৫. চূল়যমকৰগ্গো

১. সালেয্যকসুত্তৰণ্ণনা

৪৩৯. মহাজনকাযে সন্নিপতিতেতি কেচি ‘‘পহংসনৰিধিং দস্সেত্ৰা রাজকুমারং হাসেস্সামা’’তি, কেচি ‘‘তং কীল়নং পস্সিস্সামা’’তি এৰং মহাজনসমূহে সন্নিপতিতে. দেৰনটন্তি দিব্বগন্ধব্বং. কুসলং কুসলন্তি ৰচনং উপাদাযাতি ‘‘কচ্চি কুসলং? আম কুসল’’ন্তি ৰচনপটিৰচনৰসেন পৰত্তকুসলৰাদিতায তে মনুস্সা আদিতো কুসলাতি সমঞ্ঞং লভিংসু. তেসং কুসলানং ইস্সরাতি রাজকুমারা কোসলা. কোসলে জাতা. তেসং নিৰাসোতি সব্বং পুব্বে ৰুত্তনযমেৰ. তেনাহ ‘‘সো পদেসো কোসলাতি ৰুচ্চতী’’তি.

চারিকং চরমানোতি সামঞ্ঞৰচনম্পি ‘‘মহতা…পে… তদৰসরী’’তি ৰচনতো ৰিসেসং নিৰিট্ঠমেৰাতি আহ ‘‘অতুরিতচারিকং চরমানো’’তি. মহতাতি গুণমহত্তেনপি সঙ্খ্যামহত্তেনপি মহতা. তস্মিঞ্হি ভিক্খুসমূহে কেচি অধিসীলসিক্খাৰসেন সীলসম্পন্না, তথা কেচি সীলসমাধিসম্পন্না, কেচি সীলসমাধিপঞ্ঞাসম্পন্নাতি গুণমহত্তেনপি সো ভিক্খুসমূহো মহাতি. তং অনামসিত্ৰা সঙ্খ্যামহত্তমেৰ দস্সেন্তো ‘‘সতং ৰা’’তিআদিমাহ. অঞ্ঞগামপটিবদ্ধজীৰিকাৰসেন সমোসরন্তি এত্থাতি সমোসরণং, গামো নিৰাসগামো. ন্তি সালং ব্রাহ্মণগামং. ৰিহারোতি ভগৰতো ৰিহরণট্ঠানং. এত্থাতি এতস্মিং সালেয্যকসুত্তে. অনিযমিতোতি অসুকস্মিং আরামে পব্বতে রুক্খমূলে ৰাতি ন নিযমিতো, সরূপগ্গহণৰসেন ন নিযমিত্ৰা ৰুত্তো. তস্মাতি অনিযমিতত্তা. অত্থাপত্তিসিদ্ধমত্থং পরিকপ্পনৰসেন দস্সেন্তো ‘‘ৰনসণ্ডো ভৰিস্সতী’’তি আহ, অদ্ধা ভৰেয্যাতি অত্থো.

উপলভিংসূতি (সারত্থ. টী. ১.১.ৰেরঞ্জকণ্ডৰণ্ণনা; দী. নি. টী. ১.২৫৫; অ. নি. টী. ২.৩.৬৪) সৰনৰসেন উপলভিংসূতি ইমমত্থং দস্সেন্তো ‘‘সোতদ্ৰার…পে… জানিংসূ’’তি আহ. অৰধারণফলত্তা সব্বম্পি ৰাক্যং অন্তোগধাৰধারণন্তি আহ ‘‘পদপূরণমত্তে ৰা নিপাতো’’তি. অৰধারণত্থেতি পন ইমিনা ইট্ঠত্থাৰধারণত্থং খো-সদ্দগ্গহণন্তি দস্সেতি. ‘‘অস্সোসু’’ন্তি পদং খো-সদ্দে গহিতে তেন ফুল্লিতমণ্ডিতৰিভূসিতং ৰিয হোন্তং পূরিতং নাম হোতি, তেন চ পুরিমপচ্ছিমপদানি সংসিলিট্ঠানি হোন্তি, ন তস্মিং অগ্গহিতেতি আহ ‘‘পদপূরণেন ব্যঞ্জনসিলিট্ঠতামত্তমেৰা’’তি. মত্ত-সদ্দো ৰিসেসনিৰত্তিঅত্থো. তেনস্স অনত্থন্তরদীপনতং দস্সেতি, এৰ-সদ্দেন পন ব্যঞ্জনসিলিট্ঠতায একন্তিকতং. সালাযং জাতা সংৰড্ঢকা সালেয্যকা যথা ‘‘কত্তেয্যকা উব্ভেয্যকা’’তি.

সমিতপাপত্তাতি অচ্চন্তং অনৰসেসতো সৰাসনং সমিতপাপত্তা. এৰঞ্হি বাহিরকৰীতরাগসেক্খাসেক্খপাপসমনতো ভগৰতো পাপসমনং ৰিসেসিতং হোতি. অনেকত্থত্তা নিপাতানং ইধ অনুস্সৰত্থো অধিপ্পেতোতি আহ ‘‘খলূতি অনুস্সৰনত্থে নিপাতো’’তি. আলপনমত্তন্তি পিযালাপৰচনং. পিযসমুদাহারা হেতে ‘‘ভো’’তি ৰা ‘‘আৰুসো’’তি ৰা ‘‘দেৰানংপিযা’’তি ৰা. গোত্তৰসেনাতি এত্থ তং তাযতীতি গোত্তং. গোতমোতি হি পৰত্তমানং অভিধানং বুদ্ধিঞ্চ একংসিকৰিসযতায তাযতি রক্খতীতি গোতমগোত্তং. যথা হি বুদ্ধি আরম্মণভূতেন অত্থেন ৰিনা ন ৰত্ততি, এৰং অভিধানং অভিধেয্যভূতেন, তস্মা সো তানি তাযতি রক্খতীতি ৰুচ্চতি. সো পন অত্থতো অঞ্ঞকুলপরম্পরাসাধারণং তস্স কুলস্স আদিপুরিসসমুদাগতং তংকুলপরিযাপন্নসাধারণং সামঞ্ঞরূপন্তি দট্ঠব্বং. উচ্চাকুলপরিদীপনং উদিতোদিতৰিপুলখত্তিযকুলৰিভাৰনতো. সব্বখত্তিযানঞ্হি আদিভূতমহাসম্মতমহারাজতো পট্ঠায অসম্ভিন্নং উল়ারতমং সক্যরাজকুলং. কেনচি পারিজুঞ্ঞেনাতি ঞাতিপারিজুঞ্ঞভোগপারিজুঞ্ঞাদিনা কেনচিপি পারিজুঞ্ঞেন পরিহানিযা অনভিভূতো অনজ্ঝোত্থটো. তথা হি কদাচিপি তস্স কুলস্স তাদিসপারিজুঞ্ঞাভাৰো, অভিনিক্খমনকালে চ ততো সমিদ্ধতমভাৰো লোকে পাকটো পঞ্ঞাতোতি. সক্যকুলা পব্বজিতোতি ইদং ৰচনং ভগৰতো সদ্ধাপব্বজিতভাৰদীপনং ৰুত্তং মহন্তং ঞাতিপরিৰট্টং মহন্তঞ্চ ভোগক্খন্ধং পহায পব্বজিতভাৰদীপনতো. এত্থ চ সমণোতি ইমিনা পরিক্খকজনেহি ভগৰতো বহুমতভাৰো দস্সিতো সমিতপাপতাদীপনতো, গোতমোতি ইমিনা লোকিযজনেহি উল়ারতমকুলীনতাদীপনতো.

অব্ভুগ্গতোতি এত্থ অভি-সদ্দো ইত্থম্ভূতাখ্যানে, তংযোগতো পন ‘‘ভৰন্তং গোতম’’ন্তি উপযোগৰচনং সামিঅত্থেপি সমানং ইত্থম্ভূতযোগদীপনতো ‘‘ইত্থম্ভূতাখ্যানত্থে’’তি ৰুত্তং. তেনাহ ‘‘তস্স খো পন ভোতো গোতমস্সাতি অত্থো’’তি. কল্যাণোতি ভদ্দকো. সা চস্স কল্যাণতা উল়ারৰিসযতাযাতি আহ ‘‘কল্যাণগুণসমন্নাগতো’’তি. তংৰিসযতা হেত্থ সমন্নাগমো. সেট্ঠোতি এত্থাপি এসেৰ নযো যথা ‘‘ভগৰাতি ৰচনং সেট্ঠ’’ন্তি (পারা. অট্ঠ. ১.ৰেরঞ্জকণ্ডৰণ্ণনা; ৰিসুদ্ধি. ১.১৪২; উদা. অট্ঠ. ১; ইতিৰু. অট্ঠ. নিদানৰণ্ণনা; মহানি. অট্ঠ. ৫০). ‘‘ভগৰা অরহ’’ন্তিআদিনা গুণানং সংকিত্তনতো সংসদ্দনতো চ কিত্তিসদ্দো ৰণ্ণোতি আহ ‘‘কিত্তিযেৰা’’তি. কিত্তিপরিযাযোপি হি সদ্দ-সদ্দো যথা তং ‘‘উল়ারসদ্দা ইসযো গুণৰন্তো তপস্সিনো’’তি. থুতিঘোসোতি অভিত্থৰুদাহারো. অজ্ঝোত্থরিত্ৰাতি পটিপক্খাভাৰেন অনঞ্ঞসাধারণতায চ অভিভৰিত্ৰা.

সো ভগৰাতি যো সো সমতিংস পারমিযো পূরেত্ৰা সব্বকিলেসে ভঞ্জিত্ৰা অনুত্তরং সম্মাসম্বোধিং অভিসম্বুদ্ধো দেৰানং অতিদেৰো সক্কানং অতিসক্কো ব্রহ্মানং অতিব্রহ্মা লোকনাথো ভাগ্যৰন্ততাদীহি কারণেহি ভগৰাতি লদ্ধনামো, সো ভগৰা. ‘‘ভগৰা’’তি হি ইদং সত্থু নামকিত্তনং. তথা হি ৰুত্তং ‘‘ভগৰাতি নেতং নামং মাতরা কত’’ন্তিআদি (মহানি. ১৪৯, ১৯৮, ২১০; চূল়নি. অজিতমাণৰপুচ্ছানিদ্দেস ২). পরতো পন ‘‘ভগৰা’’তি গুণকিত্তনমেৰ. এৰং ‘‘অরহ’’ন্তিআদীহি পদেহি যে সদেৰকে লোকে অতিৰিয পঞ্ঞাতা বুদ্ধগুণা, তে নানপ্পকারতো ৰিভাৰিতাতি দস্সেতুং পচ্চেকং ইতিপি-সদ্দো যোজেতব্বোতি আহ ‘‘ইতিপি অরহং, ইতিপি সমাসম্বুদ্ধো…পে… ইতিপি ভগৰা’’তি. ‘‘ইতিপেতং ভূতং, ইতিপেতং তচ্ছ’’ন্তিআদীসু (দী. নি. ১.৬) ৰিয হি ইধ ইতি-সদ্দো আসন্নপচ্চক্খকারণত্থো, পি-সদ্দো সম্পিণ্ডনত্থো তেন তেসং গুণানং বহুভাৰদীপনতো. তানি গুণসল্লক্খণকারণানি সদ্ধাসম্পন্নানং ৰিঞ্ঞুজাতিকানং পচ্চক্খানি এৰাতি দস্সেন্তো ‘‘ইমিনা চ ইমিনা চ কারণেনাতি ৰুত্তং হোতী’’তিআদি. ততো ৰিসুদ্ধিমগ্গতো. তেসন্তি ‘‘অরহ’’ন্তিআদীনং. ৰিত্থারো অত্থনিদ্দেসো গহেতব্বো. ততো এৰ তংসংৰণ্ণনাযং (ৰিসুদ্ধি. মহাটী. ১.১৩০) ৰুত্তো ‘‘আরকাতি অরহং সুৰিদূরভাৰতো, আরকাতি অরহং আসন্নভাৰতো, রহিতব্বস্স অভাৰতো, সযঞ্চ অরহিতব্বতো, নত্থি এতস্স রহোগমনং গতীসু পচ্চাজাতি, পাসংসভাৰতো ৰা অরহ’’ন্তিআদিনা ‘‘অরহ’’ন্তিআদীনং পদানং অত্থো ৰিত্থারতো ৰেদিতব্বো.

ভৰন্তি চেত্থ (ৰিসুদ্ধি. মহাটী. ১.১৩০; সারত্থ. টী. ১.ৰেরঞ্জকণ্ডৰণ্ণনা) –

‘‘সম্মা নপ্পটিপজ্জন্তি, যে নিহীনাসযা নরা;

আরকা তেহি ভগৰা, দূরে তেনারহং মতো.

যে সম্মা পটিপজ্জন্তি, সুপ্পণীতাধিমুত্তিকা;

ভগৰা তেহি আসন্নো, তেনাপি অরহং জিনো.

পাপধম্মা রহা নাম, সাধূহি রহিতব্বতো;

তেসং সুট্ঠু পহীনত্তা, ভগৰা অরহং মতো.

যে সচ্ছিকতসদ্ধম্মা, অরিযা সুদ্ধগোচরা;

ন তেহি রহিতো হোতি, নাথো তেনারহং মতো.

রহো ৰা গমনং যস্স, সংসারে নত্থি সব্বসো;

পহীনজাতিমরণো, অরহং সুগতো মতো.

গুণেহি সদিসো নত্থি, যস্মা লোকে সদেৰকে;

তস্মা পাসংসিযত্তাপি, অরহং দ্ৰিপদুত্তমো.

আরকা মন্দবুদ্ধীনং, আসন্না চ ৰিজানতং;

রহানং সুপ্পহীনত্তা, ৰিদূনমরহেয্যতো;

ভৰেসু চ রহাভাৰা, পাসংসা অরহং জিনো’’তি.

সুন্দরন্তি ভদ্দকং. তঞ্চ পস্সন্তস্স হিতসুখাৰহভাৰেন ৰেদিতব্বন্তি আহ ‘‘অত্থাৰহং সুখাৰহ’’ন্তি. তত্থ অত্থাৰহন্তি দিট্ঠধম্মিকসম্পরাযিকপরমত্থসঞ্হিতহিতাৰহং. সুখাৰহন্তি তপ্পরিযাপন্নতিৰিধসুখাৰহং. তথারূপানন্তি তাদিসানং. যাদিসেহি পন গুণেহি ভগৰা সমন্নাগতো, তেহি চতুপ্পমাণিকস্স লোকস্স সব্বথাপি অচ্চন্তায পসাদনীযোতি দস্সেতুং ‘‘অনেকেহিপী’’তিআদি ৰুত্তং. তত্থ যথাভূত…পে… অরহতন্তি ইমিনা ধম্মপ্পমাণানং লূখপ্পমাণানং সত্তানং ভগৰতো পসাদাৰহতমাহ, ইতরেন ইতরেসং. দস্সনমত্তম্পিসাধু হোতীতি এত্থ কোসিযসকুণস্স ৰত্থু কথেতব্বং. একং পদম্পি সোতুং লভিস্সাম, সাধুতরংযেৰ ভৰিস্সতীতি এত্থ মণ্ডূকদেৰপুত্তৰত্থু কথেতব্বং.

ইমিনা নযেন অগারিকপুচ্ছা আগতাতি ইদং যেভুয্যৰসেন ৰুত্তং. যেভুয্যেন হি অগারিকা এৰং পুচ্ছন্তি. অনগারিকপুচ্ছাযপি এসেৰ নযো. যথা ন সক্কোন্তি…পে… ৰিস্সজ্জেন্তোতি ইমিনা সত্থু তেসং ব্রাহ্মণগহপতিকানং নিগ্গণ্হনৰিধিং দস্সেতি. তেসঞ্হি সংখিত্তরুচিতায সঙ্খেপদেসনা, তায অত্থং অজানন্তা ৰিত্থারদেসনং আযাচন্তি, সা চ নেসং সংখিত্তরুচিতা পণ্ডিতমানিতায, সো চ মানো যথাদেসিতস্স অত্থস্স অজানন্তে অপ্পতিট্ঠো হোতি, ইতি ভগৰা তেসং মাননিগ্গহৰিধিং চিন্তেত্ৰা সঙ্খেপেনেৰ পঞ্হং ৰিস্সজ্জেসি, ন সব্বসো দেসনায অসল্লক্খণত্থং. তেনাহ ‘‘পণ্ডিতমানিকা হী’’তিআদি. যস্মা মং তুম্হে যাচথ, সংখিত্তেন ৰুত্তমত্থং ন জানিত্থাতি অধিপ্পাযো.

৪৪০. ‘‘একৰিধেন ঞাণৰত্থু’’ন্তিআদীসু (ৰিভ. ৭৫১) ৰিয কোট্ঠাসত্থো ৰিধ-সদ্দো, সো চ ৰিভত্তিৰচনৰিপল্লাসং কত্ৰা পচ্চত্তে করণৰচনৰসেন ‘‘তিৰিধ’’ন্তি ৰুত্তো. অত্থো পন করণপুথুৰচনৰসেন দট্ঠব্বোতি আহ ‘‘তিৰিধন্তি তীহি কোট্ঠাসেহী’’তি. পকারত্থো ৰা ৰিধ-সদ্দো, পকারত্থত্তাযেৰ লব্ভমানং অধম্মচরিযাৰিসমচরিযাভাৰসামঞ্ঞং, কাযদ্ৰারিকভাৰসামঞ্ঞং ৰা উপাদায একত্তং নেত্ৰা ‘‘তিৰিধ’’ন্তি ৰুত্তং. পকারভেদে পন অপেক্খিতে ‘‘তিৰিধা’’ইচ্চেৰ ৰুত্তং হোতি. কাযেনাতি এত্থ কাযোতি চোপনকাযো অধিপ্পেতো, সো চ অধম্মচরিযায দ্ৰারভূতো তেন ৰিনা তস্সা অপ্পৰত্তনতো. কাযেনাতি চ হেতুম্হি করণৰচনং. কিঞ্চাপি হি অধম্মচরিযাসঙ্খাতচেতনাসমুট্ঠানা সা ৰিঞ্ঞত্তি, ন চ সা পট্ঠানে আগতেসু চতুৰীসতিযা পচ্চযেসু একেনপি পচ্চযেন চেতনায পচ্চযো হোতি, তস্সা পন তথাপৰত্তমানায কাযকম্মসঞ্ঞিতায চেতনায পৰত্তি হোতীতি তেন দ্ৰারেন লক্খিতব্বভাৰতো তস্সা কারণং ৰিয চ সব্বোহারমত্তং হোতি. কাযদ্ৰারেনাতি ৰা কাযেন দ্ৰারভূতেন কাযদ্ৰারভূতেনাতি তং ইত্থম্ভূতলক্খণে করণৰচনং. অধম্মং চরতি এতাযাতি অধম্মচরিযা, তথাপৰত্তা চেতনা. অধম্মোতি পন তংসমুট্ঠানো পযোগো দট্ঠব্বো. ধম্মতো অনপেতাতি ধম্মা, ন ধম্মাতি অধম্মা, অধম্মা চ সা চরিযা চাতি অধম্মচরিযা. পচ্চনীকসমনট্ঠেন সমং, সমানং সদিসং যুত্তন্তি ৰা সমং, সুচরিতং. সমতো ৰিগতং, ৰিরুদ্ধং ৰা তস্সাতি ৰিসমং, দুচ্চরিতং. সা এৰ ৰিসমা চরিযাতি ৰিসমচরিযা. সব্বেসু কণ্হসুক্কপদেসূতি ‘‘চতুব্বিধং ৰাচায অধম্মচরিযাৰিসমচরিযা হোতী’’তিআদিনা উদ্দেসনিদ্দেসৰসেন আগতেসু সব্বেসু কণ্হপদেসু – ‘‘তিৰিধং খো গহপতযো কাযেন ধম্মচরিযাসমচরিযা হোতী’’তিআদিনা উদ্দেসনিদ্দেসৰসেন আগতেসু সব্বেসু সুক্কপদেসু চ.

রোদেতি কুরূরকম্মন্ততায পরপটিবদ্ধে সত্তে অস্সূনি মোচেতীতি রুদ্দো, সো এৰ লুদ্দো র-কারস্স ল-কারং কত্ৰা. কক্খল়োতি লুদ্দো. দারুণোতি ফরুসো. সাহসিকোতি সাহস্সকারী. সচেপি ন লিপ্পন্তি. তথাৰিধো পরেসং ঘাতনসীলো লোহিতপাণীত্ৰেৰ ৰুচ্চতি যথা দানসীলো পরেসং দানত্থং অধোতহত্থোপি ‘‘পযতপাণী’’ত্ৰেৰ ৰুচ্চতি. পহরণং পহারদানমত্তং হতং, পৰুদ্ধং পহরণং পরস্স মারণং পহতন্তি দস্সেন্তো ‘‘হতে’’তিআদিমাহ. তত্থ নিৰিট্ঠোতি অভিনিৰিট্ঠো পসুতো.

যস্স ৰসেন ‘‘পরস্সা’’তি সামিনিদ্দেসো, তং সাপতেয্যং. যঞ্হি সামঞ্ঞতো গহিতং, তং তেনেৰ সামিনিদ্দেসেন পকাসিতন্তি আহ ‘‘পরস্স সন্তক’’ন্তি. পরস্সপরৰিত্তূপকরণন্তি ৰা একমেৰেতং সমাসপদং, যং কিঞ্চি পরসন্তকং ৰিসেসতো পরস্স ৰিত্তূপকরণং ৰাতি অত্থো. তেহি পরেহীতি যেসং সন্তকং, তেহি. যস্স ৰসেন পুরিসো ‘‘থেনো’’তি ৰুচ্চতি, তং থেয্যন্তি আহ ‘‘অৰহরণচিত্তস্সেতং অধিৰচন’’ন্তি. থেয্যসঙ্খাতেন, ন ৰিস্সাসতাৰকালিকাদিৰসেনাতি অত্থো.

মতে ৰাতি ৰা-সদ্দো অৰুত্তৰিকপ্পত্থো. তেন পব্বজিতাদিভাৰং সঙ্গণ্হাতি. এতেনুপাযেনাতি যং মাতরি মতায, নট্ঠায ৰা পিতা রক্খতি, সা পিতুরক্খিতা. যং উভোসু অসন্তেসু ভাতা রক্খতি, সা ভাতুরক্খিতাতি এৰমাদিং সন্ধাযাহ. সভাগকুলানীতি আৰাহকিরিযায সভাগানি কুলানি. দস্সুকৰিধিং ৰা উদ্দিস্স ঠপিতদণ্ডারাজাদীহি. সম্মাদিট্ঠিসুত্তে (ম. নি. অট্ঠ. ১.৮৯) ‘‘অসদ্ধম্মাধিপ্পাযেন কাযদ্ৰারপ্পৰত্তা অগমনীযট্ঠানৰীতিক্কমচেতনা’’তি এৰং ৰুত্তমিচ্ছাচারলক্খণৰসেন.

হত্থপাদাদিহেতূতি হত্থপাদাদিভেদনহেতু. ধনহেতূতি ধনস্স লাভহেতু জানিহেতু চ. লাভোতি ঘাসচ্ছাদনানি লব্ভতীতি লাভো. কিঞ্চিক্খন্তি কিঞ্চিমত্তকং আমিসজাতং. তেনাহ ‘‘যং ৰা’’তিআদি. জানন্তোযেৰাতি মুসাভাৰং তস্স ৰত্থুনো অত্থি, তং জানন্তো এৰ.

অণ্ডকাতি ৰুচ্চতি রুক্খে অণ্ডসদিসা গণ্ঠিযো. যথা থদ্ধা ৰিসমা দুব্বিনীতা চ হোন্তি, এৰমেৰং খুংসনৰম্ভনৰসেন পৰত্তৰাচাপি হি ‘‘অণ্ডকা’’তি ৰুত্তা. তেনাহ ‘‘যথা সদোসে রুক্খে’’তিআদি. কক্কসাতি ফরুসা এৰ, সো পনস্সা কক্কসভাৰো ব্যাপাদনিমিত্ততায ততো পূতিকাতি. তেনাহ ‘‘যথা নামা’’তিআদি. কটুকাতি অনিট্ঠা. অমনাপাতি ন মনৰড্ঢনী, ততো এৰ দোসজননী, চিত্তসন্দোসুপ্পত্তিকারিকা. মম্মেসূতি ঘট্টনেন দুক্খুপ্পত্তিতো মম্মসদিসেসু জাতিআদীসু. লগ্গনকারীতি এৰং ৰদন্তস্স এৰং ৰদামীতি অত্থাধিপ্পাযেন লগ্গনকারী, ন ব্যঞ্জনৰসেন. কোধস্স আসন্না তস্স কারণভাৰতো. সদোসৰাচাযাতি অত্তনো সমুট্ঠাপকদোসস্স ৰসেন সদোসৰাচায ৰেৰচনানি.

অকালেনাতি অযুত্তকালেন. অকারণনিস্সিতন্তি নিপ্ফলং. ফলঞ্হি কারণনিস্সিতং নাম তদৰিনাভাৰতো. অকারণনিস্সিতং নিপ্ফলং, সম্ফন্তি অত্থো. অসভাৰৰত্তাতি অযাথাৰৰাদী. অসংৰরৰিনযপটিসংযুত্তস্সাতি সংৰরৰিনযরহিতস্স, অত্তনো সুণন্তস্স চ ন সংৰরৰিনযাৰহস্স ৰত্তা. হদযমঞ্জূসাযং নিধেতুন্তি অহিতসংহিতত্তা চিত্তং অনুপ্পৰিসেত্ৰা নিধেতুং. অযুত্তকালেতি ধম্মং কথেন্তেন যো অত্থো যস্মিং কালে ৰত্তব্বো, ততো পুব্বে পচ্ছা তস্স অকালো, তস্মিং অযুত্তকালে ৰত্তা হোতি. অনপদেসন্তি ভগৰতা অসুকসুত্তে এৰং ৰুত্তন্তি সুত্তাপদেসৰিরহিতং. অপরিচ্ছেদন্তি পরিচ্ছেদরহিতং. যথা পন ৰাচা পরিচ্ছেদরহিতা হোতি, তং দস্সেতুং ‘‘সুত্তং ৰা’’তিআদি ৰুত্তং. উপলব্ভন্তি অনুযোগং. বাহিরকথংযেৰাতি যং সুত্তং, জাতকং ৰা নিক্খিত্তং, তস্স সরীরভূতং কথং অনামসিত্ৰা ততো বহিভূতংযেৰ কথং. সম্পজ্জিত্ৰাতি ৰিরুল়্হং আপজ্জিত্ৰা. পৰেণিজাতকাৰাতি অনুজাতপারোহমূলানিযেৰ তিট্ঠন্তি. আহরিত্ৰাতি নিক্খিত্তসুত্ততো অঞ্ঞম্পি অনুযোগউপমাৰত্থুৰসেন তদনুপযোগিনং আহরিত্ৰা. জানাপেতুন্তি এতদত্থমিদং ৰুত্তন্তি জানাপেতুং যো সক্কোতি. তস্স কথেতুন্তি তস্স তথারূপস্স ধম্মকথিকস্স বহুম্পি কথেতুং ৰট্টতি. ন অত্থনিস্সিতন্তি অত্তনো পরেসঞ্চ ন হিতাৰহং.

