সোল়সহারৰণ্ণনা

১. দেসনাহারৰণ্ণনা

তত্থ যে উপাদানক্খন্ধধম্মে উপাদায পথৰীআদিভূতাদিভেদা পঞ্ঞত্তি, তে পঞ্ঞত্তিপটিপাদনভাৰেন জাতিজরামরণৰিসেসনদুক্খপরিযাযেন চ ৰুত্তা তণ্হাৰজ্জা তেভূমকধম্মা দুক্খসচ্চং. মঞ্ঞনাভিনন্দননন্দীপরিযাযেহি ৰুত্তা তণ্হা সমুদযসচ্চং. অযং তাৰ সুত্তন্তনযো. অভিধম্মনযে পন যথাৰুত্ততণ্হায সদ্ধিং ‘‘অস্সুতৰা’’তিআদিনা দীপিতা অৰিজ্জাদযো, মঞ্ঞনাপরিযাযেন গহিতা মানদিট্ঠিযো, ভৰপদেন গহিতো কম্মভৰো চাতি সব্বেপি কিলেসাভিসঙ্খারা সমুদযসচ্চং. উভিন্নং অপ্পৰত্তি নিরোধসচ্চং. অরিযধম্মগ্গহণেন, পরিঞ্ঞাভিক্খুসেক্খাভিঞ্ঞাগহণেহি, রাগাদিখযৰচনেহি, সম্মাসম্বোধিগহণেন চ মগ্গসচ্চং. কেচি পন তণ্হাক্খযাদিৰচনেহি নিরোধসচ্চং উদ্ধরন্তি, তং অট্ঠকথায ৰিরুজ্ঝতি তত্থ তণ্হাক্খযাদীনং মগ্গকিচ্চভাৰস্স উদ্ধটত্তা.

তত্থ সমুদযেন অস্সাদো, দুক্খেন আদীনৰো, মগ্গনিরোধেহি নিস্সরণং, তেসং ভিক্খূনং মানভঞ্জনং ফলং, তথা ‘‘যথাৰুত্তৰিভাগাৰবোধো’’তিআদিনা ৰুত্তং পযোজনঞ্চ. তস্স নিপ্ফত্তিকারণত্তা দেসনায ৰিচিত্ততা চতুন্নং পুগ্গলানং যাথাৰতো সভাৰূপধারণঞ্চ উপাযো, পথৰীআদীসু পুথুজ্জনাদীনং পৰত্তিদস্সনাপদেসেন পথৰীআদযো একন্ততো পরিজানিতব্বা, মঞ্ঞনা চ পহাতব্বাতি অযমেত্থ ভগৰতো আণত্তীতি. অযং দেসনাহারো.

২. ৰিচযহারৰণ্ণনা

মঞ্ঞনানং সক্কাযস্স অৰিসেসহেতুভাৰতো, কস্সচিপি তত্থ অসেসিতব্বতো চ সব্বগহণং, সভাৰধারণতো নিস্সত্তনিজ্জীৰতো চ ধম্মগ্গহণং, পতিট্ঠাভাৰতো আৰেণিকহেতুভাৰতো চ মূলগ্গহণং, কারণভাৰতো দেসনত্থসম্ভৰতো চ পরিযাযগ্গহণং, সম্মুখভাৰতো সম্পদানত্থসম্ভৰতো চ ‘‘ৰো’’তি ৰচনং, তথারূপগুণযোগতো অভিমুখীকরণতো চ ‘‘ভিক্খৰে’’তি আলপনং. দেসেতুং সমত্থভাৰতো তেসং সতুপ্পাদনত্থঞ্চ ‘‘দেসেস্সামী’’তি পটিজাননং, দেসেতব্বতায পটিঞ্ঞাতভাৰতো, যথাপটিঞ্ঞঞ্চ দেসনতো ‘‘ত’’ন্তি পচ্চামসনং, সোতব্বভাৰতো, সৰনত্থস্স চ একন্তেন নিপ্ফাদনতো ‘‘সুণাথা’’তি ৰুত্তং. সক্কাতব্বতো, সক্কচ্চকিরিযায এৰ চ তদত্থসিদ্ধিতো ‘‘সাধুক’’ন্তি ৰুত্তং. ধম্মস্স মনসিকরণীযতো তদধীনত্তা চ সব্বসম্পত্তীনং ‘‘মনসি করোথা’’তি ৰুত্তং যথাপরিঞ্ঞাতায দেসনায পরিব্যত্তভাৰতো ৰিত্থারত্থসম্ভৰতো চ ‘‘ভাসিস্সামী’’তি ৰুত্তং. ভগৰতো সদেৰকেন লোকেন সিরসা সম্পটিচ্ছিতব্বৰচনত্তা, তস্স চ যথাধিপ্পেতত্থসাধনতো ‘‘এৰ’’ন্তি ৰুত্তং. সত্থু উত্তমগারৰট্ঠানভাৰতো, তত্থ চ গারৰস্স উল়ারপুঞ্ঞভাৰতো ‘‘ভন্তে’’তি ৰুত্তং. ভিক্খূনং তথাকিরিযায নিচ্ছিতভাৰতো ৰচনালঙ্কারতো চ ‘‘খো’’তি ৰুত্তং. সৰনস্স পটিজানিতব্বতো, তথা তেহি পটিপন্নত্তা চ ‘‘পচ্চস্সোসু’’ন্তি ৰুত্তং পচ্চক্খভাৰতো, সকলস্সপি একজ্ঝং করণতো ‘‘এত’’ন্তি ৰুত্তং.

ৰুচ্চমানস্স পুগ্গলস্স লোকপরিযাপন্নত্তা লোকাধারত্তা চ লোকং উপাদায ‘‘ইধা’’তি ৰুত্তং. পটিৰেধবাহুসচ্চাভাৰতো পরিযত্তিবাহুসচ্চাভাৰতো চ ‘‘অস্সুতৰা’’তি ৰুত্তং. পুথূসু, পুথু ৰা জনভাৰতো ‘‘পুথুজ্জনো’’তি ৰুত্তং. অনরিযধম্মৰিরহতো অরিযধম্মসমন্নাগমতো চ ‘‘অরিযান’’ন্তি ৰুত্তং. অরিযভাৰকরায পটিপত্তিযা অভাৰতো, তত্থ কোসল্লদমথাভাৰতো ‘‘অরিযানং অদস্সাৰী’’তিআদি ৰুত্তং. অসন্তধম্মস্সৰনতো সন্তধম্মসমন্নাগমতো সব্ভি পাসংসিযতো চ ‘‘সপ্পুরিসান’’ন্তি ৰুত্তং. সপ্পুরিসভাৰকরায পটিপত্তিযা অভাৰতো, তত্থ চ কোসল্লদমথাভাৰতো ‘‘সপ্পুরিসানং অদস্সাৰী’’তিআদি ৰুত্তং. পথৰীৰত্থুকানং মঞ্ঞনানং, উপরি ৰুচ্চমানানঞ্চমঞ্ঞনানং মূলকত্তা পপঞ্চসঙ্খানং ‘‘পথৰিং পথৰিতো সঞ্জানাতী’’তি ৰুত্তং. অন্ধপুথুজ্জনস্স অহংকার-মমংকারানং কত্থচিপি অপ্পহীনত্তা ‘‘পথৰিং মঞ্ঞতী’’তিআদি ৰুত্তং.

