২. সীহনাদৰগ্গো

১. চূল়সীহনাদসুত্তৰণ্ণনা

১৩৯. সুত্তদেসনাৰত্থুসঙ্খাতস্স অত্থস্স উপ্পত্তি অট্ঠুপ্পত্তি, সা তস্স অত্থীতি অট্ঠুপ্পত্তিকোতি ৰুত্তোৰাযমত্থো. লাভসক্কারপচ্চযাতি লাভসক্কারনিমিত্তং, ভগৰতো সঙ্ঘস্স চ উপ্পন্নলাভসক্কারহেতু, অত্তনো ৰা লাভসক্কারুপ্পাদনহেতু. তিত্থিযপরিদেৰিতেতি তিত্থিযানং ‘‘কিং ভো সমণোযেৰ গোতমো সমণো’’তিআদিনা ৰিপ্পলপনিমিত্তং. ‘‘মহালাভসক্কারো উপ্পজ্জী’’তি ৰত্ৰা সমন্তপাসাদিকত্থং তস্স উপ্পত্তিকারণং দস্সেন্তো ‘‘চতুপ্পমাণিকো হী’’তিআদিমাহ. চত্তারি পমাণানি চতুপ্পমাণানি, চতুপ্পমাণানি এতস্স অত্থীতি চতুপ্পমাণিকো. লোকোযেৰ সঙ্গম্ম সমাগম্ম ৰসনট্ঠেন লোকসন্নিৰাসো, সত্তকাযোতি অত্থো. পমিনাতি উল়ারতাদিৰিসেসং এতেনাতি পমাণং (অ. নি. টী. ২.৪.৬৫) রূপং রূপকাযো পমাণং এতস্সাতি রূপপ্পমাণো. ততো এৰ রূপে পসন্নোতি রূপপ্পসন্নো. সেসপদেসুপি এসেৰ নযো. ঘোসোতি পৰত্তথুতিঘোসো (অ. নি. টী. ২.৪.৬৫). লূখন্তি পচ্চযলূখতা. ধম্মোতি সীলাদযো গুণধম্মা অধিপ্পেতা.

তেসং পুগ্গলানং. আরোহন্তি উচ্চতং. সা চ খো তস্মিং তস্মিং কালে পমাণযুত্তা দট্ঠব্বা. পরিণাহন্তি নাতিকিসনাতিথূলতাৰসেন মিতপরিণাহং. সণ্ঠানন্তি তেসং তেসং অঙ্গপচ্চঙ্গানং সুসণ্ঠিততং. পারিপূরিন্তি সব্বেসং সরীরাৰযৰানং পরিপুণ্ণতং অৰেকল্লতং. তত্থ পমাণং গহেত্ৰাতি তস্মিং রূপে রূপসম্পত্তিযং পমাণভাৰং উপাদায. পসাদং জনেতীতি অধিমোক্খং উপ্পাদেতি.

পরৰণ্ণনাযাতি ‘‘অমুকো এদিসো চ এদিসো চা’’তি যসগুণৰচনেন. পরথোমনাযাতি সম্মুখাৰ পরস্স সিলাঘুপ্পাদনেন অভিত্থৰনেন. পরপসংসনাযাতি পরম্মুখা পরস্স গুণসংকিত্তনেন. পরৰণ্ণহারিকাযাতি পরম্পরৰণ্ণহারিকায পরম্পরায পরস্স কিত্তিসদ্দূপসংহারেন. তত্থাতি তস্মিং থুতিঘোসে.

চীৰরলূখন্তি থূলজিণ্ণবহুতুন্নকতাদিং চীৰরস্স লূখভাৰং. পত্তলূখন্তি অনেকগন্থিকাহতাদিং পত্তস্স লূখভাৰং. ৰিৰিধং ৰা দুক্করকারিকন্তি ধুতঙ্গসেৰনাদিৰসেন পৰত্তং নানাৰিধং দুক্করচরিযং.

সীলং ৰা পস্সিত্ৰাতি সীলপারিপূরিৰসেন ৰিসুদ্ধং কাযৰচীসুচরিতং ঞাণচক্খুনা পস্সিত্ৰা. ঝানাদিঅধিগমসিদ্ধং সমাধিং ৰা. ৰিপস্সনাভিঞ্ঞাসঙ্খাতং পঞ্ঞং ৰা.

ভগৰতো সরীরং দিস্ৰাতি সম্বন্ধো. রূপপ্পমাণোপি সম্মাসম্বুদ্ধেযেৰ পসীদতি অপরিমিতকালসমুপচিতপুঞ্ঞানুভাৰনিপ্ফন্নায সব্বসো অনৰজ্জায সব্বাকারপরিপুণ্ণাৰযৰায রূপকাযসম্পত্তিযা সমন্তপাসাদিকত্তা, যস্সা রুচিরভাৰো ৰিসুদ্ধে ৰিগতৰলাহকে দেৰে পুণ্ণমাসিযং পরিপুণ্ণকলাভাগমণ্ডলং চন্দমণ্ডলং অভিভৰিত্ৰা অতিরোচতি, পভস্সরভাৰো সরদসমযং সংৰদ্ধিতদিগুণতেজকিরণজালসমুজ্জলং সূরিযমণ্ডলং অভিভৰতি, সোম্মকিরণরসসমুজ্জলভাৰেহি তদুভযেহি অভিভুয্য ৰত্তমানং একস্মিং খণে দসসহস্সিলোকধাতুং ৰিজ্জোতনসমত্থং মহাব্রহ্মুনো পভাসমুদযং অভিৰিহচ্চ ভাসতে তপতে ৰিরোচতি চ.

সতিপি অঙ্গপরিচ্চাগাদীনং দানপারমিভাৰে পরিচ্চাগৰিসেসভাৰদস্সনত্থঞ্চেৰ সুদুক্করভাৰদস্সনত্থঞ্চ অঙ্গপরিচ্চাগাদিগ্গহণং, তত্থাপি চ অঙ্গপরিচ্চাগতো ৰিসুং নযনপরিচ্চাগগ্গহণং, পরিচ্চাগভাৰসামঞ্ঞেপি রজ্জপরিচ্চাগতো পুত্তদারপরিচ্চাগগ্গহণঞ্চ কতং. আদিনা নযেনাতি আদি-সদ্দেন পুব্বযোগপুব্বচরিযাদিহেতুসম্পত্তিযা, ‘‘ইতিপি সো ভগৰা’’তিআদিনা (দী. নি. ১.১৫৭, ২৫৫) ৰুত্তায ফলসম্পত্তিযা, ‘‘সো ধম্মং দেসেতী’’তিআদিনা (দী. নি. ১.২৫৫) ৰুত্তায সত্তুপকারকিরিযায চ সঙ্গহো দট্ঠব্বো. সম্মাসম্বুদ্ধেযেৰ পসীদতি যথাৰুত্তগুণানং অনঞ্ঞসাধারণভাৰতো অচ্ছরিযব্ভুতভাৰতো চ. সেসেসুপি এসেৰ নযো.

‘‘চীৰরলূখং দিস্ৰা’’তি ৰত্ৰা তং দস্সেতুং ‘‘সচে ভগৰা’’তিআদি ৰুত্তং. সাণপংসুকূলচীৰরেনাতি মতকল়েৰরং পলিৰেঠেত্ৰা ছড্ডিতেন তুম্বমত্তে কিমী পপ্ফোটেত্ৰা গহিতেন সাণপংসুকূলচীৰরেন. ভারিযন্তি গরুকং, দুক্করন্তি অত্থো. ৰধুযুৰতীমজ্ঝিমিত্থিৰসেন, বালযোব্বনপুরাণৰসেন ৰা তিৰিধনাটকতা. হরেণুযূসং মণ্ডলকলাযরসো. ‘‘যাপেস্সতি নামা’’তি নাম-সদ্দং আনেত্ৰা সম্বন্ধো. নাম-সদ্দযোগেন হি অনাগতকালস্স ৰিয পযোগো, যাপেতি ইচ্চেৰ অত্থো. অপ্পাণকন্তি নিরস্সাসং নিরোধিতস্সাসপস্সাসং.

সমাধিগুণন্তি সাধারণতো ৰুত্তমত্থং ৰিৰরতি ঝানাদিগ্গহণেন. মানদব্বনিম্মদনেন নিব্বিসেৰনভাৰাপাদনম্পি দমনমেৰাতি ৰুত্তং ‘‘পাথিকপুত্তদমনাদীনী’’তি. আদি-সদ্দেন সচ্চকাল়ৰকবকদমনাদীনং সঙ্গহো. বাৰেরুন্তি এৰংনামকং ৰিসযং. সরসম্পন্নোতি অট্ঠঙ্গসমন্নাগতেন সরেন সমন্নাগতো. তেন ব্রহ্মস্সরতাকরৰীকভাণিতাদস্সনেন লক্খণহারনযেন অৰসেসলক্খণপারিপূরিং ৰিয তদৰিনাভাৰতো বুদ্ধানং দেসনাৰিলাসঞ্চ ৰিভাৰেতি.

হতপ্পভাতি বুদ্ধানুভাৰেন ৰিগততেজা. কাল়পক্খূপমেতি সত্তানং ব্যামোহন্ধকারাভিভৰেন কাল়পক্খরত্তূপমে. সূরিযেতি সূরিযে উদযিত্ৰা ওভাসেন্তেতি অধিপ্পাযো.

সিঙ্ঘাটকেতি তিকোণরচ্ছাযং. চতুক্কেতি সন্ধিযং. পরিদেৰন্তীতি অনুত্থুননৰসেন ৰিপ্পলপন্তি. সোকাধিককতো হি ৰচীপলাপো পরিদেৰো. লোকে উপ্পজ্জমানেযেৰ উপ্পন্নাতি অত্তনো দিট্ঠিৰাদস্স পুরাতনভাৰং দীপেন্তি.

সেসপদেসুপীতি ‘‘ইধ দুতিযো সমণো’’তিআদীসু সেসৰারেসুপি (অ. নি. টী. ২.৪.২৪১-২৪২) যথা হি ‘‘ৰিৰিচ্চেৰ কামেহী’’তি (পারা. ১১; দী. নি. ১.২২৬; সং. নি. ২.১৫২; অ. নি. ৪.১২৩) এত্থ কতো নিযমো ‘‘ৰিৰিচ্চ অকুসলেহী’’তি (পারা. ১১; দী. নি. ১.২২৬; সং. নি. ২.১৫২; অ. নি. ৪.১২৩) এত্থাপি কতোযেৰ হোতি সাৰধারণস্সেৰ অত্থস্স ইচ্ছিতব্বত্তা, এৰমিধাপীতি. তেনাহ ‘‘দুতিযাদযোপী’’তিআদি. সামঞ্ঞফলাধিগমৰসেন নিপ্পরিযাযতো সমণভাৰোতি তেসং ৰসেনেত্থ চত্তারো সমণা দেসিতাতি তমত্থং সুত্তন্তরেন সমত্থেতুং ‘‘তেনেৰাহা’’তিআদি ৰুত্তং. পটিপত্তিক্কমেন দেসনাক্কমেন চ সকদাগামিআদীনং দুতিযাদিতা ৰুত্তাতি সোতাপন্নস্স পঠমতা অৰুত্তসিদ্ধাতি ন চোদিতা. ফলট্ঠকসমণাৰ অধিপ্পেতা সমিতপাপসমণগ্গহণতো. কস্মা পনেত্থ মহাপরিনিব্বানে ৰিয মগ্গট্ঠা তদত্থায পটিপন্না চ ন গহিতাতি? ৰেনেয্যজ্ঝাসযতো. তত্থ হি মগ্গাধিগমত্থায ৰিপস্সনাপি ইতো বহিদ্ধা নত্থি, কুতো মগ্গফলানীতি দস্সেন্তেন ভগৰতা ‘‘ঞাযস্স ধম্মস্স পদেসৰত্তী, ইতো বহিদ্ধা সমণোপি নত্থী’’তি ৰুত্তং. ইধ পন নিট্ঠানপ্পত্তমেৰ তংতংসমণভাৰং গণ্হন্তেন ফলট্ঠকসমণাৰ গহিতা ‘‘মগ্গট্ঠতো ফলট্ঠো সৰিসেসং দক্খিণেয্যো’’তি. স্ৰাযমত্থো দ্ৰীসু সুত্তেসু দেসনাভেদেনেৰ ৰিঞ্ঞাযতীতি.

রিত্তাতি ৰিৰিত্তা. তুচ্ছাতি নিস্সারা পটিপন্নকসারাভাৰতো. পৰদন্তি এতেহীতি পৰাদা, দিট্ঠিগতিকানং নানাদিট্ঠিদীপকা সমযাতি আহ ‘‘চত্তারো সস্সতৰাদা’’তিআদি. তত্থ যং ৰত্তব্বং, তং পরতো আগমিস্সতি. তেতি যথাৰুত্তসমণা. এত্থাতি ‘‘পরপ্পৰাদা’’তি ৰুত্তে বাহিরকসমযে.

যন্তি যস্মিং. ভুম্মত্থে হি ইদং পচ্চত্তৰচনং. ঞাযো ৰুচ্চতি সহ ৰিপস্সনায অরিযমগ্গো. তেন হি নিব্বানং ঞাযতি গম্মতি পটিৰিজ্ঝতীতি. সো এৰ নিব্বানসম্পাপকহেতুতায ধম্মোতি আহ ‘‘ঞাযস্স ধম্মস্সা’’তি.

তেসং পরপ্পৰাদসাসনানং অখেত্ততা খেত্ততা চ অরিযমগ্গস্স অভাৰভাৰা সুপরিসুদ্ধস্স সীলস্স সুপরিসুদ্ধায সমথৰিপস্সনায অভাৰতো সাৰতো চ. তদুভযঞ্চ দুরক্খাতস্ৰাক্খাতভাৰহেতুকং, সো চ অসম্মাসম্বুদ্ধসম্মাসম্বুদ্ধপৰেদিততাযাতি পরাজিকায সত্থু ৰিপত্তিহেতুতায সাসনস্স অনিয্যানভাৰোতি দস্সেতি.

ইদানি যথাৰুত্তমত্থং পরিযাযতো চ পাল়িযা চ সমত্থেতুং ‘‘তেনাহ ভগৰা’’তিআদিনা পাল়িং দস্সেত্ৰা উপমাপদেসেন তত্থ সুত্তং ৰিভাৰেন্তো ‘‘যস্মা’’তিআদিমাহ. তত্থ যস্মা একচ্চানং ৰিসেসতো সীহানং পুরিমং পাদদ্ৰযং হত্থকিচ্চম্পি করোতি, তস্মা আহ ‘‘সুরত্তহত্থপাদো’’তি. সীহস্স কেসা নাম কেসরাযতনা খন্ধলোমা. গোচরিযহত্থিকুলং নাম পকতিহত্থিকুলং, যং ‘‘কালাৰক’’ন্তিপি ৰুচ্চতি. ঘোটকো নাম অস্সখল়ুঙ্কো. সিনেরুপরিভণ্ডে সিম্বলিরুক্খেহি সঞ্ছাদিতো পঞ্ঞাসযোজনো দহো সিম্বলিদহো, তং পরিৰারেত্ৰা মহন্তং সিম্বলিৰনং, তং সন্ধাযাহ ‘‘সিম্বলিদহৰনে’’তি. অঞ্ঞতিত্থাৰাসভূমিযং ইমেসু সমণেসু একচ্চো ন উপ্পজ্জতি, ঈদিসো পনেত্থ ৰিকপ্পো নত্থি, সব্বেন সব্বং ন উপ্পজ্জন্তেৰাতি দস্সেন্তো ‘‘একসমণোপী’’তি আহ. অরিযমগ্গপরিক্খতেতি অরিযমগ্গুপ্পত্তিযা অভিসঙ্খতে, যদা সাসনিকানং সম্মাপটিপত্তিযা অরিযমগ্গো দিব্বতি, তদাতি অত্থো.

সম্মাতি সুট্ঠু. সুট্ঠু নদনং নাম হেতুযুত্তং সুট্ঠু কত্ৰা কথনন্তি আহ ‘‘হেতুনা’’তি. সো চ হেতু অৰিপরীতো এৰ ইচ্ছিতব্বোতি আহ ‘‘নযেনা’’তি, ঞাযেনাতি অত্থো. এৰংভূতো চ সো যথাধিপ্পেতত্থং করোতি সাধেতীতি দস্সেন্তো আহ ‘‘কারণেনা’’তি. যদি তিরচ্ছানসীহস্স নাদো সব্বতিরচ্ছানএকচ্চমনুস্সামনুস্সনাদতো সেট্ঠত্তা সেট্ঠনাদো, কিমঙ্গং পন তথাগতসীহনাদোতি আহ ‘‘সীহনাদন্তি সেট্ঠনাদ’’ন্তি. যদি তিরচ্ছানসীহনাদস্স সেট্ঠনাদতা নিব্ভযতায অপ্পটিসত্তুতায ইচ্ছিতা, তথাগতসীহনাদস্সেৰ অযমত্থো সাতিসযোতি আহ ‘‘অভীতনাদং অপ্পটিনাদ’’ন্তি. ইদানিস্স সেট্ঠনাদভাৰং কারণেন পটিপাদেন্তো ‘‘ইমেসঞ্হী’’তিআদিমাহ. তেন ‘‘সম্মা’’তি ৰুত্তমত্থং সমত্থেতি. তত্থ অত্থিতাযাতি ইমিনা সীহনাদস্স উত্তমত্থতং দস্সেতি. ভূতট্ঠো হি উত্তমট্ঠো. তায এৰ ভূতট্ঠতায অভীতনাদতাতি দস্সেন্তো ‘‘ইমে সমণা…পে… নাম হোতী’’তি আহ. অভূতঞ্হি ৰদতো কুতোচি ভযং ৰা আসঙ্কা ৰা সিযাতি ‘‘ইধেৰা’’তি নিযমস্স অৰিপরীততং দস্সেন্তো ‘‘অম্হাকম্পি…পে… অপ্পটিনাদো নাম হোতী’’তি আহ. যঞ্হি অঞ্ঞত্থাপি অত্থি, তং ইধেৰাতি অৰধারেতুং ন যুত্তন্তি.

১৪০. খোতি অৰধারণে. তেন ৰিজ্জতি এৰাতি দস্সেতি. যন্তি করণত্থে পচ্চত্তন্তি আহ ‘‘যেন কারণেনা’’তি. তিত্থং নাম দ্ৰাসট্ঠি দিট্ঠিযো তব্বিনিমুত্তস্স কস্সচি দিট্ঠিৰিপ্ফন্দিতস্স অভাৰতো. পারগমনসঙ্খাতং তরণং দিট্ঠিগতিকানং (অ. নি. টী. ২.৩.৬২) তত্থ তত্থেৰ অপরাপরং উম্মুজ্জননিমুজ্জনৰসেন পিলৰনন্তি আহ ‘‘তরন্তি উপ্পলৰন্তী’’তি. উপ্পাদেতাতি পূরণাদিকো. তিত্থে জাতাতি তিত্থিযা, যথাৰুত্তং ৰা দিট্ঠিগতসঙ্খাতং তিত্থং এতেসং অত্থীতি তিত্থিকা, তিত্থিকা এৰ তিত্থিযা. অস্সসন্তি এত্থ, এতেনাতি ৰা অস্সাসো, অৰস্সযো.

পকতত্থনিদ্দেসো যং-তং-সদ্দোতি তস্স ‘‘ভগৰতা’’তিআদীহি পদেহি সমানাধিকরণভাৰেন ৰুত্তস্স যেন অভিসম্বুদ্ধভাৰেন ভগৰা পকতো সত্থুভাৰেন অধিগতো সুপাকটো চ, তং অভিসম্বুদ্ধভাৰং সদ্ধিং আগমনপটিপদায অত্থভাৰেন দস্সেন্তো ‘‘যো সো…পে… অভিসম্বুদ্ধো’’তি আহ. সতিপি ঞাণদস্সনসদ্দানং ইধ পঞ্ঞাৰেৰচনভাৰে তেন তেন ৰিসেসেন নেসং সৰিসযে ৰিসেসপ্পৰত্তিদস্সনত্থং (সারত্থ. টী. পরিৰার ৩.১) অসাধারণৰিসেসৰসেন ৰিজ্জাত্তযৰসেন ৰিজ্জাভিঞ্ঞানাৰরণৰসেন সব্বঞ্ঞুতঞ্ঞাণমংসচক্খুৰসেন পটিৰেধদেসনাঞাণৰসেন চ তে যোজেত্ৰা দস্সেন্তো ‘‘তেসং তেস’’ন্তিআদিমাহ. তত্থ আসযানুসযং জানতা আসযানুসযঞাণেন, সব্বং ঞেয্যধম্মং পস্সতা সব্বঞ্ঞুতানাৰরণঞাণেহি. পুব্বেনিৰাসাদীহীতি পুব্বেনিৰাসআসৰক্খযঞাণেহি. অনঞ্ঞসাধারণপুঞ্ঞানুভাৰনিব্বত্তো অনুত্তরঞাণাধিগমলদ্ধপুরাৰত্তকো চ ভগৰতো রূপকাযো অতিক্কম্মেৰ দেৰানং দেৰানুভাৰং ৰত্ততীতি আহ ‘‘সব্বসত্তানং…পে… পস্সতা’’তি. পটিৰেধপঞ্ঞাযাতি মগ্গপঞ্ঞায. তায হি সব্বসো ঞেয্যধম্মেসু সম্মোহস্স ৰিধমিতত্তা পচ্ছা পৰত্তজাননং তস্স জাননং ৰিয ৰুচ্চতি.