অভিজ্ঝাযনং যেভুয্যেন পরসন্তকস্স দস্সনৰসেন হোতীতি ‘‘অভিজ্ঝায ওলোকেতা হোতী’’তি ৰুত্তং. অভিজ্ঝাযন্তো ৰা অভিজ্ঝাযিতং ৰত্থুং যত্থ কত্থচি ঠিতম্পি পচ্চক্খতো পস্সন্তো ৰিয অভিজ্ঝাযতীতি ৰুত্তং ‘‘অভিজ্ঝায ওলোকেতা হোতী’’তি. কম্মপথভেদো ন হোতি, কেৰলং লোভমত্তোৰ হোতি পরিণামনৰসেন অপ্পৰত্তত্তা. যথা পন কম্মপথভেদো হোতি, তং দস্সেতুং ‘‘যদা পনা’’তিআদি ৰুত্তং. পরিণামেতীতি অত্তনো সন্তকভাৰেন পরিগ্গয্হ নামেতি.

ৰিপন্নচিত্তোতি ব্যাপাদেন ৰিপত্তিং আপাদিতচিত্তো. তেনাহ ‘‘পূতিভূতচিত্তো’’তি. ব্যাপাদো হি ৰিসং ৰিয লোহিতস্স চিত্তং পূতিভাৰং জনেতি. দোসেন দুট্ঠচিত্তসঙ্কপ্পোতি ৰিসেন ৰিয সপ্পিআদিকোপেন দূসিতচিত্তসঙ্কপ্পো. ঘাতীযন্তূতি হনীযন্তু. ৰধং পাপুণন্তূতি মরণং পাপুণন্তু. মা ৰা অহেসুন্তি সব্বেন সব্বং ন হোন্তু. তেনাহ ‘‘কিঞ্চিপি মা অহেসু’’ন্তি, অনৰসেসৰিনাসং পাপুণন্তূতি অত্থো. হঞ্ঞন্তূতি আদিচিন্তনেনেৰাতি একন্ততো ৰিনাসচিন্তায এৰ.

মিচ্ছাদিট্ঠিকোতি অযোনিসো উপ্পন্নদিট্ঠিকো. সো চ একন্ততো কুসলপটিপক্খদিট্ঠিকোতি আহ ‘‘অকুসলদস্সনো’’তি. ৰিপল্লত্থদস্সনোতি ধম্মতায ৰিপরিযাসগ্গাহী. নত্থি দিন্নন্তি দেয্যধম্মসীসেন দানং ৰুত্তন্তি আহ ‘‘দিন্নস্স ফলাভাৰং সন্ধায ৰদতী’’তি. দিন্নং পন অন্নাদিৰত্থুং কথং পটিক্খিপতি. এস নযো ‘‘যিট্ঠং হুত’’ন্তি এত্থাপি. মহাযাগোতি সব্বসাধারণং মহাদানং. পহেণকসক্কারোতি পাহুনকানং কত্তব্বসক্কারো. ফলন্তি আনিসংসফলঞ্চ নিস্সন্দফলঞ্চ. ৰিপাকোতি সদিসং ফলং. পরলোকে ঠিতস্স অযং লোকো নত্থীতি পরলোকে ঠিতস্স কম্মুনা লদ্ধব্বো অযং লোকো ন হোতি. ইধলোকে ঠিতস্সপি পরলোকো নত্থীতি ইধলোকে ঠিতস্স কম্মুনা লদ্ধব্বো পরলোকো ন হোতি. তত্থ কারণমাহ ‘‘সব্বে তত্থ তত্থেৰ উচ্ছিজ্জন্তী’’তি. ইমে সত্তা যত্থ যত্থ ভৰযোনিগতিআদীসু ঠিতা তত্থ তত্থেৰ উচ্ছিজ্জন্তি নিরুদযৰিনাসৰসেন ৰিনস্সন্তি. ফলাভাৰৰসেনাতি মাতাপিতূসু সম্মাপটিপত্তিমিচ্ছাপটিপত্তীনং ফলস্স অভাৰৰসেন ‘‘নত্থি মাতা, নত্থি পিতা’’তি ৰদতি, ন মাতাপিতূনং, নাপি তেসু সম্মাপটিপত্তিমিচ্ছাপটিপত্তীনং অভাৰৰসেন তেসং লোকপচ্চক্খত্তা. বুব্বুল়কস্স ৰিয ইমেসং সত্তানং উপ্পাদো নাম কেৰলোৰ, ন চৰিত্ৰা আগমনপুব্বকোতি দস্সনত্থং ‘‘নত্থি সত্তা ওপপাতিকা’’তি ৰুত্তন্তি আহ ‘‘চৰিত্ৰা উপপজ্জনকসত্তা নাম নত্থীতি ৰদতী’’তি. সমণেন নাম যাথাৰতো জানন্তেন কস্সচি কিঞ্চি অকথেত্ৰা সঞ্ঞতেন ভৰিতব্বং, অঞ্ঞথা অহোপুরিসিকা নাম সিযা, কিং পরো পরস্স করিস্সতি, তথা অত্তনো সম্পাদনস্স কস্সচি অৰসরো এৰ নত্থি তত্থ তত্থেৰ উচ্ছিজ্জনতোতি আহ ‘‘যে ইমঞ্চ…পে… পৰেদেন্তী’’তি. এত্তাৰতাতি ‘‘নত্থি দিন্ন’’ন্তিআদিনা ব্যপদেসেন. দসৰত্থুকাতি পটিক্খিপিতব্বানি দস ৰত্থূনি এতিস্সাতি দসৰত্থুকা.

৪৪১. অনভিজ্ঝাদযো হেট্ঠা অত্থতো পকাসিতত্তা উত্তানত্থাযেৰ.

৪৪২. সহ ব্যযতি গচ্ছতীতি সহব্যো, সহৰত্তনকো, তস্স ভাৰো সহব্যতা, সহপৰত্তীতি আহ ‘‘সহভাৰং উপগচ্ছেয্য’’ন্তি. ব্রহ্মানং কাযো সমূহোতি ব্রহ্মকাযো, তপ্পরিযাপন্নতায তত্থ গতাতি ব্রহ্মকাযিকা. কামং চেতায সব্বস্সপি ব্রহ্মনিকাযস্স সমঞ্ঞায ভৰিতব্বং, ‘‘আভান’’ন্তিআদিনা পন দুতিযজ্ঝানভূমিকাদীনং উপরি গহিতত্তা গোবলীবদ্দঞাযেন তদৰসেসানং অযং সমঞ্ঞাতি আহ ‘‘ব্রহ্মকাযিকানং দেৰানন্তি পঠমজ্ঝানভূমিদেৰান’’ন্তি. আভা নাম ৰিসুং দেৰা নত্থি, পরিত্তাভাদীনংযেৰ পন আভাৰন্ততাসামঞ্ঞেন একজ্ঝং গহেত্ৰা পৰত্তং এতং অধিৰচনং, যদিদং ‘‘আভা’’তি যথা ‘‘ব্রহ্মপারিসজ্জব্রহ্মপুরোহিতমহাব্রহ্মানং ব্রহ্মকাযিকা’’তি. পরিত্তাভানন্তিআদি পনাতি আদি-সদ্দেন অপ্পমাণাভানং দেৰানং আভস্সরানং দেৰানন্তি ইমং পাল়িং সঙ্গণ্হাতি. একতো অগ্গহেত্ৰাতি আভাতি ৰা, একত্তকাযনানত্তসঞ্ঞাতি ৰা একতো অগ্গহেত্ৰা. তেসংযেৰাতি আভাতি ৰুত্তদেৰানংযেৰ. ভেদতো গহণন্তি কারণস্স হীনাদিভেদভিন্নতাদস্সনৰসেন পরিত্তাভাদিগ্গহণং. ইতি ভগৰা আসৰক্খযং দস্সেত্ৰাতি এৰং ভগৰা ধম্মচরিযং, সমচরিযং, ৰট্টনিস্সিতং সুগতিগামিপটিপদং, ৰিৰট্টনিস্সিতং আসৰক্খযগামিপটিপদং কত্ৰা তিভৰভঞ্জনতো আসৰক্খযং দস্সেত্ৰা অরহত্তনিকূটেন দেসনং নিট্ঠপেসি.

ইধ ঠত্ৰাতি ইমস্মিং ধম্মচরিযাসমচরিযায নিদ্দেসে ঠত্ৰা. দেৰলোকা সমানেতব্বাতি ছব্বীসতিপি দেৰলোকা সমোধানেতব্বা. ৰীসতি ব্রহ্মলোকাতি তংতংভৰপরিযাপন্ননিকাযৰসেন ৰীসতি ব্রহ্মলোকা, ৰীসতি ব্রহ্মনিকাযাতি অত্থো. দসকুসলকম্মপথেহীতি যথারহং দসকুসলকম্মপথেহি কম্মূপনিস্সযপচ্চযভূতেহি কেৰলং উপনিস্সযভূতেহি চ নিব্বত্তি দস্সিতা.

তিণ্ণং সুচরিতানন্তি তিণ্ণং কামাৰচরসুচরিতানং. কামাৰচরগ্গহণঞ্চেত্থ মনোসুচরিতাপেক্খায. ৰিপাকেনেৰাতি ইমিনা ৰিপাকুপ্পাদেনেৰ নিব্বত্তি হোতি, ন উপনিস্সযতামত্তেনাতি দস্সেতি. ‘‘উপনিস্সযৰসেনা’’তি ৰুত্তমত্থং ৰিৰরিতুং ‘‘দস কুসলকম্মপথা হী’’তিআদি ৰুত্তং. দুতিযাদীনি ভাৰেত্ৰাতিআদীসুপি ‘‘সীলে পতিট্ঠাযা’’তি পদং আনেত্ৰা সম্বন্ধিতব্বং. কস্মা পনেত্থ ‘‘উপনিস্সযৰসেনা’’তি ৰুত্তং, ননু পটিসম্ভিদামগ্গে (পটি. ম. ১.৪১) – ‘‘পঠমেন ঝানেন নীৰরণানং পহানং সীলং, ৰেরমণি সীলং, চেতনা সীলং, সংৰরো সীলং, অৰীতিক্কমো সীল’’ন্তিআদিনা সব্বেসুপি ঝানেসু সীলং উদ্ধটন্তি তস্স ৰসেন উপরিদেৰলোকানম্পি ৰিপাকেন নিব্বত্তি ৰত্তব্বাতি? ন, তস্স পরিঞ্ঞায দেসনত্তা, পরিঞ্ঞায দেসনতা চস্স ‘‘যত্থ চ পহান’’ন্তিআদিনা ৰিসুদ্ধিমগ্গসংৰণ্ণনাযঞ্চ (ৰিসুদ্ধি. মহাটী. ২.৮৩৭, ৮৩৯) পকাসিতা এৰ. তথা হি ইধাপি ‘‘দস কুসলকম্মপথা হি সীল’’ন্তিআদিনা সীলস্স রূপারূপভৰানং উপনিস্সযতা ৰিভাৰিতা, ন নিব্বত্তকতায. কস্মা পনেত্থ ভাৰনালক্খণায ধম্মচরিযায ভৰৰিসেসে ৰিভজিযমানে অসঞ্ঞভৰো ন গহিতোতি আহ ‘‘অসঞ্ঞভৰো পন…পে… ন নিদ্দিট্ঠো’’তি. বাহিরকা হি অযথাভূতদস্সিতায অসঞ্ঞভৰং ভৰৰিপ্পমোক্খং মঞ্ঞমানা তদুপগজ্ঝানং ভাৰেত্ৰা অসঞ্ঞেসু নিব্বত্তন্তি. অযমেত্থ সঙ্খেপো, যং পনেত্থ ৰত্তব্বং, তং ব্রহ্মজালট্ঠকথাযং তংসংৰণ্ণনাযঞ্চ (দী. নি. অট্ঠ. ১.৬৮-৭৩; দী. নি. টী. ১.৬৮-৭৩) ৰুত্তনযেনেৰ ৰেদিতব্বং.

সালেয্যকসুত্তৰণ্ণনায লীনত্থপ্পকাসনা সমত্তা.

২. ৰেরঞ্জকসুত্তৰণ্ণনা

৪৪৪. ৰেরঞ্জৰাসিনোতি ৰেরঞ্জগামৰাসিনো. কেচি পন ‘‘ৰিৰিধরট্ঠৰাসিনো ৰেরঞ্জকা’’তি এতমত্থং ৰদন্তি, তেসং মতেন ‘‘ৰেরজ্জকা’’তি পাল়িযা ভৰিতব্বন্তি. অনিযমিতকিচ্চেনাতি ‘‘ইমিনা নামা’’তি এৰং ন নিযমিতেন কিচ্চেন. অযং ৰিসেসোতি অযং পুগ্গলাধিট্ঠানধম্মাধিট্ঠানকতো ইমেসু দ্ৰীসু সুত্তেসু দেসনায ৰিসেসো, অত্থো পন দেসনানযো চ মজ্ঝে ভিন্নসুৰণ্ণং ৰিয অৰিসিট্ঠোতি দস্সেতি. কস্মা পন ভগৰা কত্থচি পুগ্গলাধিট্ঠানদেসনং দেসেতি, কত্থচি ধম্মাধিট্ঠানন্তি? দেসনাৰিলাসতো ৰেনেয্যজ্ঝাসযতো চ. দেসনাৰিলাসপ্পত্তা হি বুদ্ধা ভগৰন্তো, তে যথারুচি কত্থচি পুগ্গলাধিট্ঠানং কত্ৰা, কত্থচি ধম্মাধিট্ঠানং কত্ৰা ধম্মং দেসেন্তি. যে পন ৰেনেয্যা সাসনক্কমং অনোতিণ্ণা, তেসং পুগ্গলাধিট্ঠানদেসনং দেসেন্তি. যে ওতিণ্ণা, তেসং ধম্মাধিট্ঠানং. সম্মুতিসচ্চৰিসযা পুগ্গলাধিট্ঠানা, ইতরা পরমত্থসচ্চৰিসযা. পুরিমা করুণানুকূলা, ইতরা পঞ্ঞানুকূলা. সদ্ধানুসারিগোত্তানং ৰা পুরিমা. তে হি পুগ্গলপ্পমাণা, পচ্ছিমা ধম্মানুসারীনং. সদ্ধাচরিততায ৰা লোকাধিপতীনং ৰসেন পুগ্গলাধিট্ঠানা, পঞ্ঞাচরিততায ধম্মাধিপতীনং ৰসেন ধম্মাধিট্ঠানা. পুরিমা চ নেয্যত্থা, পচ্ছিমা নীতত্থা. ইতি ভগৰা তং তং ৰিসেসং অৰেক্খিত্ৰা তত্থ তত্থ দুৰিধং দেসনং দেসেতীতি ৰেদিতব্বং.

ৰেরঞ্জকসুত্তৰণ্ণনায লীনত্থপ্পকাসনা সমত্তা.

৩. মহাৰেদল্লসুত্তৰণ্ণনা

৪৪৯. গরুভাৰো গারৰং, পাসাণচ্ছত্তং ৰিয গরুকরণীযতা. সহ গারৰেনাতি সগারৰো, গরুনা কিস্মিঞ্চি ৰুত্তে গারৰৰসেন পতিস্সৰনং পতিস্সৰো, সহ পতিস্সৰেন সপ্পতিস্সৰো, পতিস্সৰভূতং তংসভাগঞ্চ যং কিঞ্চি গরুকরণং. সগারৰে সপ্পতিস্সৰচনং সগারৰসপ্পতিস্সৰচনং. গরুকরণং ৰা গারৰো, সগারৰস্স সপ্পতিস্সৰচনং সগারৰসপ্পতিস্সৰচনং. এতেন সভাৰেনেৰ সগারৰস্স তথাপৰত্তং ৰচনন্তি দস্সেতি. অঞ্ঞত্থ দু-সদ্দো গরহত্থোপি হোতি ‘‘দুক্খং দুপ্পুত্তো’’তিআদীসু ৰিয, ইধ পন সো ন সম্ভৰতি কুচ্ছিতায পঞ্ঞায অভাৰতোতি আহ ‘‘পঞ্ঞায দুট্ঠং নাম নত্থী’’তি. ‘‘দুস্সীলো’’তিআদীসু ৰিয অভাৰত্থো দু-সদ্দোতি ৰুত্তং ‘‘অপ্পঞ্ঞো নিপ্পঞ্ঞোতি অত্থো’’তি. কিত্তকেনাতি কেন পরিমাণেন. তং পন পরিমাণং যস্মা পরিমেয্যস্স অত্থস্স পরিচ্ছিন্দনং হোতি, নু-সদ্দো চ পুচ্ছায জোতকো, তস্মা ‘‘কিত্তাৰতা নু খোতি কারণপরিচ্ছেদপুচ্ছা’’তি ৰত্ৰা ‘‘কিত্তকেন নু খো এৰং ৰুচ্চতীতি অত্থো’’তি আহ. ‘‘কারণপরিচ্ছেদপুচ্ছা’’তি ইমিনা ‘‘কিত্তাৰতা’’তি সামঞ্ঞতো পুচ্ছাভাৰো দস্সিতো, ন ৰিসেসতো, তস্স পুচ্ছাৰিসেসভাৰঞাপনত্থং মহানিদ্দেসে আগতা সব্বাৰ পুচ্ছা অত্থুদ্ধারনযেন দস্সেতি ‘‘পুচ্ছা চ নামা’’তিআদিনা. অদিট্ঠং জোতীযতি এতাযাতি অদিট্ঠজোতনা, পুচ্ছা. দিট্ঠসংসন্দনা সাকচ্ছাৰসেন ৰিনিচ্ছযকরণং. ৰিমতি ছিজ্জতি এতাযাতি ৰিমতিচ্ছেদনা. অনুমতিযা পুচ্ছা অনুমতিপুচ্ছা. ‘‘তং কিং মঞ্ঞথ, ভিক্খৰে’’তিআদিপুচ্ছায হি ‘‘কিং তুম্হাকং অনুমতী’’তি অনুমতি পুচ্ছিতা হোতি. কথেতুং কম্যতায পুচ্ছা কথেতুকম্যতাপুচ্ছা.

লক্খণন্তি ঞাতুং ইচ্ছিতো যো কোচি সভাৰো. অঞ্ঞাতন্তি যেন কেনচি ঞাণেন অঞ্ঞাতভাৰং আহ. অদিট্ঠন্তি দস্সনভূতেন পচ্চক্খং ৰিয অদিট্ঠতং. অতুলিতন্তি ‘‘এত্তকং ইদ’’ন্তি তুলনভূতেন অতুলিততং. অতীরিতন্তি তীরণভূতেন অকতঞাণকিরিযাসমাপনতং. অৰিভূতন্তি ঞাণস্স অপাকটভাৰং. অৰিভাৰিতন্তি ঞাণেন অপাকটীকতভাৰং. ইধ দিট্ঠসংসন্দনাপুচ্ছা অধিপ্পেতা, ন অদিট্ঠজোতনা ৰিমতিচ্ছেদনা চাতি.

কথমযং অত্থো ৰিঞ্ঞাযতীতি আহ ‘‘থেরো হী’’তিআদি. সযং ৰিনিচ্ছিনন্তোতি সযমেৰ তেসং পঞ্হানং অত্থং ৰিসেসেন নিচ্ছিনন্তো. ইদং সুত্তন্তি ইদং পঞ্চৰীসতিপঞ্হপটিমণ্ডিতসুত্তং, ন যং কিঞ্চি অনৰসেসেনেৰ মত্থকং পাপেসীতি. ‘‘সযমেৰ পঞ্হং সমুট্ঠাপেত্ৰা সযং ৰিনিচ্ছিনন্তো’’তি এত্থ চতুক্কোটিকং ভৰতীতি দস্সেন্তো ‘‘একচ্চো হী’’তিআদিমাহ. পঞ্হং সমুট্ঠাপেতুংযেৰ সক্কোতীতি পুচ্ছনৰিধিংযেৰ জানাতি. ন নিচ্ছেতুন্তি নিচ্ছেতুং ন সক্কোতি, ৰিস্সজ্জনৰিধিং ন জানাতীতি অত্থো. ৰিসেসট্ঠানন্তি অঞ্ঞেহি অসদিসট্ঠানং. থেরেন সদিসোতি থেরেন সদিসো সাৰকো নত্থি.

সংসন্দিত্ৰাতি সংযোজেত্ৰা সমানং কত্ৰা, যথা তত্থ সব্বঞ্ঞুতঞ্ঞাণং পৰত্তং, তথা তং অৰিলোমেত্ৰাতি অত্থো. লীল়াযন্তোতি লীল়ং করোন্তো. ধম্মকথিকতায অগ্গভাৰপ্পত্তিযা তত্থ অপ্পটিহতঞাণতায বুদ্ধলীল়ায ৰিয চতুন্নং পরিসানং গমনং গণ্হন্তো ধম্মকথং কথেতি.

ইতো ৰা এত্তো ৰা অনুক্কমিত্ৰাতি উগ্গহিতকথামগ্গতো যত্থ কত্থচি ঈসকম্পি অনুক্কমিত্ৰা উগ্গহিতনিযামেনেৰাতি অত্থো. তেনাহ ‘‘যট্ঠিকোটি’’ন্তিআদি. একপদিকন্তি একপদনিক্খেপমত্তং. দণ্ডকসেতুন্তি একদণ্ডকমযং সেতুং. হেট্ঠা চ উপরি চ সুত্তপদানং আহরণেন তেপিটকং বুদ্ধৰচনং হেট্ঠুপরিযং করোন্তো. জাতস্সরসদিসঞ্চ গাথং, সুত্তপদং ৰা নিক্খিপিত্ৰা তত্থ নানাউপমাকারণানি আহরন্তো তানি চ তেহি সুত্তপদেহি বোধেন্তো সমুট্ঠাপেন্তো ‘‘জাতস্সরে পঞ্চৰণ্ণানি কুসুমানি ফুল্লাপেন্তো ৰিয সিনেরুমত্থকে ৰট্টিসহস্সং জালেন্তো ৰিযা’’তি ৰুত্তো.

একপদুদ্ধারেতি একস্মিং পদুদ্ধারণক্খণে. পদৰসেন সট্ঠি পদসতসহস্সানি গাথাৰসেন পন্নরস গাথাসহস্সানি. আকড্ঢিত্ৰা গণ্হন্তো ৰিযাতি পচ্চেকং পুপ্ফানি অনোচিনিত্ৰা ৰল্লিমেৰ আকড্ঢিত্ৰা একজ্ঝং পুপ্ফানি কত্ৰা গণ্হন্তো ৰিয. তেনাহ ‘‘একপ্পহারেনেৰা’’তি. গতিমন্তানন্তি অতিসযায ঞাণগতিযা যুত্তানং. ধিতিমন্তানন্তি ধারণবলেন যুত্তানং.

অনন্তনযুস্সদন্তি পচ্চযুপ্পন্নভাসিতত্থনিব্বানৰিপাককিরিযাদিৰসেন অনন্তপভেদে ৰিসযে পৰত্তিযা অনন্তনযেহি উস্সন্নং উপচিতং. চতুরোঘনিত্থরণত্থিকানং তিত্থে ঠপিতনাৰা ৰিযাতি যোজনা. সহস্সযুত্তআজঞ্ঞরথোতি ৰেজযন্তরথং সন্ধায ৰদতি.

যস্মা পুচ্ছাযং ব্যাপনিচ্ছানযেন ‘‘দুপ্পঞ্ঞো দুপ্পঞ্ঞো’’তি আমেডিতৰসেন ৰুত্তং, তস্মা ধম্মসেনাপতি পুচ্ছিতমত্থং ৰিস্সজ্জেন্তো পুচ্ছাসভাগেন ‘‘নপ্পজানাতি নপ্পজানাতী’’তি আমেডিতৰসেনেৰাহ. তত্থ ইতি-সদ্দো কারণত্থোতি দস্সেন্তো ‘‘যস্মা নপ্পজানাতি, তস্মা দুপ্পঞ্ঞোতি ৰুচ্চতী’’তি আহ. ইদং দুক্খন্তি ইদং উপাদানক্খন্ধপঞ্চকং দুক্খং অরিযসচ্চং. তঞ্চ খো রুপ্পনং ৰেদিযনং সঞ্জাননং অভিসঙ্খরণং ৰিজাননন্তি সঙ্খেপতো এত্তকং. ইতো উদ্ধং কিঞ্চি ধম্মজাতং দুক্খং অরিযসচ্চং নাম নত্থীতি যাথাৰসরসলক্খণতো পৰত্তিক্কমতো চেৰ পীল়নসঙ্খতসন্তাপৰিপরিণামলক্খণতো চ যথাভূতং অরিযমগ্গপঞ্ঞায নপ্পজানাতি. অৰসেসপচ্চযসমাগমে উদযতি উপ্পজ্জতি, স্ৰাযং সমুদযো সংসারপৰত্তিভাৰেনাতি আহ ‘‘পৰত্তিদুক্খপভাৰিকা’’তি, দুক্খসচ্চস্স উপ্পাদিকাতি অত্থো. যাথাৰসরসলক্খণতোতি যথাভূতং অনুপচ্ছেদকরণরসতো চেৰ সম্পিণ্ডননিদানসংযোগপলিবোধলক্খণতো চ.