পুব্বে অগ্গহিতত্তা, সামঞ্ঞতো চ গয্হমানত্তা, পুগ্গলস্স পথৰীআদিআরম্মণসভাগতায লব্ভমানত্তা চ ‘‘যোপী’’তি ৰুত্তং. ‘‘যো’’তি অনিযমেন গহিতস্স নিযমেতব্বতো পটিনিদ্দিসিতব্বতো চ; ‘‘সো’’তি ৰুত্তং সাতিসযং সংসারে ভযস্স ইক্খনতো কিলেসভেদনসম্ভৰতো চ ‘‘ভিক্খূ’’তি ৰুত্তং. সিক্খাহি সমন্নাগমতো সেক্খধম্মপটিলাভতো চ ‘‘সেক্খো’’তি ৰুত্তং. মনসা লদ্ধব্বস্স অরহত্তস্স অনধিগতত্তা অধিগমনীযতো চ ‘‘অপ্পত্তমানসো’’তি ৰুত্তং. অপরেন অনুত্তরণীযতো, পরং অনুচ্ছৰিকভাৰেন উত্তরিত্ৰা ঠিতত্তা চ ‘‘অনুত্তর’’ন্তি ৰুত্তং. যোগেন ভাৰনায কামযোগাদিতো চ খেমং সিৰং অনুপদ্দৰন্তি ‘‘যোগক্খেম’’ন্তি ৰুত্তং. ছন্দপ্পৰত্তিযা উস্সুক্কাপত্তিযা চ ‘‘পত্থযমানো’’তি ৰুত্তং. তদত্থস্স সব্বসো সব্বইরিযাপথৰিহারস্স সমথৰিপস্সনাৰিহারস্স দিব্বৰিহারস্স চ ৰসেন ‘‘ৰিহরতী’’তি ৰুত্তং. সেক্খস্স সব্বসো অভিঞ্ঞেয্যভাৰঞ্চেৰ পরিঞ্ঞেয্যভাৰঞ্চ ঞাণেন অভিভৰিত্ৰা জাননতো ‘‘অভিজানাতী’’তি ৰুত্তং. সেক্খস্স সব্বসো অপ্পহীনমঞ্ঞনতায অভাৰতো ‘‘মা মঞ্ঞী’’তি ৰুত্তং. সেসং ৰুত্তনযানুসারেন ৰেদিতব্বং. ইমিনা নযেন ইতো পরং সব্বপদেসু ৰিনিচ্ছযো কাতব্বো. সক্কা হি অট্ঠকথং তস্সা লীনত্থৰণ্ণনঞ্চ অনুগন্ত্ৰা অযমত্থো ৰিঞ্ঞূহি ৰিভাৰেতুন্তি অতিৰিত্থারভযেন ন ৰিত্থারযিম্হ. ইতি অনুপদৰিচযতো ৰিচযো হারো.

৩. যুত্তিহারৰণ্ণনা

সক্কাযস্স সব্বমঞ্ঞনানং মূলভাৰো যুজ্জতি পরিকপ্পমত্তকত্তা লোকৰিচিত্তস্স. ব্যাহুসচ্চদ্ৰযরহিতস্স অন্ধপুথুজ্জনভাৰো যুজ্জতি পুথুকিলেসাভিসঙ্খারজননাদিসভাৰত্তা. যথাৰুত্তপুথুজ্জনস্স ৰা ৰুত্তপ্পকারবাহুসচ্চাভাৰো যুজ্জতি তস্মিং সতি সব্ভাৰতো. তত্থ অস্সুতৰতো পুথুজ্জনস্স অরিযানং সপ্পুরিসানঞ্চ অদস্সাৰিতাদি যুজ্জতি অরিযকরধম্মানং অরিযভাৰস্স চ তেন অদিট্ঠত্তা অপ্পটিপন্নত্তা চ তথা তস্স পথৰিযা ‘‘অহং পথৰী, মম পথৰী, পরো পথৰী’’তি সঞ্জাননং যুজ্জতি অহংকারমমংকারানং সব্বেন সব্বং অপ্পহীনত্তা. তথা সঞ্জানতো চস্স পথৰিং কম্মাদিকরণাদিৰসেন গহেত্ৰা নানপ্পকারতো মঞ্ঞনাপৰত্তি যুজ্জতি সঞ্ঞানিদানত্তা পপঞ্চসঙ্খানং. যো মঞ্ঞতি, তস্স অপরিঞ্ঞাতৰত্থুকতা যুজ্জতি পরিঞ্ঞায ৰিনা মঞ্ঞনাপহানাভাৰতো. ‘‘আপং আপতো সঞ্জানাতী’’তিআদীসুপি এসেৰ নযো. অপরিযোসিতসিক্খস্স অপ্পত্তমানসতা যুজ্জতি কতকিচ্চতাভাৰতো. সেক্খস্স সতো যোগক্খেমপত্থনা যুজ্জতি তদধিমুত্তভাৰতো. তথা তস্স পথৰিযা অভিজাননা যুজ্জতি পরিঞ্ঞাপহানেসু মত্তসো কারিভাৰতো. ততো এৰ চস্স ‘‘মা মঞ্ঞী’’তি ৰত্তব্বতা যুজ্জতি ৰত্থুপরিঞ্ঞায ৰিয মঞ্ঞনাপহানস্সপি ৰিপ্পকতভাৰতো. সেক্খস্স পথৰিযা পরিঞ্ঞেয্যতা যুজ্জতি পরিঞ্ঞাতুং সক্কুণেয্যত্তা সব্বসো অপরিঞ্ঞাতত্তা চ. ‘‘আপং আপতো’’তিআদীসুপি এসেৰ নযো. অরহত্তাদিযুত্তস্স পথৰিযাদীনং অভিজাননা মঞ্ঞনাভাৰো চ যুজ্জতি সঙ্খাতধম্মত্তা, সব্বসো কিলেসানং পহীনত্তা, ততো এৰ চস্স ৰীতরাগাদিভাৰো ততো সম্মদেৰ চ পটিচ্চসমুপ্পাদস্স পটিৰিদ্ধতাতি. অযং যুত্তিহারো.

৪. পদট্ঠানহারৰণ্ণনা

কিস্সোপি মঞ্ঞনা সক্কাযস্স পদট্ঠানং, মঞ্ঞনানং অযোনিসোমনসিকারো পদট্ঠানং, সুতদ্ৰযৰিরহো অন্ধপুথুজ্জনভাৰস্স পদট্ঠানং, সো অরিযানং অদস্সাৰিতায পদট্ঠানং, সা অরিযধম্মস্স অকোৰিদতায পদট্ঠানং, সা অরিযধম্মে অৰিনীততায পদট্ঠানং. ‘‘সপ্পুরিসানং অদস্সাৰী’’তি এত্থাপি এসেৰ নযো. সঞ্ঞাৰিপল্লাসো মঞ্ঞনানং পদট্ঠানং. সঞ্ঞানিদানা হি পপঞ্চসঙ্খাতি. মঞ্ঞনাসু চ তণ্হামঞ্ঞনা ইতরমঞ্ঞনানং পদট্ঠানং ‘‘তণ্হাগতানং পরিতস্সিতৰিপ্ফন্দিত’’ন্তি, (দী. নি. ১.১০৫-১০৯) ‘‘তণ্হাপচ্চযা উপাদান’’ন্তি (ম. নি. ৩.১২৬; মহাৰ. ১) চ ৰচনতো, তণ্হাগতস্সেৰ চ ‘‘সেয্যোহমস্মি’’ন্তিআদিনা মানজপ্পনাসব্ভাৰতা. সব্বাপি ৰা মঞ্ঞনা সব্বাসং মঞ্ঞনানং পদট্ঠানং. ‘‘উপাদানপচ্চযা তণ্হা’’তি হি ৰচনতো দিট্ঠিপি তণ্হায পদট্ঠানং. ‘‘অহমস্মি ব্রহ্মা মহাব্রহ্মা’’তি (দী. নি. ১.৪২; ৩.৩৯) আদিৰচনতো মানোপি দিট্ঠিযা পদট্ঠানং. তথা ‘‘অস্মীতি সতি ইত্থংস্মীতি হোতি, এৰংস্মীতি হোতি, অঞ্ঞথাস্মীতি হোতী’’তিআদিৰচনতো মানস্সপি তণ্হায পদট্ঠানতা লব্ভতেৰ. সেক্খা ধম্মা সপ্পদেসতো মঞ্ঞনাপহানস্স পদট্ঠানং. অসেক্খা নিপ্পদেসতো মঞ্ঞনাপহানস্স পদট্ঠানং. কম্মভৰো চ জাতিযা পদট্ঠানং. জাতি জরামরণস্স পদট্ঠানং. পচ্চযাকারস্স যথাভূতাৰবোধো সম্মাসম্বোধিযা পদট্ঠানন্তি. অযং পদট্ঠানো হারো.

৫. লক্খণহারৰণ্ণনা

‘‘সব্বধম্মমূলপরিযায’’ন্তি এত্থ মূলগ্গহণেন মূলপরিযাযগ্গহণেন ৰা যথা তণ্হামানদিট্ঠিযো গয্হন্তি, এৰং দোসমোহাদীনম্পি সক্কাযমূলধম্মানং সঙ্গহো দট্ঠব্বো সক্কাযস্স মূলভাৰেন একলক্খণত্তা. ‘‘অস্সুতৰা’’তি ইমিনা যথা তস্স পুগ্গলস্স পরিযত্তিপটিৰেধসদ্ধম্মানং অভাৰো গয্হতি, এৰং পটিপত্তিসদ্ধম্মস্সপি অভাৰো গয্হতি সদ্ধম্মভাৰেন একলক্খণত্তা. অরিযানং অদস্সনকামতাদিলক্খণা. ‘‘অরিযধম্মস্স অকোৰিদো’’তি ইমিনা অরিযধম্মাধিগমস্স ৰিবন্ধভূতং অঞ্ঞাণং. ‘‘অরিযধম্মে অৰিনীতো’’তি ইমিনা অরিযৰিনযাভাৰো. সো পনত্থতো অরিযৰিনযে অপ্পটিপত্তি এৰ ৰাতি তীহিপি পদেহি যথাৰুত্তৰিসযা মিচ্ছাদিট্ঠি ৰিচিকিচ্ছা চ গহিতাৰ হোন্তি. তগ্গহণেন চ সব্বেপি অকুসলা ধম্মা সঙ্গহিতাৰ হোন্তি সংকিলেসলক্খণেন একলক্খণত্তা. ‘‘সপ্পুরিসানং অদস্সাৰী’’তি এত্থাপি এসেৰ নযো.

