নমো তস্স ভগৰতো অরহতো সম্মাসম্বুদ্ধস্স

খুদ্দকনিকাযে

নেত্তিপ্পকরণ-টীকা

গন্থারম্ভকথাৰণ্ণনা

সংৰণ্ণনারম্ভে (দী. নি. টী. ১.গন্থারম্ভকথাৰণ্ণনা; ম. নি. টী. ১.১ গন্থারম্ভকথাৰণ্ণনা; সং. নি. টী. ১.১.১ গন্থারম্ভকথাৰণ্ণনা) রতনত্তযৰন্দনা সংৰণ্ণেতব্বস্স ধম্মস্স পভৰনিস্সযৰিসুদ্ধিপটিৰেদনত্থং, তং পন ধম্মসংৰণ্ণনাসু ৰিঞ্ঞূনং বহুমানুপ্পাদনত্থং, তং সম্মদেৰ তেসং উগ্গহণধারণাদিক্কমলদ্ধব্বায সম্মাপটিপত্তিযা সব্বহিতসুখনিপ্ফাদনত্থং. অথ ৰা মঙ্গলভাৰতো, সব্বকিরিযাসু পুব্বকিচ্চভাৰতো, পণ্ডিতেহি সম্মাচরিতভাৰতো, আযতিং পরেসং দিট্ঠানুগতিআপজ্জনতো চ সংৰণ্ণনাযং রতনত্তযপণামকিরিযা. অথ ৰা রতনত্তযপণামকরণং পূজনীযপূজাপুঞ্ঞৰিসেসনিব্বত্তনত্থং, তং অত্তনো যথালদ্ধসম্পত্তিনিমিত্তস্স কম্মস্স বলানুপ্পদানত্থং, অন্তরা চ তস্স অসঙ্কোচনত্থং, তদুভযং অনন্তরাযেন অট্ঠকথায পরিসমাপনত্থং. ইদমেৰ চ পযোজনং আচরিযেন ইধাধিপ্পেতং. তথা হি ৰক্খতি ‘‘ৰন্দনাজনিতং…পে… তস্স তেজসা’’তি. ৰত্থুত্তযপূজা হি নিরতিসযপুঞ্ঞক্খেত্তসম্বুদ্ধিযা অপরিমেয্যপ্পভাৰো পুঞ্ঞাতিসযোতি বহুৰিধন্তরাযেপি লোকসন্নিৰাসে অন্তরাযনিবন্ধনসকলসংকিলেসৰিদ্ধংসনায পহোতি, ভযাদিউপদ্দৰঞ্চ নিৰারেতি. যথাহ –

‘‘পূজারহে পূজযতো, বুদ্ধে যদি ৰ সাৰকে’’তি. (ধ. প. ১৯৫; অপ. থের ১.১০.১) চ,

তথা –

‘‘যে, ভিক্খৰে, বুদ্ধে পসন্না, অগ্গে তে পসন্না, অগ্গে খো পন পসন্নানং অগ্গো ৰিপাকো হোতী’’তি (অ. নি. ৪.৩৪; ইতিৰু. ৯০) চ,

তথা –

‘‘‘বুদ্ধো’তি কিত্তযন্তস্স, কাযে ভৰতি যা পীতি;

ৰরমেৰ হি সা পীতি, কসিণেনপি জম্বুদীপস্স;

‘‘‘ধম্মো’তি…পে… ‘সঙ্ঘো’তি…পে… দীপস্সা’’তি. (দী. নি. অট্ঠ. ১.৬; ইতিৰু. অট্ঠ ৯০; দী. নি. টী. ১.গন্থারম্ভকথাৰণ্ণনা; ম. নি. টী. ১.১; অ. নি. টী. ২.৪.৩৪) চ,

তথা –

‘‘যস্মিং, মহানাম, সমযে অরিযসাৰকো তথাগতং অনুস্সরতি, নেৰস্স তস্মিং সমযে রাগপরিযুট্ঠিতং চিত্তং হোতি, ন দোস…পে… ন মোহপরিযুট্ঠিতং চিত্তং হোতী’’তি (অ. নি. ৬.১০; ১১.১১) চ,

তথা –

‘‘অরঞ্ঞে রুক্খমূলে ৰা…পে…;

ভযং ৰা ছম্ভিতত্তং ৰা, লোমহংসো ন হেস্সতী’’তি. (সং. নি. ১.২৪৯) চ;

তত্থ যস্স রতনত্তযস্স ৰন্দনং কত্তুকামো, তস্স গুণাতিসযযোগসন্দস্সনত্থং ‘‘মহাকারুণিক’’ন্তিআদিনা গাথাত্তযমাহ. গুণাতিসযযোগেন হি ৰন্দনারহভাৰো, ৰন্দনারহে চ কতা ৰন্দনা যথাধিপ্পেতপ্পযোজনং সাধেতীতি. তত্থ যস্সা সংৰণ্ণনং কত্তুকামো, সা নেত্তি ৰিসেসতো যথানুলোমসাসনসন্নিস্সযা, তস্স চ ৰিচিত্তাকারপ্পৰত্তিৰিভাৰিনী. তথা হি সুত্তন্তদেসনা ন ৰিনযদেসনা ৰিয করুণাপ্পধানা, নাপি অভিধম্মদেসনা ৰিয পঞ্ঞাপ্পধানা, অথ খো করুণাপঞ্ঞাপ্পধানাতি তদুভযপ্পধানদেসনাৰিসেসৰিভাৰনং তাৰ সম্মাসম্বুদ্ধস্স থোমনং কাতুং তম্মূলকত্তা সেসরতনানং ‘‘মহাকারুণিকং নাথ’’ন্তিআদি ৰুত্তং.

তত্থ কিরতীতি (দী. নি. টী. ১.গন্থারম্ভকথাৰণ্ণনা; ম. নি. টী. ১.১; সং. নি. টী. ১.১.১; অ. নি. টী. ১.১.১) করুণা, পরদুক্খং ৰিক্খিপতি অপনেতীতি অত্থো. অথ ৰা কিণাতীতি করুণা, পরদুক্খে সতি কারুণিকং হিংসতি ৰিবাধতীতি অত্থো. কম্পনং করোতীতি ৰা করুণা, পরদুক্খে সতি সাধূনং হদযখেদং করোতীতি অত্থো. কমিতি ৰা সুখং, তং রুন্ধতীতি করুণা. এসা হি পরদুক্খাপনযনকামতালক্খণা, অত্তসুখনিরপেক্খতায কারুণিকানং সুখং রুন্ধতি ৰিবন্ধতীতি অত্থো. কিরিযতি দুক্খিতেসু পসারিযতীতি ৰা করুণা, করুণায নিযুত্তোতি কারুণিকো যথা ‘‘দোৰারিকো’’তি (অ. নি. ৭.৬৭). যথা হি দ্ৰারট্ঠানতো অঞ্ঞত্থ ৰত্তমানোপি দ্ৰারপটিবদ্ধজীৰিকো পুরিসো দ্ৰারানতিৰত্তৰুত্তিতায দ্ৰারে নিযুত্তোতি ‘‘দোৰারিকো’’তি ৰুচ্চতি, এৰং ভগৰা মেত্তাদিৰসেন করুণাৰিহারতো অঞ্ঞত্থ ৰত্তমানোপি করুণানতিৰত্তৰুত্তিতায করুণায নিযুত্তোতি ‘‘কারুণিকো’’তি ৰুচ্চতি. মহাভিনীহারতো পট্ঠায হি যাৰ মহাপরিনিব্বানা লোকহিতত্থমেৰ লোকনাথা তিট্ঠন্তীতি. মহন্তো কারুণিকোতি মহাকারুণিকো. সতিপি ভগৰতো তদঞ্ঞগুণানম্পি ৰসেন মহন্তভাৰে কারুণিকসদ্দসন্নিধানেন ৰুত্তত্তা করুণাৰসেনেৰেত্থ মহন্তভাৰো ৰেদিতব্বো যথা ‘‘মহাৰেয্যাকরণো’’তি. এৰঞ্চ কত্ৰা ‘‘মহাকারুণিকো’’তি ইমিনা পদেন পুগ্গলাধিট্ঠানেন সত্থু মহাকরুণা ৰুত্তা হোতি.

অপরো নযো – অত্থসাধনতো করুণং করুণাযনং করুণাসম্পৰত্তনং অরহতীতি কারুণিকো. ভগৰতো হি সব্বঞ্ঞুতায অনৰসেসতো সত্তানং হিতং, হিতুপাযঞ্চ জানতো, তত্থ চ অকিলাসুনো হিতেসিতা সত্থিকা, ন তথা অঞ্ঞেসন্তি. অথ ৰা করুণা করুণাযনং সীলং পকতি সভাৰো এতস্সাতি কারুণিকো. ভগৰা হি পথৰীফস্সাদযো ৰিয কক্খল়ফুসনাদিসভাৰা করুণাসভাৰো সভাৰভূতকরুণোতি অত্থো. সেসং পুরিমসদিসমেৰ. অথ ৰা মহাৰিসযতায, মহানুভাৰতায, মহপ্ফলতায চ মহতী করুণাতি মহাকরুণা. ভগৰতো হি করুণা নিরৰসেসেসু সত্তেসু পৰত্ততি, পৰত্তমানা চ অনঞ্ঞসাধারণা পৰত্ততি, দিট্ঠধম্মিকাদিভেদঞ্চ মহন্তমেৰ সত্তানং হিতসুখং একন্ততো নিপ্ফাদেতি, মহাকরুণায নিযুত্তোতি মহাকারুণিকো, তং মহাকারুণিকং. সেসং সব্বং ৰুত্তনযেনেৰ ৰেদিতব্বং. সুমাগধাদিপদানং ৰিয চেত্থ সদ্দসিদ্ধি ৰেদিতব্বা.

নাথতীতি নাথো, ৰেনেয্যানং হিতসুখং আসীসতি পত্থেতীতি অত্থো, মেত্তাযনৰসেন চেত্থ হিতসুখাসীসনং ৰেদিতব্বং, ন করুণাযনৰসেন পঠমপদেন ৰুত্তত্তা. অথ ৰা নাথতি ৰেনেয্যগতং কিলেসব্যসনং উপতাপেতীতি নাথো, নাথতীতি ৰা নাথো, যাচতীতি অত্থো. ভগৰা হি ‘‘সাধু, ভিক্খৰে, ভিক্খু কালেন কালং অত্তসম্পত্তিং পচ্চৰেক্খিতা’’তিআদিনা (অ. নি. ৮.৭, ৮) সত্তানং তং তং হিতপ্পটিপত্তিং যাচিত্ৰাপি মহাকরুণায সমুস্সাহিতো তে তত্থ নিযোজেতি. পরমেন ৰা চিত্তিস্সরিযেন সমন্নাগতো, সব্বসত্তে ৰা সীলাদিগুণেহি ঈসতি অভিভৰতীতি পরমিস্সরো ভগৰা ‘‘নাথো’’তি ৰুচ্চতি, তং নাথং.

ঞাতব্বন্তি ঞেয্যং, অতীতাদিভেদভিন্নং সব্বং সঙ্খতং, অসঙ্খতঞ্চ. সঙ্গরণট্ঠেন সাগরো, পতিতপতিতানং অত্তনো পুথুলগম্ভীরভাৰেহি সংসীদনং নিম্মুজ্জনং করোতীতি অত্থো. সং-সদ্দস্স চেত্থ ‘‘সাভাৰো, সারাগো’’তিআদীসু (ধ. স. ৩৮৯, ৩৯১) ৰিয নিরুত্তিনযেন দট্ঠব্বো. সঙ্গরণট্ঠেনাতি ৰা সঙ্গরকরণট্ঠেন, ঠিতধম্মতায ‘‘অযং মে মরিযাদা, ইমং ৰেলং নাতিক্কমামী’’তি লোকেন সঙ্গরং সঙ্কেতং করোন্তো ৰিয হোতীতি অত্থো. সঙ্গরণং ৰা সমন্ততো গলনং সন্দনং উদকেন করোতীতি সাগরো. কপ্পৰুট্ঠানকালে হি মহাসমুদ্দো ইতো চিতো চ পগ্ঘরিত্ৰা সকলং লোকধাতুং একোঘং করোতীতি. লোকিযা পন ৰদন্তি ‘‘সাগরস্স রঞ্ঞো পুত্তেহি সাগরেহি নিব্বত্তিতো খতোতি সাগরো, পুরত্থিমো সমুদ্দপ্পদেসো, তংসম্বন্ধতায রুল়্হিৰসেন সব্বোপি সমুদ্দো তথা ৰোহরীযতী’’তি. সাগরসদিসত্তা সাগরো, ঞেয্যমেৰ সাগরোতি ঞেয্যসাগরো. সদিসতা চেত্থ পুথুলদুত্তরগম্ভীরানাদিকালিকতাহি ৰেদিতব্বা, নিহীনং চেতমোপম্মং. তথা হি ঞেয্যস্সেৰ সাতিসযা পুথুলতা অপরিমাণলোকধাতুব্যাপনতো, সব্বঞ্ঞুতঞ্ঞাণস্সেৰ তরণীযতায দুত্তরতা, গম্ভীরতা, আদিকোটিরহিতা চ পৰত্তি, ন ইতরস্স পরিচ্ছিন্নদেসত্তা বাহিরকৰীতরাগেহিপি ইত্তরেন খণেন অতিক্কমিতব্বত্তা, পরিমিতগম্ভীরত্তা, পরিমিতকালত্তা চ. ঞেয্যসাগরস্স পারং পরিযন্তং গতোতি ঞেয্যসাগরপারগূ, তং ঞেয্যসাগরপারগুং.

গমনঞ্চেত্থ ঞাণগমনমেৰ, ন ইতরং ঞেয্যগ্গহণতো, তং পন ঞাণং দুৰিধং সম্মসনপটিৰেধভেদতো, তথা হেতুফলভেদতো. তত্থ ‘‘কিচ্ছং ৰতাযং লোকো আপন্নো’’তিআদিনা (দী. নি. ২.৫৭; সং. নি. ২.৪, ১০; পেটকো. ২৩) করুণাযনৰসেনেৰ অভিনিৰিসিত্ৰা অনেকাকারৰোকারে সঙ্খারে সম্মসন্তং ভগৰতো সম্মসনঞাণং ছত্তিংসকোটিসতসহস্সমুখেন ঞেয্যসাগরং অজ্ঝোগাহেত্ৰা তস্স পারং পরিযন্তং অগমাসি, যং ‘‘মহাৰজিরঞাণ’’ন্তি ৰুচ্চতি. পটিৰেধঞাণং পন সব্বঞ্ঞুতঞ্ঞাণপদট্ঠানং আসৰক্খযঞাণং, আসৰক্খযঞাণপদট্ঠানঞ্চ সব্বঞ্ঞুতঞ্ঞাণং, যং ‘‘মহাবোধী’’তি ৰুচ্চতি. পারগমনঞ্চ তস্স কিচ্চসিদ্ধিযা, সমত্থতায চ ৰেদিতব্বং. তথা যথাৰুত্তং সম্মসনঞাণং হেতু, ইতরং ফলং. সহ সম্মসনঞাণেন ৰা আসৰক্খযঞাণং হেতু, সব্বঞ্ঞুতঞ্ঞাণং ফলং তদানিসংসভাৰতোতি ৰেদিতব্বং.

ৰন্দেতি নমামি, অভিত্থৰামি ৰা. সণ্হট্ঠেন নিপুণা, অনুপচিতঞাণসম্ভারানং অগাধট্ঠেন গম্ভীরা, একত্তাদিভেদতো নন্দিযাৰট্টাদিৰিভাগতো চ ৰিচিত্রা ৰিসিট্ঠা নানাৰিধা নযা এতিস্সাতি নিপুণগম্ভীরৰিচিত্রনযা, নিপুণগম্ভীরৰিচিত্রনযা দেসনা অস্সাতি নিপুণগম্ভীরৰিচিত্রনযদেসনো, তং নিপুণ…পে… দেসনং. নযতীতি ৰা নযো, পাল়িগতি, সা চ ৰুত্তনযেন অত্থতো নিপুণা, অত্থতো ব্যঞ্জনতো চ গম্ভীরা, সঙ্খেপৰিত্থারানুলোমাদিপ্পৰত্তিযা নানাৰিধতায ৰিচিত্রা. তথা হি পঞ্ঞত্তিঅনুপঞ্ঞত্তিআদিৰসেন, সংকিলেসভাগিযাদিলোকিযাদিতদুভযৰোমিস্সতাদিৰসেন, কুসলাদিখন্ধাদিসঙ্গহাদিসমযৰিমুত্তাদিঠপনাদিকুসলমূলাদিতিকপট্ঠানাদিৰসেন চ অনেকৰিধা পাল়িগতীতি.