অরীনন্তি কিলেসারীনং, পঞ্চৰিধমারানং ৰা সাসনপচ্চত্থিকানং ৰা অঞ্ঞতিত্থিযানং, তেসং হননং পাটিহারিযেহি অভিভৰনং অপ্পটিভানতাকরণং অজ্ঝুপেক্খনং ৰা. কেসিৰিনযসুত্তঞ্চেত্থ (অ. নি. ৪.১১১) নিদস্সনং. তথা চ ঠানাট্ঠানাদীনি ৰা জানতা, যথাকম্মুপগে সত্তে পস্সতা, সৰাসনানমাসৰানং খীণত্তা অরহতা, অভিঞ্ঞেয্যাদিভেদে ধম্মে অভিঞ্ঞেয্যাদিতো অৰিপরীতাৰবোধেন সম্মাসম্বুদ্ধেন. অথ ৰা তীসু কালেসু অপ্পটিহতঞাণতায জানতা, কাযকম্মাদীনং ঞাণানুপরিৰত্তনেন নিসম্মকারিতায পস্সতা, রৰাদীনম্পি (সারত্থ. টী. পরিৰার ৩.১) অভাৰসাধিকায পহানসম্পদায অরহতা, ছন্দাদীনং অহানিহেতুভূতায অক্খযপটিভানসাধিকায সব্বঞ্ঞুতায সম্মাসম্বুদ্ধেন. এৰং দসবলঅট্ঠারসাৰেণিকবুদ্ধধম্মৰসেনপি যোজনা ৰেদিতব্বা. যেতি চতুরো ধম্মে. অত্তনীতি অম্হেসু. ন রাজরাজমহামত্তাদীসু উপত্থম্ভং সম্পস্সমানা, ন কাযবলং সম্পস্সমানাতি যোজনা.

উপ্পন্নপসাদোতি অৰেচ্চপ্পসাদং ৰদতি. ৰক্খতি হি ‘‘চত্তারি সোতাপন্নস্স অঙ্গানি কথিতানী’’তি (ম. নি. অট্ঠ. ১.১৪০). কামং অসেক্খাপি অসেক্খায সমসিক্খতায সহধম্মিকা এৰ, চিণ্ণব্রহ্মচরিযতায পন সহধম্মং চরন্তীতি ন ৰত্তব্বাতি অসেক্খৰারো ন গহিতো. সব্বেপেতেতি এতে যথাৰুত্তা ভিক্খুআদযো সোতাপন্নাদযো চ পুথুজ্জনা অরিযা চাতি সব্বেপি এতে তংতংসিক্খাহি সমানধম্মত্তা সহধম্মত্তা ‘‘সহধম্মিকা’’তি ৰুচ্চন্তি. ইদানি নিব্বত্তিতঅরিযধম্মৰসেনেৰ সহধম্মিকে দস্সেন্তো ‘‘অপিচা’’তিআদিমাহ. মগ্গদস্সনম্হীতি পরিঞ্ঞাভিসমযাদিৰসেন সচ্চপটিৰেধেন ‘‘নৰ মগ্গঙ্গানি, অট্ঠ বোজ্ঝঙ্গানী’’তিআদিনা ৰিৰাদো নত্থি. একধম্মচারিতাযাতি সমানধম্মচারিতায. ন হি পটিৰিদ্ধসচ্চানং ‘‘মযা ধম্মো সুদিট্ঠো, তযা দুদ্দিট্ঠো’’তিআদিনা ৰিৰাদো অত্থি. দিট্ঠিসীলসামঞ্ঞেন সঙ্ঘাতা হি তে উত্তমপুরিসা. ইমিনাতি ‘‘সহধম্মিকা খো পনা’’তিআদিৰচনেন. তত্থ পিযমনাপগ্গহণেন সীলেসু পরিপূরকারিতাপদেসেন একদেসেন গহিতং সঙ্ঘসুপ্পটিপত্তিং পরিপুণ্ণং কত্ৰা দস্সেতি. যে হি সম্পন্নসীলা সুৰিসুদ্ধদস্সনা, তে ৰিঞ্ঞূনং পিযা মনাপাতি. এত্তাৰতাতি ‘‘অত্থি খো নো আৰুসো’’তিআদিনযপ্পৰত্তেন রতনত্তযপসাদজোতনেন অক্খাতা তেসু তেসু সুত্তপদেসেসু.

১৪১. সত্থরি পসাদোতি পসাদগ্গহণেন ‘‘ভগৰতা’’তিআদিনা ৰা পসাদনীযা ধম্মা গহিতা. তেন বুদ্ধসুবুদ্ধতং দস্সেতি, তথা ‘‘ধম্মে পসাদো’’তি ইমিনা ধম্মসুধম্মতং, ইতরেন সঙ্ঘসুপ্পটিপন্নতং. যেন চিত্তেন অঞ্ঞত্থ অনুপলব্ভমানেন সাসনেযেৰ সমণো ইতো বহিদ্ধা নত্থীতি অযমত্থো, সম্মদেৰ, পতিট্ঠাপিতোতি ৰেদিতব্বং. তত্রাযং যোজনা – যস্মা সম্মাসম্বুদ্ধো অম্হাকং সত্থা, তস্মা অত্থি খো নো, আৰুসো, সত্থরি পসাদো, সম্মাসম্বুদ্ধত্তা চস্স স্ৰাখাতো ধম্মোতি অত্থি ধম্মে পসাদো, ততো এৰ চ অত্থি সীলেসু পরিপূরকারিতাতি সহধম্মিকা…পে… পব্বজিতা চাতি এৰমেত্থ সত্থরি পসাদেন ধম্মে পসাদো, তেন সঙ্ঘসুপ্পটিপত্তীতি অযঞ্চ নযো লেসেনপি পরপ্পৰাদেসু নত্থীতি ইধেৰ সমণো…পে… সমণেহি অঞ্ঞেহীতি.

পটিৰিদ্ধসচ্চানং পহীনানুরোধানং গেহস্সিতপেমস্স অসম্ভৰো এৰাতি ‘‘ইদানী’’তি ৰুত্তং. যদি এৰং ‘‘উপজ্ঝাযেন, ভিক্খৰে, সদ্ধিৰিহারিকম্হি পুত্তপেমং উপট্ঠপেতব্বং’’তিআদিৰচনং (মহাৰ. ৬৫) কথন্তি? নযিদং গেহস্সিতপেমং সন্ধায ৰুত্তং, তংসদিসত্তা পন পেমমুখেন ৰুত্তো মেত্তাস্নেহো. ন হি ভগৰা ভিক্খূ সংকিলেসে নিযোজেতি. এৰরূপং পেমং সন্ধাযাতি পসাদাৰহগুণাৰহতো পূরণাদীসু ভত্তি পসাদো ন হোতি, পসাদপতিরূপকা পন লোভপৰত্তীতি দট্ঠব্বা. থেরোতি মহাসঙ্ঘরক্খিতত্থেরো. যেন অট্ঠকথা পোত্থকং আরোপিতা. একোৰ সত্থা অনঞ্ঞসাধারণগুণত্তা, অঞ্ঞথা অনচ্ছরিযত্তা সত্থুলক্খণমেৰ ন পরিপূরেয্য. ৰিসুং কত্ৰাতি অঞ্ঞেহি ৰিৰেচেত্ৰা অত্তনো আৰেণিকং কত্ৰা. ‘‘অম্হাকং সত্থা’’তি ব্যাৰদন্তানং অঞ্ঞেসং সত্থা ন হোতীতি অত্থতো আপন্নমেৰ হোতি, তথা চ পদেসৰত্তিনিং তস্স সত্থুতং পটিজানন্তা পরিপুণ্ণলক্খণসত্থুতং ইচ্ছন্তানম্পি ততো ৰিরুদ্ধা সত্থুভাৰপরিযেসনেন পরাজিতা হোন্তি. পরিযত্তিধম্মেতি অধিকব্রহ্মগুণসুত্তগেয্যাদিপ্পভেদসমযে. তত্থ অজসীল…পে… কুক্কুরসীলাদীসূতি ইদং যেভুয্যেন অঞ্ঞতিত্থিযানং তাদিসং ৰতসমাদানসব্ভাৰতো ৰুত্তং, আদি-সদ্দেন যমনিযমচাতুযামসংৰরাদীনং সঙ্গহোতি. অধিপ্পযাসোতি অধিকং পযসতি পযুজ্জতি এতেনাতি অধিপ্পযাসো, সৰিসেসং অধিকত্তব্বকিরিযা (অ. নি. টী. ২.৩.১১৭). তেনাহ ‘‘অধিকপ্পযোগো’’তি.

তস্স পসাদস্স পরিযোসানভূতাতি তস্স সত্থরি ধম্মে চ পসাদস্স নিট্ঠানভূতা. নিট্ঠাতি মোক্খো. সমযৰাদীনঞ্হি তস্মিং তস্মিং সমযে তদুপদেসকে চ পসাদো যাৰদেৰ মোক্খাধিগমনট্ঠো. দিট্ঠিগতিকা তথা তথা অত্তনো লদ্ধিৰসেন নিট্ঠং পরিকপ্পেন্তি যেৰাতি আহ ‘‘নিট্ঠং অপঞ্ঞপেন্তো নাম নত্থী’’তি. ব্রাহ্মণানন্তি ব্রাহ্মণৰাদীনং. তেসং একচ্চে ব্রহ্মুনা সলোকতা নিট্ঠাতি ৰদন্তি, একচ্চে তস্স সমীপতা, একচ্চে তেন সংযোগো নিট্ঠাতি ৰদন্তি. তত্থ যে সলোকতাৰাদিনো সমীপতাৰাদিনো চ, তে দ্ৰেধাৰাদিনো, ইতরে অদ্ৰেধাৰাদিনো. সব্বেপি তে অত্থতো ব্রহ্মলোকুপপত্তিযংযেৰ নিট্ঠাসঞ্ঞিনো. তত্থ হি নেসং নিচ্চাভিনিৰেসো যথা তং বকস্স ব্রহ্মুনো. তেন ৰুত্তং ‘‘ব্রহ্মলোকো নিট্ঠা’’তি. ব্রহ্মলোকোতি পঠমজ্ঝানভূমি. মহাতাপসানন্তি ৰেখনসাদিতাপসানং. মহাব্রহ্মা ৰিয পঠমজ্ঝানভূমিযং আভস্সরেসু একো সব্বসেট্ঠো নত্থীতি ‘‘আভস্সরা’’তি পুথুৰচনং. পরিব্বাজকানন্তি সঞ্চযাদিপরিব্বাজকানং. অন্তো চ মনো চ এতস্স নত্থীতি অনন্তমানসো. আজীৰকানঞ্হি সব্বদাভাৰতো অনন্তো, সুখদুক্খাদিসমতিক্কমনতো অমানসো. ইমিনা অট্ঠহি লোকধম্মেহি উপক্কিলিট্ঠচিত্ততং দস্সেতি.

পপঞ্চে যং ৰত্তব্বং, তং হেট্ঠা ৰুত্তমেৰ. তণ্হাদিট্ঠিযোৰ অধিপ্পেতা মমঙ্কারঅহঙ্কারৰিগমস্স অধিপ্পেতত্তা. যথা পঞ্চসু ঠানেসু একোৰ কিলেসো লোভো আগতো, এৰং দ্ৰীসু ঠানেসু তযো কিলেসা আগতা ‘‘দোসো মোহো দিট্ঠী’’তি. ‘‘সদোসস্সা’’তি হি ৰুত্তট্ঠানে পটিঘং অকুসলমূলং গহিতং, ‘‘পটিৰিরুদ্ধস্সা’’তি ৰিরোধো, ‘‘সমোহস্সা’’তি মোহো অকুসলমূলং, ‘‘অৰিদ্দসুনো’’তি মল্যং, অসম্পজঞ্ঞং ৰা, ‘‘সউপাদানস্সা’’তি ‘‘নত্থি দিন্ন’’ন্তিআদিনা নযেন গহণং, ‘‘পপঞ্চারামস্সা’’তি পপঞ্চুপ্পত্তিৰসেন.

আকারতোতি পৰত্তিআকারতো. পদন্তরেন রাগৰিসেসস্স ৰুচ্চমানত্তাআদিতো ৰুত্তং সরাগৰচনং ওল়ারিকং রাগৰিসযন্তি আহ ‘‘পঞ্চকামগুণিকরাগৰসেনা’’তি. গহণৰসেনাতি দল়্হগ্গহণৰসেন. ‘‘অনুরুদ্ধপটিৰিরুদ্ধস্সা’’তি একপদৰসেন পাল়িযং আগতত্তা একজ্ঝং পদুদ্ধারো কতো. তত্থ পন ‘‘অনুরুদ্ধস্সা’’তি সুভৰসেনাতি এৰমত্থো ৰত্তব্বো. ন হি পটিৰিরুজ্ঝনং সুভৰসেন হোতি. পপঞ্চুপ্পত্তিদস্সনৰসেনাতি কিলেসকম্মৰিপাকানং অপরাপরুপ্পত্তিপচ্চযতায সংসারস্স পপঞ্চনং পপঞ্চো, তস্স উপ্পত্তিহেতুভাৰদস্সনৰসেন. তণ্হা হি ভৰুপ্পত্তিযা ৰিসেসপচ্চযো. তণ্হাপচ্চযা উপাদানদস্সনৰসেনাতি তণ্হাপচ্চযস্স উপাদানস্স দস্সনৰসেন, যদৰত্থা তণ্হা উপাদানস্স পচ্চযো, তদৰত্থাদস্সনৰসেন. ফলেন হি হেতুৰিসেসকিত্তনমেতন্তি. এৰং ৰিদ্ধংসেথাতি কামরাগভৰতণ্হাদিৰসেন লোভং কস্মা এৰং ৰিপ্পকিরেথ. তণ্হাকরণৰসেনাতি তণ্হাযনকরণৰসেন সুভাকারগ্গহণৰসেন. সুভন্তি হি আরম্মণে পৰত্তো রাগো ‘‘সুভ’’ন্তি ৰুত্তো.

১৪২. ৰদন্তি এতেনাতি ৰাদো, দিট্ঠিৰাদো. দিট্ঠিৰসেন হি ‘‘সস্সতো অত্তা চ লোকো চ, অসস্সতো অত্তা চ লোকো চা’’তি চ দিট্ঠিগতিকা পঞ্ঞপেন্তি. তেনাহ ‘‘দ্ৰেমা, ভিক্খৰে, দিট্ঠিযো’’তি (ম. নি. ১.১৪২). তণ্হারহিতায দিট্ঠিযা অভাৰতো তণ্হাৰসেনেৰ চ অত্তনো সস্সতভাৰাভিনিৰেসোতি কত্ৰা ৰুত্তং ‘‘তণ্হাদিট্ঠিৰসেনা’’তি. অল্লীনাতি নিস্সিতা. উপগতাতি অৰিস্সজ্জনৰসেন একিভাৰমিৰ গতা. অজ্ঝোসিতাতি তায দিট্ঠিযা গিলিত্ৰা পরিনিট্ঠাপিতা ৰিয তদন্তোগধা. তেনাহ ‘‘অনুপৰিট্ঠা’’তি. যথা গহট্ঠানং কামজ্ঝোসানং ৰিৰাদমূলং, এৰং পব্বজিতানং দিট্ঠজ্ঝোসানন্তি আহ ‘‘ৰিভৰদিট্ঠিযা তে পটিৰিরুদ্ধা’’তি. দিট্ঠিৰিরোধেন হি দিট্ঠিগতিকৰিরোধো.

খণিকসমুদযো উপ্পাদক্খণোতি আহ ‘‘দিট্ঠীনং নিব্বত্তী’’তি. দিট্ঠিনিব্বত্তিগ্গহণেনেৰ চেত্থ যথা দিট্ঠীনং পটিচ্চসমুপ্পন্নতা ৰিভাৰিতা, এৰং দিট্ঠিৰত্থুনোপীতি উভযেসম্পি অনিচ্চতা দুক্খতা অনত্ততা চ ৰিভাৰিতাতি দট্ঠব্বং. যানি পটিসম্ভিদানযেন (পটি. ম. ১.১২২) ‘‘পচ্চযসমুদযো অট্ঠ ঠানানী’’তি ৰুত্তানি, তানি দস্সেন্তো ‘‘খন্ধাপী’’তিআদিমাহ. তত্থ খন্ধাপি দিট্ঠিট্ঠানং আরম্মণট্ঠেন ‘‘রূপং অত্ততো সমনুপস্সতী’’তিআদিৰচনতো (সং. নি. ৩.৮১; ৪.৩৪৫). অৰিজ্জাপি দিট্ঠিট্ঠানং উপনিস্সযাদিৰসেন পচ্চযভাৰতো. যথাহ – ‘‘অস্সুতৰা, ভিক্খৰে, পুথুজ্জনো অরিযানং অদস্সাৰী অরিযধম্মস্স অকোৰিদো’’তিআদি (ম. নি. ১.২, ৪৬১; সং. নি. ৩.১, ৭). ফস্সোপি দিট্ঠিট্ঠানং. যথা চাহ ‘‘তদপি ফস্সপচ্চযা (দী. নি. ১.১১৮-১৩০), ফুস্স ফুস্স পটিসংৰেদিযন্তী’’তি (দী. নি. ১.১৪৪) চ. সঞ্ঞাপি দিট্ঠিট্ঠানং. ৰুত্তঞ্হেতং ‘‘সঞ্ঞানিদানা হি পপঞ্চসঙ্খাতি (সু. নি. ৮৮০), পথৰিং পথৰিতো সঞ্ঞত্ৰা’’তি (ম. নি. ১.২) চ আদি. ৰিতক্কোপি দিট্ঠিট্ঠানং. ৰুত্তম্পি চেতং ‘‘তক্কঞ্চ দিট্ঠীসু পকপ্পযিত্ৰা, সচ্চং মুসাতি দ্ৰযধম্মমাহূ’’তি (সু. নি. ৮৯২; মহানি. ১২১) ‘‘তক্কী হোতি ৰীমংসী’’তি (দী. নি. ১.৩৪) চ আদি. অযোনিসোমনসিকারোপি দিট্ঠিট্ঠানং. যথাহ ভগৰা ‘‘তস্সেৰ অযোনিসো মনসিকরোতো ছন্নং দিট্ঠীনং অঞ্ঞতরা দিট্ঠি উপ্পজ্জতি, অত্থি মে অত্তাতি অস্স সচ্চতো থেততো দিট্ঠি উপ্পজ্জতী’’তিআদি (ম. নি. ১.১৯). সমুট্ঠাতি এতেনাতি সমুট্ঠানং, তস্স ভাৰো সমুট্ঠানট্ঠো, তেন. খণিকত্থঙ্গমো খণিকনিরোধো. পচ্চযত্থঙ্গমো অৰিজ্জাদীনং অচ্চন্তনিরোধো. সো পন যেন হোতি, তং দস্সেন্তো ‘‘সোতাপত্তিমগ্গো’’তি আহ. চত্তারো হি অরিযমগ্গা যথারহং তস্স তস্স সঙ্খারগতস্স অচ্চন্তনিরোধহেতু, খণিকনিরোধো পন অহেতুকো.

আনিসংসন্তি উদযং. সো পন দিট্ঠধম্মিকসম্পরাযিকৰসেন দুৰিধো. তত্থ সম্পরাযিকো দুগ্গতিপরিকিলেসতাযআদীনৰপক্খিকো এৰাতি ইতরং দস্সেন্তো ‘‘যং সন্ধাযা’’তিআদিমাহ. আদীনৰম্পি দিট্ঠধম্মিকমেৰ দস্সেন্তো ‘‘দিট্ঠিগ্গহণমূলকং উপদ্দৰ’’ন্তিআদিমাহ. সোতিআদীনৰো. আদীনন্তি আদি-সদ্দেন নগ্গিযানসনসঙ্কটিৰতাদীনং সঙ্গহো. নিস্সরতি এতেনাতি নিস্সরণন্তি ৰুচ্চমানে দস্সনমগ্গো এৰ দিট্ঠীনং নিস্সরণং সিযা, তস্স পন অত্থঙ্গমপরিযাযেন গহিতত্তা সব্বসঙ্খতনিস্সটং নিব্বানং দিট্ঠীহিপি নিস্সটন্তি কত্ৰা ৰুত্তং ‘‘দিট্ঠীনং নিস্সরণং নাম নিব্বান’’ন্তি. ইমিনাতিআদীসু ৰত্তব্বং অনুযোগৰত্তে ৰুত্তনযমেৰ.