ইদং নাম ঠানং পত্ৰাতি ইদং নাম অপ্পৰত্তিকারণং আগম্ম. নিরুজ্ঝতীতি অনুপ্পাদনিরোধৰসেন নিরুজ্ঝতি, তেনাহ ‘‘উভিন্নং অপ্পৰত্তী’’তি. যাথাৰসরসলক্খণতোতি যথাভূতং অচ্চুতিরসতো চেৰ নিস্সরণৰিৰেকাসঙ্খতামতলক্খণতো চ. অযং পটিপদাতি অযং সম্মাদিট্ঠিআদিকা সমোধানলক্খণা পটিপজ্জতি এতাযাতি পটিপদা. দুক্খনিরোধং গচ্ছতীতি দুক্খনিরোধং নিব্বানং সচ্ছিকিরিযাভিসমযৰসেন গচ্ছতি আরব্ভ পৰত্ততি. যাথাৰসরসলক্খণতোতি যথাভূতং কিলেসপ্পহানকরণসরসতো চেৰ নিয্যানহেতুদস্সনাধিপতেয্যলক্খণতো চ নপ্পজানাতি. অনন্তরৰারেতি দুতিযৰারে. ইমিনাৰ নযেনাতি ‘‘ইদং দুক্খং, এত্তকং দুক্খ’’ন্তিআদিনা পঠমৰারে ৰুত্তনযেন. তত্থ হি দুপ্পঞ্ঞনিদ্দেসত্তা পজাননপটিক্খেপৰসেন দেসনা আগতা, ইধ পঞ্ঞৰন্তনিদ্দেসত্তা পজাননৰসেনাতি অযমেৰ ৰিসেসো. এত্থাতি দুতিযৰারে.

সৰনতোতি কম্মট্ঠানস্স সৰনতো উগ্গণ্হাতি. গন্থসৰনমুখেন হি তদত্থস্স উগ্গহণং. ঠপেত্ৰা তণ্হন্তিআদি তস্স উগ্গহণাকারনিদস্সনং. অভিনিৰিসতীতি ৰিপস্সনাভিনিৰেসৰসেন অভিনিৰিসতি ৰিপস্সনাকম্মট্ঠানং পট্ঠপেতি. নো ৰিৰট্টেতি ৰিৰট্টে অভিনিৰেসো ন হোতি অৰিসযত্তা. অযন্তি চতুসচ্চকম্মট্ঠানিকো.

পঞ্চক্খন্ধাতি পঞ্চুপাদানক্খন্ধা. খন্ধৰসেন ৰিপস্সনাভিনিৰেসস্স চক্খাদিৰসেন ৰেদনাদিৰসেন চ সতিপি অনেকৰিধত্তে সুকরং সুৰিঞ্ঞেয্যন্তি চতুধাতুমুখেন তং দস্সেতুং ‘‘ধাতুকম্মট্ঠানৰসেন ওতরিত্ৰা’’তি আহ. রূপন্তি ৰৰত্থপেতীতি রুপ্পনট্ঠেন রূপন্তি অসঙ্করতো পরিচ্ছিন্দতি. তদারম্মণাতি তং রূপং আরম্মণং কত্ৰা পৰত্তনকা. নামন্তি ৰেদনাদিচতুক্কং নমনট্ঠেন নামন্তি ৰৰত্থাপেতি. যমকতালক্খন্ধং ভিন্দন্তো ৰিয যমকং ভিন্দিত্ৰা ‘‘অরূপং, রূপঞ্চা’’তি দ্ৰেৰ ইমে ধম্মা, ন এত্থ কোচি অত্তা ৰা অত্তনিযং ৰাতি নামরূপং ৰৰত্থপেতি পরিচ্ছিন্দতি পরিগ্গণ্হাতি. এত্তাৰতা দিট্ঠিৰিসুদ্ধি দস্সিতা. তং পনেতং নামরূপং ন অহেতুকং. যস্মা সব্বং সব্বত্থ সব্বদা চ নত্থি, তস্মা সহেতুকং. কীদিসেন হেতুনা? ন ইস্সরাদিৰিসমহেতুনা. যং পনেত্থ ৰত্তব্বং, তং ৰিসুদ্ধিমগ্গসংৰণ্ণনাযং (ৰিসুদ্ধি. মহাটী. ২.৪৪৭) ৰুত্তনযেন গহেতব্বং. সহেতুকত্তা এৰ সপচ্চযং. অৰিজ্জাদযোতি অৰিজ্জাতণ্হুপাদানকম্মাহারাদযো. এৰন্তি ‘‘তং পনেত’’ন্তিআদিনা ৰুত্তপ্পকারেন অৰিজ্জাদিকে পচ্চযে চেৰ রূপৰেদনাদিকে পচ্চযুপ্পন্নধম্মে চ ৰৰত্থপেত্ৰা পরিচ্ছিন্দিত্ৰা পরিগ্গহেত্ৰা. ৰুত্তঞ্হেতং ‘‘অৰিজ্জাসমুদযা রূপসমুদযো, তণ্হাসমুদযা রূপসমুদযো’’তি (পটি. ম. ১.৫০). এত্তাৰতা কঙ্খাৰিতরণৰিসুদ্ধিং দস্সেতি.

হুত্ৰাতি হেতুপচ্চযসমৰাযে উপ্পজ্জিত্ৰা. অভাৰট্ঠেনাতি তদনন্তরমেৰ ৰিনস্সনট্ঠেন. অনিচ্চাতি অনিচ্চা অদ্ধুৰা. অনিচ্চলক্খণং আরোপেতীতি তেসু পঞ্চসু খন্ধেসু অনিচ্চতাসঙ্খাতং সামঞ্ঞলক্খণং নিরোপেতি. ততোতি অনিচ্চলক্খণারোপনতো পরং, ততো ৰা অনিচ্চভাৰতো. উদযব্বযপ্পটিপীল়নাকারেনাতি উপ্পাদনিরোধেহি পতি পতি অভিক্খণং পীল়নাকারেন হেতুনা দুক্খা অনিট্ঠা, দুক্খমা ৰা. অৰসৰত্তনাকারেনাতি কস্সচি ৰসেন অৰসৰত্তনাকারেন. অনত্তাতি ন সযং অত্তা, নাপি নেসং কোচি অত্তা অত্থীতি অনত্তাতি. তিলক্খণংআরোপেত্ৰাতি এৰং অনিচ্চস্স দুক্খভাৰতো, দুক্খস্স চ অনত্তভাৰতো খন্ধপঞ্চকে তিৰিধম্পি সামঞ্ঞলক্খণং আরোপেত্ৰা. সম্মসন্তোতি উদযব্বযঞাণুপ্পত্তিযা উপ্পন্নে ৰিপস্সনুপক্কিলেসে পহায মগ্গামগ্গং ৰৰত্থপেত্ৰা উদযব্বযঞাণাদিৰিপস্সনাপটিপাটিযা সঙ্খারে সম্মসন্তো গোত্রভুঞাণানন্তরং লোকুত্তরমগ্গং পাপুণাতি.

একপটিৰেধেনাতি একেনেৰ ঞাণেন পটিৰিজ্ঝনেন. পটিৰেধো পটিঘাতাভাৰেন ৰিসযে নিস্সঙ্গচারসঙ্খাতং নিব্বিজ্ঝনং. অভিসমযো অৰিরজ্ঝিত্ৰা অধিগমনসঙ্খাতো অৰবোধো. ‘‘ইদং দুক্খং, এত্তং দুক্খং, ন ইতো ভিয্যো’’তি পরিচ্ছিন্দিত্ৰা যাথাৰতো জাননমেৰ ৰুত্তনযেন পটিৰেধোতি পরিঞ্ঞাপটিৰেধো, ইদঞ্চ যথা ঞাণে পৰত্তে পচ্ছা দুক্খস্স সরূপাদিপরিচ্ছেদে সম্মোহো ন হোতি, তথা পৰত্তিং গহেত্ৰা ৰুত্তং, ন পন মগ্গঞাণস্স ‘‘ইদং দুক্খ’’ন্তিআদিনা পৰত্তনতো. তেনাহ ‘‘তস্মিঞ্চস্স খণে’’তিআদি. পহীনস্স পুন অপহাতব্বতায পকট্ঠং হানং চজনং সমুচ্ছিন্দনং পহানং, পহানমেৰ ৰুত্তনযেন পটিৰেধোতি পহানপটিৰেধো. অযম্পি যেন কিলেসেন অপ্পহীযমানেন মগ্গভাৰনায ন ভৰিতব্বং, অসতি চ মগ্গভাৰনায যো উপ্পজ্জেয্য, তস্স পদঘাতং করোন্তস্স অনুপ্পত্তিধম্মতং আপাদেন্তস্স ঞাণস্স তথাপৰত্তিযা পটিঘাতাভাৰেন নিস্সঙ্গচারং উপাদায এৰং ৰুত্তো. সচ্ছিকিরিযা পচ্চক্খকরণং অনুস্সৰাকারপরিৰিতক্কাদিকে মুঞ্চিত্ৰাৰ সরূপতো আরম্মণকরণং ‘‘ইদং ত’’ন্তি যাথাৰসভাৰতো গহণং, সা এৰ ৰুত্তনযেন পটিৰেধোতি সচ্ছিকিরিযাপটিৰেধো. অযম্পি যস্স আৰরণস্স অসমুচ্ছিন্দনতো ঞাণং নিরোধং আলম্বিতুং ন সক্কোতি, তস্স সমুচ্ছিন্দনতো তং সরূপতো ৰিভাৰিতমেৰ পৰত্ততীতি এৰং ৰুত্তো.

ভাৰনা উপ্পাদনা ৰড্ঢনা চ. তত্থ পঠমমগ্গে উপ্পাদনট্ঠেন ভাৰনা, দুতিযাদীসু ৰড্ঢনট্ঠেন, উভযত্থাপি ৰা উভযং ৰেদিতব্বং. পঠমমগ্গোপি হি যথারহং ৰুট্ঠানগামিনিযং পৰত্তং পরিজাননাদিং ৰড্ঢেন্তো পৰত্তোতি তত্থাপি ৰড্ঢনট্ঠেন ভাৰনাতি সক্কা ৰিঞ্ঞাতুং. দুতিযাদীসুপি অপ্পহীনকিলেসপ্পহানতো পুগ্গলন্তরসাধনতো চ উপ্পাদনট্ঠেন ভাৰনা, সা এৰ ৰুত্তনযেন পটিৰেধোতি ভাৰনাপটিৰেধো. অযম্পি যথা ঞাণে পৰত্তে পচ্ছা মগ্গধম্মানং সরূপপরিচ্ছেদে সম্মোহো ন হোতি, তথা পৰত্তিং গহেত্ৰা ৰুত্তো. তিট্ঠন্তু তাৰ যথাধিগতা মগ্গধম্মা, যথাপৰত্তেসু ফলেসুপি অযং যথাধিগতসচ্চধম্মেসু ৰিয ৰিগতসম্মোহোৰ হোতি সেক্খোপি সমানো. তেন ৰুত্তং – ‘‘দিট্ঠধম্মো পত্তধম্মো ৰিদিতধম্মো পরিযোগাল়্হধম্মো’’তি (মহাৰ. ২৭). যথা চস্স ধম্মা তাসং জোতিতা যথাধিগতসচ্চধম্মাৰলম্বিনিযো মগ্গৰীথিতো পরতো মগ্গফলপহীনাৰসিট্ঠকিলেসনিব্বানানং পচ্চৰেক্খণা পৰত্তন্তি. দুক্খসচ্চধম্মা হি সক্কাযদিট্ঠিআদযো. অযঞ্চ অত্থৰণ্ণনা পরিঞ্ঞাভিসমযেনাতিআদীসুপি ৰিভাৰেতব্বা. কিচ্চতোতি অসম্মোহতো. নিরোধং আরম্মণতোতি এত্থ ‘‘আরম্মণতোপী’’তি পি-সদ্দো লুত্তনিদ্দিট্ঠো দট্ঠব্বো নিরোধেপি অসম্মোহপটিৰেধস্স লব্ভনতো. এতস্সাতি চতুসচ্চকম্মট্ঠানিকস্স পুগ্গলস্স.

পঞ্ঞৰাতি নিদ্দিট্ঠো নিপ্পরিযাযতো পঞ্ঞৰন্ততায ইধ অধিপ্পেতত্তা. পাল়িতোতি ধম্মতো. অত্থতোতি অট্ঠকথাতো. অনুসন্ধিতোতি তস্মিং তস্মিং সুত্তে তংতংঅনুসন্ধিতো. পুব্বাপরতোতি পুব্বেনাপরস্স সংসন্দনতো. সঙ্গীতিক্কমেন চেত্থ পুব্বাপরতা ৰেদিতব্বা. তংতংদেসনাযমেৰ ৰা পুব্বভাগেন অপরভাগস্স সংসন্দনতো. ৰিঞ্ঞাণচরিতোতি ৰিজাননচরিতো ৰীমংসনচরিতো তেপিটকে বুদ্ধৰচনে ৰিচারণাচারৰেপুল্লতো. পঞ্ঞৰাতি ন ৰত্তব্বো মগ্গেনাগতায পঞ্ঞায অভাৰতো. অজ্জ অজ্জেৰ অরহত্তন্তি ইত্তরং অতিখিপ্পমেৰাতি অধিপ্পাযো. পঞ্ঞৰাপক্খং ভজতি সেক্খপরিযাযসব্ভাৰতো. সুত্তে পন পটিৰেধোৰ কথিতো সচ্চাভিসমযৰসেন আগতত্তা.

এসাতি অনন্তরে ৰুত্তো অরিযপুগ্গলো. কম্মকারকচিত্তন্তি ভাৰনাকম্মস্স পৰত্তনকচিত্তং. সুখৰেদনম্পি ৰিজানাতীতি কো ৰেদিযতি, কস্স ৰেদনা, কিংকারণা ৰেদনা, সোপি কস্সচি অভাৰগ্গহণমুখেন সুখং ৰেদনং সভাৰতো সমুদযতো অত্থঙ্গমতো অস্সাদতো আদীনৰতো চ যথাভূতং পরিচ্ছিন্দন্তো পরিগ্গণ্হন্তো সুখং ৰেদনং ৰিজানাতি নাম. সেসপদদ্ৰযেপি এসেৰ নযো. যস্মা ‘‘সতিপট্ঠানে’’তি ইমিনা সতিপট্ঠানকথং উপলক্খেতি. তায হি তদত্থো ৰেদিতব্বো, তস্মা তংসংৰণ্ণনাযম্পি (দী. নি. টী. ২.৩৮০) ৰুত্তনযেন তস্সত্থো ৰেদিতব্বো. কামঞ্চেতং ৰিঞ্ঞাণং ৰেদনাতো অঞ্ঞম্পি আরম্মণং ৰিজানাতি, অনন্তরৰারে পন রূপমুখেন ৰিপস্সনাভিনিৰেসস্স দস্সিতত্তা ইধ অরূপমুখেন দস্সেতুং ‘‘সুখন্তিপি ৰিজানাতী’’তিআদিনা নিদ্দিট্ঠং, পুচ্ছন্তস্স ৰা অজ্ঝাসযৰসেন.

সংসট্ঠাতি সম্পযুত্তা. তেনাহ ‘‘একুপ্পাদাদিলক্খণেন সংযোগট্ঠেনা’’তি. ৰিসংসট্ঠাতি ৰিপ্পযুত্তা. ভিন্দিত্ৰাতি অঞ্ঞভূমিকস্স অঞ্ঞভূমিদস্সনেনেৰ ৰিনাসেত্ৰা, সংভিন্দিত্ৰা ৰা. সংসট্ঠভাৰং পুচ্ছতীতি তংচিত্তুপ্পাদপরিযাপন্নানং পঞ্চৰিঞ্ঞাণানং সংসট্ঠভাৰং পুচ্ছতি. যদি এৰং কথং পুচ্ছায অৰসরো ৰিসংসট্ঠভাৰাসঙ্কায এৰ অভাৰতো? ন, চিত্তুপ্পাদন্তরগতানং মগ্গপঞ্ঞামগ্গৰিঞ্ঞাণানং ৰিপস্সনাপঞ্ঞাৰিপস্সনাৰিঞ্ঞাণানঞ্চ ৰোমিস্সকসংসট্ঠভাৰস্স লব্ভমানত্তা. ৰিনিৰট্টেত্ৰাতি অঞ্ঞমঞ্ঞতো ৰিৰেচেত্ৰা. নানাকরণং দস্সেতুং ন সক্কাতি ইদং কেৰলং সংসট্ঠভাৰমেৰ সন্ধায ৰুত্তং, ন সভাৰভেদং, সভাৰভেদতো পন নানাকরণং নেসং পাকটমেৰ. তেনাহ ‘‘আরম্মণতো ৰা ৰত্থুতো ৰা উপ্পাদতো ৰা নিরোধতো ৰা’’তি. ইদানি তমেৰ সভাৰভেদং ৰিসযভেদেন সুট্ঠু পাকটং কত্ৰা দস্সেতুং ‘‘তেসং তেসং পনা’’তিআদি ৰুত্তং. ৰিসযোতি পৰত্তিট্ঠানং ইস্সরিযভূমি, যেন চিত্তপঞ্ঞানং তত্থ তত্থ পুব্বঙ্গমতা ৰুচ্চতি.

কামঞ্চ ৰিপস্সনাপি পঞ্ঞাৰসেনেৰ কিচ্চকারী, মগ্গোপি ৰিঞ্ঞাণসহিতোৰ, ন কেৰলো, যথা পন লোকিযধম্মেসু চিত্তং পধানং তত্থস্স ধোরয্হভাৰেন পৰত্তিসব্ভাৰতো. তথা হি তং ‘‘ছদ্ৰারাধিপতি রাজা’’তি (ধ. প. অট্ঠ. ২.১৮১) ৰুচ্চতি, এৰং লোকুত্তরধম্মেসু পঞ্ঞা পধানা পটিপক্খৰিধমনস্স ৰিসেসতো তদধীনত্তা. তথা হি মগ্গধম্মে সম্মাদিট্ঠি এৰ পঠমং গহিতা. অযঞ্চ নেসং ৰিসযৰসেন পৰত্তিভেদো, তথা চ পঞ্ঞাপনৰিধি ন কেৰলং থেরেহেৰ দস্সিতো, অপিচ খো ভগৰতাপি দস্সিতোতি ৰিভাৰেন্তো ‘‘সম্মাসম্বুদ্ধোপী’’তিআদিমাহ. যত্থ পঞ্ঞা ন লব্ভতি, তত্থ চিত্তৰসেন পুচ্ছনে ৰত্তব্বমেৰ নত্থি যথা ‘‘কিংচিত্তো ত্ৰং ভিক্খূ’’তিআদীসু (পারা. ১৩২-১৩৫). যত্থ পন পঞ্ঞা লব্ভতি, তত্থাপি চিত্তৰসেন জোতনা হোতি যথা – ‘‘অজ্ঝত্তমেৰ চিত্তং সণ্ঠপেতি সন্নিসাদেতি একোদিং করোতি সমাদহতি (সং. নি. ৪.৩৩২), যস্মিং সমযে কামাৰচরং কুসলং চিত্তং উপ্পন্নং হোতী’’তিআদীসু (ধ. স. ১). অট্ঠকথাযং পন লোকিযধম্মেসু চিত্তৰসেন, লোকুত্তরধম্মেসু পঞ্ঞাৰসেন চোদনং ব্যতিরেকমুখেন দস্সেতুং ‘‘কতমা তে ভিক্খু পঞ্ঞা অধিগতা’’তিআদি ৰুত্তং. যেভুয্যৰসেন চেতং ৰুত্তন্তি দট্ঠব্বং. তথা হি কত্থচি লোকিযধম্মা পঞ্ঞাসীসেনপি নিদ্দিসীযন্তি – ‘‘পঠমস্স ঝানস্স লাভিনো কামসহগতা সঞ্ঞামনসিকারা সমুদাচরন্তি হানভাগিনী পঞ্ঞা’’তিআদীসু (পটি. ম. ১.১). সঞ্ঞাসীসেনপি – ‘‘উদ্ধুমাতকসঞ্ঞাতি ৰা সেসরূপারূপসঞ্ঞাতি ৰা ইমে ধম্মা একত্থা, উদাহু নানত্থা’’তিআদীসু (পারা. অট্ঠ. ৪৫.পদভাজনীযৰণ্ণনা). তথা লোকুত্তরধম্মাপি কত্থচি চিত্তসীসেন নিদ্দিসীযন্তি – ‘‘যস্মিং সমযে লোকুত্তরং চিত্তং ভাৰেতী’’তি (ধ. স. ২৭৭), তথা ফস্সাদিসীসেনপি – ‘‘যস্মিং সমযে লোকুত্তরং ফস্সং ভাৰেতি, ৰেদনং সঞ্ঞং চেতনং ভাৰেতী’’তিআদীসু (ধ. স. ২৭৭).

চতূসু সোতাপত্তিযঙ্গেসূতি সপ্পুরিসসেৰনা, সদ্ধম্মস্সৰনং, যোনিসোমনসিকারো, ধম্মানুধম্মপটিপত্তীতি ইমেসু চতূসু সোতাপত্তিমগ্গস্স কারণেসু. কামং চেতেসু সতিআদযোপি ধম্মা ইচ্ছিতব্বাৰ তেহি ৰিনা তেসং অসম্ভৰতো, তথাপি চেত্থ সদ্ধা ৰিসেসতো কিচ্চকারীতি ৰেদিতব্বা. সদ্দো এৰ হি সপ্পুরিসে পযিরুপাসতি, সদ্ধম্মং সুণাতি, যোনিসো চ মনসি করোতি, অরিযমগ্গস্স চ অনুধম্মং পটিপজ্জতি, তস্মা ৰুত্তং ‘‘এত্থ সদ্ধিন্দ্রিযং দট্ঠব্ব’’ন্তি. ইমিনা নযেন সেসিন্দ্রিযেসুপি অত্থো দট্ঠব্বো. চতূসু সম্মপ্পধানেসূতি চতুব্বিধসম্মপ্পধানভাৰনায. চতূসু সতিপট্ঠানেসূতিআদীসুপি এসেৰ নযো. এত্থ চ সোতাপত্তিযঙ্গেসু সদ্ধা ৰিয সম্মপ্পধানভাৰনায ৰীরিযং ৰিয চ সতিপট্ঠানভাৰনায – ‘‘সতিমা ৰিনেয্য লোকে অভিজ্ঝাদোমনস্স’’ন্তি (দী. নি. ২.৩৭৩; ম. নি. ১.১০৬; সং. নি. ৫.৩৮৪, ৪০৭) ৰচনতো পুব্বভাগে কিচ্চতো সতি অধিকা ইচ্ছিতব্বা. এৰং সমাধিকম্মিকস্স সমাধি, ‘‘অরিযসচ্চভাৰনা পঞ্ঞাভাৰনা’’তি কত্ৰা তত্থ পঞ্ঞা পুব্বভাগে অধিকা ইচ্ছিতব্বাতি পাকটোযমত্থো, অধিগমক্খণে পন সমাধিপঞ্ঞানং ৰিয সব্বেসম্পি ইন্দ্রিযানং সদ্ধাদীনং সমরসতাৰ ইচ্ছিতব্বা. তথা হি ‘‘এত্থ সদ্ধিন্দ্রিয’’ন্তিআদিনা তত্থ তত্থ এত্থগ্গহণং কতং. এৰন্তি যং ঠানং, তং ইন্দ্রিযসমত্তাদিং পচ্চামসতি. সৰিসযস্মিংযেৰাতি অত্তনো অত্তনো ৰিসযে এৰ. লোকিযলোকুত্তরা ধম্মা কথিতাতি লোকিযধম্মা লোকুত্তরধম্মা চ তেন তেন পৰত্তিৰিসেসেন কথিতা. ইদং ৰুত্তং হোতি – সদ্ধাপঞ্চমেসু ইন্দ্রিযেসু সহ পৰত্তমানেসু তত্থ তত্থ ৰিসযে সদ্ধাদীনং কিচ্চাধিকতায তস্স তস্সেৰ দট্ঠব্বতা ৰুত্তা, ন সব্বেসং. এৰং অঞ্ঞেপি লোকিযলোকুত্তরা ধম্মা যথাসকং ৰিসযে পৰত্তিৰিসেসৰসেন বোধিতাতি.

ইদানি সদ্ধাদীনং ইন্দ্রিযানং তত্থ তত্থ অতিরেককিচ্চতং উপমায ৰিভাৰেতুং ‘‘যথা হী’’তিআদি ৰুত্তং. তত্রিদং উপমাসংসন্দনং রাজপঞ্চমা সহাযা ৰিয ৰিমুত্তিপরিপাচকানি পঞ্চিন্দ্রিযানি. নেসং কীল়নত্থং একজ্ঝং ৰীথিওতরণং ৰিয ইন্দ্রিযানং একজ্ঝং ৰিপস্সনাৰীথিওতরণং. সহাযেসু পঠমাদীনং যথাসকগেহেৰ ৰিচারণা ৰিয সদ্ধাদীনং সোতাপত্তিঅঙ্গাদীনি পত্ৰা পুব্বঙ্গমতা. সহাযেসু ইতরেসং তত্থ তত্থ তুণ্হীভাৰো ৰিয সেসিন্দ্রিযানং তত্থ তত্থ তদন্ৰযতা. তস্স পুব্বঙ্গমভূতস্স ইন্দ্রিযস্স কিচ্চানুগততা. ন হি তদা তেসং সসম্ভারপথৰীআদীসু আপাদীনং ৰিয কিচ্চং পাকটং হোতি, সদ্ধাদীনংযেৰ পন কিচ্চং ৰিভূতং হুত্ৰা তিট্ঠতি পুরেতরং তথাপচ্চযেহি চিত্তসন্তানস্স অভিসঙ্খতত্তা. এত্থ চ ৰিপস্সনাকম্মিকস্স ভাৰনা ৰিসেসতো পঞ্ঞুত্তরাতি দস্সনত্থং রাজানং নিদস্সনং কত্ৰা পঞ্ঞিন্দ্রিযং ৰুত্তং. ইতীতিআদি যথাধিগতস্স অত্থস্স নিগমনং.