তত্থ (দী. নি. টী. ১.গন্থারম্ভকথাৰণ্ণনা) দ্ৰীহাকারেহি ভগৰতো থোমনা ৰেদিতব্বা অত্তহিতসম্পত্তিতো, পরহিতপ্পটিপত্তিতো চ. তেসু অত্তহিতসম্পত্তি অনাৰরণঞাণাধিগমতো, সৰাসনানং সব্বেসং কিলেসানং অচ্চন্তপ্পহানতো চ ৰেদিতব্বা, পরহিতপ্পটিপত্তি লাভসক্কারাদিনিরপেক্খচিত্তস্স সব্বদুক্খনিয্যানিকধম্মদেসনতো, পটিৰিরুদ্ধেসুপি নিচ্চং হিতজ্ঝাসযঞাণপরিপাককালাগমনতো চ ৰেদিতব্বা. সা পনেত্থ পযোগতো, আসযতো চ দুৰিধা, পরহিতপ্পটিপত্তি, যথাৰুত্তভেদা দুৰিধা চ অত্তহিতসম্পত্তি পকাসিতা হোতি. কথং? ‘‘মহাকারুণিক’’ন্তি ইমিনা আসযতো, ‘‘নিপুণ…পে… দেসন’’ন্তি ইমিনা পযোগতো, ‘‘নাথ’’ন্তি ইমিনা পন উভযথাপি ভগৰতো পরহিতপ্পটিপত্তি পকাসিতা করুণাকিচ্চদীপনতো, ‘‘ঞেয্যসাগরপারগু’’ন্তি ইমিনা সাতিসযং অত্তহিতসম্পত্তি পরমুক্কংসগতঞাণকিচ্চদীপনতো.

অথ ৰা তীহাকারেহি ভগৰতো থোমনা ৰেদিতব্বা হেতুতো, ফলতো, উপকারতো চ. তত্থ হেতু মহাকরুণা, সা পন পঠমপদেন সরূপেনেৰ দস্সিতা. ফলং চতুব্বিধং ঞাণসম্পদা পহানসম্পদা আনুভাৰসম্পদা রূপকাযসম্পদা চাতি. তাসু পধানভূতা ঞাণপহানসম্পদা ‘‘ঞেয্যসাগরপারগু’’ন্তি ইমিনা পদেন পকাসিতা. পধানে হি দস্সিতে অৰিনাভাৰতো ইতরম্পি দ্ৰযং দস্সিতমেৰ হোতি. ন হি বুদ্ধানং আনুভাৰরূপকাযসম্পত্তীহি ৰিনা কদাচিপি ধম্মকাযসিরী ৰত্ততীতি. উপকারো অনন্তরং অবাহিরং কত্ৰা তিৰিধযানমুখেন ৰিমুত্তিধম্মদেসনা, সা ‘‘নাথং, নিপুণ…পে… দেসন’’ন্তি পদদ্ৰযেন পকাসিতাতি ৰেদিতব্বং.

তত্থ (দী. নি. টী. ১.গন্থারম্ভকথাৰণ্ণনা) ‘‘মহাকারুণিক’’ন্তি এতেন সম্মাসম্বোধিযা মূলং দস্সেতি. মহাকরুণাসঞ্চোদিতমানসো হি ভগৰা সংসারপঙ্কতো সত্তানং সমুদ্ধরণত্থং কতাভিনীহারো অনুপুব্বেন পারমিযো পূরেত্ৰা অনুত্তরং সম্মাসম্বোধিং অধিগতোতি করুণা সম্মাসম্বোধিযা মূলং. ‘‘ঞেয্যসাগরপারগু’’ন্তি এতেন পুব্বভাগপ্পটিপত্তিযা সদ্ধিং সম্মাসম্বোধিং দস্সেতি. অনাৰরণঞাণপদট্ঠানঞ্হি মগ্গঞাণং, মগ্গঞাণপদট্ঠানঞ্চ অনাৰরণঞাণং ‘‘সম্মাসম্বোধী’’তি ৰুচ্চতি. ৰুত্তপ্পভেদং পন সম্মসনঞাণং সহ পঞ্ঞাপারমিযা তস্সা পুব্বভাগপটিপদা. তস্সা হি আনুভাৰেন লীনুদ্ধচ্চপতিট্ঠানাযূহনকামসুখল্লিকত্তকিলমথানুযোগসস্সতুচ্ছেদাদিঅন্তদ্ৰযৰিরহিতা উক্কংসপারমিপ্পত্তা মজ্ঝিমা পটিপদা ভাৰনাপারিপূরিং গতা. ‘‘নাথ’’ন্তি ইমিনা সম্মাসম্বোধিযা ফলং দস্সেতি লোকত্তযনাযকভাৰদীপনতো. তথা হি সব্বানত্থপরিহারপুব্বঙ্গমায নিরৰসেসহিতসুখৰিধানতপ্পরায নিরতিসযায পযোগসম্পত্তিযা, সদেৰমনুস্সায পজায অচ্চন্তুপকারিতায অপরিমিতনিরুপমভাৰগুণৰিসেসসমঙ্গিতায চ সব্বসত্তুত্তমো ভগৰা অপরিমাণাসু লোকধাতূসু অপরিমাণানং সত্তানং অনুত্তরগারৰট্ঠানভূততায চ ‘‘নাথো’’তি ৰুচ্চতীতি. ‘‘নিপুণ…পে… দেসন’’ন্তি ইমিনা সম্মাসম্বোধিযা পযোজনং দস্সেতি. সংসারমহোঘতো সত্তসন্তারণত্থঞ্হি ভগৰতা সম্মাসম্বোধি অভিপত্থিতা, তঞ্চ সত্তসন্তারণং যথাৰুত্তদেসনাসম্পত্তিযা সমিজ্ঝতি তদৰিনাভাৰতো. ইমিনা ভগৰতো সাতিসযা পরহিতপ্পটিপত্তি দস্সিতা, ইতরেহি অত্তহিতসম্পত্তীতি তদুভযেন অত্তহিতায পটিপন্নাদীসু চতূসু পুগ্গলেসু ভগৰতো চতুত্থপুগ্গলভাৰং দীপেতি, তেন চ অনুত্তরদক্খিণেয্যভাৰং, উত্তমৰন্দনীযভাৰং, অত্তনো চ ৰন্দনকিরিযায খেত্তঙ্গতভাৰং দীপেতি.

এত্থ চ যথা ‘‘মহাকারুণিক’’ন্তি ইমিনা পদেন ভগৰতো মহাকরুণা দস্সিতা, এৰং ‘‘ঞেয্যসাগরপারগু’’ন্তি এতেন মহাপঞ্ঞা দস্সিতা. তেসু করুণাগ্গহণেন লোকিযেসু মহগ্গতভাৰপ্পত্তাসাধারণগুণদীপনতো ভগৰতো সব্বলোকিযগুণসম্পত্তি দস্সিতা হোতি, পঞ্ঞাগ্গহণেন সব্বঞ্ঞুতঞ্ঞাণপদট্ঠানমগ্গঞাণদীপনতো সব্বলোকুত্তরগুণসম্পত্তি. তদুভযগ্গহণসিদ্ধো এৰ চত্থো নাথসদ্দেন পকাসীযতি. করুণাৰচনেন উপগমনং নিরুপক্কিলেসং দস্সেতি, পঞ্ঞাৰচনেন অপগমনং. তথা করুণাগ্গহণেন লোকসমঞ্ঞানুরূপং ভগৰতো পৰত্তিং দস্সেতি লোকৰোহারৰিসযত্তা করুণায, পঞ্ঞাগ্গহণেন সমঞ্ঞায অনতিধাৰনং. সভাৰানৰবোধেন হি ধম্মানং সমঞ্ঞং অতিধাৰিত্ৰা সত্তাদিসম্মসনং হোতীতি. তথা করুণাগ্গহণেন মহাকরুণাসমাপত্তিৰিহারং দস্সেতি, পঞ্ঞাগ্গহণেন তীসু কালেসু অপ্পটিহতঞাণং, চতুসচ্চঞাণং, চতুপটিসম্ভিদাঞাণং, চতুৰেসারজ্জঞাণং. করুণাগ্গহণেন মহাকরুণাসমাপত্তিঞাণস্স গহিতত্তা সেসাসাধারণঞাণানি, ছ অভিঞ্ঞা, অট্ঠসু পরিসাসু (ম. নি. ১.১৫১, ১৭৮) অকম্পনঞাণানি, দস বলানি, চুদ্দস বুদ্ধঞাণানি, সোল়স ঞাণচরিযা, অট্ঠারস বুদ্ধধম্মা (মহানি. ৬৯, ১৫৬; চূল়নি. মোঘরাজমাণৰপুচ্ছানিদ্দেস ৮৫; পটি. ম. ৩.৫; দী. নি. অট্ঠ. ৩.৩০৫; ৰিভ. মূলটী. সুত্তন্তভাজনীযৰণ্ণনা; দী. নি. টী. ৩.১৪১), চতুচত্তালীস ঞাণৰত্থূনি সত্তসত্ততি ঞাণৰত্থূনীতি (সং. নি. ২.৩৪) এৰমাদীনং অনেকেসং পঞ্ঞাপ্পভেদানং ৰসেন ঞাণচারং দস্সেতি.

তথা করুণাগ্গহণেন চরণসম্পত্তি, পঞ্ঞাগ্গহণেন ৰিজ্জাসম্পত্তি. করুণাগ্গহণেন সত্তাধিপতিতা, পঞ্ঞাগ্গহণেন ধম্মাধিপতিতা. করুণাগ্গহণেন লোকনাথভাৰো, পঞ্ঞাগ্গহণেন অত্তনাথভাৰো. তথা করুণাগ্গহণেন পুব্বকারিভাৰো, পঞ্ঞাগ্গহণেন কতঞ্ঞুতা. করুণাগ্গহণেন অপরন্তপতা, পঞ্ঞাগ্গহণেন অনত্তন্তপতা. করুণাগ্গহণেন ৰা বুদ্ধকরধম্মসিদ্ধি, পঞ্ঞাগ্গহণেন বুদ্ধভাৰসিদ্ধি. তথা করুণাগ্গহণেন পরেসং তারণং, পঞ্ঞাগ্গহণেন সযং তারণং. তথা করুণাগ্গহণেন সব্বসত্তেসু অনুগ্গহচিত্ততা, পঞ্ঞাগ্গহণেন সব্বধম্মেসু ৰিরত্তচিত্ততা দস্সিতা হোতি. সব্বেসঞ্চ বুদ্ধগুণানং করুণা আদি তংনিদানভাৰতো, পঞ্ঞা পরিযোসানং ততো উত্তরি করণীযাভাৰতো, ইতি আদিপরিযোসানদস্সনেন সব্বে বুদ্ধগুণা দস্সিতা হোন্তি. তথা করুণাৰচনেন সীলক্খন্ধপুব্বঙ্গমো সমাধিক্খন্ধো দস্সিতো হোতি. করুণানিদানঞ্হি সীলং ততো পাণাতিপাতাদিৰিরতিপ্পৰত্তিতো, সা চ ঝানত্তযসম্পযোগিনীতি. পঞ্ঞাৰচনেন পঞ্ঞাক্খন্ধো. সীলঞ্চ সব্ববুদ্ধগুণানং আদি, সমাধি মজ্ঝে, পঞ্ঞা পরিযোসানন্তি এৰম্পি আদিমজ্ঝপরিযোসানকল্যাণা সব্বে বুদ্ধগুণা দস্সিতা হোন্তি নযতো দস্সিতত্তা. এসো এৰ হি নিরৰসেসতো বুদ্ধগুণানং দস্সনুপাযো, যদিদং নযগ্গাহণং, অঞ্ঞথা কো নাম সমত্থো ভগৰতো গুণে অনুপদং নিরৰসেসতো দস্সেতুং. তেনেৰাহ –

‘‘বুদ্ধোপি বুদ্ধস্স ভণেয্য ৰণ্ণং, কপ্পম্পি চে অঞ্ঞমভাসমানো;

খীযেথ কপ্পো চিরদীঘমন্তরে, ৰণ্ণো ন খীযেথ তথাগতস্সা’’তি. (দী. নি. অট্ঠ. ১.৩০৪; ৩.১৪১; ম. নি. অট্ঠ. ৩.৪২৫; উদা. অট্ঠ. ৫৩; অপ. অট্ঠ. ২.৭.২০; বু. ৰং. অট্ঠ. ৪.৪; চরিযা. অট্ঠ. নিদানকথা, পকিণ্ণককথা; দী. নি. টী. ১.গন্থারম্ভকথাৰণ্ণনা; ম. নি. টী. ১.১; সং. নি. টী. ১.১.১; অ. নি. টী. ১.১.১; ৰজির. টী. গন্থারম্ভকথা; সারত্থ. টী. ১.গন্থারম্ভকথাৰণ্ণনা);

তেনেৰ চ আযস্মতা সারিপুত্তত্থেরেনাপি বুদ্ধগুণপরিচ্ছেদনং পতি অনুযুত্তেন ‘‘নো হেতং, ভন্তে’’তি (দী. নি. ২.১৪৫) পটিক্খিপিত্ৰা ‘‘অপিচ মে, ভন্তে, ধম্মন্ৰযো ৰিদিতো’’তি (দী. নি. ২.১৪৬) ৰুত্তং.

এৰং সঙ্খেপেন সকলসব্বঞ্ঞুগুণেহি ভগৰন্তং অভিত্থৰিত্ৰা ইদানি সদ্ধম্মং থোমেতুং ‘‘ৰিজ্জাচরণসম্পন্না’’তিআদিমাহ. তত্থ ৰিজ্জাচরণসম্পন্না হুত্ৰাতি ৰচনসেসো. ৰিন্দিযং ধম্মানং সলক্খণং, সামঞ্ঞলক্খণঞ্চ ৰিন্দতীতি ৰিজ্জা, লোভক্খন্ধাদীনি ৰা ৰিজ্ঝনট্ঠেন ৰিজ্জা, চতুন্নং ৰা অরিযসচ্চানং ৰিদিতকরণট্ঠেন ৰিজ্জাতি এৰং তাৰেত্থ ৰচনত্থতো ৰিজ্জা ৰেদিতব্বা. পভেদতো পন তিস্সোপি ৰিজ্জা ৰিজ্জা ভযভেরৰসুত্তে আগতনিযামেনেৰ, অট্ঠপি ৰিজ্জা ৰিজ্জা অম্বট্ঠসুত্তাদীসু (দী. নি. ১.২৭৮ আদযো) আগতনিযামেনেৰ. চরন্তি তেহীতি চরণানি, সীলসংৰরাদযো পঞ্চদস ধম্মা, ইতি ইমাহি ৰিজ্জাহি, ইমেহি চ চরণেহি সম্পন্না সম্পন্নাগতাতি ৰিজ্জাচরণসম্পন্না.

যেনাতি যেন ধম্মেন করণভূতেন, হেতুভূতেন চ. তত্থ মগ্গধম্মস্স করণত্থো ৰেদিতব্বো নিয্যানকিরিযাসাধকতমভাৰতো, নিব্বানধম্মস্স হেতুঅত্থো আরম্মণপচ্চযভাৰতো. পচ্চযত্থো হি অযং হেত্ৰত্থো. পরিযত্তিধম্মস্সপি হেতুঅত্থো যুজ্জতেৰ পরম্পরায হেতুভাৰতো. ফলধম্মে পন উভযম্পি সম্ভৰতি. কথং? ‘‘তায সদ্ধায অৰূপসন্তাযা’’তি ৰচনতো মগ্গেন সমুচ্ছিন্নানং কিলেসানং পটিপ্পস্সদ্ধিপ্পহানকিচ্চতায ফলস্স নিয্যানানুগুণতা, নিয্যানপরিযোসানতা চাতি ইমিনা পরিযাযেন সিযা করণত্থো নিয্যানকিরিযায. সকদাগামিমগ্গৰিপস্সনাদীনং পন উপনিস্সযপচ্চযভাৰতো সিযা হেতুঅত্থো. এৰঞ্চ কত্ৰা অগ্গপ্পসাদসুত্তাদীসু (ইতিৰু. ৯০) অগ্গাদিভাৰেন অগ্গহিতাপি ফলপরিযত্তিধম্মা ছত্তমাণৰকৰিমানাদীসু (ৰি. ৰ. ৮৮৬ আদযো) সরণীযভাৰেন গহিতাতি তেসং মগ্গনিব্বানানং ৰিয মহাঅট্ঠকথাযং সরণভাৰো উদ্ধটো. ৰিসেসতো চেত্থ মগ্গপরিযাপন্না এৰ ৰিজ্জাচরণধম্মা ৰেদিতব্বা. তে হি নিপ্পরিযাযেন নিয্যানকিরিযায সাধকতমভূতা, ন ইতরে. ইতরেসং পন নিয্যানত্থতায নিয্যানতা. যদি এৰং কস্মা ‘‘ৰিজ্জাচরণসম্পন্না হুত্ৰা’’তি ৰুত্তং, নিয্যানসমকালমেৰ হি যথাৰুত্তৰিজ্জাচরণসম্পত্তিসমধিগমোতি? নাযং ৰিরোধো সমানকালতায এৰ অধিপ্পেতত্তা যথা ‘‘চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণ’’ন্তি (ম. নি. ১.২০৪, ৪০০; ৩.৪২১, ৪২৫, ৪২৬; সং. নি. ২.৪৩-৪৫; ৪.৬০; কথা. ৪৬৫, ৪৬৭). সম্পন্নাতি ৰা পদস্স ৰত্তমানকালত্থতা ৰেদিতব্বা ‘‘উপ্পন্না ধম্মা’’তি (ধ. স. তিকমাতিকা ১৭) এত্থ উপ্পন্নসদ্দস্স ৰিয. এৰঞ্চ কত্ৰা ৰচনসেসমন্তরেনেৰ পদযোজনা সিদ্ধা হোতি. ‘‘যেনা’’তি চ পদং উভযত্থ সম্বন্ধিতব্বং ‘‘যেন ধম্মেন ৰিজ্জাচরণসম্পন্না, যেন ধম্মেন নিয্যন্তী’’তি.