১৪৩. দিট্ঠিচ্ছেদনং দস্সেন্তোতি সব্বুপাদানপরিঞ্ঞাদস্সনেন সব্বসো দিট্ঠীনং সমুচ্ছেদৰিধিং দস্সেন্তো. ৰুত্তাযেৰাতি –

‘‘উপাদানানি চত্তারি, তানি অত্থৰিভাগতো;

ধম্মসঙ্খেপৰিত্থারা, কমতো চ ৰিভাৰযে’’তি. (ৰিসুদ্ধি. ২.৬৪৫) –

গাথং উদ্দিসিত্ৰা অত্থৰিভাগাদিৰসেন ৰুত্তাযেৰ. কামং ইতো বাহিরকানং ‘‘ইমানি উপাদানানি এত্তকানি চত্তারি, ন ইতো ভিয্যো’’তি ঈদিসং ঞাণং নত্থি, কেৰলং পন কেচি ‘‘কামা পহাতব্বা’’তি ৰদন্তি, কেচি ‘‘নত্থি পরো লোকোতি চ, মিচ্ছা’’তি ৰদন্তি, অপরে ‘‘সীলব্বতেন সুদ্ধীতি চ, মিচ্ছা’’তি ৰদন্তি, অত্তদিট্ঠিযা পন মিচ্ছাভাৰং সব্বসো ন জানন্তি এৰ. যত্তকং পন জানন্তি, তস্সপি অচ্চন্তপ্পহানং ন জানন্তি, তথাপি সব্বস্স পরিঞ্ঞেয্যস্স পরিঞ্ঞেয্যং পঞ্ঞপেমইচ্চেৰ তিট্ঠন্তি. এৰংভূতানং পন নেসং তত্থ যাদিসী পটিপত্তি, তং দস্সেন্তো সত্থা ‘‘সন্তি, ভিক্খৰে’’তিআদিমাহ. তত্থ সন্তীতি সংৰিজ্জন্তি. তেন তেসং দিট্ঠিগতিকানং ৰিজ্জমানতায অৰিচ্ছেদতং দস্সেতি. একেতি একচ্চে. সমণব্রাহ্মণাতি পব্বজ্জুপগমনেন সমণা, জাতিমত্তেন চ ব্রাহ্মণা. সব্বেসন্তি অনৰসেসানং উপাদানানং সমতিক্কমং পহানং. সম্মা ন পঞ্ঞপেন্তীতি যেসং পঞ্ঞপেন্তি, তেসম্পি সম্মা পরিঞ্ঞং ন পঞ্ঞপেন্তি. ইদানি তং অত্থং ৰিত্থারতো দস্সেতুং ‘‘কেচী’’তিআদি ৰুত্তং. তত্থ হোতিক-কুটীচক-বহূদক-হংস-পরমহংস-কাজক-তিদণ্ড-মোনৰত-সেৰ-পারুপক-পঞ্চমরত্তিক- সোমকারক-মুগব্বত-চরবাক-তাপস-নিগন্থা-জীৰক-ইসি-পারাযনিক-পঞ্চাতপিক-কাপিল- কাণাদ-সংসারমোচক-অগ্গিভত্তিক-মগৰতিক-গোৰতিক-কুক্কুরৰতিক-কামণ্ডলুক- ৰগ্গুলিৰতিক-একসাটক-ওদকসুদ্ধিক-সরীরসন্তাপক-সীলসুদ্ধিক-ঝানসুদ্ধিক-চতুব্বিধ- সস্সতৰাদাদযো ছন্নৰুতি তণ্হাপাসেন ডংসনতো, অরিযধম্মস্স ৰা ৰিবাধনতো পাসণ্ডা. ৰত্থুপটিসেৰনং কামন্তি ব্যাপারস্স ৰত্থুনো পটিসেৰনসঙ্খাতং কামং. থেয্যেন সেৰন্তীতি পটিহত্থআদিসমঞ্ঞায লোকস্স ৰচনৰসেন সেৰন্তি. তীণি কারণানীতি ‘‘নত্থি দিন্ন’’ন্তিআদিনযপ্পৰত্তানি দিট্ঠিৰিসেসভূতানি ৰট্টকারণানি.

অত্থসল্লাপিকাতি অত্থস্স সল্লাপিকা, দ্ৰিন্নং অধিপ্পেতত্থসল্লাপৰিভাৰিনীতি অধিপ্পাযো. দ্ৰিন্নঞ্হি ৰচনং সল্লাপো. তেনাহ ‘‘পথৰী কিরা’’তিআদি.

যো তিত্থিযানং অত্তনো সত্থরি ধম্মে সহধম্মিকেসু চ পসাদো ৰুত্তো, তস্স অনাযতনগতত্তা অপ্পসাদকভাৰদস্সনং পসাদপচ্ছেদো. তথাপৰত্তো ৰাদো পসাদপচ্ছেদৰাদো ৰুত্তো. এৰরূপেতি ঈদিসে ৰুত্তনযেন কিলেসানং অনুপসমসংৰত্তনিকে. ধম্মেতি ধম্মপতিরূপকে. ৰিনযেতি ৰিনযপতিরূপকে. তিত্থিযা হি কোহঞ্ঞে ঠত্ৰা লোকং ৰঞ্চেন্তা ধম্মং কথেমাতি ‘‘সত্তিমে কাযা অকটা অকটৰিধা’’তিআদিনা (দী. নি. ১.১৭৪) যং কিঞ্চি কথেত্ৰা তথা ‘‘ৰিনযং পঞ্ঞপেমা’’তি গোসীলৰগ্গুলিৰতাদীনি পঞ্ঞপেত্ৰা তাদিসং সাৰকে সিক্খাপেত্ৰা ‘‘ধম্মৰিনযো’’তি কথেন্তি, তং সন্ধাযেতং ৰুত্তং ‘‘ধম্মৰিনযে’’তি. তেনাহ ‘‘উভযেনপি অনিয্যানিকং সাসনং দস্সেতী’’তি. পরিত্তম্পি নাম পুঞ্ঞং কাতুকামং মচ্ছেরমলাভিভূততায নিৰারেন্তস্স অন্তরাযং তস্স করোতো দিট্ঠেৰ ধম্মে ৰিঞ্ঞূহি গরহিতব্বতা সম্পরাযে চ দুগ্গতি পাটিকঙ্খা, কিমঙ্গং পন সকলৰট্টদুক্খনিস্সরণাৰহে জিনচক্কে পহারদাযিনো তিত্থকরস্স তদোৰাদকরস্স চাতি ইমমত্থং দস্সেন্তো ‘‘অনিয্যানিকসাসনম্হি হী’’তিআদিমাহ. যথা সো পসাদো সম্পরাযে ন সম্মগ্গতো অত্তনো পৰত্তিৰসেনাতি দস্সেন্তো ‘‘কঞ্চি কালং গন্ত্ৰাপি পচ্ছা ৰিনস্সতি যেৰা’’তি আহ, অৰেচ্চপ্পসাদো ৰিয অচ্চন্তিকো ন হোতীতি অত্থো.

সম্পজ্জমানা যথাৰিধিপটিপত্তিযা তিরচ্ছানযোনিং আৰহতি. কম্মসরিক্খকেন হি ৰিপাকেনেৰ ভৰিতব্বং. সব্বম্পি কারণভেদন্তি সব্বম্পি যথাৰুত্তং তিত্থকরানং সাৰকানং অপাযদুক্খাৰহং মিচ্ছাপটিপত্তিসঙ্খাতং কারণৰিসেসং. সো পনেস পসাদো ন নিয্যাতি মিচ্ছত্তপক্খিকত্তা সুরাপীতসিঙ্গালে পসাদো ৰিয. সুরং পরিস্সাৰেত্ৰা ছড্ডিতকসটং সুরাজল্লিকং. ব্রাহ্মণা নাম ধনলুদ্ধাতি অধিপ্পাযেনাহ ‘‘ইমং ৰঞ্চেস্সামী’’তি. কংসসতাতি কহাপণসতা.

১৪৪. তস্সাতি পসাদস্স. সব্বোপি লোভো কামুপাদানন্তেৰ ৰুচ্চতীতি আহ ‘‘অরহত্তমগ্গেন কামুপাদানস্স পহানপরিঞ্ঞ’’ন্তি. এৰরূপেতি ঈদিসে সব্বসো কিলেসানং উপসমসংৰত্তনিকে. যথানুসিট্ঠং পটিপজ্জমানানং অপাযেসু অপতনৰসেন ধারণট্ঠেন ধম্মে. সব্বসো ৰিনযনট্ঠেন ৰিনযে. তত্থ ভৰদুক্খনিস্সরণায সংৰত্তনে.

নমস্সমানো অট্ঠাসি দ্ৰে অসঙ্খ্যেয্যানি পচ্চেকবোধিপারমীনং পূরণেন তত্থ বুদ্ধসাসনে পরিচযেন চ ভগৰতি পসন্নচিত্ততায চ. ‘‘উলূকা’’ত্যাদিগাথা রুক্খদেৰতায ভাসিতা. কালুট্ঠিতন্তি সাযন্হকালে দিৰাৰিহারতো উট্ঠিতং. দুগ্গতেসো ন গচ্ছতীতি দুগ্গতিং এসো ন গমিস্সতি. মোরজিকো মুরজৰাদকো. মহাভেরিৰাদকৰত্থুআদীনিপি সিতপাতুকরণং আদিং কত্ৰা ৰিত্থারেতব্বানি.

পরমত্থেতি লোকুত্তরধম্মে. কিং পন ৰত্তব্বন্তি ধম্মেপি পরমত্থে নিমিত্তং গহেত্ৰা সুণন্তানং. সামণেরৰত্থূতি পব্বজিতদিৰসেযেৰ সপ্পেন দট্ঠো হুত্ৰা কালং কত্ৰা দেৰলোকং উপপন্নসামণেরৰত্থু.

খীরোদনন্তি খীরেন সদ্ধিং সম্মিস্সং ওদনং. তিম্বরুসকন্তি তিন্দুকফলং. তিপুসসদিসা একা ৰল্লিজাতি তিম্বরুসং, তস্স ফলং তিম্বরুসকন্তি চ ৰদন্তি. কক্কারিকন্তি খুদ্দকএলাল়ুকং. মহাতিপুসন্তি চ ৰদন্তি. ৰল্লিপক্কন্তি খুদ্দকতিপুসৰল্লিযা ফলং. হত্থপতাপকন্তি মন্দামুখি. অম্বকঞ্জিকন্তি অম্বিলকঞ্জিকং. খল়যাগুন্তিপি ৰদন্তি. দোণিনিম্মজ্জনিন্তি সতেলং তিলপিঞ্ঞাকং. ৰিধুপনন্তি চতুরস্সবীজনিং. তালৰণ্টন্তি তালপত্তেহি কতমণ্ডলবীজনিং. মোরহত্থন্তি মোরপিঞ্ছেহি কতং মকসবীজনিং.

ৰুত্তনযানুসারেনেৰাতি যস্মা ইধাপি যথাৰুত্তং সব্বম্পি কারণভেদং একতো কত্ৰা দস্সেন্তো সত্থা ‘‘তং কিস্স হেতূ’’ন্তিআদিমাহ, তস্মা তত্থ অনিয্যানিকসাসনে ৰুত্তনযস্স অনুস্সরণৰসেন যোজেত্ৰা ৰেদিতব্বং.

১৪৫. পরিঞ্ঞন্তি পহানপরিঞ্ঞং. তেসং পচ্চযং দস্সেতুন্তি উপাদানানং পরিঞ্ঞা নাম পহানপরিঞ্ঞা. তেসং অচ্চন্তনিরোধো অধিপ্পেতো, সো চ পচ্চযনিরোধেন হোতীতি তেসং পচ্চযং মূলকারণতো পভুতি দস্সেতুং. অযন্তি ইদানি ৰুচ্চমানো এত্থ ‘‘ইমে চা’’তিআদিপাঠে ‘‘কিং নিদানা’’তিআদিসমাসপদানং অত্থো. সব্বপদেসূতি ‘‘তণ্হাসমুদযা’’তিআদীসু সব্বেসু পদেসু. ইমিনা এৰ চ সব্বগ্গহণেন ‘‘ফস্সনিদানা’’তিআদীনম্পি পদানং সঙ্গহো দট্ঠব্বো. ইমে অঞ্ঞতিত্থিযা উপাদানানম্পি সমুদযং ন জানন্তি, কুতো নিরোধং, তথাগতো পন তেসং তপ্পচ্চযপচ্চযানম্পি সমুদযঞ্চ অত্থঙ্গমঞ্চ যাথাৰতো জানাতি, তস্মা – ‘‘ইধেৰ, ভিক্খৰে, সমণো…পে… সুঞ্ঞা পরপ্পৰাদা সমণেভি অঞ্ঞেহী’’তি (ম. নি. ১.১৩৯) যথারদ্ধসীহনাদং মত্থকং পাপেত্ৰা দস্সেন্তো ‘‘ইমে চ, ভিক্খৰে, চত্তারো উপাদানা’’তিআদিনা (ম. নি. ১.১৪৫) নযেন দেসনং পটিচ্চসমুপ্পাদমুখেন ওতারেন্তো ৰট্টং দস্সেত্ৰা ‘‘যতো চ খো’’তিআদিনা ৰিৰট্টং দস্সেন্তো অরহত্তেন দেসনায কূটং গণ্হি, তমত্থং দস্সেন্তো ‘‘যস্মা পন ভগৰা’’তিআদিমাহ. তং সুৰিঞ্ঞেয্যমেৰ.

চূল়সীহনাদসুত্তৰণ্ণনায লীনত্থপ্পকাসনা সমত্তা.

২. মহাসীহনাদসুত্তৰণ্ণনা

ৰেসালীনগরৰণ্ণনা

১৪৬. অপরাপরন্তি পুনপ্পুনং. ৰিসালীভূততাযাতি গাৰুতন্তরং গাৰুতন্তরং পুথুভূততায. তত্রাতি তস্সং ৰিসালীভূততাযং. ছড্ডিতমত্তেতি ৰিস্সট্ঠমত্তে. ঊমিভযাদীহীতি ঊমিকুম্ভীলআৰট্টসংসুকাভযেহি. উদকপ্পৰাহেনাগতস্সপি চ উস্মা ন ৰিগচ্ছতি, উস্মা চ নাম ঈদিসস্স সৰিঞ্ঞাণকতায ভৰেয্যাতি ‘‘সিযা গব্ভো’’তি চিন্তেসি. তথা হীতিআদি তত্থ কারণচিন্তা. পুঞ্ঞৰন্ততায দুগ্গন্ধং নাহোসি, সউসুমতায পূতিকভাৰো. দারকানং পুঞ্ঞূপনিস্সযতো অঙ্গুট্ঠকতো চস্স খীরং নিব্বত্তি, খীরভত্তঞ্চ লভি. চরিমকভৰে বোধিসত্তে কুচ্ছিগতে বোধিসত্তমাতু ৰিয উদরচ্ছৰিযা অচ্ছৰিপ্পসন্নতায নিচ্ছৰি ৰিযাতি কত্ৰা আহ ‘‘নিচ্ছৰী অহেসু’’ন্তি. তেসন্তি দ্ৰিন্নং দারকানং. মাতাপিতরোতি পোসকমাতাপিতরো. অভিসিঞ্চিত্ৰা রাজানং অকংসু রজ্জসম্পত্তিযা দাযকস্স কম্মস্স কতত্তা, অসম্ভিন্নে এৰ রাজকুলে উপ্পন্নত্তা চ. কুমারস্স পুঞ্ঞানুভাৰসঞ্চোদিতা দেৰতাধিগ্গহিতাতি কেচি.

পুরস্স অপরেতি পুরস্স অপরদিসায গাৰুতমত্তে ঠানে জীৰকম্বৰনং ৰিয সপাকারমন্দিরকে. অচিরপক্কন্তোতি এত্থ ন দেসন্তরপক্কমনং অধিপ্পেতং, অথ খো সাসনতো অপক্কমনন্তি দস্সেন্তো ‘‘ৰিব্ভমিত্ৰা’’তিআদিমাহ. তেনেৰাহ ‘‘ইমস্মা ধম্মৰিনযা’’তি. পরিসতীতি পরিসাযং, জনসমূহেতি অত্থো. জনসমূহগতো পন ‘‘পরিসমজ্ঝে’’তি ৰুত্তো. ভাৰনামনসিকারেন ৰিনা পকতিযাৰ মনুস্সেহি নিব্বত্তেতব্বো ধম্মোতি মনুস্সধম্মো, মনুস্সত্তভাৰাৰহো ৰা ধম্মো মনুস্সধম্মো, অনুল়ারং পরিত্তকুসলং. যং অসতিপি বুদ্ধুপ্পাদে ৰত্ততি, যঞ্চ সন্ধাযাহ ‘‘হীনেন ব্রহ্মচরিযেন, খত্তিযে উপপজ্জতী’’তি. ‘‘অম্হাকং বুদ্ধো’’তি বুদ্ধে মমত্তকারিনো বুদ্ধমামকা. সেসপদদ্ৰযেপি এসেৰ নযো.

উত্তরিমনুস্সধম্মাদিৰণ্ণনা

অলং অরিযায অরিযভাৰাযাতি অলমরিযো, রূপাযতনং জানাতি চক্খুৰিঞ্ঞাণং ৰিয পস্সতি চাতি ঞাণদস্সনং, দিব্বচক্খু. সম্মসনুপগে চ পন ধম্মে লক্খণত্তযঞ্চ তথা জানাতি পস্সতি চাতি ঞাণদস্সনং, ৰিপস্সনা. নিব্বানং, চত্তারি ৰা সচ্চানি অসম্মোহপটিৰেধতো জানাতি পস্সতি চাতি ঞাণদস্সনং, মগ্গো. ফলং পন নিব্বানৰসেনেৰ যোজেতব্বং. পচ্চৰেক্খণা মগ্গাধিগতস্স অত্থস্স পচ্চক্খতো জাননট্ঠেন ঞাণদস্সনং, সব্বঞ্ঞুতা অনাৰরণতায সমন্তচক্খুতায চ ঞাণদস্সনং. লোকুত্তরমগ্গো অধিপ্পেতো, তস্মিঞ্হি পটিসিদ্ধে সব্বেসম্পি বুদ্ধগুণানং অসম্ভৰোতি অধিপ্পাযো. তেনাহ ‘‘তঞ্হি সো ভগৰতো পটিসেধেতী’’তি.

সুখুমং ধম্মন্তরং নাম ঝানৰিপস্সনাদিকং আচরিযানুগ্গহেন গহিতং নাম নত্থি. তক্কপরিযাহতন্তি ‘‘ইতি ভৰিস্সতি, এৰং ভৰিস্সতী’’তি তংতংদস্সেতব্বমত্থতক্কনেন ৰিতক্কনমত্তেন পরিতো আহতং পরিৰত্তিতং কত্ৰা. তেনাহ ‘‘তক্কেত্ৰা’’তিআদি. লোকিযপঞ্ঞং অনুজানাতি উপনিসিন্নপরিসায অনুকূলধম্মকথনতোতি অধিপ্পাযো. তেনাহ ‘‘সমণো গোতমো’’তিআদি. পটিভাতীতি পটিভানং, ‘‘ইতি ৰক্খামী’’তি এৰংপৰত্তং কথনচিত্তং, ততো পটিভানতো জাননং পটিভানং, আগমাভাৰতো সযমেৰ উপট্ঠিতত্তা সযংপটিভানং. তেনাহ ‘‘ইমিনাস্স ধম্মেসু পচ্চক্খভাৰং পটিবাহতী’’তি. সুফুসিতন্তি নিব্বিৰরং. অফুসিতত্তে হি সুখেন ৰচীঘোসো ন নিচ্ছরতি. দন্তাৰরণন্তি ওট্ঠদ্ৰযং. জিৰ্হাপি থদ্ধতায সুখেন ৰচীঘোসো ন নিচ্ছরতীতি আহ ‘‘মুদুকা জিৰ্হা’’তি. করৰীকরুতমঞ্জুতায মধুরো সরো. এলং ৰুচ্চতি দোসো, এলং গল়তীতি এলগল়া, ন এলগল়া অনেলগল়া, নিদ্দোসা, ন রুজ্ঝতীতি অত্থো. সব্বমেতং রঞ্জনস্সেৰ কারণং দস্সেন্তো ৰদতি.

পঞ্চ ধম্মাতি গম্ভীরঞাণচরিযভূতানং খন্ধাদীনং উগ্গহণ-সৰন-ধারণ-পরিচয-যোনিসোমনসিকারে সন্ধাযাহ. তক্করস্স সম্মা দুক্খক্খযাযাতি এত্থ সম্মা-সদ্দো উভযত্থাপি যোজেতব্বো ‘‘সম্মা তক্করস্স সম্মা দুক্খক্খযাযা’’তি. যো হি সম্মা ধম্মং পটিপজ্জতি, তস্সেৰ সম্মা দুক্খক্খযো হোতি. যো পন ৰুত্তনযেন তক্করো, তস্স নিয্যানং অত্থতো ধম্মস্সেৰ নিয্যানন্তি আহ ‘‘সো ধম্মো…পে… নিয্যাতি গচ্ছতী’’তি.

১৪৭. কোধনোতি কুজ্ঝনসীলো. যস্মা পন সুনক্খত্তো কোধৰসেন কুরূরো ফরুসৰচনো চ, তস্মা আহ ‘‘কোধনোতি চণ্ডো ফরুসো চা’’তি. তস্মিং অত্তভাৰে মগ্গফলানং উপনিস্সযো নত্থীতি তস্মিং অত্তভাৰে উপ্পজ্জনারহানং মগ্গফলানং উপনিস্সযো নত্থি. তং বুদ্ধা ‘‘মোঘপুরিসো’’তি ৰদন্তি যথা তং সুদিন্নলাল়ুদাযিআদিকে. উপনিস্সযে সতিপি তস্মিং খণে মগ্গে ৰা ফলে ৰা অসতি ‘‘মোঘপুরিসো’’তি ৰদন্তি যথা তং ধনিযূপসেনত্থেরাদিকে. সমুচ্ছিন্নোপনিস্সযে পন ৰত্তব্বমেৰ নত্থি. যথা ‘‘মক্খলি মোঘপুরিসো মনুস্সখিপ্পং মঞ্ঞে’’তি (অ. নি. ১.৩১১) তথা সুনক্খত্তোপীতি আহ ‘‘ইমস্স পনা’’তিআদি. অস্সাতি এতেন. কত্তরি হিদং সামিৰচনং. কোধেনাতি কোধহেতুনা.

