১৪. অধিট্ঠানহারৰিভঙ্গৰণ্ণনা

৪৬. ধারযিতব্বাতি উপধারেতব্বা, উপলক্খিতব্বাতি অত্থো. ৰুত্তমেৰ ‘‘সামঞ্ঞৰিসেসকপ্পনায ৰোহারভাৰেন অনৰট্ঠানতো’’তিআদিনা (নেত্তি. অট্ঠ. ১৪).

তং তং ফলন্তি নিরযাদিং তং তং ফলং. অঞ্চিতাতি গতা. যোনীতি একজাতি. সমানৰসেন মিস্সীভৰতি এতাযাতি হি যোনি, উপপত্তি. পেচ্চাতি মরিত্ৰা. উস্সন্নতাযাতি ৰিতক্কবহুলতায. ‘‘উস্সন্নত্তা’’তিপি ৰদন্তি. সস্সতাদীহি ৰা উস্সন্নত্তা. অসুরজাতিযা নিব্বত্তাপনকো অসুরজাতিনিব্বত্তনকো.

সঙ্খাতি পঞ্ঞা. পঞ্ঞাপধানা চ ভাৰনাতি আহ ‘‘পটিসঙ্খায পটিপক্খভাৰনাযা’’তি.

৪৭. পত্থটভাৰেন পথৰী. সভাৰধারণট্ঠেন, নিস্সত্তনিজ্জীৰট্ঠেন চ ধাতু. আপীযতি, অপ্পাযতীতি ৰা আপো. তেজনৰসেন তিক্খতাৰসেন, দহনৰসেন ৰা তেজো. ৰাযনৰসেন ৰেগগমনৰসেন, সমুদীরণৰসেন ৰা ৰাযো. ৰীসতি আকারাতি কেসাদযো ৰীসতি কোট্ঠাসা, পকারা ৰা. কক্খল়লক্খণাধিকতায কেসাদী কক্খল়লক্খণা ৰুত্তা.

পাটিযেক্কো পথৰীধাতুকোট্ঠাসোতি পথৰীকোট্ঠাসমত্তো, অত্তসুঞ্ঞধম্মমত্তোতি অত্থো. সন্তপ্পতীতি এত্থ সরীরপকতিমতিক্কমিত্ৰা উণ্হভাৰো সন্তাপো, সরীরদহনৰসেন পৰত্তো মহাদাহো, অযমেতেসং ৰিসেসো. যেন চ জীরীযতীতি একাহিকাদিজরারোগেন জরীযতীতি চ অত্থো যুজ্জতি. ‘‘সতৰারং তাপেত্ৰা তাপেত্ৰা উদকে পক্খিপিত্ৰা উদ্ধটসপ্পি সতধোতসপ্পী’’তি ৰদন্তি. রসরুধিরমংসমেদন্হারুঅট্ঠিঅট্ঠিমিঞ্জা রসাদযো. কেচি ন্হারুং অপনেত্ৰা সুক্কং সত্তমং ধাতুং ৰদন্তি. ৰিৰেকন্তি ৰিসুংভাৰং, ৰিসদিসভাৰন্তি অত্থো. ৰত্থুসঙ্খাতো হি আহারো পরিণামং গচ্ছন্তো পাণভক্খগহণিপদনিয মুত্তকরীসভাৰেহি ৰিয অত্তনাপি ৰিসদিসরসসঙ্খাতং ৰিসুংভাৰং নিব্বত্তেন্তো তব্ভাৰং গচ্ছতীতি ৰুচ্চতি, তথা রসাদযোপি রুধিরাদিকোট্ঠাসং. তেনাহ ‘‘রসাদিভাৰেন ৰিৰেকং গচ্ছতী’’তি.

সভাৰলক্খণতোতি অসুচিভাৰেন লক্খিতব্বতো.