লোকতোতি খন্ধাদিলোকতো, ৰট্টতোতি অত্থো. ন্তি তং মগ্গনিব্বানফলপরিযত্তিভেদং ধম্মং. উত্তমন্তি সেট্ঠং. তথা হেস অত্তনা উত্তরিতরস্স অভাৰেন ‘‘অনুত্তরো’’তি ৰুচ্চতি. তত্থ মগ্গস্স নিয্যানহেতুআদিঅত্থেন, নিব্বানস্স নিস্সরণৰিৰেকাদিঅত্থেন, ফলস্স অরিযসন্তভাৰাদিঅত্থেন চ সেট্ঠতা ৰেদিতব্বা. স্ৰাযমত্থো ‘‘যাৰতা, ভিক্খৰে, ধম্মা সঙ্খতা, অরিযো অট্ঠঙ্গিকো মগ্গো তেসং অগ্গমক্খাযতী’’তি (ইতিৰু. ৯০; অ. নি. ৪.৩৪) আদিসুত্তপদানুসারেন ৰিভাৰেতব্বো.

ধম্মন্তি যথানুসিট্ঠং পটিপজ্জমানে অপাযতো, সংসারতো চ অপতমানে কত্ৰা ধারেতীতি ধম্মো. সম্মা, সামঞ্চ সব্বধম্মানং বুদ্ধত্তা সম্মাসম্বুদ্ধো, সব্বঞ্ঞুতাঅনাৰরণঞাণো সমন্তচক্খু ভগৰা, তেন যথা সম্মাসম্বোধিসমধিগমেনেৰ সব্বে বুদ্ধগুণা সম্পাপুণীযন্তি, এৰং সম্মদেৰ আসেৰনায ভাৰনায বহুলীকিরিযায সম্মাপটিপত্তিযা সম্মদেৰ পচ্চৰেক্খণায সক্কচ্চং ধম্মদেসনায ৰেনেয্যসন্তানেসু পতিট্ঠাপনেন –

‘‘অরিযং, ৰো ভিক্খৰে, সম্মাসমাধিং দেসেস্সামি (ম. নি. ৩.১৩৬; পেটকো. ২৪). মগ্গানট্ঠঙ্গিকো সেট্ঠো (ধ. প. ২৭৩; নেত্তি. ১৭০; পেটকো. ৩০). যাৰতা, ভিক্খৰে, ধম্মা সঙ্খতা ৰা অসঙ্খতা ৰা, ৰিরাগো তেসং অগ্গমক্খাযতি (ইতিৰু. ৯০; অ. নি. ৪.৩৪). একাযনো অযং, ভিক্খৰে, মগ্গো সত্তানং ৰিসুদ্ধিযা (দী. নি. ২.৩৭৩; ম. নি. ১.১০৬; সং. নি. ৫.৩৬৭, ৩৮৪). ধম্মং, ৰো ভিক্খৰে, দেসেস্সামি আদিকল্যাণ’’ন্তি (ম. নি. ৩.৪২০; নেত্তি. ৫) –

আদিৰচনেহি, অভিত্থৰনেন চ পূজিতো মানিতো অপচিতোতি সম্মাসম্বুদ্ধপূজিতো, তং সম্মাসম্বুদ্ধপূজিতং ধম্মং ৰন্দেতি সম্বন্ধো.

অযং পনেত্থ সঙ্খেপত্থো – যস্স ধম্মস্স অধিগমনে ৰিজ্জাসম্পন্না চেৰ হোন্তি চরণসম্পন্না চ, সব্বৰট্টদুক্খতো চ নিয্যন্তি, তমেৰ অরিযানং সকলগুণসমঙ্গিভাৰনিমিত্তং, অনৰসেসদুক্খনিস্সরণহেতুভূতঞ্চ উত্তমং পৰরং সদ্ধিং পরিযত্তিধম্মেন নৰৰিধং লোকুত্তরধম্মং ভগৰতাপি সম্মাপটিপত্তিআদিৰিধিনা পূজিতং নমামি, অভিত্থৰামি ৰাতি.

এত্থ চ ‘‘যেন লোকতো নিয্যন্তি, ৰিজ্জাচরণসম্পন্না চ হোন্তী’’তি পদদ্ৰযেন যথাক্কমং ধম্মস্স ভাৰেতব্বভাৰো, সচ্ছিকাতব্বভাৰো চ ৰুত্তো. তেসু পঠমেন ৰিজ্জাসম্পত্তিযা ধম্মং থোমেতি, দুতিযেন ৰিমুত্তিসম্পত্তিযা. তথা পঠমেন ঝানসম্পদায, দুতিযেন ৰিমোক্খসম্পদায. পঠমেন ৰা সমাধিসম্পদায, দুতিযেন সমাপত্তিসম্পদায. পঠমেন ৰা খযঞাণভাৰেন, দুতিযেন অনুপ্পাদঞাণভাৰেন. অথ ৰা পুরিমেন ৰিজ্জূপমতায, দুতিযেন ৰজিরূপমতায. পুরিমেন ৰা ৰিরাগসম্পত্তিযা, দুতিযেন নিরোধসম্পত্তিযা. তথা পঠমেন নিয্যানভাৰেন, দুতিযেন নিস্সরণভাৰেন. পঠমেন ৰা হেতুভাৰেন, দুতিযেন অসঙ্খতভাৰেন. পঠমেন ৰা দস্সনভাৰেন, দুতিযেন ৰিৰেকভাৰেন. পঠমেন ৰা অধিপতিভাৰেন, দুতিযেন অমতভাৰেন ধম্মং থোমেতি. অথ ৰা পঠমেন নিয্যানিকভাৰদস্সনতো স্ৰাক্খাততায ধম্মং থোমেতি, দুতিযেন সচ্ছিকাতব্বভাৰতো সন্দিট্ঠিকতায. তথা পুরিমেন অকালিকতায, পচ্ছিমেন এহিপস্সিকতায. পুরিমেন ৰা ওপনেয্যিকতায, পচ্ছিমেন পচ্চত্তং ৰেদিতব্বতায ধম্মং থোমেতি.

‘‘উত্তম’’ন্তি চ এতেন অঞ্ঞস্স ৰিসিট্ঠস্স অভাৰদীপনেন পরিপুণ্ণতায ধম্মং থোমেতি, ‘‘সম্মাসম্বুদ্ধপূজিত’’ন্তি এতেন পরিসুদ্ধতায. সব্বদোসাপগমেন হিস্স পূজনীযতা. পরিসুদ্ধতায চস্স পহানসম্পদা, পরিপুণ্ণতায পভৰসম্পদা. পহানসম্পত্তিযা চ ভাৰনাপারিপূরী অনৰসেসদোসসমুগ্ঘাটনতো, পভৰসম্পত্তিযা সচ্ছিকিরিযনিব্বত্তি ততুত্তরি করণীযাভাৰতো. অনঞ্ঞসাধারণতায হি উত্তমোতি. তথা ভাৰেতব্বভাৰেনস্স সহ পুব্বভাগসীলাদীহি সেক্খা সীলসমাধিপঞ্ঞাক্খন্ধা, সচ্ছিকাতব্বভাৰেন সহ অসঙ্খতায ধাতুযা অসেক্খা সীলসমাধিপঞ্ঞাক্খন্ধা দস্সিতা হোন্তীতি.

এৰং সঙ্খেপেন সব্বসদ্ধম্মগুণেহি সদ্ধম্মং থোমেত্ৰা ইদানি অরিযসঙ্ঘং থোমেতুং ‘‘সীলাদিগুণসম্পন্নো’’তিআদি ৰুত্তং. তত্থ সীলাদিগুণসম্পন্নোতি সীলসমাধিপঞ্ঞাৰিমুত্তিযাদিগুণেহি সম্পন্নো সমন্নাগতো, সম্পন্নসীলাদিগুণো ৰা. অরিযানঞ্হি তংতংমগ্গৰজ্ঝকিলেসপ্পহানেন হতপটিপক্খা সুৰিসুদ্ধা সীলাদযো ‘‘সম্পন্না’’তি ৰত্তব্বতং অরহন্তি, ন পুথূজ্জনানং, যতো ‘‘সুপ্পটিপন্নো’’তিআদিনা (ম. নি. ১.৭৪; অ. নি. ৬.১০; উদা. ১৮) অরিযসঙ্ঘো থোমীযতি. অথ ৰা সীলাদিগুণসম্পন্নোতি পরিপুণ্ণসীলাদিগুণো. অরিযপুগ্গলানঞ্হি অরিযসচ্চপ্পটিৰেধেন সহেৰ যথারহং সেক্খাসেক্খা সীলাদিধম্মক্খন্ধা পারিপূরিং গচ্ছন্তীতি. ঠিতো মগ্গফলেসূতি মগ্গেসু, ফলেসু চ ঠিতো, মগ্গট্ঠো, ফলট্ঠো চাতি অত্থো. যোতি অনিযমতো অরিযসঙ্ঘং নিদ্দিসতি, তস্স ‘‘ত’’ন্তি ইমিনা নিযমং ৰেদিতব্বং.

ননু চ অরিযসঙ্ঘে ন সব্বে অরিযপুগ্গলা মগ্গট্ঠা, নাপি সব্বে ফলট্ঠাতি? সচ্চমেতং, অৰযৰধম্মেন পন সমুদাযং নিদ্দিসন্তো এৰমাহ যথা ‘‘সমং চুণ্ণ’’ন্তি. যথা হি যোগচুণ্ণস্স অৰযৰেসু লব্ভমানো সমভাৰো সমুদাযে অপদিসীযতি ‘‘সমং চুণ্ণ’’ন্তি, এৰং অরিযসঙ্ঘস্স অৰযৰভূতেসু অরিযপুগ্গলেসু লব্ভমানো মগ্গট্ঠফলট্ঠভাৰো সমুদাযভূতে অরিযসঙ্ঘে ঠিতো ‘‘মগ্গফলেসূ’’তি অপদিট্ঠোতি ৰেদিতব্বং.

আরকত্তা কিলেসেহি, অনযে ন ইরিযনতো, অযে চ ইরিযনতো, সদেৰকেন চ লোকেন ‘‘সরণ’’ন্তি অরণীযতো অরিযো, দিট্ঠিসীলসামঞ্ঞেন সংহতত্তা সঙ্ঘো, অরিযো চ সো সঙ্ঘো চাতি অরিযসঙ্ঘো, তং অরিযসঙ্ঘং. পুজ্জভৰফলনিব্বত্তনতো অত্তনো সন্তানং পুনাতীতি ৰা পুঞ্ঞং, খিত্তং ৰুত্তং বীজং ৰিরুহনট্ঠানতায তাযতি রক্খতীতি খেত্তং কেদারাদি, খেত্তং ৰিযাতি খেত্তং, সত্তানং পুঞ্ঞস্স মহপ্ফলভাৰকরণেন ৰিরুহনট্ঠানতায খেত্তন্তি পুঞ্ঞক্খেত্তং. অনুত্তরং ৰন্দেতি সম্বন্ধো.

এত্থ চ ‘‘সীলাদিগুণসম্পন্নো’’তি এতেন অরিযসঙ্ঘস্স ভগৰতো অনুজাতপুত্ততং দস্সেতি, তেনস্স পভৰসম্পদা দীপিতা হোতি. ‘‘ঠিতো মগ্গফলেসূ’’তি এতেন পহানসম্পদং, ঞাণসম্পদঞ্চ দস্সেতি কিলেসানং সমুচ্ছেদপ্পটিপ্পস্সদ্ধিপ্পহানদীপনতো, মগ্গফলঞাণাধিগমদীপনতো চ. ‘‘অরিযসঙ্ঘ’’ন্তি এতেন পভৰসম্পদং সব্বসঙ্ঘানং অগ্গভাৰদীপনতো, সদেৰকেন চ লোকেন অরণীযভাৰদীপনতো. ‘‘পুঞ্ঞক্খেত্তং অনুত্তর’’ন্তি এতেন লোকস্স বহূপকারতং দস্সেতি অগ্গদক্খিণেয্যভাৰদীপনতো.

তথা ‘‘সীলাদিগুণসম্পন্নো’’তি ইদং অরিযসঙ্ঘস্স সম্মাউজুঞাযসামীচিপ্পটিপন্নভাৰদীপনং. ‘‘ঠিতো মগ্গফলেসূ’’তি ইদং সতিপি সন্তানৰিভাগেন অনেকভাৰে চতুপুরিসযুগঅট্ঠপুরিসপুগ্গলভাৰদীপনং. ‘‘অরিযসঙ্ঘ’’ন্তি ইদং আহুনেয্যাদিভাৰদীপনং. ‘‘পুঞ্ঞক্খেত্তং অনুত্তর’’ন্তি ইদং লোকস্স হিতসুখায পটিপন্নতাদীপনং. তথা ‘‘ঠিতো মগ্গফলেসূ’’তি ইদং অরিযসঙ্ঘস্স লোকুত্তরসরণগমনসব্ভাৰদীপনং, তেনস্স ভগৰতো ওরসপুত্তভাৰো দস্সিতো হোতি. ‘‘সীলাদিগুণসম্পন্নো’’তি ইমিনা পনস্স ৰিহতৰিধস্তকিলেসা অনৰসেসা সেক্খাসেক্খা সীলাদিধম্মক্খন্ধা দস্সিতা. ‘‘অরিযসঙ্ঘং পুঞ্ঞক্খেত্তং অনুত্তর’’ন্তি ইমিনা তেসং তেসঞ্ঞেৰ যথাৰুত্তগুণৰিসেসানং সুপরিসুদ্ধতং দীপেতি. তেনস্স মহানুভাৰতং, অনুত্তরদক্খিণেয্যভাৰং, ৰন্দনারহভাৰং, অত্তনো চ ৰন্দনাকিরিযায খেত্তঙ্গতভাৰং দীপেতি. সরণগমনঞ্চ সাৰকানং সব্বগুণানং আদি, সপুব্বভাগপ্পটিপদা সেক্খা সীলক্খন্ধাদযো মজ্ঝে, অসেক্খা সীলক্খন্ধাদযো পরিযোসানন্তি আদিমজ্ঝপরিযোসানকল্যাণা সব্বে অরিযসঙ্ঘগুণা ইমায গাথায পকাসিতাতি ৰেদিতব্বং.

এৰং গাথাত্তযেন সঙ্খেপতো সকলগুণসংকিত্তনমুখেন রতনত্তযস্স পণামং কত্ৰা ইদানি তং নিপচ্চকারং যথাধিপ্পেতে পযোজনে পরিণামেন্তো ‘‘ৰন্দনাজনিত’’ন্তি গাথমাহ. তত্থ ৰন্দনাজনিতন্তি ৰন্দনাকারেন নিব্বত্তিতং, রতনত্তযগুণাভিত্থৰনৰসেন, নিপচ্চকারৰসেন ৰা উপ্পাদিতন্তি অত্থো. ইতীতি এৰং ‘‘মহাকারুণিক’’ন্তিআদিপ্পকারেন. রতিজননট্ঠেন রতনং, বুদ্ধধম্মসঙ্ঘা, চিত্তীকতাদিভাৰো ৰা রতনট্ঠো. ৰুত্তঞ্হেতং –

‘‘চিত্তীকতং মহগ্ঘঞ্চ, অতুলং দুল্লভদস্সনং;

অনোমসত্তপরিভোগং, রতনং তেন ৰুচ্চতী’’তি. (খু. পা. অট্ঠ. ৬.৩; দী. নি. অট্ঠ. ২.৩৩; সং. নি. ৫.২২৩; সু. নি. অট্ঠ. ১.২২৬; মহানি. অট্ঠ. ৫০; দী. নি. টী. ১.গন্থারম্ভকথা; ম. নি. টী. ১.৪; সং. নি. টী. ১.১.৪; অ. নি. টী. ১.১.৪; সারত্থ. টী. ১.গন্থারম্ভকথাৰণ্ণনা);

চিত্তীকতভাৰাদযো চ অনঞ্ঞসাধারণা বুদ্ধাদীসু এৰ লব্ভন্তি, রতনানং তযং রতনত্তযং, তস্মিং রতনত্তযে. হতন্তরাযোতি ৰিধস্তউপদ্দৰো হুত্ৰাতি সম্বন্ধো, এতেন অত্তনো পসাদসম্পত্তিযা, রতনত্তযস্স চ খেত্তভাৰসম্পত্তিযা তস্স পুঞ্ঞস্স অত্থসংৰণ্ণনায উপঘাতকউপদ্দৰানং ৰিহননে সমত্থতং দস্সেতি. সব্বত্থাতি সব্বস্মিং অন্তো চেৰ বহি চ, অজ্ঝত্তিকবাহিরৰত্থূসূতি অত্থো. সব্বত্থাতি ৰা সব্বস্মিং কালে, সংৰণ্ণনায আদিমজ্ঝপরিযোসানকালেসূতি ৰুত্তং হোতি. হুত্ৰাতি পুব্বকালকিরিযা, তস্স ‘‘করিস্সামত্থৰণ্ণন’’ন্তি এতেন সম্বন্ধো. তস্সাতি যং রতনত্তযে ৰন্দনাজনিতং পুঞ্ঞং, তস্স. তেজসাতি আনুভাৰেন বলেন.