ভগৰতোতি সম্পদানৰচনং কুদ্ধপদাপেক্খায. পুব্বেতি ভিক্খুকালে. সদ্দং সোতুকামোতি সো কির দিব্বচক্খুনা তাৰতিংসভৰনে দেৰতানং রূপং পস্সন্তো ওট্ঠচলনং পস্সতি, ন পন সদ্দং সুণাতি, তস্মা তাসং সদ্দং সোতুকামো অহোসি. তেন ৰুত্তং ‘‘সদ্দং সোতুকামো…পে… পুচ্ছী’’তি. সো চ অতীতে একং সীলৰন্তং ভিক্খুং কণ্ণসক্খলিযং পহরিত্ৰা বধিরমকাসি, তস্মা পরিকম্মং করোন্তোপি অভব্বোৰ দিব্বসোতাধিগমায. তং সন্ধায ৰুত্তং ‘‘উপনিস্সযো নত্থীতি ঞত্ৰা পরিকম্মং ন কথেসী’’তি. চিন্তেসীতি অত্তনো মিচ্ছাপরিৰিতক্কিতেন অযোনিসো উম্মুজ্জন্তো চিন্তেসি.

নিয্যানিকত্তাৰবোধনতো অভেদোপচারেন ‘‘দেসনাধম্মো নিয্যানিকো’’তি ৰুত্তো. নিয্যানো ৰা অরিযমগ্গো বোধেতব্বো এতস্স অত্থীতি নিয্যানিকো দেসনাধম্মো. অত্তনি অত্থিতং দস্সেতি কিচ্চসিদ্ধিদস্সনেন তত্থ তত্থ পাকটীকতত্তা, ন পটিঞ্ঞামত্তেন. তথা হি যথাপরাধং তংতংসিক্খাপদপঞ্ঞত্তিযা যথাধম্মং ৰেনেয্যজ্ঝাসযানুরূপঞ্চ অৰিপরীতধম্মদেসনায দেৰমনুস্সেহি যথাভিসঙ্খতপঞ্হানং তদজ্ঝাসযানুকূলং ঠানসো ৰিস্সজ্জনেন চ ভগৰতো সব্বত্থ অপ্পটিহতঞাণচারভাৰেন সব্বঞ্ঞুতঞ্ঞাণং ৰিঞ্ঞূনং পাকটং, তথা তত্থ তত্থ যমকপাটিহারিযকরণাদীসু ইদ্ধিৰিধঞাণাদীনীতি. তেনাহ ‘‘ময্হঞ্চা’’তিআদি. অন্ৰেতি যথাগহিতসঙ্কেতস্স অনুগমনৰসেন এতি জানাতীতি অন্ৰযো. তেনাহ ‘‘অনুবুজ্ঝতীতি অত্থো’’তি. সঙ্কেতানুগমনঞ্চেত্থ ‘‘যথাপরাধং তংতংসিক্খাপদপঞ্ঞত্তিযা’’তিআদিনা ৰুত্তনযমেৰ. এৰং যোজনা ৰেদিতব্বাতি যথা সব্বঞ্ঞুতঞ্ঞাণেন যোজনা কতা, এৰং ‘‘এৰরূপম্পি নাম ময্হং ইদ্ধিৰিধঞাণসঙ্খাতং উত্তরিমনুস্সধম্ম’’ন্তিআদিনা তত্থ তত্থ যোজনা ৰেদিতব্বা.

উত্তরিমনুস্সধম্মাদিৰণ্ণনা নিট্ঠিতা.

দসবলঞাণৰণ্ণনা

১৪৮. যদিপি আদিতো অভিঞ্ঞাত্তযৰসেন দেসনায আগতত্তা চেতোপরিযঞাণানন্তরং উপরি তিস্সো অভিঞ্ঞা ৰত্তব্বা সিযুন্তি ৰত্তব্বং সিযা, অত্থতো পন ৰিজ্জাত্তযং যথাৰুত্তঅভিঞ্ঞাত্তযমেৰাতি কত্ৰা ‘‘তিস্সো ৰিজ্জা ৰত্তব্বা সিযু’’ন্তি ৰুত্তং. কস্মা পনেত্থ ‘‘তাসু ৰুত্তাসু উপরি দসবলঞাণং ন পরিপূরতী’’তি ৰুত্তং, ননু ইমানি ঞাণানি সেসাভিঞ্ঞা ৰিয অত্তনো ৰিসযস্স অভিজাননট্ঠং উপাদায অভিঞ্ঞাসু ৰত্তব্বানি, অকম্পিযট্ঠং পন উপত্থম্ভনট্ঠঞ্চ উপাদায বলঞাণেসু যথা সম্মাসতিআদযো ইন্দ্রিযবলবোজ্ঝঙ্গমগ্গঙ্গেসূতি? নযিদমেৰং. তত্থ হি ধম্মানং ধম্মকিচ্চৰিসেসৰিভাৰনপরায দেসনায ৰুত্তং, ইধ পন সত্থু গুণৰিসেসৰিভাৰনপরায দেসনায তথা ৰত্তুং ন সক্কা অত্থতো অনঞ্ঞত্তা, একচ্চানং পুথুজ্জনানং এৰং চিত্তং উপ্পজ্জেয্য ‘‘কিমিদং ভগৰা হেট্ঠা ৰুত্তগুণে পুনপি গণ্হন্তো গুণাধিকদস্সনং করোতী’’তি. তস্মা সুৰুত্তমেতং ‘‘উপরি দসবলঞাণং ন পরিপূরতী’’তি.

অঞ্ঞেহি অসাধারণানীতি কস্মা ৰুত্তং (অ. নি. টী. ৩.১০.২১), ননু চেতানি সাৰকানম্পি একচ্চানং উপ্পজ্জন্তীতি? কামং উপ্পজ্জন্তি, যাদিসানি পন বুদ্ধানং ঠানাট্ঠানঞাণাদীনি, ন তাদিসানি তদঞ্ঞেসং কদাচিপি উপ্পজ্জন্তীতি অঞ্ঞেহি অসাধারণানীতি. তেনাহ ‘‘তথাগতস্সেৰ বলানী’’তি. ইমমেৰ হি যথাৰুত্তলেসং অপেক্খিত্ৰা তদভাৰতো আসযানুসযঞাণাদীসু এৰ অসাধারণগুণসমঞ্ঞা নিরুল়্হা. কামং ঞাণবলানং ঞাণসম্ভারো ৰিসেসপচ্চযো, পুঞ্ঞসম্ভারোপি পন নেসং পচ্চযো এৰ, ঞাণসম্ভারস্সপি ৰা পুঞ্ঞসম্ভারভাৰতো ‘‘পুঞ্ঞুস্সযসম্পত্তিযা আগতানী’’তি ৰুত্তং.

পকতিহত্থিকুলন্তি (সং. নি. ২.২২) গিরিচরনদীচরৰনচরাদিপ্পভেদা গোচরিযকালাৰকনামা সব্বাপি বলেন পাকতিকা হত্থিজাতি. দসন্নং পুরিসানন্তি থামমজ্ঝিমানং দসন্নং পুরিসানং. একস্স তথাগতস্স কাযবলন্তি আনেত্ৰা সম্বন্ধো. একস্সাতি চ তথা হেট্ঠাকথাযং আগতত্তা দেসনাসোতেন ৰুত্তং. নারাযনসঙ্ঘাতবলন্তি এত্থ নারা ৰুচ্চন্তি রস্মিযো, তা বহূ নানাৰিধা ইতো উপ্পজ্জন্তীতি নারাযনং, ৰজিরং, তস্মা নারাযনসঙ্ঘাতবলন্তি ৰজিরসঙ্ঘাতবলন্তি অত্থো. ঞাণবলং পন পাল়িযং আগতমেৰ, ন কাযবলং ৰিয অট্ঠকথারুল়্হমেৰাতি অধিপ্পাযো. ‘‘সংযুত্তকে আগতানি তেসত্ততি ঞাণানি সত্তসত্ততি ঞাণানী’’তি ৰুত্তং (ৰিভ. মূলটী. ৭৬০), তত্থ পন নিদানৰগ্গে সত্তসত্ততি আগতানি চতুচত্তারীসঞ্চ, তেসত্ততি পন পটিসম্ভিদামগ্গে (পটি. ম. ১.৭৩ মাতিকা) সুতমযাদীনি আগতানি দিস্সন্তি, ন সংযুত্তকে. অঞ্ঞানিপীতি এতেন ঞাণৰত্থুৰিভঙ্গে এককাদিৰসেন ৰুত্তানি, অঞ্ঞত্থ চ ‘‘পুব্বন্তে ঞাণ’’ন্তিআদিনা (ধ. স. ১০৭৬) ব্রহ্মজালাদীসু (দী. নি. ১.৩৬) চ ‘‘তযিদং তথাগতো পজানাতি, ইমানি দিট্ঠিট্ঠানানি এৰং গহিতানী’’তিআদিনা ৰুত্তানি অনেকানি ঞাণপ্পভেদানি সঙ্গণ্হাতি. যাথাৰপটিৰেধতো সযঞ্চ অকম্পিযং পুগ্গলঞ্চ তংসমঙ্গিং নেয্যেসু অধিবলং করোতীতি আহ ‘‘অকম্পিযট্ঠেন উপত্থম্ভনট্ঠেন চা’’তি.

উসভস্স ইদন্তি আসভং, (অ. নি. টী. ২.৪.৮) সেট্ঠং ঠানং. সব্বঞ্ঞুতপটিজাননৰসেন অভিমুখং গচ্ছন্তি, অট্ঠ ৰা পরিসা উপসঙ্কমন্তীতি আসভা, পুব্ববুদ্ধা. ইদং পনাতি বুদ্ধানং ঠানং সব্বঞ্ঞুতমেৰ ৰদতি. তিট্ঠমানোৰাতি অৰদন্তোপি (সং. নি. টী. ২.২.২২) তিট্ঠমানোৰ পটিজানাতি নামাতি অত্থো. উপগচ্ছতীতি অনুজানাতি.

অট্ঠসু পরিসাসূতি ‘‘অভিজানামি খো পনাহং, সারিপুত্ত, অনেকসতং খত্তিযপরিসং…পে… তত্র ৰত মং ভযং ৰা সারজ্জং ৰা ওক্কমিস্সতীতি নিমিত্তমেতং, সারিপুত্ত, ন সমনুপস্সামী’’তি (ম. নি. ১.১৫১) ৰুত্তাসু অট্ঠসু পরিসাসু. অভীতনাদং নদতীতি পরতো দস্সিতঞাণযোগেন দসবলোহন্তি অভীতনাদং নদতি. সীহনাদসুত্তেন খন্ধৰগ্গে (সং. নি. ৩.৭৮) আগতেন.

‘‘দেৰমনুস্সানং চতুচক্কং ৰত্ততী’’তি (অ. নি. ৪.৩১) সুত্তসেসেন সপ্পুরিসূপস্সযাদীনং ফলসম্পত্তিপৰত্তি, পুরিমসপ্পুরিসূপস্সযাদিং উপনিস্সায পচ্ছিমসপ্পুরিসূপস্সযাদীনং সম্পত্তিপৰত্তি ৰা ৰুত্তাতি আদি-সদ্দেন তত্থ চ চক্ক-সদ্দস্স গহণং ৰেদিতব্বং. ৰিচক্কসণ্ঠানা অসনি এৰ অসনিৰিচক্কং. উরচক্কাদীসূতি আদি-সদ্দেন আণাসমূহাদীসুপি চক্ক-সদ্দস্স পৰত্তি ৰেদিতব্বা. ‘‘সঙ্ঘভেদং করিস্সাম চক্কভেদ’’ন্তিআদীসু (পারা. ৪০৯; চূল়ৰ. ৩৪৩) হি আণা ‘‘চক্ক’’ন্তি ৰুত্তা, ‘‘দেৰচক্কং অসুরচক্ক’’ন্তিআদীসু (অ. নি. টী. ২.৪.৮) সমূহোতি. পটিৰেধনিট্ঠত্তা অরহত্তমগ্গঞাণং পটিৰেধোতি ‘‘ফলক্খণে উপ্পন্নং নামা’’তি ৰুত্তং. তেন পটিলদ্ধস্সপি দেসনাঞাণস্স কিচ্চনিপ্ফত্তি পরস্স বুজ্ঝনমত্তেন হোতীতি ‘‘অঞ্ঞাতকোণ্ডঞ্ঞস্স সোতাপত্তি…পে… ফলক্খণে পৰত্তং নামা’’তি ৰুত্তং. ততো পরং পন যাৰ পরিনিব্বানা দেসনাঞাণপ্পৰত্তি তস্সেৰ পৰত্তিতস্স ধম্মচক্কস্স ঠানন্তি ৰেদিতব্বং পৰত্তিতচক্কস্স চক্কৰত্তিনো চক্করতনস্স ঠানং ৰিয.

‘‘তিট্ঠতী’’তি ৰুত্তং, কিং ভূমিযং পুরিসো ৰিয? নোতি আহ ‘‘তদাযত্তৰুত্তিতাযা’’তি. ঠানন্তি চেত্থ অত্তলাভো ধরমানতা চ, ন গতিনিৰত্তীতি আহ ‘‘উপ্পজ্জতি চেৰ পৰত্ততি চা’’তি. যত্থ পনেতং দসবলঞাণং ৰিত্থারিতং, তং দস্সেন্তো ‘‘অভিধম্মে পনা’’তিআদিমাহ. সেসেসুপি এসেৰ নযো.

সমাদিযন্তীতি সমাদানানি, তানি পন সমাদিযিত্ৰা কতানি হোন্তীতি আহ ‘‘সমাদিযিত্ৰা কতান’’ন্তি. কম্মমেৰ ৰা কম্মসমাদানন্তি এতেন সমাদানসদ্দস্স অপুব্বত্থাভাৰং দস্সেতি মুত্তগতসদ্দে গতসদ্দস্স ৰিয. গতীতি নিরযাদিগতিযো. উপধীতি অত্তভাৰো. কালোতি কম্মস্স ৰিপচ্চনারহকালো. পযোগোতি ৰিপাকুপ্পত্তিযা পচ্চযভূতা কিরিযা.

অগতিগামিনিন্তি নিব্বানগামিনিং. ৰক্খতি হি ‘‘নিব্বানঞ্চাহং, সারিপুত্ত, পজানামি নিব্বানগামিঞ্চ মগ্গং নিব্বানগামিনিঞ্চ পটিপদ’’ন্তি (ম. নি. ১.১৫৩). বহূসুপি মনুস্সেসু একমেৰ পাণং ঘাতেন্তেসু কামং সব্বেসং চেতনা তস্সেৰেকস্স জীৰিতিন্দ্রিযারম্মণা, তং পন কম্মং তেসং নানাকারং. তেসু (ৰিভ. অট্ঠ. ৮১১) হি একো আদরেন ছন্দজাতো করোতি, একো ‘‘এহি ত্ৰম্পি করোহী’’তি পরেহি নিপ্পীল়িতো করোতি, একো সমানচ্ছন্দো ৰিয হুত্ৰা অপ্পটিবাহমানো ৰিচরতি. তেসু একো তেনেৰ কম্মেন নিরযে নিব্বত্ততি, একো তিরচ্ছানযোনিযং, একো পেত্তিৰিসযে. তং তথাগতো আযূহনক্খণে এৰ – ‘‘ইমিনা নীহারেন আযূহিতত্তা এস নিরযে নিব্বত্তিস্সতি, এস তিরচ্ছানযোনিযং, এস পেত্তিৰিসযে’’তি জানাতি. নিরযে নিব্বত্তমানম্পি – ‘‘এস মহানিরযে নিব্বত্তিস্সতি, এস উস্সদনিরযে’’তি জানাতি. তিরচ্ছানযোনিযং নিব্বত্তমানম্পি – ‘‘এস অপাদকো ভৰিস্সতি, এস দ্ৰিপাদকো, এস চতুপ্পদো, এস বহুপ্পদো’’তি জানাতি. পেত্তিৰিসযে নিব্বত্তমানম্পি – ‘‘এস নিজ্ঝামতণ্হিকো ভৰিস্সতি, এস খুপ্পিপাসিকো, এস পরদত্তূপজীৰী’’তি জানাতি. তেসু চ কম্মেসু – ‘‘ইদং কম্মং পটিসন্ধিমাকড্ঢিস্সতি, ইদং অঞ্ঞেন দিন্নায পটিসন্ধিযা উপধিৰেপক্কং ভৰিস্সতী’’তি জানাতি.

তথা সকলগামৰাসিকেসু একতো পিণ্ডপাতং দদমানেসু কামং সব্বেসম্পি চেতনা পিণ্ডপাতারম্মণাৰ, তং পন কম্মং তেসং নানাকারং. তেসু হি একো আদরেন করোতীতি সেসং পুরিমসদিসং, তস্মা তেসু কেচি দেৰলোকে নিব্বত্তন্তি, কেচি মনুস্সলোকে, তং তথাগতো আযূহনক্খণেযেৰ জানাতি – ‘‘ইমিনা নীহারেন আযূহিতত্তা এস মনুস্সলোকে নিব্বত্তিস্সতি, এস দেৰলোকে, তত্থাপি এস খত্তিযকুলে, এস ব্রাহ্মণকুলে, এস ৰেস্সকুলে, এস সুদ্দকুলে, এস পরনিম্মিতৰসৰত্তীসু, এস নিম্মানরতীসু, এস তুসিতেসু, এস যামেসু, এস তাৰতিংসেসু, এস চাতুমহারাজিকেসু, এস ভুম্মদেৰেসূ’’তিআদিনা তত্থ তত্থ হীনপণীতসুৰণ্ণদুব্বণ্ণঅপ্পপরিৰারমহাপরিৰারতাদিভেদং তং তং ৰিসেসং আযূহনক্খণেযেৰ জানাতি.

তথা ৰিপস্সনং পট্ঠপেন্তেসুযেৰ – ‘‘ইমিনা নীহারেন এস কিঞ্চি সল্লক্খেতুং ন সক্খিস্সতি, এস মহাভূতমত্তমেৰ ৰৰত্থপেস্সতি, এস রূপপরিগ্গহেযেৰ ঠস্সতি, এস অরূপপরিগ্গহেযেৰ, এস নামরূপপরিগ্গহেযেৰ, এস পচ্চযপরিগ্গহে এৰ, এস লক্খণারম্মণিকৰিপস্সনায এৰ, এস পঠমফলেযেৰ, এস দুতিযফলে এৰ, এস ততিযফলে এৰ, এস অরহত্তং পাপুণিস্সতী’’তি জানাতি. কসিণপরিকম্মং করোন্তেসুপি – ‘‘ইমস্স পরিকম্মমত্তমেৰ ভৰিস্সতি, এস নিমিত্তং উপ্পাদেস্সতি, এস অপ্পনং এৰ পাপুণিস্সতি, এস ঝানং পাদকং কত্ৰা ৰিপস্সনং পট্ঠপেত্ৰা অরহত্তং গণ্হিস্সতী’’তি জানাতি. তেনাহ ‘‘ইমস্স চেতনা’’তিআদি.