মগ্গৰিঞ্ঞাণম্পীতি অরিযমগ্গসহগতং অপচযগামিৰিঞ্ঞাণম্পি. তথেৰ তং ৰিজানাতীতি সচ্চধম্মং ‘‘ইদং দুক্খ’’ন্তিআদিনা নযেনেৰ ৰিজানাতি একচিত্তুপ্পাদপরিযাপন্নত্তা মগ্গানুকূলত্তা চ. যং ৰিজানাতীতি এত্থ ৰিজাননপজাননানি ৰিপস্সনাচিত্তুপ্পাদপরিযাপন্নানি অধিপ্পেতানি, ন ‘‘যং পজানাতী’’তি এত্থ ৰিয মগ্গচিত্তুপ্পাদপরিযাপন্নাতি আহ ‘‘যং সঙ্খারগত’’ন্তিআদি. তথেৰাতি ‘‘অনিচ্চ’’ন্তিআদিনা নযেন. একচিত্তুপ্পাদপরিযাপন্নত্তা ৰিপস্সনাভাৰতো চ সমানপচ্চযেহি সহ পৰত্তিকতা একুপ্পাদতা, ততো এৰ একজ্ঝং সহেৰ নিরুজ্ঝনং একনিরোধতা, একংযেৰ ৰত্থুং নিস্সায পৰত্তি একৰত্থুকতা, একংযেৰ আরম্মণং আরব্ভ পৰত্তি একারম্মণতা. হেতুম্হি চেতং করণৰচনং. তেন একুপ্পাদাদিতায সংসট্ঠভাৰং সাধেতি. অনৰসেসপরিযাদানঞ্চেতং, ইতো তীহিপি সম্পযুত্তলক্খণং হোতিযেৰ.

মগ্গপঞ্ঞং সন্ধায ৰুত্তং, সা হি একন্ততো ভাৰেতব্বা, ন পরিঞ্ঞেয্যা, পঞ্ঞায পন ভাৰেতব্বতায তংসম্পযুত্তধম্মাপি তগ্গতিকাৰ হোন্তীতি আহ ‘‘তংসম্পযুত্তং পনা’’তিআদি. কিঞ্চাপি ৰিপস্সনাপঞ্ঞায ভাৰনাৰসেন পৰত্তনতো তংসম্পযুত্তৰিঞ্ঞাণম্পি তথেৰ পৰত্ততি, তস্স পন পরিঞ্ঞেয্যভাৰানতিৰত্তনতো পরিঞ্ঞেয্যতা ৰুত্তা. তেনেৰাহ – ‘‘যম্পি তং ধম্মট্ঠিতিঞাণং, তম্পি খযধম্মং ৰযধম্মং ৰিরাগধম্মং নিরোধধম্ম’’ন্তি.

৪৫০. এৰং সন্তেপীতি ৰেদনাতি এৰং সামঞ্ঞগ্গহণে সতিপি. তেভূমিকসম্মসনচারৰেদনাৰাতি ভূমিত্তযপরিযাপন্না, ততো এৰ সম্মসনঞাণস্স গোচরভূতা ৰেদনা এৰ অধিপ্পেতা সব্রহ্মচারীনং উপকারাৰহভাৰেন দেসনায আরদ্ধত্তা. তথা হি ৰুত্তং ‘‘চতুরোঘনিত্থরণত্থিকান’’ন্তিআদি. এস নযো পঞ্ঞাযপি. ইধ সুখাদিসদ্দা তদারম্মণৰিসযাতি ইমমত্থং সুত্তেন সাধেতুং ‘‘রূপঞ্চ হী’’তিআদি ৰুত্তং. একন্তদুক্খন্তি একন্তেনেৰ অনিট্ঠং, ততো এৰ দুক্খমতায দুক্খং. আরম্মণকরণৰসেন দুক্খৰেদনায অনুপতিতং, ওতিণ্ণঞ্চাতি দুক্খানুপতিতং, দুক্খাৰক্কন্তং. সুখেন অনৰক্কন্তং অভৰিস্সাতি যোজনা. নযিদন্তি এত্থ ইদন্তি নিপাতমত্তং. সারজ্জেয্যুন্তি সারাগং উপ্পাদেয্যুং. সুখন্তি সভাৰতো চ ইট্ঠং. সারাগা সংযুজ্জন্তীতি বহলরাগহেতু যথারহং দসহিপি সংযোজনেহি সংযুজ্জন্তি. সংযোগা সংকিলিস্সন্তীতি তথা সংযুত্ততায তণ্হাসংকিলেসাদিৰসেন সংকিলিস্সন্তি, ৰিবাধীযন্তি উপতাপীযন্তি চাতি অত্থো. আরম্মণন্তি ইট্ঠং, অনিট্ঠং, মজ্ঝত্তঞ্চ আরম্মণং যথাক্কমং সুখং, দুক্খং, অদুক্খমসুখন্তি কথিতং. এৰং অৰিসেসেন পঞ্চপি খন্ধে সুখাদিআরম্মণভাৰেন দস্সেত্ৰা ইদানি ৰেদনা এৰ সুখাদিআরম্মণভাৰেন দস্সেতুং ‘‘অপিচা’’তিআদি ৰুত্তং. পাকতিকপচুরজনৰসেনাযং কথিতাতি কত্ৰা ‘‘পুরিমং সুখং ৰেদনং আরম্মণং কত্ৰা’’তি ৰুত্তং. ৰিসেসলাভী পন অনাগতম্পি সুখং ৰেদনং আরম্মণং করোতেৰ. ৰুত্তমেতং সতিপট্ঠানৰণ্ণনাযং (দী. নি. অট্ঠ. ২.৩৮০; ম. নি. অট্ঠ. ১.৭৯). ৰেদনায হি আরম্মণং ৰেদিযন্তিযা তংসমঙ্গীপুগ্গলো ৰেদেতীতি ৰোহারমত্তং হোতি.

সব্বসঞ্ঞাযাতি সব্বাযপি চতুভূমিকসঞ্ঞায. সব্বত্থকসঞ্ঞাযাতি সব্বস্মিং চিত্তুপ্পাদে পৰত্তনকসঞ্ঞায. ৰত্থে ৰাতি ৰা-সদ্দেন ৰণ্ণধাতুং সঙ্গণ্হাতি. পাপেন্তোতি ভাৰনং উপচারং ৰা অপ্পনং ৰা উপনেন্তো. উপ্পজ্জনকসঞ্ঞাপীতি ‘‘নীলং রূপং, রূপারম্মণং নীল’’ন্তি উপ্পজ্জনকসঞ্ঞাপি.

অসব্বসঙ্গাহিকত্তাতি সব্বেসং ৰেদনাসঞ্ঞাৰিঞ্ঞাণানং অসঙ্গহিতত্তা. তক্কগতন্তি সুত্তকন্তনকতক্কম্হি, সুত্তৰত্তনকতক্কম্হি ৰা ৰেঠনৰসেন ঠিতং. পরিৰট্টকাদিগতন্তি সুত্তৰেঠনপরিৰট্টকাদিগতং. ৰিস্সট্ঠত্তাৰ ন গহিতা, যদগ্গেন পঞ্ঞা ৰিঞ্ঞাণেন সদ্ধিং সম্পযোগং লভাপিতা, তদগ্গেন ৰেদনাসঞ্ঞাহিপি সম্পযোগং লভাপিতা এৰাতি. তদেৰ সঞ্জানাতি সংসট্ঠভাৰতো.

সঞ্জানাতি ৰিজানাতীতি এত্থ ‘‘পজানাতী’’তি পদং আনেত্ৰা ৰত্তব্বং পজাননৰসেনপি ৰিসেসস্স ৰক্খমানত্তা. জানাতীতি অযং সদ্দো চ লদ্দতোযেৰেত্থ অৰিসেসো, অত্থতো পন ৰিসেসতো ইচ্ছিতব্বো. অনেকত্থত্তা হি ধাতূনং তেন আখ্যাতপদেন নামপদেন চ ৰুত্তমত্থং উপসগ্গপদং জোতকভাৰেন ৰিসেসেতি, ন ৰাচকভাৰেন. তেনাহ ‘‘তস্সপি জাননত্থে ৰিসেসো ৰেদিতব্বো’’তি. এতেন সঞ্ঞাৰিঞ্ঞাণপঞ্ঞাপদানি অন্তোগধজাননত্থে যথাসকং ৰিসিট্ঠৰিসযে চ নিট্ঠানীতি দস্সেতি. তেনেৰাহ ‘‘সঞ্ঞা হী’’তিআদি. সঞ্জাননমত্তমেৰাতি এত্থ মত্ত-সদ্দেন ৰিসেসনিৰত্তিঅত্থেন ৰিজাননপজাননাকারে নিৰত্তেতি, এৰ-সদ্দেন কদাচিপি ইমিস্সা তে ৰিসেসা নত্থেৰাতি অৰধারেতি. তেনেৰাহ ‘‘অনিচ্চং দুক্খ’’ন্তিআদি. তত্থ ৰিঞ্ঞাণকিচ্চম্পি কাতুং অসক্কোন্তী সঞ্ঞা কুতো পঞ্ঞাকিচ্চং করেয্যাতি ‘‘লক্খণপটিৰেধং পাপেতুং ন সক্কোতি’’চ্চেৰ ৰুত্তং, ন ৰুত্তং ‘‘মগ্গপাতুভাৰ’’ন্তি.

আরম্মণে পৰত্তমানং ৰিঞ্ঞাণং ন সঞ্ঞা ৰিয নীলপীতাদিমত্তসঞ্জাননৰসেন পৰত্ততি, অথ খো তত্থ অঞ্ঞম্পি তাদিসং ৰিসেসং জানন্তমেৰ পৰত্ততীতি আহ ‘‘ৰিঞ্ঞাণ’’ন্তিআদি. কথং পন ৰিঞ্ঞাণং লক্খণপটিৰেধং পাপেতীতি? পঞ্ঞায দস্সিতমগ্গেন. লক্খণারম্মণিকৰিপস্সনায হি অনেকৰারং লক্খণানি পটিৰিজ্ঝিত্ৰা পৰত্তমানায পগুণভাৰতো পরিচযৰসেন ঞাণৰিপ্পযুত্তচিত্তেনপি ৰিপস্সনা সম্ভৰতি, যথা তং পগুণস্স গন্থস্স অজ্ঝযনে তত্থ তত্থ গতাপি ৰারা ন উপধারীযন্তি. ‘‘লক্খণপটিৰেধ’’ন্তি চ লক্খণানং আরম্মণকরণমত্তং সন্ধায ৰুত্তং, ন পটিৰিজ্ঝনং. উস্সক্কিত্ৰাতি উদযব্বযঞাণাদিঞাণপটিপাটিযা আরভিত্ৰা. মগ্গপাতুভাৰং পাপেতুং ন সক্কোতি অসম্বোধসভাৰত্তা. আরম্মণম্পি সঞ্জানাতি অৰবুজ্ঝনৰসেনেৰ, ন সঞ্জাননমত্তেন. তথা লক্খণপটিৰেধম্পি পাপেতি, ন ৰিজাননমত্তেন, অত্তনো পন অঞ্ঞাসাধারণেন আনুভাৰেন উস্সক্কিত্ৰা মগ্গপাতুভাৰম্পি পাপেতি.

ইদানি যথাৰুত্তমত্থং উপমায ৰিভাৰেতুং ‘‘যথা হী’’তিআদি ৰুত্তং. তত্থ অজাতবুদ্ধীতি অসঞ্জাতব্যৰহারবুদ্ধি. উপভোগপরিভোগন্তি উপভোগপরিভোগারহং, উপভোগপরিভোগৰত্থূনং পটিলাভযোগ্গন্তি অত্থো. কূটোতি কহাপণপতিরূপকো তম্বকংসাদিমযো. ছেকোতি মহাসারো. করতোতি অড্ঢসারো. সণ্হোতি মুদুজাতিকো সমসারো. ইতি-সদ্দো আদিঅত্থো. তেন পাদসারপরোপাদসারঅড্ঢসারাদীনং সঙ্গহো. জানন্তো চ পন নং রূপং দিস্ৰাপি…পে… অসুকাচরিযেন কতোতিপি জানাতি তথা হেরঞ্ঞিকগন্থস্স সুগ্গহিতত্তা. এৰমেৰন্তিআদি উপমাসংসন্দনং. সঞ্ঞাৰিভাগং অকত্ৰা পিণ্ডৰসেনেৰ আরম্মণস্স গহণতো দারকস্স কহাপণদস্সনসদিসা ৰুত্তা. তথা হি সা যথাউপট্ঠিতৰিসযপদট্ঠানা ৰুচ্চতি. ৰিঞ্ঞাণং আরম্মণে একচ্চৰিসেসগ্গহণসমত্থভাৰতো গামিকপুরিসকহাপণদস্সনসদিসং ৰুত্তং. পঞ্ঞা পন আরম্মণে অনৰসেসাৰবোধতো হেরঞ্ঞিককহাপণদস্সনসদিসা ৰুত্তা. নেসন্তি সঞ্ঞাৰিঞ্ঞাণপঞ্ঞানং. ৰিসেসোতি সভাৰৰিসেসো. দুপ্পটিৰিজ্ঝো পকতিপঞ্ঞায. ইমিনাৰ নেসং অচ্চন্তসুখুমতং দস্সেতি.

একারম্মণে পৰত্তমানানন্তি একস্মিংযেৰ আরম্মণে পৰত্তমানানং. তেন অভিন্নৰিসযাভিন্নকালতাদস্সনেন অৰিনিব্ভোগৰুত্তিতং ৰিভাৰেন্তো দুপ্পটিৰিজ্ঝতংযেৰ উল্লিঙ্গেতি. ৰৰত্থানন্তি অসঙ্করতো ঠপনং. অযং ফস্সো…পে… ইদং চিত্তন্তি নিদস্সনমত্তমেতং. ইতি-সদ্দো ৰা আদিঅত্থো. তেন সেসধম্মানম্পি সঙ্গহো দট্ঠব্বো. ইদন্তি অরূপীনং ধম্মানং ৰৰত্থানকরণং. ততোতি যং ৰুত্তং তিলতেলাদিউদ্ধরণং, ততো. যদি দুক্করতরং, কথং তন্তি আহ ‘‘ভগৰা পনা’’তিআদি.

৪৫১. নিস্সটেনাতি নিক্খন্তেন অতংসম্বন্ধেন. পরিচ্চত্তেনাতি পরিচ্চত্তসদিসেন পচ্চযভাৰানুপগমনেন পচ্চযুপ্পন্নসম্বন্ধাভাৰতো. নিস্সক্কৰচনং অপাদানদীপনতো. করণৰচনং কত্তুঅত্থদীপনতো. কামাৰচরমনোৰিঞ্ঞাণং ন নিযমতো ‘‘ইদং নাম পঞ্চদ্ৰারিকাসম্বন্ধা’’তি সক্কা ৰত্তুং, রূপাৰচরৰিঞ্ঞাণং পন ন তথাতি, তস্সেৰ পঞ্চহি ইন্দ্রিযেহি নিস্সটতা ৰুত্তাতি আহ ‘‘রূপাৰচরচতুত্থজ্ঝানচিত্তেনা’’তি. চতুত্থজ্ঝানগ্গহণং তস্সেৰ অরূপাৰচরস্স পদট্ঠানভাৰতো. পরিসুদ্ধেনাতি ৰিসেসতো অসংকিলেসিকত্তাৰ. তঞ্হি ৰিগতূপক্কিলেসতায ৰিসেসতো পরিসুদ্ধং. তেনাহ ‘‘নিরুপক্কিলেসেনা’’তি. জানিতব্বং নেয্যং, সপরসন্তানেসু ইদং অতিসযং জানিতব্বতো বুজ্ঝিতব্বং বোধেতব্বং ৰাতি অত্থো. নেয্যন্তি ৰা অত্তনো সন্তানে নেতব্বং পৰত্তেতব্বন্তি অত্থো. তেনাহ ‘‘নিব্বত্তেতুং সক্কা হোতি. এত্থ ঠিতস্স হি সা ইজ্ঝতী’’তি. পাটিযেক্কন্তি ৰিসুং ৰিসুং, অনুপদধম্মৰসেনাতি অত্থো. অভিনিৰেসাভাৰতোতি ৰিপস্সনাভিনিৰেসস্স অসম্ভৰতো. কলাপতো নযতোতি কলাপসম্মসনসঙ্খাততো নযৰিপস্সনতো. ভিক্খুনোতি সাৰকস্স. সাৰকস্সেৰ হি তত্র অনুপদধম্মৰিপস্সনা ন সম্ভৰতি, ন সত্থু. তেনাহ ‘‘তস্মা’’তিআদি. ৰিস্সজ্জেসীতি তপ্পটিবদ্ধছন্দরাগপ্পহানেন পজহতি.

হত্থগতত্তাতি হত্থগতসদিসত্তা, আসন্নত্তাতি অত্থো. যদা হি লোকনাথো বোধিমূলে অপরাজিতপল্লঙ্কে নিসিন্নো – ‘‘কিচ্ছং ৰতাযং লোকো আপন্নো’’তিআদিনা (দী. নি. ২.৫৭; সং. নি. ২.৪, ১০) পটিচ্চসমুপ্পাদমুখেন ৰিপস্সনাভিনিৰেসং কত্ৰা অধিগন্তব্বসব্বঞ্ঞুতঞ্ঞাণানুরূপং ছত্তিংসকোটিসহস্সমুখেন মহাৰজিরঞাণং নাম মহাবোধিসত্তসম্মসনং পৰত্তেন্তো অনেকাকারসমাপত্তিধম্মসম্মসনে অনুপদমেৰ নেৰসঞ্ঞানাসঞ্ঞাযতনধম্মেপি অপরাপরং সম্মসি. তেনাহ ‘‘ভগৰা পনা’’তিআদি. পরোপঞ্ঞাসাতি দ্ৰেপঞ্ঞাসং. কামঞ্চেত্থ কেচি ধম্মা ৰেদনাদযো ফস্সপঞ্চমকাদীসু ৰুত্তাপি ঝানকোট্ঠাসাদীসুপি সঙ্গহিতা, তংতংপচ্চযভাৰৰিসিট্ঠেন পন অত্থৰিসেসেন ধম্মন্তরানি ৰিয হোন্তীতি এৰং ৰুত্তং. তথা হি লোকুত্তরচিত্তুপ্পাদেসু নৰিন্দ্রিযতা ৰুচ্চতি. অঙ্গুদ্ধারেনাতি তত্থ লব্ভমানঝানঙ্গবোজ্ঝঙ্গমগ্গঙ্গানং উদ্ধরণেন. অঙ্গ-সদ্দো ৰা কোট্ঠাসপরিযাযো, তস্মা অঙ্গুদ্ধারেনাতি ফস্সপঞ্চমকাদিকোট্ঠাসানং সমুদ্ধরণেন. যাৰতা সঞ্ঞাসমাপত্তিযোতি যত্তকা সঞ্ঞাসহগতা ঝানসমাপত্তিযো, তাহি ৰুট্ঠায অধিগন্ধব্বত্তা তাৰতিকা ৰেনেয্যানং অঞ্ঞাপটিৰেধো অরহত্তসমধিগমো.

দস্সনপরিণাযকট্ঠেনাতি অন্ধস্স যট্ঠিকোটিং গহেত্ৰা মগ্গদেসকো ৰিয ধম্মানং যথাসভাৰদস্সনসঙ্খাতেন পরিণাযকভাৰেন. যথা ৰা সো তস্স চক্খুভূতো, এৰং সত্তানং পঞ্ঞা. তেনাহ ‘‘চক্খুভূতায পঞ্ঞাযা’’তি. সমাধিসম্পযুত্তা পঞ্ঞা সমাধিপঞ্ঞা. সমাধি চেত্থ আরুপ্পসমাধীতি ৰদন্তি, সম্মসনপযোগো পন কোচি ঝানসমাধীতি যুত্তং. ৰিপস্সনাভূতা পঞ্ঞা ৰিপস্সনাপঞ্ঞা. সমাধিপঞ্ঞায অন্তোসমাপত্তিযং কিচ্চতো পজানাতি, ‘‘সমাহিতো যথাভূতং পজানাতী’’তি পন ৰচনতো (সং. নি. ৩.৫; ৪.৯৯-১০০; ৩.৫.১০৭১-১০৭২; নেত্তি. ৪০; মি. প. ২.১.১৪) অসম্মোহতো পজানাতি. তত্থ কিচ্চতোতি গোচরজ্ঝত্তে আরম্মণকরণকিচ্চতো. অসম্মোহতোতি সম্পযুত্তধম্মেসু সম্মোহৰিধমনতো যথা পীতিপটিসংৰেদনাদীসু. কিমত্থিযাতি কিংপযোজনাতি আহ ‘‘কো এতিস্সা অত্থো’’তি. অভিঞ্ঞেয্যে ধম্মেতি যাথাৰসরসলক্খণাৰবোধৰসেন অভিমুখং ঞেয্যে জানিতব্বে খন্ধাযতনাদিধম্মে. অভিজানাতীতি সলক্খণতো সামঞ্ঞলক্খণতো চ অভিমুখং অৰিরজ্ঝনৰসেন জানাতি. এতেন ঞাতপরিঞ্ঞাব্যাপারমাহ. পরিঞ্ঞেয্যেতি অনিচ্চাতিপি দুক্খাতিপি অনত্তাতিপি পরিচ্ছিজ্জ জানিতব্বে. পরিজানাতীতি ‘‘যং কিঞ্চি রূপং…পে… অনিচ্চং খযট্ঠেনা’’তিআদিনা (পটি. ম. ১.৪৮) পরিচ্ছিন্দিত্ৰা জানাতি. ইমিনা তীরণপরিঞ্ঞাব্যাপারমাহ. পহাতব্বে ধম্মেতি নিচ্চসঞ্ঞাদিকে যাৰ অরহত্তমগ্গৰজ্ঝা সব্বে পাপধম্মে. পজহতি পকট্ঠতো জহতি, ৰিক্খম্ভেতি চেৰ সমুচ্ছিন্দতি চাতি অত্থো. ইমিনা পহানপরিঞ্ঞাব্যাপারমাহ. সা পনেসা পঞ্ঞা লোকিযাপি তিপ্পকারা লোকুত্তরাপি, তাসং ৰিসেসং সযমেৰাহ. কিচ্চতোতি অভিজাননৰসেন আরম্মণকিচ্চতো. অসম্মোহতোতি যথাবলং অভিঞ্ঞেয্যাদীসু সম্মোহৰিধমনতো. নিব্বানমারম্মণং কত্ৰা পৰত্তনতো অভিঞ্ঞেয্যাদীসু ৰিগতসম্মোহতো এৰাতি আহ ‘‘লোকুত্তরা অসম্মোহতো’’তি.

৪৫২. কম্মস্সকতা সম্মাদিট্ঠি চ ৰট্টনিস্সিতত্তা ইধ নাধিপ্পেতা, ৰিৰট্টকথা হেসাতি ৰুত্তং ‘‘ৰিপস্সনাসম্মাদিট্ঠিযা চ মগ্গসম্মাদিট্ঠিযা চা’’তি. পরতো ঘোসোতি পরতো সত্থুতো, সাৰকতো ৰা লব্ভমানো ধম্মঘোসো. তেনাহ ‘‘সপ্পাযধম্মস্সৰন’’ন্তি. তঞ্হি সম্মাদিট্ঠিযা পচ্চযো ভৰিতুং সক্কোতি, ন যো কোচি পরতোঘোসো. উপাযমনসিকারোতি যেন নামরূপপরিগ্গহাদি সিজ্ঝতি, তাদিসো পথমনসিকারো. অযঞ্চ সম্মাদিট্ঠিযা পচ্চযোতি নিযমপক্খিকো, ন সব্বসংগাহকোতি দস্সেন্তো ‘‘পচ্চেকবুদ্ধানং পনা’’তিআদিমাহ. যোনিসোমনসিকারস্মিংযেৰাতি অৰধারণেন পরতোঘোসমেৰ নিৰত্তেতি, ন পদট্ঠানৰিসেসং পটিযোগীনিৰত্তনত্থত্তা এৰ-সদ্দস্স.

লদ্ধুপকারাতি (অ. নি. টী. ৩.৫.২৫) যথারহং নিস্সযাদিৰসেন লদ্ধপচ্চযা. ৰিপস্সনাসম্মাদিট্ঠিযা অনুগ্গহিতভাৰেন গহিতত্তা মগ্গসম্মাদিট্ঠীসু চ অরহত্তমগ্গসম্মাদিট্ঠি, অনন্তরস্স হি ৰিধি, পটিসেধো ৰা. অগ্গফলসমাধিম্হি তপ্পরিক্খারধম্মেসুযেৰ চ কেৰলো চেতোপরিযাযো নিরুল়্হোতি সম্মাদিট্ঠীতি অরহত্তমগ্গসম্মাদিট্ঠি. ফলক্খণেতি অনন্তরে কালন্তরে চাতি দুৰিধে ফলক্খণে. পটিপ্পস্সদ্ধিৰসেন সব্বসংকিলেসেহি চেতো ৰিমুচ্চতি এতাযাতি চেতোৰিমুত্তি, অগ্গফলপঞ্ঞং ঠপেত্ৰা অৰসেসা ফলধম্মা. তেনাহ ‘‘চেতোৰিমুত্তি ফলং অস্সাতি. চেতোৰিমুত্তিসঙ্খাতং ফলং আনিসংসো’’তি, সব্বসংকিলেসেহি চেতসো ৰিমুচ্চনসঙ্খাতং পটিপ্পস্সম্ভনসঞ্ঞিতং পহানং ফলং আনিসংসো চাতি যোজনা. ইধ চ চেতোৰিমুত্তি-সদ্দেন পহানমত্তং গহিতং, পুব্বে পহাযকধম্মা, অঞ্ঞথা ফলধম্মা এৰ আনিসংসোতি গয্হমানে পুনৰচনং নিরত্থকং সিযা.

পঞ্ঞাৰিমুত্তিফলানিসংসাতি এত্থাপি এৰমেৰ অত্থো ৰেদিতব্বো. সম্মাৰাচাকম্মন্তাজীৰা সীলসভাৰত্তা ৰিসেসতো সমাধিস্স উপকারা, তথা সম্মাসঙ্কপ্পো ঝানসভাৰত্তা. তথা হি সো ‘‘অপ্পনা’’তি নিদ্দিট্ঠো. সম্মাসতিসম্মাৰাযামা পন সমাধিপক্খিযা এৰাতি আহ ‘‘অৰসেসা ধম্মা চেতোৰিমুত্তীতি ৰেদিতব্বা’’তি. চতুপারিসুদ্ধিসীলন্তি অরিযমগ্গাধিগমস্স পদট্ঠানভূতং চতুপারিসুদ্ধিসীলং. সুতাদীসুপি এসেৰ নযো. অত্তনো চিত্তপ্পৰত্তিআরোচনৰসেন সহ কথনং সংকথা, সংকথাৰ সাকচ্ছা. ইধ পন কম্মট্ঠানপটিবদ্ধাতি আহ ‘‘কম্মট্ঠানে…পে… কথা’’তি. তত্থ কম্মট্ঠানস্স একৰারং ৰীথিযা অপ্পটিপজ্জনং খলনং, অনেকৰারং পক্খলনং, তদুভযস্স ৰিচ্ছেদনীকথা খলনপক্খলনছেদনকথা. পূরেন্তস্সাতি ৰিৰট্টনিস্সিতং কত্ৰা পালেন্তস্স ব্রূহেন্তস্স চ. সুণন্তস্সাতি ‘‘যথাউগ্গহিতকম্মট্ঠানং ফাতিং গমিস্সতী’’তি এৰং সুণন্তস্স. তেনেৰ হি ‘‘সপ্পাযধম্মস্সৰন’’ন্তি ৰুত্তং. কম্মং করোন্তস্সাতি ভাৰনানুযোগকম্মং করোন্তস্স.