‘‘পথৰিং পথৰিতো সঞ্জানাতী’’তি ইদং দিট্ঠিমঞ্ঞনাদীনং সঞ্ঞায কারণভাৰদস্সনং. তত্থ যথা সঞ্ঞা, এৰং ৰিতক্কফস্সাৰিজ্জাঅযোনিসোমনসিকারাদযোপি তাসং কারণন্তি অত্থতো তেসম্পেত্থ সঙ্গহো ৰুত্তো হোতি মঞ্ঞনানং কারণভাৰেন একলক্খণত্তা. ‘‘মঞ্ঞতী’’তি ইমিনা মঞ্ঞনাকিচ্চেন তণ্হামানদিট্ঠিযো গহিতা তাসং কিলেসসভাৰত্তা. তগ্গহণেনেৰ ৰিচিকিচ্ছাদিনম্পি সঙ্গহো দট্ঠব্বো কিলেসলক্খণেন একলক্খণত্তা. তথা তণ্হায হেতুসভাৰত্তা তগ্গহণেনেৰ অৰসিট্ঠাকুসলহেতূনং সঙ্গহো দট্ঠব্বো হেতুলক্খণেন একলক্খণত্তা. তথা তণ্হাদিট্ঠীনং আসৰাদিসভাৰত্তা তগ্গহণেনেৰ অৰসিট্ঠাসৰোঘযোগগন্থনীৰরণাদীনম্পি সঙ্গহো দট্ঠব্বো আসৰাদিসভাৰত্তা একলক্খণত্তা. তথা ‘‘পথৰিং মঞ্ঞতী’’তিআদিনা পথৰীআদীনং রূপসভাৰত্তা তব্বিসযানঞ্চ মঞ্ঞনানং রূপৰিসযত্তা তগ্গহণেনেৰ সকলরূপক্খন্ধৰিসযাপি মঞ্ঞনা দস্সিতা হোন্তি রূপৰিসযলক্খণেন আসং একলক্খণত্তা. এৰং চক্খাযতনাদিৰিসযাপি মঞ্ঞনা নিদ্ধারেতব্বা. ‘‘অপরিঞ্ঞাত’’ন্তি পরিঞ্ঞাপটিক্খেপেন তপ্পটিবদ্ধকিলেসানং পহানপটিক্খেপোতি দট্ঠব্বো মগ্গকিচ্চভাৰেন পরিঞ্ঞাপহানানং একলক্খণত্তা. ইমিনা নযেন সেসেসুপি যথারহং একলক্খণা নিদ্ধারেতব্বাতি. অযং লক্খণো হারো.

৬. চতুব্যূহহারৰণ্ণনা

পথৰীআদীসু ৰত্থূসু ব্যঞ্জনচ্ছাযায অত্থং গহেত্ৰা ধম্মগম্ভীরতং অসল্লক্খেত্ৰা অসদ্ধম্মস্সৰনাদিনা ৰঞ্চিতা হুত্ৰা সদ্ধম্মস্সৰনধারণপরিচযমনসিকারৰিমুখা পথৰীআদীসু ৰত্থূসু পুথুজ্জনসেক্খাসেক্খতথাগতানং পটিপত্তিৰিসেসং অজানন্তা চ ৰেনেয্যা ইমিস্সা দেসনায নিদানং. তে ‘‘কথং নু খো যথাৰুত্তদোসৰিনিমুত্তা যথাৰুত্তঞ্চ ৰিসেসং জানন্তা সম্মাপটিপত্তিযা উভযহিতপরাযণা সৰেয্যু’’ন্তি অযমেত্থ ভগৰতো অধিপ্পাযো. পদনিব্বচনং নিরুত্তং, তং ‘‘এৰ’’ন্তিআদিনিদানপদানং, ‘‘সব্বধম্মমূলপরিযায’’ন্তিআদিপাল়িপদানঞ্চ অট্ঠকথাযং, তস্সা লীনত্থৰণ্ণনাযঞ্চেৰ ৰুত্তনযেন সুৰিঞ্ঞেয্যত্তা অতিৰিত্থারভযেন ন ৰিত্থারযিম্হ.

পদপদত্থদেসনানিক্খেপসুত্তসন্ধিৰসেন পঞ্চৰিধা সন্ধি. তত্থ পদস্স পদন্তরেন সম্বন্ধো পদসন্ধি, তথা পদত্থস্স পদত্থন্তরেন সম্বন্ধো পদত্থসন্ধি, যো ‘‘কিরিযাকারকসম্বন্ধো’’তি ৰুচ্চতি. নানানুসন্ধিকস্স সুত্তস্স তংতংঅনুসন্ধীহি সম্বন্ধো, একানুসন্ধিকস্স পন পুব্বাপরসম্বন্ধো দেসনাসন্ধি. যা অট্ঠকথাযং ‘‘পুচ্ছানুসন্ধি অজ্ঝাসযানুসন্ধি যথানুসন্ধী’’তি তিধা ৰিভত্তা. অজ্ঝাসযো চেত্থ অত্তজ্ঝাসযো পরজ্ঝাসযোতি দ্ৰিধা ৰেদিতব্বো. যং পনেত্থ ৰত্তব্বং, তং হেট্ঠা নিদানৰণ্ণনাযং ৰুত্তমেৰ. নিক্খেপসন্ধি চতুন্নং সুত্তনিক্খেপানং ৰসেন ৰেদিতব্বো. সুত্তসন্ধি ইধ পঠমনিক্খেপৰসেনেৰ ৰেদিতব্বো. কস্মা পনেত্থ মূলপরিযাযসুত্তমেৰ পঠমং নিক্খিত্তন্তি? নাযমনুযোগো কত্থচি নপ্পৰত্ততি, অপিচ যস্মা মঞ্ঞনামূলকং সক্কাযং, সব্বমঞ্ঞনা চ তত্থ এৰ অনেকভেদভিন্না পৰত্ততি, ন তস্সা সৰিসযায লেসমত্তম্পি সারং অত্থীতি পথৰীআদিৰিভাগভিন্নেসু মঞ্ঞনাসু চ সাতিসযং নিব্বেধৰিরাগসঞ্জননী উপরি সেক্খাসেক্খতথাগতগুণৰিভাৰনী চ অযং দেসনা. সুত্তন্তদেসনা চ ৰিসেসতো দিট্ঠিৰিনিৰেঠনকথা, তস্মা সনিস্সযস্স দিট্ঠিগ্গাহস্স আদিতো অসারভাৰদীপনং উপরি চ সব্বেসং অরিযানং গুণৰিসেসৰিভাৰনমিদং সুত্তং পঠমং নিক্খিত্তং. কিঞ্চ সক্কাযে মঞ্ঞনামঞ্ঞনামুখেন পৰত্তিনিৰত্তীসু আদীনৰানিসংসৰিভাৰনতো সব্বেসং পুগ্গলানং পটিপত্তিৰিভাগতো চ ইদমেৰ সুত্তং পঠমং নিক্খিত্তং.