কামনতো, কামেতব্বতো, কামপটিসংযুত্ততো চ কামো ধাতু কামধাতু. আদি-সদ্দেন ব্যাপাদধাতু-রূপধাতু-আদীনং সঙ্গহো. ৰিলক্খণতাযাতি ৰিসদিসসভাৰতায. খন্ধাযতনধাতুলোকন্তি অনেকধাতুং নানাধাতুং খন্ধলোকং আযতনলোকং ধাতুলোকং যথাভূতং পজানাতীতি যোজনা. ‘‘অযং রূপক্খন্ধো নাম…পে… অযং ৰিঞ্ঞাণক্খন্ধো নাম. তেসুপি একৰিধেন রূপক্খন্ধো, একাদসৰিধেন রূপক্খন্ধো (ৰিভ. ৩৩). একৰিধেন ৰেদনাক্খন্ধো, বহুৰিধেন ৰেদনাক্খন্ধো (ৰিভ. ৩৪-৬১). একৰিধেন সঞ্ঞাক্খন্ধো, বহুৰিধেন সঞ্ঞাক্খন্ধো (ৰিভ. ৬২-৯১). একৰিধেন সঙ্খারক্খন্ধো, বহুৰিধেন সঙ্খারক্খন্ধো (ৰিভ. ৯২-১২০). একৰিধেন ৰিঞ্ঞাণক্খন্ধো, বহুৰিধেন ৰিঞ্ঞাণক্খন্ধো’’তি (ৰিভ. ১২১-১৪৯) এৰং তাৰ খন্ধলোকস্স, ‘‘ইদং চক্খাযতনং নাম…পে… ইদং ধম্মাযতনং নাম. তত্থ দসাযতনা কামাৰচরা, দ্ৰে চাতুভূমকা’’তিআদিনা (ৰিভ. ১৫৬-১৭১) আযতনলোকস্স, ‘‘অযং চক্খুধাতু নাম…পে… অযং মনোৰিঞ্ঞাণধাতু নাম, তত্থ সোল়স ধাতুযো কামাৰচরা, দ্ৰে চাতুভূমকা’’তিআদিনা (ৰিভ. ১৭২-১৮৮) ধাতুলোকস্স অনেকসভাৰং নানাসভাৰঞ্চ পজানাতি. ন কেৰলং উপাদিন্নকসঙ্খারলোকস্সেৰ, অথ খো অনুপাদিন্নকসঙ্খারলোকস্সপি – ‘‘ইমায নাম ধাতুযা উস্সন্নত্তা ইমস্স রুক্খস্স খন্ধো সেতো, ইমস্স কাল়ো, ইমস্স মট্ঠো, ইমস্স সকণ্টকো, ইমস্স বহলত্তচো, ইমস্স তনুত্তচো, ইমস্স পত্তং ৰণ্ণসণ্ঠানাদিৰসেন এৰরূপং, ইমস্স পুপ্ফং নীলং পীতং লোহিতং ওদাতং সুগন্ধং দুগ্গন্ধং, ইমস্স ফলং খুদ্দকং মহন্তং দীঘং রস্সং ৰট্টং সুসণ্ঠানং দুস্সণ্ঠানং মুদুকং ফরুসং সুগন্ধং দুগ্গন্ধং মধুরং তিত্তকং কটুকং অম্বিলং কসাৰং, ইমস্স কণ্টকো তিখিণো কুণ্ঠো উজুকো কুটিলো তম্বো কাল়ো ওদাতো হোতী’’তিআদিনা পজানাতি. সব্বঞ্ঞুবুদ্ধাদীনং এৰ হি এতং বলং, ন অঞ্ঞেসং.

নানাধিমুত্তিকতন্তি নানাঅজ্ঝাসযতং. অধিমুত্তি নাম অজ্ঝাসযধাতু অজ্ঝাসযসভাৰো. সো পন হীনপণীততাসামঞ্ঞেন পাল়িযং দ্ৰিধাৰ ৰুত্তোপি হীনপণীতাদিভেদেন অনেকৰিধোতি আহ ‘‘হীনাদীহি অধিমুত্তীহি নানাধিমুত্তিকভাৰ’’ন্তি. তত্থ তত্থ যে যে সত্তা যংযংঅধিমুত্তিকা, তে তে তংতদধিমুত্তিকে এৰ সেৰন্তি ভজন্তি পযিরুপাসন্তি ধাতুসভাগতো. যথা গূথাদীনং ধাতুসভাৰো এসো, যং গূথাদীহি এৰ সংসন্দন্তি সমেন্তি, এৰং (পুগ্গলানং অজ্ঝাসযস্সেৰেস সভাৰো, যং) (ৰিভ. মূলটী. ৮১৩) হীনজ্ঝাসযা দুস্সীলাদীহি এৰ সংসন্দন্তি সমেন্তি, সম্পন্নসীলাদযো চ সম্পন্নসীলাদীহেৰ. তং নেসং নানাধিমুত্তিকতং ভগৰা যথাভূতং পজানাতীতি.

ৰুদ্ধিঞ্চ হানিঞ্চাতি পচ্চযৰিসেসেন সামত্থিযতো অধিকতং অনধিকতঞ্চ. ইন্দ্রিযপরোপরিযত্তঞাণনিদ্দেসে (ৰিভ. ৮১৪; পটি. ম. ১.১১৩) ‘‘আসযং জানাতি অনুসযং জানাতী’’তি আসযাদিজাননং কস্মা নিদ্দিট্ঠন্তি? আসযজাননাদিনা যেহি ইন্দ্রিযেহি পরোপরেহি সত্তা কল্যাণপাপাসযাদিকা হোন্তি, তেসং জাননস্স ৰিভাৰনতো. এৰঞ্চ কত্ৰা ইন্দ্রিযপরোপরিযত্তআসযানুসযঞাণানং ৰিসুং অসাধারণতা, ইন্দ্রিযপরোপরিযত্তনানাধিমুত্তিকতাঞাণানং ৰিসুং বলতা চ সিদ্ধা হোতি. তত্থ আসযন্তি যত্থ সত্তা নিৰসন্তি, তং তেসং নিৰাসট্ঠানং দিট্ঠিগতং ৰা যথাভূতঞাণং ৰা আসযো.অনুসযো অপ্পহীনভাৰেন থামগতো কিলেসো. তং পন ভগৰা সত্তানং আসযং জানন্তো তেসং তেসং দিট্ঠিগতানং, ৰিপস্সনামগ্গঞাণানঞ্চ অপ্পৰত্তিক্খণেপি জানাতি. ৰুত্তং হেতং –

‘‘কামং সেৰন্তংযেৰ ভগৰা জানাতি ‘অযং পুগ্গলো কামগরুকো কামাসযো কামাধিমুত্তো’তি. কামং সেৰন্তঞ্ঞেৰ জানাতি ‘অযং পুগ্গলো নেক্খম্মগরুকো নেক্খম্মাসযো নেক্খম্মাধিমুত্তো’তি. নেক্খম্মং সেৰন্তঞ্ঞেৰ জানাতি. ব্যাপাদং, অব্যাপাদং, থিনমিদ্ধং, আলোকসঞ্ঞং সেৰন্তংযেৰ জানাতি ‘অযং পুগ্গলো থিনমিদ্ধগরুকো থিনমিদ্ধাসযো থিনমিদ্ধাধিমুত্তো’তি’’ (পটি. ম. ১.১১৩).

পঠমাদীনং চতুন্নং ঝানানন্তি রূপাৰচরানং পঠমাদীনং পচ্চনীকঝাপনট্ঠেন আরম্মণূপনিজ্ঝানট্ঠেন চ ঝানানং. চতুক্কনযেন হেতং ৰুত্তং. অট্ঠন্নং ৰিমোক্খানন্তি এত্থ পটিপাটিযা সত্ত অপ্পিতপ্পিতক্খণে পচ্চনীকধম্মেহি ৰিমুচ্চনতো আরম্মণে চ অধিমুচ্চনতো ৰিমোক্খা নাম, অট্ঠমো পন সব্বসো সঞ্ঞাৰেদযিতেহি ৰিমুত্তত্তা অপগমৰিমোক্খো নাম. চতুক্কনযপঞ্চকনযেসু পঠমঝানসমাধি সৰিতক্কসৰিচারো নাম, পঞ্চকনযে দুতিযজ্ঝানসমাধি অৰিতক্কৰিচারমত্তো, নযদ্ৰযেপি উপরি তীসু ঝানেসু সমাধি অৰিতক্কঅৰিচারো, সমাপত্তীসু পটিপাটিযা অট্ঠন্নং সমাধীতিপি নামং, সমাপত্তীতিপি চিত্তেকগ্গতাসব্ভাৰতো, নিরোধসমাপত্তিযা তদভাৰতো ন সমাধীতি নামং. হানভাগিযধম্মন্তি অপ্পগুণেহি পঠমজ্ঝানাদীহি ৰুট্ঠিতস্স সঞ্ঞামনসিকারানং কামাদিঅনুপক্খন্দনং. ৰিসেসভাগিযধম্মন্তি পগুণেহি পঠমজ্ঝানাদীহি ৰুট্ঠিতস্স সঞ্ঞামনসিকারানং দুতিযজ্ঝানাদিপক্খন্দনং. ইতি সঞ্ঞামনসিকারানং কামাদিদুতিযজ্ঝানাদিপক্খন্দনানি হানভাগিযৰিসেসভাগিযধম্মাতি দস্সিতানি, তেহি পন ঝানানং তংসভাৰতা ধম্ম-সদ্দেন ৰুত্তা. তস্মাতি ৰুত্তমেৰত্থং হেতুভাৰেন পচ্চামসতি. ৰোদানন্তি পগুণতাসঙ্খাতং ৰোদানং. তঞ্হি পঠমজ্ঝানাদীহি ৰুট্ঠহিত্ৰা দুতিযজ্ঝানাদিঅধিগমস্স পচ্চযত্তা ‘‘ৰুট্ঠান’’ন্তি ৰুত্তং. যে (অ. নি. টী. ৩.১০.২১) পন ‘‘নিরোধতো ফলসমাপত্তিযা ৰুট্ঠানন্তি পাল়ি নত্থী’’তি ৰদন্তি, তে ‘‘নিরোধা ৰুট্ঠহন্তস্স নেৰসঞ্ঞানাসঞ্ঞাযতনং ফলসমাপত্তিযা অনন্তরপচ্চযেন পচ্চযো’’তি ইমায পাল়িযা (পট্ঠা. ১.১.৪১৭) পটিসেধেতব্বা. যো সমাপত্তিলাভী সমানো এৰ ‘‘ন লভামহ’’ন্তি, কম্মট্ঠানং সমানং এৰ ‘‘ন কম্মট্ঠান’’ন্তি সঞ্ঞী হোতি, সো সম্পত্তিংযেৰ সমানং ‘‘ৰিপত্তী’’তি পচ্চেতীতি ৰেদিতব্বো.

১৪৯. অপ্পনন্তি নিগমনং. ন তথা দট্ঠব্বন্তি যথা পরৰাদিনা ৰুত্তং, তথা ন দট্ঠব্বং. সকসককিচ্চমেৰ জানাতীতি ঠানাট্ঠানজাননাদিং সকং সকংযেৰ কিচ্চং কাতুং জানাতি, যথাসকমেৰ ৰিসযং পটিৰিজ্ঝতীতি অত্থো. তম্পীতি তেহি দসবলঞাণেহি জানিতব্বম্পি. কম্মন্তরৰিপাকন্তরমেৰাতি কম্মন্তরস্সৰিপাকন্তরমেৰ জানাতি, চেতনাচেতনাসম্পযুত্তধম্মে নিরযাদিনিব্বানগামিনিপটিপদাভূতে কম্মন্তি গহেত্ৰা আহ ‘‘কম্মপরিচ্ছেদমেৰা’’তি. ধাতুনানত্তঞ্চ ধাতুনানত্তকারণঞ্চ ধাতুনানত্তকারণন্তি একদেসসরূপেকসেসো দট্ঠব্বো. তঞ্হি ঞাণং তদুভযম্পি জানাতি, ‘‘ইমায নাম ধাতুযা উস্সন্নত্তা’’তিআদিনা (ৰিভ. অট্ঠ. ৮১২) তথা চেৰ সংৰণ্ণিতং. সচ্চপরিচ্ছেদমেৰাতি পরিঞ্ঞাভিসমযাদিৰসেন সচ্চানং পরিচ্ছিন্দনমেৰ. অপ্পেতুং ন সক্কোতি অট্ঠমনৰমবলানি ৰিয তংসদিসং ইদ্ধিৰিধঞাণং ৰিয ৰিকুব্বিতুং. এতেনস্স বলসদিসতঞ্চ নিৰারেতি. ঝানাদিঞাণং ৰিয ৰা অপ্পেতুং ৰিকুব্বিতুঞ্চ. যদিপি হি ‘‘ঝানাদিপচ্চৰেক্খণাঞাণং সত্তমবল’’ন্তি তস্স সৰিতক্কসৰিচারতা ৰুত্তা, তথাপি ‘‘ঝানাদীহি ৰিনা পচ্চৰেক্খণা নত্থী’’তি ঝানাদিসহগতং ঞাণং তদন্তোগধং কত্ৰা এৰং ৰুত্তন্তি ৰেদিতব্বং. অথ ৰা সব্বঞ্ঞুতঞ্ঞাণং ঝানাদিকিচ্চং ৰিয ন সব্বং বলকিচ্চং কাতুং সক্কোতীতি দস্সেতুং ‘‘ঝানং হুত্ৰা অপ্পেতুং ন সক্কোতি ইদ্ধি হুত্ৰা ৰিকুব্বিতুং ন সক্কোতী’’তি ৰুত্তং, ন পন কস্সচি বলস্স ঝানইদ্ধিভাৰতোতি দট্ঠব্বং. এৰং কিচ্চৰিসেসৰসেনপি দসবলঞাণসব্বঞ্ঞুতঞ্ঞাণানং ৰিসেসং দস্সেত্ৰা ইদানি ৰিতক্কত্তিকভূমন্তরৰসেনপি তং দস্সেতুং ‘‘অপিচা’’তিআদি ৰুত্তং. পটিপাটিযাতিআদিতো পট্ঠায পটিপাটিযা.

অনুপদৰণ্ণনং কত্ৰা ৰেদিতব্বানীতি সম্বন্ধো. কিলেসাৰরণং নিযতমিচ্ছাদিট্ঠি, কিলেসাৰরণস্স অভাৰো আসৰক্খযাধিগমস্স ঠানং, তব্ভাৰো অট্ঠানং, অনধিগমস্স পন তদুভযং যথাক্কমং অট্ঠানঞ্চ ঠানঞ্চাতি তত্থ কারণং দস্সেন্তো ‘‘লোকিয…পে… দস্সনতো চা’’তি আহ. তত্থ লোকিযসম্মাদিট্ঠিযা ঠিতি আসৰক্খযাধিগমস্স ঠানং কিলেসাৰরণাভাৰস্স কারণত্তা. সা হি তস্মিং সতি ন হোতি, অসতি চ হোতি. এতেন তস্সা অট্ঠিতিযা তস্স অট্ঠানতা ৰুত্তা এৰ. নেসং ৰেনেয্যসত্তানং. ধাতুৰেমত্তদস্সনতোতি কামধাতুআদীনং পৰত্তিভেদদস্সনতো. যদগ্গেন ধাতুৰেমত্তং জানাতি, তদগ্গেন চরিযাৰিসেসম্পি জানাতি. ধাতুৰেমত্তদস্সনতোতি ৰা ধম্মধাতুৰেমত্তদস্সনতো. সব্বাপি হি চরিযা ধম্মধাতুপরিযাপন্না এৰাতি. পযোগং অনাদিযিত্ৰাপি সন্ততিমহামত্তাদীনং (ধ. প. ১৪২) ৰিয. দিব্বচক্খুঞাণানুভাৰতো পত্তব্বেনাতি এত্থ দিব্বচক্খুনা পরস্স হদযৰত্থুসন্নিস্সযলোহিতৰণ্ণদস্সনমুখেন তদা পৰত্তমানচিত্তজাননত্থং পরিকম্মকরণং নাম সাৰকানং, তঞ্চ খো আদিকম্মিকানং, যতো দিব্বচক্খুআনুভাৰতো চেতোপরিযঞাণস্স পত্তব্বতা সিযা, বুদ্ধানং পন যদিপি আসৰক্খযঞাণাধিগমতো পগেৰ দিব্বচক্খুঞাণাধিগমো, তথাপি তথা পরিকম্মকরণং নত্থি ৰিজ্জাত্তযসিদ্ধিযা সিজ্ঝনতো. সেসাভিঞ্ঞাত্তযে চেতোপরিযঞাণং দিব্বচক্খুঞাণাধিগমেন পত্তন্তি চ ৰত্তব্বতং লভতীতি তথা ৰুত্তন্তি দট্ঠব্বং.

পুন এৰরূপিং ৰাচং ন ৰক্খামীতি চিত্তং উপ্পাদেন্তো তং ৰাচং পজহতি নাম. ৰাচায পন সো অত্থো পাকটো হোতীতি ‘‘ৰদন্তো’’তি ৰুত্তং. দিট্ঠিং ন গণ্হিস্সামীতি দিট্ঠিগ্গাহপটিক্খেপো. দিট্ঠিযা অনুপ্পাদনং পজহনমেৰাতি আহ ‘‘পজহন্তো’’তি. সো অরিযূপৰাদী নিরযে ঠপিতোযেৰ, নাস্স নিরযূপপত্তিযা কোচি ৰিবন্ধো একংসিকো অযমত্থোতি অধিপ্পাযো.

অস্সাতি একংসিকভাৰস্স. সিক্খাহি সীলসমাধিপঞ্ঞাহি, তদত্থায ৰিপস্সনায চ ৰিনা অঞ্ঞারাধনস্স অসম্ভৰতো ‘‘লোকিযলোকুত্তরা সীলসমাধিপঞ্ঞা ৰেদিতব্বা’’তি ৰত্ৰা পুন আসন্নতরে সীলাদিকে দস্সেন্তো ‘‘লোকুত্তরৰসেনেৰ ৰিনিৰত্তেতুম্পি ৰট্টতী’’তি আহ, তস্মা অগ্গমগ্গপরিযাপন্না সীলাদযো ৰেদিতব্বা. অগ্গমগ্গট্ঠস্স হি দিট্ঠেৰ ধম্মে একংসিকা অঞ্ঞারাধনা, ইতরেসং অনেকংসিকাতি. সম্পজ্জনং সম্পদা, নিপ্ফত্তীতি অত্থো, তস্মা এৰংসম্পদন্তি এৰংঅৰিরজ্ঝনকনিপ্ফত্তিকন্তি ৰুত্তং হোতি. তেনাহ ‘‘ইমম্পি কারণ’’ন্তিআদি. তত্থ কারণন্তি যুত্তি. তত্রাযং যুত্তিনিদ্ধারণা ‘‘নিরযূপগো অরিযূপৰাদী তদাদাযস্স অৰিজ্জমানতো সেয্যথাপি মিচ্ছাদিট্ঠী’’তি. এত্থ চ ‘‘তং ৰাচং অপ্পহাযা’’তিআদিৰচনেন তদাদাযস্স অপ্পহানেন চ অরিযূপৰাদো অন্তরাযিকো অনত্থাৰহো চ, পহানেন পন অচ্চযং দেসেত্ৰা খমাপনেন অনন্তরাযিকো অত্থাৰহো চ যথা তং ৰুট্ঠিতা দেসিতা চ আপত্তীতি দস্সেতি.

দসবলঞাণৰণ্ণনা নিট্ঠিতা.

চতুৰেসারজ্জঞাণৰণ্ণনা

১৫০. ব্যামোহভযৰসেন (অ. নি. টী. ২.৪.৮) সরণপরিযেসনং সারজ্জনং সারদো, ব্যামোহভযং, ৰিগতো সারদো এতস্সাতি ৰিসারদো, তস্স ভাৰো ৰেসারজ্জং. তং পন ঞাণসম্পদং পহানসম্পদং দেসনাৰিসেসসম্পদং খেমং নিস্সায পৰত্তং চতুব্বিধং পচ্চৰেক্খণঞাণং. তেনাহ ‘‘চতূসু ঠানেসূ’’তিআদি. দস্সিতধম্মেসূতি ৰুত্তধম্মেসু. ৰচনমত্তমেৰ হি তেসং, ন পন দস্সনং তাদিসস্সেৰ ধম্মস্স অভাৰতো. ভগৰতা এৰ ৰা ‘‘ইমে ধম্মা অনভিসম্বুদ্ধা’’তি পরস্স ৰচনৰসেন দস্সিতধম্মেসু. ‘‘ধম্মপটিসম্ভিদা’’তিআদীসু (ৰিভ. ৭১৮) ৰিয ধম্ম-সদ্দো হেতুপরিযাযোতি আহ ‘‘সহধম্মেনাতি সহেতুনা’’তি. হেতূতি চ উপপত্তিসাধনহেতু ৰেদিতব্বো, ন কারকো সম্পাপকো চ. অপ্পমাণন্তি অনিদস্সনং. নিদস্সনঞ্হি অন্ৰযতো ব্যতিরেকতো পমাণঙ্গতায ‘‘পমাণ’’ন্তি ৰুচ্চতি. নিমিত্তন্তি চোদনায কারণং. তত্থ চোদকো চোদনং করোতীতি কারণং, ধম্মো চোদনং করোতি এতেনাতি কারণং. তেনাহ ‘‘পুগ্গলোপী’’তিআদি. খেমন্তি কেনচি অপ্পটিবন্ধিযভাৰেন অনুপদ্দুততং.

অন্তরাযো এতেসং অত্থি, অন্তরাযেৰা যুত্তাতি অন্তরাযিকা. এৰংভূতা পন তে যস্মা অন্তরাযকরা নাম হোন্তি, তস্মা আহ ‘‘অন্তরাযং করোন্তীতি অন্তরাযিকা’’তি. অসঞ্চিচ্চ ৰীতিক্কমো ন তথা সাৰজ্জোতি কত্ৰা ৰুত্তং ‘‘সঞ্চিচ্চ ৰীতিক্কন্তা’’তি. সত্ত আপত্তিক্খন্ধাতিআদি নিদস্সনমত্তং ইতরেসম্পি চতুন্নং ‘‘অন্তরাযিকা’’তি ৰুত্তধম্মানং তব্ভাৰে ব্যভিচারাভাৰতো. ইধ পন মেথুনধম্মো অধিপ্পেতোতি ইদং অট্ঠুপ্পত্তিৰসেন ৰুত্তং অরিট্ঠসিক্খাপদং (পাচি. ৪১৭-৪২২) ৰিয. যস্মা তঙ্খণম্পি কামেসু (অ. নি. টী. ২.৪.৮) আদীনৰং দিস্ৰা ৰিরত্তো (অ. নি. টী. ২.৪.৮) হোতি চে, ৰিসেসং অধিগচ্ছতি, ন কামেসু আসত্তো, তস্মা ৰুত্তং ‘‘মেথুনং…পে… অন্তরাযো হোতী’’তি. তত্থ যস্স কস্সচীতি ন কেৰলং পব্বজিতস্সেৰ, অথ খো যস্স কস্সচি. তথা হি ৰুত্তং ‘‘মেথুনমনুযুত্তস্স, মুস্সতেৰাপি সাসন’’ন্তি. তস্মিং অনিয্যানিকধম্মেতি তস্মিং পরেন পরিকপ্পিতঅনিয্যানিকধম্মনিমিত্তং. নিমিত্তত্থে হি ইদং কম্মসংযোগে ভুম্মং.