এৰং রতনত্তযৰন্দনায পযোজনং দস্সেত্ৰা ইদানি নেত্তিপ্পকরণস্স গম্ভীরত্থত্তা অত্থসংৰণ্ণনায দুক্করভাৰং দস্সেতুং ‘‘ঠিতি’’ন্তিআদিমাহ. তত্থ ঠিতিন্তি ঠানং অনন্তরধানং অৰিচ্ছেদপ্পৰত্তিং. আকঙ্খমানেনাতি ইচ্ছমানেন পত্থযন্তেন, ‘‘অহোৰতাযং সদ্ধম্মনেত্তি চিরং তিট্ঠেয্যা’’তি এৰং পত্থযন্তেনাতি ৰুত্তং হোতি. চিরন্তি দীঘকালং, পঞ্চৰস্সসহস্সপরিমাণং কালন্তি অত্থো. সদ্ধম্মনেত্তিযাতি সদ্ধম্মসঙ্খাতায নেত্তিযা. সদ্ধম্মো হি ৰেনেয্যসন্তানেসু অরিযগুণানং নযনতো নেত্তি, সদ্ধম্মস্স ৰা নেত্তি সদ্ধম্মনেত্তি, তস্সা সদ্ধম্মনেত্তিযা, স্ৰাযমত্থো অট্ঠকথাযং ৰিচারিতো এৰ. থেরেনাতি থিরগুণযুত্তেন. অভিযাচিতোতি আদরগারৰেন যাচিতো. অভিমুখং ৰা যাচিতো, অনুত্তরং কত্ৰা যাচিতোতি অত্থো. উদ্দিস্স ৰা যাচিতো, গরুতরং কত্ৰা যাচিতোতি অত্থো, ‘‘করোতু আযস্মা নেত্তিপ্পকরণস্স কঞ্চি অত্থসংৰণ্ণন’’ন্তি এৰং নেত্তিযা অত্থসংৰণ্ণনং পতি অজ্ঝেসিতোতি ৰুত্তং হোতি. এত্থ চ সদ্ধম্মস্স চিরং ঠিতিকামেন অজ্ঝাসযসম্পন্নেন সাসনে থিরগুণযুত্তেন সব্রহ্মচারিনা আদরগারৰেন, অভিমুখং ৰা যাচিতেন মে ন সক্কা তস্স অভিযাচনং পটিক্খিপিতুন্তি দস্সেতি ‘‘ঠিতিং আকঙ্খমানেনা’’তি গাথায.

পদুমুত্তরনাথস্সাতি পদুমুত্তরস্স সম্মাসম্বুদ্ধস্স. পস্সতাতি পুব্বেনিৰাসচক্খুনা, সমন্তচক্খুনা এৰ ৰা হত্থতলে ঠপিতআমলকং ৰিয অভিনীহারং পস্সন্তেন. তাদিনাতি তাদিভাৰযুত্তেন, সব্বত্থ ৰা নিব্বিকারেন, ‘‘অম্হাকং ভগৰতা’’তি ৰচনসেসো. যস্সাতি আযস্মতো মহাকচ্চানত্থেরস্স. ঠপিতোতি –

‘‘এতদগ্গং, ভিক্খৰে, মম সাৰকানং ভিক্খূনং সংখিত্তেন ভাসিতস্স ৰিত্থারেন অত্থং ৰিভজন্তানং যদিদং মহাকচ্চানো’’তি (অ. নি. ১.১৮৮, ১৯৭) –

এৰং ঠপিতো. সীলাদিগুণৰিসেসেহি মহন্তা সাৰকাতি মহাসাৰকা (থেরগা. অট্ঠ. ২.১২৮৮; অ. নি. টী. ২.৩.৫৯), মহাকস্সপাদযো, তেসু অযমাযস্মা অঞ্ঞতরোতি, মহাসাৰকো চ সো গুণৰিসেসযোগতো উত্তমো চাতি মহাসাৰকুত্তমো.

ঝানাদীসু সাতিসযানং আৰজ্জনাদিৰসীভাৰানং, অরিযিদ্ধিৰসেন পরমস্স চ চেতোৰসীভাৰস্স অধিগতত্তা ৰসিপ্পত্তো. অত্থাদীসু সৰিসেসভেদগতপটিসম্ভিদাঞাণত্তা পভিন্নপটিসম্ভিদো. ‘‘পণ্ডিতো, ভিক্খৰে, মহাকচ্চানো, মহাপঞ্ঞো, ভিক্খৰে, মহাকচ্চানো’’তিআদিনা (ম. নি. ১.২০৫) অনেকেসু ঠানেসু ভগৰতা পসংসিতত্তা সম্বুদ্ধেন পসংসিতো. তেন ৰুত্তং ‘‘সত্থু চেৰ সংৰণ্ণিতো সংভাৰিতো, ৰিঞ্ঞূনঞ্চ সব্রহ্মচারিন’’ন্তি.

অনুমোদিতাতি ‘‘সাধু সাধু, কচ্চান, সাধু খো, ত্ৰং কচ্চান, ইমং ধম্মসংৰণ্ণনং অভাসী’’তি এৰং অনুমোদিতা. একস্মিং কির সমযে অযং মহাথেরো জম্বুৰনসণ্ডে ৰিহরন্তো অত্তনো সন্তিকাৰচরানং ভিক্খূনং ইমং হারনযপটিমণ্ডিতং পকরণং অভাসি. ভাসিত্ৰা চ ভগৰতো সন্তিকং উপসঙ্কমিত্ৰা ভগৰন্তং অভিৰাদেত্ৰা একমন্তং নিসিন্নো যথাভাসিতং ইমং পকরণং ভগৰতো নিৰেদেসি. তং সুত্ৰা ভগৰা ‘‘সাধু সাধূ’’তিআদিনা অনুমোদিত্ৰা ‘‘তস্মাতিহ, ত্ৰং কচ্চান, ইমং ধম্মসংৰণ্ণনং ধম্মনেত্তিত্ৰেৰ ধারেহী’’তি নামগ্গহণং অকাসীতি ৰদন্তি. দেসনাহারাদিনন্দিযাৰট্টনযাদিহারনযানুসারেনেৰ সব্বধম্মসংৰণ্ণনানং গতিযোতি আহ ‘‘সাসনস্স সদাযত্তা, নৰঙ্গস্সত্থৰণ্ণনা’’তি.

গম্ভীরঞাণেহীহি গম্ভীরেহি ঞাণেহি, ন সদ্ধামত্তকেন, গম্ভীরঞাণেহি ৰা মহাপঞ্ঞেহি অরিযেহি. পকরণস্স গম্ভীরত্থতং, অত্তনো চ ঞাণস্স নাতিৰিসযতং ৰিদিত্ৰা সংৰণ্ণনারম্ভে সংসীদন্তম্পি মং সাসনগুণাদিউপনিস্সযসম্পদা উস্সাহেসীতি ইমমত্থং দস্সেতি ‘‘কিঞ্চাপী’’তিআদিনা.

‘‘পঞ্চপি নিকাযে ওগাহেত্ৰা’’তি ইমিনা নেত্তিযা পঞ্চপি মহানিকাযে অনুপৰিসিত্ৰা অৰট্ঠানং, তেসং সংৰণ্ণনাভাৰঞ্চ দীপেতি. তত্থ ‘‘কতমো অস্সাদো চ আদীনৰো চা’’তিআদিপেটকোপদেসপাল়িং (পেটকো. ২৩) আনেত্ৰা ইধ দেসনাহারাদীনং পদত্থৰিনিচ্ছযো পেটকেন সংসন্দনং নাম. ‘‘যথাবল’’ন্তি ইমিনা সব্বথা সব্বভাগেনাপি নেত্তিযা সংৰণ্ণনা মযা ন সুকরা কাতুং, অত্তনো পন ঞাণবলানুরূপং করিস্সামীতি নিরতিমানতং দীপেতি.

সুৰিসুদ্ধন্তি সুট্ঠু ৰিসুদ্ধং, নিকাযন্তরলদ্ধিদোসেহি অন্তরন্তরা অনুপ্পৰেসিতেহি অসম্মিস্সন্তি অধিপ্পাযো. অসংকিণ্ণন্তি সনিকাযেপি পদত্থন্তরপরিকপ্পনাদিনা অসংকিণ্ণং তাদিসসঙ্কররহিতং অনাকুলং সুপরিচ্ছিন্নং. ৰিৰিধেহি আকারেহি নিচ্ছিনোতীতি ৰিনিচ্ছযো. অত্থানং ৰিনিচ্ছযো অত্থৰিনিচ্ছযো. গণ্ঠিট্ঠানভূতেসু অত্থেসু খিলমদ্দনাকারেন পৰত্তা ৰিমতিচ্ছেদকথা, নিপুণো সুখুমো সণ্হো অত্থৰিনিচ্ছযো এতস্সাতি নিপুণত্থৰিনিচ্ছযো. অথ ৰা অত্থে ৰিনিচ্ছিনোতীতি অত্থৰিনিচ্ছযো, যথাৰুত্তঅত্থৰিসযঞাণং, নিপুণো ছেকো অত্থৰিনিচ্ছযো এতস্সাতি নিপুণত্থৰিনিচ্ছযো, তং নিপুণত্থৰিনিচ্ছযং. সমযন্তি সিদ্ধন্তং. ইদং ৰুত্তং হোতি – মহাৰিহারৰাসীনং সিদ্ধন্তো ৰুত্তনযেন সুপরিসুদ্ধো, অনাকুলো, সণ্হসুখুমৰিনিচ্ছযো চ, সিদ্ধন্তং তং অৰিলোমেন্তো অনুকূলতো তত্থ সিদ্ধংযেৰ ধম্মনেত্তিং পকাসযন্তো নেত্তিপ্পকরণস্স অত্থসংৰণ্ণনং করিস্সামীতি.

পমাদলেখন্তি অপরভাগে পোত্থকারুল়্হকালে পমজ্জিত্ৰা লিখনৰসেন পৰত্তপ্পমাদপাঠং. ৰজ্জেত্ৰাতি অপনেত্ৰা. পাল়িং সম্মা নিযোজযন্তি তং তং নেত্তিপাল়িং তত্থ তত্থ উদাহরণভাৰেন আনীতসুত্তে সম্মদেৰ নিযোজেন্তো, অত্থসংৰণ্ণনায ৰা তং তং উদাহরণসুত্তসঙ্খাতং পাল়িং তস্মিং তস্মিং লক্খণভূতে নেত্তিগন্থে সম্মদেৰ নিযোজেন্তো. উপদেসন্তি নেত্তিউপনিসং নেত্তিহদযং. য্ৰাযং সপট্ঠানৰিভাগস্স তেত্তিংসৰিধস্স নেত্তিপদত্থস্স সহ নিমিত্তৰিভাগেন অসঙ্করতো ৰৰত্থিতো ৰিসযো, তং. ৰিভাৰেন্তো পকাসেন্তো. তস্সা নেত্তিযা করিস্সামি অত্থৰণ্ণনন্তি সম্বন্ধো.

এত্থ চ ‘‘অভিযাচিতো’’তি ইমিনা অত্থসংৰণ্ণনায নিমিত্তং দস্সেতি, ‘‘ঠিতিং আকঙ্খমানেন চিরং সদ্ধম্মনেত্তিযা’’তি ইমিনা পযোজনং, ‘‘করিস্সামত্থৰণ্ণন’’ন্তি ইমিনা পিণ্ডত্থং. সংৰণ্ণিযমানা হি পকরণত্থা সংৰণ্ণনায পিণ্ডত্থো. ‘‘তমুপনিস্সাযা’’তিআদিনা করণপ্পকারং.

ইদানি সংৰণ্ণনায সৰনে নিযোজেন্তো ‘‘ইতি অত্থ’’ন্তি ওসানগাথমাহ. তত্থ ‘‘সক্কচ্চ’’ন্তি পদং উভযত্থ যোজেতব্বং ‘‘সক্কচ্চং ৰিভজন্তস্স, সক্কচ্চং নিসামযথা’’তি.

গন্থারম্ভকথাৰণ্ণনা নিট্ঠিতা.

নিদানকথাৰণ্ণনা

ৰচনত্থজাননেন ৰিদিতপ্পকরণত্থসামঞ্ঞত্থস্স পকরণকথা ৰুচ্চমানা সোভেয্যাতি নেত্তিপদত্থপরিজাননমেৰ আদিম্হি যুত্তরূপন্তি তদত্থং পুচ্ছতি ‘‘তত্থ কেনট্ঠেন নেত্তী’’তি. তত্থ তত্থাতি ‘‘তস্সা নেত্তিযা করিস্সামত্থৰণ্ণন’’ন্তি যদিদং ৰুত্তং, তস্মিং; যস্সা করিস্সামত্থৰণ্ণনন্তি পটিঞ্ঞাতং, সা নেত্তি কেনট্ঠেন নেত্তীতি অত্থো. তত্থাতি ৰা ‘‘নেত্তিপ্পকরণস্সা’’তি এতস্মিং ৰচনে যা নেত্তি ৰুত্তা, সা কেনট্ঠেন নেত্তীতি অত্থো. ‘‘নযনট্ঠেনা’’তি ইদং কত্তুকরণাধিকরণসাধনানং সাধারণৰচনন্তি ‘‘অরিযধম্মং নযতী’’তি কত্তুসাধনৰসেন তাৰ নেত্তিসদ্দস্স অত্থং ৰত্ৰা ইদানি করণাধিকরণসাধনৰসেন ৰত্তুং ‘‘নযন্তি তাযা’’তিআদি ৰুত্তং.

তথা হি ৰুত্তন্তি নেত্তিউপদেসাধীনত্তা এৰ সুত্তাৰবোধস্স ৰুত্তং. পেটকে ‘‘তস্মা নিব্বাযিতুকামেন সুতমযেন অত্থা পরিযেসিতব্বা, তত্থ পরিযেসনায অযং অনুপুব্বী ভৰতি সোল়স হারা পঞ্চ নযা অট্ঠারস মূলপদানী’’তিআদি (পেটকো. ৩). হারনযৰিচারণা ৰিনিমুত্তো অত্থসংৰণ্ণনাৰিসেসো নত্থীতি আহ ‘‘সুত্তস্স অত্থসংৰণ্ণনা নেত্তিউপদেসাযত্তা’’তি. স্ৰাযমত্থো পরতো পকিণ্ণককথাযং আৰি ভৰিস্সতি. এৰং মহাৰিসযা চাযং নেত্তি কুতো পভৰাতি আহ ‘‘সুত্তপ্পভৰা’’তি, এতেন নেত্তিযা পমাণভূততং দস্সেতি. ইদঞ্চ সুত্তস্স নেত্তিসন্নিস্সযতাপরিদীপনপরং, ন থেরপ্পভৰতাপটিক্খেপপরং. থেরো হি পঞ্চ মহানিকাযে ওগাহেত্ৰা তংসন্নিস্সযেনেৰ তেসং সংৰণ্ণনাভূতং ইমং পকরণং অভাসি, তস্মা অযমেৰ সংৰণ্ণনাধম্মো, যদিদং সংৰণ্ণেতব্বধম্মসন্নিস্সযতা.

পকরণপরিচ্ছেদতোতি পকরণস্স ৰিভাগতো. হারৰিচারাদযো হি তযো নেত্তিপ্পকরণস্স ৰিভাগা, পকরণভূতপরিচ্ছেদতো ৰা. তীণি হি এতানি পকরণানি তযো অধিকারা, যদিদং হারৰিচারাদযো. পাল়িৰৰত্থানতোতি পাঠসন্নিৰেসতো.

‘‘সব্বো হি পকরণত্থো’’তিআদিনা সঙ্গহৰারস্স অন্ৰত্থসঞ্ঞতং দস্সেতি. ‘‘ননু চেত্থ পট্ঠানং অসঙ্গহিত’’ন্তি চোদকো ব্যভিচারমাহ. ইতরো যদিপি সরূপতো অসঙ্গহিতং, অত্থতো পন সঙ্গহিতন্তি দস্সেন্তো ‘‘নযিদমেৰ’’তিআদিনা পরিহরতি. পুন ‘‘তথা হী’’তিআদিনা তমেৰত্থং পাল়িযা পাকটতরং করোতি. অত্থনযা নন্দিযাৰট্টাদযো. সঙ্খারত্তিকা পুঞ্ঞাভিসঙ্খারাদযো, কাযসঙ্খারাদযো চ. তেসু অত্থনযানং অঞ্ঞমঞ্ঞসঙ্গহো পরতো আৰি ভৰিস্সতি. ইতরে পন কামাৰচরা, রূপাৰচরা চ কুসলা চেতনা পুঞ্ঞাভিসঙ্খারো, অকুসলা চেতনা অপুঞ্ঞাভিসঙ্খারো, অরূপাৰচরা কুসলা চেতনা আনেঞ্জাভিসঙ্খারো. পুঞ্ঞাভিসঙ্খারো চ অপুঞ্ঞাভিসঙ্খারো চ কাযদ্ৰারপ্পৰত্তো কাযসঙ্খারো, সো এৰ ৰচীদ্ৰারপ্পৰত্তো ৰচীসঙ্খারো, মনোদ্ৰারপ্পৰত্তো পন তিৰিধোপি চিত্তসঙ্খারো. ইতি জাতিৰসেন পুরিমত্তিকে ৰুত্তা এৰ ধম্মা দ্ৰারৰসেন দুতিযত্তিকে ৰুত্তা, তে এৰ চ পুরিমত্তিকেতি অঞ্ঞমঞ্ঞসঙ্গহো ৰেদিতব্বো.

যত্থাতি যস্মিং ৰারে. পেটকেতি পেটকোপদেসে. সম্পতমানাতি সংৰণ্ণনাৰসেন সন্নিপতন্তা. ‘‘ব্যঞ্জনৰিধিপুথুত্তা’’তি ইদং একস্মিং সুত্তে অনেকেসং হারানং সন্নিপতনস্স কারণৰচনং. তথা হি ‘‘অনেকসামত্থিযনিচিতা সদ্দা’’তি অক্খরচিন্তকা ৰদন্তি.