যং পন একিস্সা দেসনায দেসনন্তরেন সদ্ধিং সংসন্দনং, অযম্পি দেসনাসন্ধি, সা এৰং ৰেদিতব্বা. ‘‘অস্সুতৰা পুথুজ্জনো…পে… নিব্বানং অভিনন্দতী’’তি অযং দেসনা. ‘‘ইধ, ভিক্খৰে, অস্সুতৰা পুথুজ্জনো…পে… সপ্পুরিসধম্মে অৰিনীতো মনসিকরণীযে ধম্মে নপ্পজানাতি, অমনসিকরণীযে চ ধম্মে নপ্পজানাতি, সো মনসিকরণীযে ধম্মে অপ্পজানন্তো অমনসিকরণীযে চ ধম্মে অপ্পজানন্তো যে ধম্মা ন মনসিকরণীযা, তে ধম্মে মনসি করোতি…পে… অনুপ্পন্নো ৰা কামাসৰো উপ্পজ্জতি, উপ্পন্নো ৰা কামাসৰো পৰড্ঢতি. অনুপ্পন্নো ৰা ভৰাসৰো উপ্পজ্জতি, উপ্পন্নো ৰা ভৰাসৰো পৰড্ঢতি, অনুপ্পন্নো ৰা অৰিজ্জাসৰো উপ্পজ্জতি, উপ্পন্নো ৰা অৰিজ্জাসৰো পৰড্ঢতী’’তি (ম. নি. ১.১৭) ইমায দেসনায সংসন্দতি. তথা ‘‘তস্সেতং পাটিকঙ্খং সুভনিমিত্তং মনসি করিস্সতি, তস্স সুভনিমিত্তস্স মনসিকারা রাগো চিত্তং অনুদ্ধংসেস্সতি, সো সরাগো সদোসো সমোহো সাঙ্গণো সংকিলিট্ঠচিত্তো কালং করিস্সতী’’তি (ম. নি. ১.৫৯) ইমায দেসনায সংসন্দতি. তথা ‘‘চক্খুঞ্চাৰুসো পটিচ্চ রূপে চ উপ্পজ্জতি চক্খুৰিঞ্ঞাণং, তিণ্ণং সঙ্গতি ফস্সো, ফস্সপচ্চযা ৰেদনা. যং ৰেদেতি তং সঞ্জানাতি, যং সঞ্জানাতি তং ৰিতক্কেতি, যং ৰিতক্কেতি তং পপঞ্চেতি, যং পপঞ্চেতি ততোনিদানং পুরিসং পপঞ্চসঞ্ঞাসঙ্খা সমুদাচরন্তী’’তি (ম. নি. ১.২০৪) ইমায দেসনায সংসন্দতি. তথা ‘‘ইধ, ভিক্খৰে, অসুতৰা পুথুজ্জনো…পে… সপ্পুরিসধম্মে অৰিনীতো রূপং ‘এতং মম, এসোহমস্মি, এসো মে অত্তা’তি সমনুপস্সতি. ৰেদনং…পে…, সঞ্ঞং…পে…, সঙ্খারে…পে…, ৰিঞ্ঞাণং ‘এতং মম, এসোহমস্মি, এসো মে অত্তা’তি সমনুপস্সতি. যম্পি তং দিট্ঠং…পে… যম্পি তং দিট্ঠিট্ঠানং, সো লোকো সো অত্তা সো পেচ্চ ভৰিস্সামি নিচ্চো ধুৰো সস্সতো অৰিপরিণামধম্মো সস্সতিসমং তথেৰ ঠস্সামীতি, তম্পি ‘এতং মম, এসোহমস্মি, এসো মে অত্তা’তি সমনুপস্সতী’’তি (ম. নি. ১.২৪১) ইমায দেসনায সংসন্দতি.

‘‘যোপি সো, ভিক্খৰে, ভিক্খু…পে… নিব্বানং মাভিনন্দী’’তি অযং দেসনা. ‘‘ইধ, দেৰানমিন্দ, ভিক্খুনো সুতং হোতি ‘সব্বে ধম্মা নালং অভিনিৰেসাযা’তি, এৰঞ্চেতং, দেৰানমিন্দ, ভিক্খুনো সুতং হোতি ‘সব্বে ধম্মা নালং অভিনিৰেসাযা’তি, সো সব্বং ধম্মং অভিজানাতি, সব্বং ধম্মং অভিঞ্ঞায সব্বং ধম্মং পরিজানাতি, সব্বং ধম্মং পরিঞ্ঞায যং কিঞ্চি ৰেদনং ৰেদেতি সুখং ৰা দুক্খং ৰা অদুক্খমসুখং ৰা, সো তাসু ৰেদনাসু অনিচ্চানুপস্সী ৰিহরতি, ৰিরাগানুপস্সী ৰিহরতি, নিরোধানুপস্সী ৰিহরতি, পটিনিস্সগ্গানুপস্সী ৰিহরতী’’তি (ম. নি. ১.৩৯০) ইমায দেসনায সংসন্দতি. ‘‘যোপি সো, ভিক্খৰে, ভিক্খু অরহং…পে… অভিসম্বুদ্ধোতি ৰদামী’’তি অযং দেসনা ‘‘সুতৰা চ খো, ভিক্খৰে, অরিযসাৰকো…পে… সপ্পুরিসধম্মে সুৰিনীতো রূপং ‘নেতং মম, নেসোহমস্মি, ন মেসো অত্তা’তি সমনুপস্সতি, ৰেদনং…পে…, সঞ্ঞং…পে…, সঙ্খারে…পে…, ৰিঞ্ঞাণং ‘নেতং মম, নেসোহমস্মি, ন মেসো অত্তা’তি সমনুপস্সতি. যম্পি তং দিট্ঠং সুতং ৰিঞ্ঞাতং পত্তং পরিযেসিতং অনুৰিচরিতং মনসা, তম্পি ‘নেতং মম, নেসোহমস্মি, ন মেসো অত্তা’তি সমনুপস্সতি. যম্পি তং দিট্ঠিট্ঠানং, সো লোকো সো অত্তা সো পেচ্চ ভৰিস্সামি ‘নিচ্চো ধুৰো সস্সতো অপি পরিণামধম্মো সস্সতিসমং তথেৰ ঠস্সামী’তি, তম্পি ‘নেতং মম, নেসোহমস্মি, ন মেসো অত্তা’তি সমনুপস্সতি. সো এৰং সমনুপস্সন্তো ন পরিতস্সতী’’তি (ম. নি. ১.২৪১) এৰমাদিদেসনাহি সংসন্দতীতি, অযং চতুব্যূহো হারো.

৭. আৰত্তহারৰণ্ণনা

‘‘অস্সুতৰা পুথুজ্জনো’’তি ইমিনা যোনিসোমনসিকারপটিক্খেপমুখেন অযোনিসোমনসিকারপরিগ্গহো দীপিতো. ‘‘অরিযানং অদস্সাৰী’’তিআদিনা সপ্পুরিসূপনিস্সযাদিপটিক্খেপমুখেন অসপ্পুরিসূপনিস্সযাদিপরিগ্গহো দীপিতো. তেসু পুরিমনযেন আসযৰিপত্তি কিত্তিতা, দুতিযেন পযোগৰিপত্তি. পুরিমেন চস্স কিলেসৰট্টং, তঞ্চ যতো ৰিপাকৰট্টন্তি সকলং সংসারচক্কমাৰত্ততি. ‘‘পথৰিং মঞ্ঞতী’’তিআদিনা তত্থ তিস্সো মঞ্ঞনা ৰুত্তা. তাসু তণ্হামঞ্ঞনা ‘‘এতং মমা’’তি তণ্হাগ্গাহো, মানমঞ্ঞনা ‘‘এসোহমস্মী’’তি মানগ্গাহো, দিট্ঠিমঞ্ঞনা ‘‘এসো মে অত্তা’’তি দিট্ঠিগ্গাহো. তত্থ তণ্হাগ্গাহেন ‘‘তণ্হং পটিচ্চপরিযেসনা’’তিআদিকা (দী. নি. ২.১০৩; দী. নি. ৩.৩৫৯; অ. নি. ৩.২৩; ৰিভ. ৯৬৩) নৰ তণ্হামূলকা ধম্মা আৰত্তন্তি. মানগ্গাহেন ‘‘সেয্যোহমস্মী’’তিআদিকা নৰ মানৰিধা আৰত্তন্তি. দিট্ঠিগ্গাহেন ‘‘রূপং অত্ততো সমনুপস্সতী’’তিআদিকা (সং. নি. ৪.৩৪৫) ৰীসতিৰত্থুকা সক্কাযদিট্ঠি আৰত্ততি. তীসু চ গাহেসু যায সঞ্ঞায তণ্হাগ্গাহস্স ৰিক্খম্ভনা, সা দুক্খসঞ্ঞা দুক্খানুপস্সনা. যায সঞ্ঞায মানগ্গাহস্স ৰিক্খম্ভনা, সা অনিচ্চসঞ্ঞা অনিচ্চানুপস্সনা. যায পন সঞ্ঞায দিট্ঠিগ্গাহস্স ৰিক্খম্ভনা, সা অনত্তসঞ্ঞা অনত্তানুপস্সনা. তত্থ পঠমগ্গাহৰিসভাগতো অপ্পণিহিতৰিমোক্খমুখং আৰত্ততি, দুতিযগ্গাহৰিসভাগতো অনিমিত্তৰিমোক্খমুখং আৰত্ততি, ততিযগ্গাহৰিসভাগতো সুঞ্ঞতৰিমোক্খমুখং আৰত্ততি.