চতুৰেসারজ্জঞাণৰণ্ণনা নিট্ঠিতা.

অট্ঠপরিসৰণ্ণনা

১৫১. পুরিসস্স সূরতরভাৰো নাম সঙ্গামে পাকটো হোতি, ন গেহে নিসিন্নকালে, এৰং ৰেসারজ্জঞাণস্স আনুভাৰো পণ্ডিতপরিসাসু যত্থ কত্থচীতি দস্সেন্তো ‘‘ৰেসারজ্জঞাণস্স বলদস্সনত্থ’’ন্তি আহ. সন্নিপতিত্ৰা নিসিন্নট্ঠানন্তি ঠানসীসেন সন্নিপতিতখত্তিযপরিসমেৰ দস্সেতি. এসেৰ নযো সব্বত্থাতি অতিদেসেন আৰিভাৰিতমত্থং দস্সেতুং ‘‘মারকাযিকান’’ন্তিআদি ৰুত্তং সদিসত্থৰিসযত্তা অতিদেসস্স. যথা হি খত্তিযানং সমূহো খত্তিযপরিসাতি অযমত্থো লব্ভতি, ন এৰং ‘‘মারপরিসা’’তি এত্থ, মারস্স পরিসাতি পন মারপরিসাতি অযমত্থো অধিপ্পেতো. তেনাহ ‘‘মারকাযিকানং…পে… ন মারান’’ন্তি. মারকাযিকানন্তি মারপক্খিযানং. উগ্গট্ঠানদস্সনৰসেনাতি সারজ্জিতব্বট্ঠানদস্সনৰসেন, এৰং উগ্গা খত্তিযা অত্তনো পুঞ্ঞতেজেনাতি অধিপ্পাযো. ব্রাহ্মণা তীসু ৰেদেসূতি ইদং ইতরেসং অৰিসযদস্সনৰসেন ৰুত্তং. ৰেদে সজ্ঝাযন্তাপি হি খত্তিযা ৰেস্সা চ তদত্থৰিচারণায যেভুয্যেন অসমত্থা এৰাতি. কস্মা পনেত্থ যামাদিপরিসা ন গহিতাতি? ভুসং কামাভিগিদ্ধতায যোনিসোমনসিকারৰিরহতো. যামাদযো হি উল়ারুল়ারে কামে পটিসেৰন্তা তত্থাভিগিদ্ধতায ধম্মস্সৰনায সভাৰেন চিত্তম্পি ন উপ্পাদেন্তি, মহাবোধিসত্তানং পন বুদ্ধানঞ্চ আনুভাৰেন আকড্ঢিযমানা কদাচি তেসং পযিরুপাসনাদীনি করোন্তি তাদিসে মহাসমযে. তেনেৰ হি ৰিমানৰত্থুদেসনাপি তন্নিমিত্তা বহুলা নাহোসি. মনুস্সানং ৰসেনাযং কতা.

পরচক্কৰাল়েসু চ মনুস্সানং ৰিসেসাধিগমো নত্থীতি পুচ্ছতি ‘‘কিং পন ভগৰা অঞ্ঞানি চক্কৰাল়ানিপি গচ্ছতী’’তি. ইতরো যদিপি তেসং অরিযধম্মাধিগমো নত্থি, ৰাসনায পন তত্থ গন্ত্ৰা ধম্মং দেসেতীতি দস্সেন্তো ‘‘আমগচ্ছতী’’তি আহ. কেযূরং নানাৰিধরতনপরিসিব্বিতসুৰণ্ণজালৰিনদ্ধং ভুজাভরণং. অঙ্গদং নানাগন্ধগন্ধিতং, কেৰলং ৰা সুৰণ্ণমযং বাহুৰলযং. ছিন্নস্সরাতি দ্ৰিধাভূতস্সরা (দী. নি. টী. ২.১৭২) গগ্গরস্সরাতি গগ্গরিকায ৰিয গগ্গরাযমানখরস্সরা (দী. নি. টী. ২.১৭২; অ. নি. টী. ৩.৮.৬৯). ভাসন্তরন্তি তেসং ভাসং (দী. নি. টী. ২.১৭২; অ. নি. টী. ৩.৮.৬৯) সন্ধাযাহ. ‘‘ৰীমংসা উপ্পজ্জতী’’তি সঙ্খেপতো ৰুত্তং ৰিৰরিতুং ‘‘ইদং ৰুত্তং হোতী’’তিআদি ৰুত্তং.

সঙ্গম্মাতি সমাগন্ত্ৰা. আদিতো লাপো আলাপো, ৰচনপটিৰচনৰসেন সমং লাপো সল্লাপো. সম্মা, সমঞ্ঞা ৰা কথা সংকথা, সংকথাৰ সাকচ্ছা.

অট্ঠপরিসৰণ্ণনা নিট্ঠিতা.

চতুযোনিৰণ্ণনা

১৫২. যৰন্তি তায সত্তা অমিস্সিতাপি সমানজাতিতায মিস্সিতা ৰিয হোন্তীতি যোনি. সা পন অত্থতো অণ্ডাদিউপ্পত্তিট্ঠানৰিসিট্ঠো খন্ধানং ভাগসো পৰত্তিৰিসেসোতি আহ ‘‘খন্ধকোট্ঠাসো যোনি নামা’’তি. অণ্ডে জাতাতি পঠমায জাতিযা ৰসেন ৰুত্তং, দুতিযায পন অণ্ডতো, অণ্ডে ৰা ভিজ্জমানে জাতাতি এৰমত্থো ৰেদিতব্বো. তেনাহ ‘‘অভিনিব্ভিজ্জ জাযন্তী’’তি. ৰিনাতি এতেহি অণ্ডাদীহি বাহিরপচ্চযেহি ৰিনা. উপ্পতিত্ৰা ৰিযাতি উপ্পজ্জনৰসেন পতিত্ৰা ৰিয. বাহিরপচ্চযনিরপেক্খত্তাযেৰ ৰা উপপতনে সাধুকারিনো উপপাতিকা, তে এৰ ইধ ওপপাতিকাতি ৰুত্তা. আদি-সদ্দেন গব্ভমলে নিব্বত্তমহাপদুমকুমারাদীনং সঙ্গহো. নিজ্ঝামতণ্হিকপেতানং নিচ্চং দুক্খাতুরতায কামসেৰনা নত্থি, তস্মা তে গব্ভসেয্যকা ন হোন্তি, জালৰন্ততায ন তাসং কুচ্ছিযং গব্ভো সণ্ঠাতি, তস্মা তে ওপপাতিকাযেৰ সংসেদজত্তাযপি অসম্ভৰতো. নেরযিকা ৰিযাতি নিদস্সনাপদেসেন তেসম্পি ওপপাতিকত্তং দীপেতি. অৰসেসাতি নিজ্ঝামতণ্হিকনেরযিকে ঠপেত্ৰা অৰসেসা ৰিনিপাতিকা. যক্খানং চাতুমহারাজিকতায ওপপাতিকভাৰে এৰ আপন্নে তং নিৰত্তেতুং ‘‘এৰং যক্খাপী’’তি ৰুত্তং. তথা হি তে ন ভুম্মদেৰা ন চ ৰিনিপাতিকাতি.

চতুযোনিৰণ্ণনা নিট্ঠিতা.

পঞ্চগতিৰণ্ণনা

১৫৩. গন্তব্বাতি উপপজ্জিতব্বা. যথা হি কম্মভৰো পরমত্থতো অসতিপি কারকে পচ্চযসামগ্গিযা সিদ্ধো তংসমঙ্গিনা সন্তানলক্খণেন সত্তেন কতোতি ৰোহরীযতি, তথা উপপত্তিভৰলক্খণা গতিযো পরমত্থতো অসতিপি গমকে তংতংকম্মৰসেন যেসং তানি কম্মানি, তেহি গন্তব্বাতি ৰোহরীযন্তীতি. এৰং সদ্দত্থতো গতিং দস্সেত্ৰা অত্থুদ্ধারনযেনপি তং দস্সেতুং ‘‘অপিচা’’তিআদি ৰুত্তং. যেসু নিরযাদিভেদেসু উপপত্তিভৰেসু গতি-সদ্দো নিরূল়্হো, ততো অঞ্ঞত্থাপি গতিসদ্দপ্পৰত্তি অত্থি, তং একেন গতি-সদ্দেন ৰিসেসেত্ৰা আহ ‘‘গতিগতী’’তি যথা ‘‘দুক্খদুক্খং, (সং. নি. ৪.৩২৭) রূপরূপ’’ন্তি (ৰিসুদ্ধি. ২.৪৪৯) চ. উপ্পাদাৰত্থায গমনং উপগমনন্তি ‘‘নিব্বত্তিগতী’’তি ৰুত্তা. গতিন্তি চিত্তগতিং. তেনাহ ‘‘অজ্ঝাসযগতি নামা’’তি, অজ্ঝাসযপ্পৰত্তীতি অত্থো. তদট্ঠকথাযং (ম. নি. অট্ঠ. ২.৫০৩) পন ‘‘গতিন্তি নিপ্ফত্তি’’ন্তি অত্থো ৰুত্তো. ব্রহ্মনিমন্তনসুত্তে (ম. নি. ১.৫০৩) হি অযং পাল়ীতি. জুতিন্তি আনুভাৰং. ৰিভৰোতি ৰিনাসো. সো হি ৰিগমোতি অত্থেন গতি. তেনেৰ নিব্বানং অরহতো গতীতি (পরি. ৩৩৯) অনুপাদিসেসনিব্বানং অরহতো গতি ৰিগমো ৰিভৰোতি অনেকত্থত্তা ধাতূনং. দ্ৰেযেৰ গতিযোতি দ্ৰেৰ নিপ্ফত্তিযোতি অত্থোতি আহ ‘‘অযং নিপ্ফত্তিগতি নামা’’তি.

যস্স উপ্পজ্জতি, তং ব্রূহেন্তো এৰ উপ্পজ্জতীতি অযো, সুখং. নত্থি এত্থ অযোতি নিরযো. ততো এৰ রমিতব্বং অস্সাদেতব্বং তত্থ নত্থীতি দস্সেন্তো আহ ‘‘নিরতিঅত্থেন নিরস্সাদট্ঠেন নিরযো’’তি. তিরিযং অঞ্চিতাতি দেৰমনুস্সাদযো ৰিয উদ্ধং দীঘা অহুত্ৰা তিরিযং দীঘাভি অত্থো. পকট্ঠতো সুখতো অযনং অপগমো পেচ্চভাৰো, তং পেচ্চভাৰং পত্তানং ৰিসযোতি পেতযোনিমেৰ ৰদতি. মনসো উস্সন্নত্তাতি সতিসূরভাৰব্রহ্মচরিযযোগ্যতাদিগুণৰসেন উপচিতমানসতায উক্কট্ঠগুণচিত্ততাযাতি অত্তো. অযং পনত্থো নিপ্পরিযাযতো জম্বুদীপৰাসীৰসেন ৰেদিতব্বো. যথাহ – ‘‘তীহি, ভিক্খৰে, ঠানেহি জম্বুদীপিকা মনুস্সা উত্তরকুরুকে মনুস্সে অধিগ্গণ্হন্তি দেৰে চ তাৰতিংসে. কতমেহি তীহি? সূরা সতিমন্তো ইধ ব্রহ্মচরিযৰাসো’’তি (অ. নি. ৯.২১). তেহি পন সমানরূপাদিতায সদ্ধিং পরিত্তদীপৰাসীহি ইতরমহাদীপৰাসিনোপি মনুস্সাতেৰ পঞ্ঞাযিংসু. লোকিযা পন ‘‘মনুনো অপচ্চভাৰেন মনুস্সা’’তি ৰদন্তি. অযমেত্থ সঙ্খেপো, ৰিত্থারো পন পরমত্থদীপনিযং ৰিমানৰত্থুসংৰণ্ণনাযং (ৰি. ৰ. অট্ঠ. ৩) ৰুত্তনযেন গহেতব্বো. আনুভাৰেহীতি দেৰানুভাৰসঙ্খাতেহি ইদ্ধিৰিসেসেহি. তত্থ কামা দেৰা কামগুণেহি চেৰ ইদ্ধিৰিসেসেহি চ ইতরে ইদ্ধিৰিসেসেহেৰ দিব্বন্তি কীল়ন্তি জোতন্তি, সরণন্তি ৰা গম্মন্তি, অভিত্থৰিযন্তীতি ৰা দেৰাতি.

তিরচ্ছানযোনিঞ্চাতিআদীসূতি এত্থ তিরচ্ছানযোনিপেত্তিৰিসযগ্গহণেন খন্ধানং এৰ গহণং তেসং তাদিসস্স পরিচ্ছিন্নস্স ওকাসস্স অভাৰতো. যত্থ ৰা তে অরঞ্ঞসমুদ্দপব্বতাদিকে নিবদ্ধৰাসং ৰসন্তি, তাদিসস্স ঠানস্স ৰসেন ওকাসোপি গহেতব্বো. নিরযূপগাদীহি সত্তেহি মগ্গিতব্বতো মগ্গো পটিপজ্জিতব্বা পটিপদা চাতি তং তং কম্মমেৰ ৰুত্তন্তি আহ ‘‘উভযেনপী’’তিআদি. যথা চ পটিপন্নোতি ইমিনা তস্স কম্মস্স কতূপচিতাকারমাহ. এত্থ চ নিরযগামিঞ্চ মগ্গং নিরযগামিনিঞ্চ পটিপদন্তি ইমিনা সাধারণতো নিরযসংৰত্তনিযং কম্মং ৰত্ৰা পুন তং তং সন্তানপতিততায অসাধারণতং দস্সেতুং ‘‘যথাপটিপন্নো’’তিআদি ৰুত্তন্তি দট্ঠব্বং. ৰিনিপতন্তীতি ৰিৰসা, ৰিরূপং ৰা নিপতন্তি. কস্মা পনেত্থ পঞ্চগতিপরিচ্ছেদকঞাণং দস্সেন্তো ভগৰা ‘‘নিব্বানঞ্চাহ’’ন্তিআদিমাহাতি অনুযোগং সন্ধাযাহ ‘‘ইদং পনা’’তিআদি. ন হি ভগৰা অত্তনো বুদ্ধসুবুদ্ধতং ৰিভাৰেন্তো সাৰসেসং কত্ৰা দেসনং দেসেতি.

পঞ্চগতিৰণ্ণনা নিট্ঠিতা.

ঞাণপৰত্তাকারৰণ্ণনা

১৫৪. ঞাণপ্পৰত্তাকারন্তি ঞাণস্স পৰত্তিআকারং, ঞাণস্স ৰা পৰত্তিপকারং. একন্তদুক্খাতি একন্তেন দুক্খা অচ্চন্তদুক্খা. তা পন সব্বকালং দুক্খা সুখালযেনপি অসম্মিস্সাতি দস্সেন্তো আহ ‘‘নিচ্চদুক্খা নিরন্তরদুক্খা’’তি. বহলাতি অতনুকা, মহন্তাতি অত্থো. তিব্বাতি ৰা তিখিণা. খরাতি কক্খল়া. কটুকাতি ৰা অনিট্ঠা. কস্সতি খণীযতীতি কাসু, আৰাটো. কসীযতি চীযতীতি কাসু, রাসি. ফুনন্তীতি দ্ৰীহি হত্থেহি অঙ্গারানি উক্খিপিত্ৰা পটিৰাতং ওফুনন্তি, তেন তেসং সকলসরীরং ডয্হতি. তেনাহ ‘‘পরিদড্ঢগত্তা’’তি. পুরিসপ্পমাণং পোরিসং. একপথেনেৰাতি একমগ্গভূতেনেৰ. অনুক্কমনীযেনাতি উক্কমিতুং অপক্কমিতুং অসক্কুণেয্যেন.

ননু চ দিব্বচক্খুঞাণং পচ্চুপ্পন্নৰণ্ণারম্মণং, তেন কথং রূপন্তরসমঙ্গিং নিরযে নিব্বত্তসত্তং ‘‘অযং সো’’তি জানাতীতি চোদনং সন্ধাযাহ ‘‘তত্থ কিঞ্চাপী’’তিআদি. যথাকম্মূপগঞাণেন ‘‘অযং সো’’তি সল্লক্খেতি, তস্স পন দিব্বচক্খুআনুভাৰেন পত্তব্বত্তা ‘‘দিব্বচক্খুবলং নাম এতন্তি ৰুত্তং.

পুরিমনযেনেৰাতি ‘‘গূথকূপো ৰিয তিরচ্ছানযোনি দট্ঠব্বা’’তিআদিনা অঙ্গারকাসুপমাযং ৰুত্তনযেনেৰ. দুক্খা ৰেদনা বহুলা এতাসূতি দুক্খবহুলা. বহলপত্তপলাসোতি অৰিরল়তনুৰিপুলপণ্ণো. সুখপরিভোগং মহাপাসাদং দস্সেতুং ‘‘দীঘপাসাদো’’তি ৰুত্তং চতুরস্সপাসাদাদীনং খুদ্দকত্তা. উণ্ণামযঅত্থরণেনাতি উণ্ণামযলোহিতঅত্থরণেন. উত্তরং উপরিভাগং ছাদেতীতি উত্তরচ্ছদো, ৰিতানং. তং পন লোহিতৰিতানং ইধাধিপ্পেতন্তি ‘‘রত্তৰিতানেনা’’তি ৰুত্তং.

অপরভাগযোজনাতি পাল়িযং ‘‘অপরেন সমযেনা’’তি ৰুত্তস্স অপরভাগস্স যোজনা. সা পন একদেসেন পুরিমভাগে ৰুত্তে এৰ সুৰিঞ্ঞেয্যা হোতীতি ‘‘যথা সো’’তিআদিমাহ. মগ্গারুল়্হমেৰাতি মগ্গং উপগতমত্তমেৰ.

নিযমাভাৰাতি ‘‘দিব্বচক্খুনাৰ পস্সতী’’তি নিযমস্স অভাৰা. ‘‘দিব্বচক্খুনাপি পস্সিস্সতী’’তি ইদং ন অনুত্তরসুখানুভৰনস্স দিব্বচক্খুগোচরত্তা ৰুত্তং, অনাগতস্স পন তস্স দিব্বচক্খুপরিভণ্ডভূতেন অনাগতংসঞাণেন দস্সনমেৰাতি কারণূপচারেন ৰুত্তং. পাল়িযং পন ‘‘চেতসা চেতো পরিচ্চ পজানামি’’চ্চেৰ ৰুত্তং. ‘‘অত্থতো পন নানা হোতী’’তি সঙ্খেপতো ৰুত্তমত্থং ৰিৰরিতুং ‘‘দেৰলোকসুখং হী’’তিআদিং ৰত্ৰা যথাদস্সিতউপমাহিপি অযমত্থো পাকটো এৰাতি দস্সেন্তো ‘‘উপমাযম্পী’’তিআদিমাহ. গোত্রভুঞাণুপ্পাদতো পট্ঠায নিরোধং পস্সিত্ৰা উপ্পন্নমগ্গফলপচ্চৰেক্খণৰসেন চেৰ পরতো ফলসমাপত্তিসমাপজ্জনৰসেন চ অরিযসাৰকো নিরোধে সযিতো ৰিয হোতি তদপস্সযেনেৰ পৰত্তনতোতি আহ ‘‘নিরোধসযনৰরগত’’ন্তি. তেনাহ ‘‘নিব্বানা…পে… পস্সতী’’তি.

ঞাণপৰত্তাকারৰণ্ণনা নিট্ঠিতা.

দুক্করকারিকাদিসুদ্ধিৰণ্ণনা

১৫৫. পুচ্ছানুসন্ধিআদিঅনুসন্ধিত্তযতো অঞ্ঞত্তা ‘‘পাটিযেক্কং অনুসন্ধিৰসেনা’’তি ৰুত্তং. ন কেৰলং ‘‘দুক্করকারিকায সুদ্ধি হোতী’’তি এৰংলদ্ধিকো এৰ, অথ খো দুক্করচারীসু অভিপ্পসন্নোতি দস্সেতুং ‘‘অপিচা’’তিআদি ৰুত্তং. চতুকুণ্ডিকোতি দ্ৰীহি পাদেহি হত্থেহীতি চতূহি অঙ্গেহি কুণ্ডনকো আহিণ্ডনকো. ছমানিকিণ্ণন্তি ভূমিযং খিত্তং. ভক্খসন্তি আহারং.

