৭. কুক্কুরৰতিকসুত্তৰণ্ণনা

৭৮. কোলিযেসূতি বহুৰচনৰসেনাযং পাল়ি আগতা. এৰংনামকে জনপদেতি অত্থৰচনং কস্মা ৰুত্তন্তি আহ ‘‘সো হী’’তিআদি. ন নিযমিতোতি ‘‘অসুকম্হি নাম ৰিহারে’’তি ন নিযমেত্ৰা ৰুত্তো. সেনাসনেযেৰাতি আৰাসেযেৰ, ন রুক্খমূলাদিকে. ৰেসকিরিযা ঘাসগ্গহণাদিনা সমাদাতব্বট্ঠেন গোৰতং, তস্মিং নিযুত্তো গোৰতিকো. তেনাহ ‘‘সমাদিন্নগোৰতো’’তি. যং সন্ধাযাহু ৰেদৰেদিনো – ‘‘গচ্ছং ভক্খেতি, তিট্ঠং মুত্তেতি, উপাহা উদকং ধূপেতি, তিণানি ছিন্দতী’’তিআদি. অযং অচেলোতি অচেলকপব্বজ্জাৰসেন অচেলো, পুরিমো পন গোৰতিকো কুক্কুরৰতিকোতি এত্থ ৰুত্তনযানুসারেন অত্থো ৰত্তব্বো. পলিকুণ্ঠিত্ৰাতি উভো হত্থে উভো পাদে চ সমিঞ্জিত্ৰা. ‘‘উক্কুটিকো হুত্ৰা’’তিপি ৰদন্তি. গমনং নিপ্ফজ্জনং গতীতি আহ – ‘‘কা গতীতি কা নিপ্ফত্তী’’তি. নিপ্ফত্তিপরিযোসানা হি ৰিপাকধম্মপ্পৰত্তি. কতূপচিতকম্মৰসেন অভিসম্পরেতি এত্থাতি অভিসম্পরাযো, পরলোকো. তত্থস্স চ নিপ্ফত্তিং পুচ্ছতীতি আহ – ‘‘অভিসম্পরাযম্হি কত্থ নিব্বত্তী’’তি. কুক্কুরৰতসমাদানন্তি কুক্কুরভাৰসমাদানং, ‘‘অজ্জ পট্ঠায অহং কুক্কুরো’’তি কুক্কুরভাৰাধিট্ঠানং.

৭৯. পরিপুণ্ণন্তি যত্তকা কুক্কুরৰিকারা, তেহি পরিপুণ্ণং. তেনাহ ‘‘অনূন’’ন্তি. অব্বোকিণ্ণন্তি তেহি অৰোমিস্সং. কুক্কুরাচারন্তি কুক্কুরানং গমনাকারোতিআদিআচারেন কুক্কুরভাৰাধিট্ঠানচিত্তমাহ. তথা তথা আকপ্পেতব্বতো আকপ্পো, পৰত্তিআকারো. সো পনেত্থ গমনাদিকোতি আহ ‘‘কুক্কুরানং গমনাকারো’’তিআদি. আচারেনাতি কুক্কুরসীলাচারেন. ৰতসমাদানেনাতি কুক্কুরৰতাধিট্ঠানেন. কুক্কুরচরিযাদিযেৰ দুক্করতপচরণং. তেন গতিৰিপরিযেসাকারেন পৰত্তা লদ্ধি. অস্স কুক্কুরৰতিকস্স অঞ্ঞা গতি নত্থীতি ইতরগতিং পটিক্খিপতি, ইতরাসং পন সম্ভৰো এৰ নত্থীতি. নিপজ্জমানন্তি ৰতসীলাদীনং সংগোপনৰসেন সিজ্ঝমানং. যথা সকম্মকধাতুসদ্দা অত্থৰিসেসৰসেন অকম্মকা হোন্তি ‘‘ৰিবুদ্ধো পুরিসো ৰিবুদ্ধো কমলসণ্ডো’’তি, এৰং অত্থৰিসেসৰসেন অকম্মকাপি সকম্মকা হোন্তীতি দস্সেন্তো ‘‘ন পরিদেৰামি ন অনুত্থুনামী’’তিআদিমাহ. অনুত্থুনসদ্দো চ সকম্মকৰসেন পযুজ্জতি ‘‘পুরাণানি অনুত্থুন’’ন্তিআদীসু. অযঞ্চেত্থ পযোগোতি ইমিনা গাথাযঞ্চ অনুত্থুননরোদনং অধিপ্পেতন্তি দস্সেতি.

