৫. পকিণ্ণকনিদ্দেসো

৫৩. সঙ্ঘিকং গরুভণ্ডং যো, দেতি অঞ্ঞস্স ইস্সরো;

থুল্লচ্চযং যথাৰত্থুং, থেয্যা পারাজিকাদিপি.

৫৪. কুসাদিমযচীরানি, কম্বলং কেসৰালজং;

সমযং ৰিনা ধারযতো, লূকপক্খাজিনক্খিপং.

৫৫. সত্থকম্মে ৰত্থিকম্মে, সং নিমিত্তঞ্চ ছিন্দতো;

থুল্লচ্চযং মনুস্সানং, মংসাদিভোজনেপি ৰা.

৫৬. কদলেরকক্কদুস্সানি, পোত্থকং সব্বনীলকং;

সব্বপীতাদিকঞ্চাপি, ধারযন্তস্স দুক্কটং.

৫৭. হত্থিস্সুরগসোণানং, সীহব্যগ্ঘচ্ছদীপিনং;

তরচ্ছস্স চ মংসাদিং, উদ্দিস্সকতকম্পি চ.

৫৮. অনাপুচ্ছিতমংসঞ্চ, ভুঞ্জতো দুক্কটং সিযা;

যাতানুপুব্বং হিত্ৰান, দকতিত্থাদিকং ৰজে.

৫৯. সহসা ৰুব্ভজিত্ৰান, পৰিসে নিক্খমেয্য ৰা;

ৰচ্চপস্সাৰকুটিকং, ৰিনা উক্কাসিকং ৰিসে.

৬০. নিত্থুনন্তো করে ৰচ্চং, দন্তকট্ঠঞ্চ খাদযং;

ৰচ্চপস্সাৰদোণীনং, বহি ৰচ্চাদিকং করে.

৬১. খরেন চাৰলেখেয্য, কট্ঠং পাতেয্য কূপকে;

ঊহতঞ্চ ন ধোৰেয্য, উক্লাপঞ্চ ন সোধযে.

৬২. দককিচ্চং করোন্তস্স, কত্ৰা ‘‘চপুচপূ’’তি চ;

অনজ্ঝিট্ঠোৰ থেরেন, পাতিমোক্খম্পি উদ্দিসে.

৬৩. অনাপুচ্ছায পঞ্হস্স, কথনে ৰিস্সজ্জনেপি চ;

সজ্ঝাযকরণে দীপ-জালনে ৰিজ্ঝাপনেপি চ.

৬৪. ৰাতপানকৰাটানি, ৰিৰরেয্য থকেয্য ৰা;

ৰন্দনাদিং করে নগ্গো, গমনং ভোজনাদিকং.

৬৫. পরিকম্মং করে কারে, তিপটিচ্ছন্নকং ৰিনা;

কাযং নহাযং ঘংসেয্য, কুট্টে থম্ভে তরুম্হি ৰা.

৬৬. কুরুৰিন্দকসুত্তেন, অঞ্ঞমঞ্ঞস্স কাযতো;

অগিলানো বহারামে, চরেয্য সউপাহনো.

৬৭. উপাহনং যো ধারেতি, সব্বনীলাদিকম্পি চ;

নিমিত্তং ইত্থিযা রত্তো, মুখং ৰা ভিক্খদাযিযা.

৬৮. উজ্ঝানসঞ্ঞী অঞ্ঞস্স, পত্তং ৰা অত্তনো মুখং;

আদাসাদিম্হি পস্সেয্য, উচ্চাসনমহাসনে.

৬৯. নিসজ্জাদিং করোন্তস্স, দুক্কটং ৰন্দনেপি চ;

উক্খিত্তানুপসম্পন্ন-নানাসংৰাসকাদিনং.

৭০. একতো পণ্ডকিত্থীহি, উভতোব্যঞ্জনেন ৰা;

দীঘাসনে নিসীদেয্য, অদীঘে আসনে পন.

৭১. অসমানাসনিকেন, মঞ্চপীঠে সযেয্য ৰা;

কুলসঙ্গহত্থং দদতো, ফলপুপ্ফাদিকম্পি চ.

৭২. গন্থিমাদিং করে কারে, জিনৰারিতপচ্চযে;

পরিভুঞ্জেয্য অব্যত্তো, অনিস্সায ৰসেয্য ৰা.

৭৩. অনুঞ্ঞাতেহি অঞ্ঞস্স, ভেসজ্জং ৰা করে ৰদে;

করে সাপত্তিকো ভিক্খু, উপোসথপ্পৰারণং.

৭৪. দ্ৰারবন্ধাদিকে ঠানে, পরিৰত্তকৰাটকং;

অপিধায ৰিনাভোগং, নিযোগং ৰা সযে দিৰা.

