৬. ৰত্তাদিকণ্ডনিদ্দেসো

৯৬. উপজ্ঝাচরিযৰত্তঞ্চ, গমিকাগন্তুকম্পি চ;

সেনাসনাদিৰত্তঞ্চ, কাতব্বং পিযসীলিনা.

৯৭. হত্থপাসে ঠিতো কিঞ্চি, গহিতব্বং দদে তিধা;

গহেতুকামো গণ্হেয্য, দ্ৰিধাযং সম্পটিগ্গহো.

৯৮. সঙ্ঘাটিমুত্তরাসঙ্গং, তথা অন্তরৰাসকং;

‘‘এতং ইমং অধিট্ঠামি’’, তথা ‘‘পচ্চুদ্ধরামি’’তি.

৯৯. ‘‘ইমং ইমানি এতানি, এতম্পি চীৰর’’ন্তি ৰা;

‘‘পরিক্খারচোল়ানী’’তি, তথা ‘‘পচ্চুদ্ধরামি’’তি.

১০০. ‘‘এতং ইমং অধিট্ঠামি, পত্তং পচ্চুদ্ধরামি’’তি;

এৰং পচ্চুদ্ধরেধিট্ঠে, চীৰরাদিং যথাৰিধি.

১০১. সঞ্চরিত্তং ৰিনা সেসা, সচিত্তা গরুকন্তিমা;

অচ্ছিন্নং পরিণতং হিত্ৰা, নিস্সগ্গিযমচিত্তকং.

১০২. পদসোধম্মং দুৰে সেয্যা, ইত্থিযা ধম্মদেসনা;

দুৰে সেনাসনানীপি, সিব্বনং চীৰরস্সপি.

১০৩. পৰারিতং সুরাপানং, পঞ্চসন্নিধিআদিকং;

জোতিনুজ্জালনঞ্চেৰ, কপ্পবিন্দুমনাদিকং;

গামপ্পৰেসনন্তেতে, পাচিত্তীসু অচিত্তকা.

১০৪. পকিণ্ণকেসু উদ্দিস্স-কতং হিত্ৰাঞ্ঞমংসকং;

একত্থরণপাৰুরণং, একমঞ্চে তুৰট্টনং;

একতো ভুঞ্জনঞ্চাপি, নচ্চগীতাদিসত্তপি.

১০৫. অকাযবন্ধনঞ্চাপি, পত্তহত্থকৰাটকং;

অচিত্তকমিদং সব্বং, সেসমেত্থ সচিত্তকং.

১০৬. ৰীতিক্কমনচিত্তেন, সচিত্তকমচিত্তকং;

পঞ্ঞত্তিজাননেনাপি, ৰদন্তাচরিযা তথা.

১০৭. পুব্বকরণাদিকং কত্ৰা, উপোসথপ্পৰারণং;

নৰধা দীপিতং সব্বং, কাতব্বং পিযসীলিনা.

১০৮. সম্মজ্জনী পদীপো চ, উদকং আসনেন চ;

উপোসথস্স এতানি, পুব্বকরণন্তি ৰুচ্চতি.

১০৯. ছন্দপারিসুদ্ধিউতুক্খানং, ভিক্খুগণনা চ ওৰাদো;

উপোসথস্স এতানি, পুব্বকিচ্চন্তি ৰুচ্চতি.

১১০. উপোসথো যাৰতিকা চ ভিক্খূ কম্মপ্পত্তা,

সভাগাপত্তিযো চ ন ৰিজ্জন্তি;

ৰজ্জনীযা চ পুগ্গলা তস্মিং ন হোন্তি,

পত্তকল্লন্তি ৰুচ্চতি.

১১১. পুব্বকরণপুব্বকিচ্চানি সমাপেত্ৰা দেসিতাপত্তিকস্স সমগ্গস্স ভিক্খুসঙ্ঘস্স অনুমতিযা পাতিমোক্খং উদ্দিসিতুং আরাধনং করোম.

১১২. পারিসুদ্ধিঅধিট্ঠান-সুত্তুদ্দেসৰসা তিধা;

গণপুগ্গলসঙ্ঘা চ, তং করেয্যুং যথাক্কমং.

১১৩. চাতুদ্দসো পন্নরসো, সামগ্গী দিনতো তিধা;

দিনপুগ্গলকত্তব্বা-কারতো তে নৰেরিতা.

১১৪. তযো তযোতি কত্ৰান, দিনপুগ্গলভেদতো;

তেৰাচীদ্ৰেকৰাচীতি, নৰ ৰুত্তা পৰারণা.

১১৫. কত্তিকন্তিমপক্খম্হা, হেমং ফগ্গুনপুণ্ণমা;

তস্স অন্তিমপক্খম্হা, গিম্হং আসাল়্হিপুণ্ণমা;

ৰস্সকালং ততো সেসং, চতুৰীসতুপোসথা.

১১৬. চাতুদ্দসা ছ এতেসু, পক্খা ততিযসত্তমা;

ঞেয্যা পন্নরসা সেসা, অট্ঠারস উপোসথা.

১১৭. ‘‘ছন্দং দম্মি, ছন্দং মে হর, ছন্দং মে আরোচেহী’’তি ছন্দং দাতব্বং.

১১৮. ‘‘পারিসুদ্ধিং দম্মি, পারিসুদ্ধিং মে হর, পারিসুদ্ধিং মে আরোচেহী’’তি পারিসুদ্ধি দাতব্বা.

১১৯. ‘‘পৰারণং দম্মি, পৰারণং মে হর, পৰারণং মে আরোচেহি, মমত্থায পৰারেহী’’তি পৰারণা দাতব্বা.