পঞ্চসুপি ঠানেসু অন্ত-সদ্দো হেতুঅত্থজোতনো দট্ঠব্বো. এৰঞ্হি ‘‘যথা হী’’তিআদিনা ৰুচ্চমানা অম্বুপমা চ যুজ্জেয্য. উদককোট্ঠকন্তি আলৰালং. থিরং কত্ৰা বন্ধতীতি অসিথিলং দল়্হং নাতিমহন্তং নাতিখুদ্দকং কত্ৰা যোজেতি. থিরং করোতীতি উদকসিঞ্চনকালে ততো ততো ৰিস্সরিত্ৰা উদকস্স অনিক্খমনত্থং আলৰালং থিরতরং করোতি. সুক্খদণ্ডকোতি তস্সেৰ অম্বগচ্ছকস্স সুক্খো সাখাসীসকো. কিপিল্লিকপুটোতি তম্বকিপিল্লিককুটজং. খণিত্তিন্তি কুদালং. কোট্ঠকবন্ধনং ৰিয সীলং সম্মাদিট্ঠিযা ৰড্ঢনুপাযস্স মূলভাৰতো. উদকসিঞ্চনং ৰিয ধম্মস্সৰনং ভাৰনায পরিব্রূহনতো. মরিযাদায থিরভাৰকরণং ৰিয সমথো যথাৰুত্তভাৰনাধিট্ঠানায সীলমরিযাদায দল়্হভাৰাপাদনতো. সমাহিতস্স হি সীলং থিরতরং হোতি. সমীপে ৰল্লিআদীনং হরণং ৰিয কম্মট্ঠানে খলনপক্খলনচ্ছেদনং ইজ্ঝিতব্বভাৰনায ৰিবন্ধাপনযনতো. মূলখণনং ৰিয সত্তন্নং অনুপস্সনানং ভাৰনা তস্সা ৰিবন্ধস্স মূলকানং তণ্হামানদিট্ঠীনং পলিখণনতো. এত্থ চ যস্মা সুপরিসুদ্ধসীলস্স কম্মট্ঠানং অনুযুঞ্জন্তস্স সপ্পাযধম্মস্সৰনং ইচ্ছিতব্বং, ততো যথাসুতে অত্থে সাকচ্ছাসমাপজ্জনং, ততো কম্মট্ঠানৰিসোধনেন সমথনিপ্ফত্তি, ততো সমাহিতস্স আরদ্ধৰিপস্সকস্স ৰিপস্সনাপারিপূরি. পরিপুণ্ণৰিপস্সনো মগ্গসম্মাদিট্ঠিং পরিব্রূহেতীতি এৰমেতেসং অঙ্গানং পরম্পরায সম্মুখা চ অনুগ্গণ্হনতো অযমানুপুব্বী কথিতাতি ৰেদিতব্বং.

৪৫৩. ইধ কিং পুচ্ছতীতি ইধ এৰং অরহত্তফলং পাপিতায দেসনায ‘‘কতি পনাৰুসো, ভৰা’’তি ভৰং পুচ্ছন্তো কীদিসং অনুসন্ধিং উপাদায পুচ্ছতীতি অত্থো. তেনেৰ হি ‘‘মূলমেৰ গতো অনুসন্ধী’’তি ৰত্ৰা অধিপ্পাযং পকাসেন্তো ‘‘দুপ্পঞ্ঞো’’তিআদিমাহ. দুপ্পঞ্ঞোতি হি ইধ অপ্পটিৰিদ্ধসচ্চো অধিপ্পেতো, ন জল়ো এৰ. কামভৰোতিআদীসু কম্মোপপত্তিভেদতো দুৰিধোপি ভৰো অধিপ্পেতোতি দস্সেন্তো ‘‘কামভৰূপগং কম্ম’’ন্তিআদিমাহ. তত্থ যং ৰত্তব্বং, তং ৰিসুদ্ধিমগ্গেতংসংৰণ্ণনাযং (ৰিসুদ্ধি. ২.৬৪৭; ৰিসুদ্ধি. মহাটী. ২.৬৪৬-৬৪৭) ৰুত্তনযেন ৰেদিতব্বং. পুনব্ভৰস্সাতি পুনপ্পুনং অপরাপরং ভৰনতো জাযনতো পুনব্ভৰোতি লদ্ধনামস্স ৰট্টপবন্ধস্স. তেনাহ ‘‘ইধ ৰট্টং পুচ্ছিস্সামী’’তি. অভিনিব্বত্তীতি ভৰযোনিগতিআদিৰসেন নিব্বত্তি. তহিং তহিং তস্মিং তস্মিং ভৰাদিকে. অভিনন্দনাতি তণ্হাঅভিনন্দনহেতু. গমনাগমনং হোতীতিআদিনা ভৰাদীসু সত্তানং অপরাপরং চুতিপটিসন্ধিযো দস্সেতি. খযনিরোধেনাতি অচ্চন্তখযসঙ্খাতেন অনুপ্পাদনিরোধেন. উভযমেতং ন ৰত্তব্বং পহানাভিসমযভাৰনাভিসমযানং অচ্চাসন্নকালত্তা. ৰত্তব্বং তং হেতুফলধম্মূপচারৰসেন. যথা হি পদীপুজ্জলনহেতুকো অন্ধকারৰিগমো, এৰং ৰিজ্জুপ্পাদহেতুকো অৰিজ্জানিরোধো, হেতুফলধম্মা চ সমানকালাপি পুব্বাপরকালা ৰিয ৰোহরীযন্তি যথা – ‘‘চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণ’’ন্তি (ম. নি. ১.২০৪, ৪০০; ম. নি. ৩.৪২০, ৪২৫, ৪২৬; সং. নি. ২.৪৩-৪৫; ২.৪.৬০; কথা. ৪৬৫, ৪৬৭) পচ্চযপচ্চযুপ্পন্নকিরিযা. গমনং উপচ্ছিজ্জতি ইধ কামভৰে পরিনিব্বানেন. আগমনং উপচ্ছিজ্জতি তত্থ রূপারূপেসু পরিনিব্বানেন. গমনাগমনং উপচ্ছিজ্জতি সব্বসো অপরাপরুপ্পত্তিযা অভাৰতো.

৪৫৪. ৰিৰট্টকথায পরতো জোতিতং পঠমং ঝানং ৰিৰট্টং পত্ৰা ঠিতস্স উক্কট্ঠনিদ্দেসেন উভতোভাগৰিমুত্তস্স নিরোধসাধকং ৰিভাৰিতুং যুত্তন্তি আহ ‘‘কতমং পনাৰুসোতি ইধ কিং পুচ্ছতী’’তিআদি. তথা হি অনন্তরং নিরোধসমাপজ্জনকেন ভিক্খুনা জানিতব্বানি পঠমস্স ঝানস্স সম্পযোগপহানঙ্গানি পুচ্ছিতানি. অঙ্গৰৰত্থানন্তি ঝানঙ্গৰৰত্থানং. কোট্ঠাসপরিচ্ছেদোতি তত্থ লব্ভমানফস্সপঞ্চমকাদিধম্মকোট্ঠাসপরিচ্ছেদো জানিতব্বো. ইমস্মিং ঝানে এত্তকা ধম্মা সংৰিজ্জন্তি, এত্তকা নিরোধিতাতি জানিতব্বং. উপকারানুপকারানি অঙ্গানীতি নিরোধসমাপত্তিযা উপকারানি চ অনুপকারানি চ অঙ্গানি. নিরোধসমাপত্তিযা হি সোল়সহি ঞাণচরিযাহি নৰহি সমাধিচরিযাহি চ পত্তব্বত্তা তংতংঞাণস্স সমাধিচরিযাহি সমতিক্কমিতব্বা ধম্মা অনুপকারকঙ্গানি, সমতিক্কমকা উপকারকঙ্গানি. তেসঞ্হি ৰসেন যথানুপুব্বং উপসন্তুপসন্তওল়ারিকভাৰায ভৰগ্গসমাপত্তিযা সঙ্খারাৰসেসসুখুমতং পত্তা চিত্তচেতসিকা যথাপরিচ্ছিন্নং কালং নিরুজ্ঝন্তি, অপ্পৰত্তিং গচ্ছন্তি. তস্সাতি নিরোধস্স. অনন্তরপচ্চযন্তি অনন্তরপচ্চযসদিসং. ন হি নিরোধস্স কোচি ধম্মো অনন্তরপচ্চযো নাম অত্থি. যঞ্হি তদা চিত্তচেতসিকানং তথা নিরুজ্ঝনং, তং যথাৰুত্তপুব্বাভিসঙ্খারহেতুকায নেৰসঞ্ঞানাসঞ্ঞাযতনসমাপত্তিযা অহোসীতি সা তস্স অনন্তরপচ্চযো ৰিয হোতীতি তং ৰুত্তং. ছ সমাপত্তিযোতি সুত্তন্তনযেন ৰুত্তসুত্তন্তপিটকসংৰণ্ণনাতি কত্ৰা. ‘‘সত্ত সমাপত্তিযো’’তি পন ৰত্তব্বং, অঞ্ঞথা ইদং ‘‘চতুরঙ্গিক’’ন্তি ন ৰত্তব্বং সিযা. নযং ৰা দস্সেত্ৰাতি আদিঅন্তদস্সনৰসেন নযদস্সনং কত্ৰা.

৪৫৫. এৰং নিরোধস্স পাদকং ৰিভাৰেত্ৰা ইদানি অন্তোনিরোধে অনুপবন্ধভাৰতো পঞ্চন্নং পসাদানং পচ্চযপুচ্ছনে পঠমং তাৰ তে সরূপতো আৰেণিকতো আৰেণিকৰিসযতো পটিস্সরণতো চ পুচ্ছনৰসেন পাল়ি পৰত্তাতি দস্সেন্তো ‘‘ৰিঞ্ঞাণনিস্সযে পঞ্চ পসাদে পুচ্ছন্তো’’তি আহ. গোচরৰিসযন্তি এত্থ কামং তব্বহুলচারিতাপেক্খং গোচরগ্গহণং, অনঞ্ঞত্থভাৰাপেক্খং ৰিসযগ্গহণন্তি অত্থেৰ গোচরৰিসযভাৰানং ৰিসেসো, ৰিৰরিযমানং পন উভযম্পি আরম্মণসভাৰমেৰাতি আহ ‘‘গোচরভূতং ৰিসয’’ন্তি. একেকস্সাতি একো একস্স, অঞ্ঞো অঞ্ঞস্সাতি অত্থো. অঞ্ঞত্থো হি অযং এক-সদ্দো ‘‘ইত্থেকে অভিৰদন্তী’’তিআদীসু (ম. নি. ৩.২৭) ৰিয. সচে হীতিআদি অভূতপরিকপ্পনৰচনমেতং. তত্থ সমোধানেত্ৰাতি একজ্ঝং কত্ৰা. ৰিনাপি মুখেনাতিআদিনা অত্থসল্লাপিকনিদস্সনং নাম দস্সেতি. যথা ৰিঞ্ঞাণাধিট্ঠিতমেৰ চক্খু রূপং পস্সতি, ন কেৰলং, এৰং চক্খুনিস্সযমেৰ ৰিঞ্ঞাণং তং পস্সতি, ন ইতরন্তি আহ ‘‘চক্খুপসাদে উপনেহী’’তি. তেন তেসং তত্থ সংহচ্চকারিতং দস্সেতি. যদি ৰা নীলং যদি ৰা পীতকন্তি ইদং নীলপীতাদিসভাৰজাননমত্তং সন্ধাযাহ. নীলং পীতকন্তি পজাননং চক্খুৰিঞ্ঞাণস্স নত্থেৰ অৰিকপ্পকভাৰতো. এতেসং চক্খুৰিঞ্ঞাণাদীনং. নিস্সযসীসেন নিস্সিতপুচ্ছা হেসা, এৰঞ্হি ৰিসযানুভৰনচোদনা সমত্থিতা হোতি. তেনাহ ‘‘চক্খুৰিঞ্ঞাণং হী’’তিআদি. যথাসকং ৰিসযং রজ্জনাদিৰসেন অনুভৰিতুং অসমত্থানি চক্খুৰিঞ্ঞাণাদীনি, তত্থ সমত্থতাযেৰ চ নত্থি, ন কিঞ্চি অত্থতো পটিসরন্তানি ৰিয হোন্তীতি ৰুত্তং ‘‘কিং এতানি পটিসরন্তী’’তি. জৰনমনো পটিসরণন্তি পঞ্চদ্ৰারিকং ইতরঞ্চ সাধারণতো ৰত্ৰা পুন যায’স্স রজ্জনাদিপৰত্তিযা পটিসরণতা, সা সৰিসেসা যত্থ লব্ভতি, তং দস্সেন্তো ‘‘মনোদ্ৰারিকজৰনমনো ৰা’’তি আহ. এতস্মিং পন দ্ৰারেতি চক্খুদ্ৰারে জৰনং রজ্জতি ৰা দুস্সতি ৰা মুয্হতি ৰা, যতো তত্থ অঞ্ঞাণাদিঅসংৰরো পৰত্ততি.

তত্রাতি তস্মিং জৰনমনস্সেৰ পটিসরণভাৰে. দুব্বলভোজকাতি হীনসামত্থিযা রাজভোগ্গা. সেৰকানং গণনায যোজিতদিৰসে লব্ভমানকহাপণো যুত্তিকহাপণো. অন্দুবন্ধনেন বদ্ধস্স ৰিস্সজ্জনেন লব্ভমানকহাপণো বন্ধকহাপণো. কিঞ্চি পহরন্তে মা পহরন্তূতি পটিক্খিপতো দাতব্বদণ্ডো মাপহারকহাপণো. সো সব্বোপি পরিত্তকেসু গামিকমনুস্সেসু তথা লব্ভমানো এত্তকো হোতীতি আহ ‘‘অট্ঠকহাপণো ৰা’’তিআদি. সতৰত্থুকন্তি সতকরীসৰত্থুকং. এস নযো সেসপদদ্ৰযেপি. তত্থাতিআদি উপমাসংসন্ধনং, তং সুৰিঞ্ঞেয্যমেৰ.

৪৫৬. অন্তোনিরোধস্মিং পঞ্চ পসাদেতি নিরোধসমাপন্নস্স পৰত্তমানে পঞ্চ পসাদে. কিরিযমযপৰত্তস্মিন্তি জৰনাদিকিরিযানিব্বত্তকধম্মপ্পৰত্তিযং. বলৰপচ্চযা হোন্তীতি পচ্ছাজাতৰিপ্পযুত্তঅত্থিঅৰিগতপচ্চযেহি পচ্চযা হোন্তি, উপত্থম্ভকভাৰেন বলৰপচ্চযা হোন্তি. জীৰিতিন্দ্রিযং পটিচ্চাতি ইন্দ্রিযঅত্থিঅৰিগতপচ্চযৰসেন পচ্চযভূতং জীৰিতিন্দ্রিযং পটিচ্চ পঞ্চৰিধোপি পসাদো তিট্ঠতি. জীৰিতিন্দ্রিযেন ৰিনা ন তিট্ঠতি জীৰিতিন্দ্রিযরহিতস্স কম্মসমুট্ঠানরূপকলাপস্স অভাৰতো. তস্মাতি যস্মা অনুপালনলক্খণেন জীৰিতেন অনুপালিতা এৰ উস্মা পৰত্ততি, ন তেন অননুপালিতা, তস্মা উস্মা আযুং পটিচ্চ তিট্ঠতি. জালসিখং পটিচ্চ আভা পঞ্ঞাযতীতি জালসিখাসঙ্খাতভূতসঙ্ঘাতং সহেৰ পৰত্তমানং নিস্সায ‘‘আভা’’তি লদ্ধনামা ৰণ্ণধাতু ‘‘উজ্জলতি, অন্ধকারং ৰিধমতি, রূপগতানি চ ৰিদংসেতী’’তিআদীহি পকারেহি ঞাযতি. তং আলোকং পটিচ্চাতি তং ৰুত্তপ্পকারং আলোকং পচ্চযং লভিত্ৰা. জালসিখা পঞ্ঞাযতীতি ‘‘অপ্পিকা, মহতী, উজু, কুটিলা’’তিআদিনা পাকটা হোতি.

জালসিখা ৰিয কম্মজতেজো নিস্সযভাৰতো. আলোকো ৰিয জীৰিতিন্দ্রিযং তন্নিস্সিতভাৰতো. ইদানি উপমোপমিতব্বানং সম্বন্ধং দস্সেতুং ‘‘জালসিখা হী’’তিআদি ৰুত্তং. আলোকং গহেত্ৰাৰ উপ্পজ্জতীতি ইমিনা যথা জালসিখায সহেৰ আলোকো উপ্পজ্জতি, এৰং কম্মজুস্মনা সহেৰ জীৰিতিন্দ্রিযং উপ্পজ্জতীতি দস্সেতি. জালসিখাসন্নিস্সযো তস্সা সতিযেৰ হোন্তো আলোকো তায উপ্পাদিতো ৰিয হোতীতি আহ ‘‘অত্তনা জনিতআলোকেনেৰা’’তি. উস্মা নামেত্থ কম্মসমুট্ঠানা তেজোধাতু তন্নিস্সিতঞ্চ জীৰিতিন্দ্রিযং তদনুপালকঞ্চাতি আহ ‘‘কম্মজমহাভূতসম্ভৰেন জীৰিতিন্দ্রিযেন উস্মায অনুপালন’’ন্তি. ন কেৰলং খণট্ঠিতিযা এৰ, অথ খো পবন্ধানুপচ্ছেদস্সপি জীৰিতিন্দ্রিযং কারণন্তি আহ ‘‘ৰস্সসতম্পি কম্মজতেজপৰত্তং পালেতী’’তি. উস্মা আযুনো পচ্চযো হোন্তো সেসভূতসহিতো এৰ হোতীতি আহ ‘‘মহাভূতানী’’তি. তথা আযুপি সহজাতরূপং পালেন্তমেৰ উস্মায পচ্চযো হোতীতি ৰুত্তং ‘‘মহাভূতানি পালেতী’’তি.

৪৫৭. আযু এৰ ইন্দ্রিযপচ্চযাদিৰসেন সহজাতধম্মানং অনুপালনৰসেন সঙ্খরণতো আযুসঙ্খারো. বহুৰচননিদ্দেসো পন অনেকসতসহস্সভেদেসু রূপকলাপেসু পৰত্তিযা অনেকভেদন্তি কত্ৰা. আরম্মণরসং অনুভৰন্তীতি ৰেদনিযা যথা ‘‘নিয্যানিকা’’তি. তেনাহ ‘‘ৰেদনা ধম্মাৰা’’তি. সুখাদিভেদভিন্নত্তা বহুৰচননিদ্দেসো. ইমেসং আযুসঙ্খারৰেদনানং একন্তনিরোধং সমাপন্নস্স মরণেন ভৰিতব্বং ৰেদনায নিরুদ্ধত্তা. আযুসঙ্খারানং তথা অনিরুদ্ধত্তা নিরোধস্স সমাপজ্জনমেৰ ন সিযা, কুতো ৰুট্ঠানং. তেন ৰুত্তং পাল়িযং ‘‘তে চ হাৰুসো’’তিআদি. ৰুট্ঠানং পঞ্ঞাযতি সঞ্ঞাৰেদনাদীনং উপ্পত্তিযা. ইদানি তমত্থং ৰিত্থারতো উপমায ৰিভাৰেতুং ‘‘যো হী’’তিআদি ৰুত্তং. উক্কণ্ঠিত্ৰাতি নানারম্মণাপাততো নিব্বিন্দিত্ৰা. যথাপরিচ্ছিন্নকালৰসেনাতি যথাপরিচ্ছিন্নে কালে সম্পত্তে. রূপজীৰিতিন্দ্রিযপচ্চযাতি ইন্দ্রিযপচ্চযভূতা. জালাপৰত্তং ৰিয অরূপধম্মা তেজুস্সদভাৰতো ৰিসযোভাসনতো চ. উদকপ্পহারো ৰিয নিরোধসমাপত্তিযা পুব্বাভিসঙ্খারো. পিহিতঅঙ্গারা ৰিয রূপজীৰিতিন্দ্রিযং উস্মামত্ততায অনোভাসনতো. যথাপরিচ্ছিন্নকালাগমনন্তি যথাপরিচ্ছিন্নকালস্স উপগমনং. অনুরূপপত্তিৰসেনেৰ রূপপৰত্তিগ্গহণং. ইমং রূপকাযং জহন্তীতি ইমস্মা রূপকাযা কল়েৰরা ৰিগচ্ছন্তি নপ্পৰত্তন্তি.

কাযেন সঙ্খরীযন্তীতি কাযসঙ্খারা তপ্পটিবদ্ধৰুত্তিতায. ৰাচং সঙ্খরোন্তীতি ৰচীসঙ্খারা. ৰিতক্কেত্ৰা ৰিচারেত্ৰা হি ৰাচং ভিন্দতি কথেতি. চিত্তেন সঙ্খরীযন্তীতি চিত্তসঙ্খারা তপ্পটিবদ্ধৰুত্তিতো. চিত্তসঙ্খারনিরোধচোদনায রূপনিরোধো ৰিয চিত্তনিরোধো অচোদিতো তেসং ততো অঞ্ঞত্তাতি ন চিত্তসম্পযুত্তনিরোধো একন্তিকো ৰিতক্কাদিনিরোধে তদভাৰতো. যং পন ৰুত্তং ‘‘ৰাচা অনিরুদ্ধা হোতী’’তি, তম্পি ন. ৰাচং সঙ্খরোন্তীতি হি ৰচীসঙ্খারা, তেসু নিরুদ্ধেসু কথং ৰাচায অনিরোধো. চিত্তং পন নিরুদ্ধেসুপি চিত্তসঙ্খারেসু তেহি অনভিসঙ্খতত্তা ৰিতক্কাদিনিরোধো ৰিয পৰত্ততিযেৰাতি অযমেত্থ পরস্স অধিপ্পাযো. আনন্তরিযকম্মং কতং ভৰেয্য, চিত্তস্স অনিরুদ্ধত্তা তং নিস্সায চ রূপধম্মানং অনপগতত্তা তে জীৰন্তি এৰ নামাতি. ব্যঞ্জনে অভিনিৰেসং অকত্ৰাতি ‘‘চিত্তসঙ্খারা নিরুদ্ধা’’তি ৰচনতো তেৰ নিরুদ্ধা, ন চিত্তন্তি এৰং নেয্যত্থং সুত্তং ‘‘নীতত্থ’’ন্তি অভিনিৰেসং অকত্ৰা. আচরিযানং নযে ঠত্ৰাতি পরম্পরাগতানং আচরিযানং অধিপ্পাযে ঠত্ৰাতি অত্থো. উপপরিক্খিতব্বোতি সুত্তন্তরাগমতো সুত্তন্তরপদস্স অৰিপরীতো অত্থো ৰীমংসিতব্বো. যথা হি ‘‘অসঞ্ঞভৰো’’তি ৰচনতো ‘‘সঞ্ঞাৰ তত্থ নত্থি, ইতরে পন চিত্তচেতসিকা সন্তী’’তি অযমেত্থ অত্থো ন গয্হতি. যথা চ ‘‘নেৰসঞ্ঞানাসঞ্ঞাযতন’’ন্তি ৰচনতো ‘‘সঞ্ঞাৰ তত্থ তাদিসী, ন ফস্সাদযো’’তি অযমেত্থ অত্থো ন গয্হতি সঞ্ঞাসীসেন দেসনাতি কত্ৰা, এৰমিধাপি ‘‘চিত্তসঙ্খারা নিরুদ্ধা’’তি, ‘‘সঞ্ঞাৰেদযিতনিরোধো’’তি চ দেসনাসীসমেৰ. সব্বেপি পন চিত্তচেতসিকা তত্থ নিরুজ্ঝন্তেৰাতি অযমেত্থ অৰিপরীতো অত্থো ৰেদিতব্বো, তথাপুব্বাভিসঙ্খারেন সব্বেসংযেৰ চিত্তচেতসিকানং তত্থ নিরুজ্ঝনতো. এতেন যং পুব্বে ‘‘অঞ্ঞত্তা, তদভাৰতো’’তি চ যুত্তিৰচনং, তদযুত্তং অধিপ্পাযানৰবোধতোতি দস্সিতং হোতি. তেনাহ ‘‘অত্থো হি পটিসরণং, ন ব্যঞ্জন’’ন্তি.

উপহতানীতি বাধিতানি. মক্খিতানীতি ধংসিতানি. আরম্মণঘট্টনায ইন্দ্রিযানং কিলমথো চক্খুনা ভাসুররূপসুখুমরজদস্সনেন ৰিভাৰেতব্বো. তথা হি উণ্হকালে পুরতো অগ্গিম্হি জলন্তে খরস্সরে চ পণৰে আকোটিতে অক্খীনি ভেদানি ৰিয ন সহন্তি সোতানি ‘‘সিখরেন ৰিয অভিহঞ্ঞন্তী’’তি ৰত্তারো হোন্তি.