৪৮. যাথাৰসরসলক্খণন্তি রসিতব্বোতি রসো, পটিৰিজ্ঝিতব্বো সভাৰো, অত্তনো রসো সরসো, যাথাৰো সরসো, যাথাৰসরসো যাথাৰসরসো এৰ লক্খিতব্বত্তা লক্খণন্তি যাথাৰসরসলক্খণং. অথ ৰা যাথাৰসরসলক্খণন্তি অৰিপরীতং অত্তনো পৰত্তিসঙ্খাতং কিচ্চঞ্চেৰ পীল়নসঙ্খাতং লক্খণঞ্চ. ‘‘ইদং কিচ্চং, ইদং লক্খণ’’ন্তি অৰিজ্জাহেতু ঞাতুং ন সক্কোতি, তব্বিসযঞাণুপ্পত্তিং নিৰারেন্তী ছাদেত্ৰা পরিযোনন্ধিত্ৰা তিট্ঠতীতি ৰুত্তা. তেন ৰুত্তং ‘‘জানিতুং পটিৰিজ্ঝিতুং ন দেতী’’তি. তযিদমস্সা কিচ্চন্তি কিচ্চতো কথিতা. কথিতাতি চ ৰুত্তা, যতো চ অৰিজ্জা অসম্পটিৰেধরসাতি ৰুচ্চতি. জাযতি এত্থাতি জাতি, উপ্পত্তিট্ঠানং. যদিপি নিরোধমগ্গে অৰিজ্জা আরম্মণং ন করোতি, তে পন জানিতুকামস্স তপ্পটিচ্ছাদনৰসেন অনিরোধমগ্গেসু নিরোধমগ্গগ্গহণস্স কারণভাৰেন পৰত্তমানা তত্থ উপ্পজ্জতীতি ৰুচ্চতি, তেসম্পি অৰিজ্জায উপ্পত্তিট্ঠানতা হোতি, ইতরেসং আরম্মণভাৰেন চাতি.

অত্থানত্থন্তি হিতাহিতং. সম্মোহৰিনোদনিযং পন ‘‘অত্থত্থ’’ন্তি (ৰিভ. অট্ঠ. ২২৬) ৰুত্তং, তত্থ অত্থো এৰ অত্থত্থোতি অত্থস্স অৰিপরীততাদস্সনত্থং দুতিযেন অত্থসদ্দেন ৰিসেসনং. ন হি ঞাণং অনত্থে ‘‘অত্থো’’তি গণ্হাতীতি. কারণাকারণন্তি এত্থাপি এৰং দট্ঠব্বং. অত্থত্থন্তি ৰা আমেডিতৰচনং সব্বেসং অত্থানং পাকটকরণভাৰপ্পকাসনত্থং, ফলং ফলন্তি অত্থো, হিতপরিযাযেপি এসেৰ নযো. ন্তি অত্থানত্থাদিকং. আকারন্তি অত্থাদিকারণমেৰ.

পটিৰিদ্ধস্স পুন অৰেক্খনা পচ্চৰেক্খণা. দুচিন্তিতচিন্তিতাদিলক্খণস্স বালস্স ভাৰো বাল্যং. সম্পজানাতীতি সমং পকারেহি জানাতি. বলৰমোহো পমোহো. সমন্ততো মোহনং সম্মোহো. দুগ্গতিগামিকম্মস্স ৰিসেসপচ্চযত্তা অৰিন্দিযং. ৰিন্দতীতি লভতি. অনৰজ্জধম্মানং ৰিজ্জা ৰিয ৰিসেসপচ্চযো ন হোতীতি ৰিন্দিযং ন ৰিন্দতি. অযং অৰিজ্জায ৰেমত্ততাতি অযং ‘‘দুক্খে অঞ্ঞাণ’’ন্তিআদিনা কিচ্চজাতিলক্খণেহি ৰুত্তো অৰিজ্জায অৰিসেসো. ৰিজ্জাতিআদীনং ৰুত্তনযানসারেন অত্থো ৰেদিতব্বো.

পাসাণসক্খরৰালিকাৰিরহিতা ভূমি সণ্হাতি ‘‘সণ্হট্ঠেনা’’তি ৰুত্তং.

তত্তকমেৰ কালন্তি পঞ্চকপ্পসতানি. ৰিভূতং সমত্তিক্কন্তং রূপসঞ্ঞাসঙ্খাতং রূপং এতাযাতি ৰিভূতরূপং, সমাপত্তিন্তি পদত্থো. ন হি কাচি অরূপসমাপত্তি রূপসঞ্ঞাসহগতা পৰত্তীতি. নিরোধসমাপত্তিযং ৰত্তব্বমেৰ নত্থি, তত্থ নেৰসঞ্ঞানাসঞ্ঞাযতনসমাপত্তিযা ৰিসুং গহিতত্তা ৰুত্তং ‘‘সেসারুপ্পসমাপত্তিযো’’তি.

দমথং অনুপগচ্ছন্তো দুট্ঠস্সো খলুঙ্কস্সো. উত্তরিদমথাযাতি অরিযমগ্গদমথায.

ইতরোতি দুক্খাপটিপদো খিপ্পাভিঞ্ঞো, সুখাপটিপদো চ খিপ্পাভিঞ্ঞো. উভযতোভাগেহীতি রূপকাযনামকাযভাগেহি. উভযতোতি ৰিক্খম্ভনসমুচ্ছেদৰিমুত্তিৰসেন.

অনেকোপীতি সভাৰেন অনেকোপি. একসদ্দাভিধেয্যতাযাতি সামঞ্ঞসদ্দাভিধেয্যতায.

অধিট্ঠানহারৰিভঙ্গৰণ্ণনা নিট্ঠিতা.