৮০. ৰুত্তনযেনেৰাতি ইমিনা গোৰতন্তি গোৰতসমাদানং. গোসীলন্তি গৰাচারং. গোচিত্তন্তি ‘‘অজ্জ পট্ঠায গোহি কাতব্বং করিস্সামী’’তি উপ্পন্নচিত্তন্তি ইমমত্থং অতিদিসতি. গ্ৰাকপ্পে পন ৰত্তব্বং অৰসিট্ঠং ‘‘কুক্কুরাকপ্পে ৰুত্তসদিসমেৰা’’তি ইমিনাৰ অতিদিট্ঠং, ৰিসিট্ঠঞ্চ যথা পন তত্থাতিআদিনা ৰুত্তমেৰ. যং পনেত্থ ৰত্তব্বং, তং কুক্কুরৰতাদীসু ৰুত্তনযমেৰ.

৮১. একচ্চকম্মকিরিযাৰসেনাতি একচ্চস্স অকুসলকম্মস্স কুসলকম্মস্স করণপ্পসঙ্গেন. ইমেসন্তি গোৰতিককুক্কুরৰতিকানং. কিরিযাতি গোৰতভাৰনাদিৰসেন পৰত্তা কিরিযা. পাকটা ভৰিস্সতীতি ‘‘ইমস্মিং কম্মচতুক্কে ইদং নাম কম্মং ভজতী’’তি পাকটা ভৰিস্সতি.

কাল়কন্তি (অ. নি. টী. ২.৪.২৩২) মলীনং, চিত্তস্স অপভস্সরভাৰকরণন্তি অত্থো. তং পনেত্থ কম্মপথসম্পত্তমেৰ অধিপ্পেতন্তি আহ ‘‘দসঅকুসলকম্মপথ’’ন্তি. কণ্হন্তি কণ্হাভিজাতিহেতুতো ৰা কণ্হং. তেনাহ ‘‘কণ্হৰিপাক’’ন্তি. অপাযূপপত্তি মনুস্সেসু চ দোভগ্গিযং কণ্হৰিপাকো, যথা তমভাৰো ৰুত্তো, একত্তনিদ্দেসেন পন ‘‘অপাযে নিব্বত্তনতো’’তি ৰুত্তং, নিব্বত্তাপনতোতি অত্থো. সুক্কন্তি ওদাতং, চিত্তস্স পভস্সরভাৰকরণন্তি অত্থো, সুক্কাভিজাতিহেতুতো ৰা সুক্কং. তেনাহ ‘‘সুক্কৰিপাক’’ন্তি. সগ্গূপপত্তি মনুস্সলোকে সোভগ্গিযঞ্চ সুক্কৰিপাকো, যথা চ জোতিভাৰো ৰুত্তো, একত্তনিদ্দেসেন পন ‘‘সগ্গে নিব্বত্তনতো’’তি ৰুত্তং, নিব্বত্তাপনতোতি অত্থো, ৰোমিস্সককম্মন্তি কালেন কণ্হং, কালেন সুক্কন্তি এৰং মিস্সকৰসেন কতকম্মং. ‘‘সুখদুক্খৰিপাক’’ন্তি ৰত্ৰা সুখদুক্খানং পৰত্তিআকারং দস্সেতুং ‘‘মিস্সককম্মঞ্হী’’তিআদি ৰুত্তং. কম্মস্স কণ্হসুক্কসমঞ্ঞা কণ্হসুক্কাভিজাতিহেতুতাযাতি, অপচ্চযগামিতায তদুভযৰিনিমুত্তস্স কম্মক্খযকরকম্মস্স ইধ সুক্কপরিযাযোপি ন ইচ্ছিতোতি আহ – ‘‘উভয…পে… অসুক্কন্তি ৰুত্ত’’ন্তি. তত্থ উভযৰিপাকস্সাতি যথাধিগতস্স ৰিপাকস্স. সম্পত্তিভৰপরিযাপন্নো হি ৰিপাকো ইধ ‘‘সুক্কৰিপাকো’’তি অধিপ্পেতো, ন অচ্চন্তপরিসুদ্ধো.