‘‘ন সরূপতো’’তি ইমিনা সঙ্গহৰারে ৰিয উদ্দেসনিদ্দেসৰারেসুপি পট্ঠানস্স অত্থতো উদ্ধটতং দস্সেতি. মূলপদগ্গহণেনেৰ গহিতত্তা উদ্দেসৰারে তাৰ এৰং হোতু, নিদ্দেসৰারে পন কথন্তি? তত্থাপি নযগ্গহণেনেৰ মূলপদানিপি গহিতানীতি ৰেদিতব্বং. ন হি মূলপদেহি ৰিনা কাচি নযযোজনা সম্ভৰতি. অপরে পন ‘‘হারনযা ৰিয পট্ঠানং ন সুত্তস্স সংৰণ্ণনাৰিসেসো, অথ খো তস্মিং তস্মিং সুত্তে সংকিলেসভাগিযতাদিলব্ভমানৰিসেসমত্তন্তি ন তস্স পকরণস্স পদত্থসঙ্গহো. এৰঞ্চ কত্ৰা তেত্তিংসায নেত্তিপদত্থেসু পট্ঠানং অসঙ্গহিতং, উদ্দেসনিদ্দেসৰারেসু চ অনুদ্ধটমেৰা’’তি ৰদন্তি.

‘‘পাল়িতো এৰ ৰিঞ্ঞাযতী’’তি ৰুত্তমত্থং সমত্থেন্তো ‘‘তথা হি…পে… আভত’’ন্তি আহ, তেন থেরেন ভাসিতভাৰো ৰিয ভগৰতা অনুমোদিতভাৰোপি পাল়িঅনুগতো এৰাতি দস্সেতি. সাৰকভাসিতত্তা নিদানং ন ৰুত্তন্তি ন সক্কা ৰত্তুন্তি চোদেন্তো ‘‘সাৰক…পে… ভাসিত’’ন্তি আহ. নযিদং একন্তিকন্তি চ সাৰকভাসিতবুদ্ধভাসিতভাৰো নিদানাৰচনস্স, নিদানৰচনস্স চ অকারণং উভযত্থাপি উভযস্স দস্সনতো. তস্মা নিদানাৰচনেন নেত্তিযা অসাৰকভাসিততা ন সিজ্ঝতীতি দস্সেতি. তেনাহ ‘‘ন চ তাৰতা তানি অপ্পমাণং, এৰমিধাপি দট্ঠব্ব’’ন্তি.

যেনেৰ কারণেন নিদানাৰচনস্স পমাণভাৰসাধনতা, তেনেৰ কারণেন ইমস্স পকরণস্স পমাণভাৰসিদ্ধীতি দস্সেতি ‘‘নিদানঞ্চ নামা’’তিআদিনা. ইদানি ‘‘অথ ৰা’’তিআদিনা নেত্তিযা নিদানাৰচনেন অব্যভিচারহেতুমাহ. অযঞ্হেত্থ পযোগো ন নেত্তিযা নিদানং ৰত্তব্বং পাল়িযা অত্থসংৰণ্ণনাভাৰতো. যা হি পাল়িযা অত্থসংৰণ্ণনা ন তস্সা নিদানৰচনং দিট্ঠং যথা পটিসম্ভিদামগ্গস্স, নিদ্দেসাদীনঞ্চাতি.

‘‘অযং ৰিভাগো’’তিআদিনা একৰিধতো পট্ঠায যাৰ চতুরাসীতিসহস্সপ্পভেদা, তাৰ যথাদস্সিতস্স পকরণৰিভাগস্স পুন ‘‘আদিনা নযেন পকরণৰিভাগো ৰেদিতব্বো’’তি ইদং নিগমনং. তত্থ আদিনা নযেনাতি আদিসদ্দেন অভিঞ্ঞেয্যধম্মনিদ্দেসতো পঞ্ঞত্তিপঞ্ঞপেতব্বধম্মৰিভজনতো তিযদ্ধপরিযাপন্নধম্মৰিচারতো চতুরোঘনিত্থরণত্থতো পঞ্চাভিনন্দনাদিপ্পহানতো ছতণ্হাকাযুপসমনতো সঙ্গহৰারাদিসত্তৰারসঙ্গহতো অট্ঠমিচ্ছত্তসমুগ্ঘাতদীপনতোতি এৰমাদীনং সঙ্গহো দট্ঠব্বো.

১. সঙ্গহৰারৰণ্ণনা

যন্তি অনিযমত্থো সব্বনামসদ্দো কম্মসাধনৰসেন ৰুত্তো. অত্থাৰবোধনত্থো সদ্দপ্পযোগো অত্থপরাধীনো কেৰলো অত্থপদত্থকো, সো পদত্থৰিপরিযেসকারিনা ইতি-সদ্দেন পরভূতেন সদ্দপদত্থকো জাযতীতি আহ ‘‘যন্তি অনিযমতো উপযোগনিদ্দেসো’’তি. লোকোতি কত্তুনিদ্দেসোতিআদীসুপি এসেৰ নযো.

এৰং ‘‘য’’ন্তিআদীনং গাথাপদানং কম্মকত্তুকিরিযাকত্তুৰিসেসনাদিদস্সনৰসেন অত্থং ৰত্ৰা ইদানি অৰযৰজোতনৰসেন পদত্থং দস্সেতুং ‘‘লোকিযন্তি এত্থা’’তিআদিমাহ. লোকসদ্দো ইধ সামত্থিযতো সত্তলোকৰচনো দট্ঠব্বো. তেনাহ ‘‘পূজনকিরিযাযোগ্যভূততাৰসেনা’’তি. সাসনন্তরধানতো পরং পূজনা অঞ্ঞবুদ্ধুপ্পাদেন ৰেদিতব্বা, যথেতরহি ৰিপস্সীআদিসম্মাসম্বুদ্ধানং. ‘‘দীপঙ্করো’’তিআদিনা যদিপি বুদ্ধৰংসদেসনাযং (বু. ৰং. ২.৭৫) ভগৰতাৰ ৰুত্তং, সুমেধপণ্ডিতত্তভাৰেন পন পৰত্তিং সন্ধায ৰুত্তন্তি আহ ‘‘যথাহ ভগৰা সুমেধভূতো’’তি.

পরিঞ্ঞাক্কমেনাতি ঞাতপরিঞ্ঞাদিপটিপাটিযা. লক্খণাৰবোধপ্পটিপত্তিযাতি ৰিপস্সনায. তেন ৰুত্তং ‘‘সুঞ্ঞতমুখাদীহী’’তি. তথা চ ৰুত্তন্তি ৰিঞ্ঞূহি ৰেদনীযতায এৰ সাসনৰরস্স ৰুত্তং ভগৰতা –

‘‘এতু ৰিঞ্ঞূ পুরিসো অসঠো অমাযাৰী উজুজাতিকো, অহমনুসাসামি, অহং ধম্মং দেসেমি, যথানুসিট্ঠং তথা পটিপজ্জমানো ন চিরস্সেৰ সামঞ্ঞেৰ উস্সতি, সামং দক্খিতী’’তিআদি (ম. নি. ২.২৮১).

যং-সদ্দো সাসনৰিসযো, লোকপালসদ্দো সত্থুৰিসযোপি লোকং পতি গুণীভূতোতি ‘‘তস্সা’’তি পটিনিদ্দেসস্স কথং সত্থুৰিসযতাতি চোদনং মনসিকত্ৰা আহ ‘‘সলোকপালোতি চেত্থা’’তিআদি, গুণীভূতোপি লোকপালসদ্দো পধানভূতো ৰিয পটিনিদ্দেসং অরহতি. অঞ্ঞো হি সদ্দক্কমো, অঞ্ঞো অত্থক্কমোতি.

ধম্মগারৰেন ভগৰা ধম্মং পূজেন্তো ৰেনেয্যবন্ধৰে অচিন্তেত্ৰা সমাপত্তিসমাপজ্জনধম্মপচ্চৰেক্খণাহি সত্তসত্তাহং ৰীতিনামেসীতি আহ ‘‘ভগৰতো…পে… দীপেতব্বা’’তি. তত্থ আদিসদ্দেন সাৰকেহি ধম্মস্সৰনস্স, তেসং পচ্চুগ্গমনাদীনঞ্চ সঙ্গহো ৰেদিতব্বো.

ইচ্চস্সাতি ইতি অস্স, এৰং ভগৰতো অৰিপরীতঅনন্তরাযিকনিয্যানিকধম্মদেসনায সব্বঞ্ঞুতানাৰরণভাৰদীপনেনাতি অত্থো. তেনাতি চতুৰেসারজ্জযোগেন. তদৰিনাভাৰিনা দসবল…পে… পকাসিতা হোতি. আৰেণিকবুদ্ধধম্মাদীতি এত্থ আদিসদ্দেন তীসু কালেসু অপ্পটিহতঞাণানি, চতুসচ্চঞাণানি, চতুপটিসম্ভিদাঞাণানি, পঞ্চগতিপরিচ্ছেদকঞাণানি, ছ অভিঞ্ঞাঞাণানি, সত্ত অরিযধনানি, সত্ত বোজ্ঝঙ্গা, অট্ঠ ৰিজ্জা, অট্ঠসু পরিসাসু অকম্পনঞাণানি, অট্ঠ ৰিমোক্খা, নৰ সমাধিচরিযা, নৰ অনুপুব্বৰিহারা, দস নাথকরণা ধম্মা, দস অরিযৰাসা, দ্ৰাদস ধম্মচক্কাকারা, তেরস ধুতধম্মা, চুদ্দস বুদ্ধঞাণানি, পন্নরস চরণধম্মা, সোল়স ঞাণচরিযা, সোল়স আনাপানস্সতী, একূনৰীসতি পচ্চৰেক্খণঞাণানি, চতুৰীসতি পচ্চযৰিভাৰনঞাণানি, চতুচত্তারীস ঞাণৰত্থূনি, সত্তসত্ততি ঞাণৰত্থূনি, চতুৰীসতিকোটিসতসহস্সসমাপত্তিসঞ্চারিমহাৰজিরঞাণং, অনন্তনযসমন্তপট্ঠানপৰিচযদেসনাকারপ্পৰত্তঞাণানি চাতি এৰমাদীনং ভগৰতো গুণৰিসেসানং সঙ্গহো দট্ঠব্বো.

অপরো নযো – গুণৰিসিট্ঠতং দীপেতি, সা চ গুণৰিসিট্ঠতা মহাকরুণামহাপঞ্ঞাহি ৰেদিতব্বা তাহি সত্থুসম্পত্তিসিদ্ধিতো. তত্থ মহাকরুণায পৰত্তিভেদো ‘‘বহুকেহি আকারেহি পস্সন্তানং বুদ্ধানং ভগৰন্তানং সত্তেসু মহাকরুণা ওক্কমতী’’তিআদিনা পটিসম্ভিদামগ্গে (পটি. ম. ১.১১৭) ৰুত্তনযেন ৰেদিতব্বো. মহাপঞ্ঞায পন পৰত্তিভেদো ৰুত্তো এৰ. তত্থ করুণায ভগৰতো চরণসম্পত্তি, পঞ্ঞায ৰিজ্জাসম্পত্তি. করুণায সত্তাধিপতিতা, পঞ্ঞায ধম্মাধিপতিতা. করুণায লোকনাথতা, পঞ্ঞায অত্তনাথতা. করুণায পুব্বকারিতা, পঞ্ঞায কতঞ্ঞুতা. করুণায অপরন্তপতা, পঞ্ঞায অনত্তন্তপতা. করুণায বুদ্ধকরধম্মসিদ্ধি, পঞ্ঞায বুদ্ধভাৰসিদ্ধি. করুণায পরেসং তারণং, পঞ্ঞায সযং তারণং. করুণায সব্বসত্তেসু অনুগ্গহচিত্ততা, পঞ্ঞায সব্বধম্মেসু ৰিরত্তচিত্ততা পকাসিতা হোতীতি অনৰসেসতো পরহিতপটিপত্তিযা, অত্তহিতসম্পত্তিযা চ পারিপূরী ৰেদিতব্বা. তীসুপি অৰত্থাসূতি হেতুফলসত্তূপকারাৰত্থাসু.

অভিসমযো পটিৰেধসাসনস্স, মনসিকরণং পটিপত্তিসাসনস্স, সৰনাদীহি পরিচযকরণং পরিযত্তিসাসনস্সাতি তিণ্ণম্পি ৰসেন যোজেতব্বো. তেনাহ ‘‘যথারহ’’ন্তি. ‘‘সক্কচ্চং ধম্মদেসনেনা’’তি ইমিনা ইধ ‘‘সাসন’’ন্তি ৰুত্তস্স তিৰিধস্সাপি সদ্ধম্মস্স অৰিসেসেন দেসনাপূজং ৰত্ৰা থোমনাপূজনস্স ৰসেন তং ৰিভজিত্ৰা দস্সেন্তো ‘‘অরিযং, ৰো ভিক্খৰে’’তিআদিমাহ. তত্থ ‘‘থোমনেনা’’তি পদেনাপি ‘‘সক্কচ্চ’’ন্তি পদং যোজেতব্বং. পূজনাদ্ৰযস্সাপি ৰা ৰসেন ইধাপি পদযোজনা ৰেদিতব্বা. অরিযভাৰাদযোতি অরিযসেট্ঠঅগ্গভাৰাদযো. নিয্যানাদযোতি নিয্যানহেতুদস্সনাদযো. স্ৰাক্খাততাদযোতি স্ৰাক্খাতসন্দিট্ঠিকতাদযো.

ইদানি অরিযসঙ্ঘগুণানম্পি ইমায গাথায পকাসিতভাৰং দস্সেতুং ‘‘যস্মা পনা’’তিআদি ৰুত্তং. বাল্যাদিসমতিক্কমনতোতি বালঅব্যত্তভাৰাদিসমতিক্কমনতো.

ঞাণৰিসেসো সুতচিন্তাভাৰনামযঞাণানি. সোতব্বমনসিকাতব্বপটিৰিজ্ঝিতব্বাৰত্থা অৰত্থাভেদো. উভযন্তি ব্যঞ্জনপদং, অত্থপদঞ্চ. উভযথাতি করণকম্মসাধনৰসেন পচ্চেকং যোজেতব্বং. পটিপজ্জিতব্বত্তাতি ঞাতব্বত্তা.

‘‘অযঞ্চ গাথা’’তিআদি কেসঞ্চি ৰাদো. তথা হি অপরে ‘‘থেরেনেৰাযং গাথা ভাসিতা’’তি ৰদন্তি. অত্তূপনাযিকাপি হি কদাচি ধম্মদেসনা হোতি এৰ যথা ‘‘দসবলসমন্নাগতো, ভিক্খৰে, তথাগতো চতুৰেসারজ্জৰিসারদো’’তিআদি (সং. নি. ২.২১-২২). এৰঞ্চ কত্ৰা ‘‘কতমে সোল়স হারা’’তিআদিৰচনং সমত্থিতং হোতি.

যথাৰুত্তঅত্থমুখেনেৰাতি মূলপদসঙ্খাতঅত্থুদ্ধারেনেৰ. পরতো আগমিস্সতীতি নিদ্দেসৰারস্স পরিযোসানে আগমিস্সতি ‘‘তীণি চ নযা অনূনা’’তিআদিনা (নেত্তি. ৪ দ্ৰাদসপদ).

ৰুচ্চতীতি কত্তরি কম্মনিদ্দেসোতি আহ ‘‘ৰদতী’’তি. অথ ৰা ৰুচ্চতীতি কম্মকত্তুনিদ্দেসোযং. অযঞ্হেত্থ অত্থো – হারা, নযা চাতি উভযং পরিগ্গহিতং সংৰণ্ণকেন সব্বথা গহিতঞ্চে, ৰুচ্চতি সুত্তং, সযমেৰ সুত্তং সংৰণ্ণেতীতি, এতেন হারনযেসু ৰসীভাৰেন সুত্তসংৰণ্ণনায সুকরতং দস্সেতি.

পকারন্তরেনাতি পুব্বে ‘‘সাসন’’ন্তি ৰুত্তমত্থং ‘‘দেসনা, দেসিত’’ন্তি ততো অঞ্ঞেন পকারেন. নিযমেত্ৰাতি তস্স একন্ততো ৰিঞ্ঞেয্যতং অৰধারেত্ৰা. ৰিঞ্ঞেয্যতা ৰিসিট্ঠেসু দেসনাদেসিতেসু ৰিঞ্ঞেয্যপদে লব্ভমানা ৰিজাননকিরিযা.

দেসনাদেসিতানি চ যাৰদেৰ ৰিজাননত্থানীতি ৰিজাননং পধানন্তি তমেৰ নিদ্ধারেন্তো ‘‘তত্রাতি তস্মিং ৰিজাননে’’তি আহ.