৭৫. ধঞ্ঞিত্থিরূপরতনং, আৰুধিত্থিপসাধনং;

তূরিযভণ্ডং ফলং রুক্খে, পুব্বণ্ণাদিঞ্চ আমসে.

৭৬. সসিত্থোদকতেলেহি, ফণহত্থফণেহি ৰা;

কেসমোসণ্ঠনেকস্মিং, ভাজনে ভোজনেপি চ.

৭৭. একত্থরণপাৰুরণা, সযেয্যুং দ্ৰেকমঞ্চকে;

দন্তকট্ঠঞ্চ খাদেয্য, অধিকূনং পমাণতো.

৭৮. যোজেতি ৰা যোজাপেতি, নচ্চং গীতঞ্চ ৰাদিতং;

দস্সনং সৰনং তেসং, করোন্তস্স চ দুক্কটং.

৭৯. ৰীহাদিরোপিমে চাপি, বহিপাকারকুট্টকে;

ৰচ্চাদিছড্ডনাদিম্হি, দীঘকেসাদিধারণে.

৮০. নখমট্ঠকরণাদিম্হি, সম্বাধে লোমহারণে;

পরিকম্মকতং ভূমিং, অক্কমে সউপাহনো.

৮১. অধোতঅল্লপাদেহি, সঙ্ঘিকং মঞ্চপীঠকং;

পরিকম্মকতং ভিত্তিং, আমসন্তস্স দুক্কটং.

৮২. সঙ্ঘাটিযাপি পল্লত্থে, দুপ্পরিভুঞ্জেয্য চীৰরং;

অকাযবন্ধনো গামং, ৰজে কত্ৰান ৰচ্চকং.

৮৩. নাচমেয্য দকে সন্তে, সমাদেয্য অকপ্পিযে;

দেসনারোচনাদিম্হি, সভাগাপত্তিযাপি চ.

৮৪. ন ৰসে ৰস্সং ৰিসংৰাদে, সুদ্ধচিত্তে পটিস্সৰং;

ৰস্সং ৰসিত্ৰা গমনে, অননুঞ্ঞাতকিচ্চতো.

৮৫. ৰিনাপদং তরুস্সুদ্ধং, পোরিসম্হাভিরূহণে;

অপরিস্সাৰনোদ্ধানং, ৰজে তং যাচতো ন দে.

৮৬. অত্তনো ঘাতনে ইত্থি-রূপাদিং কারযেয্য ৰা;

হিত্ৰা মালাদিকং চিত্তং, জাতকাদিং সযং করে.

৮৭. ভুঞ্জন্তমুট্ঠপে তস্স, সালাদীসু নিসীদতো;

ৰুড্ঢানং পন ওকাসং, অদত্ৰা ৰাপি দুক্কটং.

৮৮. যানাদিমভিরূহেয্য, কল্লকো রতনত্তযং;

আরব্ভ ৰদে দৰঞ্ঞ-পরিসাযোপলালনে.

৮৯. কাযাদিং ৰিৰরিত্ৰান, ভিক্খুনীনং ন দস্সযে;

ৰাচে লোকাযতং পলিতং, গণ্হেয্য গণ্হাপেয্য ৰা.

৯০. যত্থ কত্থচি পেল়াযং, ভুঞ্জতো পত্তহত্থকো;

ৰাতপানকৰাটং ৰা, পণামে সোদকম্পি চ.

৯১. উণ্হেয্য পটিসামেয্য, অতিউণ্হেয্য ৰোদকং;

ঠপেয্য ভূমিযং পত্তং, অঙ্কে ৰা মঞ্চপীঠকে.

৯২. মিড্ঢন্তে পরিভণ্ডন্তে, পাদে ছত্তে ঠপেতি ৰা;

চলকাদিং ঠপে পত্তং, পত্তে ৰা হত্থধোৰনে.

৯৩. পত্তেন নীহরন্তস্স, উচ্ছিট্ঠমুদকম্পি চ;

অকপ্পিযম্পি পত্তং ৰা, পরিভুঞ্জেয্য দুক্কটং.

৯৪. ৰদে ‘‘জীৰা’’তি খিপিতে, ন সিক্খতি অনাদরো;

পরিমণ্ডলকাদিম্হি, সেখিযে দুক্কটং সিযা.

৯৫. যো ভণ্ডগারে পযুতোৰ ভণ্ডকং,

মাতূন পাচিত্তিযমস্স গোপযে;

দৰায হীনেনপি জাতিআদিনা,

ৰদেয্য দুব্ভাসিতমুত্তমম্পি যোতি.