মচ্ছরিযমলাদিপাপধম্মৰিগমনতো মেত্তাদিগুণানুব্রূহনতো চ ব্রহ্মং সেট্ঠং চরিযন্তি ব্রহ্মচরিযং, দানং. তথা হি তং ভগৰতা পণ্ডিতপঞ্ঞত্তং ৰুত্তং. এৰং সেসেসুপি যথারহং ব্রহ্মচরিযপরিযাযো নিদ্ধারেত্ৰা ৰত্তব্বো. কিন্তি কীদিসং. ৰতন্তি সমাদিন্নৰতং. সুচিণ্ণস্সাতি সুট্ঠু চিণ্ণস্স পুঞ্ঞস্স. ইদ্ধীতি আনুভাৰো. জুতীতি ৰত্থাভরণোভাসসমুজ্জলা সরীরপ্পভা. বলৰীরিযূপপত্তীতি কাযবলেন চেৰ উস্সাহেন চ সমন্নাগমো.

তেন পাণি কামদদোতি তেন অদ্ধিকানং উপগচ্ছন্তানং হত্থং পসারেত্ৰা অসয্হসেট্ঠিনো দানট্ঠানদস্সনমযেন পুঞ্ঞেন ইদানি ময্হং হত্থো কপ্পরুক্খো ৰিয কামদদো ইচ্ছিতিচ্ছিতদাযী, কামদদো হোন্তো চ মধুস্সৰো ইট্ঠৰত্থুৰিস্সজ্জনকো জাতো. তেন মে ব্রহ্মচরিযেনাতি তেন মম যথাৰুত্তকাযৰেয্যাৰটিযকম্মসঙ্খাতেন সেট্ঠচরিযেন. পুঞ্ঞন্তি পুঞ্ঞফলং. তম্পি হি পুজ্জসভাৰতো, উত্তরপদলোপেন ৰা ‘‘এৰমিদং পুঞ্ঞং পৰড্ঢতী’’তিআদীসু (দী. নি. ৩.৮০) ‘‘পুঞ্ঞ’’ন্তি ৰুচ্চতি.

পঞ্চ সিক্খাপদানি সমাহটানি পঞ্চসিক্খাপদং যথা ‘‘তিভৰং, তিসকট’’ন্তি চ. ব্রহ্মচরিযস্মিন্তি ধম্মদেসনায. সা হি ৰিনেয্যানং ব্রহ্মভাৰাৰহনতো ব্রহ্মং সেট্ঠং চরিযং, ব্রহ্মুনো ৰা ভগৰতো ৰাচসিকং চরিযন্তি ‘‘ব্রহ্মচরিয’’ন্তি ৰুচ্চতি.

সহস্সং মচ্চুহাযিনন্তি সহস্সমত্তা অরহত্তসমধিগমেন মচ্চুৰিসযাতিক্কমেন মচ্চুপহাযিনো জাতা. ব্রহ্মচারী ভৰিস্সামাতি এত্থ যেন ব্রহ্মচরিযেন তে ব্রহ্মচারিনোতি ৰুচ্চন্তি, তং ব্রহ্মচরিযং নিদ্ধারেত্ৰা আহ ‘‘মেথুনৰিরতি ব্রহ্মচরিযন্তি ৰুত্তা’’তি.

নাতিক্কমামাতি ন অতিচরাম অগমনীযট্ঠানেপি ইতরত্থাপি ন ৰীতিক্কমাম. তেনাহ ‘‘অঞ্ঞত্র তাহি ব্রহ্মচরিযং চরামা’’তি. অম্হন্তি অম্হাকং.

অত্তদমনৰসেনাতি যথাপটিঞ্ঞং অরহন্তানং অনুকরণাকারেন পৰত্তচিত্তদমনৰসেন, মনচ্ছট্ঠানং ইন্দ্রিযানং দমনেনাতি অত্থো. সিখাপ্পত্তসেট্ঠচরিযতায অরিযমগ্গো ব্রহ্মচরিযং. ব্রহ্মং সেট্ঠং চরতি এতেনাতি ব্রহ্মচরিযং, সত্থুসাসনং.

অতরমানানন্তি ন তরমানানং দেসকালং উদিক্খন্তানং. ফলাসাৰ সমিজ্ঝতীতি সুদুল্লভফলেপি আসা সম্মাপযোগমন্ৰায সমিজ্ঝতি এৰ. ৰিপক্কব্রহ্মচরিযোস্মীতি ৰিসেসেন নিপ্ফন্নপণীতজ্ঝাসযো পরিপুণ্ণউল়ারমনোরথো. সো হি সেট্ঠমনোসমাচারতায ব্রহ্মচরিযপরিযাযেন ৰুত্তো.

ইদমেৰ সুত্তং আগতট্ঠানন্তি অধিপ্পাযো তেপিটকে বুদ্ধৰচনে ইদমেৰ সুত্তপদং ‘‘ৰীরিযং ব্রহ্মচরিয’’ন্তি আগতট্ঠানন্তি অত্থো. ৰীরিযঞ্হি তস্মিং ৰিসযে উত্তমং পরমুক্কংসগতং তাদিসচরিযাহেতু চাতি ব্রহ্মচরিযন্তি ইধ ৰুত্তং. চতুরঙ্গসমন্নাগতন্তি চতুব্বিধদুক্করকিরিযায সাধকস্স চতুব্বিধস্স অত্তনো পৰত্তিআকারস্স ৰসেন চতুরঙ্গসমন্নাগতং.

কোচি ছিন্নভিন্নপটপিলোতিকধরো দসন্তযুত্তস্স ৰত্থস্স অভাৰতো নিচ্চেলোতি ৰত্তব্বতং লভেয্যাতি তং নিৰত্তেন্তো আহ ‘‘নগ্গো’’তি. এৰং অকাসিং, এৰম্পি সত্তপীল়া মা অহোসীতি অধিপ্পাযো. যথা ‘‘অভিহটং ন সাদিযামী’’তিআদি (ম. নি. ১.১৫৫) ভিক্খাপরিযেসনে উক্কট্ঠচারিতাদস্সনং, এৰং ‘‘নএহি ভদ্দন্তিকাদিভাৰোপী’’তি গহেতব্বং. পুরিসন্তরগতাযাতি পুরিসসমীপগতায. সংকিত্তীযন্তি এতাযাতি সংকিত্তি, গামৰাসিআদীহি সমুদাযৰসেন করিযমানকিরিযা. ইধ পন ভত্তসংকিত্তি অধিপ্পেতাতি আহ ‘‘সংকিত্তেত্ৰা কতভত্তেসূ’’তি. দদন্তি তাযাতি দত্তি. একাহং অন্তরভূতং এতস্স অত্থীতি একাহিকং. এস নযো সেসপদেসুপি. একাহৰারেনাতি একাহিকৰারেন. ‘‘একাহিক’’ন্তিআদিনা ৰুত্তৰিধিমেৰ পটিপাটিযা পৰত্তভাৰং দস্সেতুং পুন ৰুত্তং. তেনাহ ‘‘ইতি এৰরূপ’’ন্তিআদি.

এরকতিণাদীনি ৰাতি এরকতিণাদীনি গন্থিত্ৰা কতনিৰাসনানি ছৰদুস্সানি, নিহীনদুস্সানীতি অত্থো. তন্তাৰুতানন্তি তন্তং পসারেত্ৰা ৰীতানং. পকতিকণ্টকেতি সলাককণ্টকে.

১৫৬. নেকৰস্সগণসঞ্জাতন্তি অনেকৰস্সসমূহসঞ্জাতং. ননু চ ইদানেৰ ‘‘সাযততিযকম্পি উদকোরোহনানুযোগমনুযুত্তো’’তি ৰুত্তং, ‘‘নেকৰস্সগণিকং রজোজল্লং কাযে সন্নিচিত’’ন্তি চ, তদুভযং একস্মিং কথং সম্ভৰতীতি আহ ‘‘ইদং অত্তনো রজোজল্লকৰতসমাদানকালং সন্ধায ৰদতী’’তি. এতেনেৰ ‘‘অচেলকো হোমী’’তি ৰুত্তঅচেলকপটিঞ্ঞা, ‘‘সাণানিপি ধারেমী’’তিআদিনা ৰুত্তছন্নকপটিঞ্ঞা, তত্থাপি সাণ-মসাণ-ছৰদুস্সাদি-নিৰত্থ-পটিঞ্ঞা চ অৰিরুদ্ধাতি দট্ঠব্বা তস্মিং তস্মিং কালে তথা তথা পটিপন্নত্তা. তেতি অচেলকা. সঙ্ঘাতন্তি সব্বসো ঘাতং. তেনাহ ‘‘ৰধ’’ন্তি. সীলৰা নাম নত্থি ‘‘অনভিসন্ধিকম্পি পাপং হোতী’’তি এৰং লদ্ধিকত্তা. সীলং অধিট্ঠাযাতি ইদং পটিক্কমনকিরিযং সন্ধায ৰুত্তং.

পাসণ্ডপরিগ্গহণত্থাযাতি পাসণ্ডেসু অসারসারভাৰৰীমংসনত্থায. তং পব্বজ্জন্তি আজীৰকপব্বজ্জং. ৰিকটভোজনেতি ৰিকতভোজনে ৰিরূপভোজনে. তেনাহ ‘‘অপকতিভোজনে’’তি.

১৫৭. ভিংসনকতস্মিন্তি ভাৰসাধনভাৰী ইদং পদন্তি আহ ‘‘ভিংসনকতস্মিং ভিংসনককিরিযাযা’’তি. ‘‘ভিংসনকত্তস্মি’’ন্তি ৰত্তব্বে একস্স ত-কারস্স লোপো দট্ঠব্বো. যেভুয্যগ্গহণং লোমৰন্তৰসেনপি যোজেতব্বং, ন লোমৰসেনাতি আহ ‘‘বহুতরানং ৰা’’তিআদি.

সু-সদ্দে উ-কারস্স ও-কারং কত্ৰা পাল়িযং ‘‘সোতত্তো’’তি ৰুত্তন্তি তদত্থং ৰিৰরন্তো ‘‘সুতত্তো’’তি আহ. সুট্ঠু অৰতত্তোতি ৰা সোতত্তো. সোসিন্নোতি এত্থাপি এসেৰ নযো. সুদ্ধিৰসনত্থাযাতি সংসারসুদ্ধিগৰেসনত্থায.

ৰিহারস্মিন্তি পচ্চত্তে ভুম্মৰচনন্তি আহ ‘‘ৰিহারো এৰ হি ‘ৰিহারস্মি’ন্তি ৰুত্তো’’তি. তেনেৰ চাতি তেনেৰ ৰিভত্তিৰিপল্লাসৰসেন. এৰং অত্থোতি অযং এৰং লিঙ্গৰিপল্লাসৰসেন অত্থো ৰেদিতব্বো. দুক্খপ্পত্তোতি আনেত্ৰা সম্বন্ধো. সব্বত্থাতি সুখদুক্খে লাভালাভাদিকে চ. তুলিতোতি তুলাসদিসো.

দুক্করকারিকাদিসুদ্ধিৰণ্ণনা নিট্ঠিতা.

আহারসুদ্ধিৰণ্ণনা

১৫৮. সুজ্ঝিতুন্তি সংসারতো সুজ্ঝিতুং.

১৫৯. আসীতিকপব্বানীতি আসীতিকপিট্ঠিপব্বানি, ‘‘কাল়পব্বানী’’তি ৰদন্তি. পব্বানং মজ্ঝে. উন্নতুন্নতানীতি মংসে মিলাতে দ্ৰিন্নং সন্ধীনং অন্তরে ৰাতেনুদ্ধুমাতধমনীজালতায উন্নতানি উন্নতানীতি. আনিসদন্তি আনিসদট্ঠানং. নিসিন্নট্ঠানন্তি পংসূহি, ৰালিকাহি ৰা নিচিতং নিসিন্নট্ঠানং. সরপোঙ্খেনাতি সরস্স পোঙ্খপ্পদেসেন, সরপোঙ্খসঞ্ঞিতেন ৰা মগ্গেন. অক্কন্তন্তি অক্কন্তট্ঠানং. তক্কগোল়িকসদিসানং, সরীরঘংসনত্থং কত কুরুৰিন্দগোল়কানং ৰা আৰল়ি ৰট্টনাহারো. ৰংসতোতি পিট্ঠিৰংসতো. মণ্ডলেতি ভিত্তিপাদানং মত্থকে ঠপিতমণ্ডলকে সীসগ্গেন পতিট্ঠহন্তি. ন এৰং ফাসুল়িযোতি যথা যথা ৰুত্তগোপানসিযো পপতা তিট্ঠন্তি, ন এৰং বোধিসত্তস্স ফাসুকাপি পপতা ঠিতা.

ওক্খাযিকাতি অৰক্খাযিকা, হেট্ঠা হুত্ৰা নিন্নভাৰেন পঞ্ঞাযমানা. এৰরূপাতি যথাৰুত্তরূপা, নিন্নতরাতি অত্থো. যাৰ পিট্ঠিকণ্টকংঅল্লীনা হোতীতি ময্হং উদরচ্ছৰি যাৰ পিট্ঠিকণ্টকং, তাৰ তং আহচ্চ ঠিতত্তা অল্লীনা হোতি উদরিযস্স পরিক্খযেন অন্তানঞ্চ সুট্ঠুমিলাততায. ভারিযভারিযাতি গরুতরা. সহউদরচ্ছৰিং পিট্ঠিকণ্টকং, সহপিট্ঠিকণ্টকং উদরচ্ছৰিন্তি যোজনা. নেৰ নিক্খমতি আহারসন্নিস্সযআপোধাতুযা সব্বসো ৰিসুক্খত্তা. পূতিমূলানীতি লোমমূলানং পরিব্রূহনকে মংসে লোহিতে চ পরিক্খীণে তানি সুক্খানি ঠানতো ভট্ঠানি অভাৰেনেৰ ‘‘পূতিমূলানী’’তি ৰুত্তানি. তেনাহ ‘‘তস্স পনা’’তিআদি.

অধিগতাতি ইদানি অধিগতা. যথা এতরহি ৰিপস্সনাপঞ্ঞায অধিগতত্তাতি ইমিনা কিঞ্চাপি মহাবোধিসত্তা পরিপাকগতঞাণা ৰসীভূতজ্ঝানাভিঞ্ঞা ৰিপস্সনায পরিকম্মং করোন্তি, যথা চ নেসং চরিমভৰে ৰিপস্সনাচারো, ন তথা তদাতি দস্সেতি. এতদেৰাতি যং যেন ৰুত্তং অত্থজাতং, এতদেৰ এত্থ এতস্মিং পাঠপদেসে যুত্তং পুব্বেনাপরং অৰিরুজ্ঝনতো. ইতরথাতি ভিক্খূহি ৰুত্তপ্পকারেন অননুরূপো সিযা ‘‘ইমিস্সা’’তি ৰুত্তায অঞ্ঞত্তে.

আহারসুদ্ধিৰণ্ণনা নিট্ঠিতা.

সংসারসুদ্ধিআদিৰণ্ণনা

১৬০. সংসারেনাতি অপরাপরং চৰনুপপজ্জনৰসেন ভৰেসু সংসরণেন. যং সন্ধায ৰুত্তং –

‘‘খন্ধানঞ্চ পটিপাটি, ধাতুআযতনান চ;

অব্বোচ্ছিন্নং ৰত্তমানা, সংসারোতি পৰুচ্চতী’’তি. (ৰিসুদ্ধি. ২.৬১৯; দী. নি. অট্ঠ. ২.৯৫; সং. নি. অট্ঠ. ২.২.৬০; অ. নি. অট্ঠ. ২.৪.১৯৯; ধ. স. অট্ঠ. নিদানকথা; ৰিভ. অট্ঠ. ২২৬; সু. নি. অট্ঠ. ২.৫২৩; উদা. অট্ঠ. ৩৯; ইতিৰু. অট্ঠ. ১৪, ৫৮; থেরগা. অট্ঠ. ১.৬৭, ৯৯; বু. ৰং. অট্ঠ. ৫৮; চূল়নি. অট্ঠ. ৬; পটি. ম. অট্ঠ. ২.১.১১৭; ৰিসুদ্ধি. মহাটী. ১.১২৭; অ. নি. টী. ২.৪.৯; সারত্থ. টী. ১.১);

বহুকন্তি বহুকালং বহুক্খত্তুং. উপপজ্জিত্ৰাতি তত্থ তত্থ ভৰে নিব্বত্তিত্ৰা. আৰাসেনাতি তস্মিং তস্মিং সত্তাৰাসে আৰসনেন নিব্বত্তিত্ৰা জীৰনেন. খন্ধাযেৰ ৰুত্তা তেসংযেৰ পৰত্তিৰিসেসস্স তেন তেন পরিযাযেন ৰুত্তত্তা. বহুযাগেতি অজসূকরগোমায্ৰাদিকে বহুৰিধে মহাযঞ্ঞে. বহুঅগ্গীতি ৰাচাপেয্যাদিৰসেন অন্তমসো পাকযঞ্ঞাদিৰসেন চ বহুকেপি অগ্গী পরিচরণেন.

১৬১. বালদারকোপি ‘‘দহরো’’তি ৰুচ্চতীতি ততো ৰিসেসনত্থং ‘‘যুৰা’’তি ৰুত্তং. অতিক্কন্তপঠমৰযা সত্তা সভাৰেন পলিতসিরা হোন্তীতি পঠমৰযে ঠিতভাৰং দস্সেতুং ‘‘সুসুকাল়কেসো’’তি ৰুত্তং. জরাজিণ্ণোতি জরায জিণ্ণো, ন অকালিকেন জরায অভিভূতো. উক্কংসগতবুদ্ধতায ৰুদ্ধো. তেনাহ ‘‘ৰড্ঢিত্ৰা ঠিতঅঙ্গপচ্চঙ্গো’’তি, আরোহপরিণাহৰসেন ৰুদ্ধিরহিতোতি অত্থো. জাতিমহল্লকোতি জাতিযা মহল্লকো, ন ভোগপরিৰারাদীহীতি অত্থো. অদ্ধগতোতি এত্থ অদ্ধ-সদ্দো দীঘকালৰাচীতি আহ ‘‘বহুঅদ্ধানং গতো’’তি. ৰযোতিআদিপদলোপেনাযং নিদ্দেসোতি আহ ‘‘পচ্ছিমৰয’’ন্তি. পদসতম্পি…পে… সমত্থতাতি পদসতম্পি পদসহস্সম্পি সোতপথমাগচ্ছন্তমেৰ উগ্গহণসমত্থতা পরিগ্গহেতুং সমত্থতা. অযঞ্চ গতিযা ব্যাপারোতি সক্কা ৰিঞ্ঞাতুং গহণমত্তভাৰতো. তদেৰাতি পদসতম্পি পদসহস্সম্পি. আধারণং অপিলাপনৰসেন হদযে ধারণং. উপনিবন্ধনং যথা ন পমুট্ঠং হোতি, তথা উপেচ্চ অপরাপরং নিবন্ধনং. অযং পন সতিযা ব্যাপারোতি সক্কা ৰিঞ্ঞাতুং. পাল়িযঞ্চ ‘‘পরমায গতিযা চ সতিযা চ ধিতিযা চা’’তি ৰুত্তং, পরতো চ ‘‘এৰং অধিমত্তগতিমন্তো’’তি ৰুত্তং. সমত্থৰীরিযং ধিতি নামাতি ৰিসিট্ঠৰিসযং দস্সেন্তো যথাৰুত্তসতিসমাযোগং তস্স দীপেতি. তস্সাতি যথাৰুত্তগতিসতিধিতীহি সুভধাতৰচীপরিচিতস্স পরিযত্তিধম্মস্স আগমৰসেন অত্থদস্সনসমত্থতা যুত্তিৰসেন কারণদস্সনসমত্থতা.

দল়্হং (অ. নি. টী. ৩.৯.৩৮) থিরং ধনু এতস্সাতি দল়্হধন্ৰা, সো এৰ ইধ ‘‘দল়্হধম্মা’’তি ৰুত্তো. পটিসত্তুৰিধমনত্থং ধনুং গণ্হাতীতি ধনুগ্গহো, সো এৰ উসুং সরং অসতি খিপতীতি ইস্সাসোতি আহ ‘‘ধনুং গহেত্ৰা ঠিতো ইস্সাসো’’তি. দ্ৰিসহস্সপলং লোহাদিভারং ৰহিতুং সমত্থং দ্ৰিসহস্সথামং. তেনাহ ‘‘দ্ৰিসহস্সথামং নামা’’তিআদি. দণ্ডেতি ধনুদণ্ডে. যাৰ কণ্ডপ্পমাণাতি দীঘতো যত্তকং কণ্ডস্স পমাণং, তত্তকে ধনুদণ্ডে উক্খিত্তমত্তে আরোপিতো চেৰ হোতি জিযাদণ্ডো, সো চ ভারো পথৰিতো মুচ্চতি, এৰং ইদং ‘‘দ্ৰিসহস্সথামং নাম ধনূতি দট্ঠব্বং. উগ্গহিতসিপ্পোতি উগ্গহিতধনুসিপ্পো. কতহত্থোতি থিরতরং লক্খেসু অৰিরজ্ঝনসরক্খেপো. ঈদিসো পন তত্থ ৰসীভূতো কতহত্থো নাম হোতীতি আহ ‘‘চিণ্ণৰসীভাৰো’’তি. কতং রাজকুলাদীসু উপেচ্চ অসনং এতেন সো কতূপাসনোতি আহ ‘‘রাজকুলাদীসু দস্সিতসিপ্পো’’তি. এৰং কতন্তি এৰং অন্তোসুসিরকরণাদিনা সল্লহুকং কতং.