সদুক্খন্তি অত্তনা উপ্পাদেতব্বেন দুক্খেন সদুক্খং, দুক্খসংৰত্তনিকন্তি অত্থো. ‘‘ইমস্মিং সুত্তে চেতনা ধুরং, উপালিসুত্তে (ম. নি. ২.৫৬) কম্ম’’ন্তি হেট্ঠা ৰুত্তম্পি অত্থং ইধ সাধযতি ৰিজাননত্থং. অভিসঙ্খরিত্ৰাতি আযূহিত্ৰা. তং পন পচ্চযসমৰাযসিদ্ধিতো সংকড্ঢনং পিণ্ডনং ৰিয হোতীতি আহ – ‘‘সঙ্কড্ঢিত্ৰা, পিণ্ডং কত্ৰাতি অত্থো’’তি, সদুক্খং লোকন্তি অপাযলোকমাহ. ৰিপাকফস্সাতি ফস্সসীসেন তত্থ ৰিপাকপৰত্তমাহ. ভূতকম্মতোতি নিব্বত্তকম্মতো অত্তনা কতূপচিতকম্মতো. যথাভূতন্তি যাদিসং. কম্মসভাগৰসেনাতি কম্মসরিক্খকৰসেন. উপপত্তি হোতীতি অপদাদিভেদা উপপত্তি. কম্মেন ৰিয ৰুত্তাতি যং করোতি, তেন উপপজ্জতীতি এককম্মেনেৰ জাযমানা ৰিয ৰুত্তা অপদাদিভেদা. উপপত্তি চ নাম ৰিপাকেন হোতি ৰিপাকে সম্ভৰন্তে একংসেন তে উপপত্তিৰিসেসা সম্ভৰন্তি. যদি এৰং কস্মা ‘‘তেন উপপজ্জতী’’তি উপপত্তিকম্মহেতুকা ৰুত্তাতি আহ ‘‘যস্মা পনা’’তিআদি. যেন কম্মৰিপাকেন নিব্বত্তোতি যেন কম্মৰিপাকেন ৰিপচ্চমানেন অযং সত্তো নিব্বত্তোতি ৰুচ্চতি. তংকম্মৰিপাকফস্সাতি তস্স তস্স কম্মস্স ৰিপাকভূতা ফস্সা. কম্মেন দাতব্বং দাযং তব্বিপাকং আদিযন্তীতি কম্মদাযাদা, ফস্সা. কম্মস্স দাযজ্জতা কম্মফলস্স দাযজ্জং, তস্মা ৰুত্তং ‘‘কম্মদাযজ্জা’’তি. তেনাহ ‘‘কম্মমেৰ নেসং দাযজ্জং সন্তক’’ন্তি.