সেক্খগ্গহণেন অরিযায সম্মাদিট্ঠিযা সঙ্গহো, ততো চ পরতোঘোসযোনিসোমনসিকারা দীপিতা হোন্তি. পরতোঘোসেন চ সুতৰা অরিযসাৰকোতি আৰত্ততি, যোনিসোমনসিকারেন নৰ যোনিসোমনসিকারমূলকা ধম্মা আৰত্তন্তি, চতুব্বিধঞ্চ সম্পত্তিচক্কং. ‘‘মা মঞ্ঞী’’তি মঞ্ঞনানং ৰিপ্পকতপ্পহানতাগহণেন একচ্চাসৰপরিক্খযো দীপিতো হোতি, তেন চ সদ্ধাৰিমুত্তদিট্ঠিপ্পত্তকাযসক্খিভাৰা আৰত্তন্তি. ‘‘অরহং খীণাসৰো’’তিআদিনা অসেক্খা সীলক্খন্ধাদযো দস্সিতা হোন্তি, সীলক্খন্ধাদিপারিপূরিযা চ দস নাথকরণা ধম্মা আৰত্তন্তি. ‘‘ন মঞ্ঞতী’’তি মঞ্ঞনাপটিক্খেপেন পঞ্চসু উপাদানক্খন্ধেসু ‘‘নেতং মম, নেসোহমস্মি, ন মেসো অত্তা’’তি সম্মাপটিপত্তি দস্সিতা, তায চ সাতিসযা নিকন্তিপরিযাদানমানসমুগ্ঘাটনদিট্ঠিউগ্ঘাটনানি পকাসিতানীতি অপ্পণিহিতানিমিত্ত-সুঞ্ঞতৰিমোক্খা আৰত্তন্তি.

‘‘তথাগতো’’তিআদিনা সব্বঞ্ঞুগুণা ৰিভাৰিতাতি তদৰিনাভাৰতো দসবল-চতুৰেসারজ্জঅসাধারণঞাণআৰেণিকবুদ্ধধম্মা আৰত্তন্তি. ‘‘নন্দী দুক্খস্স মূল’’ন্তিআদিনা সদ্ধিং হেতুনা ৰট্টৰিৰট্টং কথিতন্তি পৰত্তিনিৰত্তিতদুভযহেতুৰিভাৰনেন চত্তারি অরিযসচ্চানি আৰত্তন্তি. ‘‘তণ্হানং খযা’’তিআদিনা তণ্হপ্পহানাপদেসেন তদেকট্ঠভাৰতো দিযড্ঢস্স কিলেসসহস্সস্স পহানং আৰত্ততি. ‘‘সব্বসো তণ্হানং খযা সম্মাসম্বোধিং অভিসম্বুদ্ধো’’তি চ ৰুত্তত্তা ‘‘নন্দী দুক্খস্স মূল’’ন্তি, ‘‘ইতি ৰিদিত্ৰা’’তিআদিনা ৰুত্তস্স মঞ্ঞনাভাৰহেতুভূতস্স পচ্চযাকারৰেদনস্স সাৰকেহি অসাধারণঞাণচারভাৰো দস্সিতো, তেন চতুৰীসতিকোটিসতসহস্সসমাপত্তিসঞ্চারি ভগৰতো মহাৰজিরঞাণং আৰত্ততীতি. অযং আৰত্তো হারো.

৮. ৰিভত্তিহারৰণ্ণনা

‘‘সব্বধম্মমূলপরিযায’’ন্তি এত্থ সব্বধম্মা নাম তেভূমকা ধম্মা সক্কাযস্স অধিপ্পেতত্তা. তেসং মঞ্ঞনা পদট্ঠানং পপঞ্চসঙ্খানিমিত্তত্তা লোকৰিচিত্তস্স. তযিমে কুসলা অকুসলা অব্যাকতাতি তিৰিধা. তেসু কুসলানং যোনিসোমনসিকারাদি পদট্ঠানং, অকুসলানং অযোনিসোমনসিকারাদি, অব্যাকতানং কম্মভৰআৰজ্জনভূতরূপাদি পদট্ঠানং. তত্থ কুসলা কামাৰচরাদিৰসেন ভূমিতো তিৰিধা, তথা অব্যাকতা চিত্তুপ্পাদসভাৰা, অচিত্তুপ্পাদসভাৰা পন কামাৰচরাৰ তথা অকুসলা. পরিযত্তিপটিপত্তিপটিৰেধসুতকিচ্চাভাৰেন তিৰিধো অস্সুতৰা. অন্ধকল্যাণৰিভাগেন দুৰিধো পুথুজ্জনো. সম্মাসম্বুদ্ধপচ্চেকবুদ্ধসাৰকভেদেন তিৰিধা অরিযা. মংসচক্খুদিব্বচক্খুপঞ্ঞাচক্খূহি দস্সনাভাৰেন তিৰিধো অদস্সাৰী. মগ্গফলনিব্বানভেদেন তিৰিধো, নৰৰিধো ৰা অরিযধম্মো. সৰনধারণপরিচযমনসিকারপটিৰেধৰসেন পঞ্চৰিধা অরিযধম্মস্স কোৰিদতা. তদভাৰতো অকোৰিদো. সংৰরপহানভেদেন দুৰিধো, দসৰিধো ৰা অরিযধম্মৰিনযো, তদভাৰতো অরিযধম্মে অৰিনীতো. এত্থ পদট্ঠানৰিভাগো হেট্ঠা দস্সিতোযেৰ. ‘‘সপ্পুরিসানং অদস্সাৰী’’তিআদীসুপি এসেৰ নযো. ‘‘পথৰিং মঞ্ঞতী’’তিআদীসু মঞ্ঞনাৰত্থুৰিভাগো পাল়িযং আগতোৰ, তথা অজ্ঝত্তিকবাহিরাদিকো চ অন্তরৰিভাগো.

মঞ্ঞনা পন তণ্হামানদিট্ঠিৰসেন সঙ্খেপতো তিৰিধা, ৰিত্থারতো পন তণ্হামঞ্ঞনা তাৰ কামতণ্হাদিৰসেন অট্ঠসতৰিধা, তথা ‘‘অস্মীতি সতি ইত্থংস্মীতি হোতী’’তিআদিনা. এৰং মানমঞ্ঞনাপি. ‘‘অস্মীতি সতি ইত্থংস্মীতি হোতী’’তিআদিনা পপঞ্চত্তযং উদ্দিট্ঠং নিদ্দিট্ঠঞ্চাতি. এতেন দিট্ঠিমঞ্ঞনাযপি অট্ঠসতৰিধতা ৰুত্তাতি ৰেদিতব্বা. অপিচ সেয্যস্স ‘‘সেয্যোহমস্মী’’তিআদিনা মানমঞ্ঞনায নৰৰিধতা তদন্তরভেদেন অনেকৰিধতা চ ৰেদিতব্বা. অযঞ্চ অত্থো হীনত্তিকত্থৰণ্ণনায ৰিভাৰেতব্বো. দিট্ঠিমঞ্ঞনায পন ব্রহ্মজালে আগতনযেন দ্ৰাসট্ঠিৰিধতা তদন্তরভেদেন অনেকৰিধতা চ ৰেদিতব্বা. ‘‘অপরিঞ্ঞাত’’ন্তি এত্থ ঞাতপরিঞ্ঞাদিৰসেন চেৰ রূপমুখাদিঅভিনিৰেসভেদাদিৰসেন চ পরিঞ্ঞানং অনেকৰিধতা ৰেদিতব্বা. তথা অট্ঠমকাদিৰসেন সেক্খৰিভাগো পঞ্ঞাৰিমুত্তাদিৰসেন অসেক্খৰিভাগো চ. অযমেত্থ ধম্মৰিভাগো. পদট্ঠানৰিভাগো চ ভূমিৰিভাগো চ ৰুত্তনযানুসারেন ৰেদিতব্বাতি. অযং ৰিভত্তিহারো.