ওলোকেতীতি উদিক্খতি. এৰং সন্তেপি তেসং ৰারো পঞ্ঞাযতীতি তেসং ভিক্খূনং ‘‘অযং পঠমং পুচ্ছতি, অযং দুতিয’’ন্তিআদিনা পুচ্ছনৰারো তাদিসস্স পঞ্ঞৰতো পঞ্ঞাযতি সুখুমস্স অন্তরস্স লব্ভনতো. বুদ্ধানং পন ৰারোতি ঈদিসে ঠানে বুদ্ধানং দেসনাৰারো অঞ্ঞেসং নপঞ্ঞাযনতো বুদ্ধানংযেৰ পঞ্ঞাযতি. ইদানি তমেৰ পঞ্ঞাযনতং যুত্তিতো দস্সেন্তো ‘‘ৰিদত্থিচতুরঙ্গুলছায’’ন্তিআদিমাহ. অচ্ছরাসঙ্ঘাটমত্তে খণে অনেক-কোটিসহস্স-চিত্তপৰত্তিসম্ভৰতো ‘‘ৰিদত্থিচতুরঙ্গুলছাযং অতিক্কমনতো পুরেতরংযেৰ ভগৰা…পে… কথেতী’’তি ৰত্ৰা ততো লহুতরাপি সত্থু দেসনাপৰত্তি অত্থেৰাতি দস্সেন্তো ‘‘তিট্ঠন্তু ৰা তাৰ এতে’’তিআদিমাহ. ইদানি তত্থ কারণং দস্সেতুং ‘‘কস্মা’’তিআদি ৰুত্তং. সোল়স পদানি কথেতীতি এতেন লোকিযজনস্স একপদুচ্চারণক্খণে ভগৰা অট্ঠৰীসসতপদানি কথেতীতি দস্সেতি. ইদানি তস্সপি কারণং দস্সেতুং ‘‘কস্মা’’তিআদি ৰুত্তং.

ধম্মোতি পাল়ি. পজ্জতি অত্থো এতেনাতি পদং, তদত্থো. অত্থং ব্যঞ্জেতীতি ব্যঞ্জনং, অক্খরং. তঞ্হি পদৰাক্যক্খরভাৰেহি পরিচ্ছিজ্জমানং তং তং অত্থং ব্যঞ্জেতি পকাসেতি. তেনাহ ‘‘ধম্মপদব্যঞ্জনন্তি পাল়িযা পদব্যঞ্জনং, তস্স তস্স অত্থস্স ব্যঞ্জনকং অক্খর’’ন্তি. এতেন অপরাপরেহি পদব্যঞ্জনেহি সুচিরম্পি কালং কথেন্তস্স তথাগতস্স ন কদাচি তেসং পরিযাদানং অত্থীতি দস্সেতি. পঞ্হং ব্যাকরোন্তি এতেনাতি পঞ্হব্যাকরণং, তথাপৰত্তপটিভানং. অপরিক্খযপটিভানা হি বুদ্ধা ভগৰন্তো, যতো ৰুত্তং ‘‘নত্থি ধম্মদেসনায হানী’’তি (দী. নি. টী. ৩.১৪১, ৩০৫; ৰিভ. মূলটী. ১.সুত্তন্তভাজনীযৰণ্ণনা). তেনাহ ‘‘ইমিনা কিং দস্সেতী’’তিআদি. তথা আসন্নপরিনিব্বানস্সপি ভগৰতো দেসনায ইতরায চ ৰিসেসাতাৰোতি পঠমবুদ্ধৰচনম্পি মজ্ঝিমবুদ্ধৰচনম্পি পচ্ছিমবুদ্ধৰচনম্পি সদিসমেৰ. আসীতিকৰস্সতো পরং পঞ্চমো আযুকোট্ঠাসো.

১৬২. কামঞ্চেত্থ ভগৰতা নাগসমালত্থেরস্স অচ্ছরিযঅব্ভুতপৰেদনমুখেন অত্তনো লোমানং হট্ঠভাৰস্স পৰেদিতত্তা ‘‘লোমহংসনপরিযাযো’’তি নামং গহিতং, তথাপি সব্বঞ্ঞুতঞ্ঞাণাদি-অনঞ্ঞসাধারণঞাণানুভাৰ-ৰিভাৰনাদিৰসেন সোল়সসমূহতো সীহনাদস্স নদনেন দেসনায পৰত্তিতত্তা ‘‘মহাসীহনাদো’’ত্ৰেৰ সঙ্গীতিকারমহাথেরেহি নামং ঠপিতন্তি দট্ঠব্বং.

মহাসীহনাদসুত্তৰণ্ণনায লীনত্থপ্পকাসনা সমত্তা.

৩. মহাদুক্খক্খন্ধসুত্তৰণ্ণনা

১৬৩. ততো পরন্তি তিণ্ণং জনানং উপরি সঙ্ঘো চতুৰগ্গকরণীযাদিকম্মেহি পটিকম্মপ্পত্তত্তা. গামং গতোতি ৰুচ্চতি গামং উদ্দিস্স গতত্তা, এৰং সাৰত্থিং পৰিসিতুং ৰিহারতো নিক্খন্তা ‘‘পৰিসিংসূ’’তি ৰুত্তা. পরিঞ্ঞন্তি পহানপরিঞ্ঞং. সা হি সমতিক্কমো, ন ইতরা. রূপৰেদনাসুপীতি ‘‘রূপানং পরিঞ্ঞং, ৰেদনানং পরিঞ্ঞ’’ন্তি এত্থাপি. কামং সব্বেসং তিত্থিযানং কামাদিপরিঞ্ঞাপঞ্ঞাপনহেতুভূতো সমযো নত্থি, যেসং পন অত্থি, তে উপাদায ‘‘সকসমযং জানন্তা’’তি ৰুত্তং. ‘‘যতো যতো খো ভো অযং ভিক্খু ৰিৰিচ্চেৰ কামেহি…পে… পঠমং ঝানং উপসম্পজ্জ ৰিহরতি, এত্তাৰতা খো ভো কামানং পরিঞ্ঞা হোতী’’তি এৰং সরূপতো পঠমজ্ঝানং ৰিভাৰেতুং অসক্কোন্তাপি কেৰলং অচ্চন্তপ্পহানসঞ্ঞায কামানং পরিঞ্ঞং পঞ্ঞপেয্যুং পঠমজ্ঝানং ৰদমানা. তং কিস্স হেতু? তাদিসস্স আগমাধিগমস্সাভাৰতো. রূপৰেদনাপরিঞ্ঞাসুপি এসেৰ নযো. ৰুচ্চেথাতি ৰুচ্চেয্য. দুতিযপদেপীতি ‘‘অনুসাসনিযা ৰা অনুসাসনি’’ন্তি এৰং ৰুত্তৰাক্যেপি. তে কির ভিক্খূ.

১৬৫. ন চেৰ সম্পাযিস্সন্তীতি ন চেৰ সম্মদেৰ পকারেহি গমেস্সন্তি ঞাপেস্সন্তি. তেনাহ ‘‘সম্পাদেত্ৰা কথেতুং ন সক্খিস্সন্তী’’তি. যস্মা অৰিসযে পঞ্হো পুচ্ছিতো হোতি, তস্মা আপজ্জিস্সন্তীতি যোজনা. সদেৰকেতি অরূপদেৰগ্গহণং. তে হি লোকিযদেৰেহি দীঘাযুকতাদিনা উক্কট্ঠা. সমারকেতি কামাৰচরদেৰগ্গহণং. সব্রহ্মকেতি রূপাৰচরব্রহ্মগ্গহণং. সস্সমণব্রাহ্মণিযাতি এত্থ সমণগ্গহণেন পব্বজিতে, ব্রাহ্মণগ্গহণেন জাতিব্রাহ্মণে, পুন দেৰগ্গহণেন সম্মুতিদেৰে, মনুস্সগ্গহণেন অৰসিট্ঠমনুস্সকাযং পরিযাদিযতি. লোকপজাগ্গহণেন পন পযোজনং অট্ঠকথাযং দস্সিতমেৰ. অঞ্ঞথা আরাধনং নাম নত্থীতি ইমিনা কামরূপৰেদনাসু অস্সাদাদীনং যাথাৰতো অৰবোধো এৰ ইতো বাহিরকানং নত্থি, কুতো পৰেদনাতি দস্সেতি.

১৬৬. চিত্তারাধনন্তি যাথাৰপৰেদনেন পরেসং চিত্তস্স পরিতোসনং. বন্ধনট্ঠেন গুণাতি কামরাগসংযোজনস্স পচ্চযভাৰেন ৰত্থুকামেসুপি বন্ধনট্ঠো ৰুত্তো, কোট্ঠাসট্ঠো ৰা গুণট্ঠো দট্ঠব্বো. তরযন্তীতি তরমানা যন্তি গচ্ছন্তি. অতীতাদিভিন্নপঠমাদিৰযা এৰ চিত্ততা রাসিভাৰেন ৰযোগুণাতি গহিতাতি আহ ‘‘রাসট্ঠো গুণট্ঠো’’তি. চক্খুৰিঞ্ঞেয্যাতি ৰা চক্খুৰিঞ্ঞাণতংদ্ৰারিকৰিঞ্ঞাণেহি ৰিজানিতব্বা. সোতৰিঞ্ঞেয্যাতিআদীসুপি এসেৰ নযো. ইট্ঠারম্মণভূতাতি সভাৰেনেৰ ইট্ঠারম্মণজাতিকা, ইট্ঠারম্মণভাৰং ৰা পত্তা. কমনীযাতি কামেতব্বা. মনৰড্ঢনকাতি মনোহরা. এতেন পরিকপ্পনতোপি ইট্ঠভাৰং গণ্হাতি. পিযজাতিকাতি পিযাযিতব্বসভাৰা. কামূপসংহিতাতি কামরাগেন উপেচ্চ সন্ধানিযা সম্বদ্ধা (অ. নি. টী. ৩.৬.৬৩) কাতব্বাতি আহ ‘‘আরম্মণং কত্ৰা’’তি.

১৬৭. সঞ্ঞং ঠপেত্ৰাতি ‘‘ইমস্মিং অঙ্গুলিকাদিপব্বে গহিতে সতং হোতি, ইমস্মিং সহস্স’’ন্তিআদিনা সঞ্ঞাণং কত্ৰা গণনা. অচ্ছিদ্দগণনাতি ‘‘একং দ্ৰে’’তিআদিনা নৰন্তৰিধিনা নিরন্তরগণনা. পিণ্ডগণনাতি সঙ্কলনপটুপ্পাদনাদিনা পিণ্ডিত্ৰা গণনা. তেনাহ ‘‘খেত্তং ওলোকেত্ৰা’’তিআদি. কসনং কসীতি কসিগ্গহণেন সব্বো কসিপটিবদ্ধো জীৰিকূপাযো গহিতোতি আহ ‘‘কসীতি কসিকম্ম’’ন্তি. জঙ্ঘৰণিজ্জাতি জঙ্ঘসত্থৰসেন ৰণিজ্জং আহ, থলৰণিজ্জাতি সকটসত্থৰসেন. আদি-সদ্দেন নাৰাপণাদিৰসেন ৰোহারং. ৰণিপ্পথোতি ৰণিজমগ্গো, দানগ্গহণৰসেন সংৰোহারোতি অত্থো. উসূনং অসনকম্মং ইস্সত্তং, ধনুসিপ্পেন জীৰিকা, ইধ পন ইস্সত্তং ৰিযাতি ইস্সত্তং, সব্বআৰুধজীৰিকাতি আহ ‘‘আৰুধং গহেত্ৰা উপট্ঠানকম্ম’’ন্তি. পোরোহিচ্চামচ্চকম্মাদি রাজকম্মং.আদি-সদ্দেন রথসিপ্পখত্তৰিজ্জাসিপ্পাদি-ৰুত্তাৰসেসং মহাসিপ্পং খুদ্দকসিপ্পঞ্চ সঙ্গণ্হাতি. সীতস্স পুরক্খতোতি সীতস্স পুরতো কতো. যো হি সীতকালে জীৰিকাহেতু সীতলপদেসং পক্খন্দতি, সো ৰাল়মিগাদীহি ৰিয সীতেন পরিপাতিযমানো তেন পুরতো কতো ৰিয হোতি. তেনাহ ‘‘সীতেন বাধিযমানো’’তি. উণ্হস্স পুরক্খতোতি এত্থাপি এসেৰ নযো. সরিত্ৰাতি সংসপ্পিত্ৰা. ঘট্টিযমানোতি হিংসিযমানো বাধিযমানো. আবাধনং আবাধো, পীল়াতি অত্থো. কামহেতুন্তি ৰা ভাৰনপুংসকনিদ্দেসো যথা ‘‘ৰিসমং চন্দিমসূরিযা পরিৰত্তন্তী’’তি (অ. নি. ৪.৭০). তথা সেসপদদ্ৰযেপি. তেনেৰাহ ‘‘কামানমেৰ হেতূ’’তি. কামানং হেতূতি এত্থ পুরিমপদাৰধারণমযুত্তং তদঞ্ঞপচ্চযপটিক্খেপাপত্তিতো, তথা উত্তরপদাৰধারণং কামানং কদাচি অহেতুভাৰস্সপি সম্ভৰতো, তস্মা ‘‘উপ্পজ্জতিযেৰা’’তি ৰুত্তং.

উট্ঠহতোতি ইমিনা উট্ঠানৰীরিযং ৰুত্তন্তি আহ ‘‘আজীৰসমুট্ঠাপকৰীরিযেনা’’তি. তং ৰীরিযন্তি আজীৰিকসমুট্ঠাপকৰীরিযং. পুব্বেনাপরং ঘটেন্তস্সাতি আরম্ভতো পট্ঠায নিরন্তরং পৰত্তেন্তস্স. চিত্তে উপ্পন্নবলৰসোকেন সোচতীতি চিত্তসন্তাপেন অন্তো নিজ্ঝাযতি. কাযে উপ্পন্নদুক্খেনাতি তস্সেৰ সোকস্স ৰসেন কাযে উপ্পন্নদুক্খেন. সোকুদ্দেসেন তং তং ৰিপ্পলপেন্তো ৰা পরিদেৰতি. উরং তাল়েত্ৰাতি ৰক্খপ্পদেসং পহরিত্ৰা. ‘‘মোঘ’’ন্তিআদি পরিদেৰনাকারদস্সনঞ্চেৰ সম্মোহাপজ্জনাকারদস্সনঞ্চ. মেতি ৰত্ৰা পুন নোতি পুথুৰচনং অত্তনো উভযথাপি ৰোহরিতব্বতো, ব্যামূল়্হৰচনং ৰা সোকৰসেন.

১৬৮. ইধ কামগ্গহণেন ৰিসেসতো ৰত্থুকামা গহিতাতি কামাদিগ্গহণং কতং, নানন্তরিযতায পন কিলেসকামোপি গহিতো এৰ. অসিচম্মন্তি এত্থ চম্মগ্গহণেন ন কেৰলং চম্মমযস্স, চম্মপরিসিব্বিতস্সেৰ ৰা গহণং, অথ খো সব্বস্সপি আৰুধবাধকস্স গহণন্তি দস্সেন্তো ‘‘খেটকফলকাদীনী’’তি আহ. আদি-সদ্দেন সরাদিসঙ্গহো. ধনুকলাপং সন্নয্হিত্ৰাতি ধনুঞ্চেৰ খুরপ্পতূণিঞ্চ সন্নয্হিত্ৰা, ধনুদণ্ডস্স জিযায তথাভাৰকরণাদিপি (অ. নি. টী. ৩.৫.৭৬) ধনুনো সন্নয্হনন্তি. দ্ৰিন্নং সেনানং ব্যূহসংৰিধানেন ৰা উভতোব্যূল়্হং. ৰিজ্জোতলন্তেসূতি নিসিতপীতফলতায ৰিজ্জোতনৰসেন পরিৰত্তমানেসু.

পাকারসমীপাতিসঙ্খারতায পাকারপাদা উপকারিযো, যা ‘‘উদ্দাপা’’তি ৰুচ্চন্তি. সতদন্তেনাতি অনেকসতদন্তকেন, যস্স তিখিণদন্তানি অনেকসতানি মূলানি হোন্তি. অতিভারতায দসৰীসমত্তাপি জনা উক্খিপিতুং ন সক্কোন্তি, যন্তৰসেন পন উক্খিপিত্ৰা বন্ধিত্ৰা ঠপেন্তি. তেনাহ ‘‘অট্ঠদন্তাকারেনা’’তিআদি. ওমদ্দন্তীতি ওট্ঠপেন্তি.

১৬৯. সন্ধিম্পি ছিন্দন্তি চোরিকায জীৰিতুকামা. নিল্লোপন্তি নিস্সেসৰিলোপং, একং পরিত্তং গামং পরিৰারেত্ৰা তত্থ কিঞ্চিপি গয্হূপগং অসেসেত্ৰা করমরগ্গহণং. তেনাহ ‘‘মহাৰিলোপ’’ন্তি. পন্থদুহনকম্মং অটৰিমগ্গে ঠত্ৰা অদ্ধিকানং ৰিলুম্পনং. পহারসাধনত্থং (অ. নি. টী. ২.২.১) দণ্ডপ্পহারস্স সুখসিদ্ধিঅত্থং. কঞ্জিতো নিব্বত্তং কঞ্জিযং, আরনালং. যং ‘‘বিলঙ্গ’’ন্তিপি ৰুচ্চতি, তং যত্থ সিঞ্চতি, সা কঞ্জিযউক্খলিকা. বিলঙ্গথালিকসদিসকরণং বিলঙ্গথালিযং. সীসকপালং উপ্পাটেত্ৰাতি অযোগুল়পৰেসনপ্পমাণং ছিদ্দং কত্ৰা. সঙ্খমুণ্ডকম্মকারণন্তি সঙ্খং ৰিয মুণ্ডকম্মকারণং.

রাহুমুখকম্মকারণন্তি রাহুমুখগত-সূরিযসদিস-কম্মকারণং. জোতিমালিকন্তি জোতিমালৰন্তং কম্মকারণং. হত্থপজ্জোতিকন্তি হত্থপজ্জোতনকম্মকারণং. এরকৰত্তকম্মকারণন্তি এরকৰত্তসদিসে সরীরতো বদ্ধে উপ্পাটনকম্মকারণং. চীরকৰাসিককম্মকারণন্তি সরীরতো উপ্পাটিতবদ্ধচীরকাহি নিৰাসাপনকম্মকারণং. তং করোন্তা যথা গীৰতো পট্ঠায বদ্ধে কন্তিত্ৰা কটিযমেৰ ঠপেন্তি, এৰং গোপ্ফকতো পট্ঠায কন্তিত্ৰা কটিযমেৰ ঠপেন্তি. অট্ঠকথাযং পন ‘‘কটিতো পট্ঠায কন্তিত্ৰা গোপ্ফকেসু ঠপেন্তী’’তি ৰুত্তং. এণেয্যককম্মকারণন্তি এণীমিগসদিসকম্মকারণং. অযৰলযানি দত্ৰাতি অযৰলযানি পটিমুঞ্চিত্ৰা. অযসূলানি কোট্টেন্তীতি কপ্পরজণ্ণুককোটীসু অযসূলানি পৰেসেন্তি. ন্তি তং তথাকতকম্মকারণং সত্তং.

বল়িসমংসিকন্তি বল়িসেহি মংসুপ্পাটনকম্মকারণং. কহাপণিকন্তি কহাপণমত্তসো ছিন্দনকম্মকারণং. কোট্টেন্তীতি ছিন্দন্তি. খারাপতচ্ছিকন্তি তচ্ছেত্ৰা খারাৰসিঞ্চনকম্মকারণং. পলিঘপরিৰত্তিকন্তি পলিঘস্স ৰিয পরিৰত্তনকম্মকারণং. একাবদ্ধং করোন্তি অযসূলস্স কোট্টনেন. পলালপীঠকন্তি পলালপীঠস্স ৰিয সরীরস্স সংৰেল্লনকম্মকারণং. কারণিকাতি ঘাতনকারকা. পলালৰট্টিং ৰিয কত্ৰাতি যথা পলালপীঠং করোন্তা পলালৰট্টিং কত্ৰা সংৰেল্লনৰসেন নং (অ. নি. টী. ২.২.১) ৰেঠেন্তি, এৰং করোন্তীতি অত্থো. ছাতকেহীতি বুভুক্খিতেহি কোলেয্যকসুনখেহি. বলৰন্তো হি তে জৰযোগ্গা সূরা চ হোন্তি. কম্মৰসেন সম্পরেতি এত্থাতি সম্পরাযো, পরলোকো. তত্থ ভৰোতি সম্পরাযিকো.

১৭০. ছন্দরাগো ৰিনীযতি চেৰ পহীযতি চ এত্থাতি নিব্বানং ছন্দরাগৰিনযো ছন্দরাগপ্পহানঞ্চাতি. তেনাহ ‘‘নিব্বানঞ্হী’’তি. তত্থ আগম্মাতি ইদং যো ছন্দরাগং ৰিনেতি পজহতি, তস্স আরম্মণং সন্ধায ৰুত্তং. তীহি পরিঞ্ঞাহীতি ইমিনা ঞাততীরণপরিঞ্ঞাহি পরিজানিস্সন্তীতি নেতং ঠানং ৰিজ্জতি. কো পন ৰাদো পহানপরিঞ্ঞাযাতি দস্সেতি? তথভাৰাযাতি পরিজাননকভাৰায.