১২. ওতরণহারৰিভঙ্গৰণ্ণনা

৪২. ইন্দ্রিযেহীতি করণে করণৰচনং ‘‘মগ্গেন গচ্ছতী’’তিআদীসু ৰিয, ‘‘ফরসুনা ছিন্দতী’’তি এৰমাদীসু ৰিয চ. ওতরণাতি অনুপ্পৰেসনা.

পঞ্ঞাক্খন্ধে সঙ্গণ্হনৰসেন সম্মাসঙ্কপ্পো ৰিযাতি যোজনা. অধিচিত্তঅনুযুত্তানং সদ্দহনুস্সহনুপট্ঠানসমাদহনেহি সদ্ধাদীসু উপকরোন্তেসু এৰ পঞ্ঞা দস্সনকিচ্চং সাধেতীতি দস্সেন্তো ‘‘সদ্ধা..পে… ৰুত্তানী’’তি আহ. নো চ ভৰঙ্গাতি তেসং সঙ্খারানং পৰত্তিকারণতাভাৰং দস্সেতি.

৪৩. তথা ৰুত্তোতি ‘‘নিস্সযো’’তি ৰুত্তো. চেতনাসীসেন তণ্হং এৰ ৰদতি চেতনাসহচরণতো.

রত্তস্সাতি মগ্গেন অসমুচ্ছিন্নরাগস্স. যেন পুগ্গলো ‘‘রত্তো’’তি ৰুচ্চতি, তস্স রাগস্স সম্বন্ধিনী সুখা ৰেদনা ৰুত্তা তত্থ তস্স অনুসযনতো. তেনাহ ‘‘সুখায…পে… ৰুত্ত’’ন্তি. এস নযো সেসেসুপি. তেনাহ ‘‘তথা’’তিআদি.

তানি এৰ ইন্দ্রিযানীতি সুখসোমনস্সুপেক্খিন্দ্রিযানি. ‘‘সঙ্খারপরিযাপন্নানী’’তি ৰচনং সন্ধাযাহ ‘‘ইধ ৰেদনাসীসেন চেতনা ৰুত্তা’’তি. ন হি ৰেদনা সঙ্খারক্খন্ধপরিযাপন্না হোতি. তণ্হায, দিট্ঠিযাতি চ উপযোগে করণৰচনন্তি দস্সেন্তো ‘‘তণ্হাযা’’তিআদিমাহ. ইদানি উপযোগৰসেনেৰ ‘‘তণ্হাযা’’তিআদীনং অত্থং দস্সেতুং ‘‘যথা ৰা’’তিআদিমাহ. তত্থ সেসধম্মানন্তি তণ্হাৰজ্জিতঅৰিসিট্ঠধম্মানং. তণ্হায নিস্সযভাৰেতি যদা তণ্হা তেসং নিস্সযো হোতি.

তণ্হায সেসধম্মানং পচ্চযভাৰেতি যদা সেসধম্মা তণ্হাপচ্চযা হোন্তি. ‘‘করজকাযসন্নিস্সিতা’’তি ইমিনা ৰেদনাদিক্খন্ধত্তযনিস্সিতাপি গহিতা কাযপ্পস্সদ্ধিভাৰতো. কারণভাৰন্তি পরম্পরহেতুভাৰং. তণ্হাদিট্ঠিউপযেনাতি দিট্ঠিউপযেন চ দিট্ঠিসহগততণ্হাউপযেন চ.

‘‘আগতীতি ইধাগতি, গতীতি পেচ্চভৰো’’তি পদদ্ৰযেন ৰুত্তমেৰত্থং পাকটতরং কাতুং পাল়িযং ‘‘আগতিগতীপি ন ভৰন্তী’’তি ৰুত্তং. ইধ হুরন্তি দ্ৰারারম্মণধম্মা দস্সিতা আসন্নদূরভাৰেহি দ্ৰারারম্মণেহি ৰিনিৰত্তেত্ৰা গহিতত্তা. ইধ দ্ৰারপ্পৰত্তধম্মা ‘‘উভযমন্তরেনা’’তি পদস্স অত্থভাৰেন ৰুত্তা. চতুব্যূহহারে পন অনিন্দ্রিযবদ্ধরূপধম্মা তথা ৰুত্তা. কারণভূতেন অনন্তরপচ্চযভূতেন, উপনিস্সযপচ্চযভূতেন চ. যে ধম্মা উপাদায ‘‘অত্তা’’তি সমঞ্ঞা, তেসং ৰিঞ্ঞাণাদিধম্মানং অভাৰেন অনুপ্পাদধম্মতং আপাদিতত্তাতি অত্থো. ‘‘অনিস্সিতস্স চলিতং নত্থী’’তিআদিনা পটিলোমতো পচ্চযভাৰো দস্সিতোতি দস্সেন্তো পাল়িযং ‘‘এসেৰন্তো দুক্খস্সাতি পটিচ্চসমুপ্পাদো’’তি ৰত্ৰা ননু ‘‘অৰিজ্জাপচ্চযা সঙ্খারা’’তিআদিকো পটিচ্চসমুপ্পাদোতি চোদনং সন্ধায যথাৰুত্তস্স পটিচ্চসমুপ্পাদভাৰং দস্সেতুং ‘‘সো দুৰিধো’’তিআদিনা লোকিযলোকুত্তরৰসেন পটিচ্চসমুপ্পাদো ৰিভত্তো. তদত্থতাযাতি ৰীতরাগৰিমুত্তিঅত্থতায. তব্ভাৰন্তি লোকুত্তরপটিচ্চসমুপ্পাদভাৰং.

ওতরণহারৰিভঙ্গৰণ্ণনা নিট্ঠিতা.