এত্থাহাতি নৰঙ্গসাসননৰৰিধসুত্তন্তাতি এতস্মিং অত্থৰচনে আহ চোদকো. তস্সাযং অধিপ্পাযো – নৰহি অঙ্গেহি ৰৰত্থিতেহি অঞ্ঞমঞ্ঞসঙ্কররহিতেহি ভৰিতব্বং, তথা চ সতি অসুত্তসভাৰানেৰ গেয্যঙ্গাদীনীতি নৰৰিধসুত্তন্তৰচনং ৰিরুজ্ঝেয্য. অথ সুত্তসভাৰানি গেয্যঙ্গাদীনি, এৰং সতি ‘‘সুত্ত’’ন্তি ৰিসুং সুত্তঙ্গং ন সিযা, এৰং সন্তে অট্ঠঙ্গসাসনং আপজ্জতীতি. তেনাহ ‘‘কথং পনা’’তিআদি. গেয্যঙ্গাদীসু কতিপযানম্পি সুত্তভাৰে যথাৰুত্তদোসানতিৰত্তি, পগেৰ সব্বেসন্তি দস্সেতি ‘‘যঞ্চা’’তিআদিনা. সঙ্গহেসূতি অট্ঠকথাসু. পোরাণট্ঠকথানঞ্হি সঙ্খেপভূতা ইদানি অট্ঠকথা ‘‘সঙ্গহা’’তি ৰুত্তা. সুত্তং নাম সগাথকং ৰা সিযা, নিগ্গাথকং ৰাতি অঙ্গদ্ৰযেনেৰ তদুভযঙ্গং কতন্তি ৰিসুং সুত্তঙ্গস্স অসম্ভৰো তদুভযৰিনিমুত্তস্স সুত্তস্স অভাৰতো. তেন ৰুত্তং ‘‘সুত্তঙ্গমেৰ ন সিযা’’তি. অথাপি কথঞ্চি. সিযাতি ৰক্খমানং সামঞ্ঞৰিধিং সন্ধাযাহ. এৰম্পি অযং দোসোতি দস্সেন্তো ‘‘মঙ্গলসুত্তাদীন’’ন্তিআদিমাহ.

তব্ভাৰনিমিত্তন্তি গেয্যঙ্গভাৰনিমিত্তং. ৰেয্যাকরণস্স তব্ভাৰনিমিত্তন্তি সম্বন্ধো. চোদকো ‘‘গাথাৰিরহে’’তি ৰচনং অগ্গণ্হন্তো ‘‘পুচ্ছাৰিস্সজ্জনং ব্যাকরণ’’ন্তি ৰচনমত্তমেৰ গহেত্ৰা ‘‘এৰং সন্তে’’তিআদিনা চোদেতি. ইতরো পন ওকাসৰিধিতো অনোকাসো ৰিধি বলৰাতি ঞাযং গাথাৰিরহিতংযেৰ ৰেয্যাকরণন্তি, ইধাধিপ্পেতন্তি চ দস্সেন্তো ‘‘নাপজ্জতী’’তিআদিনা পরিহরতি. তথা হীতি তেনেৰ কারণেন, সতিপি সঞ্ঞন্তরনিমিত্তযোগে অনোকাসসঞ্ঞানং বলৰভাৰেনেৰাতি অত্থো.

সঙ্গহৰারৰণ্ণনা নিট্ঠিতা.

২. উদ্দেসৰারৰণ্ণনা

১. ৰিভাগেনাতি সরূপৰিভাগেন. অদিট্ঠং জোতীযতি এতাযাতি অদিট্ঠজোতনা. দিট্ঠং সংসন্দীযতি এতাযাতি দিট্ঠসংসন্দনা, সংসন্দনং চেত্থ সাকচ্ছাৰসেন ৰিনিচ্ছযকরণং. ৰিমতি ছিজ্জতি এতাযাতি ৰিমতিচ্ছেদনা. অনুমতিযা পুচ্ছা অনুমতিপুচ্ছা. ‘‘তং কিং মঞ্ঞথা’’তি হি কা তুম্হাকং অনুমতীতি অনুমতি পুচ্ছিতা. কথেতুকম্যতাতি কথেতুকম্যতায.

‘‘হরীযন্তি এতেহী’’তিআদিনা করণাধিকরণকত্তুভাৰকম্মসাধনানং ৰসেন হার-সদ্দস্স অত্থং ৰত্ৰা সদিসকপ্পনাৰসেন দস্সেতুং ‘‘হারা ৰিযা’’তিআদি ৰুত্তং. পুন গন্থকরণাদিঅত্থেন গন্থাদিসদ্দানং ৰিয হারকরণাদিঅত্থেন হারসদ্দসিদ্ধিং দস্সেতুং ‘‘হারযন্তী’’তিআদিমাহ. ‘‘হরণতো, রমণতো চা’’তি ইমিনা মনোহরা মনোরমা চেতে সংৰণ্ণনাৰিসেসাতি দস্সেতি.

উপপত্তিসাধনযুত্তীতি লক্খণহেতু. ৰুত্তনযেনাতি ‘‘ননু চ অঞ্ঞেপি হারা যুত্তিসহিতা এৰা’’তিআদিনা দেসনাহারে ৰুত্তনযানুসারেন.

চতুন্নং ব্যূহো এত্থাতি ভিন্নাধিকরণানম্পি পদানং অঞ্ঞপদত্থসমাসো লব্ভতি ‘‘উরসিলোমো’’তিআদীনং (দী. নি. টী. ৩.৫৪, ৩০৩) ৰিযাতি ৰুত্তং.

সেসন্তি ‘‘ৰিৰচনমেৰ ৰেৰচন’’ন্তি এৰমাদি.

অনুপ্পৰেসীযন্তীতি অৰগাহীযন্তি. সমাধীযন্তীতি পরিহরীযন্তি. ৰিনা ৰিকপ্পেনাতি জাতি সামঞ্ঞং, ভেদো সামঞ্ঞং, সম্বন্ধো সামঞ্ঞন্তিআদিনা পদত্থন্তরভাৰৰিকপ্পনমন্তরেন.

পদট্ঠানাদিমুখেনাতি পদট্ঠানৰেৰচনভাৰনাপহানমুখেন. কেচীতি পদট্ঠানপরিক্খারআৰট্টপরিৰত্তনপঞ্ঞত্তিওতরণে সন্ধায ৰদতি.

২. সম্বন্ধোতি হেতুফলভাৰযোগো. তথাভূতানঞ্হি ধম্মানং একসন্তানসিদ্ধতা একত্তনযো. ৰিভাগো সতিপি নেসং হেতুফলভাৰে ৰিভত্তসভাৰতা. অঞ্ঞো এৰ হি হেতু, অঞ্ঞং ফলন্তি. ব্যাপারৰিরহো নিরীহতা. ন হি হেতুফলানং এৰং হোতি ‘‘অহং ইমং নিব্বত্তেমি, ইমিনাহং নিব্বত্তো’’তি. অনুরূপফলতা পচ্চযুপ্পন্নানং পচ্চযানুকূলতা. সমূহাদিং উপাদায লোকসঙ্কেতসিদ্ধা ৰোহারমত্ততা সম্মুতিসভাৰো. পথৰীফস্সাদীনং কক্খল়ফুসনাদিলক্খণং পরমত্থসভাৰো. অযঞ্হেত্থ সঙ্খেপো – যস্মিং ভিন্নে, ইতরাপোহে ৰা চিত্তেন কতেন তথা বুদ্ধি, ইদং সম্মুতিসচ্চং যথা ঘটে, সসম্ভারজলে চ, তব্বিপরিযাযেন পরমত্থসচ্চন্তি. পরমত্থসচ্চপ্পটিৰেধাযাতি নিব্বানাধিগমায.

অন্তোতি অব্ভন্তরো. পধানাৰযৰেনাতি মূলভাৰেন. ‘‘নন্দী দুক্খস্স মূল’’ন্তিআদীসু (ম. নি. ১.১৩) তণ্হা ‘‘নন্দী’’তি ৰুত্তা. ‘‘সঙ্গামে চ নন্দিং চরতী’’তিআদীসু পমোদোতি আহ ‘‘তণ্হায, পমোদস্স ৰা’’তি.

৩. জাতিভেদতোতি কুসলা, অকুসলাতি ইমস্মা ৰিসেসা. যুজ্জন্তীতি এত্থ হেতুঅত্থো অন্তোনীতো ৰেদিতব্বোতি আহ ‘‘যোজীযন্তী’’তি. কেহি যোজীযন্তি? সংৰণ্ণনকেহীতি অধিপ্পাযো. যুজ্জন্তীতি ৰা যুত্তা হোন্তি, তেহি সমানযোগক্খমা তগ্গহণেনেৰ গহিতা হোন্তীতি অত্থো তদেকট্ঠভাৰতো. ইমস্মিং অত্থে ‘‘নৰহি পদেহী’’তি সহযোগে করণৰচনং, পুরিমস্মিং করণে. ‘‘এতে খো’’তি চ পাঠো. তত্থ খো-সদ্দস্স পদপূরণতা, অৰধারণত্থতা ৰা ৰেদিতব্বা. এতে এৰাতি এতে তণ্হাদযো এৰ, ন ইতো অঞ্ঞেতি অত্থো. অট্ঠারসেৰ ন ততো উদ্ধং, অধো ৰাতি. পুরিমস্মিং পক্খে মূলপদন্তরাভাৰো, দুতিযস্মিং তেসং অনূনাধিকতা দীপিতা হোতি.

উদ্দেসৰারৰণ্ণনা নিট্ঠিতা.

৩. নিদ্দেসৰারৰণ্ণনা

৪. নিদ্দেসৰারে সামঞ্ঞতোতি সাধারণতো. ৰিসেসেনাতি অসাধারণতো. পদত্থোতি সদ্দত্থো. লক্খণন্তি সভাৰো. কমোতি অনুপুব্বী. এত্তাৰতাতি এত্তকপ্পমাণভাৰো. হেত্ৰাদীতি হেতুফলভূমিউপনিসাসভাগৰিসভাগলক্খণনযা. ৰিসেসতো পন লক্খণন্তি সম্বন্ধো.

হারসঙ্খেপৰণ্ণনা

১. যং, ভিক্খৰেতি এত্থ যন্তি পচ্চত্তৰচনং, তঞ্চ সুখং, সোমনস্সন্তি দ্ৰযেন সমানাধিকরণন্তি কত্ৰা ‘‘অস্সাদীযতীতি অস্সাদো, সুখং, সোমনস্সঞ্চা’’তি ৰুত্তং. সুখাদিৰেদনা ৰিয মনাপিযরূপাদিপি অৰীতরাগস্স অস্সাদেতব্বন্তি আহ ‘‘এৰং ইট্ঠারম্মণম্পী’’তি. ‘‘অস্সাদেতি এতাযাতি ৰা অস্সাদো, তণ্হা’’তি এতেন ‘‘য’’ন্তি হেতুঅত্থে নিপাতোতি দস্সেতি. তত্রাযমত্থো – যেন হেতুনা পঞ্চুপাদানক্খন্ধে পটিচ্চ অস্সাদনীযভাৰেন উপ্পজ্জতি সুখং সোমনস্সং, অযং তণ্হাসঙ্খাতো অস্সাদো অস্সাদনকিরিযায কারণন্তি. ইতি কত্ৰা অযমত্থো দিট্ঠাভিনন্দনাদিভাৰতো ৰিপল্লাসেসুপি সম্ভৰতীতি আহ ‘‘এৰং ৰিপল্লাসাপী’’তি. অনিট্ঠম্পীতি পি-সদ্দেন ইট্ঠম্পীতি যোজেতব্বং, অনৰসেসা সাসৰা ধম্মা ইধ আরম্মণগ্গহণেন গহিতাতি আহ ‘‘সব্বেসং তেভূমকসঙ্খারান’’ন্তি.

দুক্খাদুক্খমসুখৰেদনানন্তি এত্থ দুক্খসভাৰা এৰ অদুক্খমসুখা ৰেদনা গহিতা অনিট্ঠারম্মণস্স অধিপ্পেতত্তা, ন সুখসভাৰা. যং সন্ধায ৰুত্তং ‘‘যাযং, ভন্তে, অদুক্খমসুখা ৰেদনা, সন্তস্মিং এসা পণীতে সুখে ৰুত্তা ভগৰতা’’তি (ম. নি. ২.৮৮; সং. নি. ৪.২৬৭). ‘‘সুখপরিযাযসব্ভাৰতো’’তি ইমিনা ইট্ঠতামত্ততোপি লেসেন সত্তানং আরম্মণস্স অস্সাদনীযতা সম্ভৰতীতি দস্সেতি.

আদীনৰো দোসনিস্সন্দনতায দোসো, স্ৰাযং পীল়নৰুত্তিযা ৰেদিতব্বোতি আহ ‘‘আদীনৰো দুক্খা ৰেদনা, তিস্সোপি ৰা দুক্খতা’’তি. এৰং দোসত্থতং আদীনৰস্স দস্সেত্ৰা ইদানি কপণত্থতং দস্সেতুং ‘‘অথ ৰা’’তিআদি ৰুত্তং. যতোতি যস্মা দোসকপণসভাৰত্তাতি ৰুত্তং হোতি.

নিস্সরতীতি ৰিৰিত্তি, সব্বসঙ্খারৰিৰেকোতি অত্থো. সামঞ্ঞনিদ্দেসেনাতি নিস্সরণসদ্দৰচনীযতাসামঞ্ঞেন. পুরিমানন্তি অস্সাদাদীনৰতানং. উপাযো চাতিআদীসু চ-সদ্দো পদপূরণমত্তন্তি কত্ৰা আহ ‘‘পচ্ছিমানঞ্চা’’তি, ফলাদীনন্তি অত্থো. তদন্তোগধভেদানন্তি অরিযমগ্গপরিযাপন্নৰিসেসানং.

কামভৰাদীনন্তি আদি-সদ্দেন ন রূপারূপভৰা এৰ গহিতা, অথ খো তে চ সঞ্ঞীভৰাদযো চ একৰোকারভৰাদযো চ গহিতা. তেনাহ ‘‘তিণ্ণং তিণ্ণং ভৰান’’ন্তি.

যাৰদেৰ অনুপাদাপরিনিব্বানত্থা ভগৰতো দেসনাতি আহ ‘‘ননু চ…পে… নিপ্ফাদীযতী’’তি. ‘‘ৰুত্তমেৰা’’তি ইমিনা পুনরুত্তিদোসং চোদেতি. ইতরো ‘‘সচ্চমেত’’ন্তি অনুজানিত্ৰা ‘‘তঞ্চ খো’’তিআদিনা পরিহরতি. ‘‘পরম্পরাযা’’তি এতেন অজ্ঝত্তং যোনিসোমনসিকারো ৰিয ন পরতোঘোসো আসন্নকারণং ধম্মাধিগমস্স ধম্মস্স পচ্চত্তং ৰেদনীযত্তাতি দস্সেতি. তথা হি ‘‘অক্খাতারো তথাগতা, পটিপন্না পমোক্খন্তি, ঝাযিনো মারবন্ধনা’’তি (ধ. প. ২৭৬) ৰুত্তং. তদধিগমকারণং অরিযমগ্গাধিগমকারণং সিযা. কিং পন তন্তি আহ ‘‘সম্পত্তিভৰহেতূ’’তি, তেন চরিমত্তভাৰহেতুভূতং পুঞ্ঞসম্পত্তিং ৰদতি.

‘‘অত্তানুদিট্ঠিং ঊহচ্চ, এৰং মচ্চুতরো সিযা’’তি ইদং অরিযমগ্গস্স পুব্বভাগপটিপদায ফলভাৰসাধনং. যেন হি ৰিধিনা অত্তানুদিট্ঠিসমুগ্ঘাতো, মচ্চুতরণঞ্চ সিযা, সো ‘‘এৰ’’ন্তি ইমিনা পকাসিতোতি. অত্তানুদিট্ঠিসমুগ্ঘাতমচ্চুতরণানং ফলভাৰে ৰত্তব্বমেৰ নত্থি.

‘‘ধম্মো হৰে’’তি পন গাথাযং লোকিযস্স পুঞ্ঞফলস্স ৰুত্তত্তা আহ ‘‘ইদং ফল’’ন্তি. যং নিব্বত্তেতব্বং, তং ফলং. যং নিব্বত্তকং, সো উপাযো. অযমেত্থ ৰিনিচ্ছযো. তেনাহ ‘‘এতেন নযেনা’’তিআদি. উপধিসম্পত্তীতি অত্তভাৰসোভা.

ৰিসুদ্ধীতি ঞাণদস্সনৰিসুদ্ধি অধিপ্পেতাতি আহ – ‘‘এত্থাপি…পে… ৰিঞ্ঞাতু’’ন্তি. ‘‘যস্মা পনা’’তিআদিনাপি তমেৰত্থং ৰচনন্তরে পাকটতরং করোতি.

সরূপতো আগতানি ‘‘যতো খো, ভিক্খৰে, ভিক্খু পঞ্চন্নং উপাদানক্খন্ধানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং পজানাতী’’তিআদীসু (সং. নি. ৩.২৬-২৮). একদেসেন আগতানি ‘‘সংযোজনিযেসু, ভিক্খৰে, ধম্মেসু অস্সাদানুপস্সিনো ৰিহরতো (সং. নি. ২.৫৩), বহুদুক্খা বহুপাযাসা, আদীনৰো এত্থ ভিয্যো (ম. নি. ১.১১৭), সঙ্খারানমেতং নিস্সরণং, যদিদং নিব্বান’’ন্তিআদীসু (পটি. ম. ১.২৪; ৩.৪১). ন সরূপেন আগতানি যথা সামঞ্ঞফলসুত্তাদীসু. অত্থৰসেনাতি অস্সাদেতব্বাদিঅত্থৰসেন. ন পপঞ্চিতোতি ন ৰিত্থারিতো.

