৪. পাচিত্তিযনিদ্দেসো

৩০. সম্পজানমুসাৰাদে, পাচিত্তিযমুদীরিতং;

ভিক্খুঞ্চ ওমসন্তস্স, পেসুঞ্ঞহরণেপি চ.

৩১. ঠপেত্ৰা ভিক্খুনিং ভিক্খুং, অঞ্ঞেন পিটকত্তযং;

পদসোধম্মং ভণন্তস্স, পাচিত্তিযমুদীরিতং.

৩২. অনুপসম্পন্নেনেৰ, সযিত্ৰান তিরত্তিযং;

পাচিত্তি সহসেয্যায, চতুত্থত্থঙ্গতে পুন.

৩৩. ইত্থিযা একরত্তম্পি, সেয্যং কপ্পযতোপি ৰা;

দেসেন্তস্স ৰিনা ৰিঞ্ঞুং, ধম্মঞ্চ ছপ্পদুত্তরিং.

৩৪. দুট্ঠুল্লং ভিক্খুনো ৰজ্জং, ভিক্খুসম্মুতিযা ৰিনা;

অভিক্খুনো ৰদন্তস্স, পাচিত্তিযমুদীরিতং.

৩৫. খণেয্য ৰা খণাপেয্য, পথৰিঞ্চ অকপ্পিযং;

ভূতগামং ৰিকোপেয্য, তস্স পাচিত্তিযং সিযা.

৩৬. অজ্ঝোকাসে তু মঞ্চাদিং, কত্ৰা সন্থরণাদিকং;

সঙ্ঘিকং যাতি পাচিত্তি, অকত্ৰাপুচ্ছনাদিকং.

৩৭. সঙ্ঘিকাৰসথে সেয্যং, কত্ৰা সন্থরণাদিকং;

অকত্ৰাপুচ্ছনাদিং যো, যাতি পাচিত্তি তস্সপি.

৩৮. জানং সপ্পাণকং তোযং, পাচিত্তি পরিভুঞ্জতো;

অঞ্ঞাতিকা ভিক্খুনিযা, ঠপেত্ৰা পারিৰত্তকং.

৩৯. চীৰরং দেতি পাচিত্তি, চীৰরং সিব্বতোপি চ;

অতিরিত্তং অকারেত্ৰা, পৰারেত্ৰান ভুঞ্জতো.

৪০. ভিক্খুং আসাদনাপেক্খো, পৰারেতি পৰারিতং;

অনতিরিত্তেন ভুত্তে তু, পাচিত্তিযমুদীরিতং.

৪১. সন্নিধিভোজনং ভুঞ্জে, ৰিকালে যাৰকালিকং;

ভুঞ্জতো ৰাপি পাচিত্তি, অগিলানো পণীতকং.

৪২. ৰিঞ্ঞাপেত্ৰান ভুঞ্জেয্য, সপ্পিভত্তাদিকম্পি চ;

অপ্পটিগ্গহিতং ভুঞ্জে, দন্তকট্ঠোদকং ৰিনা.

৪৩. তিত্থিযস্স দদে কিঞ্চি, ভুঞ্জিতব্বং সহত্থতো;

নিসজ্জং ৰারহো কপ্পে, মাতুগামেন চেকতো.

৪৪. সুরামেরযপানেপি, পাচিত্তিযমুদীরিতং;

অঙ্গুলিপতোদকে চাপি, হসধম্মেপি চোদকে.

৪৫. অনাদরেপি পাচিত্তি, ভিক্খুং ভীসযতোপি ৰা;

ভযানকং কথং কত্ৰা, দস্সেত্ৰা ৰা ভযানকং.

৪৬. ঠপেত্ৰা পচ্চযং কিঞ্চি, অগিলানো জলেয্য ৰা;

জোতিং জলাপযেয্যাপি, তস্স পাচিত্তিযং সিযা.

৪৭. কপ্পবিন্দুমনাদায, নৰচীৰরভোগিনো;

হসাপেক্খস্স পাচিত্তি, ভিক্খুনো চীৰরাদিকং.

৪৮. অপনেত্ৰা নিধেন্তস্স, নিধাপেন্তস্স ৰা পন;

জানং পাণং মারেন্তস্স, তিরচ্ছানগতম্পি চ.

৪৯. ছাদেতুকামো ছাদেতি, দুট্ঠুল্লং ভিক্খুনোপি চ;

গামন্তরগতস্সাপি, সংৰিধাযিত্থিযা সহ.

৫০. ভিক্খুং পহরতো ৰাপি, তলসত্তিকমুগ্গিরে;

চোদেতি ৰা চোদাপেতি, গরুকামূলকেনপি.

৫১. কুক্কুচ্চুপ্পাদনে চাপি, ভণ্ডনত্থাযুপস্সুতিং;

সোতুং ভণ্ডনজাতানং, যাতি পাচিত্তিযং সিযা.

৫২. সঙ্ঘস্স লাভং পরিণামিতং তু,

নামেতি যো তং পরপুগ্গলস্স;

পুচ্ছং অকত্ৰাপি চ সন্তভিক্খুং,

পাচিত্তি গামস্স গতে ৰিকালেতি.