১২০. আপত্তিদেসকেন ‘‘অহং, ভন্তে, সম্বহুলা নানাৰত্থুকা আপত্তিযো আপজ্জিং, তা তুম্হমূলে পটিদেসেমী’’তি ৰত্ৰা পটিগ্গণ্হন্তেন ‘‘পস্সসি, আৰুসো, তা আপত্তিযো’’তি ৰুত্তে ‘‘আম, ভন্তে, পস্সামী’’তি ৰত্ৰা পুন পটিগ্গণ্হন্তেন ‘‘আযতিং, আৰুসো, সংৰরেয্যাসী’’তি ৰুত্তে ‘‘সাধু, সুট্ঠু, ভন্তে সংৰরিস্সামী’’তি তিক্খত্তুং ৰত্ৰা দেসেতব্বং.

১২১. ৰেমতিং আরোচেন্তেন ‘‘অহং, ভন্তে, সম্বহুলাসু নানাৰত্থুকাসু আপত্তীসু ৰেমতিকো, যদা নিব্বেমতিকো ভৰিস্সামি, তদা তা আপত্তিযো পটিকরিস্সামী’’তি তিক্খত্তুং ৰত্ৰা আরোচেতব্বং.

১২২. ‘‘অজ্জ মে উপোসথো ‘পন্নরসো, চাতুদ্দসো’তি ৰা অধিট্ঠামী’’তি তিক্খত্তুং ৰত্ৰা পুগ্গলেন অধিট্ঠানুপোসথো কাতব্বো.

১২৩. দ্ৰীসু পন থেরেন ‘‘পরিসুদ্ধো অহং আৰুসো, ‘পরিসুদ্ধো’তি মং ধারেহী’’তি তিক্খত্তুং ৰত্তব্বং. নৰকেনপি তথেৰ ৰত্তব্বং. ‘‘ভন্তে, ধারেথা’’তি ৰচনং ৰিসেসো.

১২৪. তীসু পন ‘‘সুণন্তু মে আযস্মন্তা, অজ্জুপোসথো পন্নরসো, যদাযস্মন্তানং পত্তকল্লং, মযং অঞ্ঞমঞ্ঞং পারিসুদ্ধিউপোসথং করেয্যামা’’তি ঞত্তিং ঠপেত্ৰা পটিপাটিযা ৰুত্তনযেন পারিসুদ্ধিউপোসথো কাতব্বো.

১২৫. ‘‘অজ্জ মে পৰারণা ‘চাতুদ্দসী, পন্নরসী’তি ৰা অধিট্ঠামী’’তি তিক্খত্তুং ৰত্ৰা একেন পৰারেতব্বং.

১২৬. দ্ৰীসু পন থেরেন ‘‘অহং, আৰুসো, আযস্মন্তং পৰারেমি দিট্ঠেন ৰা সুতেন ৰা পরিসঙ্কায ৰা, ৰদতু মং আযস্মা অনুকম্পং উপাদায, পস্সন্তো পটিকরিস্সামী’’তি তিক্খত্তুং ৰত্ৰা পৰারেতব্বং. নৰকেনাপি তথেৰ ৰত্তব্বং. ‘‘ভন্তে’’তি ৰচনং ৰিসেসো.

১২৭. তীসু ৰা চতূসু ৰা পন ‘‘সুণন্তু মে আযস্মন্তা, অজ্জ পৰারণা পন্নরসী, যদাযস্মন্তানং পত্তকল্লং, মযং অঞ্ঞমঞ্ঞং পৰারেয্যামা’’তি ঞত্তিং ঠপেত্ৰা থেরেন ‘‘অহং, আৰুসো, আযস্মন্তে পৰারেমি দিট্ঠেন ৰা সুতেন ৰা পরিসঙ্কায ৰা, ৰদন্তু মং আযস্মন্তা অনুকম্পং উপাদায, পস্সন্তো পটিকরিস্সামী’’তি তিক্খত্তুং ৰত্ৰা পৰারেতব্বং. নৰকেহিপি তথেৰ পটিপাটিযা পৰারেতব্বং. ‘‘ভন্তে’’তিৰচনং ৰিসেসো.

১২৮. চতূহি অধিকেসু পন ‘‘সুণাতু মে আৰুসো সঙ্ঘো, অজ্জ পৰারণা পন্নরসী, যদি সঙ্ঘস্স পত্তকল্লং, সঙ্ঘো পৰারেয্যা’’তি ঞত্তিং ঠপেত্ৰা ৰুড্ঢতরেন ‘‘সঙ্ঘং, আৰুসো, পৰারেমি দিট্ঠেন ৰা সুতেন ৰা পরিসঙ্কায ৰা, ৰদন্তু মং আযস্মন্তো অনুকম্পং উপাদায, পস্সন্তো পটিকরিস্সামী’’তি তিক্খত্তুং ৰত্ৰা পৰারেতব্বং. নৰকেহিপি তথেৰ পটিপাটিযা ‘‘সঙ্ঘং, ভন্তে, পৰারেমি দিট্ঠেন ৰা সুতেন ৰা পরিসঙ্কায ৰা, ৰদন্তু মং আযস্মন্তো অনুকম্পং উপাদায, পস্সন্তো পটিকরিস্সামী’’তি তিক্খত্তুং ৰত্ৰা পৰারেতব্বং.

মূলসিক্খা নিট্ঠিতা.

নমো তস্স ভগৰতো অরহতো সম্মাসম্বুদ্ধস্স