২. এসেৰ নযোতি অতিদেসেন ৰিচিযমানৰচনসেসো অতিদিট্ঠো. ভাৰত্থে তোহি আহ ‘‘ৰিস্সজ্জিতন্তি ৰিস্সজ্জনা’’তি. সুত্তে আগতং ন অত্থসংৰণ্ণনাৰসেন অট্ঠকথাযং আগতন্তি অধিপ্পাযো. পুচ্ছানুরূপতা ইধ পুব্বাপরন্তি চতুব্যূহপুব্বাপরতো ইমং ৰিসেসেত্ৰা দস্সেতি. পুচ্ছানুসন্ধীতি পুচ্ছায ৰিস্সজ্জনেন অনুসন্ধানং. অট্ঠকথাযং পন হেট্ঠিমদেসনায পুচ্ছানিমিত্তপৰত্তউপরিদেসনায সম্বন্ধো ‘‘পুচ্ছানুসন্ধী’’তি ৰুত্তং. পুব্বাপেক্খন্তি পুচ্ছিতৰিস্সজ্জিতপদাপেক্খং. ‘‘সুত্তস্সা’’তি ৰা ইমিনা পুচ্ছাৰিস্সজ্জনাঅনুগীতিযো ঠপেত্ৰা সেসো ৰিচযহারপদত্থো সঙ্গহিতোতি পদস্সাপি সঙ্গহো ৰেদিতব্বো. ইমস্মিং পক্খে গাথাযং চ-সদ্দো পদপূরণমত্তে দট্ঠব্বো.

‘‘চক্খু অনিচ্চ’’ন্তি পুট্ঠে ‘‘আম, চক্খু অনিচ্চমেৰা’’তি একন্ততো ৰিস্সজ্জনং একংসব্যাকরণং. ‘‘অঞ্ঞিন্দ্রিযং ভাৰেতব্বং, সচ্ছিকাতব্বঞ্চা’’তি পুট্ঠে ‘‘মগ্গপরিযাপন্নং ভাৰেতব্বং, ফলপরিযাপন্নং সচ্ছিকাতব্ব’’ন্তি ৰিভজিত্ৰা ৰিস্সজ্জনং ৰিভজ্জব্যাকরণং. ‘‘অঞ্ঞিন্দ্রিযং কুসল’’ন্তি পুট্ঠে ‘‘কিং অনৰজ্জট্ঠো কুসলট্ঠো, উদাহু সুখৰিপাকট্ঠো’’তি পটিপুচ্ছিত্ৰা ৰিস্সজ্জনং পটিপুচ্ছাব্যাকরণং. ‘‘সস্সতো অত্তা, অসস্সতো ৰা’’তি ৰুত্তে ‘‘অব্যাকতমেত’’ন্তিআদিনা অৰিস্সজ্জনং ঠপনং. ‘‘কিং পনেতে কুসলাতি ৰা ধম্মাতি ৰা একত্থা, উদাহু নানত্থা’’তি ইদং পুচ্ছনং সাৰসেসং. ৰিস্সজ্জনস্স পন সাৰসেসতা ৰেনেয্যজ্ঝাসযৰসেন দেসনাযং ৰেদিতব্বা. অপ্পাটিহীরকং সউত্তরং. সপ্পাটিহীরকং নিরুত্তরং. সেসং ৰিচযহারনিদ্দেসে সুৰিঞ্ঞেয্যমেৰ.

এত্থ চ অস্সাদো অস্সাদহেতু যাৰ আণত্তিহেতূতি এৰং হেতূনম্পি অস্সাদাদযো ৰেদিতব্বা. তত্থ সঙ্খেপতো সুখসুখপচ্চযলক্খণো অস্সাদো, সো ৰিসেসতো সগ্গসম্পত্তিযা দীপেতব্বো. সা হি তস্স উক্কংসো, সেসা পনেত্থ ভৰসম্পত্তি তদন্ৰাযিকা ৰেদিতব্বা. তস্স হেতু দানমযং, সীলমযঞ্চ পুঞ্ঞকিরিযৰত্থু. দুক্খদুক্খপচ্চযলক্খণো আদীনৰো. ৰিপরিণামসঙ্খারদুক্খতানং তদৰরোধতো ৰট্টদুক্খস্সাপি এত্থ সঙ্গহো. ৰিসেসতো পন কামানং ওকারোতি দট্ঠব্বো, স্ৰাযং সংকিলেসৰত্থুনা, ইত্তরপচ্চুপট্ঠানতাদীহি চ ৰিভাৰেতব্বো, তস্স হেতু দস অকুসলকম্মপথা. নেক্খম্মং নিস্সরণং, তস্স হেতু যথারহং তদনুচ্ছৰিকা পুব্বভাগপ্পটিপদা. ফলং দেসনাফলমেৰ, তস্স হেতু দেসনা. উপাযো যথাৰুত্তউপাযোৰ, তস্স হেতু চত্তারি চক্কানি. আণত্তি উপদেসো, তস্স রাগগ্গিআদীহি লোকস্স আদিত্ততা, সত্থু মহাকরুণাযোগো চ হেতু.

তথা চতূসু অরিযসচ্চেসু সমুদযেন অস্সাদো, দুক্খেন আদীনৰো, মগ্গনিরোধেহি নিস্সরণং, মগ্গো ৰা উপাযো, তদুপদেসো আণত্তি, অনুপাদিসেসা নিব্বানধাতু ফলং. ইতি অনুপুব্বকথায সদ্ধিং বুদ্ধানং সামুক্কংসিকায ধম্মদেসনায নিদ্ধারণভাৰেন ৰিচযো ৰেদিতব্বো. পদস্স পদত্থসম্বন্ধো হেতু. সো হি তস্স পৰত্তিনিমিত্তং, পঞ্হস্স ঞাতুকামতা, কথেকুকামতা চ. অদিট্ঠজোতনাদীনঞ্হি চতুন্নং ঞাতুকামতা, ইতরস্স ইতরা. ৰিস্সজ্জনস্স পঞ্হো হেতু. এৰং সেসানম্পি যথারহং ৰত্তব্বং.

৩. ব্যঞ্জনত্থানং যুত্তাযুত্তপরিক্খাতি ব্যঞ্জনগ্গহণেন পদং গহিতং, অত্থগ্গহণেন পঞ্হাদীহি সদ্ধিং অস্সাদাদযো গহিতা. ৰিচযহারপদত্থা এৰ হি যুত্তাযুত্তাদিৰিসেসসহিতা যুত্তিহারাদীনং পদত্থা. তথা হি পদট্ঠানপদট্ঠানিকভাৰৰিসিট্ঠা তেযেৰ পদট্ঠানহারস্স পদত্থা. লক্খণলক্খিতব্বতাৰিসিট্ঠা, নিদ্ধারিতা চ লক্খণহারস্স, নিব্বচনাদিৰিভাৰনাৰিসিট্ঠা চতুব্যূহহারস্স, সভাগধম্মৰসেন, ৰিসভাগধম্মৰসেন চ আৰট্টনৰিসিট্ঠা আৰট্টহারস্স, ভূমিৰিভাগাদিৰিসিট্ঠা ৰিভত্তিহারস্স, পটিপক্খতো পরিৰত্তনৰিসিট্ঠা পরিৰত্তনহারস্স, পরিযাযৰেৰচনৰিসিট্ঠা ৰেৰচনহারস্স, পভৰাদিপঞ্ঞাপনৰিসিট্ঠা পঞ্ঞত্তিহারস্স, খন্ধাদিমুখেহি ওতরণৰিসিট্ঠা ওতরণহারস্স, পদপদত্থপঞ্হারম্ভসোধনৰিসিট্ঠা সোধনহারস্স, সামঞ্ঞৰিসেসনিদ্ধারণৰিসিট্ঠা অধিট্ঠানহারস্স, পচ্চযধম্মেহি পরিক্খরণৰিসিট্ঠা পরিক্খারহারস্স, পহাতব্বভাৰেতব্বতানিদ্ধারণৰিসিট্ঠা সমারোপনহারস্স পদত্থা. ‘‘ব্যঞ্জনস্স সভাৰনিরুত্তিতা, অত্থস্স সুত্তাদীহি অৰিলোমনং যুত্তভাৰো’’তি ইমিনা অসভাৰনিরুত্তিতা, সুত্তাদীহি ৰিলোমনঞ্চ অযুত্তভাৰোতি দীপেতি, তেন যুত্তাযুত্তীনং হেতুং দস্সেতি.

৪. যোনিসোমনসিকারাদীতি আদিসদ্দেন সদ্ধম্মস্সৰনসপ্পুরিসূপনিস্সযাদিসাধারণং, অসাধারণঞ্চ দেয্যপটিগ্গাহকাদিং সঙ্গণ্হাতি. সম্ভৰতোতি যথারহং তস্স ধম্মস্স অনুরূপং. যাৰ সব্বধম্মাতি এত্থ সব্বং নাম পদেসসব্বং, ন সব্বসব্বন্তি. অযঞ্হি সব্বসদ্দো যথা পঠমৰিকপ্পে সুত্তে আগতধম্মৰসেন পদেসৰিসযো, এৰং দুতিযৰিকপ্পে পদট্ঠানপদট্ঠানিকনিদ্ধারণেন তংতংপকরণপরিচ্ছিন্নধম্মগ্গহণতো পদেসৰিসযো এৰ, ন অনৰসেসধম্মৰিসযোতি. সুত্তাগতধম্মানং যানি পদট্ঠানানি, তেসঞ্চ যানীতি এৰং কারণপরম্পরানিদ্ধারণলক্খণো পদট্ঠানহারো, পরিক্খারহারো পন সুত্তাগতধম্মানং তংতংপচ্চযুপ্পন্নানং পটিহেতুপচ্চযতাৰিসেসৰিভাৰনলক্খণোতি সতিপি কারণৰিচারণভাৰে অযং পদট্ঠানহারপরিক্খারহারানং ৰিসেসো.

৫. যথা ‘‘সমানাধিকরণসমানপদে’’তিআদীসু একসদ্দস্স অত্থো সমানসদ্দো, এৰং একরসট্ঠেন ভাৰনা ‘‘একুপ্পাদা’’তিআদীসু (কথা. ৪৭৩) ৰিয একলক্খণাতি এত্থ একসদ্দো সমানত্থোতি আহ ‘‘সমানলক্খণা’’তি. সংৰণ্ণনাৰসেনাতি এত্থ কম্মত্থে অন-সদ্দো, সংৰণ্ণেতব্বতাৰসেনাতি অত্থো. লক্খণাতি উপলক্খণা. ‘‘নানত্তকাযনানত্তসঞ্ঞিনো (দী. নি. ৩.৩৪১, ৩৫৭, ৩৫৯; অ. নি. ৯.২৪), নানত্তসঞ্ঞানং অমনসিকারা’’তিআদীসু সহচারিতা দট্ঠব্বা. সঞ্ঞাসহগতা হি ধম্মা তত্থ সঞ্ঞাগ্গহণেন গহিতা. ‘‘দদং মিত্তানি গন্থতী’’তিআদীসু (সং. নি. ১.২৪৬; সু. নি. ১৮৯) সমানকিচ্চতা. পিযৰচনত্থচরিযা সমানত্ততাপি হি তত্থ মিত্তগন্থনকিচ্চেন সমানকিচ্চা গয্হন্তি সঙ্গহৰত্থুভাৰতো. ‘‘ফস্সপচ্চযা ৰেদনা’’তিআদীসু (ম. নি. ৩.১২৬; সং. নি. ২.১, ৩৯; মহাৰ. ১; ৰিভ. ২২৫; উদা. ১; নেত্তি. ২৪) সমানহেতুতা. যথা হি ফস্সো ৰেদনায, এৰং সঞ্ঞাদীনম্পি সহজাতাদিনা পচ্চযো হোতি এৰাতি তেপি সমানহেতুতায ৰুত্তা এৰ হোন্তি. তথা হি ৰুত্তং ‘‘তজ্জামনোৰিঞ্ঞাণধাতুসম্ফস্সজা চেতনা’’তি (ধ. স. ৫), ‘‘ফুট্ঠো সঞ্জানাতি, ফুট্ঠো চেতেতী’’তিআদি (সং. নি. ৪.৯৩). এৰং ‘‘তণ্হাপচ্চযা উপাদান’’ন্তি (ম. নি. ৩.১২৬; সং. নি. ২.১, ৩৯; মহাৰ. ১; ৰিভ. ২২৫; উদা. ১; নেত্তি. ২৪) এৰমাদিপি উদাহরিতব্বং. ‘‘অৰিজ্জাপচ্চযা সঙ্খারা’’তিআদীসু (ম. নি. ৩.১২৬; সং. নি. ২.১, ৩৯; মহাৰ. ১; ৰিভ. ২২৫; উদা. ১; নেত্তি. ২৪) সমানফলতা দট্ঠব্বা. যথা হি সঙ্খারা অৰিজ্জায ফলং, এৰং তণ্হুপাদাদীনম্পীতি তেপি তত্থ গহিতাৰ হোন্তি. তেনাহ ‘‘পুরিমকম্মভৰস্মিং মোহো অৰিজ্জা আযূহনা সঙ্খারা নিকন্তি তণ্হা উপগমনং উপাদান’’ন্তি. ‘‘রূপং অস্সাদেতি অভিনন্দতি, তং আরব্ভ রাগো উপ্পজ্জতী’’তি (পট্ঠা. ১.১.৪২৪) ৰুত্তে তংসম্পযুত্তা ৰেদনাদযো ৰুত্তা এৰ হোন্তি সমানারম্মণভাৰতো. ন হি তেহি ৰিনা তস্স উপ্পত্তি অত্থি. এৰমাদীহীতি এত্থ আদিসদ্দেন অত্থপ্পকরণলিঙ্গসদ্দন্তরসন্নিধানসামত্থিযাদীনম্পি সঙ্গহো দট্ঠব্বো. অত্থাদিৰসেনপি হি সুত্তে অৰুত্তানম্পি ৰুত্তানং ৰিয নিদ্ধারণং সম্ভৰতীতি. ৰুত্তপ্পকারেনাতি ‘‘ৰধকট্ঠেন একলক্খণানী’’তিআদিনা পাল়িযং, ‘‘সহচারিতা’’তিআদিনা অট্ঠকথাযঞ্চ ৰুত্তেন পকারেন.

৬. ‘‘ফুসনট্ঠেন ফস্সো’’তিআদিনা নিদ্ধারেত্ৰা ৰচনং নিব্বচনং, তং পন পদস্সেৰ, ন ৰাক্যস্সাতি আহ ‘‘পদনিব্বচন’’ন্তি. অধিপ্পাযনিদানানিপেত্থ ব্যঞ্জনমুখেনেৰ নিদ্ধারেতব্বানি. নিব্বচনপুব্বাপরসন্ধীসু ৰত্তব্বমেৰ নত্থীতি আহ ‘‘ৰিসেসতো ব্যঞ্জনদ্ৰারেনেৰ অত্থপরিযেসনা’’তি. পৰত্তিনিমিত্তং অজ্ঝাসযাদি.

৭. ‘‘পদট্ঠানে’’তি ইদং সুত্তে আগতধম্মানং কারণভূতেপি ধম্মে নিদ্ধারেত্ৰা সভাগতো, ৰিসভাগতো চ আৰট্টনং কাতব্বন্তি দস্সনত্থং ৰুত্তং, ন তন্তিৰসেন. তস্মা পদট্ঠাননিদ্ধারণায ৰিনাপি আৰট্টনং যুত্তমেৰাতি সিদ্ধং হোতি. পদস্স ৰা সদ্দপৰত্তিট্ঠানং পদট্ঠানং পদত্থো. এতস্মিং পক্খে ‘‘আরম্ভথ নিক্কমথাতি (সং. নি. ১.১৮৫; নেত্তি. ২৯; পেটকো. ৩৮; মি. প. ৫.১.৪) ৰীরিযস্স পদট্ঠান’’ন্তি (নেত্তি. ২৯) এত্থ য্ৰাযমারম্ভধাতুআদিকো অত্থো ৰুত্তো, তং ৰীরিযসদ্দস্স পৰত্তিট্ঠানং ৰীরিযসদ্দাভিধেয্যো অত্থোতি এৰমত্থো ৰেদিতব্বো. সেসেসুপি এসেৰ নযো. সেসকং নামগহিততো ইতরং, তং পন তস্স পটিপক্খভূতং ৰা সিযা, অঞ্ঞং ৰাতি আহ ‘‘ৰিসভাগতায অগ্গহণেন ৰা’’তি. সংৰণ্ণনায যোজেন্তোতি যথাৰুত্তৰিসভাগধম্মনিদ্ধারণভূতেন অত্থকথনেন পাল়িযং যোজেন্তো. তেনাহ ‘‘দেসন’’ন্তি. ‘‘পটিপক্খে’’তি ইদং নিদস্সনমত্তং দট্ঠব্বং সভাগধম্মৰসেনপি আৰট্টনস্স ইচ্ছিতত্তা.

৮. নামৰসেনাতি সাধারণনামৰসেন. পাল়িযং পন ‘‘মিচ্ছত্তনিযতানং সত্তানং, অনিযতানঞ্চ সত্তানং দস্সনপহাতব্বা কিলেসা সাধারণা’’তিআগতত্তা (নেত্তি. ৩৪) ‘‘দস্সনপহাতব্বাদিনামৰসেনা’’তি ৰুত্তং. ৰত্থুৰসেনাতি সত্তসন্তানৰসেন. সো হি ধম্মানং পৰত্তিট্ঠানতায ইধ ‘‘ৰত্থূ’’তি অধিপ্পেতো. তেনাহ – ‘‘পুথুজ্জনস্স, সোতাপন্নস্স চ কামরাগব্যাপাদা সাধারণা’’তিআদি (নেত্তি. ৩৪). ৰুত্তৰিপরিযাযেনাতি নামতো, ৰত্থুতো চ আৰেণিকতায. তংতংমগ্গফলট্ঠানঞ্হি তংতংমগ্গফলট্ঠতা, ভব্বানং ভব্বতা, অভব্বানং অভব্বতা অসাধারণা.