তিস্সো চ হেট্ঠিমজ্ঝানচেতনাতি ইদং অব্যাবজ্ঝৰেদনং ৰেদিযনএকন্তসুখুপ্পত্তিযা হেতুভাৰসাধনং. যদি এৰং যথাৰুত্তা ঝানচেতনা তাৰ হোতু একন্তসুখুপ্পত্তিহেতুভাৰতো. কামাৰচরা কিন্তীতি কামাৰচরা পন কুসলচেতনা তংসভাৰাভাৰতো কিন্তি কেন পকারেন অব্যাবজ্ঝমনোসঙ্খারো নাম জাতোতি চোদেতি, ইতরো পন ন সব্বা কামাৰচরকুসলচেতনা তথা গহিতা, অথ খো একচ্চা ঝানচেতনানুকূলাতি দস্সেন্তো ‘‘কসিণসজ্জনকালে কসিণাসেৰনকালে লব্ভন্তী’’তি আহ. তত্থ কসিণাসেৰনচেতনা গহেতব্বা, সা উপচারজ্ঝানস্স সাধিকা. তেন কামাৰচরচেতনা পঠমজ্ঝানচেতনায ঘটিতাতি কসিণসজ্জনচেতনাপি কদাচি তাদিসা হোতীতি গহিতা. পরিকম্মাদিৰসেন হি পৰত্তা ভাৰনামযা কামাৰচরকুসলচেতনা পঠমজ্ঝানস্স আসন্নতায ৰুত্তা. চতুত্থজ্ঝানচেতনা ততিযজ্ঝানচেতনায ঘটিতাতি ইদং একত্তকাযএকত্তসঞ্ঞীসত্তাৰাসৰতায তংসরিক্খকা উপেক্খাপি ঈদিসেসু ঠানেসু সুখসরিক্খতা, এৰং সন্তসভাৰতা ঞাণসহিততা চ. কেচি পন চতুত্থজ্ঝানচেতনানুগুণাতি নিদস্সেন্তা কসিণসজ্জনকালে কসিণজ্ঝানকালে কসিণাসেৰনকালে লব্ভতীতি ততিযজ্ঝানচেতনায আসন্নঘটিততা ৰুত্তাতি ৰদন্তি, তং তেসং মতিমত্তং, ৰুত্তনযেনেৰ তাসং ঘটিততা ৰেদিতব্বা. উভযমিস্সকৰসেনাতি উভযেসং কুসলাকুসলসঙ্খারানং সুখদুক্খানঞ্চ মিস্সকভাৰৰসেন. ৰেমানিকপেতানন্তি ইদং বাহুল্লতো ৰুত্তং, ইতরেসম্পি ৰিনিপাতিকানং কালেন দুক্খং হোতিযেৰ.

তস্স পহানাযাতি তস্স যথাৰুত্তস্স কম্মস্স অনুপ্পত্তিধম্মতাপাদনায. যা চেতনাতি যা অপচযগামিনিচেতনা. কম্মং পত্ৰাতি সুখকম্মন্তি ৰুচ্চমানে মগ্গচেতনায অঞ্ঞো পণ্ডরতরো ধম্মো নাম নত্থি অচ্চন্তপারিসুদ্ধিভাৰতো. অকণ্হা অসুক্কাতি আগতাতি এত্থ সুক্কভাৰপটিক্খেপকারণং হেট্ঠা ৰুত্তনযমেৰ. তেনাহ ‘‘ইদং পন কম্মচতুক্কং পত্ৰা’’তিআদি.

৮২. অনিয্যানিকপক্খেতি অচেল়কপব্বজ্জায কুক্কুরৰতে চ. যোগেতি ঞাযধম্মপটিপত্তিযন্তি অত্থো. যোনেনাতি যো তিত্থিযপরিৰাসো তেন ভগৰতা পঞ্ঞত্তো. যং তিত্থিযপরিৰাসং সমাদিযিত্ৰাতি অযমেত্থ যোজনা. ঘংসিত্ৰা সুৰণ্ণং ৰিয নিঘংসোপ্পলে. কোট্টেত্ৰা হত্থেন ৰিয কুলালভাজনং.

ৰূপকট্ঠোতি ৰিৰিত্তো একীভূতো. পেসিতত্তোতি নিব্বানং পতি পেসিতত্তো. কামং তদনুত্তরং ব্রহ্মচরিযপরিযোসানং…পে… ৰিহাসীতি ইমিনাৰ অরহত্তনিকূটেন দেসনা নিট্ঠাপিতা হোতি, আযস্মতো পন সেনিযস্স পটিপত্তিকিত্তনপরমেতং উজুকং আপন্নঅরহত্তভাৰদীপনং, যদিদং ‘‘অঞ্ঞতরো খো পনা’’তিআদিৰচনন্তি আহ ‘‘অরহত্তনিকূটেনেৰা’’তি. অরহত্তাধিগমোযেৰ তস্স তেসং অব্ভন্তরতা. সেসং সব্বং সুৰিঞ্ঞেয্যমেৰ.

কুক্কুরৰতিকসুত্তৰণ্ণনায লীনত্থপ্পকাসনা সমত্তা.