যুত্তোযেৰ অনুমতত্তা পণ্ডিতেহি. অভিধানেপি এৰমেৰ অত্থী. অত্থো পন অঞ্ঞথা চিন্তেতব্বো. ইমস্মিং ৰা অত্থে রকারস্স দকারো কাতব্বো. মংসেন মিস্সো, লক্খিতো ৰা করম্বকো মংসকরম্বকো. ন পৰারেতীতি যেসং কেসঞ্চি মিস্সকত্তা ন পৰারেতি. পৰারেতীতি মংসেন মিস্সিতত্তা পৰারেতি.

যো পন পটিক্খিপতি, সো পৰারিতোৰ হোতীতি যোজনা. নিমন্তনেতি নিমন্তনট্ঠানে. হীতি সচ্চং. তত্থাতি কুরুন্দিযং. যেনাতি যেন ভত্তেন. এত্থাতি ‘‘যাগুং গণ্হথা’’তিআদিৰচনে. অধিপ্পাযোতি অট্ঠকথাচরিযানং অধিপ্পাযো. এত্থাতি ‘‘যাগুমিস্সকং গণ্হথা’’তিআদিৰচনে. দুদ্দসন্তি দুক্করং দস্সনং. ইদঞ্চাতি ‘‘মিস্সকং গণ্হথা’’তিৰচনঞ্চ. ন সমানেতব্বন্তি সমং ন আনেতব্বং, সমানং ৰা ন কাতব্বং. হীতি সচ্চং, যস্মা ৰা. ইদং পনাতি মিস্সকং পন. এত্থাতি মিস্সকে. ৰিসুং কত্ৰাতি রসখীরসপ্পীনি আৰেণিং কত্ৰা. তন্তি রসাদিং.

কদ্দীযতি মদ্দীযতীতি কদ্দমো. উন্দতি পসৰতি ৰড্ঢতীতি উদকং. উন্দতি ৰা ক্লেদনং করোতীতি উদকং, নিলীনে সত্তে গুপতি রক্খতীতি গুম্বো, গুহতি সংৰরতীতি ৰা গুম্বো. অনুপরিযাযন্তেনাতি অনুক্কমেন পরিৰত্তিত্ৰা আযন্তেন. তন্তি নাৰং ৰা সেতুং ৰা. মজ্ঝন্হিকন্তি অহস্স মজ্ঝং মজ্ঝন্হং, অহসদ্দস্স ন্হাদেসো, মজ্ঝন্হং এৰ মজ্ঝন্হিকং. পোত্থকেসু পন মজ্ঝন্তিকন্তি পাঠো অত্থি, সো অপাঠোযেৰ. যো ঠিতো পৰারেতি, তেন ঠিতেনেৰ ভুঞ্জিতব্বন্তি যোজনা. আনিসদন্তি পীঠে ফুট্ঠআনিসদমংসং. অচালেত্ৰাতি অচাৰেত্ৰা. অযমেৰ ৰা পাঠো. উপরি চ পস্সেসু চ অমোচেত্ৰাতি ৰুত্তং হোতি. অদিন্নাদানে ৰিয ঠানাচাৰনং ন ৰেদিতব্বং. সংসরিতুন্তি সংসব্বিতুং. নন্তি ভিক্খুং.

অতিরেকং রিচতি গচ্ছতীতি অতিরিত্তং, ন অতিরিত্তং অনতিরিত্তন্তি অত্থং দস্সেন্তো আহ ‘‘ন অতিরিত্ত’’ন্তি. ‘‘অধিক’’ন্তিইমিনা অতিরিত্তসদ্দস্স অতিসুঞ্ঞত্থং নিৰত্তেতি. অধি হুত্ৰা এতি পৰত্ততীতি অধিকং. তং পনাতি অনতিরিত্তং পন হোতীতি সম্বন্ধো. তত্থাতি ‘‘অকপ্পিযকত’’ন্তিআদিৰচনে. ৰিত্থারো এৰং ৰেদিতব্বোতি যোজনা. তত্থাতি অতিরিত্তং কাতব্বেসু ৰত্থূসু. যং ফলং ৰা যং কন্দমূলাদি ৰা অকতন্তি যোজনা. অকপ্পিযভোজনং ৰাতি কুলদূসককম্মাদীহি নিব্বত্তং অকপ্পিযভোজনং ৰা অত্থীতি সম্বন্ধো. যোতি ৰিনযধরো ভিক্খু. তেন কতন্তি যোজনা. ‘‘ভুত্তাৰিনা পৰারিতেন আসনা ৰুট্ঠিতেন কত’’ন্তিৰচনতো ভুত্তাৰিনা অপৰারিতেন আসনা ৰুট্ঠিতেন কত্তব্বন্তি সিদ্ধং. তস্মা পাতো অদ্ধানং গচ্ছন্তেসু দ্ৰীসু একো পৰারিতো, তস্স ইতরো পিণ্ডায চরিত্ৰা লদ্ধং ভিক্খং অত্তনা অভুত্ৰাপি ‘‘অলমেতং সব্ব’’ন্তি কাতুং লভতি এৰ. যন্তি খাদনীযভোজনীযং. ‘‘তদুভযম্পী’’তিইমিনা অতিরিত্তঞ্চ অতিরিত্তঞ্চ অতিরিত্তং, ন অতিরিত্তং অনতিরিত্তন্তি অত্থং দস্সেতি.