৯. পরিৰত্তহারৰণ্ণনা

‘‘সব্বধম্মমূলপরিযায’’ন্তি এত্থ ‘‘সব্বধম্মা’’তি পঞ্চুপাদানক্খন্ধা গহিতা, তেসং মূলকারণন্তি চ তণ্হামানদিট্ঠিযো. তথা অস্সুতৰা পুথুজ্জনো…পে… সপ্পুরিসধম্মে অৰিনীতোতি. যাৰকীৰঞ্চ পঞ্চসু উপাদানক্খন্ধেসু সুভতো সুখতো নিচ্চতো অত্ততো সমনুপস্সনৰসেন ‘‘এতং মম, এসোহমস্মি, এসো মে অত্তা’’তি তণ্হামানদিট্ঠিগাহা ন সমুচ্ছিজ্জন্তি, তাৰ নেসং পবন্ধূপরমো সুপিনন্তেপি ন কেনচি লদ্ধপুব্বো. যদা পন নেসং অসুভতো দুক্খতো অনিচ্চতো অনত্ততো সমনুপস্সনৰসেন ‘‘নেতং মম, নেসোহমস্মি, ন মেসো অত্তা’’তি পৰত্তমানা অপ্পণিহিতানিমিত্তসুঞ্ঞতানুপস্সনা উস্সক্কিত্ৰা অরিযমগ্গাধিগমায সংৰত্তন্তি, অথ নেসং পবন্ধূপরমো হোতি অচ্চন্তঅপ্পঞ্ঞত্তিকভাৰূপগমনতো. তেন ৰুত্তং ‘‘সব্বধম্মাতি পঞ্চুপাদানক্খন্ধা গহিতা, তেসং মূলকারণন্তি চ তণ্হামানদিট্ঠিযো’’তি. তথা অস্সুতৰা পুথুজ্জনো…পে… সপ্পুরিসধম্মে অৰিনীতো তীহিপি মঞ্ঞনাহি পথৰিং মঞ্ঞতি যাৰ নিব্বানং অভিনন্দতি, তীহিপি পরিঞ্ঞাহি তস্স তং ৰত্থু অপরিঞ্ঞাতন্তি কত্ৰা. যস্স পন তং ৰত্থু তীহি পরিঞ্ঞাহি পরিঞ্ঞাতং, ন সো ইতরো ৰিয তং মঞ্ঞতি. তেনাহ ভগৰা ‘‘সুতৰা চ খো, ভিক্খৰে, অরিযসাৰকো…পে… সপ্পুরিসধম্মে সুৰিনীতো রূপং ‘নেতং মম, নেসোহমস্মি, ন মেসো অত্তা’তি সমনুপস্সতি, ৰেদনং…পে… অসতি ন পরিতস্সতী’’তি (ম. নি. ১.২৪১). সেক্খো পথৰিং মা মঞ্ঞি, যাৰ নিব্বানং মাভিনন্দি, অরহা সম্মাসম্বুদ্ধো চ পথৰিং ন মঞ্ঞতি, যাৰ নিব্বানং নাভিনন্দতি, মঞ্ঞনামঞ্ঞিতেসু ৰত্থূসু মত্তসো সব্বসো চ পরিঞ্ঞাভিসমযসংসিদ্ধিযা পহানাভিসমযনিব্বত্তিতো. যস্স পন তেসু ৰত্থূসু সব্বসো মত্তসো ৰা পরিঞ্ঞা এৰ নত্থি, কুতো পহানং, সো যথাপরিকপ্পং নিরঙ্কুসাহি মঞ্ঞনাহি ‘‘এতং মমা’’তিআদিনা মঞ্ঞতেৰ. তেনাহ ভগৰা ‘‘ইধ, ভিক্খৰে, অস্সুতৰা পুথুজ্জনো…পে… সপ্পুরিসধম্মে অৰিনীতো রূপং ‘এতং মম, এসোহমস্মি, এসো মে অত্তা’তি সমনুপস্সতি, ৰেদনং…পে…, সঞ্ঞ…পে…’’ন্তিআদি (ম. নি. ১.২৪১). অযং পরিৰত্তো হারো.

১০. ৰেৰচনহারৰণ্ণনা

‘‘সব্বধম্মা সকলধম্মা অনৰসেসধম্মা’’তি পরিযাযৰচনং, ‘‘মূলপরিযাযং মূলকারণং অসাধারণহেতু’’ন্তি পরিযাযৰচনং, ‘‘মূলপরিযাযন্তি ৰা মূলদেসনং কারণতথন’’ন্তি পরিযাযৰচনং, ‘‘ৰো তুম্হাকং তুম্হ’’ন্তি পরিযাযৰচনং, ‘‘ভিক্খৰে, সমণা তপস্সিনো’’তি পরিযাযৰচনং, ‘‘দেসেস্সামী কথেস্সামী পঞ্ঞপেস্সামী’’তি পরিযাযৰচনং, ‘‘সুণাথ সোতং ওদহথ সোতদ্ৰারানুসারেন উপধারেথা’’তি পরিযাযৰচনং, ‘‘সাধুকং সম্মা সক্কচ্চ’’ন্তি পরিযাযৰচনং, ‘‘মনসি করোথ চিত্তে ঠপেথ সমন্নাহরথা’’তি পরিযাযৰচনং, ‘‘ভাসিস্সামি ব্যত্তং কথেস্সামি ৰিভজিস্সামী’’তি পরিযাযৰচনং, ‘‘এৰং, ভন্তে, সাধু সুট্ঠু ভন্তে’’তি পরিযাযৰচনং, ‘‘পচ্চস্সোসুং সম্পটিচ্ছিংসু সম্পটিগ্গহেসু’’ন্তি পরিযাযৰচনং. ইমিনা নযেন সব্বপদেসু ৰেৰচনং ৰত্তব্বন্তি. অযং ৰেৰচনো হারো.

১১. পঞ্ঞত্তিহারৰণ্ণনা

‘‘সব্বধম্মমূলপরিযায’’ন্তি এত্থ সব্বধম্মা নাম সক্কাযধম্মা, তে খন্ধৰসেন পঞ্চধা পঞ্ঞত্তা, আযতনৰসেন দ্ৰাদসধা, ধাতুৰসেন অট্ঠারসধা পঞ্ঞত্তা. ‘‘মূল’’ন্তি ৰা ‘‘মূলপরিযায’’ন্তি ৰা মঞ্ঞনা ৰুত্তা, তা তণ্হামানদিট্ঠিৰসেন তিধা অন্তরভেদেন অনেকধা চ পঞ্ঞত্তা. অথ ৰা ‘‘সব্বধম্মা’’তি তেভূমকধম্মানং সঙ্গহপঞ্ঞত্তি, ‘‘মূলপরিযায’’ন্তি তেসং পভৰপঞ্ঞত্তি, ‘‘ৰো’’তি সম্পদানপঞ্ঞতি, ‘‘দেসেস্সামি ভাসিস্সামী’’তি পটিঞ্ঞাপঞ্ঞত্তি, ‘‘সুণাথ সাধুকং মনসি করোথা’’তি চ আণাপনপঞ্ঞত্তি, ‘‘অস্সুতৰা’’তি পটিৰেধৰিমুখতাপঞ্ঞত্তি চেৰ পরিযত্তিৰিমুখতাপঞ্ঞত্তি চ, ‘‘পুথুজ্জনো’’তি অনরিযপঞ্ঞত্তি, সা অরিযধম্মপটিক্খেপপঞ্ঞত্তি চেৰ অরিযধম্মৰিরহপঞ্ঞত্তি চ, ‘‘অরিযান’’ন্তি অসমপঞ্ঞত্তি চেৰ সমপঞ্ঞত্তি চ. তত্থ অসমপঞ্ঞত্তি তথাগতপঞ্ঞত্তি, সমপঞ্ঞত্তি পচ্চেকবুদ্ধানঞ্চেৰ উভতোভাগৰিমুত্তাদীনঞ্চ ৰসেন অট্ঠৰিধা ৰেদিতব্বা. ‘‘অরিযানং অদস্সাৰী’’তিআদি দস্সনভাৰনাপটিক্খেপপঞ্ঞত্তি, ‘‘পথৰিং মঞ্ঞতী’’তিআদি পঞ্চন্নং উপাদানক্খন্ধানং দ্ৰাদসন্নং আযতনানং অট্ঠারসন্নং ধাতূনং সম্মসনুপগানং ইন্দ্রিযানং নিক্খেপপঞ্ঞত্তি চেৰ পভৰপঞ্ঞত্তি চ, তথা ৰিপল্লাসানং কিচ্চপঞ্ঞত্তি পরিযুট্ঠানং দস্সনপঞ্ঞত্তি কিলেসানং ফলপঞ্ঞত্তি অভিসঙ্খারানং ৰিরূহনপঞ্ঞত্তি তণ্হায অস্সাদনপঞ্ঞত্তি দিট্ঠিযা ৰিপ্ফন্দনপঞ্ঞত্তি, ‘‘সেক্খা’’তি সদ্ধানুসারীসদ্ধাৰিমুত্তদিট্ঠিপ্পত্তকাযসক্খীনং দস্সনপঞ্ঞত্তি চেৰ ভাৰনাপঞ্ঞত্তি চ ‘‘অপ্পত্তমানসো’’তি সেক্খধম্মানং ঠিতিপঞ্ঞত্তি, ‘‘অনুত্তরং যোগক্খেমং পত্থযমানো’’তি পঞ্ঞায অভিনিব্বিদাপঞ্ঞত্তি, ‘‘অভিজানাতী’’তি অভিঞ্ঞেয্যধম্মানং অভিঞ্ঞাপঞ্ঞত্তি, দুক্খস্স পরিঞ্ঞাপঞ্ঞত্তি, সমুদযস্স পহানপঞ্ঞত্তি, নিরোধস্স সচ্ছিকিরিযাপঞ্ঞত্তি, মগ্গস্স ভাৰনাপঞ্ঞত্তি, ‘‘মা মঞ্ঞী’’তি মঞ্ঞনানং পটিক্খেপপঞ্ঞত্তি, সমুদযস্স পহানপঞ্ঞত্তি. ইমিনা নযেন সেসপদেসুপি ৰিত্থারেতব্বং. অযং পঞ্ঞত্তি হারো.