৪৫৮. রূপাৰচরচতুত্থজ্ঝানমেৰ রূপৰিরাগভাৰনাৰসেন পৰত্তং অরূপজ্ঝানন্তি নেৰসঞ্ঞানাসঞ্ঞাযতনং ৰিস্সজ্জেন্তো ধম্মসেনাপতি ‘‘সুখস্স চ পহানা’’তিআদিনা ৰিস্সজ্জেসি. অপগমনেন ৰিগমেন পচ্চযা অপগমনপচ্চযা সুখাদিপ্পহানানি. অধিগমপচ্চযা পন কসিণেসু রূপাৰচরচতুত্থজ্ঝানং হেট্ঠিমা তযো চ আরুপ্পা. ন হি সক্কা তানি অনধিগন্ত্ৰা নেৰসঞ্ঞানাসঞ্ঞাযতনমধিগন্তুং. নিরোধতো ৰুট্ঠানকফলসমাপত্তিন্তি নিরোধতো ৰুট্ঠানভূতং অনিচ্চানুপস্সনাসমুদাগতফলসমাপত্তিং. সা হি ‘‘অনিমিত্তা চেতোৰিমুত্তী’’তি ৰুচ্চতি. যথা সমথনিস্সন্দো অভিঞ্ঞা, মেত্তাকরুণামুদিতাব্রহ্মৰিহারনিস্সন্দো উপেক্খাব্রহ্মৰিহারো, কসিণনিস্সন্দো আরুপ্পা, সমথৰিপস্সনানিস্সন্দো নিরোধসমাপত্তি, এৰং ৰিপস্সনায নিস্সন্দফলভূতং সামঞ্ঞফলন্তি আহ ‘‘ৰিপস্সনানিস্সন্দায ফলসমাপত্তিযা’’তি. আরম্মণা নাম সারম্মণধম্মানং ৰিসেসতো উপ্পত্তিনিমিত্তন্তি আহ ‘‘সব্বনিমিত্তানন্তি রূপাদীনং সব্বারম্মণান’’ন্তি. নত্থি এত্থ কিঞ্চি সঙ্খারনিমিত্তন্তি অনিমিত্তা, অসঙ্খতা ধাতূতি আহ ‘‘সব্বনিমিত্তাপগতায নিব্বানধাতুযা’’তি. ফলসমাপত্তিসহজাতং মনসিকারং সন্ধাযাহ, ন আৰজ্জনমনসিকারং. ন হেত্থ তস্স সম্ভৰো অনুলোমানন্তরং উপ্পজ্জনতো.

ইমস্মিং ঠানেতি ইধ ৰুত্তনিরোধস্স আদিমজ্ঝপরিযোসানানং গহিতানং ইমস্মিং পরিযোসানস্স গহিতট্ঠানে. দ্ৰীহি বলেহীতি সমথৰিপস্সনাবলেহি. তযো চ সঙ্খারানন্তি কাযসঙ্খারাদীনং তিণ্ণং সঙ্খারানং. সোল়সহি ঞাণচরিযাহীতি অনিচ্চানুপস্সনা, দুক্খা, অনত্তা, নিব্বিদা, ৰিরাগা, নিরোধা, পটিনিস্সগ্গা, ৰিৰট্টানুপস্সনা, সোতাপত্তিমগ্গো…পে… অরহত্তফলসমাপত্তীতি ইমাহি সোল়সহি ঞাণচরিযাহি. নৰহি সমাধিচরিযাহীতি পঠমজ্ঝানসমাধিআদীহি নৰহি সমাধিচরিযাহি. যো যথাৰুত্তাসু চরিযাসু পুগ্গলস্স ৰসীভাৰো, সা ৰসীভাৰতাপঞ্ঞা. অস্সা সা কথিতাতি যোজনা. ৰিনিচ্ছযকথাতি ৰিনিচ্ছযৰসেন পৰত্তা অট্ঠকথা কথিতা. তস্মা ৰিসুদ্ধিমগ্গে (ৰিসুদ্ধি. ২.৮৬৮-৮৬৯) তংসংৰণ্ণনাযঞ্চ (ৰিসুদ্ধি. মহাটী. ২.৮৬৮) ৰুত্তনযেন ৰেদিতব্বা.

ৰলঞ্জনসমাপত্তি অরিযৰিহারৰসেন ৰিহরণসমাপত্তি. ঠিতিযাতি এত্থ পবন্ধট্ঠিতি অধিপ্পেতা, ন খণট্ঠিতি. কস্মা? সমাপজ্জনত্তা. তেনাহ ‘‘ঠিতিযাতি চিরট্ঠিতত্থ’’ন্তি. অদ্ধানপরিচ্ছেদোতি এত্তকং কালং সমাপত্তিযা ৰীতিনামেস্সামীতি পগেৰ কালপরিচ্ছেদো. রূপাদিনিমিত্তৰসেনাতি কম্মকম্মনিমিত্তগতিনিমিত্তেসু যথারহং লব্ভমানরূপাদিনিমিত্তৰসেন. তত্থ যস্মা কম্মনিমিত্তে ছব্বিধম্পি আরম্মণং লব্ভতি, তস্মা ‘‘সব্বনিমিত্তান’’ন্তি ৰুত্তং, ন সব্বেসং আরম্মণানং একজ্ঝং, একন্ততো ৰা মনসিকাতব্বতো. লক্খণৰচনঞ্হেতং যথা ‘‘দাতব্বমেতং ভেসজ্জং, যদি মে ব্যাধিতা সিযু’’ন্তি.

৪৫৯. নীলম্পি সঞ্জানাতীতিআদিনা নীলাদিগ্গহণমুখেন তংৰণ্ণানং সত্তানং সঞ্জাননং অৰেরাদিভাৰমনসিকরণং জোতিতন্তি আহ ‘‘এতস্মিঞ্হি ঠানে অপ্পমাণা চেতোৰিমুত্তি কথিতা’’তি. এত্থ আকিঞ্চঞ্ঞং কথিতন্তি সম্বন্ধো. ‘‘এত্থ সুঞ্ঞতা’’তি, ‘‘এত্থ অনিমিত্তা’’তি এত্থাপি এসেৰ নযো. ন্তি ‘‘ইধ অঞ্ঞং অভিনৰং নাম নত্থী’’তিআদিনা ৰুত্তং অত্থৰচনং. এতাতি অপ্পমাণচেতোৰিমুত্তিআদযো. একনামকাতি একেকনামকা, যে নানাব্যঞ্জনাতি অধিপ্পেতা. একো ধম্মোতি অরহত্তফলসমাপত্তি. চতুনামকোতি অপ্পমাণচেতোৰিমুত্তিআদিনামকো. এতন্তি এতমত্থং. অপ্পমাণাতি অনোধিসো, ওধিসোপি ৰা ‘‘এত্তকা’’তি অপরিমিতা. অসেসেত্ৰাতি অসুভসমাপত্তি ৰিয একস্সেৰ অগ্গহণতো.

কিঞ্চাপি অসুভনিমিত্তারম্মণম্পি কিঞ্চনং হোতি, আরম্মণসঙ্ঘট্টনস্স কিঞ্চনস্স অসুভসমাপত্তীনম্পি পটিভাগনিমিত্তসঙ্খাতং আরম্মণং সবিম্বং ৰিয ৰিগ্গহং কিঞ্চনং হুত্ৰা উপট্ঠাতি, ন তথা ইমস্সাতি. ননু ব্রহ্মৰিহারপঠমারুপ্পানম্পি পটিভাগনিমিত্তভূতং কিঞ্চি আরম্মণং নত্থীতি? সচ্চং নত্থি, অযং পন পঠমারুপ্পৰিঞ্ঞাণং ৰিয ন পটিভাগনিমিত্তভূতআরম্মণতায এৰং ৰুত্তা. অত্তেনাতি অত্তনা. ভৰতি এতেন অত্তাতি অভিধানং বুদ্ধি চাতি ভাৰো, অত্তা. ভাৰ-সদ্দোপি অত্তপরিযাযোতি আহ ‘‘ভাৰপোসপুগ্গলাদিসঙ্খাতেনা’’তি. নেসং অপ্পমাণসমাধিআদীনং চতুন্নং. ‘‘নানতা পাকটাৰা’’তি ৰুত্তং নানত্তং ভূমিতো আরম্মণতো চ দস্সেতুং ‘‘অত্থো পনা’’তিআদি ৰুত্তং. পরিত্তাদিভাৰেন অতীতাদিভাৰেন অজ্ঝত্তাদিভাৰেন চ ন ৰত্তব্বং আরম্মণং এতিস্সাতি নৰত্তব্বারম্মণা নিব্বানারম্মণফলসমাপত্তিভাৰতো.

এত্তকোতি রাগাদীহি সংকিলিট্ঠতায এত্তকপ্পমাণো, উত্তানো পরিত্তচেতসোতি অত্থো. নিব্বানম্পি অপ্পমাণমেৰ পমাণকরণানং অভাৰেনাতি আনেত্ৰা সম্বন্ধো. অকুপ্পাতি অরহত্তফলচেতোৰিমুত্তি পটিপক্খেহি অকোপনীযতায. কিঞ্চতীতি কত্তরি পঠিতো ধাতু মদ্দনত্থোতি আহ ‘‘কিঞ্চতি মদ্দতী’’তি. তস্স পযোগং দস্সেতুং ‘‘মনুস্সা কিরা’’তিআদি ৰুত্তং.

সমূহাদিঘনৰসেন সকিচ্চপরিচ্ছেদতায চ সৰিগ্গহা ৰিয উপট্ঠিতা সঙ্খারা নিচ্চাদিগ্গাহস্স ৰত্থুতায ‘‘নিচ্চনিমিত্তং সুখাদিনিমিত্ত’’ন্তি চ ৰুচ্চতি. ৰিপস্সনা পন তত্থ ঘনৰিনিব্ভোগং করোন্তী নিচ্চাদিগ্গাহং ৰিধমেন্তী ‘‘নিমিত্তং সমুগ্ঘাতেতী’’তি ৰুত্তা ঘননিমিত্তস্স আরম্মণভূতস্স অভাৰা. ন গহিতাতি একত্থপদনিদ্দেসে পাল়িযং কস্মা ন গহিতা? সাতি সুঞ্ঞতা চেতোৰিমুত্তি. সব্বত্থাতি অপ্পমাণাচেতোৰিমুত্তিআদিনিদ্দেসেসু. আরম্মণৰসেনাতি আরম্মণৰসেনপি একত্থা, ন কেৰলং সভাৰসরসতোৰ. ইমিনা পরিযাযেনাতি অপ্পমাণতোতিআদিনা আরম্মণতো লদ্ধপরিযাযেন. অঞ্ঞস্মিং পন ঠানেতি আকিঞ্চঞ্ঞাদিসদ্দপৰত্তিহেতুতো অঞ্ঞেন হেতুনা অপ্পমাণাতিসদ্দপ্পৰত্তিযং এতস্স চেতোৰিমুত্তিযা হোন্তি. এস নযো সেসেসুপি. ইমিনা পরিযাযেনাতি ইমিনা তায তায সমঞ্ঞায ৰোহরিতব্বতাপরিযাযেন. সচ্চানং দস্সনমুখেন ৰট্টৰসেন উট্ঠিতদেসনং অরহত্তেন কূটং গণ্হন্তো যথানুসন্ধিনাৰ দেসনং নিট্ঠপেসি. যং পনেত্থ অত্থতো অৰিভত্তং, তং সুৰিঞ্ঞেয্যমেৰ.

মহাৰেদল্লসুত্তৰণ্ণনায লীনত্থপ্পকাসনা সমত্তা.

৪. চূল়ৰেদল্লসুত্তৰণ্ণনা

৪৬০. অযং দেসনা যস্মা পুচ্ছাৰিস্সজ্জনৰসেন পৰত্তা, তস্মা পুচ্ছকৰিস্সজ্জকে পুচ্ছানিমিত্তঞ্চ সমুদাযতো ৰিভাৰেতুং ‘‘কো পনায’’ন্তিআদি ৰুত্তং. উপাসকত্তন্তি অমগ্গাগতং উপাসকত্তং. তেসন্তি একাদসনহুতানং. মগ্গাগতেন উপসমেন সন্তিন্দ্রিযো সন্তমানসো.

‘‘কিং নু খো অজ্জ ভৰিস্সতি অয্যপুত্তো’’তি ৰীথিং ওলোকযমানা. ওলম্বনত্থন্তি তস্স হত্থাৰলম্বনত্থং পুব্বাচিণ্ণৰসেন অত্তনো হত্থং পসারেসি. বহিদ্ধাতি অত্তনা অঞ্ঞং ৰিসভাগৰত্থুং সন্ধায ৰদতি. পরিভেদকেনাতি পেসুঞ্ঞৰাদিনা.

অধিগমপ্পিচ্ছতায ‘‘ন পকাসেতব্বো’’তি চিন্তেসি. পুন তং অনুকম্পন্তো ‘‘সচে খো পনাহ’’ন্তিআদিং চিন্তেসি. এসো ধম্মোতি এসো লোকুত্তরধম্মো. ৰিৰট্টং উদ্দিস্স উপচিতং নিব্বেধভাগিযং কুসলং উপনিস্সযো. ‘‘যদি মে উপনিস্সযো অত্থি, সক্কা এতং পটিলদ্ধুং. সচেপি নত্থি, আযতিং উপনিস্সযো ভৰিস্সতী’’তি চিরকালপরিভাৰিতায ঘটে পদীপজালা ৰিয অব্ভন্তরে দিপ্পমানায হেতুসম্পত্তিযা চোদিযমানা আহ ‘‘এৰং সন্তে ময্হং পব্বজ্জং অনুজানাথা’’তি.

লাভসক্কারো উপ্পজ্জি সুচিরকালং কতূপচিতপুঞ্ঞতায. অভিনীহারসম্পন্নত্তাতি সুজাতত্থেরস্স পদুমুত্তরস্স ভগৰতো অগ্গসাৰকস্স নিপচ্চকারং কত্ৰা – ‘‘তুম্হেহি দিট্ঠধম্মস্স ভাগী অস্স’’ন্তি নিব্বেধভাগিযং দানং দত্ৰা কতপত্থনাসঙ্খাতসম্পন্নাভিনীহারত্তা. নাতিচিরং কিলমিত্থাতি কম্মট্ঠানং ভাৰেন্তী ৰিপস্সনায পরিপাকৰসেন চিরং ন কিলমিত্থ. ৰুত্তমেৰত্থং ৰিৰরিতুং ‘‘ইতো পট্ঠাযা’’তিআদি ৰুত্তং. দুতিযগমনেনাতি পব্বাজনত্থং গমনতো দুতিযগমনেন.

উপনেত্ৰাতি পঞ্হস্স অত্থভাৰেন উপনেত্ৰা. সক্কাযন্তি সকাযং. উপনিক্খিত্তং কিঞ্চি ৰত্থুং সম্পটিচ্ছমানা, ৰিয সম্পটিচ্ছন্তী ৰিয. একো এৰ পাসো এতিস্সাতি একপাসকা, গণ্ঠি. সা হি সুমোচিযা, অনেকপাসা পন দুম্মোচিযা, একপাসগ্গহণং ৰিস্সজ্জনস্স সুকরভাৰদস্সনত্থং. পটিসম্ভিদাৰিসযে ঠত্ৰাতি এতেন থেরিযা পভিন্নপটিসম্ভিদতং দস্সেতি. পচ্চযভূতাতি আরম্মণাদিৰসেন পচ্চযভূতা.

থেরিযা ৰিসেসাধিগমস্স অত্তনো অৰিসযতায ৰিসাখো ‘‘ন সক্কা’’তিআদিনা চিন্তেসীতি দট্ঠব্বং. সচ্চৰিনিব্ভোগপঞ্হব্যাকরণেনাতি সচ্চপরিযাপন্নস্স ধম্মস্স দস্সনতো অঞ্ঞানঞ্ঞত্থনিদ্ধারণভেদনাসঙ্খাতস্স ৰিনিব্ভোগপঞ্হস্স ৰিস্সজ্জনেন. দ্ৰে সচ্চানীতি দুক্খসমুদযসচ্চানি. পটিনিৰত্তেত্ৰাতি পরিৰত্তেত্ৰা. গণ্ঠিপঞ্হন্তি দুব্বিনিব্বেধতায গণ্ঠিভূতং পঞ্হং.

ন তংযেৰ উপাদানং তে পঞ্চুপাদানক্খন্ধা একদেসস্স সমুদাযতাভাৰতো, সমুদাযস্স চ একদেসতাভাৰতো. নাপি অঞ্ঞত্র পঞ্চহি উপাদানক্খন্ধেহি উপাদানং তস্স তদেকদেসভাৰতো. ন হি একদেসো সমুদাযৰিনিমুত্তো হোতি. যদি হি তঞ্ঞেৰাতিআদিনা উভযপক্খেপি দোসং দস্সেতি. রূপাদিসভাৰম্পীতি রূপৰেদনাসঞ্ঞাৰিঞ্ঞাণসভাৰম্পি, ফস্সচেতনাদিসভাৰম্পি উপাদানং সিযা. অঞ্ঞত্র সিযাতি পঞ্চহি উপাদানক্খন্ধেহি ৰিসুংযেৰ উপাদানং যদি সিযা. পরসমযেতি নিকাযৰাদে. চিত্তৰিপ্পযুত্তো অনুসযোতি নিদস্সনমত্তমেতং নিকাযৰাদে চিত্তসভাৰাভাৰৰিঞ্ঞাণাদীনম্পি চিত্তৰিপ্পযুত্তভাৰপটিজাননতো. এৰং ব্যাকাসীতি ‘‘ন খো, আৰুসো’’তিআদিনা খন্ধগতছন্দরাগভাৰেন ব্যাকাসি. অত্থধম্মনিচ্ছযসম্ভৰতো অসম্বন্ধেন. তেসু কত্থচিপি অসম্মুয্হনতো অৰিত্থাযন্তেন. পুচ্ছাৰিসযে মোহন্ধকারৰিগমনেন পদীপসহস্সং জালেন্তেন ৰিয. সউপাদানুপাদানট্ঠানং অনুত্তানতায পচুরজনস্স গূল়্হো. অগ্গহিতসঙ্কেতানং কেসঞ্চি পটিচ্ছাদিতসদিসত্তা পটিচ্ছন্নো. তিলক্খণব্ভাহতধম্মৰিসযতায তিলক্খণাহতো. গম্ভীরঞাণগোচরতায গম্ভীরো. লদ্ধপতিট্ঠা অরিযসচ্চসম্পটিৰেধনতো. এৰং দিট্ঠধম্মাদিভাৰতো ৰেসারজ্জপ্পত্তা. সব্বসো নিৰুত্থব্রহ্মচরিযতায তিণ্ণং ভৰানম্পি অপরভাগে নিব্বানে নিৰুত্থৰতীতি ভৰমত্থকে ঠিতা.

৪৬১. ‘‘রূপং অত্ততো সমনুপস্সতী’’তি পদুদ্ধারং কত্ৰা ‘‘ইধেকচ্চো’’তিআদিনা (পটি. ম. ১.১৩০) পটিসম্ভিদাপাঠেন তদত্থং ৰিৰরতি. তত্থ অত্ততো সমনুপস্সতীতি অত্তাতি সমনুপস্সতি, অত্তভাৰেন সমনুপস্সতি. অহন্তি অত্তানং নিদ্দিসতি. অহংবুদ্ধিনিবন্ধনঞ্হি অত্তানং অত্তৰাদী পঞ্ঞপেতি, তস্মা যং রূপং সো অহন্তি যদেতং মম রূপং নাম, সো অহন্তি ৰুচ্চমানো মম অত্তা তং মম রূপন্তি রূপঞ্চ অত্তঞ্চ অদ্ৰযং অনঞ্ঞং সমনুপস্সতি. তথা পস্সতো চ অত্তা ৰিয রূপং, রূপং ৰিয ৰা অত্তা অনিচ্চোতি আপন্নমেৰ. অচ্চীতি জালসিখা. সা চে ৰণ্ণো, চক্খুৰিঞ্ঞেয্যাৰ সিযা, ন কাযৰিঞ্ঞেয্যা, ৰণ্ণোপি ৰা কাযাদিৰিঞ্ঞেয্যো অচ্চিযা অনঞ্ঞত্তাতি উপমেয্যং ৰিয উপমাপি দিট্ঠিগতিকস্স অযুত্তাৰ. দিট্ঠিপস্সনাযাতি মিচ্ছাদিট্ঠিসঙ্খাতায পস্সনায পস্সতি, ন তণ্হামানপঞ্ঞানুপস্সনায. অরূপং ৰেদনাদিং অত্তাতি গহেত্ৰা ছাযায রুক্খাধীনতায ছাযাৰন্তং রুক্খং ৰিয, রূপস্স সন্তকভাৰেন অত্তাধীনতায রূপৰন্তং অত্তানং সমনুপস্সতি. পুপ্ফাধীনতায পুপ্ফস্মিং গন্ধং ৰিয আধেয্যভাৰেন অত্তাধীনতায রূপস্স অত্তনি রূপং সমনুপস্সতি. যথা করণ্ডো মণিনো আধারো, এৰং রূপম্পি অত্তনো আধারোতি কত্ৰা অত্তানং রূপস্মিং সমনুপস্সতি. এসেৰ নযোতি ইমিনা অত্তনো ৰেদনাদীহি অনঞ্ঞত্তং তেসঞ্চাধারণতং নিস্সিততঞ্চ যথাৰুত্তং অতিদিসতি.

অরূপং অত্তাতি কথিতং ‘‘ৰেদনাৰন্ত’’ন্তিআদীসু ৰিয রূপেন ৰোমিস্সকতায অভাৰতো. রূপারূপমিস্সকো অত্তা কথিতো রূপেন সদ্ধিং সেসারূপধম্মানং অত্তাতি গহিতত্তা. উচ্ছেদদিট্ঠি কথিতা রূপাদীনং ৰিনাসদস্সনতো. তেনেৰাহ ‘‘রূপং অত্তাতি যো ৰদেয্য, তং ন উপপজ্জতি, অত্তা মে উপ্পজ্জতি চ ৰেতি চাতি ইচ্চস্স এৰমাগতং হোতী’’তিআদি. অৰসেসেসূতি পন্নরসসু ঠানেসু. সস্সতদিট্ঠি কথিতা রূপৰন্তাদিভাৰেন গহিতস্স অনিদ্ধারিতরূপত্তা.

দিট্ঠিগতিকো যং ৰত্থুং অত্তাতি সমনুপস্সতি, যেভুয্যেন তং নিচ্চং সুখন্তি চ সমনুপস্সতেৰ. সাৰকো পন তপ্পটিক্খেপেন সব্বে ধম্মা অনত্তাতি সুদিট্ঠত্তা রূপং অত্তাতি ন সমনুপস্সতি, তথাভূতো চ অনিচ্চং দুক্খং অনত্তাতি সমনুপস্সতি, তথা ৰেদনাদযোতি দস্সেন্তো ‘‘ন রূপং অত্ততো’’তিআদিমাহ. এৰং ভৰদিট্ঠিপি অৰিজ্জাভৰতণ্হা ৰিয ৰট্টস্স সমুদযোযেৰাতি দিট্ঠিকথাযং ‘‘এত্তকেন গমনং হোতী’’তিআদি. দিট্ঠিপ্পহানকথাযঞ্চ ‘‘এত্তকেন গমনং ন হোতী’’তিআদি ৰুত্তং.

৪৬২. হেট্ঠা ৰুত্তমত্থমেৰ পুচ্ছিতত্তা ‘‘থেরিযা পটিপুচ্ছিত্ৰা ৰিস্সজ্জেতব্বো’’তি ৰত্ৰা পটিপুচ্ছনৰিধিং দস্সেতুং ‘‘উপাসকা’’তিআদি ৰুত্তং. পটিপত্তিৰসেনাতি সক্কাযনিরোধগামিনিপটিপদাভাৰেন. সঙ্খতাসঙ্খতৰসেন লোকিযলোকুত্তরৰসেন সঙ্গহিতাসঙ্গহিতৰসেনাতি ‘‘ৰসেনা’’তি পদং পচ্চেকং যোজেতব্বং. তত্থ কামং অসঙ্খতো নাম মগ্গো নত্থি, কিং সঙ্খতো, উদাহু অসঙ্খতোতি পন পুচ্ছাৰসেন তথা ৰুত্তং? ‘‘অরিযো’’তি ৰচনেনেৰ মগ্গস্স লোকুত্তরতো সিদ্ধা, সঙ্গাহকখন্ধপরিযাপন্নানং পন মগ্গধম্মানম্পি সিযা লোকিযতাতি ইধ লোকিযগ্গহণং. কিঞ্চাপি সঙ্গহিতপদমেৰ পাল়িযং আগতং, ন অসঙ্গহিতপদং, যে পন সঙ্গাহকভাৰেন ৰুত্তা, তে সঙ্গহিতা ন হোন্তীতি অট্ঠকথাযং অসঙ্গহিতগ্গহণং কতন্তি দট্ঠব্বং. সঙ্খতোতিআদীসু সমেচ্চ সম্ভুয্য পচ্চযেহি কতোতি সঙ্খতো. তথাভূতো চ তংসমঙ্গিনো পুগ্গলস্স পুব্বভাগচেতনাতি ময্হং মগ্গো অট্ঠঙ্গিকো হোতু সত্তঙ্গিকো ৰাতি চেতিতভাৰেন চেতিতো. সহজাতচেতনাযপি চেতিতোৰ তস্সা সহকারীকারণভাৰতো, ততো এৰ পকপ্পিতো আযূহিতো. পচ্চযেহি নিপ্ফাদিতত্তা কতো নিব্বত্তিতো চ. সমাপজ্জন্তেন অত্তনো সন্তানে সম্মদেৰ আপজ্জন্তেন উপ্পাদেন্তেন. ইতি সত্তহিপি পদেহি পচ্চযনিব্বত্তিতংযেৰ অরিযমগ্গস্স দস্সেতি.