তস্সেৰাতি অনতিরিত্তস্সেৰ. এত্থাতি অনতিরিত্তে, ‘‘কপ্পিযকত’’ন্তি আদীসু সত্তসু ৰিনযকম্মাকারেসু ৰা. অনন্তরেতি ৰিনযধরস্স অনন্তরে আসনে. পত্ততো নীহরিত্ৰাতি সম্বন্ধো. তত্থেৰাতি ভুঞ্জনট্ঠানেযেৰ. তস্সাতি নিসিন্নস্স. তেনাতি ভত্তং আনেন্তেন ভিক্খুনা ভুঞ্জিতব্বন্তি যোজনা. ‘‘নিসিন্নেন ভিক্খুনা’’তি কারিতকম্মং আনেতব্বং. কস্মা ‘‘হত্থং ধোৰিত্ৰা’’তি ৰুত্তন্তি পুচ্ছন্তো আহ ‘‘কস্মা’’তি. হীতি কারণং. যস্মা অকপ্পিযং হোতি, তস্মা হত্থং ধোৰিত্ৰাতি মযা ৰুত্তন্তি অধিপ্পাযো. তস্সাতি ভত্তং আনেন্তস্স. যেনাতি ৰিনযধরেন. পুন যেনাতি এৰমেৰ. যঞ্চাতি খাদনীযভোজনীযঞ্চ. যেন ৰিনযধরেন পঠমং অকতং, তেনেৰ কত্তব্বং. যঞ্চ খাদনীযভোজনীযং পঠমং অকতং, তঞ্ঞেৰ কত্তব্বন্তি ৰুত্তং হোতি. তত্থাতি পঠমভাজনে. হীতি সচ্চং. পঠমভাজনং সুদ্ধং ধোৰিত্ৰা কতম্পি নিদ্দোসমেৰ. তেন ভিক্খুনাতি পৰারিতেন ভিক্খুনা.

কুণ্ডেপীতি উক্খলিযম্পি. সা হি কুডতি ওদনাদিং দাহং করোতীতি কুণ্ডোতি ৰুচ্চতি. তন্তি অতিরিত্তকতং খাদনীযভোজনীযং. যেন পনাতি ৰিনযধরেন পন. ভিক্খুং নিসীদাপেন্তীতি সম্বন্ধো. মঙ্গলনিমন্তনেতি মঙ্গলত্থায নিমন্তনট্ঠানে. তত্থাতি মঙ্গলনিমন্তনে. করোন্তেনাতি করোন্তেন ৰিনযধরেন.

গিলানেন ভুঞ্জিতাৰসেসমেৰ ন কেৰলং গিলানাতিরিত্তং নাম, গিলানং পন উদ্দিস্স আভতং গিলানাতিরিত্তমেৰ নামাতি দস্সেন্তো আহ ‘‘ন কেৰল’’ন্তিআদি. যংকিঞ্চি গিলানন্তি উপসম্পন্নং ৰা অনুপসম্পন্নং ৰা যংকিঞ্চি গিলানং. যং দুক্কটং ৰুত্তং, তং অসংসট্ঠৰসেন ৰুত্তন্তি যোজনা. অনাহারত্থাযাতি পিপাসচ্ছেদনআবাধৰূপসমত্থায.

২৪১. সতি পচ্চযেতি এত্থ পচ্চযস্স সরূপং দস্সেতুং ‘‘পিপাসায সতী’’তি চ ‘‘আবাধে সতী’’তি চ ৰুত্তং. তেন তেনাতি সত্তাহকালিকেন চ যাৰজীৰিকেন চ. তস্সাতি আবাধস্স. ইদং পদং ‘‘উপসমনত্থ’’ন্তি এত্থ সমুধাতুযা সম্বন্ধে সম্বন্ধো, যুপচ্চযেন সম্বন্ধে কম্মন্তি দট্ঠব্বন্তি. পঞ্চমং.