১২. ওতরণহারৰণ্ণনা

‘‘সব্বধম্মমূলপরিযায’’ন্তি এত্থ সব্বধম্মা নাম লোকিযা পঞ্চক্খন্ধা দ্ৰাদসাযতনানি অট্ঠারস ধাতুযো দ্ৰে সচ্চানি একূনৰিসতি ইন্দ্রিযানি দ্ৰাদসপদিকো পচ্চযাকারোতি, অযং সব্বধম্মগ্গহণেন খন্ধাদিমুখেন দেসনায ওতরণং. ‘‘মূল’’ন্তি ৰা ‘‘মূলপরিযায’’ন্তি ৰা মঞ্ঞনা ৰুত্তা, তা অত্থতো তণ্হা মানো দিট্ঠি চাতি তেসং সঙ্খারক্খন্ধসঙ্গহোতি অযং খন্ধমুখেন ওতরণং. তথা ‘‘ধম্মাযতনধম্মধাতূহি সঙ্গহো’’তি অযং আযতনমুখেন ধাতুমুখেন চ ওতরণং. ‘‘অস্সুতৰা’’তি ইমিনা সুতস্স ৰিবন্ধভূতা অৰিজ্জাদযো গহিতা, ‘‘পুথুজ্জনো’’তি ইমিনা যেসং কিলেসাভিসঙ্খারানং জননাদিনা পুথুজ্জনোতি ৰুচ্চতি, তে কিলেসাভিসঙ্খারাদযো গহিতা, ‘‘অরিযানং অদস্সাৰী’’তিআদিনা যেসং কিলেসধম্মানং ৰসেন অরিযানং অদস্সাৰিআদিভাৰো হোতি, তে দিট্ঠিমানাৰিজ্জাদযো গহিতাতি সব্বেহি তেহি সঙ্খারক্খন্ধসঙ্গহোতি পুব্বে ৰুত্তনযেনেৰ ওতরণং ৰেদিতব্বং. ‘‘সঞ্জানাতি মঞ্ঞতি অভিজানাতি ন মঞ্ঞতী’’তি এত্থাপি সঞ্জাননমঞ্ঞনাঅভিজাননানুপস্সনানং সঙ্খারক্খন্ধপরিযাপন্নত্তা ৰুত্তনযেনেৰ ওতরণং ৰেদিতব্বং. তথা সেক্খগ্গহণেন সেক্খা, ‘‘অরহ’’ন্তিআদিনা অসেক্খা সীলক্খন্ধাদযো গহিতাতি এৰম্পি খন্ধমুখেন ওতরণং, আযতনধাতাদিমুখেন চ ওতরণং ৰেদিতব্বং. তথা ‘‘ন মঞ্ঞতী’’তি তণ্হাগাহাদিপটিক্খেপেন দুক্খানুপস্সনাদযো গহিতা, তেসং ৰসেন অপ্পণিহিতৰিমোক্খমুখাদীহি ওতরণং ৰেদিতব্বং. ‘‘পরিঞ্ঞাত’’ন্তি ইমিনা পরিজাননকিচ্চেন পৰত্তমানা বোধিপক্খিযধম্মা গয্হন্তীতি সতিপট্ঠানাদিমুখেন ওতরণং ৰেদিতব্বং. নন্দিগ্গহণেন ভৰগ্গহণেন তণ্হাগহণেন চ সমুদযসচ্চং, দুক্খগ্গহণেন জাতিজরামরণগ্গহণেন চ দুক্খসচ্চং, ‘‘তণ্হানং খযা’’তিআদিনা নিরোধসচ্চং, অভিসম্বোধিযা গহণেন মগ্গসচ্চং গহিতন্তি অরিযসচ্চেহি ওতরণন্তি. অযং ওতরণো হারো.

১৩. সোধনহারৰণ্ণনা

‘‘সব্বধম্মমূলপরিযাযং ৰো, ভিক্খৰে…পে… ইধ, ভিক্খৰে, অস্সুতৰা…পে… পথৰিং পথৰিতো সঞ্জানাতী’’তি আরম্ভো. ‘‘পথৰিং পথৰিযা সঞ্ঞত্ৰা পথৰিং মঞ্ঞতী’’তি পদসুদ্ধি, নো আরম্ভসুদ্ধি. তথা ‘‘পথৰিযা মঞ্ঞতি পথৰিতো মঞ্ঞতি পথৰিং মেতি মঞ্ঞতি পথৰিং অভিনন্দতী’’তি পদসুদ্ধি, নো আরম্ভসুদ্ধি. ‘‘তং কিস্স হেতু অপরিঞ্ঞাতং তস্সাতি ৰদামী’’তি পদসুদ্ধি চেৰ আরম্ভসুদ্ধি চ. সেসৰারেসুপি এসেৰ নযোতি. অযং সোধনো হারো.

১৪. অধিট্ঠানহারৰণ্ণনা

‘‘সব্বধম্মমূলপরিযায’’ন্তি এত্থ সব্বধম্মগ্গহণং সামঞ্ঞতো অধিট্ঠানং. ‘‘পথৰিং আপ’’ন্তিআদি পন তং অৰিকপ্পেত্ৰা ৰিসেসৰচনং. তথা ‘‘মূলপরিযায’’ন্তি সামঞ্ঞতো অধিট্ঠানং, তং অৰিকপ্পেত্ৰা ৰিসেসৰচনং ‘‘পথৰিং মঞ্ঞতি…পে… অভিনন্দতী’’তি. ‘‘পথৰিং মঞ্ঞতী’’তি চ সামঞ্ঞতো অধিট্ঠানং তণ্হাদিগ্গাহানং সাধারণত্তা মঞ্ঞনায, তং অৰিকপ্পেত্ৰা ৰিসেসৰচনং ‘‘এতং মম, এসোহমস্মি, এসো মে অত্তা’’তি, এৰং সুত্তন্তরপদানিপি আনেত্ৰা ৰিসেসৰচনং নিদ্ধারেতব্বং. সেসৰারেসুপি এসেৰ নযো. ‘‘সেক্খো’’তি সামঞ্ঞতো অধিট্ঠানং, তং অৰিকপ্পেত্ৰা ৰিসেসৰচনং ‘‘কাযসক্খী দিট্ঠিপ্পত্তো সদ্ধাৰিমুত্তো সদ্ধানুসারী ধম্মানুসারী’’তি. তথা ‘‘সেক্খো’’তি সামঞ্ঞতো অধিট্ঠানং, তং অৰিকপ্পেত্ৰা ৰিসেসৰচনং ‘‘ইধ, ভিক্খৰে, ভিক্খু সেক্খায সম্মাদিট্ঠিযা সমন্নাগতো হোতি…পে… সেক্খেন সম্মাসমাধিনা সমন্নাগতো হোতী’’তি (সং. নি. ৫.১৩). ‘‘অরহ’’ন্তি সামঞ্ঞতো অধিট্ঠানং, তং অৰিকপ্পেত্ৰা ৰিসেসৰচনং ‘‘উভতোভাগৰিমুত্তো পঞ্ঞাৰিমুত্তো (পু. প. ১৩.২; ১৫.১ মাতিকা), তেৰিজ্জো ছল়ভিঞ্ঞো’’তি (পু. প. ৭.২৬, ২৭ মাতিকা) চ. ‘‘খীণাসৰো’’তি সামঞ্ঞতো অধিট্ঠানং, তং অৰিকপ্পেত্ৰা ৰিসেসৰচনং ‘‘কামাসৰাপি চিত্তং ৰিমুচ্চিত্থ, ভৰাসৰাপি চিত্তং ৰিমুচ্চিত্থা’’তিআদি (পারা. ১৪). সেসপদেসুপি এসেৰ নযো. ‘‘অভিজানাতী’’তি সামঞ্ঞতো অধিট্ঠানং, তং অৰিকপ্পেত্ৰা ৰিসেসৰচনং ‘‘মঞ্ঞতী’’তি. মঞ্ঞনাভাৰো হিস্স পহানপটিৰেধসিদ্ধো, পহানপটিৰেধো চ পরিঞ্ঞাসচ্ছিকিরিযাভাৰনাপটিৰেধেহি ন ৰিনাতি সব্বেপি অভিঞ্ঞাৰিসেসা মঞ্ঞনাপটিক্খেপেন অত্থতো গহিতাৰ হোন্তীতি. তথা ‘‘অরহ’’ন্তি সামঞ্ঞতো অধিট্ঠানং, তং অৰিকপ্পেত্ৰা ৰিসেসৰচনং ‘‘ৰীতরাগত্তা ৰীতদোসত্তা ৰীতমোহত্তা’’তি. ইমিনা নযেন সেসপদেসুপি সামঞ্ঞৰিসেসনিদ্ধারণা ৰেদিতব্বা. অযং অধিট্ঠানো হারো.