অসঙ্গহিতো খন্ধানং পদেসো এতস্স অত্থীতি মগ্গো সপ্পদেসো. নত্থি এতেসং পদেসাতি খন্ধা নিপ্পদেসা. পদিস্সতি এতেন সমুদাযোতি হি পদেসো, অৰযৰো. অযন্তি মগ্গো. সপ্পদেসত্তা একদেসত্তা. নিপ্পদেসেহি সমুদাযভাৰতো নিরৰসেসপদেসেহি. যথা নগরং রজ্জেকদেসভূতং তদন্তোগধত্তা রজ্জেন সঙ্গহিতং, এৰং অরিযমগ্গো খন্ধত্তযেকদেসভূতো তদন্তোগধত্তা তীহি খন্ধেহি সঙ্গহিতোতি দস্সেতি ‘‘নগরং ৰিয রজ্জেনা’’তি ইমিনা. সজাতিতোতি সমানজাতিতায, সমানসভাৰত্তা এৰাতি অত্থো. এত্থ চ সীলক্খন্ধো ‘‘নৰ কোটিসহস্সানী’’তিআদিনা (ৰিসুদ্ধি. ১.২০; অপ. অট্ঠ. ২.৫৫.৫৫; পটি. ম. অট্ঠ. ১.১.৩৭) ৰুত্তপভেদৰসেন চেৰ সম্পত্তসমাদানৰিরতিআদিৰসেন চ গয্হমানো নিপ্পদেসো, মগ্গসীলং পন আজীৰট্ঠমকমেৰ সমুচ্ছেদৰিরতিমত্তমেৰাতি সপ্পদেসং. সমাধিক্খন্ধো পরিত্তমহগ্গতাদিৰসেন চেৰ উপচারপ্পনাসমাধিৰসেন চ অনেকভেদতায নিপ্পদেসো, মগ্গসমাধি পন লোকুত্তরোৰ, অপ্পনাসমাধি এৰাতি সপ্পদেসো. তথা পঞ্ঞাক্খন্ধো পরিত্তমহগ্গতাদিৰসেন চেৰ সুতমযঞাণাদিৰসেন চ অনেকভেদতায নিপ্পদেসো, মগ্গপঞ্ঞা পন লোকুত্তরাৰ, ভাৰনামযা এৰাতি সপ্পদেসা. অত্তনো ধম্মতাযাতি সহকারীকারণং অনপেক্খিত্ৰা অত্তনো সভাৰেন অত্তনো বলেন অপ্পেতুং ন সক্কোতি ৰীরিযেন অনুপত্থম্ভিতং, সতিযা চ অনুপট্ঠিতং. পগ্গহকিচ্চন্তি যথা কোসজ্জপক্খে ন পতিতা চিত্তট্ঠিতি, তথা পগ্গণ্হনকিচ্চং. অপিলাপনকিচ্চন্তি যথা আরম্মণে ন পিলৰতি, এৰং অপিলাপনকিচ্চং.

একতো জাতাতি সহজাতা. পিট্ঠিং দত্ৰা ওনতসহাযো ৰিয ৰাযামো সমাধিস্স আরম্মণে অপ্পনায ৰিসেসপচ্চযভাৰতো. অংসকূটং দত্ৰা ঠিতসহাযো ৰিয সতি সমাধিস্স আরম্মণে দল়্হপৰত্তিযা পচ্চযভাৰতো. কিরিযতোতি উপকারকিরিযতো.

আকোটেত্ৰাতি আরম্মণং আহনিত্ৰা. তথা হি ৰিতক্কো ‘‘আহননরসো’’তি, যোগাৰচরো চ ‘‘কম্মট্ঠানং তক্কাহতং ৰিতক্কপরিযাহতং করোতী’’তি ৰুচ্চতি. ইধাপীতি সম্মাদিট্ঠিসঙ্কপ্পেসু. কিরিযতোতি ৰুত্তপ্পকারউপকারকিরিযতো.

সুভসুখাদিনিমিত্তগ্গাহৰিধমনং চতুকিচ্চসাধনং. পচ্চযত্তেনাতি সহজাতাদিপচ্চযভাৰেন. চতুকিচ্চসাধনৰসেনেৰাতি ইদং মগ্গৰীরিযস্সেৰ গহিতভাৰদস্সনং. তঞ্হি একংযেৰ হুত্ৰা চতুকিচ্চং যথাৰুত্তউপকারকসভাৰেন চ পরিৰারট্ঠেন পরিক্খারো হোতি. মগ্গসম্পযুত্তধম্মানন্তি ইমিনা মগ্গধম্মানম্পি গহণং, ন তংসম্পযুত্তফস্সাদীনংযেৰ. একচিত্তক্খণিকাতি মগ্গচিত্তুপ্পাদৰসেন একচিত্তক্খণিকা.

সত্তহি ঞাণেহীতি পরমুক্কংসগতেহি সত্তহি জৰনেহি সম্পযুত্তঞাণেহি, সত্তহি ৰা অনুপস্সনাঞাণেহি. আদিতো সেৰনা আসেৰনা, ততো পরং ৰড্ঢনা ভাৰনা, পুনপ্পুনং করণং বহুলীকম্মন্তি অধিপ্পাযেনাহ ‘‘অঞ্ঞেন চিত্তেনা’’তিআদি. অধিপ্পাযৰসেন নিদ্ধারেত্ৰা গহেতব্বত্থং সুত্তং নেয্যত্থং. যথারুতৰসেন গহেতব্বত্থং নীতত্থং. এৰং সন্তেতি যদি ইদং সুত্তং নীতত্থং, আসেৰনাদি চ ৰিসুং ৰিসুং চিত্তেহি হোতি, এৰং সন্তে. আসেৰনাদি নাম চিত্তস্স অনেকৰারং উপ্পত্তিযা হোতি, ন একৰারমেৰাতি আহ ‘‘একং চিত্ত’’ন্তিআদি. তত্রাযং সঙ্খেপত্থো – আসেৰনাৰসেন পৰত্তমানং চিত্তং সুচিরম্পি কালং আসেৰনাৰসেনেৰ পৰত্তেয্য, তথা ভাৰনাবহুলীকম্মৰসেন পৰত্তমানানিপি, ন চেত্থ এত্তকানেৰ চিত্তানি আসেৰনাৰসেন পৰত্তন্তি, এত্তকানি ভাৰনাৰসেন, বহুলীকম্মৰসেনাতি নিযমো লব্ভতি. ইতি অনেকচিত্তক্খণিকঅরিযমগ্গং ৰদন্তস্স দুন্নিৰারিযোৰাযং দোসো. যথা পন পুব্বভাগেপি নানাচিত্তেসু পৰত্তপরিঞ্ঞাদিকিচ্চানং সম্মাদিট্ঠিআদীনং পটিৰেধকালে যথারহং চতুকিচ্চসাধনং, একচিত্তক্খণিকা চ পৰত্তি, এৰং ৰিপস্সনায পৰত্তাভিসঙ্খারৰসেন আসেৰনাভাৰনাবহুলীকম্মানি পটিৰেধকালে একচিত্তক্খণিকানেৰ হোন্তীতি ৰদন্তানং আচরিযানং ন কোচি দোসো আসেৰনাদীহি কাতব্বকিচ্চস্স তদা একচিত্তক্খণেযেৰ সিজ্ঝনতো. তেনাহ ‘‘একচিত্তক্খণিকাৰা’’তিআদি. সচে সঞ্জানাতীতি সচে সঞ্ঞত্তিং গচ্ছতি. যাগুং পিৰাহীতি উয্যোজেতব্বো ধম্মসাকচ্ছায অভব্বভাৰতোতি অধিপ্পাযো.

৪৬৩. পুঞ্ঞাভিসঙ্খারাদীসূতি আদি-সদ্দেন কাযসঞ্চেতনাদি লক্খণে কাযসঙ্খারাদিকেপি সঙ্গণ্হাতি, ন অপুঞ্ঞানেঞ্জাভিসঙ্খারে এৰ. কাযপটিবদ্ধত্তা কাযেন সঙ্খরীযতি, ন কাযসমুট্ঠানত্তা. চিত্তসমুট্ঠানা হি তে ধম্মাতি. নিব্বত্তীযতীতি চ ইদং কাযে সতি সব্ভাৰং, অসতি চ অভাৰং সন্ধায ৰুত্তং. ৰাচন্তি ৰচীঘোসং. সঙ্খরোতীতি জনেতি. তেনাহ ‘‘নিব্বত্তেতী’’তি. ন হি তং ৰিতক্কৰিচাররহিতচিত্তং ৰচীঘোসং নিব্বত্তেতুং সক্কোতি. চিত্তপটিবদ্ধত্তাতি এতেন চিত্তস্স নিস্সযাদিপচ্চযভাৰো চিত্তসঙ্খারসঙ্খরণন্তি দস্সেতি. অঞ্ঞমঞ্ঞমিস্সাতি অত্থতো ভিন্নাপি কাযসঙ্খারাদিৰচনৰচনীযভাৰেন অঞ্ঞমঞ্ঞমিস্সিতা অভিন্না ৰিয, ততো এৰ আলুল়িতা সংকিণ্ণা অৰিভূতা অপাকটা দুদ্দীপনা দুৰিঞ্ঞাপযা. আদানগ্গহণমুঞ্চনচোপনানীতি যস্স কস্সচি কাযেন আদাতব্বস্স আদানসঙ্খাতং গহণং, ৰিস্সজ্জনসঙ্খাতং মুঞ্চনং, যথাতথাচলনসঙ্খাতং চোপনন্তি ইমানি পাপেত্ৰা সাধেত্ৰা উপ্পন্না. কাযতো পৰত্তা সঙ্খারা, কাযেন সঙ্খরীযন্তীতি চ কাযসঙ্খারাত্ৰেৰ ৰুচ্চন্তি. হনুসংচোপনন্তি হনুসঞ্চলনং. ৰচীভেদন্তি ৰাচানিচ্ছারণং. ৰাচং সঙ্খরোন্তীতি কত্ৰা ইধ ৰচীসঙ্খারাত্ৰেৰ ৰুচ্চন্তি.

৪৬৪. সমাপজ্জিস্সন্তি পদং নিরোধস্স আসন্নানাগতভাৰৰিসযং আসন্নং ৰজ্জেত্ৰা দূরস্স গহণে পযোজনাভাৰতো. নিরোধপাদকস্স নেৰসঞ্ঞানাসঞ্ঞাযতনচিত্তস্স চ গহণতো পট্ঠায নিরোধং সমাপজ্জতি নামাতি অধিপ্পাযেন ‘‘পদদ্ৰযেন নেৰসঞ্ঞানাসঞ্ঞাযতনসমাপত্তিকালো কথিতো’’তি ৰুত্তং. তথা চিত্তং ভাৰিতং হোতীতি এত্থ অদ্ধানপরিচ্ছেদচিত্তগ্গহণং ইতরেসং নানন্তরিযভাৰতো. ন হি বলদ্ৰযঞাণসমাধিচরিযানং ৰসীভাৰাপাদনচিত্তেহি ৰিনা অদ্ধানপরিচ্ছেদচিত্তং অচিত্তকভাৰায হোতি.

সেসসঙ্খারেহীতি কাযসঙ্খারচিত্তসঙ্খারেহি. দুতিযজ্ঝানেযেৰ নিরুজ্ঝতি অনুপ্পত্তিনিরোধেন. ইতরেসুপি এসেৰ নযো. ৰুট্ঠহিস্সন্তি পদং ৰুট্ঠহনস্স আসন্নানাগতভাৰৰিসযং আসন্নং ৰজ্জেত্ৰা দূরস্স গহণে পযোজনাভাৰতো. নিরোধতো ৰুট্ঠানস্স চ চিত্তুপ্পাদেন পরিচ্ছিন্নত্তা ততো ওরমেৰাতি আহ ‘‘পদদ্ৰযেন অন্তোনিরোধকালো কথিতো’’তি. তথা চিত্তং ভাৰিতং হোতীতি যথা যথাপরিচ্ছিন্নকালমেৰ অচিত্তকভাৰো, ততো পরং সচিত্তকভাৰো হোতি, তথা নিরোধস্স পরিকম্মচিত্তং উপ্পাদিতং হোতি.

পটিসঙ্খাতি পটিসঙ্খায ইদমেৰ কাতব্বং জানিত্ৰা অপ্পৰত্তিমত্তং. সমাপজ্জন্তীতি অচিত্তকভাৰং সম্পদেৰ আপজ্জন্তি. অথ কস্মা সত্তাহমেৰ সমাপজ্জন্তীতি? যথাকালপরিচ্ছেদকরণতো, তঞ্চ যেভুয্যেন আহারূপজীৰীনং সত্তানং উপাদিন্নকপৰত্তস্স একদিৰসং ভুত্তাহারস্স সত্তাহমেৰ যাপনতো.

সব্বা ফলসমাপত্তি অস্সাসপস্সাসে ন সমুট্ঠাপেতীতি ইদং নত্থীতি আহ ‘‘সমুট্ঠাপেতী’’তি. যা পন ন সমুট্ঠাপেতি, তং দস্সেন্তো ‘‘ইমস্স পন…পে… ন সমুট্ঠাপেতী’’তি আহ. তত্থ ইমস্সাতি ইধ পাল়িযং ৰুত্তনিরোধসমাপজ্জনভিক্খুনো. তস্স পন ফলসমাপত্তি চতুত্থজ্ঝানিকাৰাতি নিযমো নত্থীতি আহ ‘‘কিং ৰা এতেনা’’তিআদি. অব্বোহারিকাতি সুখুমত্তভাৰপ্পত্তিযা ‘‘অত্থী’’তি ৰোহরিতুং অসক্কুণেয্যাতি কেচি. নিরোধস্স পন পাদকভূতায চতুত্থজ্ঝানাদিসমাধিচরিযায ৰসেন অচতুত্থজ্ঝানিকাপি নিরোধানন্তরফলসমাপত্তি অস্সাসপস্সাসে ন সমুট্ঠাপেতীতি অভাৰতো এৰ তে অব্বোহারিকা ৰুত্তা. এৰঞ্চ কত্ৰা সঞ্জীৰত্থেরৰত্থুম্হি আনীতসমাপত্তিফলনিদস্সনম্পি সুট্ঠু উপপজ্জতি. তেনাহ ‘‘ভৰঙ্গসমযেনেৰেতং কথিত’’ন্তি. কিরিযমযপৰত্তৰল়ঞ্জনকালেতি এত্থ কিরিযমযপৰত্তং কাযৰচীৰিঞ্ঞত্তিৰিপ্ফারো, তস্স ৰল়ঞ্জনকালে পৰত্তনসমযে. ৰাচং অভিসঙ্খাতুং ন সক্কোন্তি অৰিঞ্ঞত্তিজনকত্তা তেসং ৰিতক্কৰিচারানং.

সগুণেনাতি সরসেন, সভাৰেনাতি অত্থো. সুঞ্ঞতা নাম ফলসমাপত্তি রাগাদীহি সুঞ্ঞত্তা. তথা রাগনিমিত্তাদীনং অভাৰা অনিমিত্তা, রাগপণিধিআদীনং অভাৰা অপ্পণিহিতাতি আহ ‘‘অনিমিত্তঅপ্পণিহিতেসুপি এসেৰ নযো’’তি. অনিমিত্তং অপ্পণিহিতঞ্চ নিব্বানং আরম্মণং কত্ৰা উপ্পন্নফলসমাপত্তিযং ফস্সো অনিমিত্তো ফস্সো অপ্পণিহিতো ফস্সো নামাতি ইমমত্থং ‘‘এসেৰ নযো’’তি ইমিনা অতিদিসতি.

অত্তসুঞ্ঞতাদস্সনতো অনত্তানুপস্সনা সুঞ্ঞতা, নিচ্চনিমিত্তুগ্ঘাটনতো অনিচ্চানুপস্সনা অনিমিত্তা, সুখপ্পণিধিপটিক্খেপতো দুক্খানুপস্সনা অপ্পণিহিতাতি আহ – ‘‘সুঞ্ঞতা…পে… ৰিপস্সনাপি ৰুচ্চতী’’তি. অনিচ্চতো ৰুট্ঠাতীতি সঙ্খারানং অনিচ্চাকারগ্গাহিনিযা ৰুট্ঠানগামিনিযা পরতো একতোৰুট্ঠানউভতোৰুট্ঠানেহি নিমিত্তপৰত্ততো ৰুট্ঠাতি. অনিচ্চতো পরিগ্গহেত্ৰাতি চ ইদং ‘‘ন একন্তিকং এৰম্পি হোতী’’তি কত্ৰা ৰুত্তং. এস নযো সেসেসুপি. অপ্পণিহিতৰিপস্সনায মগ্গোতিআদিনা, সুঞ্ঞতৰিপস্সনায মগ্গোতিআদিনা চ যোজনং সন্ধাযাহ ‘‘এসেৰ নযো’’তি. ৰিকপ্পো আপজ্জেয্য আগমনস্স ৰৰত্থানস্স অভাৰেন অৰৰত্থানকরত্তা. এৰঞ্হি তযো ফস্সা ফুসন্তীতি এৰং সগুণতো আরম্মণতো চ নামলাভে সুঞ্ঞতাদিনামকা তযো ফস্সা ফুসন্তীতি অনিযমৰচনং. সমেতি যুজ্জতি একস্সেৰ ফস্সস্স নামত্তযযোগতো.

সব্বসঙ্খতৰিৰিত্ততায নিব্বানং ৰিৰেকো নাম উপধিৰিৰেকোতি কত্ৰা. নিন্নতা তপ্পটিপক্খৰিমুখস্স তদভিমুখতা. পোণতা ওনমনং, পব্ভারতা ততো ৰিস্সট্ঠভাৰো.

৪৬৫. চক্খাদিতো রূপাদীসু পৰত্তরূপকাযতো উপ্পজ্জনতো পঞ্চদ্ৰারিকং সুখং কাযিকং নাম, মনোদ্ৰারিকং চেতোফস্সজাতায চেতসিকং নাম. সভাৰনিদ্দেসো সুখযতীতি কত্ৰা. মধুরভাৰদীপকন্তি ইট্ঠভাৰজোতনং. ৰেদযিতভাৰদীপকন্তি ৰেদকভাৰৰিভাৰকং. ৰেদনা এৰ হি পরমত্থতো আরম্মণং ৰেদেতি, আরম্মণং পন ৰেদিতব্বন্তি. দুক্খন্তি সভাৰনিদ্দেসোতিএৰমাদিঅত্থৰচনং সন্ধাযাহ ‘‘এসেৰ নযো’’তি. ঠিতিসুখাতি ঠিতিযা ধরমানতায সুখা, ন ঠিতিক্খণমত্তেন. তেনাহ ‘‘অত্থিভাৰো সুখ’’ন্তি. ৰিপরিণামদুক্খাতি ৰিপরিণমনেন ৰিগমনেন দুক্খা, ন নিরোধক্খণেন. তেনাহ ‘‘নত্থিভাৰো দুক্খ’’ন্তি. অপরিঞ্ঞাতৰত্থুকানঞ্হি সুখৰেদনুপরমো দুক্খতো উপট্ঠাতি. স্ৰাযমত্থো পিযৰিপ্পযোগেন দীপেতব্বো. ঠিতিদুক্খা ৰিপরিণামসুখাতি এত্থাপি এসেৰ নযো. তেনাহ ‘‘অত্থিভাৰো দুক্খং, নত্থিভাৰো সুখ’’ন্তি. দুক্খৰেদনুপরমো হি সত্তানং সুখতো উপট্ঠাতি. এৰঞ্হি ৰদন্তি – ‘‘তস্স রোগস্স ৰূপসমেন অহো সুখং জাত’’ন্তি. জাননভাৰোতি যাথাৰসভাৰতো অৰবুজ্ঝনং. অদুক্খমসুখঞ্হি ৰেদনং জানন্তস্স সুখং হোতি তস্স সুখুমভাৰতো, যথা তদঞ্ঞে ধম্মে সলক্খণতো সামঞ্ঞলক্খণতো চ সম্মদেৰ অৰবোধো পরমং সুখং. তেনেৰাহ –

‘‘যতো যতো সম্মসতি, খন্ধানং উদযব্বযং;

লভতী পীতিপামোজ্জং, অমতং তং ৰিজানত’’ন্তি. (ধ. প. ৩৭৪);

অজাননভাৰোতি এত্থ ৰুত্তৰিপরিযাযেন অত্থো ৰেদিতব্বো. দুক্খঞ্হি সম্মোহৰিহারোতি. অপরো নযো জাননভাৰোতি জাননস্স ঞাণস্স সব্ভাৰো. ঞাণসম্পযুত্তা হি ঞাণোপনিস্সযা চ অদুক্খমসুখা ৰেদনা সুখা ইট্ঠাকারা. যথাহ ‘‘ইট্ঠা চেৰ ইট্ঠফলা চা’’তি. অজাননভাৰো দুক্খন্তি এত্থ ৰুত্তৰিপরিযাযেন অত্থো ৰেদিতব্বো.

কতমো অনুসযো অনুসেতীতি কামরাগানুসযাদীসু সত্তসু অনুসযেসু কতমো অনুসযো অনুসযৰসেন পৰত্ততি? অপ্পহীনভাৰেন হি সন্তানে অনুসযন্তীতি অনুসযা, অনুরূপং কারণং লভিত্ৰা উপ্পজ্জন্তীতি অত্থো. এতেন কারণলাভে সতি উপ্পজ্জনারহতা নেসং দস্সিতা. অপ্পহীনা হি কিলেসা কারণলাভে সতি উপ্পজ্জন্তি. তেনাহ ‘‘অপ্পহীনট্ঠেন সযিতো ৰিয হোতী’’তি. তে চ নিপ্পরিযাযতো অনাগতা কিলেসা দট্ঠব্বা, অতীতা পচ্চুপ্পন্না চ তংসভাৰত্তা তথা ৰুচ্চন্তি. ন হি ধম্মানং কালভেদেন সভাৰভেদো অত্থি. যদি অপ্পহীনট্ঠো অনুসযট্ঠো, ননু সব্বেপি কিলেসা অপ্পহীনা অনুসযা ভৰেয্যুন্তি? ন মযং অপ্পহীনতামত্তেন অনুসযট্ঠং ৰদাম, অথ খো পন অপ্পহীনট্ঠেন থামগতা কিলেসা অনুসযা. ইদং থামগমনঞ্চ রাগাদীনমেৰ আৰেণিকো সভাৰো দট্ঠব্বো, যতো অভিধম্মে – ‘‘থামগতং অনুসযং পজহতী’’তি ৰুত্তং. সোতি রাগানুসযো. অপ্পহীনোতি অপ্পহীনভাৰমুখেন অনুসযনট্ঠমাহ. সো চ অপরিঞ্ঞাতক্খন্ধৰত্থুতো, পরিঞ্ঞাতেসু পতিট্ঠং ন লভতি. তেনাহ ‘‘ন সব্বায সুখায ৰেদনায সো অপ্পহীনো’’তি. আরম্মণৰসেন চাযং অনুসযট্ঠো অধিপ্পেতো. তেনাহ ‘‘ন সব্বং সুখং ৰেদনং আরব্ভ উপ্পজ্জতীতি অত্থো’’তি.

ৰত্থুৰসেনপি পন অনুসযট্ঠো ৰেদিতব্বো, যো ‘‘ভূমিলদ্ধ’’ন্তি ৰুচ্চতি. তেন হি অট্ঠকথাযং (ৰিসুদ্ধি. ২.৮৩৪) ৰুত্তং –

‘‘ভূমীতি ৰিপস্সনায আরম্মণভূতা তেভূমকা পঞ্চক্খন্ধা. ভূমিলদ্ধং নাম তেসু খন্ধেসু উপ্পত্তিরহং কিলেসজাতং. তেন হি সা ভূমিলদ্ধা নাম হোতি, তস্মা ভূমিলদ্ধন্তি ৰুচ্চতি, সা চ খো ন আরম্মণৰসেন. আরম্মণৰসেন হি সব্বেপি অতীতানাগতে পরিঞ্ঞাতেপি চ খীণাসৰানং খন্ধে আরব্ভ কিলেসা উপ্পজ্জন্তি মহাকচ্চানউপ্পলৰণ্ণাদীনং খন্ধে আরব্ভ সোরেয্যসেট্ঠিনন্দমাণৰকাদীনং ৰিয. যদি চ তং ভূমিলদ্ধং নাম সিযা, তস্স অপ্পহেয্যতো ন কোচি ভৰমূলং পজহেয্য, ৰত্থুৰসেন পন ভূমিলদ্ধং ৰেদিতব্বং. যত্থ যত্থ হি ৰিপস্সনায অপরিঞ্ঞাতা খন্ধা উপ্পজ্জন্তি, তত্থ তত্থ উপ্পাদতো পভুতি তেসু ৰট্টমূলং কিলেসজাতং অনুসেতি. তং অপ্পহীনট্ঠেন ভূমিলদ্ধন্তি ৰেদিতব্ব’’ন্তিআদি.

এস নযো সব্বত্থাতি ইমিনা ‘‘ন সব্বায দুক্খায ৰেদনায সো অপ্পহীনো, ন সব্বং দুক্খং ৰেদনং আরব্ভ উপ্পজ্জতী’’তিআদিং অতিদিসতি. তত্থ যং ৰত্তব্বং, তং ৰুত্তনযেনেৰ ৰেদিতব্বং. ‘‘যো অনুসযো যত্থ অনুসেতি, সো পহীযমানো তত্থ পহীনো নাম হোতী’’তি তত্থ তত্থ পহানপুচ্ছা, তং সন্ধাযাহ ‘‘কিং পহাতব্বন্তি অযং পহানপুচ্ছা নামা’’তি.

একেনেৰ ব্যাকরণেনাতি ‘‘ইধাৰুসো, ৰিসাখ, ভিক্খু ৰিৰিচ্চেৰ কামেহী’’তিআদিনা (ম. নি. ১.৩৭৪) একেনেৰ ৰিস্সজ্জনেন. দ্ৰে পুচ্ছাতি অনুসযপুচ্ছা পহানপুচ্ছাতি দ্ৰেপি পুচ্ছা ৰিস্সজ্জেসি. ‘‘রাগং তেন পজহতী’’তি ইদমেকং ৰিস্সজ্জনং, ‘‘ন তত্থ রাগানুসযো অনুসেতী’’তি ইদমেকং ৰিস্সজ্জনং, পুচ্ছানুক্কমঞ্চেত্থ অনাদিযিত্ৰা পহানক্কমেন ৰিস্সজ্জনা পৰত্তা. ‘‘দ্ৰে পুচ্ছা ৰিস্সজ্জেসী’’তি সঙ্খেপতো ৰুত্তমত্থং ৰিৰরিতুং ‘‘ইধা’’তিআদি ৰুত্তং. তত্থ তথাৰিক্খম্ভিতমেৰ কত্ৰাতি ইমিনা যো রাগং ৰিক্খম্ভেত্ৰা পুন উপ্পজ্জিতুং অপ্পদানতো তথাৰিক্খম্ভিতমেৰ কত্ৰা মগ্গেন সমুগ্ঘাতেতি, তস্স ৰসেন ‘‘রাগং তেন পজহতি, ন তত্থ রাগানুসযো অনুসেতী’’তি ৰত্তব্বন্তি দস্সেতি. কামোঘাদীহি চতূহি ওঘেহি সংসারভৰোঘেনেৰ ৰা ৰেগসা ৰুয্হমানেসু সত্তেসু তং উত্তরিত্ৰা পত্তব্বং, তস্স পন গাধভাৰতো পতিট্ঠানভূতং. তেনাহ ভগৰা – ‘‘তিণ্ণো পারঙ্গতো থলে তিট্ঠতি ব্রাহ্মণো’’তি (সং. নি. ৪.২৩৮; ইতিৰু. ৬৯; পু. প. ১৮৭).