৯. ‘‘ভাৰিতে’’তি ইদং ভাৰনাকিরিযায উপলক্খণং, ন এত্থ কালৰচনিচ্ছাতি আহ ‘‘ভাৰেতব্বেতি অত্থো’’তি. ভাৰনা চেত্থ আসেৰনাতি, কুসলসদ্দোপি অনৰজ্জট্ঠোতি ৰেদিতব্বো. পটিপক্খতোতি ৰিপক্খতো. ৰিসদিসূদাহরণেন ব্যতিরেকতো যথাধিপ্পেতধম্মপ্পতিট্ঠানা হেসা.

১০. পদত্থস্সাতি পদাভিধেয্যস্স অত্থস্স, সভাৰধম্মস্স ৰা.

১১. নিক্খেপো দেসনা. পভৰো সমুদযো.

১২. ‘‘অৰুত্তানম্পি সঙ্গহো’’তি ইমিনা অৰুত্তসমুচ্চযত্থো চ-সদ্দোতি দস্সেতি.

১৩. ‘‘গাথারুল়্হে’’তি ইমিনা পাল়িআগতোৰ পঞ্হো ৰেদিতব্বো, ন ইতরোতি দস্সেতি. তেনাহ ‘‘বুদ্ধাদীহি ব্যাকতে’’তি. তস্স অত্থস্সাতি আরদ্ধস্স অত্থস্স, তেন আরম্ভসোধনস্স ৰিসযমাহ. এত্থ চ অত্থদ্ৰারেনেৰ পদপুচ্ছাসোধনম্পি করীযতীতি পুন ‘‘তস্স অত্থস্সা’’তি ৰুত্তং. অথ ৰা ৰিস্সজ্জিতম্হীতি ৰিস্সজ্জনে. ৰিস্সজ্জনসোধনেন হি পঞ্হাসোধনং. পঞ্হেতি পুচ্ছাযং. গাথাযন্তি উপলক্খণং, তেন গাথাযং, সুত্তগেয্যাদীসু চাতি ৰুত্তং হোতি. যমারব্ভাতি যং সীলাদিমারব্ভ গাথাদীসু দেসিতং, তস্মিং আরম্ভেতি অত্থো. পুচ্ছিতাতি পুচ্ছাকারিনী, ‘‘কা এত্থ পদসুদ্ধি, কা পঞ্হাসুদ্ধি, কা আরম্ভসুদ্ধী’’তি এৰং পুচ্ছাকারিনী পুচ্ছং কত্ৰা পৰত্তিতা সুদ্ধাসুদ্ধপরিক্খাতি যোজনা.

১৪. ন ৰিকপ্পযিতব্বাতি যথা লোকে ‘‘জাতি সামঞ্ঞং, ভেদো সামঞ্ঞং, সম্বন্ধো সামঞ্ঞ’’ন্তিআদিনা সামঞ্ঞং জাতিআদিং, তব্বিধুরঞ্চ ৰিসেসং ৰিকপ্পেন্তি পরিকপ্পেন্তি, এৰং ন ৰিকপ্পযিতব্বাতি অত্থো. যদা যো কালৰিসেসো ‘‘স্ৰে’’তি লদ্ধৰোহারো, তদা সো তংদিৰসাতিক্কমে ‘‘অজ্জা’’তি, পুন তংদিৰসাতিক্কমে ‘‘হিয্যো’’তি ৰোহরীযতীতি অনৰট্ঠিতসভাৰা এতে কালৰিসেসা. দিসাযপি ‘‘একং অৰধিং অপেক্খিত্ৰা পুরত্থিমা দিসা, ততো অঞ্ঞং অপেক্খিত্ৰা পচ্ছিমা নাম হোতী’’তিআদিনা অনৰট্ঠিতসভাৰতা ৰেদিতব্বা. জাতিআদিঅপেক্খাযাতি জাতিআদিদুক্খৰিসেসাপেক্খায. সচ্চাপেক্খাযাতি সচ্চসামঞ্ঞাপেক্খায. ‘‘তণ্হা’’তি ৰুচ্চমানং কামতণ্হাদিঅপেক্খায সামঞ্ঞম্পি সমানং সচ্চাপেক্খায ৰিসেসো হোতীতি এৰমাদিং সন্ধাযাহ ‘‘এস নযো সমুদযাদীসুপী’’তি.

১৬. এত্থাতি এতস্মিং বুদ্ধৰচনে. তেনাহ ‘‘সিক্খত্তযসঙ্খাতস্সা’’তিআদি. যথারুতং যথাকথিতং সদ্দতো অধিগতং নিদ্ধারিতং, ন অত্থপ্পকরণলিঙ্গসদ্দন্তরসন্নিধানাদিপ্পমাণন্তরাধিগতং. ‘‘অত্থতো দস্সিতা’’তি ইদং যস্মিং সুত্তে ভাৰনাৰ কথিতা, ন পহানং, তং সন্ধায ৰুত্তং.

নযসঙ্খেপৰণ্ণনা

১৭. তণ্হাৰিজ্জাহি করণভূতাহি. সংকিলেসো পক্খো এতস্সাতি সংকিলেসপক্খো, সংকিলেসপক্খিকো সুত্তত্থো, তস্স নযনলক্খণোতি যোজনা. ৰোদানপক্খস্স সুত্তত্থস্সাতি সম্বন্ধো. ৰুট্ঠানগামিনিযা, বলৰৰিপস্সনায চ দুক্খাদীসু পরিঞ্ঞেয্যতাদীনি মগ্গানুগুণো গহণাকারো অনুগাহণনযো. যদি এৰং কথং নযোতি আহ ‘‘তস্স পনা’’তিআদি. তত্থ ‘‘নযৰোহারো’’তি ইমিনা নযাধিট্ঠানং নযোতি ৰুত্তন্তি দস্সেতি.

১৮. বাধকাদিভাৰতোতি বাধকপভৰসন্তিনিয্যানভাৰতো. অঞ্ঞথাভাৰাভাৰেনাতি অবাধকঅপ্পভৰঅসন্তি অনিয্যানভাৰাভাৰেন. সচ্চসভাৰত্তাতি অমুসাসভাৰত্তা. অৰিসংৰাদনতোতি অরিযসভাৰাদিভাৰস্স ন ৰিসংৰাদনতো একন্তিকত্তাতি অত্থো.

১৯. সংকিলিট্ঠধম্মাতি সংকিলেসসমন্নাগতা ধম্মা সদ্ধম্মনযকোৰিদাতি সচ্চপটিচ্চসমুপ্পাদাদিধম্মনযকুসলা, একত্তাদিনযকুসলা ৰা.

২০. অত্থৰিস্সজ্জনেসূতি ‘‘ইমে ধম্মা কুসলা’’তিআদিনা (ধ. স. ১) সুত্তে কতপঞ্হৰিস্সজ্জনেসু চেৰ অট্ঠকথায কতঅত্থসংৰণ্ণনাসু চ. ‘‘ৰোদানিযা’’তি ইমিনা অনৰজ্জধম্মা ইধ কুসলাতি অধিপ্পেতা, ন সুখৰিপাকাতি দস্সেতি. তস্স তস্স অত্থনযস্স যোজনত্থং মনসা ৰোলোকযতেতি যোজনা.

২১. যদি করণভূতং, কথং তস্স অত্থন্তরাভাৰোতি আহ ‘‘যেন হী’’তিআদি. দিসাভূতধম্মানং ৰোলোকযনসমানযনভাৰতো ৰোহারভূতো, কম্মভূতো চ নযো, ন নন্দিযাৰট্টাদযো ৰিয অত্থভূতোতি ‘‘ৰোহারনযো, কম্মনযো’’তি চ ৰুচ্চতি.

দ্ৰাদসপদৰণ্ণনা

২৩. অপরিযোসিতে পদেতি উচ্চারণৰেলাযং পদে অসমত্তে, ৰিপ্পকতেতি অত্থো. পরিযোসিতে হি ‘‘পদ’’ন্ত্ৰে সমঞ্ঞা সিযা, ন ‘‘অক্খর’’ন্তি অধিপ্পাযো. পদস্স ৰেৰচনতায অত্থৰসেন পরিযাযং খরন্তং সঞ্চরন্তং ৰিয হোতি, ন এৰং ৰণ্ণো অৰেৰচনত্তাতি আহ পরিযাযৰসেন অক্খরণতো’’তি. ন হি ৰণ্ণস্স পরিযাযো ৰিজ্জতী’’তি ইদং অকারাদিৰণ্ণৰিসেসং সন্ধায ৰদতি, ন ৰণ্ণসামঞ্ঞং. তস্স হি ৰণ্ণো অক্খরন্তি পরিযাযো ৰুত্তো এৰাতি.

অক্খরসদ্দস্স অত্থং ৰত্ৰা তপ্পসঙ্গেন ৰণ্ণসদ্দস্সপি ৰত্তুং ‘‘কেনট্ঠেন ৰণ্ণো’’তিআদিমাহ. তত্থ ননু পদেন, ৰাক্যেন ৰা অত্থো সংৰণ্ণীযতি, ন অক্খরেনাতি চোদনং মনসি কত্ৰা আহ ‘‘ৰণ্ণো এৰ হী’’তিআদি. পদাদিভাৰেনাতি পদৰাক্যভাৰেন. যথাসম্বন্ধন্তি যথাসঙ্কেতং. অযং-সদ্দো ইমস্সত্থস্স ৰাচকো, অযং অত্থো ইমস্স সদ্দস্স ৰচনীযোতি যথাগহিতসঙ্কেতানুরূপং সদ্দত্থানং ৰাচকৰচনীযভাৰো. অথ ৰা য্ৰাযং সদ্দত্থানং অঞ্ঞমঞ্ঞং অৰিনাভাৰো, সো সম্বন্ধো. তদনুরূপং একক্খরং নামপদং ‘‘মা এৰং মঞ্ঞসী’’তিআদীসু মা-কারাদি. কেচীতি অভযগিরিৰাসিনো. তে হি অভিধম্মদেসনং ‘‘মনসাদেসনা’’তি ৰদন্তি, যতো রাহুলাচরিযো ‘‘ৰিসুদ্ধকরুণানং মনসাদেসনা ৰাচায অক্খরণতো অক্খরসঞ্ঞিতা’’তি আহ.

সত্ৰপ্পধানন্তি দ্রব্যপ্পধানং. নামপদে হি দ্রব্যমাৰিভূতরূপং, কিরিযা অনাৰিভূতরূপা যথা ‘‘ফস্সো’’তি (ম. নি. ৩.১২৬; সং. নি. ২.১, ৩৯; মহাৰ. ১; ৰিভ. ২২৫; উদা. ১; নেত্তি. ২৪). আখ্যাতপদে পন কিরিযা আৰিভূতরূপা, দ্রব্যমনাৰিভূতরূপং যথা ‘‘ফুসতী’’তি. তেন নেসং সত্ৰকিরিযাপ্পধানতা ৰুত্তা. কিরিযাৰিসেসগ্গহণনিমিত্তন্তি কিরিযাৰিসেসাৰবোধহেতু কিরিযাৰিসেসদীপনতো, যথা ‘‘চিরপ্পৰাসি’’ন্তি (ধ. প. ২১৯) এত্থ প-সদ্দো ৰসনকিরিযায ৰিযোগৰিসিট্ঠতং দীপেতি. ‘‘এৰং মনসি করোথ, মা এৰং মনসাকত্থা’’তিআদীসু কিরিযাৰিসেসস্স জোতকো এৰং-সদ্দো. ‘‘এৰংসীলা (দী. নি. ৩.১৪২) এৰংধম্মা’’তিআদীসু (দী. নি. ২.১৩; ম. নি. ৩. ১৯৮; সং. নি. ৫.৩৭৮) সত্ৰৰিসেসস্স. এৰং সেসনিপাতপদানম্পীতি অধিপ্পাযো. তেনাহ ‘‘কিরিযায…পে… নিপাতপদ’’ন্তি.

সঙ্খেপতো ৰুত্তং, কিং পন তন্তি আহ ‘‘পদাভিহিত’’ন্তি. অথ ৰা সঙ্খেপতো ৰুত্তং, যো অক্খরেহি সঙ্কাসিতোতি ৰুচ্চতি. পদাভিহিতং পদেহি কথিতং, যো পদেহি পকাসিতোতি ৰুচ্চতি. তদুভযং, যদি পদসমুদাযো ৰাক্যং, তস্স কো পরিচ্ছেদো. যাৰতা অধিপ্পেতত্থপরিযোসানং, তাৰতা একৰাক্যন্তিপি ৰদন্তি, বহূপেত্থ পকারে ৰণ্ণেন্তি. কিং তেহি, সাখ্যাতং সাব্যযং সকারকং সৰিসেসনং ‘‘ৰাক্য’’ন্তি দট্ঠব্বং. ননু চ পদেনপি অত্থো ব্যঞ্জীযতীতি চোদনং মনসি কত্ৰা আহ ‘‘পদমত্তসৰনেপি হী’’তিআদি. আকারেসু ৰাক্যৰিভাগেসু অভিহিতং কথিতং নিব্বচনং আকারাভিহিতং নিব্বচনং. ‘‘অভিহিতন্তি চ পাল়িআগত’’ন্তি ৰদন্তি.

‘‘নিব্বানং মগ্গতি, নিব্বানত্থিকেহি ৰা মগ্গীযতি, কিলেসে ৰা মারেন্তো গচ্ছতীতি মগ্গো’’তিআদিনা (ধ. স. অট্ঠ. ১৬) নিব্বচনানং ৰিত্থারো. তংনিদ্দেসকথনত্তা নিদ্দেসোতি ইমমত্থমাহ ‘‘নিব্বচনৰিত্থারো নিরৰসেসদেসনত্তা নিদ্দেসো’’তি. পদেহীতি ৰাক্যাৰযৰভূতেহি, ৰাক্যতো ৰিভজ্জমানেহি ৰা আখ্যাতাদিপদেহি. তেনাহ ‘‘ৰাক্যস্স ৰিভাগো’’তি, তথা চাহ ‘‘অপরিযোসিতে’’তিআদি. অপরে পন ‘‘পকতিপচ্চযলোপাদেসাদিৰসেন অক্খরৰিভাগো আকারো, নিরুত্তিনযেন পদৰিভাগো নিব্বচনং, ৰাক্যৰিভাগো নিদ্দেসো. ৰণ্ণপদৰাক্যানি হি অৰিভত্তানি, ৰিভত্তানি চ ছ ব্যঞ্জনপদানী’’তি ৰদন্তি. ছট্ঠং ৰচনন্তি ছট্ঠং পদং. কাতব্বন্তি ‘‘অক্খরং পদং ব্যঞ্জনং আকারো তথেৰ নিরুত্তি নিদ্দেসো ছট্ঠৰচন’’ন্তি গাথাযং এৰং কত্তব্বং, সংৰণ্ণনাৰসেন ৰা আকারপদং চতুত্থং কাতব্বন্তি অত্থো. সব্বো সদ্দৰোহারো ৰিভত্তেহি, অৰিভত্তেহি চ অক্খরপদৰাক্যেহেৰ, তদঞ্ঞপ্পকারো নত্থীতি আহ ‘‘যানিমানী’’তিআদি.

২৪. কাসনাসদ্দো কম্মত্থোতি দস্সেতুং ‘‘কাসীযতী’’তিআদি ৰুত্তং. পদেহি তাৰ অত্থস্স সঙ্কাসনা, পকাসনা চ হোতু, পদাৰধিকাপি সংৰণ্ণনা ইচ্ছিতাতি অক্খরেহি পন কথন্তি আহ ‘‘অক্খরেহি সুয্যমানেহী’’তিআদি. পদত্থসম্পটিপত্তীতি পদাভিধেয্যঅত্থাৰবোধো. ‘‘অক্খরেহি সঙ্কাসেতী’’তিআদিনা অক্খরকরণং সঙ্কাসনভূতং উগ্ঘটনকিরিযং ৰদন্তেন যথাৰুত্তো অত্থো সাধিতোতি দস্সেতুং ‘‘তথা হী’’তিআদি ৰুত্তং.

ৰিভজনুত্তানীকম্মপঞ্ঞত্তীতি একত্তনিদ্দেসো সমাহারোতি অযং দ্ৰন্দসমাসো. উভযেনাতি ‘‘ৰিৰরণা, ৰিভজনা’’তি ইমিনা দ্ৰযেন. এতেহীতি এত্থ এৰ-কারো লুত্তনিদ্দিট্ঠোতি আহ ‘‘এতেহি এৰা’’তি. ‘‘সঙ্কাসনা…পে… অভাৰতো’’তি ইমিনা যথাধিপ্পেতঅনূনাৰধারণফলং দস্সেতি. উগ্ঘটনাদীতি আদিসদ্দেন ৰিপঞ্চননযানি সঙ্গণ্হাতি.

২৫. সম্মা যুত্তোতি সম্মা অৰিপরীতং, অনৰসেসতো চ যুত্তো সহিতো. তথা হি ৰুত্তং ‘‘অনূনা’’তি. সব্বো হি পাল়িঅত্থো অত্থপদঅত্থনযেহি অনৰসেসতো সঙ্গহিতো. তেনাহ ‘‘সব্বস্স হী’’তিআদি.