১৪. পরিক্খারহারৰণ্ণনা

‘‘সব্বধম্মমূলপরিযায’’ন্তি এত্থ সব্বধম্মা নাম পরিযাপন্নধম্মা, তে কুসলাকুসলাব্যাকতভেদেন তিৰিধা. তেসু কুসলানং যোনিসোমনসিকারো অলোভাদযো চ হেতূ, অকুসলানং অযোনিসোমনসিকারো লোভাদযো চ হেতূ, অব্যাকতেসু ৰিপাকানং যথাসকং কম্মং, ইতরেসং ভৰঙ্গমাৰজ্জনসমন্নাহারাদি চ হেতূ. এত্থ চ সপ্পুরিসূপনিস্সযাদিকো পচ্চযো হেতুম্হি এৰ সমৰরুল়্হো, সো তত্থ আদি-সদ্দেন সঙ্গহিতোতি দট্ঠব্বো. ‘‘মূল’’ন্তি ৰুত্তানং মঞ্ঞনানং হেতুভাৰো পাল়িযং ৰুত্তো এৰ. মঞ্ঞনাসু পন তণ্হামঞ্ঞনায অস্সাদানুপস্সনা হেতু. ‘‘সঞ্ঞোজনিযেসু ধম্মেসু অস্সাদানুপস্সিনো তণ্হা পৰড্ঢতী’’তি (সং. নি. ২.৫২) হি ৰুত্তং. মানমঞ্ঞনায দিট্ঠিৰিপ্পযুত্তলোভো হেতু কেৰলং সংসগ্গৰসেন ‘‘অহমস্মী’’তি পৰত্তনতো. দিট্ঠিমঞ্ঞনায একত্তনযাদীনং অযাথাৰগ্গাহো হেতু, অস্সুতভাৰো পুথুজ্জনভাৰস্স হেতু, সো অরিযানং অদস্সনসীলতায, সা অরিযধম্মস্স অকোৰিদতায, সা অরিযধম্মে অৰিনীততায হেতু, সব্বা চাযং হেতুপরম্পরা পথৰীআদীসু ‘‘এতং মম, এসোহমস্মি, এসো মে অত্তা’’তি তিস্সন্নং মঞ্ঞনানং হেতু, সেক্খারহাদিভাৰা পন মত্তসো সব্বসো চ মঞ্ঞনাভাৰস্স হেতূতি. অযং পরিক্খারো হারো.

১৬. সমারোপনহারৰণ্ণনা

‘‘সব্বধম্মমূলপরিযায’’ন্তিআদীসু মূলপরিযাযগ্গহণেন অস্সুতৰাগহণেন সঞ্জাননমঞ্ঞনাপরিঞ্ঞাগহণেহি চ সংকিলেসধম্মা দস্সিতা, তে চ সঙ্খেপতো তিৰিধা তণ্হাসংকিলেসো দিট্ঠিসংকিলেসো দুচ্চরিতসংকিলেসোতি. তত্থ তণ্হাসংকিলেসো তণ্হাসংকিলেসস্স, দিট্ঠিসংকিলেসস্স, দুচ্চরিতসংকিলেসস্স চ পদট্ঠানং, তথা দিট্ঠিসংকিলেসো দিট্ঠিসংকিলেসস্স, তণ্হাসংকিলেসস্স, দুচ্চরিতসংকিলেসস্স চ পদট্ঠানং, দুচ্চরিতসংকিলেসোপি দুচ্চরিতসংকিলেসস্স, তণ্হাসংকিলেসস্স, দিট্ঠিসংকিলেসস্স চ পদট্ঠানং. তেসু তণ্হাসংকিলেসো অত্থতো লোভোৰ, যো ‘‘লোভো লুব্ভনা লুব্ভিতত্তং সারাগো সারজ্জনা সারজ্জিতত্ত’’ন্তিআদিনা (ধ. স. ৩৮৯) অনেকেহি পরিযাযেহি ৰিভত্তো. তথা দিট্ঠিযেৰ দিট্ঠিসংকিলেসো, যো ‘‘দিট্ঠিগতং দিট্ঠিগহনং দিট্ঠিকন্তারো দিট্ঠিৰিসূকং দিট্ঠিৰিপ্ফন্দিত’’ন্তিআদিনা (ধ. স. ১১০৫) অনেকেহি পরিযাযেহি, ‘‘সন্তি, ভিক্খৰে, একে সমণব্রাহ্মণা’’তিআদিনা (দী. নি. ১.৩০) দ্ৰাসট্ঠিযা পভেদেহি চ ৰিভত্তো. দুচ্চরিতসংকিলেসো পন অত্থতো দুস্সীল্যচেতনা চেৰ চেতনাসম্পযুত্তধম্মা চ, যা ‘‘কাযদুচ্চরিতং ৰচীদুচ্চরিতং কাযৰিসমং ৰচীৰিসম’’ন্তি (ৰিভ. ৯১৩, ৯২৪), ‘‘পাণাতিপাতো অদিন্নাদান’’ন্তি (ৰিভ. ৯১৩) চ আদিনা অনেকেহি পরিযাযেহি, অনেকেহি পভেদেহি চ ৰিভত্তা.

তেসু তণ্হাসংকিলেসস্স সমথো পটিপক্খো, দিট্ঠিসংকিলেসস্স ৰিপস্সনা, দুচ্চরিতসংকিলেসস্স সীলং পটিপক্খো. তে পন সীলাদযো ধম্মা ইধ পরিঞ্ঞাগহণেন সেক্খগ্গহণেন ‘‘অরহ’’ন্তিআদিনা অরিযতাদিগ্গহণেন চ গহিতা. তত্থ সীলেন দুচ্চরিতসংকিলেসপ্পহানং সিজ্ঝতি, তথা তদঙ্গপ্পহানং ৰীতিক্কমপ্পহানঞ্চ, সমথেন তণ্হাসংকিলেসপ্পহানং সিজ্ঝতি, তথা ৰিক্খম্ভনপ্পহানং পরিযুট্ঠানপ্পহানঞ্চ. ৰিপস্সনায দিট্ঠিসংকিলেসপ্পহানং সিজ্ঝতি, তথা সমুচ্ছেদপ্পহানং অনুসযপ্পহানঞ্চ. তত্থ পুব্বভাগে সীলে পতিট্ঠিতস্স সমথো, সমথে পতিট্ঠিতস্স ৰিপস্সনা, মগ্গক্খণে পন সমকালমেৰ ভৰন্তি. পুব্বেযেৰ হি সুপরিসুদ্ধকাযৰচীকম্মস্স সুপরিসুদ্ধাজীৰস্স চ সমথৰিপস্সনা আরদ্ধা গব্ভং গণ্হন্তিযো পরিপাকং গচ্ছন্তিযো ৰুট্ঠানগামিনিৰিপস্সনং পরিব্রূহেন্তি, ৰুট্ঠানগামিনিৰিপস্সনা ভাৰনাপারিপূরিং গচ্ছন্তী মগ্গেন ঘটেন্তি মগ্গক্খণে সমথৰিপস্সনা পরিপূরেতি. অথ মগ্গক্খণে সমথৰিপস্সনাভাৰনাপারিপূরিযা অনৰসেসসংকিলেসধম্মং সমুচ্ছিন্দন্তিযো নিরোধং নিব্বানং সচ্ছিকরোন্তীতি. অযং সমারোপনো হারো.

সোল়সহারৰণ্ণনা নিট্ঠিতা.