সুঞ্ঞতাদিভেদেন অনেকভেদত্তা পাল়িযং ‘‘অনুত্তরেসূ’’তি বহুৰচননিদ্দেসোতি ‘‘অনুত্তরা ৰিমোক্খা’’তি ৰত্ৰা পুন তেসং সব্বেসম্পি অরহত্তভাৰসামঞ্ঞেন ‘‘অরহত্তে’’তি ৰুত্তং. ৰিসযে চেতং ভুম্মং. পত্থনং পট্ঠপেন্তস্সাতি ‘‘অহো ৰতাহং অরহত্তং লভেয্য’’ন্তি পত্থনং উপট্ঠপেন্তস্স, পত্থেন্তস্সাতি অত্থো. পট্ঠপেন্তস্সাতি চেত্থ হেতুম্হি অন্তসদ্দো. কথং পন অরহত্তৰিসযা পত্থনা উপ্পজ্জতীতি? ন কাচি অরহত্তং আরম্মণং কত্ৰা পত্থনা উপ্পজ্জতি অনধিগতত্তা অৰিসযভাৰতো. পরিকপ্পিতরূপং পন তং উদ্দিস্স পত্থনা উপ্পজ্জতি. ‘‘উপ্পজ্জতি পিহাপচ্চযা’’তি ৰুত্তং পরম্পরপচ্চযতং সন্ধায, উজুকং পন পচ্চযভাৰো নত্থীতি ৰুত্তং ‘‘ন পত্থনায পট্ঠপনমূলকং উপ্পজ্জতী’’তি. ইদং পন সেৰিতব্বং দোমনস্সং অকুসলপ্পহানস্স কুসলাভিৰুড্ঢিযা চ নিমিত্তভাৰতো. তেনাহ ভগৰা – ‘‘দোমনস্সম্পাহং, দেৰানমিন্দ, দুৰিধেন ৰদামি সেৰিতব্বম্পি অসেৰিতব্বম্পী’’তি (দী. নি. ২.৩৫৯-৩৬২). তীহি মাসেহি সম্পজ্জনকা তেমাসিকা. সেসপদদ্ৰযেপি এসেৰ নযো. ইমস্মিং ৰারেতি ইমস্মিং পৰারণৰারে. ৰিসুদ্ধিপৰারণন্তি ‘‘পরিসুদ্ধো অহ’’ন্তি এৰং পৰত্তং ৰিসুদ্ধিপৰারণং. অরহন্তানমেৰ হেস পৰারণা.

ন কদাচি পহাতব্বস্স পহাযকতা অত্থীতি দস্সেন্তো ‘‘ন দোমনস্সেন ৰা’’তিআদিং ৰত্ৰা পরিযাযেনেতং ৰুত্তং, তং ৰিভাৰেন্তো ‘‘অযং পনা’’তিআদিমাহ. যং পনেত্থ ৰত্তব্বং, তং পরতো ৰিত্থারেন আগমিস্সতি. পটিপদং গহেত্ৰা পত্থনং কত্ৰা পত্থনং ঠপেত্ৰা. পটিসঞ্চিক্খতীতি ওৰাদৰসেন অত্তানং সমুত্তেজেন্তো কথেতি. সীলেন হীনট্ঠানন্তি অঞ্ঞেহি অরহত্তায পটিপজ্জন্তেহি সীলেন হীনট্ঠানং কিং তুয্হং অত্থীতি অধিপ্পাযো. সুপরিসুদ্ধন্তি অখণ্ডাদিভাৰতো সুধোতজাতিমণি ৰিয সুট্ঠু পরিসুদ্ধং. সুপগ্গহিতন্তি কদাচিপি সঙ্কোচাভাৰতো ৰীরিযং সুট্ঠু পগ্গহিতং. পঞ্ঞাতি ৰিপস্সনাপঞ্ঞা পটিপক্খেহি অনধিভূততায অকুণ্ঠা তিক্খৰিসদা সঙ্খারানং সম্মসনে সূরা হুত্ৰা ৰহতি পৰত্ততি. পরিযাযেনাতি তস্স দোমনস্সস্স অরহত্তুপনিস্সযতাপরিযাযেন. আরম্মণৰসেন অনুসযনং ইধাধিপ্পেতন্তি আহ ‘‘ন তং আরব্ভ উপ্পজ্জতী’’তি. অনুপ্পজ্জনমেত্থ পহানং নামাতি ৰুত্তং ‘‘পহীনোৰ তত্থ পটিঘানুসযোতি অত্থো’’তি. ততিযজ্ঝানেন ৰিক্খম্ভেতব্বা অৰিজ্জা, সা এৰ অরিযমগ্গেন সমুচ্ছিন্দীযতীতি ‘‘অৰিজ্জানুসযং ৰিক্খম্ভেত্ৰা’’তিআদি ৰুত্তং, অনুসযসদিসতায ৰা. ‘‘রাগানুসযং ৰিক্খম্ভেত্ৰা’’তি এত্থাপি এসেৰ নযো. চতুত্থজ্ঝানে নানুসেতি নাম তত্থ কাতব্বকিচ্চাকরণতো.

৪৬৬. তস্মাতি পচ্চনীকত্তা সভাৰতো কিচ্চতো পচ্চযতো চাতি অধিপ্পাযো. ৰিসভাগপটিভাগো কথিতো ‘‘কণ্হসুক্কসপ্পটিভাগা ধম্মা’’তিআদীসু ৰিয. অন্ধকারাতি অন্ধকারসদিসা অপ্পকা সভাৰতো. অৰিভূতা অপাকটা অনোল়ারিকভাৰতো. ততো এৰ দুদ্দীপনা দুৰিঞ্ঞাপনা. তাদিসাৰাতি উপেক্খাসদিসাৰ. যথা উপেক্খা সুখদুক্খানি ৰিয ন ওল়ারিকা, এৰং অৰিজ্জা রাগদোসা ৰিয ন ওল়ারিকা. অথ খো অন্ধকারা অৰিভূতা দুদ্দীপনা দুৰিঞ্ঞাপনাতি অত্থো. সভাগপটিভাগো কথিতো ‘‘পণিধি পটিঘোসো’’তিআদীসু ৰিয. যত্তকেসু ঠানেসূতি দুক্খাদীসু যত্তকেসু ঠানেসু, যত্থ ৰা ঞেয্যট্ঠানেসু. ৰিসভাগপটিভাগোতি অন্ধকারস্স ৰিয আলোকো ৰিঘাতকপটিভাগো. ৰিজ্জাতি মগ্গঞাণং অধিপ্পেতং, ৰিমুত্তীতি ফলন্তি আহ ‘‘উভোপেতে ধম্মা অনাসৰা’’তি. অনাসৰট্ঠেনাতিআদীসু পণীতট্ঠেনাতিপি ৰত্তব্বং. সোপি হি ৰিমুত্তিনিব্বানানং সাধারণো, ৰিমুত্তিযা অসঙ্খতট্ঠেন নিব্বানস্স ৰিসভাগতাপি লব্ভতেৰ. পঞ্হং অতিক্কমিত্ৰা গতোসি, অপুচ্ছিতব্বং পুচ্ছন্তোতি অধিপ্পাযো. পঞ্হানং পরিচ্ছেদপমাণং গহেতুং যুত্তট্ঠানে অট্ঠত্ৰা ততো পরং পুচ্ছন্তো নাসক্খি পঞ্হানং পরিযন্তং গহেতুং. অপ্পটিভাগধম্মস্সাতি নিপ্পরিযাযতো সভাগপটিভাগেন অপ্পটিভাগধম্মস্স. অনাগতাদিপরিযাযেন নিব্বানস্স সভাগপটিভাগো ৰুত্তো, ৰিসভাগে চ অত্থেৰ সঙ্খতধম্মা, তস্মা নিপ্পরিযাযতো কিঞ্চি সভাগপটিভাগং সন্ধায পুচ্ছতীতি কত্ৰা ‘‘অচ্চযাসী’’তিআদি ৰুত্তং. অসঙ্খতস্স হি অপ্পতিট্ঠস্স একন্তনিচ্চস্স সতো নিব্বানস্স কুতো নিপ্পরিযাযেন সভাগস্স সম্ভৰো. তেনাহ ‘‘নিব্বানং নামেত’’ন্তিআদি.

ৰিরদ্ধোতি এত্থ সভাগপটিভাগং পুচ্ছিস্সামীতি নিচ্ছযাভাৰতো পুচ্ছিতমত্থং ৰিরজ্ঝিত্ৰাৰ পুচ্ছি, ন অজানিত্ৰাতি অত্থো. এতেন হেট্ঠা সব্বপুচ্ছা দিট্ঠসংসন্দননযেন জানিত্ৰাৰ পৰত্তাতি দীপিতং হোতি. থেরী পন তং তং পুচ্ছিতমত্থং সভাৰতো ৰিভাৰেন্তী সত্থু দেসনাঞাণং অনুগন্ত্ৰাৰ ৰিস্সজ্জেসি. নিব্বানোগধন্তি নিব্বানং ওগাহিত্ৰা ঠিতং নিব্বানন্তোগধং. তেনাহ ‘‘নিব্বানব্ভন্তরং নিব্বানং অনুপৰিট্ঠ’’ন্তি. অস্সাতি ব্রহ্মচরিযস্স.

৪৬৭. পণ্ডিচ্চেন সমন্নাগতাতি এত্থ ৰুত্তপণ্ডিচ্চং দস্সেতুং ‘‘ধাতুকুসলা’’তিআদি ৰুত্তং. তেনেৰাহ – ‘‘কিত্তাৰতা নু খো, ভন্তে, পণ্ডিতো হোতি? যতো খো, আনন্দ, ভিক্খু ধাতুকুসলো চ হোতি, আযতনকুসলো চ পটিচ্চসমুপ্পাদকুসলো চ ঠানাট্ঠানকুসলো চ. এত্তাৰতা নু খো, আনন্দ, ভিক্খু পণ্ডিতো হোতী’’তি (ম. নি. ৩.১২৪). পঞ্ঞামহত্তং নাম থেরিযা অসেক্খপ্পটিসম্ভিদপ্পত্তায পটিসম্ভিদাযো পূরেত্ৰা ঠিততাতি তং দস্সেতুং ‘‘মহন্তে অত্থে’’তিআদি ৰুত্তং. রাজযুত্তেহীতি রঞ্ঞো কম্মে নিযুত্তপুরিসেহি. আহচ্চৰচনেনাতি সত্থারা করণাদীনি আহনিত্ৰা পৰত্তিতৰচনেন. যদেত্থ অত্থতো ন ৰিভত্তং, তং হেট্ঠা ৰুত্তনযত্তা সুৰিঞ্ঞেয্যমেৰ.

চূল়ৰেদল্লসুত্তৰণ্ণনায লীনত্থপ্পকাসনা সমত্তা.

৫. চূল়ধম্মসমাদানসুত্তৰণ্ণনা

৪৬৮. ধম্মোতি গহিতগহণানীতি ধম্মো ৰা হোতু ইতরো ৰা, ধম্মোতি পগ্গহিতগ্গাহপ্পৰত্তা চরিযাৰ. আযূহনক্খণেতি তস্স ধম্মোতি গহিতস্স পৰত্তনক্খণে. সুখন্তি অকিচ্ছং. তেনাহ ‘‘সুকর’’ন্তি. দুক্খৰিপাকন্তি অনিট্ঠফলৰিপচ্চনং.

৪৬৯. যথা চক্খাদীনং পঞ্চন্নং ইন্দ্রিযানং যথাসকং ৰিসযগ্গহণং সভাৰসিদ্ধং, এৰং মনসোপি. তে চ ৰিসযা ইট্ঠাকারতো গহণে ন কোচি দোসো, পুরিসত্তভাৰে ন চ তে দোসং পৰত্তেন্তীতি অযং তেসং সমণব্রাহ্মণানং লদ্ধীতি আহ ‘‘ৰত্থুকামেসুপি কিলেসকামেসুপি দোসো নত্থী’’তি, অস্সাদেত্ৰা ৰিসযপরিভোগে নত্থি আদীনৰো, তপ্পচ্চযা ন কোচি অন্তরাযোতি অধিপ্পাযো. পাতব্যতং আপজ্জন্তীতি পরিভুঞ্জনকতং উপগচ্ছন্তি. পরিভোগত্থো হি অযং পা-সদ্দো কত্তুসাধনো চ তব্য-সদ্দো, যথারুচি পরিভুঞ্জন্তীতি অত্থো. কিলেসকামোপি অস্সাদিযমানো ৰত্থুকামন্তোগধোযেৰ, কিলেসকামৰসেন পন নেসং অস্সাদেতব্বতাতি আহ ‘‘ৰত্থুকামেসু কিলেসকামেন পাতব্যত’’ন্তি. কিলেসকামেনাতি করণত্থে করণৰচনং. পাতব্যতং পরিভুঞ্জিতব্বতন্তি এত্থাপি কত্তুৰসেনেৰ অত্থো ৰেদিতব্বো. মোল়িং কত্ৰাতি ৰেণিবন্ধৰসেন মোল়িং কত্ৰা. তাপসপরিব্বাজিকাহীতি তাপসপব্বজ্জূপগতাহি. পরিঞ্ঞং পঞ্ঞপেন্তীতি ইদং ‘‘পহানমাহংসূ’’তি পদস্সেৰ ৰেৰচনন্তি ‘‘পহানং সমতিক্কমং পঞ্ঞপেন্তী’’তি ৰুত্তং. তেন কামা নামেতে অনিচ্চা দুক্খা ৰিপরিণামধম্মাতি যাথাৰতো পরিজাননং ইধ ‘‘পহান’’ন্তি অধিপ্পেতং, ন ৰিনাভাৰমত্তন্তি দস্সেতি. মালুৰাসিপাটিকাতি মালুৰাৰিদলং মালুৰাফলে পোট্টলিকা. সন্তাসং আপজ্জেয্যাতি সালে অধিৰত্থদেৰতায পৰত্তিং গহেত্ৰা ৰুত্তং. তদা হি তস্সা এৰং হোতি. কোৰিল়ারপত্তসদিসেহীতি মহাকোৰিল়ারপত্তসণ্ঠানেহি. সণ্ঠানৰসেন হেতং ৰুত্তং, মালুৰাপত্তা পন কোৰিল়ারপত্তেহি মহন্ততরানি চেৰ ঘনতরানি চ হোন্তি. ৰিপুলবহুঘনগরুপত্ততায মহন্তং ভারং জনেত্ৰা. সাতি মালুৰালতা. ওঘনন্তি হেট্ঠতো ওলম্বনহেতুভূতং ঘনভাৰং.

অন্ধৰনসুভগৰনগ্গহণং তেসং অভিলক্খিতভাৰতো. নাল়িকেরাদীসু তিণজাতীসু. খাদনুপলক্খণং উপচিকানং উট্ঠহনগ্গহণন্তি আহ ‘‘উট্ঠহেয্যু’’ন্তি. কেল়িং করোন্তী ৰিযাতি ৰিলম্বননদী ৰিয কেল়িং করোন্তী. ইদানি অহং তং অজ্ঝোত্থরিন্তি পমোদমানা ৰিয ইতো চিতো চ ৰিপ্ফন্দমানা ৰিলম্বন্তী. সম্ফস্সোপি সুখো মুদুতলুণকোমলভাৰতো. দস্সনম্পি সুখং ঘনবহলপত্তসংহততায. সোমনস্সজাতাতি পুব্বে অনুস্সৰৰসেন ভৰনৰিনাসভযা সন্তাসং আপজ্জি, ইদানি তস্সা সম্পত্তিদস্সনেন পলোভিতা সোমনস্সজাতা অহোসি.

ৰিটভিং করেয্যাতি আতানৰিতানৰসেন জটেন্তী জালং করেয্য. তথাভূতা চ ঘনপত্তসঞ্ছন্নতায ছত্তসদিসী হোতীতি আহ ‘‘ছত্তাকারেন তিট্ঠেয্যা’’তি. সকলং রুক্খন্তি উপরি সব্বসাখাপসাখং সব্বরুক্খং. ভস্সমানাতি পলিৰেঠনৰসেনেৰ ওতরমানা. যাৰ মূলা ওতিণ্ণসাখাহীতি মালুৰা ভারেন ওনমিত্ৰা রুক্খস্স যাৰ মূলা ওতিণ্ণসাখাহি পুন অভিরুহমানা. সব্বসাখাতি হেট্ঠা মজ্ঝে উপরি চাতি সব্বাপি সাখাযো পলিৰেঠেন্তী. সংসিব্বিত্ৰা জালসন্তানকনিযামেন জটেত্ৰা. এৰং অপরাপরং সংসিব্বনেন অজ্ঝোত্থরন্তী. সব্বসাখা হেট্ঠা কত্ৰা সযং উপরি ঠত্ৰা মহাভারভাৰেন ৰাতে ৰা ৰাযন্তে দেৰে ৰা ৰস্সন্তে পদালেয্য. সাখট্ঠকৰিমানন্তি সাখাপটিবদ্ধং ৰিমানং. যস্মা ইধ সত্থারা ‘‘সেয্যথাপি, ভিক্খৰে’’তিআদিনা ভূতপুব্বমেৰ ৰত্থু উপমাভাৰেন আহটং, তস্মা ‘‘ইদং পন ৰিমান’’ন্তিআদি ৰুত্তং.

৪৭১. বহলরাগসভাৰোতি পচ্চৰেক্খণাহি নীহরিতুং অসক্কুণেয্যতায বলৰা হুত্ৰা অভিভৰনরাগধাতুকো. রাগজন্তি রাগনিমিত্তজাতং. দিট্ঠে দিট্ঠে আরম্মণেতি দিট্ঠে দিট্ঠে ৰিসভাগারম্মণে. নিমিত্তং গণ্হাতীতি কিলেসুপ্পত্তিযা কারণভূতং অনুব্যঞ্জনসো নিমিত্তং গণ্হাতি, সিক্খাগারৰেন পন কিলেসেহি নিস্সিতং মগ্গং ন পটিপজ্জতি, ততো এৰ আচরিযুপজ্ঝাযেহি আণত্তং দণ্ডকম্মং করোতেৰ. তেনাহ ‘‘ন ত্ৰেৰ ৰীতিক্কমং করোতী’’তি. হত্থপরামাসাদীনীতি – ‘‘এহি তাৰ তযা ৰুত্তং মযা ৰুত্তঞ্চ অমুত্র গন্ত্ৰা ৰীমংসিস্সামা’’তিআদিনা হত্থগ্গহণাদীনি করোন্তো, ন করুণামেত্তানিদানৰসেন. মোহজাতিকোতি বহলমোহসভাৰো.

৪৭২. কম্মনিযামেনাতি পুরিমজাতিসিদ্ধেন লোভুস্সদতাদিনিযমিতেন কম্মনিযামেন. ইদানি তং লোভুস্সদতাদিং ৰিভাগেন দস্সেতুং ‘‘যস্স হী’’তিআদি আরদ্ধং. তত্থ কম্মাযূহনক্খণেতি কম্মকরণৰেলায. লোভো বলৰাতি তজ্জায সামগ্গিযা সামত্থিযতো লোভো অধিকো হোতি. অলোভো মন্দোতি তপ্পটিপক্খো অলোভো দুব্বলো হোতি. কথং পনেতে লোভালোভা অঞ্ঞমঞ্ঞং উজুৰিপচ্চনীকভূতা একক্খণে পৰত্তন্তি? ন খো পনেতং এৰং দট্ঠব্বং ‘‘একক্খণে পৰত্তন্তী’’তি, নিকন্তিক্খণং পন আযূহনক্খণমেৰ কত্ৰা এৰং ৰুত্তং. এস নযো সেসেসু. পরিযাদাতুন্তি অভিভৰিতুং ন সক্কোতি. যো হি ‘‘এৰংসুন্দরং এৰংৰিপুলং এৰংমহগ্ঘঞ্চ ন সক্কা পরস্স দাতু’’ন্তিআদিনা অমুত্তচাগতাদিৰসেন পৰত্তায চেতনায সম্পযুত্তো অলোভো সম্মদেৰ লোভং পরিযাদাতুং ন সক্কোতি. দোসমোহানং অনুপ্পত্তিযং তাদিসপচ্চযলাভেনেৰ অদোসামোহা বলৰন্তো. তস্মাতি লোভাদোসামোহানং বলৰভাৰতো অলোভদোসমোহানঞ্চ দুব্বলভাৰতোতি ৰুত্তমেৰ কারণং পচ্চামসতি. সোতি তংসমঙ্গী. তেন কম্মেনাতি তেন লোভাদিউপনিস্সযৰতা কুসলকম্মুনা. সুখসীলোতি সখিলো. তমেৰত্থং অক্কোধনোতি পরিযাযেন ৰদতি.

মন্দা অলোভাদোসা লোভদোসে পরিযাদাতুং ন সক্কোন্তি, অমোহো পন বলৰা মোহং পরিযাদাতুং সক্কোতীতি এৰং যথারহং পঠমৰারে ৰুত্তনযেনেৰ অতিদেসত্থো ৰেদিতব্বো. পুরিমনযেনেৰাতি পুব্বে ৰুত্তনযানুসারেন. দুট্ঠোতি কোধনো. দন্ধোতি মন্দমঞ্ঞো. সুখসীলকোতি সুখসীলো.

এত্থ চ লোভৰসেন, দোসমোহ-লোভদোস-লোভমোহ-দোসমোহ-লোভদোসমোহৰসেনাতি তযো এককা, তযো দুকা, একো তিকোতি লোভাদিউস্সদৰসেন অকুসলপক্খে এৰ সত্ত ৰারা, তথা কুসলপক্খে অলোভাদিউস্সদৰসেনাতি চুদ্দস ৰারা লব্ভন্তি. তত্থ অলোভদোসমোহা, অলোভাদোসমোহা, অলোভদোসামোহা বলৰন্তোতি আগতেহি কুসলপক্খে ততিযদুতিযপঠমৰারেহি দোসুস্সদমোহুস্সদদোসমোহুস্সদৰারা গহিতা এৰ হোন্তি. তথা অকুসলপক্খে লোভাদোসামোহা, লোভদোসামোহা, লোভাদোসমোহা বলৰন্তোতি আগতেহি ততিযদুতিযপঠমৰারেহি অদোসুস্সদঅমোহুস্সদঅদোসামোহুস্সদৰারা গহিতা এৰাতি অকুসলকুসলপক্খেসু তযো তযো ৰারে অন্তোগধে কত্ৰা অট্ঠেৰ ৰারা দস্সিতা. যে পন উভযসম্মিস্সতাৰসেন লোভালোভুস্সদৰারাদযো অপরে একূনপঞ্ঞাস ৰারা কামং দস্সেতব্বা, তেসং অসম্ভৰতো এৰ ন দস্সিতা. ন হি ‘‘একস্মিং সন্তানে অন্তরেন অৰত্থন্তরং লোভো চ বলৰা অলোভো চা’’তিআদি যুজ্জতি. পটিপক্খৰসেন ৰাপি এতেসং বলৰদুব্বলভাৰো সহজাতধম্মৰসেন ৰা. তত্থ লোভস্স তাৰ পটিপক্খৰসেন অনভিভূততায বলৰভাৰো, তথা দোসমোহানং অদোসামোহেহি. অলোভাদীনং পন লোভাদিঅনভিভৰনতো. সব্বেসঞ্চ সমানজাতিযসমধিভুয্য পৰত্তিৰসেন সহজাতধম্মতো বলৰভাৰো. তেন ৰুত্তং অট্ঠকথাযং (ম. নি. অট্ঠ. ২.৪৭২) – ‘‘লোভো বলৰা, অলোভো মন্দো. অদোসামোহা বলৰন্তো, দোসমোহা মন্দা’’তিআদি, সো চ নেসং মন্দবলৰভাৰো পুরিমূপনিস্সযতো তথা আসযস্স পরিভাৰিততায ৰেদিতব্বো. তেনেৰাহ ‘‘কম্মনিযামেনা’’তি. সেসং ৰুত্তনযত্তা সুৰিঞ্ঞেয্যমেৰাতি.

চূল়ধম্মসমাদানসুত্তৰণ্ণনায লীনত্থপ্পকাসনা সমত্তা.

৬. মহাধম্মসমাদানসুত্তৰণ্ণনা

৪৭৩. এৰং ইদানি ৰুচ্চমানাকারো কামো কামনং ইচ্ছা এতেসন্তি এৰংকামা. এৰং ছন্দো ছন্দনং রোচনং অজ্ঝাসযো এতেসন্তি এৰংছন্দা. অভিমুখং, অভিনিৰিস্স ৰা পকারেহি এতি উপগচ্ছতীতি অধিপ্পাযো, লদ্ধি. সা হি লদ্ধব্বৰত্থুং অভিমুখং ‘‘এৰমেত’’ন্তি অভিনিৰিসন্তী তেন তেন পকারেন উপগচ্ছতি, হত্থগতং কত্ৰা তিট্ঠতি ন ৰিস্সজ্জেতি. এৰং ৰুচ্চমানাকারো অধিপ্পাযো এতেসন্তি এৰংঅধিপ্পাযা. ভগৰা মূলং কারণং এতেসং যাথাৰতো অধিগমাযাতি ভগৰংমূলকা. তেনাহ ‘‘ভগৰন্তঞ্হি নিস্সায মযং ইমে ধম্মে আজানাম পটিৰিজ্ঝামা’’তি. অম্হাকংধম্মাতি তেহি অত্তনা অধিগন্তব্বতায ৰুত্তং. সেৰিতব্বানঞ্হি যাথাৰতো অধিগমঞাণানি অধিগচ্ছনকসম্বন্ধীনি, তানি চ সম্মাসম্বুদ্ধমূলকানি অনঞ্ঞৰিসযত্তা. তেনাহ ‘‘পুব্বে কস্সপসম্বুদ্ধেনা’’তিআদি. ভগৰা নেতা তেসন্তি ভগৰংনেত্তিকা. নেতাতি সেৰিতব্বধম্মে ৰিনেয্যসন্তানং পাপেতা. ৰিনেতাতি অসেৰিতব্বধম্মে ৰিনেয্যসন্তানতো অপনেতা. তদঙ্গৰিনযাদিৰসেন ৰা ৰিনেতা. অনুনেতাতি ইমে ধম্মা সেৰিতব্বা, ইমে ন সেৰিতব্বাতি উভযসম্পাপনাপনযনত্থং পঞ্ঞপেতা. তেনাহ ‘‘যথাসভাৰতো’’তিআদি.